ⵜⴰⵎⵡⴰⵔⵔⵉⵜ ⵏ ⴰⵢⵓⴱ ⵅ ⴱⵉⵍⴷⴰⴷ
9
1 ⵢⴰⵔⵔⴰ-ⴷⴷ ⴰⵢⵓⴱ, ⵉⵏⵏⴰ: 2 ⵙⵙⵏⴻⵖ ⵏⵉⵛⴰⵏ, ⴰⵇⴰ ⴰⵎⵎⵓ ⵉ ⵜⴻⴵⴰ,
ⵎⴰⵖⴰⵔ ⵎⴰⵎⵎⴻⵛ ⵉ ⵖⴰ ⵢⵉⵍⵉ ⴱⵏⴰⴷⴻⵎ ⴷ ⴰⵎⵙⴻⴳⴳⴻⴷ ⵖⴰⵔ ⴰⵔⴻⴱⴱⵉ? ■
3 ⵎⴰⵍⴰ ⵏⴻⵜⵜⴰ ⵉⵅⵙ ⴰⴽⵉⴷⴻⵙ ⵉⵎⵛⴰⵔⵔⴻⵄ,
ⵉⵍⵉ ⵏⴻⵜⵜⴰ ⵡⴰⵔ ⵉⵥⴻⵎⵎⴰⵔ ⴰⴷ ⵅⴰⵙ ⴷⴷ-ⵢⴰⵔⵔ ⵓⵍⴰ ⴷ ⵉⵛⵜ ⵏ ⵜⵡⴰⵍⴰ ⵅ ⵡⴰⵍⴻⴼ ⵏ ⵜⵡⴰⵍⴰⵡⵉⵏ.
4 ⵏⴻⵜⵜⴰ ⴷ ⴰⵎⵉⵖⵉⵙ ⵏ ⵡⵓⵍ ⴷ ⴱⵓ-ⵜⵥⴻⵎⵎⴰⵔ ⵉⵊⴻⵀⴷⴻⵏ,
ⵎⴰⵏ ⵡⴻⵏ ⵉⵥⴻⵎⵎⴰⵔⴻⵏ ⴰⴷ ⵉⵙⵙⴻⵇⵙⴻⵃ ⵉⵅⴻⴼ ⵏⵏⴻⵙ ⴹⵉⴷⴷ ⵏⵏⴻⵙ,
ⵓⵛⴰ ⴰⴷ ⵉⵇⵇⵉⵎ ⵉⴷⴷⴰⵔ ⴷⵉ ⵍⴰⵎⴰⵏ?
5 ⵏⴻⵜⵜⴰ ⴷ ⵡⴻⵏⵏⵉ ⵉⵙⵙⵎⵓⵟⵟⵓⵢⴻⵏ ⵉⴷⵓⵔⴰⵔ ⴰⵎ ⵡⴰⵔ ⵜⵜ ⵜⵜⵉⵛⵉⵏ ⵉⵡⴷⴰⵏ,
ⴷ ⵡⴻⵏⵏⵉ ⵜⴻⵏ ⵉⵙⵙⵏⴻⵇⵍⴰⴱⴻⵏ ⴷⴻⴳ ⵡⴻⵖⴹⴰⴱ ⵏⵏⴻⵙ,
6 ⵏⴻⵜⵜⴰ ⴷ ⵡⴻⵏⵏⵉ ⵉⵙⵙⴻⵏⵀⴻⵥⵥⴰⵏ ⵜⴰⵎⵎⵓⵔⵜ ⵥⴻⴳ ⵡⴻⵎⵛⴰⵏ ⵏⵏⴻⵙ,
ⴷ ⵡⴻⵏⵏⵉ ⵉⴳⴳⵉⵏ ⵉⴱⵉⵍⴰⵔⴻⵏ ⵏⵏⴻⵙ ⴰⴷ ⴰⵔⵊⵉⵊⴻⵏ,
7 ⵏⴻⵜⵜⴰ ⴷ ⵡⴻⵏⵏⵉ ⵉⵜⵜⴰⵎⴰⵔⴻⵏ ⵜⴰⴼⵓⵛⵜ ⴰⵍⴰⵎⵉ ⵡⴰⵔ ⴷⴷ-ⵜⴻⵏⵇⵉⵔ,
ⴷ ⵡⴻⵏⵏⵉ ⵉⵜⵜⵛⴻⵎⵎⴰⵄⴻⵏ ⵉⵜⵔⴰⵏ!
8 ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ ⵡⴰⵀⴰ ⵉⵜⵜⴱⴻⵥⵥⴰⵄ ⵉⵊⴻⵏⵡⴰⵏ,
ⵓ ⵏⴻⵜⵜⴰ ⵉⵚⵓⵔⵔⵓⴼ ⵜⵉⵡⴰ ⵏ ⵜⵄⵓⵔⴰⵔ ⵏ ⵍⴻⵎⵡⴰⵊ ⵏ ⵡⴰⵎⴰⵏ, ■
9 ⵏⴻⵜⵜⴰ ⴷ ⵡⴻⵏⵏⵉ ⵉⴳⴳⵉⵏ ⴰⵡⵔⴰⴼ ⵏ ⵉⵜⵔⴰⵏ ⵏ ⴷⴷⵓⴱ ⴰⵎⴻⵇⵇⵔⴰⵏ ⴷ ⵓⵔⵢⵓⵏ,
ⴰⴳⵔⴰⵡ ⵏ ⵙⴻⴱⵄⴰ ⵏ ⵉⵜⵔⴰⵏ ⴷ ⵉⵅⴰⵎⵎⴻⵏ ⵏ ⵍⵊⴰⵏⵓⴱ,
10 ⵏⴻⵜⵜⴰ ⴷ ⵡⴻⵏⵏⵉ ⵉⴳⴳⵉⵏ ⵜⵉⵎⴻⵙⵍⴰⵢⵉⵏ ⵜⵉⵎⴻⵇⵇⵔⴰⵏⵉⵏ,
- ⵡⴰⵔ ⵉⵥⴻⵎⵎⴰⵔ ⴱⵏⴰⴷⴻⵎ ⴰⴷ ⵜⴻⵏⵜ ⵉⴼⵀⴻⵎ - ,
ⵓⵍⴰ ⴷ ⵍⴻⵄⵊⴰⵢⴻⴱ ⴱⵍⴰ ⵍⴻⵃⵙⴰⴱ. ■
11 ⵅⵥⴰⵔ, ⵏⴻⵜⵜⴰ ⵉⵄⴻⴷⴷⵓ ⵅⴰⴼⵉ, ⵡⴰⵔ ⵜ ⵥⴰⵔⵔⴻⵖ,
ⵉⵥⴻⴽⴽⵡⴰ, ⵏⴻⵛⵛ ⵡⴰⵔ ⴽⵉⴷⴻⵙ ⵜⵜⴰⵛⵉⵖ.
12 ⵅⵥⴰⵔ, ⵎⴰⵍⴰ ⵉⵅⴹⴻⴼ ⵏⴻⵜⵜⴰ, ⵎⴰⵏ ⵡⴻⵏ ⵉ ⵜ ⵖⴰ ⵉⵎⴻⵏⵄⴻⵏ?
ⵎⴰⵏ ⵡⴻⵏ ⵉⵥⴻⵎⵎⴰⵔⴻⵏ ⴰⴷ ⴰⵙ ⵢⵉⵏⵉ: ‘ⵎⵉⵏ ⴷⵉⵏ ⵜⵜⴻⴳⴳⴻⴷ ⵛⴻⴽ?’
13 ⴰⵔⴻⴱⴱⵉ ⵡⴰⵔ ⵉⵜⵜⴰⵔⵔⵉ ⴰⵖⴹⴰⴱ ⵏⵏⴻⵙ ⴰⴷ ⴷⴷ-ⵉⴷⵡⴻⵍ,
ⵙⴰⴷⵓ ⵏⵏⴻⵙ ⵓⴹⴰⵔⴻⵏ ⵉⵎⵄⴰⵡⴰⵏⴻⵏ ⵏ ‘ⵔⴰⵀⴰⴱ’. □
14 ⵎⴰⵎⵎⴻⵛ ⵉ ⵖⴰ ⴳⴳⴻⵖ ⴰⴷ ⵅⴰⵙ ⴷⴷ-ⴰⵔⵔⴻⵖ,
ⵎⴰⵎⵎⴻⵛ ⵉ ⵖⴰ ⴼⴰⵔⵥⴻⵖ ⴰⵡⴰⵍⴻⵏ ⵉⵏⵓ ⵎⵍⵉⵃ ⵥⵥⴰⵜⴻⵙ?
15 ⵡⴰⵅⵅⴰ ⵏⴻⵛⵛ ⴷ ⴰⵎⵙⴻⴳⴳⴻⴷ, ⵡⴰⵔ ⵥⴻⵎⵎⴰⵔⴻⵖ ⴰⴷ ⵅⴰⵙ ⴷⴷ-ⴰⵔⵔⴻⵖ,
ⵎⴰⵛⴰ ⴰⴷ ⵥⴰⵡⴳⴻⵖ ⵍⵇⴰⴹⵉ ⵉⵏⵓ ⵎⴰⵃⴻⵏⴷ ⴰⴷ ⵅⴰⴼⵉ ⵉⵃⵉⵏⵏ,
16 ⵎⴰⵍⴰ ⵅⴰⴼⵉ ⴷⴷ-ⵢⴰⵔⵔ ⵍⴰⵎⵉ ⵍⴰⵖⵉⵖ,
ⵡⴰⵔ ⵜⵜⵖⵉⵍⴻⵖ ⴰⵇⴰ ⵏⴻⵜⵜⴰ ⴰⴷ ⵉⵙⴻⵍ ⵖⴰⵔ ⵜⵎⵉⵊⵊⴰ ⵉⵏⵓ.
17 ⴰⵇⴰ ⵏⴻⵜⵜⴰ ⵉⵍⴻⴱⴱⴻⵥ ⴰⵢⵉ ⵙ ⵉⵛⵜ ⵏ ⵜⵃⴰⵔⵢⴰⴹⵜ,
ⵓ ⵢⴰⵔⴻⵏⵏⵉ ⴷⴻⴳ ⵉⵢⴻⵥⵥⵉⵎⴻⵏ ⵉⵏⵓ ⴱⴰⵟⴻⵍ.
18 ⵏⴻⵜⵜⴰ ⵡⴰⵔ ⴷ ⴰⵢⵉ ⵉⵜⵜⴻⵊⵊⵉ ⴰⴷ ⴰⵔⵔⴻⵖ ⵏⵏⴻⴼⵙ,
ⵎⴰⵛⴰ ⵉⵙⵙⵊⴰⵡⴰⵏ ⴰⵢⵉ ⵙ ⵜⴰⵔⵥⵓⴳⵉ.
19 ⵎⴰⵍⴰ ⵜⴻⵇⵇⵉⵎ ⵜⵎⴻⵙⵍⴰⵛⵜ ⴷⵉ ⵊⵊⴻⵀⴷ, ⴰⵇⴰ ⵏⴻⵜⵜⴰ ⵉⵊⵀⴻⴷ ⵇⴰⵄ,
ⵎⴰⵍⴰ ⴷⵉ ⵛⵛⵔⴻⵄ, ⵉⵇⵇⴰⵔ: ‘ⵡⵉ ⴷ ⴰⵢⵉ ⵖⴰ ⵉⵄⴰⵔⴹⴻⵏ?’
20 ⵡⴰⵅⵅⴰ ⵏⴻⵛⵛ ⴷ ⴰⵎⵙⴻⴳⴳⴻⴷ, ⵄⴰⴷ ⴰⵇⴻⵎⵎⵓⵎ ⵉⵏⵓ ⴰⴷ ⵅⴰⴼⵉ ⵉⵃⴽⴻⵎ,
ⵡⴰⵅⵅⴰ ⵏⴻⵛⵛ ⴱⵍⴰ ⵍⵄⵉⴱ, ⵏⴻⵜⵜⴰ ⴰⴷ ⴰⵢⵉ ⵉⵄⴻⵢⵢⴻⴱ.
21 ⵡⴰⵅⵅⴰ ⵏⴻⵛⵛ ⴱⵍⴰ ⵍⵄⵉⴱ ⵉ ⴵⵉⵖ, ⵡⴰⵔ ⵙⵙⵉⵏⴻⵖ ⵎⴰⵛⴰ ⵍⴻⵄⵎⴰⵔ ⵉⵏⵓ,
ⵜⵓⴷⴰⵔⵜ ⵉⵏⵓ ⵃⴻⵙⵙⴱⴻⵖ ⵜⵜ ⴷ ⵡⴰⵍⵓ.
22 ⵙ ⵓⵢⴰ ⵉ ⵖⴰ ⵉⵏⵉⵖ: ‘ⵇⴰⵄ ⴷ ⵉⵛⵜ!
ⴰⵎ ⵡⴻⵏⵏⵉ ⵉⴵⴰⵏ ⴱⵍⴰ ⵍⵄⵉⴱ ⴰⵎ ⵡⴻⵏⵏⵉ ⵉⴵⴰⵏ ⴷ ⴰⵄⴻⴼⴼⴰⵏ,
ⵏⴻⵜⵜⴰ ⴰⴷ ⵜⴻⵏ ⵉⵇⴹⴰ ⵙ ⵜⵏⴰⵢⴻⵏ ⵉⴷⵙⴻⵏ!’ ■
23 ⵎⴰⵍⴰ ⴰⵔⴻⴽⴽⵓⴹ ⵉⵏⴻⵇⵇ ⴷⴻⴳ ⵉⵛⵜ ⵏ ⵜⴻⵛⵜⵉ,
ⵅⴻⵏⵏⵉ ⵏⴻⵜⵜⴰ ⵉⵙⵜⴻⵀⴻⵥⵥⴰ ⵥⵉ ⵍⴻⵇⴹⴻⵄ ⵏ ⵍⴰⵢⴰⵙ ⵉ ⵉⵎⴻⵥⴷⴰⴳⴻⵏ.
24 ⵜⴰⵎⵎⵓⵔⵜ ⴰⴷ ⵜⴻⵎⵎⴻⵡⵛ ⴷⴻⴳ ⵓⴼⵓⵙ ⵏ ⵓⵄⴻⴼⴼⴰⵏ.
ⵉⵖⴻⵎⴱⴰⴱ ⵏ ⵍⵇⵓⴹⴰⵜ ⵏⵏⴻⵙ ⵉⵜⵜⵍⴻⵃⵃⴻⴼ ⴰⵙⴻⵏ.
ⵎⴰⵍⴰ ⵡⴰⵔ ⵜ ⵉⴳⴳⵉ ⵏⴻⵜⵜⴰ, ⵎⴰⵏ ⵡⴻⵏ ⵅⴻⵏⵏⵉ?
25 ⴷⴻⵖⵢⴰ ⵅ ⵡⴻⵏⵏⵉ ⵉⵜⵜⴰⵥⵥⵍⴻⵏ ⴰⵇⴰ ⵜⵜⵇⴻⴵⵉⵇⴻⵏ ⵡⵓⵙⵙⴰⵏ ⵉⵏⵓ,
ⴰⵔⴻⵡⵍⴻⵏ ⵖⴰⵔ ⴷⵉⵏ, ⵡⴰⵔ ⵜⵡⵉⵍⵉⵏ ⵍⵅⴰⵔ. ■
26 ⴽⴽⵉⵏ ⴰⵎ ⵜⵖⴰⵔⵔⵓⴱⴰ ⵏ ⵓⵖⴰⵏⵉⵎ,
ⴰⵎ ⵓⴳⵉⴷⴻⵔ ⵉⵃⴻⵡⵡⵎⴻⵏ ⵅ ⵥⵥⴰⵔⴷⴻⵜ.
27 ⵎⴰⵍⴰ ⵏⵏⵉⵖ: ‘ⴰⴷ ⵜⵜⵓⵖ ⴰⵛⴻⵜⵛⵉ ⵉⵏⵓ,
ⴰⴷ ⴱⴻⴷⴷⵍⴻⵖ ⴰⵖⴻⵎⴱⵓⴱ ⵉⵛⴻⴹⵏⴻⵏ ⵉⵏⵓ, ⴰⴷ ⵙⵙⴼⵉⵔⵏⵉⵏⴻⵖ!’,
28 ⴰⵎⵎⵓ ⵉ ⵜⵜⴻⴳⴳⵯⴻⴷⴻⵖ ⵥⵉ ⵎⴰⵔⵔⴰ ⵍⴻⵃⵔⵉⵇ ⵉⵏⵓ.
ⵏⴻⵛⵛ ⵙⵙⵏⴻⵖ ⵛⴻⴽ ⵡⴰⵔ ⵥⵥⴰⵢⵉ ⵜᵉⵜⵜⴱⴰⵔⵔⵉⴷ.
29 ⵏⴻⵛⵛ ⴷ ⴰⵄⴻⴼⴼⴰⵏ, ⵎⴰⵢⴻⵎⵎⵉ ⵙⵙⵃⵉⵙⵙⵉⴼⴻⵖ ⵉ ⵡⴰⵍⵓ?
30 ⵎⴰⵍⴰ ⵙⵙⵉⵔⴷⴻⵖ ⵙ ⵡⴰⵎⴰⵏ ⵏ ⵡⴻⴷⴼⴻⵍ,
ⴰⴷ ⵙⵙⵉⵥⴻⴷⴳⴻⵖ ⵉⴼⴰⵙⵙⴻⵏ ⵉⵏⵓ ⵙ ⵍⵍⵉⵅⵉⵢⴰ, ■
31 ⵄⴰⴷ ⴰⴷ ⴰⵢⵉ ⵜⵏⴻⵜⵢⴻⴷ ⴷⴻⴳ ⵡⴻⵃⴼⵓⵔ,
ⴰⵍ ⴷ ⴰⵢⵉ ⵖⴰ ⵉⵄⵉⴼⴼ ⵡⴰⵔⵔⵓⴹ ⵉⵏⵓ.
32 ⵎⴰⵖⴰⵔ ⵏⴻⵜⵜⴰ ⵡⴰⵔ ⵉⴵⵉ ⴷ ⴱⵏⴰⴷⴻⵎ ⴰⵎ ⵏⴻⵛⵛ,
ⵡⴻⵏⵏⵉ ⵅⴻⴼ ⵥⴻⵎⵎⴰⵔⴻⵖ ⴰⴷ ⴷⴷ-ⴰⵔⵔⴻⵖ,
ⵅⵎⵉ ⵏⴻⵜⵜⴰⵡⴻⴹ ⵖⴰⵔ ⵜⴰⴷⴷⴰⵔⵜ ⵏ ⵛⵛⵔⴻⵄ ⴰⴽ-ⴷ ⵡⴰⵢⴰⵡⵢⴰ. ■
33 ⵡⴰⵔ ⴷⵉⵏ ⵉⴵⵉ ⵍⵄⴰⴷⴻⵍ ⵊⴰⵔ ⴰⵏⴻⵖ,
ⵡⴻⵏⵏⵉ ⵉⵥⴻⵎⵎⴰⵔⴻⵏ ⴰⴷ ⵉⵙⵙⴰⵔⵙ ⴰⴼⵓⵙ ⵏⵏⴻⵙ ⵅⴰⵏⴻⵖ ⵙ ⵜⵏⴰⵢⴻⵏ ⵉⴷⵏⴻⵖ.
34 ⴻⵊⵊ ⵉ-ⵜ ⴰⴷ ⵅⴰⴼⵉ ⵉⴽⵙⵉ ⴰⵄⵎⵓⴷ ⵏⵏⴻⵙ,
ⵡⴰⵔ ⴷ ⴰⵢⵉ ⵉⵙⵙⵏⴻⵅⵍⵉⵄ ⵄⴰⴷ ⵓⵀⵓⴷⴷⵉ ⵏⵏⴻⵙ, ■
35 ⵅⴻⵏⵏⵉ ⴰⴷ ⵙⵙⵉⵡⵍⴻⵖ ⵏⵀⵍⴰ ⵎⴰ ⴰⴷ ⵥⵥⴰⵢⴻⵙ ⴳⴳⵯⴻⴷⴻⵖ,
ⵎⴰⵖⴰⵔ ⵏⴻⵛⵛ ⵡⴰⵔ ⴵⵉⵖ ⴰⵎⵎⵓ ⵉ ⵢⵉⵅⴻⴼ ⵉⵏⵓ.