ⵉⵥⵍⵉ ⵏ ⵓⵖⴻⵍⵍⴻⴱ ⵏ ⴷⴰⴱⵓⵔⴰ ⴷ ⴱⴰⵔⴰⵇ
5
1 ⴷⴻⴳ ⵡⴰⵙⵙ ⵏⵏⵉ ⵜⵖⴻⵏⵏⴻⵊ ⴷⴰⴱⵓⵔⴰ ⴰⴽ-ⴷ ⴱⴰⵔⴰⵇ, ⵎⵎⵉⵙ ⵏ ⴰⴱⵉⵏⵓⵄⴰⵎ, ⵜⴻⵏⵏⴰ: 2 “ⴱⴰⵔⴽⴻⵎ ⵙⵉⴷⵉ ⵉ ⵉⵊⴻⵟⵟⴰⵢⴻⵏ ⵏ ⵓⵛⴻⵡⵡⴰⴼ ⵉⵜⵜⵡⴰⴼⴻⵙⵙⵢⴻⵏ ⴷⵉ ⵉⵙⵔⴰⵉⵍ,
ⵙ ⵓⵟⴻⵡⵡⴻⵄ ⵏ ⵍⴳⴻⵏⵙ ⵙ ⵍⵅⴰⴹⴰⵔ!”
3 ⵙⵍⴻⵎ, ⴽⴻⵏⵏⵉⵡ, ⵉⵊⴻⴵⵉⴷⴻⵏ, ⵙⵃⴻⵙⵙⴻⵎ, ⴽⴻⵏⵏⵉⵡ, ⴰⵢⵜ ⵏ ⵊⵊⴻⵀⴷ!
ⵏⴻⵛⵛ ⴰⴷ ⵖⴻⵏⵏⵊⴻⵖ ⵉⵥⵍⴰⵏ ⵉ ⵙⵉⴷⵉ,
ⵏⴻⵛⵛ ⴰⴷ ⵥⴻⵀⵀⴷⴻⵖ ⵉ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ.
4 ⴰ ⵙⵉⴷⵉ, ⵓⵎⵉ ⵛⴻⴽ ⴷⴷ-ⵜⴻⴼⴼⵖⴻⴷ ⵥⵉ ⵙⴰⵄⵉⵔ,
ⵓⵎⵉ ⵛⴻⴽ ⵜⵓⵖⴰ ⴷⴷ ⵜⴻⴳⴳⵓⵔⴻⴷ ⵥⴻⴳ ⵉⵢⵢⴰⵔ ⵏ ⵉⴷⵓⵎ,
ⵜⴻⵏⵀⴻⵥⵥ ⵜⴻⵎⵎⵓⵔⵜ, ⵢⴰⵔⵊⵉⵊ ⵓⵊⴻⵏⵏⴰ,
ⵡⴰⵀ, ⵓⵍⴰ ⴷ ⵉⵙⴻⵢⵏⵓⵜⴻⵏ ⴼⴰⵔⵔⵖⴻⵏ-ⴷⴷ ⵙ ⵡⴰⵎⴰⵏ. ■
5 ⵉⴷⵓⵔⴰⵔ ⴼⴻⵙⵢⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ,
ⴰⴷⵔⴰⵔ ⵏⵏⵉ ⵏ ⵙⵉⵏⴰ, ⵉⴼⵙⵉ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ. ■
6 ⴷⴻⴳ ⵡⵓⵙⵙⴰⵏ ⵏ ⵛⴰⵎⵊⴰⵔ, ⵎⵎⵉⵙ ⵏ ⵄⴰⵏⴰⵜ,
ⴷⴻⴳ ⵡⵓⵙⵙⴰⵏ ⵏ ⵢⴰⵄⵉⵍ, ⵇⵇⵉⵎⴻⵏ ⵉⴱⵔⵉⴷⴻⵏ ⵅⵍⴰⵏ,
ⵓ ⵉⵏⵏⵉ ⵜⵓⵖⴰ ⵉⴳⴳⵓⵔⴻⵏ ⵅ ⵜⴻⴱⵔⵉⴷⵉⵏ,
ⵜⵜⴻⴽⴽⴻⵏ ⵉⵎⴻⵙⵔⴰⵇ ⵉⵄⴰⵔⵔⵇⴻⵏ.
7 ⵉⵎⵊⴰⵀⴻⴷⴻⵏ ⵡⴰⵔ ⵇⵇⵉⵎⴻⵏ, ⵡⴰⵔ ⵇⵇⵉⵎⴻⵏ ⴷⵉ ⵉⵙⵔⴰⵉⵍ,
ⵖⴰⵔⴻⵙ ⴰⵍⴰⵎⵉ ⵏⴻⵛⵛ, ⴷⴰⴱⵓⵔⴰ,
ⴽⴽⴰⵔⴻⵖ ⵏⴻⵛⵛ, ⵢⴻⵎⵎⴰⵙ ⵏ ⵉⵙⵔⴰⵉⵍ.
8 ⵓⵎⵉ ⵉⴼⴰⵔⵥ ⵍⴳⴻⵏⵙ ⵉⵔⴻⴱⴱⵉⵜⴻⵏ ⵉⵎⴰⵢⵏⵓⵜⴻⵏ,
ⵅⴻⵏⵏⵉ ⵜⵓⵖⴰ ⴷⵉⵏ ⵉⵊⵊ ⵏ ⵓⵎⴻⵏⵖⵉ ⵉⵏⴻⵇⵇⴻⵏ ⵖⴰⵔ ⵜⴻⵡⵡⵓⵔⴰ.
ⵜⴰⵙⴻⴷⴷⴰⵔⵜ ⵏ ⵓⵄⴻⵙⴽⴰⵔ ⴷ ⵓⵃⵔⵉⵛ,
ⵡⴰⵔ ⵜⵜⵡⴰⵥⴰⵔⴻⵏ ⵛⴰ ⵊⴰⵔ ⴰⵔⴻⴱⵄⴰ-ⴰⵍⴰⴼ ⴷⵉ ⵉⵙⵔⴰⵉⵍ?
9 ⵓⵍ ⵉⵏⵓ ⴰⴽ-ⴷ ⵉⵎⴳⴻⵡⵡⴰⴷⴻⵏ ⵏ ⵉⵙⵔⴰⵉⵍ,
ⵉⵏⵏⵉ ⵉⵟⴻⵡⵡⵄⴻⵏ ⵉⵅⴻⴼ ⵏⵙⴻⵏ ⵊⴰⵔ ⵍⴳⴻⵏⵙ ⵙ ⵍⵅⴰⴹⴰⵔ,
ⵍⴱⴰⵔⴰⴽⴰ ⵉ ⵙⵉⴷⵉ!
10 ⴰ ⴽⴻⵏⵏⵉⵡ, ⵉⵏⵏⵉ ⵉⵏⵏⴰⵢⴻⵏ ⵅ ⵜⴻⵖⵢⴰⵍ ⴷ ⵜⵉⵛⴻⵎⵍⴰⵍⵉⵏ,
ⴽⴻⵏⵏⵉⵡ ⵉⵏⵏⵉ ⵉⵜⵜⵖⵉⵎⴰⵏ ⵅ ⵜⵥⴰⵔⴱⵉⵢⵢⵉⵏ
ⴷ ⴽⴻⵏⵏⵉⵡ ⵉⵏⵏⵉ ⵉⴳⴳⵓⵔⴻⵏ ⴷⴻⴳ ⵡⴻⴱⵔⵉⴷ, ⵙⵉⵡⵍⴻⵎ ⵅ ⵎⴰⵏ ⴰⵢⴰ!
11 ⵙ ⵜⵎⵉⵊⵊⴰ ⵏ ⵉⵎⵊⴻⴱⴱⴰⴷⴻⵏ ⵏ ⵍⵇⴻⵡⵙ, ⴷⵉⵏ ⵊⴰⵔ ⵡⴰⵏⵓⵜⴻⵏ,
ⴰⵇⴰ ⵉⵜⵜⵡⴰⵙⴻⵍ ⵡⴰⵡⴰⵍ ⵅ ⵜⵎⴻⴳⴳⴰ ⵉⵙⴻⴳⴳⴷⴻⵏ ⵏ ⵙⵉⴷⵉ,
ⵜⵉⵎⴻⴳⴳⴰ ⵉⵙⴻⴳⴳⴷⴻⵏ ⵏ ⵉⵎⵊⴰⵀⴰⴷⴻⵏ ⵏ ⵉⵙⵔⴰⵉⵍ.
ⵅⴻⵏⵏⵉ ⵉⵀⵡⴰ-ⴷⴷ ⵍⴳⴻⵏⵙ ⵏ ⵙⵉⴷⵉ ⵖⴰⵔ ⵜⴻⵡⵡⵓⵔⴰ ⵏ ⵜⴻⵏⴷⵉⵏⵜ.
12 ⴼⴰⵇ, ⴼⴰⵇ, ⴷⴰⴱⵓⵔⴰ, ⴼⴰⵇ, ⴼⴰⵇ, ⵙⵉⵡⴻⵍ ⵙ ⵢⵉⵊⵊ ⵏ ⵉⵥⵍⵉ!
ⴽⴽⴰⵔ, ⴱⴰⵔⴰⵇ, ⵃⴻⴱⴱⴻⵙ ⵉⵎⴻⵃⴱⴰⵙ ⵏⵏⴻⴽ,
ⴰ ⵛⴻⴽ, ⵎⵎⵉⵙ ⵏ ⴰⴱⵉⵏⵓⵄⴰⵎ!
13 ⵅⴻⵏⵏⵉ ⵉⵀⵡⴰ ⵡⵉ ⵉⵇⵇⵉⵎⴻⵏ ⵏ ⴰⵢⵜ ⵏ ⵊⵊⴻⵀⴷ ⵊⴰⵔ ⵍⴳⴻⵏⵙ,
ⵙⵉⴷⵉ ⵉⵀⵡⴰ-ⴷⴷ ɣ̮ⴰⵔⵉ ⴰⴽ-ⴷ ⴰⵢⵜ ⵏ ⴱⵓ-ⵜⴻⵖⵔⵓⴹⵜ.
14 ⵣⴻⴳ ⵉⴼⵔⴰⵢⵉⵎ ⵉⵏⵏⵉ ⴰⵥⵡⴰⵔ ⵏⵙⴻⵏ ⴷⵉ ⵄⴰⵎⴰⵍⵉⵇ
ⵓ ⴰⵡⴰⵔⵏⵉ ⴰⵛ ⴱⵉⵏⵢⴰⵎⵉⵏ ⵊⴰⵔ ⵍⵄⴻⵙⴽⴰⵔⴰⵜ ⵏ ⵢⴻⵡⴷⴰⵏ ⵏⵏⴻⴽ.
ⵣⵉ ⵎⴰⵅⵉⵔ ⵀⵡⴰⵏ ⵉⵎⴳⴻⵡⵡⴰⴷⴻⵏ,
ⵓ ⵥⵉ ⵣⴰⴱⵓⵍⵓⵏ ⵉⵏⵏⵉ ⵉⵟⵟⴼⴻⵏ ⴰⵄⴻⴽⴽⴰⵥ ⵏ ⵜⵉⵔⴰ.
15 ⵍⵃⵓⴽⴽⴰⵎ ⵏ ⵉⵙⵙⴰⴽⴰⵔ ⵀⵡⴰⵏ-ⴷⴷ ⴰⴽ-ⴷ ⴷⴰⴱⵓⵔⴰ
ⵓⵛⴰ ⴰⵎⴻⵛⵏⴰⵡ ⵎⴰⵎⵎⴻⵛ ⵉⵜⵜⵡⴰⵙⵙⴻⴽⴽ ⵉⵙⵙⴰⵅⴰⵔ,
ⴰⵎⵎⵓ ⵉ ⵉⵜⵜⵡⴰⵙⵙⴻⴽⴽ ⵓⵍⴰ ⴷ ⴱⴰⵔⴰⵇ ⴷⵉ ⵍⴻⵡⴹⴰ ⵏ ⵜⴻⵖⵥⵓⵔⵜ.
ⴷⵉ ⵍⴻⵚⴼⵓⴼ ⵏ ⵔⵓⴱⵉⵏ ⵜⵓⵖⴰ ⵉⵅⴰⵔⵔⵉⵚⴻⵏ ⵏ ⵡⵓⵍ ⴷ ⴰⵟⵟⴰⵙ.
16 ⵎⴰⵢⴻⵎⵎⵉ ⵜⴻⵇⵇⵉⵎⴻⴷ ⵊⴰⵔ ⵉⵖⴻⵏⴷⵉⴼⴻⵏ,
ⵜⴻⵙⵙⵃⴻⵙⵙⴻⴷ ⵖⴰⵔ ⵡⴻⵙⴱⵓⵄⵔⵉⵢ ⵏ ⵜⵃⵉⵎⵔⵉⵡⵉⵏ?
ⴷⵉ ⵍⴻⵚⴼⵓⴼ ⵏ ⵔⵓⴱⵉⵏ ⴳⴳⵉⵏ ⴰⴷ ⴱⴻⵇⵇⵛⴻⵏ ⴷⴻⴳ ⵡⵓⵍ ⴰⵟⵟⴰⵙ.
17 ⵊⵉⵍⵄⴰⴷ ⵉⵇⵇⵉⵎ ⵉⵥⴻⴷⴷⴻⵖ ⵅ ⵓⵊⴻⵎⵎⴰⴹ ⵏ ⵍ'ⵓⵔⴷⵓⵏ
ⵓ ⵎⴰⵢⴻⵎⵎⵉ ⵉⵇⵇⵉⵎ ⴷⴰⵏ ⵖⴰⵔ ⵜⵖⴰⵔⵔⵓⴱⴰ ⴰⵎ ⵉⵊⵊ ⵏ ⵓⴱⴰⵔⵔⴰⵏⵉ?
ⴰⵛⵉⵔ ⵉⵇⵇⵉⵎ ⵖⴰⵔ ⵜⵎⴰ ⵏ ⵍⴻⴱⵃⴰⵔ
ⵓⵛⴰ ⵉⵇⵇⵉⵎ ⵉⵥⴻⴷⴷⴻⵖ ⵖⴰⵔ ⵉⴼⵜⴰⵙⴻⵏ ⵏⵏⴻⵙ.
18 ⵣⴰⴱⵓⵍⵓⵏ ⴷ ⵉⵊⵊ ⵏ ⵍⴳⴻⵏⵙ ⵉⵙⴻⴱⴱⴻⵍ ⵜⵓⴷⴰⵔⵜ ⵏⵏⴻⵙ ⴰⵍ ⵍⵎⴻⵡⵜ,
ⴰⵎ ⵜ ⵉⴳⴳⴰ ⵓⵍⴰ ⴷ ⵏⴰⴼⵜⴰⵍⵉ ⴷⵉ ⵍⴻⴳⵄⵓⴷⵉ ⵏ ⵡⴰⵥⵥⴰⵢ ⵏ ⵓⵎⴻⵏⵖⵉ.
19 ⵉⵊⴻⴵⵉⴷⴻⵏ ⵓⵙⵉⵏ-ⴷⴷ, ⵎⴻⵏⵖⴻⵏ.
ⵍⴻⵅⴷⴻⵏⵏⵉ ⵎⵎⴻⵏⵖⴻⵏ ⵉⵊⴻⴵⵉⴷⴻⵏ ⵏ ⴽⴻⵏⵄⴰⵏ
ⴷⵉ ⵜⴰⵄⵏⴰⴽ ⵖⴰⵔ ⵡⴰⵎⴰⵏ ⵏ ⵎⴰⵊⵉⴷⴷⵓ.
ⵡⴰⵔ ⴽⵙⵉⵏ ⵎⴰⵛⴰ ⵜⴰⴽⴻⵛⵛⴰⴹⵜ ⵏ ⵏⵏⵓⵇⴰⵔⵜ.
20 ⵣⴻⴳ ⵓⵊⴻⵏⵏⴰ ⵎⵎⴻⵏⵖⴻⵏ,
ⵉⵜⵔⴰⵏ ⵎⴻⵏⵖⴻⵏ ⴰⴽ-ⴷ ⵙⵉⵙⴰⵔⴰ ⵥⵉ ⵜⴻⴱⵔⵉⴷⵉⵏ ⵏⵙⴻⵏ.
21 ⵉⵖⵥⴰⵔ ⵏ ⵇⵉⵛⵓⵏ ⵉⵡⵢⵉ ⵉ-ⵜⴻⵏ,
ⵜⵉⵖⵥⴰⵔⵜ ⵏ ⵎⴻⵛⵃⴰⵍ ⵓⵢⴰ, ⵜⵉⵖⵥⴰⵔⵜ ⵏ ⵇⵉⵛⵓⵏ,
ⵓⵢⵓⵔ ⵙ ⵊⵊⴻⵀⴷ, ⴰ ⵍⴻⵄⵎⴰⵔ ⵉⵏⵓ.
22 ⵍⴻⵅⴷⴻⵏⵏⵉ ⴷⴷⵥⴻⵏ ⵜⵉⵛⴻⴹⵢⵉⵏ ⵏ ⵉⵢⵙⴰⵏ ⵥⴻⴳ ⵓⵥⴻⵔⵥⴻⵔ
ⵉ ⵥⵉ ⵉⵥⵥⴻⵔⵥⵔⴻⵏ ⵉⵏⵏⵉ ⵉⵊⴻⵀⴷⴻⵏ ⵙ ⵢⵉⵢⵙⴰⵏ ⵏⵙⴻⵏ.
23 ⵏⴻⵄⵍⴻⵎ ⵎⵉⵔⵓⵥ, ⵉⵏⵏⴰ ⵍⵎⴰⵍⴰⴽ ⵏ ⵙⵉⴷⵉ,
ⵏⴻⵄⵍⴻⵎ ⵉⵎⴻⵥⴷⴰⵖ ⵏⵏⴻⵙ ⵙ ⵉⵛⵜ ⵏ ⵏⵏⴻⵄⵍⴻⵜ,
ⵎⵉⵏⵥⵉ ⵡⴰⵔ ⴷⴷ-ⵓⵙⵉⵏ ⵃⵉⵎⴰ ⴰⴷ ⵡⵛⴻⵏ ⴰⴼⵓⵙ ⵉ ⵙⵉⴷⵉ,
ⵃⵉⵎⴰ ⴰⴷ ⵡⵛⴻⵏ ⴰⴼⵓⵙ ⵉ ⵙⵉⴷⵉ ⵙ ⴰⵢⵜ ⵏ ⴱⵓ-ⵜⴻⵖⵔⵓⴹⵜ.
24 ⵜⴻⵜⵜⵡⴰⴱⴰⵔⴻⴽ ⵢⴰⵄⵉⵍ, ⵜⴰⵎⵖⴰⵔⵜ ⵏ ⵃⴰⴱⵉⵔ, ⴰⵇⵉⵏⵉ,
ⵙⴻⵏⵏⴻⵊ ⵉ ⵎⴰⵔⵔⴰ ⵜⵉⵎⵖⴰⵔⵉⵏ.
ⵜⴻⵜⵜⵡⴰⴱⴰⵔⴻⴽ ⵏⴻⵜⵜⴰⵜ ⵙⴻⵏⵏⴻⵊ ⵉ ⵎⴰⵔⵔⴰ ⵜⵉⵎⵖⴰⵔⵉⵏ ⵉⵥⴻⴷⴷⵖⴻⵏ ⴷⴻⴳ ⵉⵇⵉⴹⴰⵏ.
25 ⵏⴻⵜⵜⴰ ⵉⵜⵜⴰⵔ ⴰⵎⴰⵏ, ⵏⴻⵜⵜⴰⵜ ⵜⴻⵡⵛⴰ ⴰⵙ ⴰⵖⵉ,
ⵜⵉⵡⵉ ⴰⵙ-ⴷⴷ ⵜⵔⵓⵙⵙⵉ ⴷⴻⴳ ⵉⵛⵜ ⵏ ⵟⵟⴻⴱⵚⵉ ⴷ ⴰⵎⴻⵇⵇⵔⴰⵏ ⴰⵟⵟⴰⵙ.
26 ⵙ ⵓⴼⵓⵙ ⵏⵏⴻⵙ ⵜⴻⵙⵙⵡⵉⵥⵥⴻⴹ ⵖⴰⵔ ⵍⴻⵡⵜⴻⴷ
ⵓ ⴰⴼⵓⵙⵉ ⵏⵏⴻⵙ ⵖⴰⵔ ⵡⴻⴼⴹⵉⵙ ⵏ ⵉⵅⴻⴷⴷⴰⵎⴻⵏ.
ⵏⴻⵜⵜⴰⵜ ⵜⴻⵡⵜⴰ ⵙⵉⵙⴰⵔⴰ, ⵜⴻⵍⴱⴻⵥ ⴰⵙ ⴰⵥⴻⴵⵉⴼ ⵏⵏⴻⵙ,
ⵜⵄⴻⴱⴱⴻⵥ ⵅⴰⵙ ⵓⵛⴰ ⵜⴻⵙⵙⵏⵓⵇⵇⴻⴱ ⴰⵙ ⴰⵖⴻⵥⴷⵉⵙ ⵏ ⵓⵥⴻⴵⵉⴼ ⵏⵏⴻⵙ.
27 ⵉⴽⵎⵓⵎⵎⴻⵛ ⵊⴰⵔ ⵉⴹⴰⵔⴻⵏ ⵏⵏⴻⵙ, ⵉⴱⴱⵓⵥⵥⴻⵍ, ⴰⵇⴰ ⵉⵥⵥⴻⵍ ⴷⵉⵏ.
ⴰⵇⴰ ⵉⴽⵎⵓⵎⵎⴻⵛ ⵊⴰⵔ ⵉⴹⴰⵔⴻⵏ ⵏⵏⴻⵙ, ⵉⴱⴱⵓⵥⵥⴻⵍ.
ⵓⵎⵉ ⵜⵓⵖⴰ ⵉⵜⵜⴻⴽⵎⵓⵎⵎⵓⵛ, ⵉⵡⴹⴰ ⴷⵉⵏ, ⵓⵛⴰ ⵉⵡⴹⴰ-ⴷⴷ ⵉⵍⴻⵇⵇⴻⴼ!
28 ⵣⵉ ⵍⴽⴰⵥⵉ ⵏⵏⴻⵙ ⵜⴻⵅⵥⴰⵔ-ⴷⴷ ⵢⴻⵎⵎⴰⵙ ⵏ ⵙⵉⵙⴰⵔⴰ ⵓⵛⴰ ⵜⴻⵙⵖⵓⵢⵢ ⵊⴰⵔ ⵉⵇⴹⵉⴱⴻⵏ ⵏ ⵡⵓⵥⵥⴰⵍ
‘ⵎⴰⵢⴻⵎⵎⵉ ⵉⵄⴻⵟⵟⴰⵍ ⵓⴽⴰⵔⵔⵓ ⵏⵏⴻⵙ ⴰⵎⵎⵓ ⴰⵟⵟⴰⵙ?
ⵎⴰⵢⴻⵎⵎⵉ ⵉⴽⴰⵔⵔⵓⵜⴻⵏ ⵏⵏⴻⵙ ⵇⵇⵉⵎⴻⵏ ⵡⴰⵔ ⴳⴳⵓⵔⴻⵏ ⵓⵍⴰ ⴷ ⵉⵛⵜ ⵏ ⵓⵚⵓⵔⵉⴼ?’
29 ⵉⵏⵏⵉ ⴷ ⵜⵉⵖⵎⵉⵙⵉⵏ ⴰⵟⵟⴰⵙ ⵊⴰⵔ ⵜⵊⴻⴵⵉⴷⵉⵏ ⵏⵏⴻⵙ ⴰⵔⵔⵉⵏⵜ-ⵉ-ⴷⴷ,
ⵓⵛⴰ ⵓⵍⴰ ⴷ ⵏⴻⵜⵜⴰⵜ ⵙⵉⵎⴰⵏⵜ ⵏⵏⴻⵙ ⵜⴰⵔⵔⴰ-ⴷⴷ ⵅ ⵎⵉⵏ ⵜⴻⵏⵏⴰ:
30 ‘ⵎⴰ ⵅⴻⵏⵏⵉ ⵏⵉⵜⵏⵉ ⵡⴰⵔ ⵓⴼⵉⵏ ⵡⴰⵍⵓ
ⵓⵛⴰ ⴰⵇⴰ ⴰⵜⴻⵏ ⵡⴰⵔ ⴳⴳⵓⵔ ⴰⴷ ⴱⴹⴰⵏ ⵜⴰⴽⴻⵛⵛⴰⴹⵜ?
ⵉ ⴽⵓⵍ ⴰⵔⵢⴰⵥ ⵉⵊⴻⵀⴷⴻⵏ ⵉⵛⵜ ⵏ ⵜⴻⵄⵥⴰⵔⴻⵛⵜ ⵏⵉⵖ ⵜⵏⴰⵢⴻⵏ ⵏ ⵜⴻⵄⵥⴰⵔⵉⵢⵢⵉⵏ?
ⵜⴰⴽⴻⵛⵛⴰⴹⵜ ⵏ ⵉⴽⴻⵜⵜⴰⵏⴻⵏ ⵉⵜⵜⵡⴰⵙⵇⴰⵔⴻⵇⵛⴻⵏ ⵉ ⵙⵉⵙⴰⵔⴰ,
ⵜⴰⴽⴻⵛⵛⴰⴹⵜ ⵏ ⵉⴽⴻⵜⵜⴰⵏⴻⵏ ⵉⵜⵜⵡⴰⵙⵇⴰⵔⴻⵇⵛⴻⵏ,
ⴰⴱⵓⵔⴹⴰ, ⵍⵅⴻⴷⵎⴻⵜ ⵏ ⵓⵎⵓⴷⵉ ⵖⴰⵔ ⵜⵏⴰⵢⴻⵏ ⵏ ⵉⵖⴻⵥⴷⵉⵙⴻⵏ
ⵥⴻⴳ ⵓⴽⴻⵜⵜⴰⵏ ⵉⵜⵜⵡⴰⵙⵇⴰⵔⴻⵇⵛⴻⵏ ⵉ ⵉⵔⴰⵡⴻⵏ,
ⴰⵎ ⵜⴽⴻⵛⵛⴰⴹⵜ?’
31 ⴰⵎⵎⵓ ⵉ ⵖⴰ ⵀⴻⵍⵍⴽⴻⵏ ⵍⵄⴻⴷⵢⴰⵏ ⵏⵏⴻⴽ, ⴰ ⵙⵉⴷⵉ,
ⵎⴰⵛⴰ ⵉⵏⵏⵉ ⵜ ⵉⵜⵜⴻⵅⵙⴻⵏ ⴰⴷ ⵉⵍⵉⵏ ⴰⵎ ⵜⴼⵓⵛⵜ
ⵉ ⴷⴷ-ⵉⵏⴻⵇⵇⴰⵔⴻⵏ ⴷⵉ ⵊⵊⴻⵀⴷ ⵏⵏⴻⵙ.”
ⵓⵛⴰ ⵜⴰⵎⵎⵓⵔⵜ ⵜⴰⵔⴻⵢⵢⴻⵃ ⴰⵔⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ.