1 “ⵡⴰⵔ ⵉⵄⴻⴷⴷⴻⵍ ⴰⴷ ⵜⵅⴻⵥⵥⴰⵔⴻⴷ ⵡⴰⵀⴰ ⴷⴻⴳ ⵓⵡⴻⴷⴷⴰⵔ ⵏ ⵓⴼⵓⵏⴰⵙ ⵏⵉⵖ ⵏ ⵉⵊⵊⴻⵏ ⵥⴻⴳ ⵡⵓⴵⵉ ⵏ ⵓⵎⴰⵛ, ⵏⵉⵖ ⴰⴷ ⵅⴰⵙ ⵜⵇⴻⵍⴱⴻⴷ ⵜⵉⵟⵟⴰⵡⵉⵏ, ⵎⴰⵛⴰ ⵉⵜⵜⵅⴻⵚⵚⴰ ⴰⴷ ⴰⵙ ⵜⴻⵏ-ⵉ-ⴷⴷ-ⵜⴰⵔⵔⴻⴷ ⵏⵉⵛⴰⵏ ⵉ ⵓⵎⴰⵛ. ^■   2 ⵎⴰⵍⴰ ⵓⵎⴰⵛ ⵡⴰⵔ ⵉⴵⵉ ⵛⴰ ⵢⵓⴷⴻⵙ ⵏⵉⵖ ⵡⴰⵔ ⵜ ⵜⴻⵙⵙⵉⵏⴻⴷ, ⴰⴷ ⵜ ⵜⴻⵙⵙⵉⴷⴼⴻⴷ ⵖⴰⵔ ⴷⴰⵅⴻⵍ ⵉ ⵜⴰⴷⴷⴰⵔⵜ ⵏⵏⴻⴽ ⵓⵛⴰ ⴰⴷ ⵖⴰⵔⴻⴽ ⵉⵇⵇⵉⵎ ⴰⵍ ⴷⴷ ⵖⴰ ⵢⴰⵙ ⵓⵎⴰⵛ ⴰⴷ ⵅⴰⵙ ⵢⴰⵔⵥⵓ ⵓⵛⴰ ⵅⴻⵏⵏⵉ ⴰⴷ ⴰⵙ ⵜ-ⵉ-ⴷⴷ ⵜⴰⵔⵔⴻⴷ. 3 ⴰⵎⴻⵏⵏⵉ ⵉ ⵖⴰ ⵜⴻⴳⴳⴻⴷ ⵙ ⵡⴻⵖⵢⵓⵍ ⵏⵏⴻⵙ, ⴰⵎⴻⵏⵏⵉ ⵉ ⵖⴰ ⵜⴻⴳⴳⴻⴷ ⵄⴰⵡⴻⴷ ⵙ ⵡⴰⵔⵔⵓⴹ ⵏⵏⴻⵙ, ⵡⴰⵀ ⴰⵎⵎⵓ ⵉ ⵖⴰ ⵜⴻⴳⴳⴻⴷ ⴰⴽ-ⴷ ⵎⴰⵔⵔⴰ ⵜⴰⵎⴻⵙⵍⴰⵛⵜ ⵏ ⵓⵎⴰⵛ ⵏⵏⵉ ⵥⵥⴰⵢⴻⵙ ⵉⵡⴻⴷⴷⴰⵔⴻⵏ ⵓⵛⴰ ⵜⵓⴼⵉⴷ ⵜⵜ ⵛⴻⴽ. ⵡⴰⵔ ⵉⵄⴻⴷⴷⴻⵍ ⴰⴷ ⴰⵙ ⵜⴻⵏⵏⵓⴼⴰⵔⴻⴷ. ^□   4 ⵡⴰⵔ ⵜⴻⵇⵇⵉⵎⴻⴷ ⴰⴷ ⵜⴻⵅⵥⴰⵔⴻⴷ ⴷⴻⴳ ⵡⴻⵖⵢⵓⵍ ⵏ ⵓⵎⴰⵛ ⵏⵉⵖ ⴷⴻⴳ ⵓⴼⵓⵏⴰⵙ ⵏⵏⴻⵙ ⴰⵎ ⵡⴹⴰⵏ ⴷⴻⴳ ⵡⴻⴱⵔⵉⴷ, ⵡⴰⵔ ⵅⴰⵙⴻⵏ ⵇⴻⴵⴻⴱ ⵛⴰ ⵜⵉⵟⵟⴰⵡⵉⵏ. ⵙ ⵜⵉⴷⴻⵜⵜ ⴰⴷ ⵜⴻⵏ ⵜⴻⵙⵙⴻⴽⴽⴰⵔⴻⴷ ⴰⴽⵉⴷⴻⵙ.

5 ⵜⴰⵎⵖⴰⵔⵜ ⵡⴰⵔ ⵜⵢⴰⵔⵔⴻⴹ ⴰⵔⵔⵓⴹ ⵏ ⵡⴻⵔⵢⴰⵥ, ⵏⵉⵖ ⴰⵔⵢⴰⵥ ⴰⴷ ⵢⴰⵔⴹ ⴰⵔⵔⵓⴹ ⵏ ⵜⴻⵎⵖⴰⵔⵜ, ⵎⵉⵏⵥⵉ ⵎⴰⵔⵔⴰ ⵡⵉ ⵉⵜⵜⴻⴳⴳⴻⵏ ⴰⵢⴰ ⴰⵇⴰ-ⵜⵜ ⴷ ⵊⵊⵄⵉⴼⴻⵛⵜ ⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ.

6 ⵎⴰⵍⴰ ⵉⴱⴰⵏ-ⴷⴷ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ ⵅ ⵡⴻⴱⵔⵉⴷ ⵛⴰ ⵏ ⵍⵄⵓⵛⵛ ⵏ ⵡⴻⵊⴹⵉⴹ, ⴷⵉ ⵛⴰ ⵏ ⵜⵛⴻⵊⵊⴰⵔⵜ ⵏⵉⵖ ⵅ ⵜⴻⵎⵎⵓⵔⵜ, ⵙ ⵉⵡⴰⵔⵔⵓⴷⴻⵏ ⵏⵉⵖ ⵙ ⵜⵎⴻⴵⴰⵍⵉⵏ, ⵓⵛⴰ ⵜⴰⵢⴻⵎⵎⴰⵜ ⵜⴻⵙⵙⴷⴻⵍ ⵅ ⵉⵡⴰⵔⵔⵓⴷⴻⵏ ⵏⵉⵖ ⵅ ⵜⵎⴻⴵⴰⵍⵉⵏ, ⵅⴻⵏⵏⵉ ⵡⴰⵔ ⵜⵜᵉⵟⵟⴻⴼ ⵜⴰⵢⴻⵎⵎⴰⵜ ⴰⴽ-ⴷ ⵉⵡⴰⵔⵔⵓⴷⴻⵏ. ^□   7 ⴰⴷ ⵜⴻⵊⵊⴻⴷ ⴰⴷ ⵜⵓⵢⵓⵔ ⵜⵢⴻⵎⵎⴰⵜ, ⵎⴰⵛⴰ ⴰⴷ ⵜⴻⴽⵙⵉⴷ ⵉⵡⴰⵔⵔⵓⴷⴻⵏ ⵉ ⵢⵉⵅⴻⴼ ⵏⵏⴻⴽ, ⵃⵉⵎⴰ ⴰⴷ ⵜⵉⵍⵉⴷ ⵎⵍⵉⵃ, ⵓⵛⴰ ⴰⴷ ⴰⵛ ⵥⵓⴳⴳⴰⵔⵜⴻⵏ ⵡⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⴽ.

8 ⵅⵎⵉ ⵉ ⵖⴰ ⵜⴻⴱⵏⵉⴷ ⵜⴰⴷⴷⴰⵔⵜ ⵏ ⵊⴷⵉⴷ, ⴰⴷ ⵜⴻⴳⴳⴻⴷ ⵜⴰⵄⵎⴰⴷⵜ ⵅ ⵜⵥⴻⵇⵇⴰ ⵏⵏⴻⴽ, ⵃⵉⵎⴰ ⵡⴰⵔ ⵜⵜⵉⴽⴽⵯⵉⴹⴻⵏ ⵉⴷⴰⵎⵎⴻⵏ ⵖⴰⵔ ⵜⴰⴷⴷⴰⵔⵜ ⵏⵏⴻⴽ, ⵎⴰⵍⴰ ⵉⵡⴹⴰ-ⴷⴷ ⵥⵥⴰⵢⴻⵙ ⵃⴻⴷ.

9 ⵡⴰⵔ ⵥⴰⵔⵔⴻⵄ ⵛⴰ ⴰⵎⴰⵔⵊⵓⵄ ⵏ ⵓⴹⵉⵍ ⵏⵏⴻⴽ ⵙ ⵜⵏⴰⵢⴻⵏ ⵏ ⵎⴰⵔⴽⴰⵜ ⵏ ⵥⵥⴰⵔⵉⵄⴻⵜ ⵃⵉⵎⴰ ⵡⴰⵔ ⵜᵉⵜⵜⵡⴰⵙⵄⵉⴵⵉⵜ ⵎⴰⵔⵔⴰ ⵚⵚⴰⴱⴻⵜ ⵏ ⵥⵥⴰⵔⵉⵄⴻⵜ ⵏⵏⵉ ⵜⵥⴰⵔⵄⴻⴷ ⵓⵍⴰ ⴷ ⵍⵖⵉⴵⴻⵜ ⵏ ⵓⵎⴰⵔⵊⵓⵄ ⵏ ⵓⴹⵉⵍ. ^■  

10 ⵡⴰⵔ ⵛⴰⵔⵔⴻⵥ ⵛⴰ ⵙ ⵓⴼⵓⵏⴰⵙ ⴷ ⵡⴻⵖⵢⵓⵍ ⵊⵎⵉⵄ.

11 ⵡⴰⵔ ⵢⴰⵔⵔⴻⴹ ⵛⴰ ⴰⵔⵔⵓⴹ ⵉⵜⵜⵡⴰⴳⴳⴻⵏ ⵥⵉ ⵜⵅⴻⴵⴻⴹⵜ ⵏ ⵜⴰⴹⵓⴼⵜ ⴷ ⵍⴻⵇⵟⴻⵏ ⵊⵎⵉⵄ.

12 ⴰⴷ ⵜⴻⴳⴳⴻⴷ ⵜⵛⴰⵔⵛⵉⴼⴰ ⵅ ⴰⵔⴻⴱⵄⴰ ⵏ ⵉⵖⴻⵎⵎⵓⵔⴰ ⵏ ⵓⵙⴻⵍⵀⴰⵎ ⵏⵏⴻⴽ ⵉ ⵥⵉ ⵜⵍⴻⵃⵃⴼⴻⴷ. ^■  

13 ⵎⴰⵍⴰ ⵉⵊⵊ ⵏ ⵡⴻⵔⵢⴰⵥ ⵢⴰⵡⵉ ⵉⵛⵜ ⵏ ⵜⴻⵎⵖⴰⵔⵜ ⵓⵛⴰ ⵢⵓⴷⴻⴼ-ⴷⴷ ⵖⴰⵔⴻⵙ, ⵅⴻⵏⵏⵉ ⴰⴷ ⵜⵜ ⵉⵛⴰⵔⵀ,

14 ⵓⵛⴰ ⵉⵙⵙⴻⴽⴽⴰⵔ ⵅⴰⵙ ⴰⵡⴰⵍⴻⵏ ⵓⵛⴰ ⵢⴰⵔⵔⴰ ⵉⵙⴻⵎ ⵏⵏⴻⵙ ⴷ ⴰⵄⴻⴼⴼⴰⵏ, ⵉⵏⵏⴰ: ‘ⴰⵇⴰ ⵜⴰⵎⵖⴰⵔⵜ-ⴰ ⵉⵡⵢⴻⵖ ⵜⵜ, ⵓⵛⴰ ⵓⵎⵉ ⵖⴰⵔⴻⵙ-ⴷⴷ ⵇⴰⵔⵔⴱⴻⵖ, ⵉⵡⴹⴻⵖ ⴰⴷ ⵙⵙⵏⴻⵖ ⴰⵇⴰ ⵡⴰⵔ ⵜⴻⴵⵉ ⵛⴰ ⴷ ⵜⴰⵄⵥⴰⵔⴻⵛⵜ!’,

15 ⵅⴻⵏⵏⵉ ⴳⴳⵓⵔ ⴱⴰⴱⴰⵙ ⵏ ⵜⴻⴱⵍⵉⵖⵜ ⵏⵏⵉ ⴷ ⵢⴻⵎⵎⴰⵙ ⴰⴷ ⵙⵙⴻⵛⵏⴻⵏ ⵍⴱⵓⵔⵀⴰⵏⴰⵜ ⵏ ⵜⵖⵓⵏⵉ ⵏ ⵜⴻⴱⵍⵉⵖⵜ ⵉ ⵢⴻⵎⵖⴰⵔⴻⵏ ⵖⴰⵔ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ.

16 ⴰⴷ ⵢⵉⵏⵉ ⴱⴰⴱⴰⵙ ⵏ ⵜⴻⴱⵍⵉⵖⵜ ⵏⵏⵉ ⵉ ⵢⴻⵎⵖⴰⵔⴻⵏ: ‘ⵏⴻⵛⵛ ⵡⵛⵉⵖ ⵢⴻⴵⵉ ⵉ ⵡⴻⵔⵢⴰⵥ-ⴰ ⴷ ⵜⴰⵎⵖⴰⵔⵜ ⵓⵛⴰ ⵏⴻⵜⵜⴰ ⵉⴷⵡⴻⵍ ⵉⵛⴰⵔⵀ ⵉ-ⵜⵜ,

17 ⵓⵛⴰ ⴰⵇⴰ ⵏⴻⵜⵜⴰ ⵉⵙⵙⴻⴽⴽⴰⵔ ⵅⴰⵙ ⴰⵡⴰⵍⴻⵏ, ⵉⵏⵏⴰ: ⵡⴰⵔ ⵓⴼⵉⵖ ⵖⴰⵔ ⵢⴻⴵⵉⵛ ⵍⴱⵓⵔⵀⴰⵏⴰⵜ ⵏ ⵜⵖⵓⵏⵉ ⵏ ⵜⴻⴱⵍⵉⵖⵜ. ⴰⵇⴰ ⴰⵢⴰ ⴷ ⵍⴱⵓⵔⵀⴰⵏⴰⵜ ⵏ ⵜⵖⵓⵏⵉ ⵏ ⵢⴻⴵⵉ!’ ⵓⵛⴰ ⵏⵉⵜⵏⵉ ⴰⴷ ⴱⴻⵥⵥⵄⴻⵏ ⴰⵍⴻⵃⵃⴰⴼ ⵥⵥⴰⵜ ⵉ ⵡⵓⴷⴻⵎ ⵏ ⵉⵎⵖⴰⵔⴻⵏ ⵏ ⵜⴻⵏⴷⵉⵏⵜ.

18 ⵅⴻⵏⵏⵉ ⴰⴷ ⵟⵟⴼⴻⵏ ⵉⵎⵖⴰⵔⴻⵏ ⵏ ⵜⴻⵏⴷⵉⵏⵜ ⴰⵔⵢⴰⵥ ⵏⵏⵉ ⵓⵛⴰ ⴰⴷ ⵜ ⴼⴰⵔⵛⴻⵏ

19 ⵓⵛⴰ ⴰⴷ ⴰⵙ ⴳⴳⴻⵏ ⵎⵓⵍⵜⴰ ⵏ ⵎⵢⴰ ⵏ ⵓⵇⵉⵢⵢⴰⵜ ⵏ ⵏⵏⵓⵇⴰⵔⵜ ⵓⵛⴰ ⴰⴷ ⵜⴻⵏⵜ ⵉⵡⵛ ⵉ ⴱⴰⴱⴰⵙ ⵏ ⵜⴻⴱⵍⵉⵖⵜ ⵏⵏⵉ, ⵎⵉⵏⵥⵉ ⵏⴻⵜⵜⴰ ⵢⴰⵔⵔⴰ ⵉⵙⴻⵎ ⴷ ⴰⵄⴻⴼⴼⴰⵏ ⵅ ⵉⵛⵜ ⵏ ⵜⴻⵄⵥⴰⵔⴻⵛⵜ ⵥⵉ ⵉⵙⵔⴰⵉⵍ. ⴰⴷ ⵜⵉⵍⵉ ⴷ ⵜⴰⵎⵖⴰⵔⵜ ⵏⵏⴻⵙ, ⵡⴰⵔ ⵉⵃⴻⴵⴻⵍ ⴰⴷ ⴰⵙ ⵉⴵⴻⴼ ⵎⴰⵔⵔⴰ ⵓⵙⵙⴰⵏ ⵎⵉⵏ ⵉ ⵖⴰ ⵢⴻⴽⴽ ⵉⴷⴷⴰⵔ.

20 ⵎⴰⵛⴰ ⵎⴰⵍⴰ ⵉⴼⴼⴻⵖ ⵎⴰⵏ ⴰⵢⴰ ⴷ ⵜⵉⴷⴻⵜⵜ ⵓⵛⴰ ⵡⴰⵔ ⵓⴼⵉⵏ ⵍⴱⵓⵔⵀⴰⵏⴰⵜ ⵏ ⵜⵖⵓⵏⵉ ⵖⴰⵔ ⵜⴻⴱⵍⵉⵖⵜ, 21 ⵅⴻⵏⵏⵉ ⴰⴷ ⵙⵙⵓⴼⴼⵖⴻⵏ ⵜⴰⴱⵍⵉⵖⵜ ⵏⵏⵉ ⵖⴰⵔ ⵜⴻⵡⵡⴰⵔⵜ ⵏ ⵜⴰⴷⴷⴰⵔⵜ ⵏ ⴱⴰⴱⴰⵙ ⵓⵛⴰ ⴰⴷ ⵜⵜ ⴰⵔⴻⵊⵎⴻⵏ ⵢⴻⵔⵢⴰⵥⴻⵏ ⵏ ⵜⴻⵏⴷⵉⵏⵜ, ⴰⵍ ⵖⴰ ⵜⴻⵎⵎⴻⵜ, ⵎⵉⵏⵥⵉ ⵜⴻⴳⴳⴰ ⵍⴻⴼⴹⵉⵃⴻⵜ ⴷⵉ ⵉⵙⵔⴰⵉⵍ ⵓⵎⵉ ⵜⴻⵙⵙⴻⴼⴹⴻⵃ ⵉⵅⴻⴼ ⵏⵏⴻⵙ ⴷⵉ ⵜⴰⴷⴷⴰⵔⵜ ⵏ ⴱⴰⴱⴰⵙ. ⵉⵜⵜⵅⴻⵚⵚⴰ ⴰⴷ ⵜⴻⴽⴽⵙⴻⴷ ⵍⵖⴰⵔ ⵥⵉ ⵍⵡⴻⵙⵜ ⵏⵏⴻⴽ.

22 ⵎⴰⵍⴰ ⵉⵜⵜⵡⴰⵟⵟⴻⴼ ⵉⵊⵊ ⵏ ⵡⴻⵔⵢⴰⵥ ⵓⵎⵉ ⵉⵟⵟⴻⵚ ⴰⴽ-ⴷ ⵛⴰ ⵏ ⵜⴻⵎⵖⴰⵔⵜ ⵏⵏⵉ ⵉⴵⴰⵏ ⴰⴽ-ⴷ ⵡⴻⵔⵢⴰⵥ, ⵅⴻⵏⵏⵉ ⴰⴷ ⵎⵎⵜⴻⵏ ⵙ ⵜⵏⴰⵢⴻⵏ, ⴰⵔⵢⴰⵥ ⵏⵏⵉ ⵉⵟⵟⵚⴻⵏ ⴰⴽ-ⴷ ⵜⴻⵎⵖⴰⵔⵜ ⴷ ⵜⴻⵎⵖⴰⵔⵜ ⵄⴰⵡⴻⴷ. ⵉⵜⵜⵅⴻⵚⵚⴰ ⴰⴷ ⵜⴻⴽⴽⵙⴻⴷ ⵍⵖⴰⵔ ⵥⵉ ⵉⵙⵔⴰⵉⵍ. ^■  

23 ⵎⴰⵍⴰ ⵉⵛⵜ ⵏ ⵜⴻⴱⵍⵉⵖⵜ ⴷ ⵜⴰⵄⵥⴰⵔⴻⵛⵜ ⵜᵉⵜⵜⵡⴰⵅⴹⴻⴱ ⵥⴻⴳ ⵉⵊⵊ ⵏ ⵡⴻⵔⵢⴰⵥ, ⵓⵛⴰ ⵢⵓⴼⴰ ⵉ-ⵜⵜ ⵉⵊⵊ ⵏ ⵡⴻⵔⵢⴰⵥ ⴷⵉ ⵜⴻⵏⴷⵉⵏⵜ ⵓⵛⴰ ⵉⵟⵟⴻⵚ ⴰⴽⵉⴷⴻⵙ, 24 ⵅⴻⵏⵏⵉ ⴰⴷ ⵜⴻⵏ ⵜⴻⵙⵙⵓⴼⴼⵖⴻⵎ ⴱⴰⵔⵔⴰ ⵙ ⵜⵏⴰⵢⴻⵏ ⵖⴰⵔ ⵜⴻⵡⵡⴰⵔⵜ ⵏ ⵜⴻⵏⴷⵉⵏⵜ, ⴰⴷ ⵜⵜⵡⴰⵔⴻⵊⵎⴻⵏ ⴰⵍ ⵖⴰ ⵎⵎⵜⴻⵏ ⵏⵉⵜⵏⵉ. ⵜⴰⴱⵍⵉⵖⵜ ⵎⵉⵏⵥⵉ ⵡⴰⵔ ⵜⴻⵙⵙⴻⴽⴽⴰⵔ ⵛⴰ ⵜⵖⵓⵢⵢⵉⵜ ⴷⵉ ⵜⴻⵏⴷⵉⵏⵜ, ⴰⵔⵢⴰⵥ ⵎⵉⵏⵥⵉ ⵉⵙⵙⴻⵃⵇⴰⵔ ⵜⴰⵎⵖⴰⵔⵜ ⵏ ⵓⵎⵇⴰⵔⵔⴻⴱ ⵏⵏⴻⵙ. ⵉⵜⵜⵅⴻⵚⵚⴰ ⴰⴷ ⵜⴻⴽⴽⵙⴻⴷ ⵍⵖⴰⵔ ⵥⵉ ⵍⵡⴻⵙⵜ ⵏⵏⴻⴽ.

25 ⵎⴰⵍⴰ ⵉⵊⵊ ⵏ ⵡⴻⵔⵢⴰⵥ ⵢⵓⴼⴰ ⵉⵛⵜ ⵏ ⵜⴻⴱⵍⵉⵖⵜ ⵉⵜⵜⵡⴰⵅⴻⴹⴱⴻⵏ ⴷⴻⴳ ⵉⵢⵢⴰⵔ ⵓⵛⴰ ⵉⵙⵙⴻⵅⵙⴰⵔ ⵉ-ⵜⵜ ⵡⴻⵔⵢⴰⵥ, ⵉⵟⵟⴻⵚ ⴰⴽⵉⴷⴻⵙ, ⵅⴻⵏⵏⵉ ⵉⵜⵜⵅⴻⵚⵚⴰ ⴰⴷ ⵉⵎⵎⴻⵜ ⵡⴻⵔⵢⴰⵥ ⵡⴰⵀⴰ ⵡⴻⵏⵏⵉ ⵉ ⴽⵉⵙ ⵉⵟⵟⵚⴻⵏ. 26 ⵡⴰⵔ ⵜⵜⴻⴳⴳ ⵡⴰⵍⵓ ⵉ ⵜⴻⴱⵍⵉⵖⵜ. ⵜⴰⴱⵍⵉⵖⵜ ⵡⴰⵔ ⵜⴻⴳⴳⵉ ⵛⴰ ⴷⴷⴻⵏⴱ ⴰⵍ ⵍⵎⴻⵡⵜ, ⵎⵉⵏⵥⵉ ⵜⴰⵎⴻⵙⵍⴰⵛⵜ-ⴰ ⴰⵎⴻⵛⵏⴰⵡ ⵜⴰⵎⴻⵙⵍⴰⵛⵜ ⵏ ⵡⴻⵔⵢⴰⵥ ⵏⵏⵉ ⵉⴽⴽⴰⵔⴻⵏ ⴰⴽ-ⴷ ⵓⵎⵇⴰⵔⵔⴻⴱ ⵏⵏⴻⵙ ⵓⵛⴰ ⵉⵏⵖⴰ ⵉ-ⵜ, 27 ⵎⵉⵏⵥⵉ ⵏⴻⵜⵜⴰ ⵢⵓⴼⵉ ⵜⵜ ⴷⴻⴳ ⵉⵢⵢⴰⵔ, ⵜⴻⵙⵖⵓⵢ ⵜⴻⴱⵍⵉⵖⵜ ⵏⵏⵉ ⵉⵜⵜⵡⴰⵅⴻⴹⴱⴻⵏ, ⵎⴰⵛⴰ ⵡⴰⵔ ⵜⵓⵖⵉ ⴷⵉⵏ ⵡⵉ ⵜⵜ ⵖⴰ ⵉⵙⵙⵏⴻⵊⵎⴻⵏ.

28 ⵅⵎⵉ ⵛⴰ ⵏ ⵡⴻⵔⵢⴰⵥ ⵢⵓⴼⴰ ⵉⵛⵜ ⵏ ⵜⴻⴱⵍⵉⵖⵜ ⴷ ⵜⴰⵄⵥⴰⵔⴻⵛⵜ, ⵡⴰⵔ ⵜⵜ ⵉⵅⴹⵉⴱ ⵃⴻⴷ, ⵓⵛⴰ ⵏⴻⵜⵜⴰ ⵉⵟⵟⴻⴼ ⵉ-ⵜⵜ, ⵉⵟⵟⴻⵚ ⴰⴽⵉⴷⴻⵙ ⵓⵛⴰ ⵜⵜⵡⴰⴼⴻⵏ ⵏⵉⵜⵏⵉ, 29 ⵅⴻⵏⵏⵉ ⴰⵔⵢⴰⵥ ⵏⵏⵉ ⵉⵟⵟⵚⴻⵏ ⴰⴽⵉⴷⴻⵙ ⴰⴷ ⵉⵡⵛ ⵉ ⴱⴰⴱⴰⵙ ⵏ ⵜⴻⴱⵍⵉⵖⵜ ⵅⴻⵎⵙⵉⵏ ⵏ ⵓⵇⵉⵢⵢⴰⵜ ⵏ ⵏⵏⵓⵇⴰⵔⵜ ⵓ ⵏⴻⵜⵜⴰⵜ ⴰⴷ ⵜⴻⴷⵡⴻⵍ ⴷ ⵜⴰⵎⵖⴰⵔⵜ ⵏⵏⴻⵙ, ⵓⵎⵉ ⵜⵜ ⵉⵙⵙⴻⵃⵇⴰⵔ. ⵡⴰⵔ ⵉⵥⴻⵎⵎⴰⵔ ⴰⴷ ⴰⵙ ⵉⴵⴻⴼ ⵎⴰⵔⵔⴰ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⵙ.” ^■