1 ⵓⵎⵉ ⵢⴰⵔⴳⴻⴱ ⵎⵓⵔⴷⴰⵅⴰⵢ ⵅ ⵎⴰⵔⵔⴰ ⵎⵉⵏ ⵉⵜⵜⵡⴰⴳⴳⴻⵏ, ⵉⵛⴰⵔⵔⴻⴳ ⵜⵛⴰⵎⵉⵔ ⵏⵏⴻⵙ, ⵢⴰⵔⴹ ⵉⵛⵜ ⵏ ⵜⵅⴰⵏⵛⴻⵜ ⵉⵙⵙⵓⵢⴻⵙ ⵉⵖⵖⴻⴹ ⵅ ⵓⵥⴻⴵⵉⴼ ⵏⵏⴻⵙ ⵓⵛⴰ ⵉⵥⵡⴰ ⴷⵉ ⵍⵡⴻⵙⵜ ⵏ ⵜⴻⵏⴷⵉⵏⵜ ⵓⵛⴰ ⵜⵓⵖⴰ ⵉⵙⵙⵖⵓⵢⵢⵓ ⵉⵛⵜ ⵏ ⵜⵖⵓⵢⵢⵉⵜ ⵜⴻⵊⵀⴻⴷ ⵜⴰⵔⵥⴻⴳ. 2 ⵢⵉⵡⴻⴹ-ⴷⴷ ⴰⵍ ⵜⴰⵡⵡⴰⵔⵜ ⵏ ⵓⵊⴻⴵⵉⴷ, ⵎⵉⵏⵥⵉ ⵡⴰⵔ ⵉⵥⴻⵎⵎⴰⵔ ⵃⴻⴷ ⴰⴷ ⵢⴰⴷⴻⴼ ⵖⴰⵔ ⵜⴻⵡⵡⴰⵔⵜ ⵏ ⵓⵊⴻⴵⵉⴷ ⴰⵎ ⵢⴰⵔⴹ ⵜⵅⴰⵏⵛⴻⵜ ⵏ ⵡⴻⵛⴹⴰⵏ. 3 ⴷⵉ ⴽⵓⵍ ⵍⵄⴰⵎⴰⵍⴰ ⴷ ⴽⵓⵍ ⵜⴰⵏⴷⵉⵏⵜ ⵎⴰⵏⵉ ⵢⵉⵡⴻⴹ ⵍⵓⵎⵓⵔ ⵏ ⵓⵊⴻⴵⵉⴷ, ⵉⵍⵇⴻⴼ ⵓⴷⴰⵢⴻⵏ ⵉⵊⵊ ⵏ ⵡⴻⵛⴹⴰⵏ ⴷ ⴰⵎⴻⵇⵇⵔⴰⵏ ⴷ ⵓⵥⵓⵎⵎⵉ ⴷ ⵉⵎⴻⵟⵟⴰⵡⴻⵏ ⴷ ⵉⵖⵓⵢⵢⴰⵏ, ⵓⵛⴰ ⵇⵇⵉⵎⴻⵏ ⴰⵟⵟⴰⵙ ⵥⵥⴰⵢⵙⴻⵏ ⵥⵥⵍⴻⵏ ⴷⵉ ⵜⵅⴰⵏⵛⴻⵜ ⴷ ⵉⵖⵖⴻⴹ.

4 ⵜⵉⵎⴻⵙⴻⵅⵅⴰⵔⵉⵏ ⵜⵉⴱⵍⵉⵖⵉⵏ ⵏ ⵉⵙⵜⵉⵔ ⴷ ⵉⵎⵙⴻⵅⵅⴰⵔⴻⵏ ⵏⵏⴻⵙ ⵉⵛⴻⵏⵄⴻⵏ ⵓⵙⵉⵏ-ⴷⴷ ⵎⴰⵃⴻⵏⴷ ⴰⴷ ⵜⵜ ⵅⴻⴱⴱⴰⵔⴻⵏ ⵙ ⵓⵢⴰ ⵓⵛⴰ ⵜⴻⵃⵥⴻⵏ ⵜⵊⴻⴵⵉⴷⵜ ⴰⵟⵟⴰⵙ. ⵜⴻⵙⵙⴻⴽⴽ ⵜⵛⴰⵎⵉⵔⴰⵜ ⵉ ⵎⵓⵔⴷⴰⵅⴰⵢ ⵎⴰⵃⴻⵏⴷ ⴰⴷ ⵜⴻⵏⵜ ⵢⴰⵔⴹ, ⴰⴷ ⵉⴽⴽⴻⵙ ⵜⴰⵅⴰⵏⵛⴻⵜ ⵏⵏⴻⵙ, ⵎⴰⵛⴰ ⵏⴻⵜⵜⴰ ⵡⴰⵔ ⵜⴻⵏⵜ ⵉⵇⴱⵉⵍ. 5 ⵅⴻⵏⵏⵉ ⵜⵍⴰⵖⴰ ⵉⵙⵜⵉⵔ ⵉ ⵀⴰⵜⴰⵅ, ⵉⵊⵊ ⵥⴻⴳ ⵉⵎⵙⴻⵅⵅⴰⵔⴻⵏ ⵉⵛⴻⵏⵄⴻⵏ ⵏ ⵓⵊⴻⴵⵉⴷ, ⵡⴻⵏⵏⵉ ⵜⵓⵖⴰ ⵉ ⴷ ⴰⵙ ⵉⴳⴳⴰ ⵓⵊⴻⴵⵉⴷ ⴷ ⴰⵎⵙⴻⵅⵅⴰⵔ, ⵓⵛⴰ ⵜⵓⵎⵓⵔ ⵉ-ⵜ ⵅ ⵎⵓⵔⴷⴰⵅⴰⵢ ⵎⴰⵃⴻⵏⴷ ⴰⴷ ⵉⵅⵥⴰⵔ ⵎⵉⵏ ⵜ ⵢⵓⵖⵉⵏ ⴷ ⵎⴰⵢⴻⵎⵎⵉ ⵉⴳⴳⴰ ⴰⵎⵎⵓ. 6 ⵉⴼⴼⴻⵖ ⵀⴰⵜⵜⴰⵅ ⵖⴰⵔ ⵎⵓⵔⴷⴰⵅⴰⵢ, ⵖⴰⵔ ⵡⴰⵥⵥⴰⵢ ⵉ ⵉⴵⴰⵏ ⵥⵥⴰⵜ ⵉ ⵜⴻⵡⵡⴰⵔⵜ ⵏ ⵓⵊⴻⴵⵉⴷ 7 ⵓⵛⴰ ⵎⵓⵔⴷⴰⵅⴰⵢ ⵉⵄⴰⵡⴻⴷ ⴰⵙ ⵎⴰⵔⵔⴰ ⵎⵉⵏ ⴷ ⴰⵙ ⵉⵎⵙⴰⵔⴻⵏ ⴷ ⵛⵃⴰⵍ ⵏ ⵏⵏⵓⵇⴰⵔⵜ ⵉ ⵉⵡⴰⵄⴻⴷ ⵀⴰⵎⴰⵏ ⴰⴷ ⵜ ⵉⵡⵥⴻⵏ ⵉ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵏ ⵓⵊⴻⴵⵉⴷ, ⵉ ⵡⵓⴷⴰⵢⴻⵏ, ⵎⴰⵃⴻⵏⴷ ⴰⴷ ⵜⴻⵏ ⵢⴰⵔⴻⴷⴷⴻⴵ. 8 ⵏⴻⵜⵜⴰ ⵉⵡⵛⴰ ⴰⵙ ⵉⵛⵜ ⵏ ⵜⵉⵍⴻⵎⵜ ⵏ ⵜⵉⵔⴰ ⵏ ⵓⵥⴻⵔⴼ ⵉ ⵉⵜⵜⵡⴰⵙⵙⵓⴼⴼⵖⴻⵏ ⴷⵉ ⵛⵓⵛⴰⵏ ⵎⴰⵃⴻⵏⴷ ⴰⴷ ⵜⴻⵏ ⴰⵔⴻⴷⴷⴵⴻⵏ ⵃⵉⵎⴰ ⴰⴷ ⵜⵜ ⵉⵙⵙⵛⴻⵏ ⵉ ⵉⵙⵜⵉⵔ ⵓ ⴰⴷ ⴰⵙ ⵢⵉⵏⵉ ⵓ ⴰⴷ ⴰⵙ ⵢⵓⵎⵓⵔ ⵎⴰⵃⴻⵏⴷ ⴰⴷ ⵜⵔⴰⵃ ⵖⴰⵔ ⵓⵊⴻⴵⵉⴷ ⴰⴷ ⴰⵙ ⵜⵥⴰⵡⴳ ⵓ ⵎⴰⵃⴻⵏⴷ ⴰⴷ ⴰⵙ ⵜᵉⵜⵜⴰⵔ ⵥⵥⴰⵜ ⵉ ⵡⵓⴷⴻⵎ ⵏⵏⴻⵙ ⴷⵉ ⵟⵟⵡⴻⵄ ⵏ ⵍⴳⴻⵏⵙ ⵏⵏⴻⵙ. 9 ⵢⵓⴷⴻⴼ ⵀⴰⵜⴰⵅ ⵓⵛⴰ ⵉⵄⴰⵡⴻⴷ ⴰⵡⴰⵍⴻⵏ ⵏ ⵎⵓⵔⴷⴰⵅⴰⵢ ⵉ ⵉⵙⵜⵉⵔ.

10 ⵜⴻⵙⵙⵉⵡⴻⵍ ⵉⵙⵜⵉⵔ ⵉ ⵀⴰⵜⴰⵅ ⵓⵛⴰ ⵜⵓⵎⵓⵔ ⵉ-ⵜ ⴰⴷ ⵢⵉⵏⵉ ⵉ ⵎⵓⵔⴷⴰⵅⴰⵢ:

11 “ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏ ⵓⵊⴻⴵⵉⴷ ⴷ ⵎⴰⵔⵔⴰ ⵍⴳⴻⵏⵙ ⴷⵉ ⵍⵄⴰⵎⴰⵍⴰⵜ ⵏ ⵓⵊⴻⴵⵉⴷ ⵙⵙⵏⴻⵏ ⵎⵍⵉⵃ ⴱⴻⵍⵍⵉ ⵎⴰⵔⵔⴰ ⵡⵉ ⵉ ⵖⴰ ⵢⴰⴷⴼⴻⵏ ⵖⴰⵔ ⵓⵊⴻⴵⵉⴷ ⴷⴻⴳ ⵡⴰⵥⵥⴰⵢ ⵏ ⵥⵥⴰⵜ, ⴰⵎ ⵡⴰⵔ ⴷⴷ-ⵉⵜⵜⵡⴰⵍⴰⵖⴰ, ⴷ ⴰⵔⵢⴰⵥ ⵏⵉⵖ ⴷ ⵜⴰⵎⵖⴰⵔⵜ ⵉ ⵉⴵⴰ, ⴰⵇⴰ ⴷⵉⵏ ⵅⴰⵙ ⵉⵊⵊ ⵏ ⵍⴻⵃⴽⴰⵎ ⵡⴰⵀⴰ, ⴷ ⵍⵎⴻⵡⵜ, ⵎⵖⵉⵔ ⵎⴰⵍⴰ ⴰⵊⴻⴵⵉⴷ ⵉⵙⵙⵡⵉⵥⵥⴻⴹ ⴰⵙ ⵜⴰⵖⵖⴰⵔⴻⵛⵜ ⵏⵏⴻⵙ ⵏ ⵡⵓⵔⴻⵖ, ⵃⵉⵎⴰ ⴰⴷ ⵉⵇⵇⵉⵎ ⵉⴷⴷⴰⵔ. ⵜⵍⴰⵜⵉⵏ ⵏ ⵡⵓⵙⵙⴰⵏ-ⴰ ⵉ ⵉⵄⴷⵓⵏ ⵡⴰⵔ ⵅⴰⴼⵉ ⴷⴷ-ⵉⵍⴰⵖⴰ ⵃⴻⴷ ⵎⴰⵃⴻⵏⴷ ⴰⴷ ⴷⴷ-ⴰⵙⴻⵖ ⵖⴰⵔ ⵓⵊⴻⴵⵉⴷ.”

12 ⵄⴰⵡⴷⴻⵏ ⵏⵉⵜⵏⵉ ⴰⵡⴰⵍⴻⵏ ⵏ ⵉⵙⵜⵉⵔ ⵉ ⵎⵓⵔⴷⴰⵅⴰⵢ.

13 ⵅⴻⵏⵏⵉ ⵉⵏⵏⴰ ⵎⵓⵔⴷⴰⵅⴰⵢ, ⴰⴷ ⵉⵏⵉⵏ ⵉ ⵉⵙⵜⵉⵔ ⵄⴰⵡⴻⴷ: “ⵡⴰⵔ ⵜⵅⴻⵎⵎⴰⵎ, ⴰⵇⴰ ⵛⴻⵎ ⵜⵥⴻⵎⵎⴰⵔⴻⴷ ⴰⴷ ⵜⴰⵔⴻⵡⵍⴻⴷ ⴷⵉ ⵜⴰⴷⴷⴰⵔⵜ ⵏ ⵓⵊⴻⴵⵉⴷ ⴽⵜⴰⵔ ⵅ ⵎⴰⵔⵔⴰ ⵡⵓⴷⴰⵢⴻⵏ ⵏⵏⴻⵖⵏⵉ.

14 ⵎⵉⵏⵥⵉ ⵎⴰⵍⴰ ⵛⴻⵎ ⵜⴻⵙⵙⴻⵖⴷⴻⴷ ⵙ ⵜⵉⴷⴻⵜⵜ ⴷⵉ ⵍⵡⴻⵇⵜ-ⴰ, ⴰⴷ ⴷⵉⵏ ⵜⵉⵍⵉ ⵍⴻⴼⵙⴰⵙⴻⵜ ⴷ ⵓⵙⴻⵍⵍⴻⴽ ⵉ ⵡⵓⴷⴰⵢⴻⵏ ⵥⴻⴳ ⵡⴻⴱⵔⵉⴷ ⵏⵏⴻⵖⵏⵉ, ⵎⴰⵛⴰ ⵛⴻⵎ ⴷ ⵜⴰⴷⴷⴰⵔⵜ ⵏ ⴱⴰⴱⴰⵎ ⴰⴷ ⴰⵔⴻⴷⴷⴵⴻⵏ. ⵡⵉ ⵉⵙⵙⵏⴻⵏ ⵎⴰ ⵜⴻⴽⵙⵉⴷ ⴰⵡⴻⵇⵇⴰⵔ ⵉⴳⴻⵍⵍⴷⴻⵏ ⵖⴰⵔ ⵉⵛⵜ ⵏ ⵍⵡⴻⵇⵜ ⴰⵎ ⵜⴰⵏⵉⵜⴰ?” ^□  

15 ⵅⴻⵏⵏⵉ ⵉⵏⵏⴰ ⵉⵙⵜⵉⵔ, ⵉⵜⵜⵅⴻⵚⵚⴰ ⴰⴷ ⴷⴷ-ⴰⵔⵔⴻⵏ ⵅ ⵎⵓⵔⴷⴰⵅⴰⵢ:

16 “ⵓⵢⵓⵔ, ⵙⵎⵓⵏ ⵎⴰⵔⵔⴰ ⵓⴷⴰⵢⴻⵏ ⵉ ⵉⵥⴻⴷⴷⵖⴻⵏ ⴷⵉ ⵛⵓⵛⴰⵏ ⵓⵛⴰ ⵥⵓⵎⵎⴻⵎ ⴰⵢⵉ ⵉ ⵏⴻⵛⵛ, ⵡⴰⵔ ⵜᵉⵜⵜⴻⵎ, ⵡⴰⵔ ⵜⵙⴻⵙⵙⴻⵎ ⵜⵍⴰⵜⴰ ⵏ ⵡⵓⵙⵙⴰⵏ, ⴵⵉⵍⴻⵜ ⴷ ⵡⴰⵙⵙ. ⵓⵍⴰ ⴷ ⵏⴻⵛⵛ ⴷ ⵜⴻⵎⵙⴻⵅⵅⴰⵔⵉⵏ ⵜⵉⴱⵍⵉⵖⵉⵏ ⵉⵏⵓ ⴰⴷ ⵥⵓⵎⵎⴻⵏⵜ ⴰⵎⵎⵓ, ⵓⵛⴰ ⵅⴻⵏⵏⵉ ⴰⴷ ⴰⴷⴼⴻⵖ ⵖⴰⵔ ⵓⵊⴻⴵⵉⴷ ⵎⵉⵏ ⵡⴰⵔ ⵉⵛⵓⵡⵡⴰⵔ ⵄⵍⴰⵃⵙⴰⴱ ⴰⵥⴻⵔⴼ. ⵎⴰⵍⴰ ⴼⵏⵉⵖ, ⵅⴻⵏⵏⵉ ⴼⵏⵉⵖ!”

17 ⵅⴻⵏⵏⵉ ⵉⴼⴼⴻⵖ ⵎⵓⵔⴷⴰⵅⴰⵢ ⵓⵛⴰ ⵉⴳⴳⴰ ⴰⵎ ⵎⴰⵎⵎⴻⵛ ⵎⴰⵔⵔⴰ ⵎⵉⵏ ⵅ ⵉ ⴷ ⴰⵙ ⵜⵓⵎⵓⵔ ⵉⵙⵜⵉⵔ.