1 ⴰⵢⵜ ⵏ ⵉⵙⵔⴰⵉⵍ ⵖⴻⵛⵛⴻⵏ ⴰⴽ-ⴷ ⵎⵉⵏ ⵉⴵⴰⵏ ⵉⵜⵜⵡⴰⵃⴰⵔⵔⵎⴻⵏ ⵉ ⵓⵜⴻⵃⵃⵉ. ⵄⴰⵅⴰⵏ, ⵎⵎⵉⵙ ⵏ ⴽⴰⵔⵎⵉ, ⵎⵎⵉⵙ ⵏ ⵣⴰⴱⴷⵉ, ⵎⵎⵉⵙ ⵏ ⵣⴰⵔⴰⵃ, ⵥⵉ ⵜⴻⵇⴱⵉⵞ ⵏ ⵢⴰⵀⵓⴷⴰ, ⵉⴽⵙⵉ ⵥⵉ ⵎⵉⵏ ⵉⴵⴰⵏ ⴷ ⵍⴻⵃⵔⴰⵎ. ⵅⴻⵏⵏⵉ ⵢⴰⵔⵖⴰ ⵡⴻⵖⴹⴰⴱ ⵏ ⵙⵉⴷⵉ ⵅ ⴰⵢⵜ ⵏ ⵉⵙⵔⴰⵉⵍ. ^■  

2 ⵢⴰⵛⵓⵡⴰ ⵉⵙⵙⴻⴽⴽ ⵉⵔⵢⴰⵥⴻⵏ ⵥⵉ ⴰⵔⵉⵃⴰ ⵖⴰⵔ ⵄⴰⵢ ⵉ ⵉⴵⴰⵏ ⵖⴰⵔ ⴱⴰⵢⵜ-ⴰⵡⵉⵏ, ⵖⴰⵔ ⵛⵛⴰⵔⵇ ⵏ ⴱⴰⵢⵜ-ⵉⵍ. ⵏⴻⵜⵜⴰ ⵉⵙⵙⵉⵡⴻⵍ ⴰⴽⵉⴷⵙⴻⵏ, ⵉⵏⵏⴰ: “ⴳⴰⵄⵄⴷⴻⵎ, ⴱⴻⵔⴳⴰⴳⴻⵎ ⵜⴰⵎⵎⵓⵔⵜ!” ⵉⵔⵢⴰⵥⴻⵏ ⴼⴼⵖⴻⵏ ⵓ ⴱⴻⵔⴳⴰⴳⴻⵏ ⵅ ⵄⴰⵢ. 3 ⵓⵎⵉ ⴷⴷ-ⵄⴻⵇⴱⴻⵏ ⵖⴰⵔ ⵢⴰⵛⵓⵡⴰ, ⵏⵏⴰⵏ ⴰⵙ: “ⵏⵀⵍⴰ ⵎⴰ ⵉⴳⴻⵄⵄⴻⴷ ⴷⵉⵏ ⵎⴰⵔⵔⴰ ⵍⴳⴻⵏⵙ. ⴻⵊⵊ ⴰⴷ ⴳⴻⵄⵄⴷⴻⵏ ⴷⵉⵏ ⵄⵍⴰⵃⴰⵍ ⴰⵍⴼⴰⵢⴻⵏ ⵏⵉⵖ ⵜⴻⵍⵜ-ⴰⵍⴰⴼ ⵏ ⵢⴻⵔⵢⴰⵥⴻⵏ ⵃⵉⵎⴰ ⴰⴷ ⵖⴻⵍⴱⴻⵏ ⵅ ⵄⴰⵢ. ⵡⴰⵔ ⴷⴷ-ⵜⵜⵉⵡⵢⴻⴷ ⵛⴰ ⴷⵉⵏⵏⵉ ⵎⴰⵔⵔⴰ ⵍⴳⴻⵏⵙ, ⵎⵉⵏⵥⵉ ⵏⵉⵜⵏⵉ ⴰⵇⴰ ⴰⵜⴻⵏ ⴷⵉ ⴷⵔⵓⵙ. 4 ⴰⵎⵎⵓ ⵉ ⴳⴻⵄⵄⴷⴻⵏ ⵥⵉ ⵍⴳⴻⵏⵙ ⵄⵍⴰⵃⴰⵍ ⵜⴻⵍⵜ-ⴰⵍⴰⴼ ⵏ ⵢⴻⵔⵢⴰⵥⴻⵏ, ⵎⴰⵛⴰ ⵏⵉⵜⵏⵉ ⴰⵔⴻⵡⵍⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵢⴻⵔⵢⴰⵥⴻⵏ ⵏ ⵄⴰⵢ. 5 ⵉⵔⵢⴰⵥⴻⵏ ⵏ ⵄⴰⵢ ⵏⵖⵉⵏ ⵥⵥⴰⵢⵙⴻⵏ ⵙⴻⵜⵜⴰ ⵓ-ⵜⵍⴰⵜⵉⵏ ⵏ ⵢⴻⵔⵢⴰⵥⴻⵏ ⵓⵛⴰ ⴹⴼⴰⵔⴻⵏ ⵜⴻⵏ ⵥⵉ ⵥⵥⴰⵜ ⵏ ⵡⵓⴷⴻⵎ ⵏ ⵜⴻⵡⵡⴰⵔⵜ ⴰⵍ ⵛⴰⴱⴰⵔⵉⵎ ⵓⵛⴰ ⵖⴻⵍⴱⴻⵏ ⵅⴰⵙⴻⵏ ⴷⴻⴳ ⵓⵀⴻⴽⴽⵯⵓ. ⵅⴻⵏⵏⵉ ⵉⴼⵙⵉⵢ ⵡⵓⵍ ⵏ ⵍⴳⴻⵏⵙ, ⵉⴷⵡⴻⵍ ⴰⵎⴻⵛⵏⴰⵡ ⴰⵎⴰⵏ.

6 ⵢⴰⵛⵓⵡⴰ ⵉⵛⴰⵔⵔⴻⴳ ⴰⵔⵔⵓⴹ ⵏⵏⴻⵙ, ⵉⵡⴹⴰ ⵅ ⵓⵖⴻⵎⴱⵓⴱ ⵏⵏⴻⵙ ⵖⴰⵔ ⵜⴻⵎⵎⵓⵔⵜ ⵥⵥⴰⵜ ⵉ ⵜⵜⴰⴱⵓⵜ ⵏ ⵙⵉⴷⵉ, ⴰⵍ ⴵⵉⵍⴻⵜ, ⵏⴻⵜⵜⴰ ⴷ ⵉⵎⵖⴰⵔⴻⵏ ⵏ ⵉⵙⵔⴰⵉⵍ, ⵓⵛⴰ ⵏⵉⵜⵏⵉ ⵙⵙⵓⵢⵓⵙⴻⵏ ⵓⵛⴰⵍ ⵅ ⵓⵥⴻⴵⵉⴼ ⵏⵙⴻⵏ. 7 ⵢⴰⵛⵓⵡⴰ ⵉⵏⵏⴰ: “ⴰ ⵙⵉⴷⵉ ⵉⵏⵓ, ⵙⵉⴷⵉ, ⵎⴰⵢⴻⵎⵎⵉ ⵜⴻⵊⵊⵉⴷ ⵍⴳⴻⵏⵙ-ⴰ ⴰⴷ ⵉⵥⵡⴰ ⵍ'ⵓⵔⴷⵓⵏ? ⵎⴰ ⵃⵉⵎⴰ ⴰⴷ ⴰⵏⴻⵖ ⵜⴻⴳⴳⴻⴷ ⴷⴻⴳ ⵓⴼⵓⵙ ⵏ ⴰⵢⵜ ⵏ ⵉⵎⵓⵔⵉⵢⵢⴻⵏ, ⵎⴰⵃⴻⵏⴷ ⴰⴷ ⴰⵏⴻⵖ ⵜⴻⵃⵃⴰⵏ? ⵉⵍⵉ, ⵏⴻⴳⴳⴰ ⴰⴷ ⵏⴻⵇⴱⴻⵍ ⴰⴷ ⵏⴻⵥⴷⴻⵖ ⵖⴰⵔ ⵓⵊⴻⵎⵎⴰⴹ ⵏ ⵍ'ⵓⵔⴷⵓⵏ.” 8 ⴰ ⵙⵉⴷⵉ, ⵎⵉⵏ ⵖⴰ ⵉⵏⵉⵖ, ⴰⵡⴰⵔⵏⵉ ⵉ ⵓⵎⵉ ⵢⴰⵔⵔⴰ ⵉⵙⵔⴰⵉⵍ ⴰⵄⵔⵓⵔ ⵖⴰⵔ ⵡⵓⴷⴻⵎ ⵏ ⵍⵄⴻⴷⵢⴰⵏ ⵏⵏⴻⵙ ⵎⴰⵃⴻⵏⴷ ⴰⴷ ⵢⴰⵔⵡⴻⵍ? 9 ⵎⴰⵍⴰ ⴰⴷ ⵜ ⵙⵍⴻⵏ ⴰⵢⵜ ⵏ ⴽⴻⵏⵄⴰⵏ ⴷ ⵎⴰⵔⵔⴰ ⵉⵎⴻⵥⴷⴰⵖ ⵏ ⵜⴻⵎⵎⵓⵔⵜ, ⴰⴷ ⴰⵏⴻⵖ ⵇⴻⵡⵡⴰⵔⴻⵏ, ⴰⴷ ⵇⴻⴹⵄⴻⵏ ⵉⵙⴻⵎ ⵏⵏⴻⵖ ⵥⵉ ⵜⴰⵎⵎⵓⵔⵜ. ⵎⵉⵏ ⵉ ⵖⴰ ⵜⴻⴳⴳⴻⴷ ⵅⴻⵏⵏⵉ ⵉ ⵢⵉⵙⴻⵎ ⵏⵏⴻⴽ ⴰⵎⴻⵇⵇⵔⴰⵏ?”

10 ⵅⴻⵏⵏⵉ ⵉⵏⵏⴰ ⵙⵉⴷⵉ ⵉ ⵢⴰⵛⵓⵡⴰ: “ⴽⴽⴰⵔ, ⵎⴰⵢⴻⵎⵎⵉ ⴷⴰ ⵜⵎⴻⴷⴷⴻⴷ ⴰⵎⵎⵓ ⵅ ⵓⵖⴻⵎⴱⵓⴱ ⵏⵏⴻⴽ ⵖⴰⵔ ⵜⴻⵎⵎⵓⵔⵜ?

11 ⴰⵇⴰ ⵉⵙⵔⴰⵉⵍ ⵉⵅⴹⴰ ⵓⵛⴰ ⵏⵉⵜⵏⵉ ⵄⴻⴷⴷⴰⵏ ⵍⵄⴰⵀⴷ ⵉⵏⵓ ⵏⵏⵉ ⵅ ⴷ ⴰⵙⴻⵏ ⵓⵎⵓⵔⴻⵖ. ⴽⵙⵉⵏ ⵄⴰⵡⴻⴷ ⵥⵉ ⵎⵉⵏ ⵉⴵⴰⵏ ⵉⵜⵜⵡⴰⵃⴰⵔⵔⵎⴻⵏ ⵉ ⵍⵃⵓⴽⵎ, ⵓⵛⴰ ⵓⵛⴰⵔⴻⵏ ⵄⴰⵡⴻⴷ, ⵙⵙⵅⴰⵔⵔⵇⴻⵏ ⵄⴰⵡⴻⴷ ⵓⵍⴰ ⵙⵙⴰⵔⵙⴻⵏ ⴰⵢⴰ ⵖⴰⵔ ⵍⴻⵇⵛⵓⵄ ⵏⵙⴻⵏ.

12 ⵅ ⵓⵢⴰ ⵡⴰⵔ ⵥⴻⵎⵎⴰⵔⴻⵏ ⴰⵢⵜ ⵏ ⵉⵙⵔⴰⵉⵍ ⴰⴷ ⵇⵇⵉⵎⴻⵏ ⴱⴻⴷⴷⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵍⵄⴻⴷⵢⴰⵏ ⵏⵙⴻⵏ. ⴰⴷ ⴰⵔⵔⵉⵏ ⴰⵄⵔⵓⵔ ⵖⴰⵔ ⵡⵓⴷⴻⵎ ⵏ ⵍⵄⴻⴷⵢⴰⵏ ⵏⵙⴻⵏ ⵎⴰⵃⴻⵏⴷ ⴰⴷ ⴰⵔⴻⵡⵍⴻⵏ, ⵎⵉⵏⵥⵉ ⵏⵉⵜⵏⵉ ⴷⴻⵡⵍⴻⵏ ⵜⵜⵡⴰⵃⴰⵔⵔⵎⴻⵏ ⵇⴰⵄ ⵉ ⵍⵃⵓⴽⵎ. ⵏⴻⵛⵛ ⵡⴰⵔ ⴽⵉⵡⴻⵎ ⵜⵜⵉⵍⵉⵖ ⵄⴰⴷ, ⵎⴰⵍⴰ ⵡⴰⵔ ⵜⴻⴽⴽⵙⴻⵎ ⵎⵉⵏ ⵉⴵⴰⵏ ⴷ ⵍⴻⵃⵔⴰⵎ ⵥⵉ ⵍⵡⴻⵙⵜ ⵏⵡⴻⵎ.

13 ⴽⴽⴰⵔ, ⵇⴻⴷⴷⴻⵙ ⵍⴳⴻⵏⵙ, ⴰⴷ ⵜⵉⵏⵉⴷ: ‘ⵇⴻⴷⴷⵙⴻⵎ ⵉⵅⴻⴼ ⵏⵡⴻⵎ ⵉ ⵜⵉⵡⴻⵛⵛⴰ, ⵎⵉⵏⵥⵉ ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ: ⴰⵇⴰ ⴷⵉⵏ ⵛⴰ ⴷ ⵍⴻⵃⵔⴰⵎ ⴷⵉ ⵍⵡⴻⵙⵜ ⵏⵡⴻⵎ, ⵉⵙⵔⴰⵉⵍ! ⵡⴰⵔ ⵜⵥⴻⵎⵎⴰⵔⴻⴷ ⴰⴷ ⵜⴻⵙⵙⴱⴻⴷⴷⴻⴷ ⵍⵄⴻⴷⵢⴰⵏ ⵏⵏⴻⴽ, ⴰⵍ ⵖⴰ ⵜⴻⴽⴽⵙⴻⵎ ⵎⵉⵏ ⵉⴵⴰⵏ ⴷ ⵍⴻⵃⵔⴰⵎ ⵥⵉ ⵍⵡⴻⵙⵜ ⵏⵡⴻⵎ.

14 ⵜⵉⵡⴻⵛⵛⴰ ⴰⴷ ⴷⴷ-ⵜⵇⴰⵔⵔⴱⴻⵎ ⵄⵍⴰⵃⵙⴰⴱ ⵜⵉⵇⴻⴱⴱⴰⵍ ⵏⵡⴻⵎ ⵓⵛⴰ ⵅⴻⵏⵏⵉ ⴰⴷ ⴷⴷ-ⵜⵇⴰⵔⵔⴻⴱ ⵜⴻⵇⴱⵉⵞ ⵏⵏⵉ ⵉⵄⴻⴵⴻⵎ ⵙⵉⴷⵉ ⵄⵍⴰⵃⵙⴰⴱ ⵍⴰⴵⴰⵜ ⵏⵏⴻⵙ ⵓ ⵍⴰⴵ ⵉ ⵖⴰ ⵉⵄⴻⴵⴻⵎ ⵙⵉⴷⵉ ⴰⴷ ⴷⴷ-ⵉⵇⴰⵔⵔⴻⴱ ⵄⵍⴰⵃⵙⴰⴱ ⵍⴰⴵⴰⵜ ⵏ ⵜⵓⴷⵔⵉⵏ ⵏⵏⴻⵙ ⵓⵛⴰ ⵍⴰⴵ ⵏⵏⵉ ⵉ ⵖⴰ ⵉⵄⴻⴵⴻⵎ ⵙⵉⴷⵉ ⴰⴷ ⴷⴷ-ⵉⵇⴰⵔⵔⴻⴱ ⵄⵍⴰⵃⵙⴰⴱ ⵉⵔⵢⴰⵥⴻⵏ ⵉⴱⵍⵉⵖⴻⵏ ⵏⵏⴻⵙ.

15 ⵓⵛⴰ ⴰⴷ ⵉⵎⵙⴰⵔ, ⴰⵇⴰ ⵡⴻⵏⵏⵉ ⵉⴽⵙⵉⵏ ⵎⵉⵏ ⵉⴵⴰⵏ ⴷ ⵍⴻⵃⵔⴰⵎ ⴰⴷ ⵉⵜⵜⵡⴰⵙⴻⵛⵎⴻⴹ ⵙ ⵜⵎⴻⵙⵙⵉ ⴰⴽ-ⴷ ⵎⴰⵔⵔⴰ ⵎⵉⵏ ⵖⴰⵔⴻⵙ ⵉⴵⴰⵏ, ⵎⵉⵏⵥⵉ ⵏⴻⵜⵜⴰ ⵉⵄⴻⴷⴷⴰ ⵅ ⵍⵄⴰⵀⴷ ⵏ ⵙⵉⴷⵉ ⵓ ⵉⴳⴳⴰ ⵍⴻⴼⴹⵉⵃⴻⵜ ⴷⵉ ⵉⵙⵔⴰⵉⵍ.’ ”

16 ⵉⴽⴽⴰⵔ ⵢⴰⵛⵓⵡⴰ ⵥⵉⵛ ⵓⵛⴰ ⵉⵊⵊⴰ ⴰⴷ ⴷⴷ-ⵉⵙⵇⴰⵔⵔⴻⴱ ⵉⵙⵔⴰⵉⵍ ⵜⴰⵇⴱⵉⵞ ⵜⴰⵇⴱⵉⵞ ⵓⵛⴰ ⵜᵉⵜⵜⵡⴰⵄⴻⴵⴻⵎ ⵜⴻⵇⴱⵉⵞ ⵏ ⵢⴰⵀⵓⴷⴰ.

17 ⵉⵊⵊⴰ ⴰⴷ ⴷⴷ-ⵜⵇⴰⵔⵔⴻⴱ ⵍⴰⴵ ⵏ ⵢⴰⵀⵓⴷⴰ ⵓⵛⴰ ⵜᵉⵜⵜⵡⴰⵄⴻⴵⴻⵎ ⵍⴰⴵ ⵏ ⵉⵥⴰⵔⴰⵃⵉⵢⵢⴻⵏ. ⵅⴻⵏⵏⵉ ⵉⵊⵊⴰ ⴰⴷ ⴷⴷ-ⵜⵇⴰⵔⵔⴻⴱ ⵍⴰⴵ ⵏ ⵉⵥⴰⵔⴰⵃⵉⵢⵢⴻⵏ, ⵜᵉⵜⵜⵡⴰⵙⴻⵜⵜⴻⴼ ⵄⵍⴰⵃⵙⴰⴱ ⵉⵔⵢⴰⵥⴻⵏ ⵉⴱⵍⵉⵖⴻⵏ ⵏⵏⴻⵙ ⵓⵛⴰ ⵉⵜⵜⵡⴰⵄⴻⴵⴻⵎ ⵣⴰⴱⴷⵉ.

18 ⵏⴻⵜⵜⴰ ⵉⵊⵊⴰ ⴰⴷ ⴷⴷ-ⵉⵇⴰⵔⵔⴻⴱ ⵍⴰⴵ ⵏ ⵜⴰⴷⴷⴰⵔⵜ ⵏⵏⴻⵙ, ⵜⵜⵡⴰⵙⴻⵜⵜⴼⴻⵏ ⵄⵍⴰⵃⵙⴰⴱ ⵉⵔⵢⴰⵥⴻⵏ ⵉⴱⵍⵉⵖⴻⵏ ⵏⵏⴻⵙ ⵓⵛⴰ ⵉⵜⵜⵡⴰⵄⴻⴵⴻⵎ ⵄⴰⵅⴰⵏ, ⵎⵎⵉⵙ ⵏ ⴽⴰⵔⵎⵉ, ⵎⵎⵉⵙ ⵏ ⵣⴰⴱⴷⵉ, ⵎⵎⵉⵙ ⵏ ⵣⴰⵔⴰⵃ, ⵥⵉ ⵜⴻⵇⴱⵉⵞ ⵏ ⵢⴰⵀⵓⴷⴰ.

19 ⵢⴰⵛⵓⵡⴰ ⵉⵏⵏⴰ ⵉ ⵄⴰⵅⴰⵏ: “ⴰ ⵎⵎⵉ, ⴻⵡⵛ ⵍⵄⴻⵥⵥ ⵉ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵓ ⵇⴰⴷⴰ ⵉ-ⵜ! ⵉⵏⵉ ⴰⵢⵉ, ⵎⵉⵏ ⵜⴻⴳⴳⵉⴷ ⵛⴻⴽ, ⵡⴰⵔ ⵅⴰⴼⵉ ⵙⵏⵓⴼⴼⴰⵔ ⵛⴰ” 20 ⵄⴰⵅⴰⵏ ⵢⴰⵔⵔⴰ-ⴷⴷ ⵅ ⵢⴰⵛⵓⵡⴰ, ⵉⵏⵏⴰ: “ⴰⵇⴰ ⵙ ⵜⵉⴷⴻⵜⵜ, ⵏⴻⵛⵛ ⵅⴹⵉⵖ ⴰⴽ-ⴷ ⵙⵉⴷⵉ, ⴰⵔⴻⴱⴱⵉ ⵏ ⵉⵙⵔⴰⵉⵍ, ⵏⴻⵛⵛ ⴳⴳⵉⵖ ⵜⴰ ⴷ ⵜⴰ. 21 ⵏⴻⵛⵛ ⵥⵔⵉⵖ ⵊⴰⵔ ⵜⴽⴻⵛⵛⴰⴹⵜ ⵉⵊⵊ ⵏ ⵓⴱⴰⵔⵜⴻⵙⵙⵓ ⵉⵥⴻⵡⵡⵇⴻⵏ ⵥⵉ ⵛⵉⵏⴰⵔ ⴷ ⵎⵉⵜⴰⵢⴻⵏ ⵏ ⵉⵛⵉⵇⵍⴻⵏ ⵏ ⵏⵏⵓⵇⴰⵔⵜ ⴷ ⵉⵛⵜ ⵏ ⵜⴱⴰⵔⵔⴰⵜ ⵏ ⵡⵓⵔⴻⵖ ⵜⴻⵡⵥⴻⵏ ⵅⴻⵎⵙⵉⵏ ⵏ ⵉⵛⵉⵇⵍⴻⵏ. ⵏⴻⵛⵛ ⵎⴻⵥⵔⴻⵖ ⴷⴰⵢⵙⴻⵏ ⵓⵛⴰ ⵉⵡⵢⴻⵖ ⵜⴻⵏ-ⴷⴷ ⵖⴰⵔⵉ, ⴰⵇⴰ ⴰⵜⴻⵏ ⵏⵏⵓⴼⴰⵔⴻⵏ ⴷⵉ ⵜⴻⵎⵎⵓⵔⵜ, ⴷⵉ ⵍⵡⴻⵙⵜ ⵏ ⵓⵇⵉⴹⵓⵏ ⵉⵏⵓ, ⴷ ⵏⵏⵓⵇⴰⵔⵜ ⵙⵡⴰⴷⴷⴰⵢ.” 22 ⵢⴰⵛⵓⵡⴰ ⵉⵙⵙⴻⴽⴽ ⵉⵔⴻⵇⵇⴰⵙⴻⵏ. ⵏⵉⵜⵏⵉ ⵓⵥⵥⵍⴻⵏ ⵖⴰⵔ ⵓⵇⵉⴹⵓⵏ, ⵅⵥⴰⵔ, ⵍⴻⵃⵡⴰⵢⴻⵊ ⵜⵓⵖⴰ ⴰⵜⴻⵏ ⵏⵓⴼⴼⴰⵔⴻⵏ ⴷⴻⴳ ⵓⵇⵉⴹⵓⵏ, ⴷ ⵏⵏⵓⵇⴰⵔⵜ ⵙⵡⴰⴷⴷⴰⵢ. 23 ⴽⵙⵉⵏ ⵏⵉⵜⵏⵉ ⵍⴻⵃⵡⴰⵢⴻⵊ ⵏⵏⵉ ⵥⵉ ⵍⵡⴻⵙⵜ ⵏ ⵓⵇⵉⴹⵓⵏ ⵓⵛⴰ ⵉⵡⵢⴻⵏ ⵜⴻⵏ ⵖⴰⵔ ⵢⴰⵛⵓⵡⴰ ⵓ ⵖⴰⵔ ⵎⴰⵔⵔⴰ ⴰⵢⵜ ⵏ ⵉⵙⵔⴰⵉⵍ ⵓⵛⴰ ⵙⵙⴰⵔⵙⴻⵏ ⵜⴻⵏ ⵥⵥⴰⵜ ⵉ ⵡⵓⴷⴻⵎ ⵏ ⵙⵉⴷⵉ. ^□  

24 ⵢⴰⵛⵓⵡⴰ, ⴷ ⵎⴰⵔⵔⴰ ⵉⵙⵔⴰⵉⵍ ⴰⴽⵉⴷⴻⵙ, ⵉⴽⵙⵉ ⵄⴰⵅⴰⵏ, ⵎⵎⵉⵙ ⵏ ⵣⴰⵔⴰⵃ, ⵓⵍⴰ ⴷ ⵏⵏⵓⵇⴰⵔⵜ ⴷ ⵓⴱⴰⵔⵜⴻⵙⵙⵓ ⵉⵥⴻⵡⵡⵇⴻⵏ ⴷ ⵜⴱⴰⵔⵔⴰⵜ ⵏ ⵡⵓⵔⴻⵖ ⴷ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵢⴻⵙⵙⵉⵙ ⵏⵏⴻⵙ ⴷ ⵉⴼⵓⵏⴰⵙⴻⵏ ⵏⵏⴻⵙ ⴷ ⵉⵖⵢⴰⵍ ⵏⵏⴻⵙ ⴷ ⵡⵓⴵⵉ ⵏⵏⴻⵙ ⴷ ⵓⵇⵉⴹⵓⵏ ⵏⵏⴻⵙ ⴷ ⵎⴰⵔⵔⴰ ⵎⵉⵏ ⵖⴰⵔⴻⵙ ⵓⵛⴰ ⵉⵡⵢⴻⵏ ⵜⴻⵏ ⵖⴰⵔ ⵜⴻⵖⵥⵓⵔⵜ ⵏ ⴰⵅⵓⵔ. 25 ⵉⵏⵏⴰ ⵢⴰⵛⵓⵡⴰ: “ⵎⴰⵢⴻⵎⵎⵉ ⵉ ⴷ ⴰⵏⴻⵖ ⵜⴻⴳⴳⵉⴷ ⴷⵉ ⴰⵔⵔⵥⵉⵢⴻⵜ? ⵙⵉⴷⵉ ⴰⴷ ⵛⴻⴽ ⵢⴻⴳⴳ ⴷⵉ ⴰⵔⵔⵥⵉⵢⴻⵜ ⴰⵙⵙ-ⴰ!” ⴷ ⵎⴰⵔⵔⴰ ⵉⵙⵔⴰⵉⵍ ⵢⴰⵔⵊⴻⵎ ⵉ-ⵜ ⵙ ⵉⵥⵔⴰ ⵓⵛⴰ ⵙⵙⵛⴻⵎⴹⴻⵏ ⵜⴻⵏ ⵙ ⵜⵎⴻⵙⵙⵉ ⵓⵛⴰ ⵏⴹⴰⵔⴻⵏ ⵅⴰⵙⴻⵏ ⵉⵥⵔⴰ. 26 ⵙⵙⴱⴻⴷⴷⴻⵏ ⵅⴰⵙ ⵉⵊⵊ ⵏ ⵓⵄⵓⵔⵔⵉⵛ ⴷ ⴰⵎⴻⵇⵇⵔⴰⵏ ⵏ ⵉⵥⵔⴰ ⵡⴻⵏⵏⵉ ⴷⵉⵏ ⵉⴵⴰⵏ ⴰⵍ ⴰⵙⵙ-ⴰ. ⵓⵛⴰ ⵙⵉⴷⵉ ⵉⴳⴳⴰ ⴰⴷ ⴷⴷ-ⵉⵄⵇⴻⴱ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⵙ. ⵙ ⵓⵢⴻⵏⵏⵉ ⵇⵇⴰⵔⴻⵏ ⴰⵙ ⵉ ⵜⴻⵎⵎⵓⵔⵜ ⵏⵏⵉ: ‘ⵜⴰⵖⵥⵓⵔⵜ ⵏ ⴰⵅⵓⵔ’ ⵖⴰⵔⴻⵙ ⴰⵍ ⴰⵙⵙ-ⴰ. ^□