1 ⵉⵙⵙⵉⵡⴻⵍ ⴰⵔⴻⴱⴱⵉ ⵎⴰⵔⵔⴰ ⴰⵡⴰⵍⴻⵏ-ⴰ, ⵉⵏⵏⴰ:

2 “ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵡⴻⵏⵏⵉ ⵛⴻⴽ ⴷⴷ-ⵉⵙⵙⵓⴼⴼⵖⴻⵏ ⵥⵉ ⵜⴻⵎⵎⵓⵔⵜ ⵏ ⵎⵉⵚⵔⴰ, ⵥⵉ ⵜⴰⴷⴷⴰⵔⵜ ⵏ ⵜⴻⵙⵎⵓⵖⵉ. ^■  

3 ⵡⴰⵔ ⵖⴰⵔⴻⴽ ⵜⵜⵉⵍⵉⵏ ⵉⵔⴻⴱⴱⵉⵜⴻⵏ ⵏⵏⴻⵖⵏⵉ ⵥⵥⴰⵜ ⵉ ⵡⵓⴷⴻⵎ ⵉⵏⵓ. 4 ⵡⴰⵔ ⵜⵜⴻⴳⴳ ⵉ ⵢⵉⵅⴻⴼ ⵏⵏⴻⴽ ⵍⴻⵅⵢⴰⵍ ⵉⵏⴻⵇⵛⴻⵏ ⵏⵉⵖ ⵛⴰ ⵏ ⵍⵃⴰⵊⵊⴻⵜ ⵜⴰⵔⵡⴻⵙ ⴷⵉ ⵎⵉⵏ ⵉⴵⴰⵏ ⵙⴻⵏⵏⴻⵊ ⴷⴻⴳ ⵓⵊⴻⵏⵏⴰ ⵏⵉⵖ ⴷⵉ ⵛⴰ ⴷⴰ ⵙⵡⴰⴷⴷⴰⵢ ⵉ ⵜⴻⵎⵎⵓⵔⵜ ⵏⵉⵖ ⴷⵉ ⵛⴰ ⴷⴻⴳ ⵡⴰⵎⴰⵏ ⵉ ⵉⴵⴰⵏ ⵙⴰⴷⵓ ⵜⴻⵎⵎⵓⵔⵜ. ^■   5 ⵡⴰⵔ ⴳⴳⵓⵔ ⴰⴷ ⴰⵙⴻⵏ ⵜⴰⴹⴰⵔⴻⴷ ⵓⵍⴰ ⴰⴷ ⵅⴰⵙⴻⵏ ⵜⵙⴻⵅⵅⴰⵔⴻⴷ, ⵎⵉⵏⵥⵉ ⵏⴻⵛⵛ, ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴷ ⵉⵊⵊ ⵏ ⴰⵔⴻⴱⴱⵉ ⵉⵜⵜⴰⵙⵎⴻⵏ, ⵡⴻⵏⵏⵉ ⴷⴷ-ⵢⴰⵔⴻⵥⴼⴻⵏ ⵍⵎⵓⵄⵚⵉⵢⵢⴻⵜ ⵏ ⵉⴱⴰⴱⴰⵜⴻⵏ ⴷⵉ ⵜⴰⵔⵡⴰ ⴰⵍ ⵊⵊⵉⵍ ⵡⵉⵙⵙ ⵜⵍⴰⵜⴰ ⴷ ⵡⵉⵙⵙ ⴰⵔⴻⴱⵄⴰ ⵏ ⵢⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ, 6 ⴷ ⵡⴻⵏⵏⵉ ⵉⵙⵙⵛⴰⵏⴰⵏ ⵜⴰⵎⴻⵅⵙⵉⵡⵜ ⵏⵏⴻⵙ ⵉⵛⴻⵡⵡⴰⵔⴻⵏ ⵉ ⵍⵓⵍⵓⴼ ⵏ ⵢⵉⵏⵏⵉ ⴷ ⴰⵢⵉ ⵉⵜⵜⴻⵅⵙⴻⵏ ⵓ ⵃⴻⵟⵟⴰⵏ ⵍⵓⵎⵓⵔⴰⵜ ⵉⵏⵓ.

7 ⵡⴰⵔ ⵏⴻⵟⵟⴻⵇ ⵙ ⵢⵉⵙⴻⵎ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⴷⵉ ⵍⴱⴰⵟⴻⵍ, ⵎⵉⵏⵥⵉ ⵡⴰⵔ ⵉⵜⵜⴱⴰⵔⵔⵉ ⵙⵉⴷⵉ ⵉ ⵡⴻⵏⵏⵉ ⵉ ⵖⴰ ⵉⵏⴻⵟⵇⴻⵏ ⵙ ⵢⵉⵙⴻⵎ ⵏⵏⴻⵙ ⴷⵉ ⵍⴱⴰⵟⴻⵍ. ^■  

8 ⵉⴷⴰⵔ ⴰⵙⵙ ⵏ ⵙⵙⴻⴱⵜ ⵃⵉⵎⴰ ⴰⴷ ⵜ ⵜⴻⵙⵙⵇⴻⴷⴷⵙⴻⴷ. ^■   9 ⵙⴻⵜⵜⴰ ⵏ ⵡⵓⵙⵙⴰⵏ ⵉ ⵖⴰ ⵜⵅⴻⴷⵎⴻⴷ, ⴰⴷ ⵜⴻⴳⴳⴻⴷ ⵎⴰⵔⵔⴰ ⵍⵅⴻⴷⵎⴻⵜ ⵏⵏⴻⴽ.^■  

10 ⴰⵙⵙ ⵡⵉⵙⵙ ⵙⴻⴱⵄⴰ ⴷ ⵡⴰⵙⵙ ⵏ ⵙⵙⴻⴱⵜ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ. ⵡⴰⵔ ⴷⴰⵢⴻⵙ ⵜⵜⴻⴳⴳ ⵓⵍⴰ ⴷ ⵉⵛⵜ ⵏ ⵍⵅⴻⴷⵎⴻⵜ, ⵛⴻⴽ ⵍⵍⴰ, ⵓⵍⴰ ⴷ ⵎⵎⵉⵛ ⵍⵍⴰ, ⵏⵉⵖ ⴷ ⵢⴻⴵⵉⵛ, ⵓⵍⴰ ⴷ ⵉⵙⵎⴻⵖ ⵏⵏⴻⴽ, ⵏⵉⵖ ⵜⴰⵢⵢⴰ ⵏⵏⴻⴽ, ⵓⵍⴰ ⴷ ⵍⴻⴱⵀⵉⵎⴻⵜ ⵏⵏⴻⴽ, ⵏⵉⵖ ⴰⴱⴰⵔⵔⴰⵏⵉ ⵡⴻⵏⵏⵉ ⴰⴽⵉⴷⴻⴽ ⵉⴵⴰⵏ ⴷⴰⵅⴻⵍ ⵉ ⵜⴻⵡⵡⵓⵔⴰ ⵏⵏⴻⴽ.

11 ⵎⵉⵏⵥⵉ ⴷⵉ ⵙⴻⵜⵜⴰ ⵏ ⵡⵓⵙⵙⴰⵏ ⵉⴳⴳⴰ ⵙⵉⴷⵉ ⴰⵊⴻⵏⵏⴰ ⴷ ⵜⴻⵎⵎⵓⵔⵜ, ⵍⴻⴱⵃⴰⵔ ⴷ ⵎⴰⵔⵔⴰ ⵎⵉⵏ ⴷⴰⵢⴻⵙ ⵓⵛⴰ ⵢⴰⵔⴻⵢⵢⴻⵃ ⴷⴻⴳ ⵡⴰⵙⵙ ⵡⵉⵙⵙ ⵙⴻⴱⵄⴰ. ⵙ ⵓⵢⴻⵏⵏⵉ ⵉⴱⴰⵔⴻⴽ ⵙⵉⴷⵉ ⴰⵙⵙ ⵏ ⵙⵙⴻⴱⵜ ⵓⵛⴰ ⵉⵙⵙⵇⴻⴷⴷⴻⵙ ⵉ-ⵜ. ^■  

12 ⵡⴻⵇⵇⴰⵔ ⴱⴰⴱⴰⵛ ⴷ ⵢⴻⵎⵎⴰⵛ, ⵎⴰⵃⴻⵏⴷ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⴽ ⵥⴻⵎⵎⴰⵔⴻⵏ ⴰⴷ ⵥⵥⵓⴳⴳⴰⵔⵜⴻⵏ ⴷⵉ ⵜⴻⵎⵎⵓⵔⵜ ⵉ ⴷ ⴰⵛ ⵖⴰ ⵢⴻⵡⵛ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ. ^■  

13 ⵡⴰⵔ ⵏⴻⵇⵇ. ^■  

14 ⵡⴰⵔ ⵥⴻⵏⵏⴰ. ^■  

15 ⵡⴰⵔ ⵜⵜⴰⵛⴰⵔ.

16 ⵡⴰⵔ ⵛⴻⵀⵀⴻⴷ ⵙ ⵉⵅⴰⵔⵔⵉⵇⴻⵏ ⴹⵉⴷⴷ ⵉ ⵓⵎⵇⴰⵔⵔⴻⴱ ⵏⵏⴻⴽ.

17 ⵡⴰⵔ ⵙⵎⴻⵥⵔⴰⵢ ⵜⴰⴷⴷⴰⵔⵜ ⵏ ⵓⵎⵇⴰⵔⵔⴻⴱ ⵏⵏⴻⴽ, ⵡⴰⵔ ⵙⵎⴻⵥⵔⴰⵢ ⴷⵉ ⵜⴰⵎⵖⴰⵔⵜ ⵏ ⵓⵎⵇⴰⵔⵔⴻⴱ ⵏⵏⴻⴽ, ⵏⵉⵖ ⴷⴻⴳ ⵢⵉⵙⵎⴻⵖ ⵏⵏⴻⵙ, ⵏⵉⵖ ⴷⵉ ⵜⴰⵢⵢⴰ ⵏⵏⴻⵙ, ⵏⵉⵖ ⴷⴻⴳ ⵓⴼⵓⵏⴰⵙ ⵏⵏⴻⵙ, ⵏⵉⵖ ⴷⴻⴳ ⵡⴻⵖⵢⵓⵍ ⵏⵏⴻⵙ ⵓⵍⴰ ⴷⴻⴳ ⵉⵛⵜ ⵏ ⵍⵃⴰⵊⵊⴻⵜ ⵉ ⵉⴵⴰⵏ ⵏ ⵓⵎⵇⴰⵔⵔⴻⴱ ⵏⵏⴻⴽ.” ^■  

18 ⵎⴰⵔⵔⴰ ⵍⴳⴻⵏⵙ ⵉⵥⵔⴰ ⵓ ⵉⵙⵍⴰ ⵉ ⵡⴰⵊⵊⴰⵊⴻⵏ ⴷ ⵡⴰⵙⵙⴰⵎⴻⵏ ⴷ ⴷⴷⵔⵉⵥ ⵏ ⵓⵚⵓⴹⵉ ⴷⴻⴳ ⵓⵢⵉⵛⵛ ⵏ ⵉⵛⴰⵔⵔⵉ ⴷ ⵡⴻⴷⵔⴰⵔ ⵉⴷⴷⵓⵅⵅⵓⵏⴻⵏ. ⵓⵎⵉ ⵉⵥⵔⴰ ⵍⴳⴻⵏⵙ ⵎⴰⵏ ⴰⵢⴰ, ⵅⴻⵏⵏⵉ ⴰⵔⵊⵉⵊⴻⵏ ⵓⵛⴰ ⴱⴻⵄⵄⴷⴻⵏ ⵏⵉⵜⵏⵉ ⵖⴰⵔ ⵍⴰⴳⴳⵯⴰⵊ.

19 ⵏⵏⴰⵏ ⵉ ⵎⵓⵙⴰ: “ⵙⵉⵡⴻⵍ ⵛⴻⴽ ⴰⴽⵉⴷⵏⴻⵖ ⵓⵛⴰ ⴰⴷ ⵏⵙⴻⵍ. ⵎⴰⵛⴰ ⵉⵜⵜⵅⴻⵚⵚⴰ ⴰⵔⴻⴱⴱⵉ ⵡⴰⵔ ⴽⵉⴷⵏⴻⵖ ⵉⵙⵙⵉⵡⵉⵍ ⵃⵉⵎⴰ ⵡⴰⵔ ⵏⴻⵜⵜⵎⴻⵜⵜⵉ!” ^■   20 ⵉⵏⵏⴰ ⵎⵓⵙⴰ ⵉ ⵍⴳⴻⵏⵙ: “ⵡⴰⵔ ⵜⴻⴳⴳⵯⴻⴷⴻⵎ ⵛⴰ, ⴰⵇⴰ ⵢⵓⵙⴰ-ⴷⴷ ⴰⵔⴻⴱⴱⵉ ⵃⵉⵎⴰ ⴰⴷ ⴽⴻⵏⵏⵉⵡ ⵉⵇⴻⴵⴻⴱ ⵓ ⵃⵉⵎⴰ ⴰⴷ ⵥⵥⴰⵢⴻⵙ ⵜⴻⴳⴳⵯⴻⴷⴻⵎ ⵎⴰⵃⴻⵏⴷ ⵡⴰⵔ ⵜⵅⴻⵟⵟⵉⵎ ⵛⴰ.” 21 ⵉⴱⴻⴷⴷ ⵍⴳⴻⵏⵙ ⵥⵉ ⵍⴰⴳⴳⵯⴰⵊ, ⵎⴰⵛⴰ ⵎⵓⵙⴰ ⵉⵇⴰⵔⵔⴻⴱ-ⴷⴷ ⵖⴰⵔ ⵓⵙⴻⵢⵏⵓ ⵉⴱⴱⵓⵎⴱⵙⴻⵏ ⵎⴰⵏⵉ ⵜⵓⵖⴰ ⴰⵔⴻⴱⴱⵉ. ^■  

22 ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⴰⵎⵎⵓ ⵉⵜⵜⵅⴻⵚⵚⴰ ⴰⴷ ⵜⵉⵏⵉⴷ ⵉ ⴰⵢⵜ ⵏ ⵉⵙⵔⴰⵉⵍ: ‘ⴽⴻⵏⵏⵉⵡ ⵜⴻⵥⵔⵉⵎ ⴱⴻⵍⵍⵉ ⵙⵙⵉⵡⵍⴻⵖ-ⴷⴷ ⴰⴽⵉⴷⵡⴻⵎ ⵥⴻⴳ ⵓⵊⴻⵏⵏⴰ. 23 ⵡⴰⵔ ⵜⵜⴻⴳⴳⴻⵎ ⴽⵉⴷⵉ ⵉⵔⴻⴱⴱⵉⵜⴻⵏ ⵏ ⵏⵏⵓⵇⴰⵔⵜ ⵓⵍⴰ ⵡⴰⵔ ⵜⵜⴻⴳⴳⴻⵎ ⵉⵔⴻⴱⴱⵉⵜⴻⵏ ⵏ ⵡⵓⵔⴻⵖ ⵉ ⵢⵉⵅⴻⴼ ⵏⵡⴻⵎ. 24 ⴻⴳⴳ ⴰⵢⵉ ⵉⵊⵊ ⵏ ⵓⵄⴰⵍⵟⴰⵔ ⵙ ⵓⵛⴰⵍ, ⵇⴻⴷⴷⴻⵎ ⵅⴰⵙ ⵜⵉⵖⴰⵔⵚⴰ ⵏⵏⴻⴽ ⵏ ⵡⴻⵛⵎⴰⴹ ⴷ ⵜⵉⵖⴰⵔⵚⴰ ⵏⵏⴻⴽ ⵏ ⵍⴻⵀⵏⴰ, ⵓⴵⵉ ⵏⵏⴻⴽ ⴷ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⵏⵏⴻⴽ. ⴷⵉ ⴽⵓⵍ ⴰⵎⵛⴰⵏ ⵎⴰⵏⵉ ⵉ ⵖⴰ ⴳⴳⴻⵖ ⵍⵉⴷⴰⵔⴻⵜ ⵏ ⵢⵉⵙⴻⵎ ⵉⵏⵓ, ⴰⴷ ⵖⴰⵔⴻⴽ ⴷⴷ-ⴰⵙⴻⵖ ⵓⵛⴰ ⴰⴷ ⴰⵛ ⴱⴰⵔⴽⴻⵖ. ^■   25 ⵎⴰⵍⴰ ⵜⴻⴳⴳⵉⴷ ⴰⵢⵉ ⵉⵊⵊ ⵏ ⵓⵄⴰⵍⵟⴰⵔ ⵏ ⵉⵥⵔⴰ, ⵡⴰⵔ ⵜ ⵜⴱⴻⵏⵏⵉⴷ ⵙ ⵜⵚⵓⴹⴰⵔ ⵉⵜⵜⵡⴰⵙⵙⵓⵢⴷⴰⵏ, ⵎⵉⵏⵥⵉ ⵎⴰⵍⴰ ⵜⴻⴷⴷⵥⴻⴷ ⵙ ⵉⵎⴻⵢⴷⵉ ⵏⵏⴻⴽ, ⵉⵍⵉ ⴰⴷ ⵜ ⵜⴻⵙⵙⵄⵉⴵⵜⴻⴷ. ^■   26 ⵡⴰⵔ ⵜⵜⴳⵉⵄⵄⵉⴷ ⵖⴰⵔ ⵓⵄⴰⵍⵟⴰⵔ ⵉⵏⵓ ⵙ ⵢⵉⵊⵊ ⵏ ⴷⴷⵔⵓⵊ, ⵃⵉⵎⴰ ⵡⴰⵔ ⵉⵜⵜⴱⵉⵏ ⵓⵙⴻⴹⵃⵉ ⵏⵏⴻⴽ.”