1 “ⵎⴰⵍⴰ ⵉⵜⵜⵡⴰⴼ ⵃⴻⴷ ⵉⵜⵜⵡⴰⵏⴻⵖ, ⴷⵉ ⵜⴻⵎⵎⵓⵔⵜ ⵏⵏⵉ ⴷ ⴰⵛ ⵉ ⵖⴰ ⵉⵡⵛ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵎⴰⵃⴻⵏⴷ ⴰⴷ ⵜⵜ ⵜᵉⵟⵟⴼⴻⴷ ⴷ ⵍⵡⴰⵔⵜ, ⵉⵥⵥⴻⵍ ⴷⴻⴳ ⵉⵢⵢⴰⵔ ⵓⵛⴰ ⵡⴰⵔ ⵉⵙⵙⵉⵏ ⵃⴻⴷ ⵡⵉ ⵜ ⵉⵏⵖⵉⵏ, 2 ⵅⴻⵏⵏⵉ ⵉⵎⵖⴰⵔⴻⵏ ⵏⵏⴻⴽ ⴷ ⵍⵇⵓⴹⴰⵜ ⵏⵏⴻⴽ ⴰⴷ ⴷⴷ-ⴼⴼⵖⴻⵏ ⵓⵛⴰ ⴰⴷ ⴽⵙⵉⵏ ⵍⴻⵄⴱⴰⵔ ⴰⵍ ⵜⵉⵏⴻⴷⴷⴰⵎ ⵉ ⴷ ⴰⵙ ⴷⴷ-ⵉⵏⵏⴹⴻⵏ ⵉ ⵡⴻⵏⵏⵉ ⵉⵜⵜⵡⴰⵏⵖⴻⵏ. 3 ⵣⵉ ⵜⴻⵏⴷⵉⵏⵜ, ⵜⴻⵏⵏⵉ ⵢⵓⴷⵙⴻⵏ ⵉ ⵡⴻⵏⵏⵉ ⵉⵜⵜⵡⴰⵏⵖⴻⵏ, ⴰⴷ ⵥⵥⴰⵢⴻⵙ ⴽⵙⵉⵏ ⵢⵉⵎⵖⴰⵔⴻⵏ ⵉⵛⵜ ⵏ ⵜⵢⴻⵏⴷⵓⵥⵜ ⵏ ⵜⴼⵓⵏⴰⵙⵉⵏ ⵏⵏⵉ ⵄⴻⵎⵎⴰⵔⵚ ⵡⴰⵔ ⵥⵥⴰⵢⴻⵙ ⵛⵔⵉⵥⴻⵏ ⵛⴰ ⵓ ⵜⴻⵏⵏⵉ ⵡⴰⵔ ⵉⵊⴱⵉⴷⴻⵏ ⵄⴰⴷ ⴰⵥⴰⵢⵍⵓ. 4 ⵓⵛⴰ ⵉⵎⵖⴰⵔⴻⵏ ⵏ ⵜⴻⵏⴷⵉⵏⵜ ⵏⵏⵉ ⴰⴷ ⵙⵙⴻⵀⵡⴰⵏ ⵜⴰⵢⴻⵏⴷⵓⵥⵜ ⵏⵏⵉ ⵖⴰⵔ ⵉⵛⵜ ⵏ ⵜⴻⵖⵥⵓⵔⵜ ⵉⵜⵜⴰⵥⵍⴻⵏ ⵍⴻⴱⴷⴰ ⵙ ⵡⴰⵎⴰⵏ, ⵄⴻⵎⵎⴰⵔⵚ ⵡⴰⵔ ⵜᵉⵜⵜⵡⴰⵛⴰⵔⵥ ⵓ ⵡⴰⵔ ⵜᵉⵜⵜⵡⴰⵥⵥⵓ ⵓⵛⴰ ⴰⴷ ⴰⵔⵥⴻⵏ ⵉⵔⵉ ⵏ ⵜⵢⴻⵏⴷⵓⵥⵜ ⴷⵉⵏ ⴷⵉ ⵜⴻⵖⵥⵓⵔⵜ. 5 ⵅⴻⵏⵏⵉ ⴰⴷ ⴷⴷ-ⵇⴰⵔⵔⴱⴻⵏ ⵉⴽⴻⵀⵀⴰⵏⴻⵏ, ⴰⵢⵜ ⵏ ⵍⴰⵡⵉ, ⵎⵉⵏⵥⵉ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵉⵅⴹⴰⵔ ⵉ-ⵜⴻⵏ ⵎⴰⵃⴻⵏⴷ ⴰⴷ ⵅⴰⵙ ⵙⴻⵅⵅⴰⵔⴻⵏ ⵓ ⵎⴰⵃⴻⵏⴷ ⴰⴷ ⴱⴰⵔⴽⴻⵏ ⵙ ⵢⵉⵙⴻⵎ ⵏ ⵙⵉⴷⵉ ⵓ ⵄⵍⴰⵃⵙⴰⴱ ⴰⵡⴰⵍ ⵏⵙⴻⵏ ⴰⴷ ⵉⵜⵜⵡⴰⵃⴽⴻⵎ ⴽⵓⵍ ⴰⵎⵛⵓⴱⴱⴻⵛ ⴷ ⴽⵓⵍ ⵍⴻⵅⵛⵓⵏⴻⵛⵜ. 6 ⵓⵛⴰ ⵎⴰⵔⵔⴰ ⵉⵎⵖⴰⵔⴻⵏ ⵏ ⵜⴻⵏⴷⵉⵏⵜ ⵏⵏⵉ ⵢⵓⴷⵙⴻⵏ ⵅ ⵡⴻⵏⵏⵉ ⵉⵜⵜⵡⴰⵏⵖⴻⵏ, ⴰⴷ ⵙⵙⵉⵔⴷⴻⵏ ⵉⴼⴰⵙⵙⴻⵏ ⵏⵙⴻⵏ ⵙⴻⵏⵏⴻⵊ ⵉ ⵜⵢⴻⵏⴷⵓⵥⵜ ⵏⵏⵉ ⵓⵎⵉ ⵉⵜⵜⵡⴰⵔⵥ ⵢⵉⵔⵉ ⴷⵉ ⵜⴻⵖⵥⵓⵔⵜ 7 ⵓⵛⴰ ⴰⴷ ⴱⴰⵔⵔⵃⴻⵏ, ⴰⴷ ⵉⵏⵉⵏ: ‘ⵉⴼⴰⵙⵙⴻⵏ ⵏⵏⴻⵖ ⵡⴰⵔ ⵙⵙⵉⵥⵥⵍⴻⵏ ⵛⴰ ⵉⴷⴰⵎⵎⴻⵏ-ⴰ ⵓ ⵜⵉⵟⵟⴰⵡⵉⵏ ⵏⵏⴻⵖ ⵡⴰⵔ ⵜ ⵥⵔⵉⵏ. 8 ⴻⴳⴳ ⴰⵚⵍⴰⵃ ⵉ ⵍⴳⴻⵏⵙ ⵏⵏⴻⴽ ⵉⵙⵔⴰⵉⵍ ⵏⵏⵉ ⵜⴻⴼⴷⵉⴷ, ⴰ ⵙⵉⴷⵉ, ⵓⵛⴰ ⵡⴰⵔ ⵙⵙⵔⵓⵙⴰ ⵉⴷⴰⵎⵎⴻⵏ ⵉⵎⴻⵥⴷⴰⴳⴻⵏ, ⴷⵉ ⵍⵡⴻⵙⵜ ⵏ ⵍⴳⴻⵏⵙ ⵏⵏⴻⴽ ⵉⵙⵔⴰⵉⵍ!’ ⵅⴻⵏⵏⵉ ⵉⴷⴰⵎⵎⴻⵏ ⵏⵏⵉ ⴰⴷ ⵉⵍⵉⵏ ⵜⵜⵡⴰⴼⴷⵉⵏ ⵉ ⵏⵉⵜⵏⵉ. 9 ⴰⵎⵎⵓ ⵉ ⵖⴰ ⵜⴻⴽⴽⵙⴻⴷ ⵉⴷⴰⵎⵎⴻⵏ ⵉⵎⴻⵥⴷⴰⴳⴻⵏ ⵥⵉ ⵍⵡⴻⵙⵜ ⵏⵏⴻⴽ, ⵎⵉⵏⵥⵉ ⵉⵜⵜⵅⴻⵚⵚⴰ ⴰⴷ ⵜⴻⴳⴳⴻⴷ ⵎⵉⵏ ⵉⴵⴰⵏ ⵏⵉⵛⴰⵏ ⴷⵉ ⵜⵉⵟⵟⴰⵡⵉⵏ ⵏ ⵙⵉⴷⵉ.

10 ⵅⵎⵉ ⵉ ⵖⴰ ⵜⴻⴼⴼⵖⴻⴷ ⵖⴰⵔ ⵓⵎⴻⵏⵖⵉ ⴰⴽ-ⴷ ⵍⵄⴻⴷⵢⴰⵏ ⵏⵏⴻⴽ ⵓⵛⴰ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵉⴳⴳⴰ ⴰⵛ ⵜⴻⵏ ⴷⴻⴳ ⵉⴼⴰⵙⵙⴻⵏ ⵏⵏⴻⴽ ⵓⵛⴰ ⵜⵃⴻⴱⴱⵙⴻⴷ ⵥⵥⴰⵢⴻⵙ ⴷ ⵉⵎⴻⵃⴱⴰⵙ,

11 ⵓⵛⴰ ⵜⴻⵥⵔⵉⴷ ⵊⴰⵔ ⵉⵎⴻⵃⴱⴰⵙ ⵉⵛⵜ ⵏ ⵜⴻⵎⵖⴰⵔⵜ, ⵜⴻⵛⵏⴰ ⴷⴻⴳ ⵡⴰⴷⴷⵓⴷ, ⵓⵛⴰ ⵜⴻⵎⵎⴻⵥⵔⴻⴷ ⴰⴷ ⵜⵜ ⵜⴻⴽⵙⵉⴷ ⴷ ⵜⴰⵎⵖⴰⵔⵜ ⵉ ⵢⵉⵅⴻⴼ ⵏⵏⴻⴽ

12 ⵅⴻⵏⵏⵉ ⴰⴷ ⵜⵜ ⵜⴻⵙⵙⵉⴷⴼⴻⴷ ⵖⴰⵔ ⵜⴰⴷⴷⴰⵔⵜ ⵏⵏⴻⴽ ⵓⵛⴰ ⴰⴷ ⵜⵃⴻⴼⴼ ⴰⵥⴻⴵⵉⴼ ⵏⵏⴻⵙ, ⴰⴷ ⵜⵇⴻⵙⵙⴻⴷ ⵉⵛⵛⴰⵔⴻⵏ ⵏⵏⴻⵙ.

13 ⴰⴷ ⵜⴻⴽⴽⴻⵙ ⴰⵔⵔⵓⴹ ⵏ ⵜⵎⴻⵃⴱⴰⵙⵜ ⵏⵏⴻⵙ ⵓⵛⴰ ⴰⴷ ⵜⴻⵇⵇⵉⵎ ⴷⵉ ⵜⴰⴷⴷⴰⵔⵜ ⵏⵏⴻⴽ ⵓⵛⴰ ⴰⴷ ⵜⴻⵙⵖⵓⵢ ⵉ ⴱⴰⴱⴰⵙ ⴷ ⵢⴻⵎⵎⴰⵙ ⵉⵊⵊ ⵏ ⵓⵢⵓⵔ ⵉⴽⵎⴻⵍ ⵓ ⴰⵡⴰⵔⵏⵉ ⵎⴰⵏ ⴰⵢⴰ ⵜⵥⴻⵎⵎⴰⵔⴻⴷ ⴰⴷ ⵅⴰⵙ ⵜⴰⴷⴼⴻⴷ ⵓⵛⴰ ⴰⴷ ⵜⵉⵍⵉⴷ ⴷ ⴰⵔⵢⴰⵥ ⵏⵏⴻⵙ ⵓ ⵏⴻⵜⵜⴰⵜ ⴰⴷ ⵜⵉⵍⵉ ⴷ ⵜⴰⵎⵖⴰⵔⵜ ⵏⵏⴻⴽ.

14 ⵓⵛⴰ ⵎⴰⵍⴰ ⵡⴰⵔ ⴷ ⴰⵛ ⵜⴻⵄⵊⵉⴱ, ⴰⴷ ⵜⵜ ⵜⴻⵊⵊⴻⴷ ⴰⴷ ⵜⵓⵢⵓⵔ ⵖⴰⵔ ⵍⵅⴰⴹⴰⵔ ⵏⵏⴻⵙ, ⵡⴰⵔ ⵜⵜ ⵥⵏⵓⵥⵉ ⵙ ⵏⵏⵓⵇⴰⵔⵜ. ⵡⴰⵔ ⵥⵥⴰⵢⴻⵙ ⵜⴻⴳⴳⴻⴷ ⴰⵎⴻⵛⵏⴰⵡ ⵙⵙⴻⵍⵄⴻⵜ ⵉ ⵜⴻⴵⴰ, ⵎⵉⵏⵥⵉ ⴰⵇⴰ ⵜⴻⵙⵙⴻⵃⵇⴰⵔⴻⴷ ⵜⵜ. ^□  

15 ⵎⴰⵍⴰ ⴰⵔⵢⴰⵥ ⵖⴰⵔⴻⵙ ⵜⵏⴰⵢⴻⵏ ⵏ ⵜⴻⵎⵖⴰⵔⵉⵏ, ⵉⵛⵜⴻⵏ ⵉⵜⵜⴻⵅⵙ ⵉ-ⵜⵜ, ⵜⴻⵏⵏⴻⵖⵏⵉⵜ ⵉⵛⴰⵔⵔⴻⵀ ⵉ-ⵜⵜ, ⵓⵛⴰ ⵜⴻⵏⵏⵉ ⵉⵛⴰⵔⵔⴻⵀ ⴷ ⵜⴻⵏⵏⵉ ⵉⵜⵜⴻⵅⵙ ⵓⵔⵡⴻⵏ ⴰⵙ-ⴷⴷ ⵉⵃⴻⵏⵊⵉⵔⴻⵏ, ⵎⴰⵛⴰ ⴰⵎⴻⵏⵥⵓ ⵜⵓⵖⴰ-ⵜ ⵏ ⵜⴻⵏⵏⵉ ⵉⵛⴰⵔⵔⴻⵀ,

16 ⵅⴻⵏⵏⵉ ⴷⴻⴳ ⵡⴰⵙⵙ ⵏⵏⵉ ⴷⵉ ⵖⴰ ⵉⴱⴹⴰ ⵍⵡⴰⵔⵜ ⵏ ⵎⵉⵏ ⵖⴰⵔⴻⵙ ⵉⴵⴰⵏ ⵉ ⵉⵃⴻⵏⵊⵉⵔⴻⵏ ⵏⵏⴻⵙ, ⵡⴰⵔ ⵉⵥⴻⵎⵎⴰⵔ ⴰⴷ ⵉⵡⵛ ⵜⴰⵙⵖⴰⵔⵜ ⵏ ⵓⵎⴻⵏⵥⵓ ⵉ ⵎⵎⵉⵙ ⵏ ⵜⴻⵏⵏⵉ ⵉⵜⵜⴻⵅⵙ ⴷⴻⴳ ⵡⴻⵎⵛⴰⵏ ⵉ ⵖⴰ ⵉⵡⵛ ⵉ ⵎⵎⵉⵙ ⵏ ⵜⴻⵏⵏⵉ ⵉⵛⴰⵔⵔⴻⵀ, ⵡⴻⵏⵏⵉ ⴷ ⴰⵎⴻⵏⵥⵓ ⵉ ⵢⴻⴵⴰ.

17 ⵉⵜⵜⵅⴻⵚⵚⴰ ⴰⴷ ⵉⵏⵄⴻⵎ ⵙ ⵎⵎⵉⵙ ⴰⵎⴻⵏⵥⵓ ⵏ ⵜⴻⵏⵏⵉ ⵉⵛⴰⵔⵔⴻⵀ ⵓⵎⵉ ⴷ ⴰⵙ ⵉ ⵖⴰ ⵉⵡⵛ ⵜⵏⴰⵢⴻⵏ ⵏ ⵜⵙⴻⵇⵇⴰⵔ ⵥⵉ ⵎⴰⵔⵔⴰ ⵎⵉⵏ ⴷ ⴰⵙ ⴷⴷ-ⵉⴽⴽⴰⵔⴻⵏ, ⵎⵉⵏⵥⵉ ⵏⴻⵜⵜⴰ ⴷ ⴰⵎⴻⵥⵡⴰⵔ ⵏ ⵜⴻⵔⵢⴰⵙⵜ ⵏⵏⴻⵙ ⵓ ⵜⴰⵙⵖⴰⵔⵜ ⵏ ⵜⵎⴻⵏⵥⵓⵜ ⴷ ⵏⵏⴻⵙ ⵉ ⵜⴻⴵⴰ. ^■  

18 ⵎⴰⵍⴰ ⵉⵊⵊ ⵏ ⵡⴻⵔⵢⴰⵥ ⵖⴰⵔⴻⵙ ⵎⵎⵉⵙ ⴷ ⴰⵖⴻⵏⵏⴰⵏ ⴷ ⴰⵎⵖⴻⵡⵡⴻⵖ ⵏⵏⵉ ⵡⴰⵔ ⵉⵜⵜⴻⵙⵍⵉⵏ ⵉ ⵡⴰⵡⴰⵍ ⵏ ⴱⴰⴱⴰⵙ ⵏⵉⵖ ⵉ ⵡⴰⵡⴰⵍ ⵏ ⵢⴻⵎⵎⴰⵙ, ⵓⵛⴰ ⵏⵉⵜⵏⵉ ⵎⴰⵔⵃⴻⵏ ⵜ, ⵡⴰⵅⵅⴰ ⴰⵎⴻⵏⵏⵉ ⵏⴻⵜⵜⴰ ⵡⴰⵔ ⴷ ⴰⵙⴻⵏ ⵉⵜⵜⴻⵙⵍⵉ,

19 ⵅⴻⵏⵏⵉ ⴱⴰⴱⴰⵙ ⴷ ⵢⴻⵎⵎⴰⵙ ⴰⴷ ⵜ ⴽⵙⵉⵏ ⵓⵛⴰ ⴰⴷ ⵜ ⴰⵡⵢⴻⵏ ⴱⴰⵔⵔⴰ ⵥⵥⴰⵜ ⵉ ⵉⵎⵖⴰⵔⴻⵏ ⵏ ⵜⴻⵏⴷⵉⵏⵜ ⵏⵏⴻⵙ, ⵖⴰⵔ ⵜⴻⵡⵡⴰⵔⵜ ⵏ ⵡⴻⵎⵛⴰⵏ ⵎⴰⵏⵉ ⵉⵥⴻⴷⴷⴻⵖ. 20 ⴰⴷ ⵉⵏⵉⵏ ⵉ ⵉⵎⵖⴰⵔⴻⵏ ⵏ ⵜⴻⵏⴷⵉⵏⵜ: ‘ⵡⴰ ⴷ ⵎⵎⵉⵜⵏⴻⵖ ⴷ ⴰⵖⴻⵏⵏⴰⵏ ⴷ ⴰⵎⵖⴻⵡⵡⴻⵖ, ⵡⴰⵔ ⵉⵜⵜⴻⵙⵍⵉ ⵉ ⵡⴰⵡⴰⵍ ⵏⵏⴻⵖ, ⴰⵇⴰ ⴰⴼⵓⵙ ⵏⵏⴻⵙ ⵉⵏⵏⵓⵇⵇⴻⴱ ⵓ ⵏⴻⵜⵜⴰ ⴷ ⴰⵎⴻⵙⴽⴰⵔ.’ 21 ⵅⴻⵏⵏⵉ ⵎⴰⵔⵔⴰ ⵉⵔⵢⴰⵥⴻⵏ ⵏ ⵜⴻⵏⴷⵉⵏⵜ ⴰⴷ ⵜ ⴰⵔⴻⵊⵎⴻⵏ ⴰⵍ ⵖⴰ ⵉⵎⵎⴻⵜ. ⵉⵜⵜⵅⴻⵚⵚⴰ ⴰⴷ ⵜⴻⴽⴽⵙⴻⴷ ⴰⵄⴻⴼⴼⴰⵏ ⵥⵉ ⵍⵡⴻⵙⵜ ⵏⵡⴻⵎ ⵃⵉⵎⴰ ⵎⴰⵔⵔⴰ ⵉⵙⵔⴰⵉⵍ ⴰⴷ ⵜⵙⴻⵍ ⵓⵛⴰ ⴰⴷ ⵜⴻⴳⴳⵯⴻⴷ.

22 ⵎⴰⵍⴰ ⵉⵊⵊ ⵏ ⵡⴻⵔⵢⴰⵥ ⵉⴳⴳⴰ ⵉⵊⵊ ⵏ ⴷⴷⴻⵏⴱ ⵉ ⵅ ⵉⴵⴰ ⵍⵃⵓⴽⵎ ⵏ ⵍⵎⴻⵡⵜ ⵓⵛⴰ ⵉⵜⵜⵡⴰⵏⴻⵖ, ⵜⵓⵢⵍⴻⴷ ⵉ-ⵜ ⵅ ⵉⵛⵜ ⵏ ⵜⴻⵃⵏⴰⵛⵜ ⵏ ⵓⴽⴻⵛⵛⵓⴹ, 23 ⵅⴻⵏⵏⵉ ⵡⴰⵔ ⵜⴻⵊⵊⵉⵎ ⵍⵅⴻⵛⴱⴻⵜ ⵏⵏⴻⵙ ⴰⴷ ⵜⴻⵙⵙⴻⵏⵙ ⵅ ⵜⴻⵃⵏⴰⵛⵜ, ⵎⴰⵛⴰ ⴰⴷ ⵜ ⵜⵏⴻⴹⵍⴻⴷ ⴷⴻⴳ ⵡⴰⵙⵙ ⵏⵏⵉ, ⵎⵉⵏⵥⵉ ⵡⴻⵏⵏⵉ ⵉⵜⵜⵡⴰⵢⵍⴻⵏ ⴰⵇⴰ-ⵜ ⴷ ⴰⵎⴻⵏⵄⵓⵍ ⵥⵉ ⴰⵔⴻⴱⴱⵉ. ⵡⴰⵔ ⵙⵙⵅⴻⵎⵎⴰⵊ ⵜⴰⵎⵎⵓⵔⵜ ⵏⵏⴻⴽ ⵏⵏⵉ ⴷ ⴰⵛ ⵉ ⵖⴰ ⵉⵡⵛ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴷ ⵍⵡⴰⵔⵜ. ^■