1 ⵅⴻⵏⵏⵉ ⵉⵏⵏⴰ ⵙⵉⴷⵉ ⵉ ⵢⴰⵛⵓⵡⴰ: “ⵡⴰⵔ ⵜⵜⴻⴳⴳⵯⴻⴷ ⵓ ⵡⴰⵔ ⵜⴻⵊⵊⴻⴷ ⴰⴷ ⵉⵄⴳⴻⵥ ⵡⵓⵍ ⵏⵏⴻⴽ. ⴽⵙⵉ ⴰⴽⵉⴷⴻⴽ ⵎⴰⵔⵔⴰ ⵍⴳⴻⵏⵙ ⵏ ⵍⵄⴻⵙⴽⴰⵔ, ⴽⴽⴰⵔ, ⵜⵓⵢⵓⵔⴻⴷ ⵖⴰⵔ ⵄⴰⵢ! ⵅⵥⴰⵔ, ⵏⴻⵛⵛ ⴳⴳⵉⵖ ⴰⵊⴻⴵⵉⴷ ⵏ ⵄⴰⵢ ⴷ ⵍⴳⴻⵏⵙ ⵏⵏⴻⵙ ⴷ ⵜⴻⵏⴷⵉⵏⵜ ⵏⵏⴻⵙ ⴷ ⵜⴻⵎⵎⵓⵔⵜ ⵏⵏⴻⵙ ⴷⴻⴳ ⵓⴼⵓⵙ ⵏⵏⴻⴽ. ^■   2 ⵛⴻⴽ ⴰⴷ ⵜⴻⴳⴳⴻⴷ ⴰⴽ-ⴷ ⵄⴰⵢ ⵓ ⴰⴽ-ⴷ ⵓⵊⴻⴵⵉⴷ ⵏⵏⴻⵙ ⴰⵎ ⵎⴰⵎⵎⴻⵛ ⵜⴻⴳⴳⵉⴷ ⴰⴽ-ⴷ ⴰⵔⵉⵃⴰ ⵓ ⴰⴽ-ⴷ ⵓⵊⴻⴵⵉⴷ ⵏⵏⴻⵙ, ⴰⴷ ⵜⴻⴽⵙⵉⵎ ⵎⵖⵉⵔ ⵜⴰⴽⴻⵛⵛⴰⴹⵜ ⴷ ⵍⴻⴱⵀⴰⵢⴻⵎ ⵡⴰⵀⴰ ⵉ ⵢⵉⵅⴻⴼ ⵏⵡⴻⵎ. ⴻⴳⴳ ⴷⴻⴳ ⵡⴻⵄⵔⵓⵔ ⵏ ⵜⴻⵏⴷⵉⵏⵜ ⵉⵛⵜ ⵏ ⵜⴻⵅⵛⴻⴼⵜ.” ^■  

3 ⵓⵛⴰ ⵉⴽⴽⴰⵔ ⵢⴰⵛⵓⵡⴰ ⴰⴽ-ⴷ ⵎⴰⵔⵔⴰ ⵍⴳⴻⵏⵙ ⵏ ⵍⵄⴻⵙⴽⴰⵔ ⵃⵉⵎⴰ ⴰⴷ ⵉⴳⴻⵄⵄⴻⴷ ⵖⴰⵔ ⵄⴰⵢ. ⵉⵅⴹⴰⵔ ⵢⴰⵛⵓⵡⴰ ⵜⴻⵍⵜ-ⴰⵍⴰⴼ ⵏ ⵢⴻⵔⵢⴰⵥⴻⵏ, ⴰⵢⵜ ⵏ ⴱⵓ-ⵜⴻⵖⵔⵓⴹⵜ ⵉⵎⴻⵃⴹⴻⵏ, ⵓⵛⴰ ⵉⵙⵙⴻⴽⴽ ⵉ-ⵜⴻⵏ ⵙ ⴵⵉⵍⴻⵜ 4 ⵓⵛⴰ ⵢⵓⵎⵓⵔ ⵉ-ⵜⴻⵏ, ⵉⵏⵏⴰ: “ⵅⵥⴰⵔⴻⵎ, ⴰⴷ ⵜⴻⴳⴳⴻⵎ ⵜⴰⵅⵛⴻⴼⵜ ⵖⴰⵔ ⵡⴻⵄⵍⵓⵍ ⵏ ⵜⴻⵏⴷⵉⵏⵜ. ⵡⴰⵔ ⵜⵉⴳⴳⵯⴻⵊⴻⵎ ⴰⵟⵟⴰⵙ ⵅ ⵜⴻⵏⴷⵉⵏⵜ ⵓ ⵉⵍⵉⵎ ⵜⵃⴻⵥⵥⵎⴻⵎ. 5 ⵏⴻⵛⵛ ⴰⴷ ⴷⴷ-ⵇⴰⵔⵔⴱⴻⵖ ⵖⴰⵔ ⵜⴻⵏⴷⵉⵏⵜ ⴰⴽ-ⴷ ⵎⴰⵔⵔⴰ ⵍⴳⴻⵏⵙ. ⴰⴷ ⵉⵎⵙⴰⵔ ⵎⴰⵍⴰ ⴼⴼⵖⴻⵏ ⵉ ⵓⵎⵙⴰⴳⴰⵔ ⴰⴽⵉⴷⵏⴻⵖ ⴰⵎ ⵜⵡⴰⵍⴰⵜ ⵜⴰⵎⴻⵥⵡⴰⵔⵓⵜ, ⵅⴻⵏⵏⵉ ⴰⴷ ⵥⵥⴰⵢⵙⴻⵏ ⵏⴰⵔⵡⴻⵍ ⵥⵥⴰⵜ ⵉ ⵡⵓⴷⴻⵎ ⵏⵙⴻⵏ. 6 ⵏⵉⵜⵏⵉ ⴰⴷ ⴰⵏⴻⵖ ⴷⴷ-ⴹⴼⴰⵔⴻⵏ ⵖⴰⵔⴻⵙ ⴰⵍ ⵜⴻⵏ-ⴷⴷ-ⵏⴻⵙⵙⵉⴳⴳⵯⴻⵊ ⵅ ⵜⴻⵏⴷⵉⵏⵜ, ⵎⵉⵏⵥⵉ ⵏⵉⵜⵏⵉ ⴰⴷ ⵉⵏⵉⵏ: ‘ⵏⵉⵜⵏⵉ ⴰⵔⴻⵡⵍⴻⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⵖ ⴰⵎ ⵜⵡⴰⵍⴰⵜ ⵜⴰⵎⴻⵥⵡⴰⵔⵓⵜ.’ ⴰⵎⵎⵓ ⵉ ⵥⵥⴰⵢⵙⴻⵏ ⵖⴰ ⵏⴰⵔⵡⴻⵍ ⵥⵥⴰⵜ ⵉ ⵡⵓⴷⴻⵎ ⵏⵙⴻⵏ. 7 ⵅⴻⵏⵏⵉ ⴽⴻⵏⵏⵉⵡ ⴰⴷ ⵜⴻⴽⴽⴰⵔⴻⵎ ⵥⴻⴳ ⵡⴻⵛⴱⴰⵔ, ⴰⴷ ⵜᵉⵟⵟⴼⴻⵎ ⵜⴰⵏⴷⵉⵏⵜ, ⵎⵉⵏⵥⵉ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ, ⴰⴷ ⵜⵜ ⵉⵡⵛ ⴷⴻⴳ ⵓⴼⵓⵙ ⵏⵡⴻⵎ. 8 ⵓⵛⴰ ⴰⴷ ⵉⵎⵙⴰⵔ ⵅ ⵎⵉⵏⵏⵉ ⵉ ⵖⴰ ⵜⵉⵍⵉ ⵜᵉⵟⵟⴼⴻⵎ ⵜⴰⵏⴷⵉⵏⵜ, ⴰⴷ ⵜⴻⵙⵙⴰⵔⵖⴻⵎ ⵜⴰⵏⴷⵉⵏⵜ ⵙ ⵜⵎⴻⵙⵙⵉ. ⵉⵜⵜⵅⴻⵚⵚⴰ ⴰⴷ ⵜⴻⴳⴳⴻⵎ ⵄⵍⴰⵃⵙⴰⴱ ⴰⵡⴰⵍ ⵏ ⵙⵉⴷⵉ. ⵅⵥⴰⵔⴻⵎ, ⵏⴻⵛⵛ ⴰⵇⴰ ⵓⵎⵓⵔⴻⵖ ⴽⴻⵏⵏⵉⵡ.”

9 ⵅⴻⵏⵏⵉ ⵉⵙⵙⴻⴽⴽ ⵉ-ⵜⴻⵏ ⵢⴰⵛⵓⵡⴰ ⵓⵛⴰ ⵏⵉⵜⵏⵉ ⴳⴳⵉⵏ ⵜⴰⵅⵛⴻⴼⵜ ⵓⵛⴰ ⵇⵇⵉⵎⴻⵏ ⵊⴰⵔ ⴱⴰⵢⵜ-ⵉⵍ ⴷ ⵄⴰⵢ, ⵖⴰⵔ ⵍⵖⴰⵔⴱ ⵅ ⵄⴰⵢ. ⵢⴰⵛⵓⵡⴰ ⵉⵙⵙⴻⵏⵙ ⴵⵉⵍⴻⵜ ⵏⵏⵉ ⴷⵉ ⵍⵡⴻⵙⵜ ⵏ ⵍⴳⴻⵏⵙ.

10 ⵜⵉⵡⴻⵛⵛⴰ ⵥⵉⵛ ⵉⴽⴽⴰⵔ ⵢⴰⵛⵓⵡⴰ. ⵉⵃⵙⴻⴱ ⵍⴳⴻⵏⵙ ⵓⵛⴰ ⵉⴳⴻⵄⵄⴻⴷ ⴰⴽ-ⴷ ⵉⵎⵖⴰⵔⴻⵏ ⵏ ⵉⵙⵔⴰⵉⵍ ⵥⵥⴰⵜ ⵉ ⵡⵓⴷⴻⵎ ⵏ ⵍⴳⴻⵏⵙ ⵖⴰⵔ ⵄⴰⵢ.

11 ⵎⴰⵔⵔⴰ ⵍⴳⴻⵏⵙ ⵏ ⵍⵄⴻⵙⴽⴰⵔ, ⵉⵏⵏⵉ ⴽⵉⵙ ⵉⴵⴰⵏ, ⵉⴼⴼⴻⵖ-ⴷⴷ ⵓⵛⴰ ⵏⵉⵜⵏⵉ ⵇⴰⵔⵔⴱⴻⵏ-ⴷⴷ ⵓⵛⴰ ⵉⵡⴹⴻⵏ ⵖⴰⵔⴻⵙ ⴰⵍ ⵇⵉⴱⴰⵞ ⵉ ⵜⴻⵏⴷⵉⵏⵜ. ⵏⵉⵜⵏⵉ ⵡⵜⵉⵏ ⵉⵇⵉⴹⴰⵏ ⵏⵙⴻⵏ ⵖⴰⵔ ⵛⵛⴰⵎⴰⵍ ⵏ ⵄⴰⵢ. ⵜⵓⵖⴰ ⴷⵉⵏ ⵉⵛⵜ ⵏ ⵜⴻⵖⵥⵓⵔⵜ ⵊⴰⵔ ⴰⵙ-ⴷⴷ ⴷ ⵄⴰⵢ.

12 ⵉⴽⵙⵉ ⵏⴻⵜⵜⴰ ⵄⵍⴰⵃⴰⵍ ⵅⴻⵎⵙⴰ-ⴰⵍⴰⴼ ⵏ ⵢⴻⵔⵢⴰⵥⴻⵏ ⵓⵛⴰ ⵉⴳⴳⴰ ⴰⵙⴻⵏ ⵜⴰⵅⵛⴻⴼⵜ ⵊⴰⵔ ⴱⴰⵢⵜ-ⵉⵍ ⴷ ⵄⴰⵢ, ⵖⴰⵔ ⵍⵖⴰⵔⴱ ⵏ ⵜⴻⵏⴷⵉⵏⵜ.

13 ⵙⵙⴱⴻⴷⴷⴻⵏ ⵍⴳⴻⵏⵙ, ⵥⴻⵄⵎⴰ ⵎⴰⵔⵔⴰ ⵍⵄⴻⵙⴽⴰⵔ ⵖⴰⵔ ⵛⵛⴰⵎⴰⵍ ⵏ ⵜⴻⵏⴷⵉⵏⵜ, ⵓⵛⴰ ⴰⵖⴻⵥⴷⵉⵙ ⴰⵏⴻⴳⴳⴰⵔⵓ ⵏ ⵍⵄⴻⵙⴽⴰⵔ ⵖⴰⵔ ⵍⵖⴰⵔⴱ ⵏ ⵜⴻⵏⴷⵉⵏⵜ. ⵢⴰⵛⵓⵡⴰ ⵉⵔⵓⵃ ⴵⵉⵍⴻⵜ ⵏⵏⵉ ⵖⴰⵔ ⵍⵡⴻⵙⵜ ⵏ ⵍⴻⵡⴹⴰ ⵏ ⵜⴻⵖⵥⵓⵔⵜ.

14 ⵓⵎⵉ ⵉⵥⵔⴰ ⴰⵢⴰ ⵓⵊⴻⴵⵉⴷ ⵏ ⵄⴰⵢ, ⵇⴻⴵⵇⴻⵏ ⵓⵛⴰ ⴽⴽⴰⵔⴻⵏ ⵥⵉⵛ. ⴼⴼⵖⴻⵏ ⵉⵔⵢⴰⵥⴻⵏ ⵏ ⵜⴻⵏⴷⵉⵏⵜ ⵉ ⵓⵎⵙⴰⴳⴰⵔ ⴰⴽ-ⴷ ⵉⵙⵔⴰⵉⵍ, ⵉ ⵓⵎⴻⵏⵖⵉ, ⵏⴻⵜⵜⴰ ⴰⴽ-ⴷ ⵎⴰⵔⵔⴰ ⵍⴳⴻⵏⵙ ⵏⵏⴻⵙ, ⵖⴰⵔ ⵡⴰⵥⵥⴰⵢ ⵏ ⵓⵎⴻⵏⵖⵉ ⵥⵥⴰⵜ ⵉ ⵡⵓⴷⴻⵎ ⵏ ⵍⴻⵡⴹⴰ. ⵎⴰⵛⴰ ⵏⴻⵜⵜⴰ ⵡⴰⵔ ⵉⵙⵙⵉⵏ ⴱⴻⵍⵍⵉ ⵜⵓⵖⴰ ⴳⴳⵉⵏ ⴰⵙ ⵉⵛⵜ ⵏ ⵜⴻⵅⵛⴻⴼⵜ ⵖⴰⵔ ⵡⴻⵄⵔⵓⵔ ⵏ ⵜⴻⵏⴷⵉⵏⵜ.

15 ⵢⴰⵛⵓⵡⴰ ⴷ ⵎⴰⵔⵔⴰ ⵉⵙⵔⴰⵉⵍ ⴳⴳⵉⵏ ⴰⵅⵎⵉ ⵊⵊⵉⵏ ⵉⵅⴻⴼ ⵏⵙⴻⵏ ⴰⴷ ⵜⵜⵡⴰⵡⵜⴻⵏ ⵇⵉⴱⴰⵞ ⵏⵙⴻⵏ ⵓⵛⴰ ⴰⵔⴻⵡⵍⴻⵏ ⵅ ⵡⴻⴱⵔⵉⴷ ⵏ ⵍⴻⵅⵍⴰ.

16 ⵎⴰⵔⵔⴰ ⵍⴳⴻⵏⵙ ⵉ ⵜⵓⵖⴰ ⵉⴵⴰⵏ ⴷⵉ ⵜⴻⵏⴷⵉⵏⵜ ⵍⴰⵖⴰⵏ ⵜⴻⵏ ⵃⵉⵎⴰ ⴰⴷ ⵜⴻⵏ ⴹⴼⴰⵔⴻⵏ. ⴹⴼⴰⵔⴻⵏ ⵢⴰⵛⵓⵡⴰ ⵓⵛⴰ ⴷⴻⵡⵍⴻⵏ ⵉⴳⴳⵯⴻⵊⴻⵏ ⵅ ⵜⴻⵏⴷⵉⵏⵜ.

17 ⵓⵍⴰ ⴷ ⵉⵊⵊ ⵏ ⵡⴻⵔⵢⴰⵥ ⵡⴰⵔ ⵉⵇⵇⵉⵎ ⴷⵉ ⵄⴰⵢ ⵏⵉⵖ ⴷⵉ ⴱⴰⵢⵜ-ⵉⵍ, ⵡⴻⵏⵏⵉ ⵡⴰⵔ ⴷⴷ-ⵉⴼⴼⵉⵖⴻⵏ ⵛⴰ ⴰⵡⴰⵔⵏⵉ ⵉ ⵉⵙⵔⴰⵉⵍ, ⵓⵛⴰ ⵏⵉⵜⵏⵉ ⵊⵊⵉⵏ ⵜⴰⵏⴷⵉⵏⵜ ⵜⴰⵔⵥⴻⵎ ⵓⵛⴰ ⵇⵇⵉⵎⴻⵏ ⴹⴻⴼⴼⴰⵔⴻⵏ ⴰⵢⵜ ⵏ ⵉⵙⵔⴰⵉⵍ.

18 ⵅⴻⵏⵏⵉ ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵢⴰⵛⵓⵡⴰ: “ⵙⵡⵉⵥⵥⴻⴹ ⴰⵃⵔⵉⵛ ⵏⵏⵉ ⴷⴻⴳ ⵓⴼⵓⵙ ⵏⵏⴻⴽ ⵖⴰⵔ ⵄⴰⵢ, ⵎⵉⵏⵥⵉ ⵏⴻⵛⵛ ⴰⴷ ⵡⵛⴻⵖ ⵜⴰⵏⴷⵉⵏⵜ ⴷⴻⴳ ⵓⴼⵓⵙ ⵏⵏⴻⴽ.” ⵅⴻⵏⵏⵉ ⵉⵙⵙⵡⵉⵥⵥⴻⴹ ⵢⴰⵛⵓⵡⴰ ⴰⵃⵔⵉⵛ ⵏⵏⵉ ⴷⴻⴳ ⵓⴼⵓⵙ ⵏⵏⴻⵙ ⵖⴰⵔ ⵜⴻⵏⴷⵉⵏⵜ. ^□  

19 ⵅⴻⵏⵏⵉ ⵉⴽⴽⴰⵔ ⵓⵖⴻⵥⴷⵉⵙ ⴰⵏⴻⴳⴳⴰⵔⵓ ⵏ ⵍⵄⴻⵙⴽⴰⵔ ⴷⴻⵖⵢⴰ ⵓⵛⴰ ⵓⵎⵉ ⵉⵙⴰⵔⵔⴻⵃ ⵢⴰⵛⵓⵄⴰ ⴰⴼⵓⵙ ⵏⵏⴻⵙ, ⴱⴷⴰⵏ ⴰⴷ ⴰⵥⵥⵍⴻⵏ ⵓⵛⴰ ⵉⵡⴹⴻⵏ ⵖⴰⵔ ⵜⴻⵏⴷⵉⵏⵜ ⵓⵛⴰ ⵟⵟⴼⴻⵏ ⵜⵜ. ⴳⴳⵉⵏ ⵜ ⵙ ⵜⴰⵥⵍⴰ ⵓⵛⴰ ⵙⵙⴻⴽⴽⴰⵔⴻⵏ ⵜⵉⵎⴻⵙⵙⵉ ⴷⵉ ⵜⴻⵏⴷⵉⵏⵜ. 20 ⵉⵔⵢⴰⵥⴻⵏ ⵏ ⵄⴰⵢ ⵏⵏⵇⴻⵍⴱⴻⵏ ⵓⵛⴰ ⵥⵔⵉⵏ ⴷⴷⴻⵅⵅⴰⵏ ⵢⵓⵍⵉ ⵖⴰⵔ ⵓⵊⴻⵏⵏⴰ ⵥⵉ ⵜⴻⵏⴷⵉⵏⵜ. ⵏⵉⵜⵏⵉ ⵡⴰⵔ ⵥⴻⵎⵎⴰⵔⴻⵏ ⴰⴷ ⴰⵔⴻⵡⵍⴻⵏ ⵖⴰⵔ ⴷⴰ ⵓⵍⴰ ⵖⴰⵔ ⴷⵉⵏ, ⵎⵉⵏⵥⵉ ⵍⴳⴻⵏⵙ ⵉ ⵜⵓⵖⴰ ⵢⴰⵔⴻⵡⵍⴻⵏ ⵖⴰⵔ ⵍⴻⵅⵍⴰ, ⵉⵏⵏⴻⵇⵍⴻⴱ-ⴷⴷ ⵉ ⵓⵎⴻⵏⵖⵉ ⵅ ⵡⴻⵏⵏⵉ ⵜⴻⵏ ⵉⴹⴻⴼⴼⴰⵔⴻⵏ. 21 ⵢⴰⵛⵓⵡⴰ ⴷ ⵎⴰⵔⵔⴰ ⴰⵢⵜ ⵏ ⵉⵙⵔⴰⵉⵍ ⵥⵔⵉⵏ ⴱⴻⵍⵍⵉ ⵉⵏⵏⵉ ⵜⵓⵖⴰ ⵔⴰⵊⴰⵏ ⴷⵉ ⵜⴻⵅⵛⴻⴼⵜ ⵟⵟⴼⴻⵏ ⵜⴰⵏⴷⵉⵏⵜ ⵓⵛⴰ ⵢⵓⵍⵉ ⴷⴷⴻⵅⵅⴰⵏ ⵥⵉ ⵜⴻⵏⴷⵉⵏⵜ. ⵏⵉⵜⵏⵉ ⵄⴻⵇⴱⴻⵏ-ⴷⴷ, ⵡⵜⵉⵏ ⵉⵔⵢⴰⵥⴻⵏ ⵏ ⵄⴰⵢ. 22 ⵉⵏⵏⵉ ⴷⴷ-ⵉⴼⴼⵖⴻⵏ ⵥⵉ ⵜⴻⵏⴷⵉⵏⵜ, ⵔⵓⵃⴻⵏ ⵉ ⵓⵎⵙⴰⴳⴰⵔ ⴰⴽⵉⴷⵙⴻⵏ, ⴰⵍⴰⵎⵉ ⵏⵉⵜⵏⵉ, ⵉⵔⵢⴰⵥⴻⵏ ⵏ ⵄⴰⵢ, ⴷⴻⵡⵍⴻⵏ ⴷⵉ ⵍⵡⴻⵙⵜ ⵏ ⵉⵙⵔⴰⵉⵍⵉⵢⵢⴻⵏ, ⵉⵏⴰ ⵖⴰⵔ ⵓⵖⴻⵥⴷⵉⵙ ⴷ ⵉⵏⴰ ⵖⴰⵔ ⵓⵖⴻⵥⴷⵉⵙ ⵏⵏⴻⵖⵏⵉ, ⵓⵛⴰ ⵏⵉⵜⵏⵉ ⵖⴻⵍⴱⴻⵏ ⵅⴰⵙⴻⵏ ⴰⵍⴰⵎⵉ ⵡⴰⵔ ⵥⵥⴰⵢⵙⴻⵏ ⵉⵇⵇⵉⵎ ⵓⵍⴰ ⴷ ⵉⵊⵊⴻⵏ ⵉⴷⴷⴰⵔ ⵏⵉⵖ ⵉⵥⴻⵎⵎⴰⵔ ⴰⴷ ⵢⴰⵔⵡⴻⵍ. ^■   23 ⵎⴻⵏⵄⴻⵏ ⴰⵊⴻⴵⵉⴷ ⵏ ⵄⴰⵢ ⴰⵎ ⵉⴷⴷⴰⵔ ⵄⴰⴷ ⵓ ⵉⵡⵢⴻⵏ ⵜ ⵖⴰⵔ ⵢⴰⵛⵓⵡⴰ.

24 ⵓⵎⵉ ⴰⵢⵜ ⵏ ⵉⵙⵔⴰⵉⵍ ⴽⴻⵎⵎⵍⴻⵏ ⴰⴷ ⵏⵖⴻⵏ ⵎⴰⵔⵔⴰ ⵉⵎⴻⵥⴷⴰⵖ ⵏ ⵄⴰⵢ, ⴰⵎ ⴷⴻⴳ ⵉⵢⵢⴰⵔ ⴰⵎ ⴷⵉ ⵍⴻⵅⵍⴰ ⵎⴰⵏⵉ ⵜⵓⵖⴰ ⵜⴻⵏ ⴷⴷ-ⴹⴼⴰⵔⴻⵏ ⵓⵛⴰ ⵜⵜⵡⴰⵏⵖⴻⵏ ⵎⴰⵔⵔⴰ ⵙ ⵍⴻⵇⴹⴻⵄ ⵏ ⵙⵙⵉⴼ, ⵅⴻⵏⵏⵉ ⵉⵄⵇⴻⴱ ⵉⵙⵔⴰⵉⵍ ⵖⴰⵔ ⵄⴰⵢ ⵓⵛⴰ ⵡⵜⵉⵏ ⵜⵜ ⵙ ⵍⴻⵇⴹⴻⵄ ⵏ ⵙⵙⵉⴼ. 25 ⵎⴰⵔⵔⴰ ⵉⵏⵏⵉ ⵉⵜⵜⵡⴰⵏⵖⴻⵏ ⴷⴻⴳ ⵡⴰⵙⵙ ⵏⵏⵉ, ⵉⵔⵢⴰⵥⴻⵏ ⴷ ⵜⴻⵎⵖⴰⵔⵉⵏ, ⵜⵓⵖⴰ ⴰⵜⴻⵏ ⴷⵉ ⵜⴻⵏⵄⴰⵛ-ⴰⵍⴰⴼ, ⴷⴰⵢⴻⵙ ⵎⴰⵔⵔⴰ ⵉⵔⵢⴰⵥⴻⵏ ⵏ ⵄⴰⵢ. 26 ⵢⴰⵛⵓⵡⴰ ⵡⴰⵔ ⵉⵙⵙⴻⵀⵡⵉ ⴰⴼⵓⵙ ⵏⵏⴻⵙ ⵉ ⵉⵙⵙⵡⵉⵥⵥⴹⴻⵏ ⵙ ⵓⵃⵔⵉⵛ ⴰⵍⴰⵎⵉ ⵜⵓⵖⴰ ⵉⵃⴰⵔⵔⴻⵎ ⵎⴰⵔⵔⴰ ⵉⵎⴻⵥⴷⴰⵖ ⵏ ⵄⴰⵢ ⵉ ⵓⵜⴻⵃⵃⵉ. 27 ⴽⵙⵉⵏ ⵉⵙⵔⴰⵉⵍⵉⵢⵢⴻⵏ ⵎⵖⵉⵔ ⵍⴻⴱⵀⴰⵢⴻⵎ ⴷ ⵜⴽⴻⵛⵛⴰⴹⵜ ⵏ ⵜⴻⵏⴷⵉⵏⵜ ⵏⵏⵉ ⵉ ⵢⵉⵅⴻⴼ ⵏⵙⴻⵏ ⵄⵍⴰⵃⵙⴰⴱ ⴰⵡⴰⵍ ⵏ ⵙⵉⴷⵉ, ⴰⵡⴰⵍ ⵏⵏⵉ ⵢⵓⵎⵓⵔ ⵏⴻⵜⵜⴰ ⵉ ⵢⴰⵛⵓⵡⴰ. ^■   28 ⵉⵙⵙⴻⵛⵎⴻⴹ ⵢⴰⵛⵓⵡⴰ ⵜⴰⵏⴷⵉⵏⵜ ⵏ ⵄⴰⵢ ⵓⵛⴰ ⵢⴰⵔⵔⴰ ⵉ-ⵜⵜ ⴷ ⵉⵛⵜ ⵏ ⴰⵔⵡⵉⵏⴰ ⵉ ⵍⴻⴱⴷⴰ, ⴷ ⵉⵛⵜ ⵏ ⵍⵅⴰⵔⴱⴻⵜ, ⴰⵍ ⴰⵙⵙ-ⴰ. 29 ⵏⴻⵜⵜⴰ ⵢⵓⵢⴻⵍ ⴰⵊⴻⴵⵉⴷ ⵏ ⵄⴰⵢ ⵖⴰⵔ ⵉⵛⵜ ⵏ ⵜⴻⵃⵏⴰⵛⵜ ⴰⵍ ⵜⴰⵎⴻⴷⴷⵉⵜ ⵓ ⵓⵎⵉ ⵜⴻⵖⵍⵉ ⵜⴼⵓⵛⵜ, ⵢⵓⵎⵓⵔ ⵢⴰⵛⵓⵡⴰ ⴰⴷ ⴽⴽⵙⴻⵏ ⵍⵅⴻⵛⴱⴻⵜ ⵏⵏⴻⵙ ⵥⵉ ⵜⴻⵃⵏⴰⵛⵜ. ⵏⴹⴰⵔⴻⵏ ⵜⵜ ⵖⴰⵔ ⵡⴰⴷⴰⴼ ⵏ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ ⵓ ⵙⵙⴱⴻⴷⴷⴻⵏ ⵅⴰⵙ ⵉⵊⵊ ⵏ ⵓⵄⵓⵔⵔⵉⵛ ⴷ ⴰⵎⴻⵇⵇⵔⴰⵏ ⵏ ⵢⴻⵥⵔⴰ, ⵉ ⴷⵉⵏ ⵉⴵⴰⵏ ⵄⴰⴷ ⴰⵍ ⴰⵙⵙ-ⴰ. ^■  

30 ⵅⴻⵏⵏⵉ ⵉⴱⵏⴰ ⵢⴰⵛⵓⵡⴰ ⵉⵊⵊ ⵏ ⵓⵄⴰⵍⵟⴰⵔ ⵉ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵅ ⵡⴻⴷⵔⴰⵔ ⵏ ⵄⵉⴱⴰⵍ, 31 ⴰⵎ ⵎⴰⵎⵎⴻⵛ ⵜ ⵢⵓⵎⵓⵔ ⵎⵓⵙⴰ, ⴰⵎⵙⴻⵅⵅⴰⵔ ⵏ ⵙⵉⴷⵉ, ⵉ ⴰⵢⵜ ⵏ ⵉⵙⵔⴰⵉⵍ, ⵄⵍⴰⵃⵙⴰⴱ ⵎⵉⵏ ⵢⵓⵔⴰⵏ ⴷⴻⴳ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ ⵏ ⵛⵛⴰⵔⵉⵄⴰ ⵏ ⵎⵓⵙⴰ: ⵉⵊⵊ ⵏ ⵓⵄⴰⵍⵟⴰⵔ ⵏ ⵡⴻⵥⵔⵓ ⵇⴰⵄ, ⵡⴰⵔ ⵅⴰⵙ ⵉⵎⴻⵢⵢⴻⵍ ⵙ ⵉⵊⵊ ⵏ ⴷⴷⵓⵥⴰⵏ ⵏ ⵡⵓⵥⵥⴰⵍ ⵥⵉ ⵙⵙⴰ ⵖⴰⵔ ⴷⴰ. ⵏⵉⵜⵏⵉ ⴱⴻⵅⵅⴰⵔⴻⵏ ⵅⴰⵙ ⵜⵉⵖⴰⵔⵚⴰ ⵏ ⵜⵎⴻⵙⵙⵉ ⵉ ⵙⵉⴷⵉ. ⵖⴰⵔⵚⴻⵏ ⵄⴰⵡⴻⴷ ⵜⵉⵖⴰⵔⵚⴰ ⵏ ⵍⴻⵀⵏⴰ. ^■   32 ⵅ ⵢⴻⵥⵔⴰ ⵉⴳⴳⴰ ⵏⴻⵜⵜⴰ ⵉⵛⵜ ⵏ ⵜⵉⵍⴻⵎⵜ ⵏ ⵜⵉⵔⴰ ⵏ ⵛⵛⴰⵔⵉⵄⴰ ⵏ ⵎⵓⵙⴰ, ⵜⴻⵏⵏⵉ ⵢⵓⵔⴰ ⵥⵥⴰⵜ ⵉ ⵡⵓⴷⴻⵎ ⵏ ⴰⵢⵜ ⵏ ⵉⵙⵔⴰⵉⵍ. ^■   33 ⵎⴰⵔⵔⴰ ⴰⵢⵜ ⵏ ⵉⵙⵔⴰⵉⵍ ⴷ ⵉⵎⵖⴰⵔⴻⵏ ⴷ ⵉⵡⴻⵇⵇⴰⴼⴻⵏ ⴷ ⵍⵇⵓⴹⴰⵜ ⴱⴻⴷⴷⴻⵏ ⵖⴰⵔ ⵓⵖⴻⵥⴷⵉⵙ-ⴰ ⵓ ⵖⴰⵔ ⵓⵖⴻⵥⴷⵉⵙ ⵏⵏⴻⵖⵏⵉ ⵏ ⵜⵜⴰⴱⵓⵜ ⵇⵉⴱⴰⵞ ⵉ ⵉⴽⴻⵀⵀⴰⵏⴻⵏ ⵥⵉ ⴰⵢⵜ ⵏ ⵍⴰⵡⵉ ⵉⵏⵏⵉ ⵢⴰⵔⴱⵓⵏ ⵜⵜⴰⴱⵓⵜ ⵏ ⵍⵄⴰⵀⴷ ⵏ ⵙⵉⴷⵉ, ⴰⵎ ⵓⴱⴰⵔⵔⴰⵏⵉ ⴰⵎ ⴰⵢⵜⴱⴰⴱ ⵏ ⵜⴻⵎⵎⵓⵔⵜ. ⴰⵥⵢⴻⵏ ⵥⵥⴰⵢⵙⴻⵏ ⵜⵓⵖⴰ ⵥⵥⴰⵜ ⵏ ⵡⴻⴷⵔⴰⵔ ⵏ ⵊⵉⵔⵉⵥⵉⵎ ⵓ ⴰⵥⵢⴻⵏ ⵏⵏⴻⵖⵏⵉ ⵖⴰⵔ ⵥⵥⴰⵜ ⵏ ⵡⴻⴷⵔⴰⵔ ⵏ ⵄⵉⴱⴰⵍ, ⴰⵎ ⵎⴰⵎⵎⴻⵛ ⵜⵓⵖⴰ ⵢⵓⵎⵓⵔ ⵎⵓⵙⴰ, ⴰⵎⵙⴻⵅⵅⴰⵔ ⵏ ⵙⵉⴷⵉ ⵥⵉⵛ, ⵉ ⵓⴱⴰⵔⴻⴽ ⵏ ⴰⵢⵜ ⵏ ⵉⵙⵔⴰⵉⵍ. 34 ⴰⵡⴰⵔⵏⵉ ⵉ ⵓⵢⴰ ⵉⵖⵔⴰ ⵎⴰⵔⵔⴰ ⴰⵡⴰⵍⴻⵏ ⵏ ⵛⵛⴰⵔⵉⵄⴰ, ⵍⴱⴰⵔⴰⴽⴰ ⴷ ⵏⵏⴻⵄⵍⴻⵜ, ⵄⵍⴰⵃⵙⴰⴱ ⵎⴰⵔⵔⴰ ⵎⵉⵏ ⵢⵓⵔⴰⵏ ⴷⴻⴳ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ ⵏ ⵛⵛⴰⵔⵉⵄⴰ. 35 ⵣⵉ ⵎⴰⵔⵔⴰ ⵎⵉⵏ ⵜⵓⵖⴰ ⵢⵓⵎⵓⵔ ⵎⵓⵙⴰ, ⵡⴰⵔ ⵉⴵⵉ ⵓⵍⴰ ⴷ ⵉⵊⵊ ⵏ ⵡⴰⵡⴰⵍ, ⵡⴰⵔ ⵜ ⵉⵖⵔⵉ ⵢⴰⵛⵓⵡⴰ ⵉ ⵎⴰⵔⵔⴰ ⴰⴳⵔⴰⵡ ⵏ ⵍⴳⴻⵏⵙ ⵏ ⵉⵙⵔⴰⵉⵍ, ⵓⵍⴰ ⴷ ⵜⵉⵎⵖⴰⵔⵉⵏ ⴷ ⵉⵃⴻⵏⵊⵉⵔⴻⵏ ⵉⵎⴻⵥⵢⴰⵏⴻⵏ ⴷ ⵓⴱⴰⵔⵔⴰⵏⵉ ⵡⴻⵏⵏⵉ ⴰⴽⵉⴷⵙⴻⵏ ⵉⵔⵓⵃⴻⵏ, ⵜⵓⵖⴰ ⴰⵜⴻⵏ ⴷⵉⵏ. ^■