ⵊⵉⴷⵄⵓⵏ ⴷ ⵍⵎⴰⵍⴰⴽ ⵏ ⵙⵉⴷⵉ
6
1 ⵎⴰⵛⴰ ⴰⵢⵜ ⵏ ⵉⵙⵔⴰⵉⵍ ⴳⴳⵉⵏ ⵎⵉⵏ ⵉⴵⴰⵏ ⴷ ⴰⵄⴻⴼⴼⴰⵏ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ ⵓⵛⴰ ⵉⵙⴻⵍⵍⴻⵎ ⵉ-ⵜⴻⵏ ⵙⵉⴷⵉ ⴷⴻⴳ ⵓⴼⵓⵙ ⵏ ⵎⵉⴷⵢⴰⵏ, ⵉⵊⵊ ⵏ ⵍⵎⵉⵊⴰⵍ ⵏ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ. 2 ⵓⵎⵉ ⵜⵓⵖⴰ ⴰⴼⵓⵙ ⵏ ⵎⵉⴷⵢⴰⵏ ⵉⵊⵀⴻⴷ ⵅ ⵉⵙⵔⴰⵉⵍ, ⴳⴳⵉⵏ ⴰⵢⵜ ⵏ ⵉⵙⵔⴰⵉⵍ ⵉ ⵢⵉⵅⴻⴼ ⵏⵙⴻⵏ ⵉⴼⵔⴰⵏ ⴷⴻⴳ ⵉⴷⵓⵔⴰⵔ ⴷ ⵉⵅⴻⵔⴷⵓⵙⴻⵏ ⴷ ⵍⵇⴻⵍⵄⴰⵜ ⴹⵉⴷⴷ ⵉ ⵎⵉⴷⵢⴰⵏ. 3 ⴰⵡⴰⵔⵏⵉ ⵍⴰⵎⵉ ⵉⵥⴰⵔⵄ ⵉⵙⵔⴰⵉⵍ, ⵅⴻⵏⵏⵉ ⵎⵉⴷⵢⴰⵏ ⵜⵓⵖⴰ ⵉⵜⵜⴳⴻⵄⵄⴻⴷ, ⵓⵛⴰ ⵓⵍⴰ ⴷ ⵉⵄⴰⵎⴰⵍⵉⵇⵉⵢⵢⴻⵏ ⴷ ⴰⵢⵜ ⵏ ⵛⵛⴰⵔⵇ ⴳⴻⵄⵄⴷⴻⵏ ⴹⵉⴷⴷ ⵏⵙⴻⵏ. 4 ⵏⵉⵜⵏⵉ ⵡⵜⵉⵏ ⵉⵇⵉⴹⴰⵏ ⵏⵙⴻⵏ ⴹⵉⴷⴷ ⵏⵙⴻⵏ ⵓⵛⴰ ⴰⵔⴻⴷⴷⴵⴻⵏ ⵍⵖⵉⴵⴻⵜ ⵏ ⵜⴻⵎⵎⵓⵔⵜ ⴰⵍ ⵊⵊⵡⴰⵢⴻⵀ ⵏ ⵖⴰⵥⵥⴰ. ⵏⵉⵜⵏⵉ ⵡⴰⵔ ⵊⵊⵉⵏ ⴷⵉ ⵉⵙⵔⴰⵉⵍ ⵉ ⵥⵉ ⵖⴰ ⵉⴷⴷⴰⵔ ⴱⵏⴰⴷⴻⵎ, ⵍⴰ ⴷ ⵓⴵⵉ, ⵍⴰ ⴷ ⴰⴼⵓⵏⴰⵙ ⵓⵍⴰ ⴷ ⴰⵖⵢⵓⵍ, 5 ⵎⴰⵖⴰⵔ ⵏⵉⵜⵏⵉ ⴳⴻⵄⵄⴷⴻⵏ ⵙ ⵜⵃⵉⵎⵔⵉⵡⵉⵏ ⵏⵙⴻⵏ ⴷ ⵉⵇⵉⴹⴰⵏ ⵏⵙⴻⵏ ⵓⵛⴰ ⵓⵙⵉⵏ-ⴷⴷ ⴰⵎ ⵉⵊⵊ ⵏ ⵡⴻⵢⵍⴰⴼ ⵏ ⵜⵎⵓⵔⵖⵉ. ⵡⴰⵔ ⵉⵥⴻⵎⵎⴰⵔ ⴰⴷ ⵜⵜⵡⴰⵃⴻⵙⴱⴻⵏ ⴰⴽ-ⴷ ⵉⵍⴻⵖⵎⴰⵏ ⵏⵙⴻⵏ ⵓⵛⴰ ⵏⵉⵜⵏⵉ ⵓⴷⴼⴻⵏ ⵜⴰⵎⵎⵓⵔⵜ ⵃⵉⵎⴰ ⴰⴷ ⵜⵜ ⴰⵔⴻⴷⴷⴵⴻⵏ. 6 ⴰⵎⵎⵓ ⵉⵥⵍⴻⴹ ⵉⵙⵔⴰⵉⵍ ⴰⵟⵟⴰⵙ ⵥⵉ ⵙⵙⵉⴱⴱⴻⵜ ⵏ ⵎⵉⴷⵢⴰⵏ. ⵓⵛⴰ ⵅⴻⵏⵏⵉ ⵙⵖⵓⵢⵢⴻⵏ ⴰⵢⵜ ⵏ ⵉⵙⵔⴰⵉⵍ ⵖⴰⵔ ⵙⵉⴷⵉ. 7 ⵅⵎⵉ ⵙⵖⵓⵢⵢⴻⵏ ⴰⵢⵜ ⵏ ⵉⵙⵔⴰⵉⵍ ⵖⴰⵔ ⵙⵉⴷⵉ ⴷⵉ ⵙⵙⵉⴱⴱⴻⵜ ⵏ ⵎⵉⴷⵢⴰⵏ, ⵉⵎⵙⴰⵔ, 8 ⴰⵇⴰ ⵙⵉⴷⵉ ⵉⵙⵙⴻⴽⴽ-ⴷⴷ ⵉⵊⵊ ⵏ ⵡⴻⵔⵢⴰⵥ, ⵉⵊⵊ ⵏ ⵓⵏⴰⴱⵉ, ⵖⴰⵔ ⴰⵢⵜ ⵏ ⵉⵙⵔⴰⵉⵍ. ⵏⴻⵜⵜⴰ ⵉⵏⵏⴰ ⴰⵙⴻⵏ: “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ: ‘ⵏⴻⵛⵛ ⵙⵙⴳⴻⵄⵄⴷⴻⵖ ⴽⴻⵏⵏⵉⵡ ⵥⵉ ⵎⵉⵚⵔⴰ ⵓ ⵙⵙⵓⴼⴼⵖⴻⵖ-ⴷⴷ ⴽⴻⵏⵏⵉⵡ ⵥⵉ ⵜⴰⴷⴷⴰⵔⵜ ⵏ ⵜⴻⵙⵎⵓⵖⵉ. 9 ⵏⴻⵛⵛ ⴼⴻⴽⴽⴻⵖ-ⴷⴷ ⴽⴻⵏⵏⵉⵡ ⵥⴻⴳ ⵓⴼⵓⵙ ⵏ ⵉⵎⵉⵚⵔⵉⵢⵢⴻⵏ ⵓ ⵥⴻⴳ ⵓⴼⵓⵙ ⵏ ⵎⴰⵔⵔⴰ ⵉⵏⵏⵉ ⴽⴻⵏⵏⵉⵡ ⵉⵃⵚⴰⵔⴻⵏ. ⵏⴻⵛⵛ ⵓⵥⵥⵍⴻⵖ ⵅⴰⵙⴻⵏ ⵥⵥⴰⵜ ⵉ ⵡⵓⴷⴻⵎ ⵏⵡⴻⵎ ⵓ ⵡⵛⵉⵖ ⴰⵡⴻⵎ ⵜⴰⵎⵎⵓⵔⵜ ⵏⵙⴻⵏ.
10 ⵏⴻⵛⵛ ⵏⵏⵉⵖ ⴰⵡⴻⵎ: ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ, ⵡⴰⵔ ⵜⴻⴳⴳⵯⴷⴻⵎ ⵥⵉ ⵉⵔⴻⴱⴱⵉⵜⴻⵏ ⵏ ⵉⵎⵓⵔⵉⵢⵢⴻⵏ, ⵉⵏⵏⵉ ⴷⵉ ⵜⴻⵎⵎⵓⵔⵜ ⵏⵙⴻⵏ ⵜⵥⴻⴷⴷⵖⴻⵎ!’ ⵎⴰⵛⴰ ⴽⴻⵏⵏⵉⵡ ⵡⴰⵔ ⵜⴻⵙⵍⵉⵎ ⵖⴰⵔ ⵜⵎⵉⵊⵊⴰ ⵉⵏⵓ.” ■
11 ⵅⴻⵏⵏⵉ ⵢⵓⵙⴰ-ⴷⴷ ⵍⵎⴰⵍⴰⴽ ⵏ ⵙⵉⴷⵉ ⵓⵛⴰ ⵉⵇⵇⵉⵎ ⵙⴰⴷⵓ ⵜⵛⴻⵊⵊⵓⵔⴰ ⵏ ⵢⵉⴳⴳ ⵏⵏⵉ ⵖⴰⵔ ⵄⴰⴼⵔⴰ, ⵜⴻⵏⵏⵉ ⵏ ⵢⵓⵡⴰⵛ, ⴰⴱⵉⵄⴰⵥⴰⵔⵉ. ⵎⵎⵉⵙ ⵊⵉⴷⵄⵓⵏ ⵜⵓⵖⴰ-ⵜ ⴷⵉⵏ ⵉⵙⵙⴰⵔⵡⴰⵜ ⵉⵔⴷⴻⵏ ⴷⵉ ⵜⵙⵉⵔⵜ ⵏ ⵓⴹⵉⵍ ⵃⵉⵎⴰ ⴰⴷ ⵜⴻⵏ ⵉⵙⵙⴰⵔⵡⴻⵍ ⴰⵎⵎⵓ ⵥⵥⴰⵜ ⵉ ⵡⵓⴷⴻⵎ ⵏ ⵎⵉⴷⵢⴰⵏ. □
12 ⵍⴻⵅⴷⴻⵏⵏⵉ ⵉⴱⴰⵏ ⴰⵙ-ⴷⴷ ⵍⵎⴰⵍⴰⴽ ⵏ ⵙⵉⴷⵉ, ⵉⵏⵏⴰ ⴰⵙ: “ⵙⵉⴷⵉ ⴰⴽⵉⴷⴻⴽ, ⴰ ⵛⴻⴽ, ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ!”
13 ⵊⵉⴷⵄⵓⵏ ⵉⵏⵏⴰ ⴰⵙ: “ⴰ, ⵙⵉⴷⵉ, ⵎⴰⵍⴰ ⵙⵉⴷⵉ ⴰⵇⴰ-ⵜ ⴰⴽⵉⴷⵏⴻⵖ, ⵎⴰⵢⴻⵎⵎⵉ ⵉ ⴷ ⴰⵏⴻⵖ ⵉⵍⵇⴻⴼ ⵅⴻⵏⵏⵉ ⵎⴰⵔⵔⴰ ⵓⵢⴰ ⵓ ⵎⴰⵏⵉ ⴵⴰⵏⵜ ⵎⴰⵔⵔⴰ ⵍⴻⵄⵊⴰⵢⴻⴱ ⵉ ⵅ ⴷ ⴰⵏⴻⵖ ⵙⵙⵉⵡⵍⴻⵏ ⵉⴱⴰⴱⴰⵜⴻⵏ ⵏⵏⴻⵖ, ⵓⵎⵉ ⵏⵉⵜⵏⵉ ⵏⵏⴰⵏ: ‘ⵎⴰ ⵡⴰⵔ ⴷ ⴰⵏⴻⵖ-ⴷⴷ ⵉⵙⵙⵓⴼⴼⴻⵖ ⵙⵉⴷⵉ ⵥⵉ ⵎⵉⵚⵔⴰ?’ ⵎⴰⵛⴰ ⵍⴻⵅⵅⵓ ⵉⵏⴹⴰⵔ ⴰⵏⴻⵖ ⵙⵉⴷⵉ, ⵉⵙⴻⵍⵍⴻⵎ ⴰⵏⴻⵖ ⴷⴻⴳ ⵉⴼⴰⵙⵙⴻⵏ ⵏ ⵎⵉⴷⵢⴰⵏ.”
14 ⵔⴻⵅⴷⴻⵏⵏⵉ ⵉⴷⵡⴻⵍ-ⴷⴷ ⵖⴰⵔⴻⵙ ⵙⵉⴷⵉ, ⵉⵏⵏⴰ: “ⵓⵢⵓⵔ ⴷⵉ ⵊⵊⴻⵀⴷ ⵏⵏⴻⴽ ⵡⴰⵏⵉⵜⴰ ⵓⵛⴰ ⴰⴷ ⵜⴼⴻⴽⴽⴻⴷ ⵉⵙⵔⴰⵉⵍ ⵥⴻⴳ ⵓⴼⵓⵙ ⵏ ⵎⵉⴷⵢⴰⵏ. ⵎⴰ ⵏⴻⵛⵛ ⵡⴰⵔ ⵛⴻⴽ-ⴷⴷ ⵙⵙⴻⴽⴽⴻⵖ?” ■
15 ⵎⴰⵛⴰ ⵏⴻⵜⵜⴰ ⵢⴰⵔⵔⴰ-ⴷⴷ ⵅⴰⵙ: “ⴰ, ⵙⵉⴷⵉ, ⵙ ⵎⵉⵏⵥⵉ ⵉ ⵖⴰ ⴼⴻⴽⴽⴻⵖ ⵉⵙⵔⴰⵉⵍ? ⵅⵥⴰⵔ ⵍⵡⴰⵛⵓⵏ ⵉⵏⵓ ⴷ ⵜⴰⵎⴻⵥⵍⵓⴹⵜ ⵇⴰⵄ ⴷⵉ ⵎⴰⵏⴰⵙⵙⴰ ⵓ ⵏⴻⵛⵛ ⴷ ⴰⵎⵓⴷⵔⵓⵙ ⵇⴰⵄ ⴷⵉ ⵜⴰⴷⴷⴰⵔⵜ ⵏ ⴱⴰⴱⴰ.”
16 ⵉⵏⵏⴰ ⴰⵙ ⵙⵉⴷⵉ: “ⵎⵉⵏⵥⵉ ⵏⴻⵛⵛ ⴰⴷ ⵉⵍⵉⵖ ⴰⴽⵉⴷⴻⴽ, ⴰⴷ ⵜⵖⴻⵍⴱⴻⴷ ⵎⵉⴷⵢⴰⵏ, ⴰⵅⵎⵉ ⴷ ⵉⵊⵊ ⵏ ⵡⴻⵔⵢⴰⵥ ⵡⴰⵀⴰ.”
17 ⵅⴻⵏⵏⵉ ⵉⵏⵏⴰ ⴰⵙ ⵏⴻⵜⵜⴰ: “ⵎⴰⵍⴰ ⵅⴻⵏⵏⵉ ⵓⴼⵉⵖ ⴰⵔⴹⴰ ⴷⵉ ⵜⵉⵟⵟⴰⵡⵉⵏ ⵏⵏⴻⴽ, ⵅⴻⵏⵏⵉ ⵉⵡⵛⴰ ⴰⵢⵉ ⵉⵛⵜ ⵏ ⵍⴻⵄⵍⴰⵎⴻⵜ, ⴰⵇⴰ ⴷ ⵛⴻⴽ ⵙⵉⵎⴰⵏⵜ ⵏⵏⴻⴽ ⵉ ⴷⴷ ⴽⵉⴷⵉ ⵉⵙⵙⴰⵡⴰⵍⴻⵏ.
18 ⵡⴰⵔ ⵙⵙⴰ ⵜⵜⵔⴰⵃ ⵛⴰ, ⴰⵍ ⵖⴰⵔⴻⴽ ⴷⴷ ⵖⴰ ⵄⴻⵇⴱⴻⵖ ⴰⴷ ⵜⵉⵍⵉ ⵉⵡⵢⴻⵖ-ⴷⴷ ⵜⴰⵔⵥⴻⴼⵜ ⵉⵏⵓ ⵓ ⴰⴷ ⵜⵜ-ⵉ-ⴷⴷ-ⵙⵙⴰⵔⵙⴻⵖ ⵥⵥⴰⵜⴻⴽ.” ⵏⴻⵜⵜⴰ ⵉⵏⵏⴰ: “ⴰⴷ ⵇⵇⵉⵎⴻⵖ ⵖⴰⵔⴻⵙ ⴰⵍ ⴷⴷ ⵖⴰ ⵜⵄⴻⵇⴱⴻⴷ.”
19 ⵓⵛⴰ ⵢⵓⴷⴻⴼ ⵊⵉⴷⵄⵓⵏ, ⵉⵙⵙⴻⵡⵊⴻⴷ ⵉⵊⵊ ⵏ ⵉⵖⴰⵢⴹ ⴷ ⴰⵎⴻⵥⵢⴰⵏ ⴷ ⵉⵖⵔⵓⵎⴻⵏ ⴱⵍⴰ ⴰⵖⵔⵓⵎ ⵥⴻⴳ ⵢⵉⵊⵊ ⵏ ⵉⴼⴰ ⵏ ⵡⴰⵔⴻⵏ. ⵏⴻⵜⵜⴰ ⵉⵙⵙⴰⵔⵙ ⴰⵢⵙⵓⵎ ⴷⵉ ⵜⵚⵓⴵⴻⵜ, ⵉⴳⴳⴰ ⴰⵔⵔⵡⴰ ⴷⴻⴳ ⵉⵛⵜ ⵏ ⵜⴻⵢⴷⵓⵔⵜ ⵓⵛⴰ ⵢⵉⵡⵉ ⵎⴰⵏ ⴰⵢⴰ ⵖⴰⵔⴻⵙ ⵖⴰⵔ ⴱⴰⵔⵔⴰ ⵙⴰⴷⵓ ⵜⵛⴻⵊⵊⴰⵔⵜ ⵏ ⵢⵉⴳⴳ ⵓⵛⴰ ⵉⵙⵙⴰⵔⵙ ⴰⵙ ⵎⴰⵏ ⴰⵢⴰ. 20 ⵎⴰⵛⴰ ⵉⵏⵏⴰ ⴰⵙ ⵍⵎⴰⵍⴰⴽ ⵏ ⵙⵉⴷⵉ: “ⴽⵙⵉ ⴰⵢⵙⵓⵎ ⴷ ⵉⵖⵔⵓⵎⴻⵏ ⴱⵍⴰ ⴰⵏⵜⵓⵏ ⵓ ⵜⴻⵙⵙⴰⵔⵙⴻⴷ ⵜⴻⵏ ⴷⴰ ⵅ ⵜⴻⵚⴹⴰⵔⵜ ⵓⵛⴰ ⵥⴻⴵⴻⵄ ⵅⴰⵙ ⴰⵔⵔⵡⴰ!” ⵓⵛⴰ ⴰⵎⵎⵓ ⵉ ⵜ ⵉⴳⴳⴰ. 21 ⵅⴰⵙ ⵓⵛⴰ ⵉⵙⴰⵔⵔⴻⵃ ⵍⵎⴰⵍⴰⴽ ⵏ ⵙⵉⴷⵉ ⵜⴰⵖⵖⴰⵔⵛⵜ ⵉ ⵜⵓⵖⴰ ⵖⴰⵔⴻⵙ ⴷⴻⴳ ⵓⴼⵓⵙ ⵏⵏⴻⵙ, ⵉⵀⴰⴷⴰ ⵥⵥⴰⵢⴻⵙ ⴰⵢⵙⵓⵎ ⴷ ⵉⵖⵔⵓⵎⴻⵏ ⴱⵍⴰ ⴰⵏⵜⵓⵏ. ⵍⴻⵅⴷⴻⵏⵏⵉ ⵜⴳⴻⵄⵄⴻⴷ ⵜⵎⴻⵙⵙⵉ ⵥⵉ ⵜⴻⵚⴹⴰⵔⵜ ⵜⴻⵛⵛⴰ ⴰⵢⵙⵓⵎ ⴷ ⵉⵖⵔⵓⵎⴻⵏ. ⵅⴻⵏⵏⵉ ⵉⵏⵏⵓⴼⵙⴻⵍ ⵍⵎⴰⵍⴰⴽ ⵏ ⵙⵉⴷⵉ ⵅ ⵜⵉⵟⵟⴰⵡⵉⵏ ⵏ ⵊⵉⴷⵄⵓⵏ.
22 ⵓⵎⵉ ⵊⵉⴷⵄⵓⵏ ⵉⵥⵔⴰ, ⴰⵇⴰ ⵜⵓⵖⴰ-ⵜ ⴷ ⵍⵎⴰⵍⴰⴽ ⵏ ⵙⵉⴷⵉ, ⵉⵏⵏⴰ ⵊⵉⴷⵄⵓⵏ: “ⴰ ⵙⵉⴷⵉ ⵉⵏⵓ, ⵙⵉⴷⵉ, ⴰⵇⴰ ⵏⴻⵛⵛ ⵥⵔⵉⵖ ⵍⵎⴰⵍⴰⴽ ⵏ ⵙⵉⴷⵉ ⴰⵖⴻⵎⴱⵓⴱ ⴷⴻⴳ ⵓⵖⴻⵎⴱⵓⴱ.” 23 ⵎⴰⵛⴰ ⵙⵉⴷⵉ ⵢⴰⵔⵔⴰ-ⴷⴷ ⵅⴰⵙ: “ⴰⴷ ⴽⵉⴷⴻⴽ ⵢⵉⵍⵉ ⵍⴻⵀⵏⴰ, ⵡⴰⵔ ⵜⵜⴻⴳⴳⵯⴻⴷ ⵛⴰ, ⵛⴻⴽ ⵡⴰⵔ ⵜⵜⵎⴻⵜⵜⵉⴷ.” 24 ⵓⵛⴰ ⵊⵉⴷⵄⵓⵏ ⵉⴱⵏⴰ ⴷⵉⵏⵏⵉ ⵉⵊⵊ ⵏ ⵓⵄⴰⵍⵟⴰⵔ ⵉ ⵙⵉⴷⵉ, ⵉⴳⴳⴰ ⴰⵙ: “ⵙⵉⴷⵉ ⴷ ⵍⴻⵀⵏⴰ!” ⴰⵇⴰ-ⵜ ⴷⵉ ⵄⴰⴼⵔⴰ ⵏ ⴰⵢⵜ ⵏ ⴰⴱⵉⵄⴰⵥⴰⵔⵉ ⵖⴰⵔⴻⵙ ⴰⵍ ⴰⵙⵙ-ⴰ.
ⵊⵉⴷⵄⵓⵏ ⵉⵖⴹⴻⵍ ⴰⵄⴰⵍⵟⴰⵔ ⵏ ⴱⴰⵄⴰⵍ
25 ⴷⵉ ⴵⵉⵍⴻⵜ ⵏⵏⵉ ⵙⵉⵎⴰⵏⵜ ⵏⵏⴻⵙ, ⵉⵎⵙⴰⵔ ⴰⵇⴰ ⵙⵉⴷⵉ ⵉⵏⵏⴰ ⴰⵙ: “ⴽⵙⵉ ⵉⵊⵊ ⵏ ⵓⵢⴻⵏⴷⵓⵥ ⴷ ⴰⵎⴻⵥⵢⴰⵏ ⵏ ⵉⴼⵓⵏⴰⵙⴻⵏ ⵉ ⵉⴵⴰⵏ ⵏ ⴱⴰⴱⴰⵛ, ⴰⵢⴻⵏⴷⵓⵥ ⵡⵉⵙⵙ ⵜⵏⴰⵢⴻⵏ ⵏⵏⵉ ⵖⴰⵔⴻⵙ ⵉⴵⴰ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⵓⵛⴰ ⵖⴹⴻⵍ ⴰⵄⴰⵍⵟⴰⵔ ⵏ ⴱⴰⵄⵍ ⵉ ⵉⴵⴰⵏ ⵏ ⴱⴰⴱⴰⵛ ⵓ ⵥⴷⴻⵎ ⵜⴰⵔⴻⴱⴱⵉⵜ ⵏ ⵛⵡⴰⵔⵜⵉ ⵏⵏⵉ ⵥⵥⴰⵜⴻⵙ! 26 ⴱⵏⴰ ⵅⴻⵏⵏⵉ ⵉⵊⵊ ⵏ ⵓⵄⴰⵍⵟⴰⵔ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵅ ⵜⵇⵉⵛⵛⴰⵜ ⵏ ⵍⵇⴻⵍⵄⴰ ⴰⵢⴰ, ⵙⴻⵡⵊⴻⴷ ⵉ-ⵜ, ⵓⵛⴰ ⴽⵙⵉ ⴰⵢⴻⵏⴷⵓⵥ ⵡⵉⵙⵙ ⵜⵏⴰⵢⴻⵏ ⵓⵛⴰ ⴰⵡⵢⵉ ⵜ-ⵉ-ⴷⴷ ⴷ ⵜⵖⴰⵔⵚⵜ ⵏ ⵡⴻⵛⵎⴰⴹ ⵙ ⵓⴽⴻⵛⵛⵓⴹ ⵏ ⵜⵔⴻⴱⴱⵉⵜ ⵏ ⵛⵡⴰⵔⵜⵉ ⵏⵏⵉ ⵉⵜⵜⵅⴻⵚⵚⴰ ⴰⴷ ⵜⵥⴻⴷⵎⴻⴷ.”
27 ⵅⴻⵏⵏⵉ ⵉⴽⵙⵉ ⵊⵉⴷⵄⵓⵏ ⵄⴻⵛⵔⴰ ⵏ ⵢⴻⵔⵢⴰⵥⴻⵏ ⵥⴻⴳ ⵉⵎⵙⴻⵅⵅⴰⵔⴻⵏ ⵏⵏⴻⵙ ⵓⵛⴰ ⵉⴳⴳⴰ ⴰⵎ ⵎⴰⵎⵎⴻⵛ ⵉ ⴷ ⴰⵙ ⵉⵏⵏⴰ ⵙⵉⴷⵉ. ⵎⴰⵛⴰ ⵓⵎⵉ ⵏⴻⵜⵜⴰ ⵉⴳⴳⵯⴻⴷ ⵥⵉ ⵍⵡⴰⵛⵓⵏ ⵏ ⵜⴰⴷⴷⴰⵔⵜ ⵏ ⴱⴰⴱⴰⵙ ⵓ ⵥⴻⴳ ⵢⴻⵔⵢⴰⵥⴻⵏ ⵏ ⵜⴻⵏⴷⵉⵏⵜ ⴰⴷ ⵜ ⵉⴳⴳ ⵙ ⵡⴰⵙⵙ, ⵉⵎⵙⴰⵔ ⴱⴻⵍⵍⵉ ⵉⴳⴳⴰ ⵉ-ⵜ ⴷⵉ ⴵⵉⵍⴻⵜ. 28 ⵓⵎⵉ ⴷⴷ-ⴽⴽⴰⵔⴻⵏ ⵢⴻⵔⵢⴰⵥⴻⵏ ⵏ ⵜⴻⵏⴷⵉⵏⵜ ⵜⵉⵡⴻⵛⵛⴰ ⵥⵉⵛ, ⵥⵔⵉⵏ ⵏⵉⵜⵏⵉ ⴰⵇⴰ ⴰⵄⴰⵍⵟⴰⵔ ⵏ ⴱⴰⵄⵍ ⵉⵜⵜⵡⴰⵀⴷⴻⵎ ⵓⵛⴰ ⵜᵉⵜⵜⵡⴰⵥⴷⴻⵎ ⵜⵔⴻⴱⴱⵉⵜ ⵏ ⵛⵡⴰⵔⵜⵉ ⵏⵏⵉ ⵥⵥⴰⵜⴻⵙ ⵓ ⴰⵢⴻⵏⴷⵓⵥ ⵡⵉⵙⵙ ⵜⵏⴰⵢⴻⵏ ⵉⵜⵜⵡⴰⴱⴻⵅⵅⴰⵔ ⵅ ⵓⵄⴰⵍⵟⴰⵔ ⵉ ⴷⵉⵏ ⵉⵜⵜⵡⴰⴱⵏⴰⵏ. 29 ⵓⵛⴰ ⵏⵏⴰⵏ ⵉ ⵡⴰⵢⴰⵡⵢⴰ: “ⵎⴰⵏ ⵡⴻⵏ ⵉⴳⴳⵉⵏ ⴰⵢⴰ?” ⵏⵉⵜⵏⵉ ⵙⵙⴻⵇⵙⴰⵏ, ⴰⵔⵥⵓⵏ ⵓⵛⴰ ⵏⵏⴰⵏ: “ⵊⵉⴷⵄⵓⵏ, ⵎⵎⵉⵙ ⵏ ⵢⵓⵡⴰⵛ, ⵉ-ⵜ ⵉⴳⴳⵉⵏ.” 30 ⵅⴻⵏⵏⵉ ⵏⵏⴰⵏ ⵢⴻⵔⵢⴰⵥⴻⵏ ⵏ ⵜⴻⵏⴷⵉⵏⵜ ⵉ ⵢⵓⵡⴰⵛ: “ⵙⵓⴼⴻⵖ-ⴷⴷ ⵎⵎⵉⵛ ⵃⵉⵎⴰ ⴰⴷ ⵉⵎⵎⴻⵜ, ⵎⵉⵏⵥⵉ ⵏⴻⵜⵜⴰ ⵉⵖⴹⴻⵔ ⴰⵄⴰⵍⵟⴰⵔ ⵏ ⴱⴰⵄⵍ ⵓ ⵎⵉⵏⵥⵉ ⵏⴻⵜⵜⴰ ⵉⵥⴷⴻⵎ ⵜⴰⵔⴻⴱⴱⵉⵜ ⵏ ⵛⵡⴰⵔⵜⵉ ⵉ ⵥⵥⴰⵜⴻⵙ ⵉⴵⴰⵏ.” 31 ⵢⵓⵡⴰⵛ ⵢⴰⵔⵔⴰ-ⴷⴷ ⵅ ⵎⴰⵔⵔⴰ ⵉⵏⵏⵉ ⵉ ⴷⴷ ⵖⴰⵔⴻⵙ ⵉⴱⴻⴷⴷⴻⵏ: “ⵎⴰ ⵜⴻⵅⵙⴻⵎ ⴰⴷ ⵜⵎⴻⵏⵖⴻⵎ ⵉ ⴱⴰⵄⵍ? ⵎⴰ ⵜⴻⵅⵙⴻⵎ ⴰⴷ ⵜ ⵜⴻⵙⵙⵏⴻⵊⵎⴻⵎ? ⵡⴻⵏⵏⵉ ⴰⴽⵉⴷⴻⵙ ⵉ ⵖⴰ ⵉⴱⴻⴷⴷⴻⵏ, ⴰⴷ ⵉⵜⵜⵡⴰⵏⴻⵖ ⴷⵉ ⵚⵚⴱⴻⵃ-ⴰ ⵡⴰⵏⵉⵜⴰ. ⵎⴰⵍⴰ ⵏⴻⵜⵜⴰ ⴷ ⵉⵊⵊ ⵏ ⴰⵔⴻⴱⴱⵉ, ⴻⵊⵊ ⵉ-ⵜ ⴰⴷ ⵉⵎⵏⴻⵖ ⵉ ⵢⵉⵅⴻⴼ ⵏⵏⴻⵙ ⵏⵏⵉⵜ, ⵎⵉⵏⵥⵉ ⵖⴻⴹⵍⴻⵏ ⴰⵄⴰⵍⵟⴰⵔ ⵏⵏⴻⵙ.” 32 ⴷⴻⴳ ⵡⴰⵙⵙ ⵏⵏⵉ ⵉⵍⴰⵖⴰ ⴰⵙ-ⴷⴷ ⵉ ⵊⵉⴷⵄⵓⵏ ⵢⴰⵔⴰⴱⴱⴰⵄⵍ, ⵎⵉⵏ ⵉⵅⵙ ⴰⴷ ⵢⵉⵏⵉ: “ⴱⴰⵄⵍ ⵉⵎⵏⴻⵖ ⴰⴽⵉⴷⴻⵙ, ⵎⴰⵖⴰⵔ ⵏⴻⵜⵜⴰ ⵉⵖⴹⴻⵍ ⴰⵄⴰⵍⵟⴰⵔ ⵏⵏⴻⵙ.”
ⵊⵉⴷⵄⵓⵏ ⵉⵜⵜⴰⵔ ⵉⵛⵜ ⵏ ⵍⴻⵄⵍⴰⵎⴻⵜ
33 ⵎⴰⵔⵔⴰ ⵎⵉⴷⵢⴰⵏ ⴷ ⵄⴰⵎⴰⵍⵉⵇ ⴷ ⴰⵢⵜ ⵏ ⵛⵛⴰⵔⵇ ⵎⵓⵏⴻⵏ ⵓⵛⴰ ⵥⵡⴰⵏ-ⴷⴷ ⵍ’ⵓⵔⴷⵓⵏ ⵓⵛⴰ ⵡⵜⵉⵏ ⵉⵇⵉⴹⴰⵏ ⵏⵙⴻⵏ ⴷⵉ ⵍⴻⵡⴹⴰ ⵏ ⵜⴻⵖⵥⵓⵔⵜ ⵏ ⵢⴰⵥⵔⴰⵄⵉⵍ. 34 ⴰⵔⵔⵓⵃ ⵏ ⵙⵉⴷⵉ ⵉⵙⵙⵢⴰⵔⴹ ⵉ ⵊⵉⴷⵄⵓⵏ ⵓⵛⴰ ⵏⴻⵜⵜⴰ ⵉⵚⵓⴹ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ ⵓⵛⴰ ⵉⵍⴰⵖⴰ-ⴷⴷ ⵅ ⴰⵢⵜ ⵏ ⴰⴱⵉⵄⴰⵥⴰⵔ ⵎⴰⵃⴻⵏⴷ ⴰⴷ ⴱⴻⴷⴷⴻⵏ ⴰⵡⴰⵔⵏⵉ ⴰⵙ. 35 ⵉⵙⵙⴻⴽⴽ ⵉⵔⴻⵇⵇⴰⵙⴻⵏ ⴷⵉ ⵎⴰⵔⵔⴰ ⵎⴰⵏⴰⵙⵙⴰ ⵓⵛⴰ ⵉⵜⵜⵡⴰⵍⴰⵖⴰ ⵎⴰⵏⴰⵙⵙⴰ ⵎⴰⵃⴻⵏⴷ ⴰⴷ ⴱⴻⴷⴷⴻⵏ ⵏⵉⵜⵏⵉ ⴰⵡⴰⵔⵏⵉ ⴰⵙ. ⵅⴻⵏⵏⵉ ⵉⵙⵙⴻⴽⴽ ⵉⵔⴻⵇⵇⴰⵙⴻⵏ ⵖⴰⵔ ⴰⵛⵉⵔ ⵓ ⵖⴰⵔ ⵣⴰⴱⵓⵍⵓⵏ ⵓ ⵖⴰⵔ ⵏⴰⴼⵜⴰⵍⵉ ⵓⵛⴰ ⵏⵉⵜⵏⵉ ⴳⴻⵄⵄⴷⴻⵏ ⵎⴰⵃⴻⵏⴷ ⴰⴷ ⵜⴻⵏ ⵎⵎⴻⵍⵇⴰⵏ.
36 ⵅⴰⵙ ⵓⵛⴰ ⵉⵏⵏⴰ ⵊⵉⴷⵄⵓⵏ ⵉ ⴰⵔⴻⴱⴱⵉ: “ⵎⴰⵍⴰ ⵛⴻⴽ ⵜⴻⵅⵙⴻⴷ ⵙ ⵜⵉⴷⴻⵜⵜ ⴰⴷ ⵜⴼⴻⴽⴽⴻⴷ ⵉⵙⵔⴰⵉⵍ ⵙ ⵓⴼⵓⵙ ⵉⵏⵓ ⴰⵎ ⵎⴰⵎⵎⴻⵛ ⵉ ⴷ ⴰⵢⵉ ⵜⴻⵏⵏⵉⴷ, 37 ⵅⵥⴰⵔ, ⵅⴻⵏⵏⵉ ⵏⴻⵛⵛ ⴰⴷ ⵙⵙⴰⵔⵙⴻⵖ ⵜⴰⵀⵉⴹⵓⵔⵜ ⵏ ⵜⴰⴹⵓⴼⵜ ⵅ ⵓⵏⴻⴷⵔⴰⵔ. ⵎⴰⵍⴰ ⵉⵡⴹⴰ ⵏⵏⴷⴰ ⵎⵖⵉⵔ ⵅ ⵜⴰⴹⵓⴼⵜ ⵡⴰⵀⴰ ⵓ ⵜⴰⵎⵎⵓⵔⵜ ⵎⴰⵔⵔⴰ ⵜⴻⵇⵇⵉⵎ ⵜⵓⵥⴻⵖ, ⵅⴻⵏⵏⵉ ⵙⵙⵏⴻⵖ ⵏⴻⵛⵛ, ⴰⵇⴰ ⵛⴻⴽ ⴰⴷ ⵜⴻⵙⵙⵏⴻⵊⵎⴻⴷ ⵉⵙⵔⴰⵉⵍ ⵙ ⵓⴼⵓⵙ ⵉⵏⵓ, ⴰⵎ ⵎⴰⵎⵎⴻⵛ ⵉ ⴷ ⴰⵢⵉ ⵜⴻⵏⵏⵉⴷ.” 38 ⵓ ⴰⵎⵎⵓ ⵉ ⵜⴻⵎⵙⴰⵔ. ⵜⵉⵡⴻⵛⵛⴰ ⵏⵏⴻⵙ ⵏⴻⵜⵜⴰ ⵉⴽⴽⴰⵔ ⵥⵉⵛ ⵓⵛⴰ ⵉⵥⵍⵉ ⵜⴰⵀⵉⴹⵓⵔⵜ ⵓⵛⴰ ⵉⵥⴻⵎⵎ-ⴷⴷ ⵏⵏⴷⴰ ⵥⵉ ⵜⵀⵉⴹⵓⵔⵜ, ⵉⵛⵜ ⵏ ⵟⵟⴰⵡⵢⴰ ⵜⴻⵛⵛⵓⵔ ⵙ ⵡⴰⵎⴰⵏ.
39 ⵅⴰⵙ ⵓⵛⴰ ⵉⵏⵏⴰ ⵊⵉⴷⵄⵓⵏ ⵉ ⴰⵔⴻⴱⴱⵉ: “ⵜⵜⵥⴰⵡⴳⴻⵖ ⵡⴰⵔ ⵅⴰⴼⵉ ⵢⴰⵔⴻⵇⵇ ⵡⴻⵖⴹⴰⴱ ⵏⵏⴻⴽ ⵎⴰⵍⴰ ⵏⴻⵛⵛ ⵙⵙⵉⵡⵍⴻⵖ ⵉⵛⵜ ⵏ ⵜⵡⴰⵍⴰ ⵏⵏⴻⵖⵏⵉⵜ. ⴻⵊⵊ ⴰⵢⵉ ⴰⴷ ⵇⴻⴵⴱⴻⵖ ⵙ ⵜⵀⵉⴹⵓⵔⵜ ⵄⴰⴷ ⵉⵛⵜ ⵏ ⵜⵡⴰⵍⴰ ⵏⵏⴻⵖⵏⵉ ⵡⴰⵀⴰ ⵓⵛⴰ ⴰⴷ ⵜⴻⵇⵇⵉⵎ ⵜⵀⵉⴹⵓⵔⵜ ⵜⵓⵥⴻⵖ ⵓ ⵅ ⵎⴰⵔⵔⴰ ⵜⴰⵎⵎⵓⵔⵜ ⴰⴷ ⴷⵉⵏ ⵢⵉⵍⵉ ⵏⵏⴷⴰ.” ■ 40 ⵓⵛⴰ ⴷⵉ ⴵⵉⵍⴻⵜ ⵏⵏⵉ ⵉⴳⴳⴰ ⵉ-ⵜ ⵙⵉⴷⵉ ⴰⵎⵎⵓ: ⵜⴰⵀⵉⴹⵓⵔⵜ ⵡⴰⵀⴰ ⵉ ⵉⵇⵇⵉⵎⴻⵏ ⵜⵓⵥⴻⵖ ⵓ ⵜⵓⵖⴰ ⵏⵏⴷⴰ ⵅ ⵎⴰⵔⵔⴰ ⵜⴰⵎⵎⵓⵔⵜ.