1 “ⵓⵛⵜ ⵅ ⵜⴻⵎⵎⵓⵔⵜ ⵏ ⵍⵃⴻⵙⵙ ⵏ ⵡⴰⴼⵔⵉⵡⴻⵏ, ⵜⴻⵏⵏⵉ ⵖⴰⵔ ⵓⵔⴻⵏⴷⴰⴷ ⵉⵖⴻⵥⵔⴰⵏ ⵏ ⵜⴻⵎⵎⵓⵔⵜ ⵏ ⴽⵓⵛ, 2 ⵜⴻⵏⵏⵉ ⵉⵙⵙⴻⴽⴽⴻⵏ ⵉⵎⵙⴻⴽⴽⴰⵏ ⵏⵏⴻⵙ ⵅ ⵍⴻⴱⵃⴰⵔ, ⴷⵉ ⵜⵖⴰⵔⵔⴰⴱⵓⵜⵉⵏ ⵏ ⵓⵖⴰⵏⵉⵎ ⵜⵉⵡⴰ ⵉ ⵡⴰⵎⴰⵏ. ⵓⵢⵓⵔⴻⵎ, ⴰ ⴽⴻⵏⵏⵉⵡ ⵉⵔⴻⵇⵇⴰⵙⴻⵏ ⵉⴼⵙⵓⵙⴻⵏ, ⵖⴰⵔ ⵉⵊⵊ ⵏ ⵍⴳⴻⵏⵙ ⵉⵥⵥⵓⴳⴳⴰⵔⵜⴻⵏ ⵓ ⵉⵜⵜⵡⴻⵙⵙⴳⴻⵏ ⵏ ⵜⴻⵍⵎⴻⵛⵜ, ⵖⴰⵔ ⵉⵊⵊ ⵏ ⵍⴳⴻⵏⵙ ⵏⵏⵉ ⵥⵉ ⴳⴳⵯⴻⴷⴻⵏ ⵥⴻⴳ ⵡⴰⵎⵉ ⵉⴵⴰ ⵓ ⵥⵉ ⵙⵙⴰ ⵜⵙⴰⵡⴻⵏⵜ, ⵖⴰⵔ ⵍⴳⴻⵏⵙ ⵏⵏⵉ ⵉⵜⵜⴰⵎⴰⵔⴰⵏ ⵍⴻⴱⴷⴰ ⵓ ⵉⵄⴻⴼⴼⴻⵙ, ⵡⴻⵏⵏⵉ ⵥⵉ ⵇⴻⴹⵄⴻⵏ ⵉⵖⴻⵥⵔⴰⵏ ⵜⴰⵎⵎⵓⵔⵜ ⵏⵏⴻⵙ. 3 ⴰ ⴽⴻⵏⵏⵉⵡ ⵎⴰⵔⵔⴰ ⵉⵎⴻⵥⴷⴰⵖ ⵏ ⴷⴷⵓⵏⴻⵛⵜ ⴷ ⵢⴻⵏⵏⵉ ⵉⵥⴻⴷⴷⵖⴻⵏ ⴷⵉ ⵜⴻⵎⵎⵓⵔⵜ, ⵅⵎⵉ ⵉ ⵖⴰ ⵙⵙⴳⴻⵄⵄⴷⴻⵏ ⵜⴰⵄⴻⴵⴰⵏⵜ ⵅ ⵉⴷⵓⵔⴰⵔ, ⵅⴻⵏⵏⵉ ⴰⴷ ⵜ ⵜⵥⴰⵔⴻⵎ, ⵓ ⵅⵎⵉ ⵉ ⵖⴰ ⵚⵓⴹⴻⵏ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ, ⴰⴷ ⵜ ⵜⴻⵙⵍⴻⵎ!”

4 “ⵎⴰⵖⴰⵔ ⴰⵎⵎⵓ ⵉ ⴷ ⵖⴰⵔⵉ ⵉⵏⵏⴰ ⵙⵉⴷⵉ: ‘ⵏⴻⵛⵛ ⴰⴷ ⵃⴹⵉⵖ ⴷⵉ ⵍⵀⵓⴷⵏⴻⵜ ⵅ ⵍⵄⴰⵔⵛ ⵉⵏⵓ, ⴰⵎ ⵍⴻⵀⵎⵓ ⵢⴰⵔⴻⵇⵇⴻⵏ ⵖⴰⵔ ⵟⵟⵃⴰ ⵏ ⵓⵥⵉⵍ, ⴰⵎ ⵓⵙⴻⵢⵏⵓ ⵉⵛⵛⵓⵔⴻⵏ ⵙ ⵏⵏⴹⴰ ⵖⴰⵔ ⵍⴻⵀⵎⵓ ⵏ ⵚⵚⴰⴱⴻⵜ.’ 5 ⵎⴰⵖⴰⵔ ⵇⴱⴻⵍ ⵚⵚⴰⴱⴻⵜ, ⵅⵎⵉ ⵉ ⵖⴰ ⵉⴽⴻⵎⵎⴻⵍ ⵏⵏⵓⵡⵡⴰⵔ, ⵜⴻⴷⵡⴻⵍ ⵜⵏⴻⵡⵡⴰⵔⵜ ⴷ ⴰⴹⵉⵍ ⵉⵜⵜⵏⴻⵏⵏⴰ, ⴰⴷ ⵉⵥⴱⴰⵔ ⵏⴻⵜⵜⴰ ⵉⵥⴱⵉⵔⴻⵏ ⵙ ⵉⵊⴻⵇⵇⴰⴹⴻⵏ ⵏ ⵡⴻⵥⴱⴰⵔ, ⴰⴷ ⵉⴽⴽⴻⵙ ⴰⵔⴱⵉⴱⴻⵏ, ⴰⴷ ⵜⴻⵏ ⵉⵇⴹⵓ. 6 ⵏⵉⵜⵏⵉ ⵎⴰⵔⵔⴰ ⴰⴷ ⵜⵜⵡⴰⵊⵊⴻⵏ ⵉ ⵉⵊⴹⴰⴹ ⵉⵜⵜⴽⴻⵛⵛⴰⴹⴻⵏ ⵅ ⵉⴷⵓⵔⴰⵔ ⵓ ⵉ ⵍⴻⵡⵃⵓⵛ ⵏ ⵜⴻⵎⵎⵓⵔⵜ. ⴷⴻⴳ ⵓⵏⴻⴱⴷⵓ ⴰⴷ ⵅⴰⵙⴻⵏ ⴰⵔⵙⴻⵏ ⵉⵊⴹⴰⴹ ⵉⵜⵜⴽⴻⵛⵛⴰⴹⴻⵏ ⵓ ⴷⵉ ⵍⵎⴻⵛⵜⴰ ⴰⴷ ⵅⴰⵙⴻⵏ ⴰⵔⵙⴻⵏ ⵍⴻⵡⵃⵓⵛ ⵏ ⵍⴻⵅⵔⴰ. 7 ⴷⴻⴳ ⵡⵓⵙⵙⴰⵏ ⵏⵏⵉ ⴰⴷ ⵜᵉⵜⵜⵡⴰⵡⵉ ⵜⴰⵔⵥⴻⴼⵜ ⵉ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ⵉⵊⵊ ⵏ ⵍⴳⴻⵏⵙ ⵉⵥⵥⵓⴳⴳⴰⵔⵜⴻⵏ ⴷ ⵉⵜⵜⵡⴻⵙⵙⴳⴻⵏ ⵏ ⵜⴻⵍⵎⴻⵛⵜ, - ⵓ ⵎⴰⵏ ⴰⵢⴰ ⵥⴻⴳ ⵉⵊⵊ ⵏ ⵍⴳⴻⵏⵙ ⵉⵎⴻⴳⴳⵯⴻⴷ ⵥⵥⴰⵢⴻⵙ ⵥⴻⴳ ⵡⴰⵎⵉ ⵉⴵⴰ ⴷ ⵜⵙⴰⵡⴻⵏⵜ, ⵥⴻⴳ ⵉⵊⵊ ⵏ ⵍⴳⴻⵏⵙ ⵏⵏⵉ ⵉⵜⵜⴰⵎⴰⵔⴻⵏ ⵍⴻⴱⴷⴰ ⵓ ⵉⵄⴻⴼⴼⴻⵙ, ⵏⵏⵉ ⵥⵉ ⵇⴻⴹⵄⴻⵏ ⵉⵖⴻⵥⵔⴰⵏ ⵜⴰⵎⵎⵓⵔⵜ ⵏⵏⴻⵙ - , ⵖⴰⵔ ⵡⴻⵎⵛⴰⵏ ⵏ ⵢⵉⵙⴻⵎ ⵏ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ⵖⴰⵔ ⵡⴻⴷⵔⴰⵔ ⵏ ⵚⵉⵀⵢⵓⵏ.”