1 ⵓⵛⴰ ⵉⵏⵏⴰ ⵏⴻⵜⵜⴰ ⵉ ⵎⵓⵙⴰ:

“ⴳⴰⵄⵄⴻⴷ ⵖⴰⵔ ⵙⵉⴷⵉ, ⵛⴻⴽ ⴷ ⵀⴰⵔⵓⵏ ⴷ ⵏⴰⴷⴰⴱ ⴷ ⴰⴱⵉⵀⵓ ⴷ ⵙⴻⴱⵄⵉⵏ ⵏ ⵉⵎⵖⴰⵔⴻⵏ ⵏ ⵉⵙⵔⴰⵉⵍ ⵓⵛⴰ ⴰⴹⴰⵔⴻⵎ ⵥⵉ ⵍⴰⴳⴳⵯⴰⵊ. 2 ⵎⵓⵙⴰ ⵡⴻⵃⵃⴷⴻⵙ ⴰⴷ ⴷⴷ-ⵉⵇⴰⵔⵔⴻⴱ ⵖⴰⵔ ⵙⵉⴷⵉ, ⵎⴰⵛⴰ ⵏⵉⵜⵏⵉ ⵡⴰⵔ ⵜⵜⵇⴰⵔⵔⵉⴱⴻⵏ ⵛⴰ. ⵓⵍⴰ ⴷ ⵍⴳⴻⵏⵙ ⵡⴰⵔ ⴽⵉⴷⴻⵙ ⵉⵜⵜⴳⵉⵄⵄⵉⴷ ⵛⴰ.” 3 ⵎⵓⵙⴰ ⵉⵄⵇⴻⴱ-ⴷⴷ ⵓⵛⴰ ⵉⵅⴻⴱⴱⴰⵔ ⵍⴳⴻⵏⵙ ⵅ ⵎⴰⵔⵔⴰ ⴰⵡⴰⵍⴻⵏ ⵏ ⵙⵉⴷⵉ ⵓ ⵅ ⵎⴰⵔⵔⴰ ⵍⴼⴰⵔⴰⵢⵉⴹ. ⵎⴰⵔⵔⴰ ⵍⴳⴻⵏⵙ ⵢⴰⵔⵔⴰ-ⴷⴷ ⵙ ⵢⵉⵊⵊ ⵏ ⵡⴰⵡⴰⵍ, ⵏⵏⴰⵏ: “ⵎⴰⵔⵔⴰ ⴰⵡⴰⵍⴻⵏ ⵉ ⵉⵏⵏⴰ ⵙⵉⴷⵉ ⴰⴷ ⵥⵥⴰⵢⵙⴻⵏ ⵏⴻⴳⴳ.” ^□  ■   4 ⵎⵓⵙⴰ ⵢⵓⵔⴰ ⵎⴰⵔⵔⴰ ⴰⵡⴰⵍⴻⵏ ⵏ ⵙⵉⴷⵉ. ⵖⴰⵔ ⵚⵚⴱⴻⵃ ⵥⵉⵛ ⵉⴽⴽⴰⵔ ⵓⵛⴰ ⵉⴱⵏⴰ ⵉⵊⵊ ⵏ ⵓⵄⴰⵍⵟⴰⵔ ⵖⴰⵔ ⵉⴹⴰⵔⴻⵏ ⵏ ⵡⴻⴷⵔⴰⵔ ⵓⵛⴰ ⵉⴳⴳⴰ ⵜⴻⵏⵄⴰⵛ ⵏ ⵉⵎⴰⵢⴹⵓⵜⴻⵏ ⵏ ⵡⴻⵥⵔⵓ, ⵄⵍⴰⵃⵙⴰⴱ ⵍⵇⴻⴷⴷ ⵏ ⵜⴻⵏⵄⴰⵛ ⵏ ⵜⵇⴻⴱⴱⴰⵍ ⵏ ⵉⵙⵔⴰⵉⵍ. 5 ⵉⵙⵙⴻⴽⴽ ⵉⵃⵓⴷⵔⵉⵢⵢⴻⵏ ⵥⴻⴳ ⴰⵢⵜ ⵏ ⵉⵙⵔⴰⵉⵍ, ⵉⵏⵏⵉ ⵉⵙⵙⴱⴻⵅⵅⴰⵔⴻⵏ ⵜⵉⵖⴰⵔⵚⵉ ⵏ ⵡⴻⵛⵎⴰⴹ ⵓ ⵇⴻⴷⴷⵎⴻⵏ ⵜⵉⵖⴰⵔⵚⵉ ⵏ ⵍⴻⵀⵏⴰ ⵥⴻⴳ ⵉⵢⴻⵏⴷⵓⵥⴻⵏ ⵉ ⵙⵉⴷⵉ. 6 ⵉⴽⵙⵉ ⵎⵓⵙⴰ ⴰⵥⵢⴻⵏ ⵏ ⵉⴷⴰⵎⵎⴻⵏ, ⵉⴳⴳⴰ ⵉ-ⵜ ⴷⵉ ⵟⵟⴱⴰⵚⵉ ⵓⵛⴰ ⴰⵥⵢⴻⵏ ⵏⵏⴻⵖⵏⵉ ⵏ ⵉⴷⴰⵎⵎⴻⵏ ⵉⵥⴻⴵⴻⵄ ⵉ-ⵜⴻⵏ ⵅ ⵓⵄⴰⵍⵟⴰⵔ. 7 ⵉⴽⵙⵉ ⴰⴷⵍⵉⵙ ⵉⵜⵜⵡⴰⵏⵏⴹⴻⵏ ⵏ ⵍⵄⴰⵀⴷ, ⵉⵖⵔⴰ ⵉ-ⵜ ⵅ ⵉⵎⴻⵥⵥⵓⵖⴻⵏ ⵏ ⵍⴳⴻⵏⵙ ⵓⵛⴰ ⵏⵉⵜⵏⵉ ⵏⵏⴰⵏ: “ⵎⴰⵔⵔⴰ ⵎⵉⵏ ⴷ ⴰⵏⴻⵖ ⵉⵏⵏⴰ ⵙⵉⴷⵉ ⴳⴳⵓⵔ ⴰⴷ ⵜ ⵏⴻⴳⴳ ⵓ ⴳⴳⵓⵔ ⴰⴷ ⵜ ⵏⵟⴰⵄ.” 8 ⵉⴽⵙⵉ ⵎⵓⵙⴰ ⵉⴷⴰⵎⵎⴻⵏ, ⵉⵥⵓⵥⵥⴰⵔ ⵉ-ⵜⴻⵏ ⵅ ⵍⴳⴻⵏⵙ, ⵉⵏⵏⴰ: “ⵅⵥⴰⵔ, ⵉⵏⴰ ⴷ ⵉⴷⴰⵎⵎⴻⵏ ⵏ ⵍⵄⴰⵀⴷ ⵏⵏⵉ ⵉⴳⴳⴰ ⵙⵉⴷⵉ ⴰⴽⵉⴷⵡⴻⵎ ⵅ ⵎⴰⵔⵔⴰ ⴰⵡⴰⵍⴻⵏ-ⴰ.” ^■  

9 ⵉⴳⴻⵄⵄⴻⴷ ⵎⵓⵙⴰ ⴰⴽ-ⴷ ⵀⴰⵔⵓⵏ ⴷ ⵏⴰⴷⴰⴱ ⴷ ⴰⴱⵉⵀⵓ ⴷ ⵙⴻⴱⵄⵉⵏ ⵏ ⵉⵎⵖⴰⵔⴻⵏ ⵏ ⵉⵙⵔⴰⵉⵍ.

10 ⵥⵔⵉⵏ ⴰⵔⴻⴱⴱⵉ ⵏ ⵉⵙⵔⴰⵉⵍ. ⵜⵓⵖⴰ ⵙⴰⴷⵓ ⵉⴹⴰⵔⴻⵏ ⵏⵏⴻⵙ ⴰⵎⴻⵛⵏⴰⵡ ⵜⵉⵙⵉ ⵏ ⵥⵥⴻⵍⵍⵉⵊ ⵉ ⵉⵜⵜⵡⴰⴳⴳⴻⵏ ⵏ ⵚⴰⴼⴼⵉⵔ ⴰⵥⵉⵥⴰ, ⵉⵚⴼⴰ ⴰⵎⴻⵛⵏⴰⵡ ⴰⵊⴻⵏⵏⴰ ⵙⵉⵎⴰⵏⵜ ⵏⵏⴻⵙ. ^■  

11 ⵡⴰⵔ ⵉⵙⵙⵡⵉⵥⵥⴻⴹ ⴰⴼⵓⵙ ⵏⵏⴻⵙ ⵅ ⵉⵎⵛⴻⵏⵏⵄⴻⵏ ⵏ ⴰⵢⵜ ⵏ ⵉⵙⵔⴰⵉⵍ ⵓⵛⴰ ⵏⵉⵜⵏⵉ ⵅⵥⴰⵔⴻⵏ ⵖⴰⵔ ⴰⵔⴻⴱⴱⵉ, ⵛⵛⵉⵏ, ⵙⵡⵉⵏ.

12 ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⴳⴰⵄⵄⴻⴷ-ⴷⴷ ⵖⴰⵔⵉ ⵖⴰⵔ ⵡⴻⴷⵔⴰⵔ ⵓⵛⴰ ⵇⵇⵉⵎ ⴷⵉⵏ ⵓⵛⴰ ⵏⴻⵛⵛ ⴰⴷ ⴰⵛ ⵡⵛⴻⵖ ⵜⵉⵍⵡⵉⵃⵉⵏ ⵏ ⵡⴻⵥⵔⵓ, ⵛⵛⴰⵔⵉⵄⴰ ⴷ ⵍⵓⵎⴰⵔⴰⵜ ⵜⵉⵏⵏⵉ ⵓⵔⵉⵖ ⵅ ⵜⴻⵍⵡⵉⵃⵉⵏ, ⵃⵉⵎⴰ ⴰⴷ ⴰⵙⴻⵏ ⵜⴻⵏⵜ ⵜⴻⵙⵙⵍⴻⵎⴷⴻⴷ.”

13 ⵉⴽⴽⴰⵔ ⵎⵓⵙⴰ ⴰⴽ-ⴷ ⵢⴰⵛⵓⵡⴰ, ⴰⵎⵙⴻⵅⵅⴰⵔ ⵏⵏⴻⵙ, ⵓⵛⴰ ⵉⴳⴻⵄⵄⴻⴷ ⵎⵓⵙⴰ ⵖⴰⵔ ⵡⴻⴷⵔⴰⵔ ⵏ ⴰⵔⴻⴱⴱⵉ.

14 ⵉⵏⵏⴰ ⵉ ⵉⵎⵖⴰⵔⴻⵏ: “ⵔⴰⵊⴰⵎ ⴰⵏⴻⵖ ⴷⴰⵏⵉⵜⴰ ⴰⵍ ⴷⴷ ⵖⴰⵔⵡⴻⵎ ⵉ ⵖⴰ ⵏⴻⴷⵡⴻⵍ. ⵅⵥⴰⵔ, ⵀⴰⵔⵓⵏ ⴷ ⵃⵓⵔ ⴰⴽⵉⴷⵡⴻⵎ. ⵎⴰⵍⴰ ⴷⵉⵏ ⵃⴻⴷ ⵖⴰⵔⴻⵙ ⴷⴷⵄⴰⵡⵉ, ⵉⵜⵜⵅⴻⵚⵚⴰ ⴰⵙ ⴰⴷ ⵖⴰⵔⵙⴻⵏ ⵉⵔⴰⵃ.”

15 ⵅⴻⵏⵏⵉ ⵉⴳⴻⵄⵄⴻⴷ ⵎⵓⵙⴰ ⵖⴰⵔ ⵡⴻⴷⵔⴰⵔ ⵓⵛⴰ ⵉⴷⵍⴰ ⵉⵊⵊ ⵏ ⵓⵙⴻⵢⵏⵓ ⴰⴷⵔⴰⵔ.

16 ⴰⵄⵓⴵⵉ ⵏ ⵙⵉⴷⵉ ⵜⵓⵖⴰ ⵉⵥⴻⴷⴷⴻⵖ ⴷⴻⴳ ⵡⴻⴷⵔⴰⵔ ⵏ ⵙⵉⵏⴰ ⵓ ⴰⵙⴻⵢⵏⵓ ⵉⴷⵍⴰ ⵉ-ⵜ ⵙⴻⵜⵜⴰ ⵏ ⵡⵓⵙⵙⴰⵏ ⵓⵛⴰ ⴷⴻⴳ ⵡⴰⵙⵙ ⵡⵉⵙⵙ ⵙⴻⴱⵄⴰ ⵉⵍⴰⵖⴰ-ⴷⴷ ⵏⴻⵜⵜⴰ ⵅ ⵎⵓⵙⴰ ⵥⵉ ⵍⵡⴻⵙⵜ ⵏ ⵓⵙⴻⵢⵏⵓ.

17 ⴰⵙⵛⴰⵏ ⵏ ⵓⵄⵓⴵⵉ ⵏ ⵙⵉⴷⵉ ⵜⵓⵖⴰ-ⵜ ⴷⵉ ⵜⵉⵟⵟⴰⵡⵉⵏ ⵏ ⴰⵢⵜ ⵏ ⵉⵙⵔⴰⵉⵍ ⴰⵎ ⵜⵎⴻⵙⵙⵉ ⵉⵜⵜⴻⵜⵜⴻⵏ ⵅ ⵜⵇⵉⵛⵛⴰⵜ ⵏ ⵡⴻⴷⵔⴰⵔ. ^■  

18 ⵢⵓⴷⴻⴼ ⵎⵓⵙⴰ ⵖⴰⵔ ⵍⵡⴻⵙⵜ ⵏ ⵓⵙⴻⵢⵏⵓ ⵓⵛⴰ ⵉⴳⴻⵄⵄⴻⴷ ⴰⴷⵔⴰⵔ. ⵜⵓⵖⴰ ⵎⵓⵙⴰ ⵉⵇⵇⵉⵎ ⴰⵔⴻⴱⵄⵉⵏ ⵏ ⵡⵓⵙⵙⴰⵏ ⴷ ⴰⵔⴻⴱⵄⵉⵏ ⵏ ⴵⵢⴰⵍⵉ ⴷⴻⴳ ⵡⴻⴷⵔⴰⵔ.