1 ⵅⴻⵏⵏⵉ ⴼⴻⵙⵢⴻⵏ ⴰⵢⵜ ⵏ ⵉⵙⵔⴰⵉⵍ ⵉⵇⵉⴹⴰⵏ ⵏⵙⴻⵏ ⵓⵛⴰ ⵡⵜⵉⵏ ⵉⵇⵉⴹⴰⵏ ⵏⵙⴻⵏ ⴷⵉ ⵍⴻⵡⴹⴰⵜ ⵏ ⵎⵓ’ⴰⴱ, ⴰⵔⴻⵏⴷⴰⴷ ⵏ ⴰⵔⵉⵃⴰ ⵏⵏⵉ ⵉⴵⴰⵏ ⵅ ⵓⵊⴻⵎⵎⴰⴹ ⵏ ⵍ'ⵓⵔⴷⵓⵏ. 2 ⵓⵛⴰ ⵉⵥⵔⴰ ⴱⴰⵍⴰⵇ, ⵎⵎⵉⵙ ⵏ ⵚⵉⴼⴼⵓⵔ, ⵎⴰⵔⵔⴰ ⵎⵉⵏ ⵉⴳⴳⴰ ⵉⵙⵔⴰⵉⵍ ⴷⴻⴳ ⵉⵎⵓⵔⵉⵢⵢⴻⵏ. 3 ⵎⵓ’ⴰⴱ ⵜⵓⵖⴰ ⵉⵜⵜⴻⴳⴳⵯⴻⴷ ⴰⵟⵟⴰⵙ ⵥⵉ ⵍⴳⴻⵏⵙ-ⴰ, ⵎⵉⵏⵥⵉ ⵜⵓⵖⴰ ⴰⵜⴻⵏ ⴷⴻⴳ ⵡⴰⵟⵟⴰⵙ. ⵎⵓ’ⴰⴱ ⵜⵓⵖⴰ ⵉⵜⵜⵏⴻⵅⵍⴰⵄ ⵥⴻⴳ ⴰⵢⵜ ⵏ ⵉⵙⵔⴰⵉⵍ.

4 ⵅⴻⵏⵏⵉ ⵉⵏⵏⴰ ⵎⵓ’ⴰⴱ ⵉ ⵉⵎⵖⴰⵔⴻⵏ ⵏ ⵎⵉⴷⵢⴰⵏ: “ⵍⴻⵅⵅⵓ ⵍⵖⴰⵛⵉ ⴰⵢⴰ ⴰⴷ ⵉⵍⵙⴻⵃ ⵎⴰⵔⵔⴰ ⵎⵉⵏ ⵉ ⴷ ⴰⵏⴻⵖ-ⴷⴷ ⵉⵏⵏⴹⴻⵏ, ⴰⵎ ⵎⴰⵎⵎⴻⵛ ⵉⵍⴻⵙⵙⴻⵃ ⵓⴼⵓⵏⴰⵙ ⵜⴰⵥⵉⵢⵥⴰⵡⵜ ⵏ ⵢⴻⵢⵢⴰⵔ.” ⵜⵓⵖⴰ ⴱⴰⵍⴰⵇ, ⵎⵎⵉⵙ ⵏ ⵚⵉⴼⴼⵓⵔ, ⴰⵊⴻⴵⵉⴷ ⵏ ⵎⵓ’ⴰⴱ. 5 ⵉⵙⵙⴻⴽⴽ ⵉⵔⴻⵇⵇⴰⵙⴻⵏ ⵖⴰⵔ ⴱⴰⵍⵄⴰⵎ, ⵎⵎⵉⵙ ⵏ ⴱⴰⵄⵓⵔ, ⵖⴰⵔ ⵜⴻⵏⴷⵉⵏⵜ ⵏ ⴼⴰⵜⵓⵔ ⵖⴰⵔ ⵢⴻⵖⵥⴰⵔ ⵏ ⵍⴼⵓⵔⴰⵟ, ⴷⵉ ⵜⴻⵎⵎⵓⵔⵜ ⵏ ⴰⵢⵜ ⵏ ⵄⴰⵎⵓⵡ ⵎⴰⵃⴻⵏⴷ ⴰⴷ ⴰⵙ ⴷⴷ-ⵍⴰⵖⴰⵏ ⵓⵛⴰ ⵏⴻⵜⵜⴰ ⵉⵏⵏⴰ: “ⵅⵥⴰⵔ, ⵉⴼⴼⴻⵖ-ⴷⴷ ⵢⵊⵊ ⵏ ⵍⴳⴻⵏⵙ ⵥⵉ ⵎⵉⵚⵔⴰ ⵓⵛⴰ ⵅⵥⴰⵔ, ⴰⵇⴰ ⵉⴷⵍⴰ ⵓⴷⴻⵎ ⵏ ⵜⴻⵎⵎⵓⵔⵜ ⵓⵛⴰ ⴰⵇⴰ ⵏⵉⵜⵏⵉ ⵥⴻⴷⴷⵖⴻⵏ ⵏⵉⵛⴰⵏ ⴰⵔⴻⵏⴷⴰⴷ ⵉⵏⵓ. ^■   6 ⴰⵙ-ⴷⴷ ⵍⴻⵅⵅⵓ, ⵏⵄⴻⵍ ⵍⴳⴻⵏⵙ ⴷⵉ ⵟⵟⵡⴻⵄ ⵉⵏⵓ, ⵎⵉⵏⵥⵉ ⴰⵇⴰ ⵉⵊⵀⴻⴷ ⵅⴰⴼⵉ. ⴰⴷ ⵜⴰⵖ ⵏⴻⵛⵛ ⵥⴻⵎⵎⴰⵔⴻⵖ ⴰⴷ ⵜ ⵖⴻⵍⴱⴻⵖ ⵏⵉⵖ ⴰⴷ ⵜ ⵙⵙⵓⴼⴼⵖⴻⵖ ⵥⵉ ⵜⴻⵎⵎⵓⵔⵜ, ⵎⵉⵏⵥⵉ ⵏⴻⵛⵛ ⵙⵙⵏⴻⵖ ⴱⴻⵍⵍⵉ ⵡⵉ ⵉ ⵖⴰ ⵜⴱⴰⵔⴽⴻⴷ ⵛⴻⴽ, ⴰⴷ ⵉⵜⵜⵡⴰⴱⴰⵔⴻⴽ ⵓ ⵡⵉ ⵉ ⵖⴰ ⵜⵏⴻⵄⵍⴻⴷ, ⴰⴷ ⵉⵜⵜⵡⴰⵏⵄⴻⵍ.”

7 ⵅⴻⵏⵏⵉ ⵔⵓⵃⴻⵏ ⵉⵎⵖⴰⵔⴻⵏ ⵏ ⵎⵓ’ⴰⴱ ⴷ ⵉⵎⵖⴰⵔⴻⵏ ⵏ ⵎⵉⴷⵢⴰⵏ ⴰⴽ-ⴷ ⵍⵎⵓⵏⴻⵜ ⵏ ⵓⵄⴻⵥⵥⴻⵎ ⴷⴻⴳ ⵓⴼⵓⵙ ⵏⵙⴻⵏ. ⵉⵡⴹⴻⵏ ⵖⴰⵔ ⴱⴰⵍⵄⴰⵎ ⵓⵛⴰ ⵙⵙⵉⵡⵍⴻⵏ ⴰⴽⵉⴷⴻⵙ ⵙ ⵡⴰⵡⴰⵍⴻⵏ ⵏ ⴱⴰⵍⴰⴽ. 8 ⵏⴻⵜⵜⴰ ⵉⵏⵏⴰ ⴰⵙⴻⵏ: “ⵙⴻⵏⵙⴻⵎ ⴷⴰ ⴵⵉⵍⴻⵜ-ⴰ, ⵅⴻⵏⵏⵉ ⵏⴻⵛⵛ ⴰⴷ ⵅⴰⵡⴻⵎ ⴷⴷ-ⴰⵔⵔⴻⵖ ⴰⵎ ⵎⴰⵎⵎⴻⵛ ⵖⴰⵔⵉ ⵉ ⵖⴰ ⵉⵙⵙⵉⵡⴻⵍ ⵙⵉⴷⵉ.” ⵅⴻⵏⵏⵉ ⵇⵇⵉⵎⴻⵏ ⵍⵃⵓⴽⴽⴰⵎ ⵏ ⵎⵓ’ⴰⴱ ⵖⴰⵔ ⴱⴰⵍⵄⴰⵎ. 9 ⵢⵓⵙⴰ-ⴷⴷ ⴰⵔⴻⴱⴱⵉ ⵖⴰⵔ ⴱⴰⵍⵄⴰⵎ, ⵉⵏⵏⴰ: “ⵎⵉⵏ ⵄⵏⴰⵏ ⵉⵔⵢⴰⵥⴻⵏ ⵏⵏⵉ ⵉⴵⴰⵏ ⴰⴽⵉⴷⴻⴽ?”

10 ⵉⵏⵏⴰ ⴱⴰⵍⵄⴰⵎ ⵉ ⴰⵔⴻⴱⴱⵉ: “ⴱⴰⵍⴰⴽ, ⵎⵎⵉⵙ ⵏ ⵚⵉⴼⴼⵓⵔ, ⴰⵊⴻⴵⵉⴷ ⵏ ⵎⵓ’ⴰⴱ, ⵉⵙⵙⴻⴽⴽ ⵉ-ⵜⴻⵏ-ⴷⴷ ⵖⴰⵔⵉ, ⵉⵏⵏⴰ:

11 ‘ⵅⵥⴰⵔ, ⵉⵊⵊ ⵏ ⵍⴳⴻⵏⵙ ⵉⴼⴼⴻⵖ-ⴷⴷ ⵥⵉ ⵎⵉⵚⵔⴰ ⵓ ⴰⵇⴰ ⵉⴷⵍⴰ ⵓⴷⴻⵎ ⵏ ⵜⴻⵎⵎⵓⵔⵜ. ⴰⵙ-ⴷⴷ, ⵏⵄⴻⵍ ⵉ-ⵜ ⴷⵉ ⵟⵟⵡⴻⵄ ⵉⵏⵓ. ⴰⴷ ⵜⴰⵖ ⵥⴻⵎⵎⴰⵔⴻⵖ ⵅⴻⵏⵏⵉ ⴰⴷ ⴽⵉⵙⴻⵏ ⵎⴻⵏⵖⴻⵖ ⵏⵉⵖ ⴰⴷ ⵜⴻⵏ ⵙⵙⵓⴼⴼⵖⴻⵖ.’ ”

12 ⵉⵏⵏⴰ ⴰⵔⴻⴱⴱⵉ ⵉ ⴱⴰⵍⵄⴰⵎ: “ⵡⴰⵔ ⵜⵜⵔⵉⵃ ⴽⵉⵙⴻⵏ ⵏⵉⵖ ⴰⴷ ⵜⵏⴻⵄⵍⴻⴷ ⵍⴳⴻⵏⵙ ⵏⵏⵉ, ⵎⵉⵏⵥⵉ ⵍⴳⴻⵏⵙ ⴰⵇⴰ ⵉⵜⵜⵡⴰⴱⴰⵔⴻⴽ.”

13 ⵅⴻⵏⵏⵉ ⵉⴽⴽⴰⵔ ⴱⴰⵍⵄⴰⵎ ⴷⵉ ⵚⵚⴱⴻⵃ ⵓⵛⴰ ⵉⵏⵏⴰ ⵉ ⵍⵃⵓⴽⴽⴰⵎ ⵏ ⴱⴰⵍⴰⴽ: “ⴷⴻⵡⵍⴻⵎ-ⴷⴷ ⵖⴰⵔ ⵜⴻⵎⵎⵓⵔⵜ ⵏⵡⴻⵎ, ⵎⵉⵏⵥⵉ ⵙⵉⴷⵉ ⵡⴰⵔ ⴷ ⴰⵢⵉ ⵉⵙⵎⵉⵃ ⵃⵉⵎⴰ ⴰⴷ ⵔⴰⵃⴻⵖ ⴰⴽⵉⴷⵡⴻⵎ.”

14 ⵅⴻⵏⵏⵉ ⴽⴽⴰⵔⴻⵏ ⵍⵃⵓⴽⴽⴰⵎ ⵏ ⵎⵓ’ⴰⴱ ⵓⵛⴰ ⴷⴻⵡⵍⴻⵏ-ⴷⴷ ⵖⴰⵔ ⴱⴰⵍⴰⴽ ⵓⵛⴰ ⵏⵏⴰⵏ: “ⴱⴰⵍⵄⴰⵎ ⵢⵓⴳⵉ ⴰⴷ ⴷⴷ-ⵢⴰⵙ ⴰⴽⵉⴷⵏⴻⵖ.”

15 ⵉⵙⵙⴻⴽⴽ ⴱⴰⵍⴰⴽ ⵄⴰⵡⴻⴷ ⵍⵃⵓⴽⴽⴰⵎ, ⵄⴰⴷ ⴽⵜⴰⵔ ⵓ ⵄⴰⴷ ⵡⴻⵏⵏⵉ ⵉⵛⴻⵏⵄⴻⵏ ⴽⵜⴰⵔ ⵅ ⵢⵉⵏⴰ ⵉⵎⴻⵥⵡⵓⵔⴰ.

16 ⵓⵙⵉⵏ-ⴷⴷ ⵖⴰⵔ ⴱⴰⵍⵄⴰⵎ, ⵏⵏⴰⵏ: “ⴰⵎⵎⵓ ⵉⵇⵇⴰⵔ ⴱⴰⵍⴰⴽ, ⵎⵎⵉⵙ ⵏ ⵚⵉⴼⴼⵓⵔ: ‘ⵜⵜⵥⴰⵡⴳⴻⵖ ⵛⴻⴽ, ⵡⴰⵔ ⵜⴻⵊⵊⵉ ⵉⵅⴻⴼ ⵏⵏⴻⴽ ⵎⴰⵃⴻⵏⴷ ⵡⴰⵔ ⵖⴰⵔⵉ ⴷⴷ-ⵜⵜⴰⵙⴻⴷ!

17 ⵎⵉⵏⵥⵉ ⴰⴷ ⵛⴻⴽ ⴽⴰⵔⵔⵎⴻⵖ ⵙ ⵡⴰⵟⵟⴰⵙ ⵓⵛⴰ ⴰⴷ ⴳⴳⴻⵖ ⵎⴰⵔⵔⴰ ⵎⵉⵏ ⴷ ⴰⵢⵉ ⵖⴰ ⵜⵉⵏⵉⴷ. ⵜⵜⵥⴰⵡⴳⴻⵖ ⵛⴻⴽ, ⴰⵙ-ⴷⴷ ⵓⵛⴰ ⵏⵄⴻⵍ ⵍⴳⴻⵏⵙ-ⴰ ⴷⵉ ⵟⵟⵡⴻⵄ ⵉⵏⵓ!”

18 ⵢⴰⵔⵔⴰ ⴱⴰⵍⵄⴰⵎ ⵓⵛⴰ ⵉⵏⵏⴰ ⵉ ⵉⵎⵙⴻⵅⵅⴰⵔⴻⵏ ⵏ ⴱⴰⵍⴰⴽ: “ⵡⴰⵅⵅⴰ ⴱⴰⵍⴰⴽ ⴰⴷ ⴰⵢⵉ ⵉⵡⵛ ⵜⴰⴷⴷⴰⵔⵜ ⵏⵏⴻⵙ ⵜⴻⵛⵛⵓⵔ ⵙ ⵏⵏⵓⵇⴰⵔⵜ ⴷ ⵡⵓⵔⴻⵖ, ⵄⴰⴷ ⵡⴰⵔ ⵥⵎⵉⵔⴻⵖ ⴰⴷ ⴼⴼⵖⴻⵖ ⵅ ⵍⵓⵎⵓⵔ ⵏ ⵙⵉⴷⵉ, ⴰⵔⴻⴱⴱⵉ ⵉⵏⵓ, ⵎⴰⵃⴻⵏⴷ ⴰⴷ ⴳⴳⴻⵖ ⵛⴰ ⵏ ⵍⵃⴰⵊⵊⴻⵜ ⴷ ⵜⴰⵎⴻⵥⵢⴰⵏⵜ ⵏⵉⵖ ⵅ ⵛⴰ ⵏ ⵍⵃⴰⵊⵊⴻⵜ ⴷ ⵜⴰⵎⴻⵇⵇⵔⴰⵏⵜ. ^■  

19 ⵅⴻⵏⵏⵉ ⵍⴻⵅⵅⵓ, ⵜⵜⵥⴰⵡⴳⴻⵖ ⴽⴻⵏⵏⵉⵡ, ⵇⵇⵉⵎⴻⵎ ⴷⴰⵏⵉⵜⴰ ⴵⵉⵍⴻⵜ-ⴰ ⵃⵉⵎⴰ ⴰⴷ ⵙⵙⵏⴻⵖ ⵎⵉⵏ ⴷ ⴰⵢⵉ ⵖⴰ ⵢⵉⵏⵉ ⵙⵉⴷⵉ ⵄⴰⴷ ⴽⵜⴰⵔ.” 20 ⴷⵉ ⴵⵉⵍⴻⵜ ⵢⵓⵙⴰ-ⴷⴷ ⴰⵔⴻⴱⴱⵉ ⵖⴰⵔ ⴱⴰⵍⵄⴰⵎ, ⵉⵏⵏⴰ ⴰⵙ: “ⵎⴰⵍⴰ ⴷⴻⵡⵍⴻⵏ-ⴷⴷ ⵢⴻⵔⵢⴰⵥⴻⵏ ⵏⵏⵉ ⵄⴰⵡⴻⴷ ⵎⴰⵃⴻⵏⴷ ⴰⴷ ⴰⵛ-ⴷⴷ ⵍⴰⵖⴰⵏ, ⴽⴽⴰⵔ ⵅⴻⵏⵏⵉ ⵓⵛⴰ ⵔⵓⵃ ⴰⴽⵉⴷⵙⴻⵏ. ⵎⴰⵛⴰ ⵡⴰⵔ ⵜⵜⴻⴳⴳ ⵎⵖⵉⵔ ⵎⵉⵏ ⴷ ⴰⵛ ⵖⴰ ⵉⵏⵉⵖ.” 21 ⵉⴽⴽⴰⵔ ⴱⴰⵍⵄⴰⵎ ⵖⴰⵔ ⵚⵚⴱⴻⵃ ⵓⵛⴰ ⵉⵃⴻⵥⵥⴻⵎ ⵉ ⵜⴻⵖⵢⵓⵞ ⵏⵏⴻⵙ ⵓⵛⴰ ⵢⵓⵢⵓⵔ ⴰⴽ-ⴷ ⵍⵃⵓⴽⴽⴰⵎ ⵏ ⵎⵓ’ⴰⴱ.

22 ⵅⴻⵏⵏⵉ ⵢⴰⵔⵖⴰ ⵡⴻⵖⴹⴰⴱ ⵏ ⴰⵔⴻⴱⴱⵉ, ⵎⵉⵏⵥⵉ ⵏⴻⵜⵜⴰ ⵉⵔⵓⵃ ⵓⵛⴰ ⵍⵎⴰⵍⴰⴽ ⵏ ⵙⵉⴷⵉ ⵉⴱⴻⴷⴷ ⴷⴻⴳ ⵡⴻⴱⵔⵉⴷ ⴰⵎ ⵉⵊⵊ ⵏ ⵍⴻⵄⴷⵓ ⴹⵉⴷⴷ ⵏⵏⴻⵙ. ⵏⴻⵜⵜⴰ ⵉⵏⵢⴰ ⵅ ⵜⴻⵖⵢⵓⵞ ⵏⵏⴻⵙ ⵓⵛⴰ ⵜⵏⴰⵢⴻⵏ ⵏ ⵉⵃⵓⴷⵔⵉⵢⵢⴻⵏ ⵜⵓⵖⴰ ⴰⵜⴻⵏ ⴰⴽⵉⴷⴻⵙ. 23 ⵓⵛⴰ ⵜⴰⵖⵢⵓⵞ ⵜⴻⵥⵔⴰ ⵍⵎⴰⵍⴰⴽ ⵏ ⵙⵉⴷⵉ ⵉⴱⴻⴷⴷ ⴷⴻⴳ ⵡⴻⴱⵔⵉⴷ ⵙ ⵙⵙⵉⴼ ⵏⵏⴻⵙ ⵉⵜⵜⵡⴰⵊⴻⴱⴷⴻⵏ ⴷⴻⴳ ⵓⴼⵓⵙ ⵏⵏⴻⵙ. ⵙ ⵓⵢⴻⵏⵏⵉ ⵜⴻⵔⵃⴻⵎ ⵜⴻⵖⵢⵓⵞ ⵥⴻⴳ ⵡⴻⴱⵔⵉⴷ ⵓⵛⴰ ⵜⵓⵢⵓⵔ ⴷⴻⴳ ⵉⵢⵢⴰⵔ. ⵅⴻⵏⵏⵉ ⵉⵡⵜⴰ ⴱⴰⵍⵄⴰⵎ ⵜⴰⵖⵢⵓⵞ ⵃⵉⵎⴰ ⴰⴷ ⵜⵜ ⵢⴰⵔⵔ ⵖⴰⵔ ⵡⴻⴱⵔⵉⴷ. ^■  

24 ⵎⴰⵛⴰ ⵍⵎⴰⵍⴰⴽ ⵏ ⵙⵉⴷⵉ ⵉⴱⴻⴷⴷ ⴷⴻⴳ ⵉⵛⵜ ⵏ ⵜⴻⴱⵔⵉⴷⵜ ⵜⴻⵃⵚⴰⵔ ⵊⴰⵔ ⵉⵎⴰⵔⵊⴰⵄⴻⵏ ⵏ ⵓⴹⵉⵍ ⵙ ⵢⵉⵊⵊ ⵏ ⵡⴻⵖⴱⴰⵔ ⵖⴰⵔ ⵟⵟⴰⵔⴼ ⴷ ⵉⵊⵊ ⵏ ⵡⴻⵖⴱⴰⵔ ⵖⴰⵔ ⵟⵟⴰⵔⴼ ⵏⵏⴻⵖⵏⵉⵜ. 25 ⵓⵎⵉ ⵜⴻⵥⵔⴰ ⵜⴻⵖⵢⵓⵞ ⵍⵎⴰⵍⴰⴽ ⵏ ⵙⵉⴷⵉ, ⵜⴻⵍⵚⴻⵇ ⵖⴰⵔ ⵡⴻⵖⴱⴰⵔ ⵓⵛⴰ ⵉⵜⵜⵡⴰⵃⵚⴰⵔ ⵓⴹⴰⵔ ⵏ ⴱⴰⵍⵄⴰⵎ ⴰⴽ-ⴷ ⵡⴻⵖⴱⴰⵔ ⵓⵛⴰ ⵏⴻⵜⵜⴰ ⵉⵇⵇⵉⵎ ⵉⵛⵛⴰⵜ ⵉ-ⵜⵜ.

26 ⵓⵛⴰ ⵉⵔⵓⵃ ⵍⵎⴰⵍⴰⴽ ⵏ ⵙⵉⴷⵉ ⵖⴰⵔ ⵥⵥⴰⵜ ⵓⵛⴰ ⵉⴱⴻⴷⴷ ⴷⴻⴳ ⵉⵊⵊ ⵏ ⵡⴻⵎⵛⴰⵏ ⵉⵃⵚⴰⵔ ⴰⵟⵟⴰⵙ ⴰⵍ ⵎⴰⵏⵉ ⵡⴰⵔ ⵉⵜⵜⵡⵉⴼⵉ ⵜⵜⴰⵙⵉⵄ ⵎⴰⵃⴻⵏⴷ ⴰⴷ ⵢⵉⵍⵉ ⵉⵃⴻⵢⵢⴻⴷ ⵖⴰⵔ ⵢⴻⴼⴼⵓⵙ ⵓⵍⴰ ⵖⴰⵔ ⵓⵥⴻⵍⵎⴰⴹ. 27 ⵓⵎⵉ ⵜⴻⵥⵔⴰ ⵜⴻⵖⵢⵓⵞ ⵍⵎⴰⵍⴰⴽ ⵏ ⵙⵉⴷⵉ, ⵜⴱⴰⵔⵛ ⵙⴰⴷⵓ ⴱⴰⵍⵄⴰⵎ ⵓⵛⴰ ⴱⴰⵍⵄⴰⵎ ⵉⵅⴻⵢⵢⴻⵇ ⴰⵟⵟⴰⵙ ⵓⵛⴰ ⵉⴼⴰⵔⵛ ⵜⴰⵖⵢⵓⵞ ⵙ ⵢⵉⵊⵊ ⵏ ⵓⴽⴻⵛⵛⵓⴹ.

28 ⵅⴻⵏⵏⵉ ⵢⴰⵔⵥⴻⵎ ⵙⵉⴷⵉ ⴰⵇⴻⵎⵎⵓⵎ ⵏ ⵜⴻⵖⵢⵓⵞ ⵓⵛⴰ ⵜⴻⵏⵏⴰ ⵉ ⴱⴰⵍⵄⴰⵎ: “ⵎⵉⵏ ⴷ ⴰⵛ ⴳⴳⵉⵖ ⵓⵎⵉ ⴷ ⴰⵢⵉ ⵜⴼⴰⵔⵛⴻⴷ ⵍⴻⵅⵅⵓ ⵄⴰⴷ ⵜⵍⴰⵜⴰ ⵏ ⵉⵎⵓⵔⴻⵏ?” ^■   29 ⵅⴻⵏⵏⵉ ⵉⵏⵏⴰ ⴱⴰⵍⵄⴰⵎ ⵉ ⵜⴻⵖⵢⵓⵞ: “ⵎⵉⵏⵥⵉ ⵛⴻⵎ ⵜⴱⵓⵚⴰⵔⴻⴷ ⵅⴰⴼⵉ. ⵎⵍⵉ ⵖⴰⵔⵉ ⵙⵙⵉⴼ ⴷⴻⴳ ⵓⴼⵓⵙ ⵉⵏⵓ, ⴰⴷ ⵜⵉⵍⵉ ⵅⴻⵏⵏⵉ ⵏⵖⵉⵖ ⵛⴻⵎ!” 30 ⵜⴻⵏⵏⴰ ⵜⴻⵖⵢⵓⵞ ⵉ ⴱⴰⵍⵄⴰⵎ: “ⵎⴰ ⵡⴰⵔ ⴵⵉⵖ ⵏⴻⵛⵛ ⵜⴰⵖⵢⵓⵞ ⵏⵏⴻⴽ ⵉ ⵅⴻⴼ ⵜⴻⵏⵢⵉⴷ ⵥⴻⴳ ⵡⴰⵎⵉ ⵏⴻⵛⵛ ⵖⴰⵔⴻⴽ ⴵⵉⵖ ⴰⵍ ⴰⵙⵙ-ⴰ? ⵎⴰ ⴰⵇⴰ ⵏⴻⵛⵛ ⵏⵏⵓⵎⴻⵖ ⵜⴻⴳⴳⴻⵖ ⴰⴽ ⴽⵉⴽ ⴰⵎⵎⵓ?” ⵓⵛⴰ ⵢⴰⵔⵔⴰ-ⴷⴷ ⵅⴰⵙ: “ⵍⵍⴰ!” 31 ⵅⴻⵏⵏⵉ ⵢⴰⵔⵥⴻⵎ ⵙⵉⴷⵉ ⵜⵉⵟⵟⴰⵡⵉⵏ ⵏ ⴱⴰⵍⵄⴰⵎ ⴰⵍⴰⵎⵉ ⵉⵥⵔⴰ ⵍⵎⴰⵍⴰⴽ ⵏ ⵙⵉⴷⵉ ⵉⴱⴻⴷⴷ ⴷⴻⴳ ⵡⴻⴱⵔⵉⴷ ⵙ ⵙⵙⵉⴼ ⵏⵏⴻⵙ ⵉⵜⵜⵡⴰⵊⴻⴱⴷⴻⵏ ⴷⴻⴳ ⵓⴼⵓⵙ ⵏⵏⴻⵙ. ⵅⴻⵏⵏⵉ ⵉⵙⵙⴻⵇⵡⴻⵙ ⴱⴰⵍⵄⴰⵎ ⴰⵥⴻⴵⵉⴼ ⵏⵏⴻⵙ ⵓⵛⴰ ⵢⵓⴹⴰⵔ ⴰⵎ ⴷⴷ-ⵢⴰⵔⵔⴰ ⵓⴷⴻⵎ ⵏⵏⴻⵙ ⵖⴰⵔ ⵜⴻⵎⵎⵓⵔⵜ. 32 ⵅⴻⵏⵏⵉ ⵉⵏⵏⴰ ⴰⵙ ⵍⵎⴰⵍⴰⴽ ⵏ ⵙⵉⴷⵉ: “ⵎⴰⵢⴻⵎⵎⵉ ⵜⴻⵡⵜⵉⴷ ⵜⴰⵖⵢⵓⵞ ⵏⵏⴻⴽ ⵜⵍⴰⵜⴰ ⵏ ⵉⵎⵓⵔⴻⵏ? ⵅⵥⴰⵔ ⴰⵇⴰ ⵏⴻⵛⵛ ⴼⴼⵖⴻⵖ-ⴷⴷ ⴰⵎ ⵍⴻⵄⴷⵓ ⵏⵏⴻⴽ ⵎⵉⵏⵥⵉ ⴰⴱⵔⵉⴷ-ⴰ ⵉⵜⵜⴹⴰⵔⵔⴰ ⴰⵢⵉ ⵏⴻⵛⵛ ⵏⵉⵛⴰⵏ. ^■   33 ⵜⴰⵖⵢⵓⵞ ⵜⴻⵥⵔⴰ ⴰⵢⵉ ⵓⵛⴰ ⵜⴻⵔⵃⴻⵎ ⵅⴻⵏⵏⵉ ⵥⵉ ⵥⵥⴰⵜ ⵉ ⵡⵓⴷⴻⵎ ⵉⵏⵓ ⵜⵍⴰⵜⴰ ⵏ ⵉⵎⵓⵔⴻⵏ. ⵎⴰⵍⴰ ⵡⴰⵔ ⵜⴻⵔⵃⵉⵎ ⵥⵉ ⵥⵥⴰⵜ ⵉ ⵡⵓⴷⴻⵎ ⵉⵏⵓ, ⵅⴻⵏⵏⵉ ⵏⴻⵛⵛ ⴰⴷ ⵢⵉⵍⵉ ⴰⵇⴰ ⵍⴻⵅⵅⵓ ⵏⵖⵉⵖ ⵛⴻⴽ ⵓ ⵏⴻⵜⵜⴰⵜ ⴰⴷ ⵜⵜ ⵊⵊⴻⵖ ⴰⴷ ⵜⴻⴷⴷⴰⵔ.” 34 ⵅⴻⵏⵏⵉ ⵉⵏⵏⴰ ⴱⴰⵍⵄⴰⵎ ⵉ ⵍⵎⴰⵍⴰⴽ ⵏ ⵙⵉⴷⵉ: “ⴰⵇⴰ ⵏⴻⵛⵛ ⵅⴹⵉⵖ, ⵎⵉⵏⵥⵉ ⵡⴰⵔ ⵙⵙⵉⵏⴻⵖ ⴱⴻⵍⵍⵉ ⵛⴻⴽ ⵜⴱⴻⴷⴷⴻⴷ ⵥⵥⴰⵜⵉ ⴷⴻⴳ ⵡⴻⴱⵔⵉⴷ. ⵄⴰⴷ ⵍⴻⵅⵅⵓ, ⵎⴰⵍⴰ ⴰⵢⴰ ⴷ ⵍⵄⵉⴱ ⴷⵉ ⵜⵉⵟⵟⴰⵡⵉⵏ ⵏⵏⴻⴽ, ⵏⴻⵛⵛ ⴰⴷ ⴷⴷ-ⴷⴻⵡⵍⴻⵖ.” 35 ⵉⵏⵏⴰ ⵍⵎⴰⵍⴰⴽ ⵏ ⵙⵉⴷⵉ ⵉ ⴱⴰⵍⵄⴰⵎ: “ⵔⵓⵃ ⴰⴽ-ⴷ ⵉⵡⴷⴰⵏ-ⴰ, ⵎⴰⵛⴰ ⵙⵉⵡⴻⵍ ⵡⴰⵀⴰ ⵎⵉⵏ ⴷ ⴰⵛ ⵖⴰ ⵉⵏⵉⵖ.” ⴰⵎⵎⵓ ⵉⵔⵓⵃ ⴱⴰⵍⵄⴰⵎ ⴰⴽ-ⴷ ⵍⵃⵓⴽⴽⴰⵎ ⵏ ⴱⴰⵍⴰⴽ.

36 ⵓⵎⵉ ⴱⴰⵍⴰⴽ ⵉⵙⵍⴰ, ⴰⵇⴰ ⴱⴰⵍⵄⴰⵎ ⵢⵓⵙⴰ-ⴷⴷ, ⵉⵔⵓⵃ ⵃⵉⵎⴰ ⴰⴷ ⵜ ⵉⵎⵎⴻⵍⵇⴰ ⵖⴰⵔ ⵜⴰⵏⴷⵉⵏⵜ ⵏ ⵎⵓ’ⴰⴱ ⵉ ⵉⴵⴰⵏ ⵖⴰⵔ ⵊⵊⵉⵀⴻⵜ ⵏ ⵡⴻⵢⵎⵉⵔ ⵏ ⴰⵔⵏⵓⵏ, ⵖⴰⵔ ⵟⵟⴰⵔⴼ ⵏ ⵊⵊⵉⵀⴻⵜ ⵏ ⵡⴻⵢⵎⵉⵔ. 37 ⵓⵛⴰ ⴱⴰⵍⴰⴽ ⵉⵏⵏⴰ ⵉ ⴱⴰⵍⵄⴰⵎ: “ⵎⴰ ⵡⴰⵔ ⵙⵙⴻⴽⴽⴻⵖ ⵏⴻⵛⵛ ⵉⵡⴷⴰⵏ ⴰⴷ ⴰⵛ ⴷⴷ-ⵍⴰⵖⴰⵏ? ⵎⴰⵢⴻⵎⵎⵉ ⵡⴰⵔ ⴷⴷ-ⵜⵓⵙⵉⴷ ⵖⴰⵔⵉ? ⵎⴰ ⵡⴰⵔ ⵥⴻⵎⵎⴰⵔⴻⵖ ⵏⴻⵛⵛ ⴰⴷ ⵛⴻⴽ ⴽⴰⵔⵎⴻⵖ?” 38 ⵅⴻⵏⵏⵉ ⵢⴰⵔⵔⴰ-ⴷⴷ ⴱⴰⵍⵄⴰⵎ ⵅ ⴱⴰⵍⴰⴽ: “ⵅⵥⴰⵔ, ⵏⴻⵛⵛ ⵓⵙⵉⵖ-ⴷⴷ ⵖⴰⵔⴻⴽ, ⵎⴰⵛⴰ ⵎⴰ ⵥⴻⵎⵎⴰⵔⴻⵖ ⵏⴻⵛⵛ ⵍⴻⵅⵅⵓ ⴰⴷ ⵙⵙⵉⵡⵍⴻⵖ ⵅ ⵛⴰ? ⴰⵡⴰⵍ ⵏⵏⵉ ⵉ ⵖⴰ ⵢⴻⴳⴳ ⵙⵉⴷⵉ ⴷⴻⴳ ⵓⵇⴻⵎⵎⵓⵎ ⵉⵏⵓ, ⴳⴳⵓⵔ ⴰⴷ ⵜ ⵉⵏⵉⵖ.” ^□   39 ⵓⵛⴰ ⵉⵔⵓⵃ ⴱⴰⵍⵄⴰⵎ ⴰⴽ-ⴷ ⴱⴰⵍⴰⴽ ⵓⵛⴰ ⵓⵙⵉⵏ-ⴷⴷ ⵖⴰⵔ ⵜⴻⵏⴷⵉⵏⵜ ⵏ ⵃⴰⵚⵓⵜ. 40 ⵅⴻⵏⵏⵉ ⵉⵖⴰⵔⵚ ⴱⴰⵍⴰⴽ ⵉ ⵉⴼⵓⵏⴰⵙⴻⵏ ⴷ ⵡⵓⴵⵉ, ⵉⵙⵙⴻⴽⴽ ⵥⵥⴰⵢⵙⴻⵏ ⵖⴰⵔ ⴱⴰⵍⵄⴰⵎ ⵓ ⵖⴰⵔ ⵍⵃⵓⴽⴽⴰⵎ ⵏⵏⵉ ⵜⵓⵖⴰ ⴰⴽⵉⴷⴻⵙ. 41 ⴷⵉ ⵚⵚⴱⴻⵃ ⵉⵎⵙⴰⵔ ⴱⴻⵍⵍⵉ ⴱⴰⵍⴰⴽ ⵢⵉⵡⵉ ⴰⴽⵉⵙ ⴱⴰⵍⵄⴰⵎ ⵓⵛⴰ ⵉⵙⵙⵉⵍⵉ ⵉ-ⵜ ⵅ ⵍⵓⵄⵍⴰⵜ ⵏ ⴱⴰⵄⵍ ⵎⴰⵏⵉ ⵜⵓⵖⴰ ⵉⵥⴻⵎⵎⴰⵔ ⴰⴷ ⵉⵥⴰⵔ ⵍⴳⴻⵏⵙ ⴰⵍ ⵟⵟⴰⵔⴼ ⵉⴳⴳⵯⴻⵊⴻⵏ ⵇⴰⵄ.