ⴰⵢⵓⴱ ⵉⵙⵙⵉⵡⴻⵍ ⴰⴽ-ⴷ ⴱⵉⵍⴷⴰⴷ ⵅ ⵍⵖⴰⵔⴰⴹ ⵏ ⴰⵔⴻⴱⴱⵉ ⵙ ⵓⵡⴻⴷⴷⴻⴱ
10
1 ⵉⵜⵜⵄⵉⴼⴼⵉ ⵍⴻⵄⵎⴰⵔ ⵉⵏⵓ ⵥⵉ ⵜⵓⴷⴰⵔⵜ ⵉⵏⵓ, ⴰⴷ ⴱⴰⵔⵔⵃⴻⵖ ⴰⵛⴻⵜⵛⵉ ⵉⵏⵓ ⴰⵎⵎⵓ ⵡⴰⵀⴰ ⴱⵍⴰ ⴰⵎⵏⴰⵄ,
ⴰⴷ ⵙⵙⵉⵡⵍⴻⵖ ⵖⴰⵔ ⵜⴰⵔⵥⵓⴳⵉ ⵏ ⵍⴻⵄⵎⴰⵔ ⵉⵏⵓ.
2 ⵏⴻⵛⵛ ⴰⴷ ⵉⵏⵉⵖ ⵉ ⴰⵔⴻⴱⴱⵉ: ‘ⵡⴰⵔ ⴷ ⴰⵢⵉ ⵜⵜⴻⴳⴳ ⴷ ⴰⵄⴻⴼⴼⴰⵏ,
ⵙⵛⴻⵏ ⴰⵢⵉ, ⵎⴰⵢⴻⵎⵎⵉ ⴰⴽⵉⴷⵉ ⵜᵉⵜⵜⵎⴻⵏⵖⵉⴷ.
3 ⵎⴰ ⵖⴰⵔⴻⴽ ⵍⴻⴼⴹⴻⵍ ⴰⵇⴰ ⵛⴻⴽ ⵜⵃⴻⵚⵚⴰⵔⴻⴷ,
ⴰⵇⴰ ⵜⵏⴻⵟⵟⴰⵔⴻⴹ ⵍⵅⴻⴷⵎⴻⵜ ⵏ ⵉⴼⴰⵙⵙⴻⵏ ⵏⵏⴻⴽ,
ⴰⵎ ⵜᵉⵜⵜⴻⴳⴳⴻⴷ ⵜⴰⴼⴰⵡⵜ ⵅ ⵉⵅⴰⵔⵔⵉⵚⴻⵏ ⵏ ⵉⵄⴻⴼⴼⴰⵏⴻⵏ?
4 ⵎⴰ ⵖⴰⵔⴻⴽ ⵜⵉⵟⵟⴰⵡⵉⵏ ⵏ ⴱⵏⴰⴷⴻⵎ,
ⵎⴰ ⵜᵉⵜⵜⵡⴰⵍⵉⴷ ⵛⴻⴽ ⴰⵎ ⵎⴰⵎⵎⴻⵛ ⵜⵜⵡⴰⵍⴰⵏ ⵉⵡⴷⴰⵏ? □
5 ⵎⴰ ⵓⵙⵙⴰⵏ ⵏⵏⴻⴽ ⴰⵎ ⵡⵓⵙⵙⴰⵏ ⵏ ⴱⵏⴰⴷⴻⵎ?
ⵎⴰ ⵉⵙⴻⴳⴳⵯⵓⵙⴰ ⵏⵏⴻⴽ ⴰⵎ ⵉⵙⴻⴳⴳⵯⵓⵙⴰ ⵏ ⵡⴻⵔⵢⴰⵥ,
6 ⴰⵇⴰ ⵛⴻⴽ ⵜⴰⵔⴻⵥⵥⵓⴷ ⴰⵎⵎⵓ ⵅ ⵍⵎⵓⵄⵚⵉⵢⵢⴻⵜ ⵉⵏⵓ,
ⵜᵉⵜⵜⴱⴻⵇⵇⵛⴻⴷ ⴷⵉ ⴷⴷⵏⵓⴱ ⵉⵏⵓ?
7 ⵡⴰⵅⵅⴰ ⵛⴻⴽ ⵜⴻⵙⵙⵏⴻⴷ ⴰⵇⴰ ⵏⴻⵛⵛ ⵡⴰⵔ ⴵⵉⵖ ⴷ ⴰⵄⴻⴼⴼⴰⵏ,
ⵡⴰⵅⵅⴰ ⴰⵎⴻⵏⵏⵉ ⵡⴰⵔ ⴷⵉⵏ ⵡⴻⵏⵏⵉ ⵉ ⵖⴰ ⵉⴼⴻⴽⴽⴻⵏ ⵥⴻⴳ ⵓⴼⵓⵙ ⵏⵏⴻⴽ.
8 ⵉⴼⴰⵙⵙⴻⵏ ⵏⵏⴻⴽ ⵅⴻⵍⵇⴻⵏ ⴰⵢⵉ-ⴷⴷ, ⴳⴳⵉⵏ ⴰⵢⵉ,
ⴰⵇⴰ ⵜⵜⴻⵏⵏⴹⴻⵏ ⴰⵢⵉ, ⵓⵛⴰ ⵍⴻⵅⵅⵓ ⵛⴻⴽ ⵜⵚⴰⵔⴹⴻⴷ ⴰⵢⵉ.
9 ⵄⵇⴻⵍ ⴰⵇⴰ ⵛⴻⴽ ⵜⴻⴳⴳⵉⴷ ⴰⵢⵉ ⴰⵎ ⵜⴰⵔⵔⵉⵙⵜ,
ⵓ ⵖⴰⵔ ⵓⴰⵛⵜⵄⴻⵊⵊⴰⵛⵜ ⵜⴻⵅⵙⴻⴷ ⴰⴷ ⴰⵢⵉ ⵜⴰⵔⵔⴻⴷ. ■
10 ⵎⴰ ⵡⴰⵔ ⴷ ⴰⵢⵉ ⵜⵥⴻⴵⵄⴻⴷ ⴰⵎ ⵓⵖⵉ,
ⴰⵎ ⴽⵉⵙⵓ ⵜⴻⵊⵊⵉⴷ ⴰⵢⵉ ⴰⴷ ⵛⵛⵔⴻⵖ? ■
11 ⵙ ⵜⴻⵍⵎⴻⵛⵜ ⴷ ⵡⴻⵢⵙⵓⵎ ⵜⴻⵙⵙⵢⴰⵔⴹⴻⴷ ⴰⵢⵉ,
ⵙ ⵉⵅⵙⴰⵏ ⴷ ⵉⵥⴻⵡⵔⴰⵏ ⵜⴻⵎⵎⵓⴷⴻⴷ ⴰⵢⵉ.
12 ⵜⵓⴷⴰⵔⵜ ⴷ ⵜⵎⴻⵅⵙⵉⵡⵜ ⵉⵛⵓⵡⵡⴰⵔⴻⵏ ⵜⴻⵡⵛⵉⴷ ⴰⵢⵉ ⵜⵜ,
ⴰⵃⴻⵟⵟⵓ ⵏⵏⴻⴽ ⵉⵃⴹⴰ ⴱⵓⵃⴱⴻⵍ ⵉⵏⵓ.
13 ⵜⵅⴻⵎⵎⵍⴻⴷ ⵜⴰ ⵎⴰⵛⴰ ⴷⴻⴳ ⵡⵓⵍ ⵏⵏⴻⴽ,
ⵏⴻⵛⵛ ⵙⵙⵏⴻⵖ ⴱⴻⵍⵍⵉ ⴰⵢⴰ ⵜⵓⵖⴰ-ⵜ ⵖⴰⵔⴻⴽ ⴷⵉ ⵍⴱⴰⵍ.
14 ⵎⴰⵍⴰ ⵅⴹⵉⵖ, ⵛⴻⴽ ⴰⴷ ⴰⵢⵉ ⵜⴻⵃⴹⵉⴷ,
ⵡⴰⵔ ⴷ ⴰⵢⵉ ⵜᵉⵜⵜⴱⴰⵔⵔⵉⴷ ⵥⵉ ⵍⵎⵓⵄⵚⵉⵢⵢⴻⵜ ⵉⵏⵓ.
15 ⵎⴰⵍⴰ ⴳⴳⵉⵖ ⵍⵖⴰⵔ, ⵓⵛⵜ ⵅⴰⴼⵉ!
ⵎⴰⵍⴰ ⵏⴻⵛⵛ ⴷ ⴰⵎⵙⴻⴳⴳⴻⴷ ⵉ ⴵⵉⵖ, ⵡⴰⵔ ⵥⴻⵎⵎⴰⵔⴻⵖ ⴰⴷ ⵙⵙⴳⴻⵄⵄⴷⴻⵖ ⴰⵥⴻⴵⵉⴼ ⵉⵏⵓ.
ⵊⵊⵉⵡⵏⴻⵖ ⵙ ⵍⴻⴼⴹⵉⵃⴻⵜ, ⵜⵜⴰⵛⵉⵖ ⴰⴽ-ⴷ ⵍⴻⵎⵃⴰⵢⴻⵏ ⵉⵏⵓ.
16 ⵎⴰⵍⴰ ⵙⵙⴳⴻⵄⵄⴷⴻⵖ ⵉⵅⴻⴼ ⵉⵏⵓ, ⴰⴷ ⴰⵢⵉ ⵜⵏⴻⵢⵎⴰⵔⴻⴷ ⴰⵎ ⵡⴰⵢⵔⴰⴷ ⵉⵥⴻⵀⵀⴰⵔⴻⵏ,
ⵜⴻⵙⵙⵛⴰⵏⴻⴷ ⵅⴰⴼⵉ ⴰⵛⵓⵡⵡⴰⵔ ⵏ ⵍⴻⵄⵊⴻⴱ ⵏ ⵊⵊⵀⴻⴷ ⵏⵏⴻⴽ ⵍⴻⴱⴷⴰ. ■
17 ⵎⴰⵄⵍⵉⴽ ⵓⴼⵉⵖ ⴰⴷ ⵅⴰⴼⵉ ⵜⴻⵙⵙⴱⴻⴷⴷⴻⴷ ⵍⴻⴱⴷⴰ ⵉⵛⴻⵀⵀⴰⴷⴻⵏ ⵏⵏⴻⵖⵏⵉ,
ⵓⵛⴰ ⴰⴷ ⵜⴰⵔⵏⵉⴷ ⵄⴰⴷ ⴷⴻⴳ ⵡⴻⵖⴹⴰⴱ ⵏⵏⴻⴽ ⵅⴰⴼⵉ,
ⵉⵄⴻⵙⵙⴰⵙⴻⵏ ⵉ ⵉⵅⴻⴵⴼⴻⵏ ⵉⵊⵊ ⵉ ⵡⴻⵏⵏⴻⵖⵏⵉ ⵍⴻⴱⴷⴰ, ⵡⴰⵀ ⴰⴷ ⵖⴰⵔⵉ ⵜⵜⵏⴻⴷⵀⴻⴷ ⵉⵊⵊ ⵏ ⵍⵄⴻⵙⴽⴰⵔ.
18 ⵎⴰⵢⴻⵎⵎⵉ ⵉ ⴷ ⴰⵢⵉ ⵜⴻⵊⵊⵉⴷ ⴰⴷ ⴷⴷ-ⴼⴼⵖⴻⵖ ⵥⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ?
ⵎⵍⵉ ⵙⵙⵓⴼⴼⵖⴻⵖ ⴱⵓⵃⴱⴻⵍ, ⵡⴰⵔ ⴷ ⴰⵢⵉ ⵜⵥⴰⵔ ⵓⵍⴰ ⴷ ⵉⵛⵜ ⵏ ⵜⵉⵟⵟ!’ ■
19 ⵎⴰⵄⵍⵉⴽ ⵓⴼⵉⵖ ⴰⵅⵎⵉ ⵡⴰⵔ ⵉⵍⵉⵖ ⵄⴻⵎⵎⴰⵔⵚ,
ⵎⵎⴻⴽⵙⵉⵖ ⵖⴰⵔ ⵡⴻⵏⴹⴻⵍ ⵥⴻⴳ ⵓⵄⴻⴷⴷⵉⵙ ⵏ ⵢⴻⵎⵎⴰ.
20 ⵎⴰ ⵡⴰⵔ ⴵⵉⵏ ⵡⵓⵙⵙⴰⵏ ⵏ ⵜⵓⴷⴰⵔⵜ ⵉⵏⵓ ⵓⴷⵔⵓⵙⴻⵏ?
ⵎⵍⵉ ⴷ ⴰⵢⵉ ⵉⵊⵊⴰ, ⴰⴷ ⵅⴰⴼⵉ ⵉⵏⵏⴻⵇⵍⴻⴱ ⵎⴰⵃⴻⵏⴷ ⴰⴷ ⴼⴰⵔⵀⴻⵖ ⵛⵡⴰⵢⵜ ⵄⴰⵡⴻⴷ,
21 ⵇⴱⴻⵍ ⵉ ⵖⴰ ⵓⵢⵓⵔⴻⵖ, - ⵡⴰⵔ ⴷⵉⴽⴽⵡⵉⵍⴻⵖ ⵄⴰⴷ - ,
ⵖⴰⵔ ⵜⴻⵎⵎⵓⵔⵜ ⵏ ⵜⴰⴵⴻⵙⵜ ⴷ ⵜⵉⵍⵉ ⵏ ⵍⵎⴻⵡⵜ,
22 ⵖⴰⵔ ⵜⴻⵎⵎⵓⵔⵜ ⴷ ⵜⴰⴱⴰⵔⵛⴰⵏⵜ ⴰⵎ ⵜⵎⴻⴷⴷⵉⵜ,
ⴰⵎ ⵜⵉⵍⵉ ⵏ ⵍⵎⴻⵡⵜ, ⵡⴰⵔ ⴷⵉⵏ ⵉⵜⵜⴱⵉⵏ ⵡⴰⵍⵓ,
ⵎⴰⵏⵉ ⵜⴻⴳⴳⴰ ⵜⴼⴰⵡⵜ ⴰⵎ ⵜⵎⴻⴷⴷⵉⵜ.