ⴰⵢⵓⴱ ⵉⵙⵙⵉⵡⴻⵍ ⵅ ⵍⴻⵎⵃⴰⵢⴻⵎ ⵏⵏⴻⵙ ⵏ ⵢⵉⴹⴰ
30
1 ⵍⴻⵅⵅⵓ ⵎⴰⵛⴰ ⵜⵓⵖⴰ ⴹⴻⵃⵃⵛⴻⵏ ⵅⴰⴼⵉ ⵉⵃⵓⴷⵔⵉⵢⵢⴻⵏ ⵏⵏⵉ ⵉⴵⴰⵏ ⴷ ⵉⵎⴻⵥⵢⴰⵏⴻⵏ ⵅⴰⴼⵉ ⴷⴻⴳ ⵡⵓⵙⵙⴰⵏ, ⵉⵏⵏⵉ ⴱⴰⴱⴰⵜⵙⴻⵏ ⵡⴰⵔ ⵖⴰⵔⵉ ⵙⴻⴽⴽⵡⵉⵏ
ⵎⴰⵃⴻⵏⴷ ⴰⴷ ⵜⴻⵏ ⴳⴳⴻⵖ ⵖⴰⵔ ⵢⵉⵟⴰⵏ ⵉ ⵉⴵⴰⵏ ⵅ ⵡⵓⴵⵉ ⵉⵏⵓ.
2 ⵎⵉⵏ ⵖⴰ ⵢⴻⴳⴳ ⵅⴻⵏⵏⵉ ⵙ ⵊⵊⴻⵀⴷ ⵏ ⵉⴼⴰⵙⵙⴻⵏ ⵏⵙⴻⵏ?
ⴰⵇⴰ ⵉⴼⵏⴰ ⵊⵊⴻⵀⴷ ⵏⵙⴻⵏ ⵥⵉ ⵙⵙⵉⴱⴱⴻⵜ ⵏ ⵜⴻⵡⵙⴰⵔ.
3 ⵣⵉ ⵍⵇⵉⴵⴻⵜ ⵓ ⵥⵉ ⵍⴰⵥ ⴷⴻⵡⵍⴻⵏ ⵉⵙⵔⵉⵡⴻⵏ,
ⵜⵜⵎⴻⵖⵥⴰⵥⴻⵏ ⴷⵉ ⵍⵡⴰⵟⴰ ⵢⵓⵥⵖⴻⵏ
ⴷⵉ ⵜⵓⴱⴱⴰⵔⵛⴻⵏⵜ ⵜⴻⵛⵛⵓⵔ ⵙ ⵓⵔⴻⴷⴷⴻⴵ ⴷ ⵓⵔⴻⴱⴱⴻⵊ.
4 ⵏⵉⵜⵏⵉ ⵍⴻⵇⵇⴹⴻⵏ ⵍⴻⴱⵥⴰⵔ ⴰⵎⴻⴵⴰⵃ ⵊⴰⵔ ⵛⴱⴰⵔⵇ,
ⵉⵥⴻⵡⵔⴰⵏ ⵏ ⵓⵥⴻⵥⵥⵓ ⴷ ⴰⵖⵔⵓⵎ ⵏⵙⴻⵏ.
5 ⵓⵥⵥⵍⴻⵏ ⵅⴰⵙⴻⵏ ⵥⵉ ⵜⵎⵓⵏⴻⵜ ⵏ ⵉⵡⴷⴰⵏ,
ⴽⴽⵡⴰⵔⴻⵏ ⵜⴻⵏ ⴰⵎ ⵉⵅⴻⵡⵡⴰⵏⴻⵏ,
6 ⵃⵉⵎⴰ ⴰⴷ ⵥⴻⴷⵖⴻⵏ ⴷⵉ ⵜⴻⵖⵥⵓⵔⵉⵏ ⵉⵙⵙⴰⴳⴳⵯⴰⴷⴻⵏ,
ⴷⴻⴳ ⵉⴼⵔⴰⵏ ⵏ ⵓⵛⴰⵍ ⵓ ⴷⵉ ⵍⴻⵊⵔⵓⴼ.
7 ⵙⵖⵓⵢⵢⵓⵏ ⵊⴰⵔ ⵛⴱⴰⵔⵇ,
ⵙⴰⴷⵓ ⵜⵉⵥⴻⴳⴳⵡⴰⵔⵉⵏ ⵙⵙⵎⵓⵏⴰⵏ.
8 ⵜⴰⵔⵡⴰ ⵏ ⵉⴱⵓⵀⴰⵍⵉⵢⵢⴻⵏ ⴷ ⵜⴰⵔⵡⴰ ⴱⵍⴰ ⵉⵙⴻⵎ,
ⵉⵏⵏⵉ ⵓⵥⵥⵍⴻⵏ ⵅⴰⵙⴻⵏ ⵥⵉ ⵜⴻⵎⵎⵓⵔⵜ ⵙ ⵓⵥⴻⴵⴰⴹ.
9 ⵍⴻⵅⵅⵓ ⵎⴰⵛⴰ ⴰⵇⴰ ⴰⵢⵉ ⴷⴻⴳ ⵉⵥⵍⵉ ⵏⵙⴻⵏ ⵏ ⵜⵥⴰⵡⴰⵔⵜ,
ⴷⴻⵡⵍⴻⵖ ⴰⵙⴻⵏ ⵉ ⵜⴻⵅⴱⴰⵔⵊⵉⵜ. □ ■
10 ⵛⴰⵔⵔⵀⴻⵏ ⴰⵢⵉ, ⵜⵜⴰⴳⴳⵯⴰⵊⴻⵏ ⵅⴰⴼⵉ,
ⵡⴰⵔ ⵜⵜⵙⴻⴹⵃⵉⵏ ⵛⴰ ⴰⴷ ⵙⵙⵓⵙⴼⴻⵏ ⵅ ⵓⵖⴻⵎⴱⵓⴱ ⵉⵏⵓ. ■
11 ⵎⴰⵖⴰⵔ ⵏⴻⵜⵜⴰ ⵉⵙⵙⴻⴼⵙⵉ ⴰⵙⵖⵓⵏ ⵏ ⵜⵇⵉⴹⵓⵏⵜ ⵉⵏⵓ ⵓⵛⴰ ⵉⵙⵙⴻⵀⵡⴰ ⴰⵢⵉ.
ⵏⵉⵜⵏⵉ ⵏⴹⴰⵔⴻⵏ ⵙⵙⵔⵉⵎⴻⵜ ⵏⵙⴻⵏ ⵥⵥⴰⵜⵉ. □
12 ⵖⴰⵔ ⵓⵖⴻⵥⴷⵉⵙ ⴰⴼⵓⵙⵉ ⵉⵏⵓ ⴽⴽⴰⵔⴻⵏ-ⴷⴷ ⵅⴰⴼⵉ ⵉⵖⴻⴷⴷⵉⵡⴻⵏ ⵏ ⵜⴰⵔⵔⴰⵡⵜ,
ⵄⴰⵔⵔⵏⴻⵏ ⵉⴹⴰⵔⴻⵏ ⵉⵏⵓ,
ⵙⵙⴳⴻⵄⵄⴰⴷⴻⵏ ⵅⴰⴼⵉ ⵉⵎⴻⵙⵔⴰⵇ ⵏ ⴰⵔⵥⵉⵢⵢⴻⵜ ⵏⵙⴻⵏ.
13 ⴰⴱⵔⵉⴷ ⵉⵏⵓ ⴰⵔⵥⵉⵏ ⵜ,
ⴰⵔⴻⵏⵏⵢⴻⵏ ⵜⴰⵎⴰⵔⴰ ⵅ ⵜⴰⵎⴰⵔⴰ ⵉⵏⵓ
ⵉⵏⵏⵉ ⵙⵉⵎⴰⵏⵜ ⵏⵙⴻⵏ ⵡⴰⵔ ⵉⴵⵉ ⵡⵉ ⴷ ⴰⵙⴻⵏ ⵖⴰ ⵉⵡⵛⴻⵏ ⴰⴼⵓⵙ.
14 ⴰⵅⵎⵉ ⴷⴷ-ⵜⵜⴰⵙⴻⵏ ⵥⴻⴳ ⵉⵊⵊ ⵏ ⵓⵏⵓⵇⵇⵉⴱ ⴷ ⵎⵉⵔⵉⵡ,
ⵜⵜⴰⴽⴽⵡⴰⴹⴻⵏ ⴰⵎ ⵍⴻⵎⵡⴰⵊ ⵢⴰⵔⴻⴷⴷⴵⴻⵏ.
15 ⵜⵜⵡⴰⴽⴻⴱⴱⴻⵏ-ⴷⴷ ⵅⴰⴼⵉ ⵉⵏⴻⵅⵍⵉⵄⴻⵏ,
ⴰⵎ ⵓⵙⴻⵎⵎⵉⴹ ⴹⴻⴼⴼⴰⵔⴻⵏ ⵏⵉⵜⵏⵉ ⵛⵛⴰⵏ ⵉⵏⵓ,
ⵉⴹⵡⴰ ⵥⵥⵀⴰⵔ ⵉⵏⵓ ⴰⵎ ⵉⵊⵊ ⵏ ⵓⵙⴻⵢⵏⵓ.
16 ⵙ ⵓⵢⴰ ⵉⴼⴻⵙⵙⵉ ⵍⴻⵅⵅⵓ ⵍⴻⵄⵎⴰⵔ ⵉⵏⵓ ⴷⴰⵢⵉ,
ⵓⵙⵙⴰⵏ ⵏ ⵍⴻⵖⴱⴻⵏ ⵎⴻⵏⵏⵄⴻⵏ ⴰⵢⵉ.
17 ⴷⵉ ⴵⵉⵍⴻⵜ ⵉⵙⵙⵏⵓⵇⵇⵓⴱ ⴰⵢⵉ ⵉⵅⵙⴰⵏ ⵉⵏⵓ ⵉ ⴷⴰⵢⵉ ⵉⴵⴰⵏ,
ⵍⴻⵃⵔⵉⵇ ⵉ ⴷ ⴰⵢⵉ ⵉⵜⵜⵖⴻⵥⵥⴰⵏ ⵡⴰⵔ ⵢⴰⵔⴻⵙⵙⵉ.
18 ⵉⵜⵜⵡⴰⴱⴻⴷⴷⴻⵍ ⵡⴰⵔⵔⵓⴷ ⵉⵏⵓ ⵙ ⵊⵊⴻⵀⴷ ⴰⵎⴻⵇⵇⵔⴰⵏ
ⴰⵍⴰⵎⵉ ⵡⴰⵔ ⵅⴰⴼⵉ ⵜⵜⴻⵄⵇⵉⵍⴻⵏ ⵄⴰⴷ,
ⵓ ⵏⴻⵜⵜⴰ ⵉⵛⴰⵔⴼ ⴰⵢⵉ ⴰⵎ ⵜⵎⴰ ⵉ ⵉⵏⵏⴹⴻⵏ
ⵉ ⵡⴰⵔⵥⴻⵎ ⵏ ⵢⵉⵔⵉ ⴷⴻⴳ ⵡⴰⵔⵔⵓⴹ.
19 ⵉⵏⴹⴰⵔ ⴰⵢⵉ ⴷⴻⴳ ⵓⴱⴻⴵⴰⵄ,
ⴷⴻⵡⵍⴻⵖ ⴰⵎ ⵓⵛⴰⵍ ⴷ ⵢⵉⵖⵖⴻⴹ.
20 ⵙⵖⵓⵢⵢⵓⵖ-ⴷⴷ ⵖⴰⵔⴻⴽ, ⵎⴰⵛⴰ ⵛⴻⴽ ⵡⴰⵔ ⵅⴰⴼⵉ ⵜᵉⵜⵜⴰⵔⵔⵉⴷ,
ⵏⴻⵛⵛ ⴱⴻⴷⴷⴻⵖ ⴷⴰ, ⵎⴰⵛⴰ ⵡⴰⵔ ⴷ ⴰⵢⵉ ⵜⵃⴻⵟⵟⵉⴷ.
21 ⵛⴻⴽ ⵜⴷⴻⵡⵍⴻⴷ ⴰⵢⵉ ⴰⵎ ⵉⵊⵊ ⵏ ⴱⵓ-ⵍⴻⵅⵛⵓⵏⴻⵜ,
ⵜᵉⵜⵜⴷⴰⵔⵔⴰⵛⴻⴷ ⵅⴰⴼⵉ ⵙ ⵓⴼⵓⵙ ⵏⵏⴻⴽ ⵉⵊⴻⵀⴷⴻⵏ.
22 ⵛⴻⴽ ⵜⴻⵙⵙⴳⴻⵄⵄⴰⴷⴻⴷ ⴰⵢⵉ ⵓ ⵜⵏⴻⴷⴷⵀⴻⴷ ⴰⵢⵉ ⴷⴻⴳ ⵓⵙⴻⵎⵎⵉⴹ,
ⵜⴻⵙⵙⴻⴼⵔⴰⵖⴻⴷ ⵇⴰⵄ ⴰⴷⴷⵓⴷ ⵉⵏⵓ.
23 ⵎⴰⵖⴰⵔ ⵏⴻⵛⵛ ⵙⵙⵏⴻⵖ ⴰⵇⴰ ⵛⴻⴽ ⴰⴷ ⴰⵢⵉ ⵜⵏⴻⴷⵀⴻⴷ ⵖⴰⵔ ⵍⵎⴻⵡⵜ,
ⵖⴰⵔ ⵜⴰⴷⴷⴰⵔⵜ ⵎⴰⵏⵉ ⵜⵜⵎⵓⵏⴻⵏ ⵎⴰⵔⵔⴰ ⵉⵏⵏⵉ ⵉⴷⴷⴰⵔⴻⵏ. ■
24 ⵎⴰ ⵡⴰⵔ ⵉⵏⴻⵟⵟⴰⵔ ⴱⵏⴰⴷⴻⵎ ⴰⴼⵓⵙ ⵏⵏⴻⵙ ⵎⴰⵍⴰ ⵉⵡⴹⴰ,
ⵎⴰ ⵡⴰⵔ ⵉⵙⵖⵓⵢⵢⵓ ⵡⴰⵍⵓ ⵇⴰⵄ ⵖⴰⵔ ⴰⵔⵥⵉⵢⵢⴻⵜ ⵏⵏⴻⵙ?
25 ⵎⴰ ⵡⴰⵔ ⵔⵓⵖ ⵅ ⵡⴻⵏⵏⵉ ⵜⵓⵖⴰ ⵖⴰⵔ ⵉⴵⴰ ⵡⵓⵙⵙⴰⵏ ⵏ ⵜⴰⵎⴰⵔⴰ,
ⵎⴰ ⵡⴰⵔ ⵉⵛⴹⵉⵏ ⴱⵓⵃⴱⴻⵍ ⵉⵏⵓ ⵅ ⵓⵎⴻⵥⵍⵓⴹ? ■
26 ⵓⵎⵉ ⵙⵙⵉⵜⵎⴻⵖ ⵖⴰⵔ ⵎⵉⵏ ⵉⵚⴻⴱⵃⴻⵏ, ⴰⵇⴰ ⵢⵓⵙⴰ-ⴷⴷ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ,
ⵓⵎⵉ ⵔⴰⵊⵉⵖ ⵜⴰⴼⴰⵡⵜ, ⵜⵓⵙⴰ-ⴷⴷ ⵜⴰⴵⴻⵙⵜ.
27 ⵜⵜⵏⴻⵏⵏⴰⵏ ⴰⴷⴰⵏⴻⵏ ⵉⵏⵓ, ⵡⴰⵔ ⴰⵔⵙⵉⵏ,
ⵉⵡⴹⴻⵏ-ⴷⴷ ⵡⵓⵙⵙⴰⵏ ⵏ ⵜⴰⵎⴰⵔⴰ ⵖⴰⵔⵉ.
28 ⵜⵓⵖⴰ ⵓⵢⵓⵔⴻⵖ ⴷⴻⴳ ⵡⴻⵛⴹⴰⵏ, ⴱⵍⴰ ⵍⴻⵀⵎⵓ ⵏ ⵜⴼⵓⵛⵜ.
ⴽⴽⴰⵔⴻⵖ-ⴷⴷ ⴷⴻⴳ ⵡⴻⴳⵔⴰⵡ ⵏ ⵍⴳⴻⵏⵙ ⵓⵛⴰ ⵇⵇⵉⵎⴻⵖ ⵙⵖⵓⵢⵢⵓⵖ ⴷⴻⴳ ⵓⵊⴻⵏⵏⴰ.
29 ⵉ ⵡⵓⵛⵛⴰⵏⴻⵏ ⵏ ⵍⴻⵅⵍⴰ ⴷⴻⵡⵍⴻⵖ ⴷ ⵓⵎⴰⵜⵙⴻⵏ ⵥⵥⴰⵢⵙⴻⵏ,
ⵉ ⵢⴻⵙⵙⵉⵙ ⵏ ⵏⵏⵄⴰⵎⴻⵜ ⴷ ⴰⵎⵄⴰⵛⴰⵔ. ■
30 ⵜⵉⵍⵎⴻⵛⵜ ⵉⵏⵓ ⵜⴻⴷⵡⴻⵍ ⵅⴰⴼⵉ ⴷ ⴰⴽⴰⵔⴽⵓⵛ ⴰⴱⴰⵔⵛⴰⵏ,
ⵥⵉ ⵜⵎⴻⵙⵙⵉ ⵛⴻⵎⵎⴹⴻⵏ ⵉⵅⵙⴰⵏ ⵉⵏⵓ. ■
31 ⵜⴻⴷⵡⴻⵍ ⵜⵉⵔⴰⵔⵜ ⵏ ⵍⴳⴰⵎⴱⵔⵉ ⵉⵏⵓ ⵉ ⵡⴻⵛⴹⴰⵏ,
ⵜⴰⵎⵊⴰ ⵉⵏⵓ ⵉ ⵍⵃⴻⵙⵙ ⵏ ⵉⵎⴻⵟⵟⴰⵡⴻⵏ.