1 ⵓⵛⴰ ⴼⴻⵙⵢⴻⵏ ⵎⴰⵔⵔⴰ ⵜⴰⵎⴻⵙⵎⵓⵏⵜ ⵏ ⴰⵢⵜ ⵏ ⵉⵙⵔⴰⵉⵍ ⵉⵇⵉⴹⴰⵏ ⵏⵙⴻⵏ, ⵓⵢⵓⵔⴻⵏ ⵥⵉ ⵍⴻⵅⵍⴰ ⵏ ⵙⵉⵏ, ⴰⵎ ⵎⴰⵎⵎⴻⵛ ⵉ ⴷ ⴰⵙⴻⵏ ⵢⵓⵎⵓⵔ ⵙⵉⴷⵉ ⵓⵛⴰ ⵡⵜⵉⵏ ⵉⵇⵉⴹⴰⵏ ⵏⵙⴻⵏ ⴷⵉ ⵔⴰⴼⵉⴷⵉⵎ. ⵡⴰⵔ ⴷⵉⵏ ⵜⵓⵖⵉ ⴰⵎⴰⵏ ⵃⵉⵎⴰ ⴰⴷ ⵉⵙⵙⵓ ⵍⴳⴻⵏⵙ. 2 ⵅⴻⵏⵏⵉ ⵉⵎⵛⵓⴱⴱⴻⵛ ⵍⴳⴻⵏⵙ ⴰⴽ-ⴷ ⵎⵓⵙⴰ, ⵏⵉⵜⵏⵉ ⵏⵏⴰⵏ: “ⴻⵡⵛ ⴰⵏⴻⵖ ⴰⵎⴰⵏ ⵃⵉⵎⴰ ⴰⴷ ⵏⵙⵓ!” ⵎⵓⵙⴰ ⵉⵏⵏⴰ ⴰⵙⴻⵏ: “ⵎⴰⵢⴻⵎⵎⵉ ⴰⴽⵉⴷⵉ ⵜⴻⵎⵛⵓⴱⴱⵓⵛⴻⵎ? ⵎⴰⵢⴻⵎⵎⵉ ⵜᵉⵜⵜⵇⴻⴵⴰⴱⴻⵎ ⵙⵉⴷⵉ?” ^■   3 ⵜⵓⵖⴰ ⵍⴳⴻⵏⵙ ⵉⴼⴼⵓⴷ ⴰⵟⵟⴰⵙ ⵖⴰⵔ ⵡⴰⵎⴰⵏ ⵓⵛⴰ ⵏⵏⴷⴻⵇⵎⴻⵏ ⵥⵉ ⵎⵓⵙⴰ, ⵏⵏⴰⵏ: “ⵎⴰⵖⴰⵔ ⴷ ⴰⵏⴻⵖ ⴷⴷ-ⵜⴻⵙⵙⴳⴻⵄⵄⴷⴻⴷ ⵥⵉ ⵎⵉⵚⵔⴰ? ⵎⴰ ⵃⵉⵎⴰ ⴰⴷ ⴰⵢⵉ ⵜⵀⴻⵍⵍⴽⴻⴷ ⵏⴻⵛⵛ ⵙ ⵓⴼⴰⴷⵉ ⵓⵍⴰ ⴷ ⵜⴰⵔⵡⴰ ⵉⵏⵓ ⴷ ⵍⴻⴱⵀⴰⵢⴻⵎ ⵉⵏⵓ?” 4 ⵍⴻⵅⴷⴻⵏⵏⵉ ⵉⵙⵖⵓⵢⵢ ⵎⵓⵙⴰ ⵖⴰⵔ ⵙⵉⴷⵉ, ⵉⵏⵏⴰ: “ⵎⵉⵏ ⵉ ⵖⴰ ⴳⴳⴻⵖ ⴰⴽ-ⴷ ⵍⴳⴻⵏⵙ-ⴰ? ⵎⵖⵉⵔ ⵛⵡⴰⵢⵜ ⵓⵛⴰ ⴰⴷ ⴰⵢⵉ ⴰⵔⴻⵊⵎⴻⵏ.” 5 ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⴻⴽⴽ ⵥⵥⴰⵜ ⵉ ⵍⴳⴻⵏⵙ ⵓⵛⴰ ⴽⵙⵉ ⴰⴽⵉⴷⴻⴽ ⵛⴰ ⵥⴻⴳ ⵉⵎⵖⴰⵔⴻⵏ ⵏ ⵉⵙⵔⴰⵉⵍ ⵓⵛⴰ ⴽⵙⵉ ⵄⴰⵡⴻⴷ ⴷⴻⴳ ⵓⴼⵓⵙ ⵏⵏⴻⴽ ⵜⴰⵖⵖⴰⵔⵛⵜ ⵏⵏⵉ ⵥⵉ ⵜⴻⵡⵜⵉⴷ ⵉⵖⵥⴰⵔ ⵓⵛⴰ ⵔⵓⵃ. ^■   6 ⴰⵇⴰ ⴰⵢⵉ, ⵏⴻⵛⵛ ⴰⴷ ⴱⴻⴷⴷⴻⵖ ⴷⵉⵏ ⵥⵥⴰⵜⴻⴽ ⵅ ⵜⴻⵚⴹⴰⵔⵜ ⵖⴰⵔ ⵃⵓⵔⵉⴱ, ⴰⴷ ⵜⴻⵡⵜⴻⴷ ⵜⴰⵚⴹⴰⵔⵜ, ⴰⴷ ⵥⵥⴰⵢⴻⵙ ⴷⴷ-ⴼⴼⵖⴻⵏ ⵡⴰⵎⴰⵏ ⵓⵛⴰ ⴰⴷ ⵉⵙⵙⵓ ⵍⴳⴻⵏⵙ.” ⵉⴳⴳⴰ ⵎⵓⵙⴰ ⴰⵎⴻⵏⵏⵉ ⵥⵥⴰⵜ ⵉ ⵜⵉⵟⵟⴰⵡⵉⵏ ⵏ ⵉⵎⵖⴰⵔⴻⵏ ⵏ ⵉⵙⵔⴰⵉⵍ. ^■   7 ⵓⵛⴰ ⵉⵍⴰⵖⴰ ⵉⵙⴻⵎ ⵏ ⵡⴻⵎⵛⴰⵏ ⵏⵏⵉ ⵎⴰⵙⵙⴰ ⴷ ⵎⴰⵔⵉⴱⴰ, ⵎⵉⵏⵥⵉ ⴰⵢⵜ ⵏ ⵉⵙⵔⴰⵉⵍ ⵎⵛⵓⴱⴱⵛⴻⵏ ⴷⵉⵏ ⵓ ⵎⵉⵏⵥⵉ ⵏⵉⵜⵏⵉ ⵇⴻⴵⴱⴻⵏ ⵙⵉⴷⵉ, ⵏⵏⴰⵏ: “ⵎⴰ ⵙⵉⴷⵉ ⴰⵇⴰ-ⵜ ⵍⴻⵅⵅⵓ ⴷⵉ ⵍⵡⴻⵙⵜ ⵏⵏⴻⵖ ⵏⵉⵖ ⵍⵍⴰ?”

8 ⵅⴻⵏⵏⵉ ⵢⵓⵙⴰ-ⴷⴷ ⵄⴰⵎⴰⵍⵉⵇ ⵓⵛⴰ ⵉⵎⵏⴻⵖ ⴰⴽ-ⴷ ⵉⵙⵔⴰⵉⵍ ⴷⵉ ⵔⴰⴼⵉⴷⵉⵎ. ^■   9 ⵉⵏⵏⴰ ⵎⵓⵙⴰ ⵉ ⵢⴰⵛⵓⵡⴰ: “ⴻⵊⵊ ⴰⵏⴻⵖ ⴰⴷ ⵏⵉⵅⴹⴰⵔ ⵉⵔⵢⴰⵥⴻⵏ ⵓⵛⴰ ⴰⴷ ⵏⴻⴼⴼⴻⵖ ⵎⴰⵃⴻⵏⴷ ⴰⴷ ⵏⴻⵎⵏⴻⵖ ⴰⴽ-ⴷ ⵄⴰⵎⴰⵍⵉⵇ. ⵜⵉⵡⴻⵛⵛⴰ ⴰⴷ ⵉⵍⵉⵖ ⵙⴻⵏⵏⴻⵊ ⵅ ⵜⵇⵉⵛⵛⴰⵜ ⵏ ⵜⴻⵡⵔⵉⵔⵜ ⵓⵛⴰ ⴰⵄⵎⵓⴷ ⵏ ⴰⵔⴻⴱⴱⵉ ⴰⴷ ⵢⵉⵍⵉ ⴷⴻⴳ ⵓⴼⵓⵙ ⵉⵏⵓ.”

10 ⵉⴳⴳⴰ ⵢⴰⵛⵓⵡⴰ ⴰⵎ ⵎⴰⵎⵎⴻⵛ ⴷ ⴰⵙ ⵉⵏⵏⴰ ⵎⵓⵙⴰ, ⵉⵎⵏⴻⵖ ⴰⴽ-ⴷ ⵄⴰⵎⴰⵍⵉⵇ, ⵎⴰⵛⴰ ⵎⵓⵙⴰ ⴷ ⵀⴰⵔⵓⵏ ⴷ ⵃⵓⵔ ⵓⵍⵢⴻⵏ ⵖⴰⵔ ⵜⵇⵉⵛⵛⴰⵜ ⵏ ⵜⴻⵡⵔⵉⵔⵜ.

11 ⵓⵛⴰ ⵉⵎⵙⴰⵔ ⵍⴰⵎⵉ ⵉⵙⵙⴳⴻⵄⵄⴻⴷ ⵎⵓⵙⴰ ⴰⴼⵓⵙ ⵏⵏⴻⵙ, ⵅⴻⵏⵏⵉ ⵜⵓⵖⴰ ⵉⵙⵔⴰⵉⵍ ⵜⵖⴻⴵⴻⴱ, ⵎⴰⵛⴰ ⵅⵎⵉ ⵉⵜⵜⴻⵊⵊⴰ ⴰⴼⵓⵙ ⵏⵏⴻⵙ ⴰⴷ ⵉⵀⵡⴰ, ⵅⴻⵏⵏⵉ ⵖⴻⴵⴱⴻⵏ ⴰⵢⵜ ⵏ ⵄⴰⵎⴰⵍⵉⵇ.

12 ⵉⴼⴰⵙⵙⴻⵏ ⵏ ⵎⵓⵙⴰ ⴷⴻⵡⵍⴻⵏ ⴷⴻⵇⵍⴻⵏ. ⵅⴻⵏⵏⵉ ⴽⵙⵉⵏ ⵉⵊⵊ ⵏ ⵡⴻⵥⵔⵓ ⵓⵛⴰ ⴳⴳⵉⵏ ⵜ ⵙⴰⴷⵓ ⵎⵓⵙⴰ ⵓⵛⴰ ⵉⵇⵇⵉⵎ ⵅⴰⵙ ⵓⵛⴰ ⵀⴰⵔⵓⵏ ⴷ ⵃⵓⵔ ⵙⴻⵏⵏⴷⴻⵏ ⵉⴼⴰⵙⵙⴻⵏ ⵏⵏⴻⵙ, ⵉⵊⵊ ⵥⴻⴳ ⵓⵖⴻⵥⴷⵉⵙ-ⴰ, ⵡⴻⵏⵏⴻⵖⵏⵉ ⵥⴻⴳ ⵓⵖⴻⵥⴷⵉⵙ ⵏⵏⴻⵖⵏⵉ. ⴰⵎⵎⵓ ⵉ ⵉⵇⵇⵉⵎⴻⵏ ⵉⴼⴰⵙⵙⴻⵏ ⵏⵏⴻⵙ ⴳⴻⵄⵄⴷⴻⵏ ⴰⵍⵎⵉ ⵜⴻⵖⵍⵉ ⵜⴼⵓⵛⵜ.

13 ⵓⵛⴰ ⵉⵖⵍⴻⴱ ⵢⴰⵛⵓⵡⴰ ⵅ ⵄⴰⵎⴰⵍⵉⵇ ⴷ ⵍⴳⴻⵏⵙ ⵏⵏⴻⵙ ⵙ ⵍⴻⵇⴹⴻⵄ ⵏ ⵙⵙⵉⴼ. ^□  

14 ⵅⴻⵏⵏⵉ ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⴰⵔⵉ ⴰⵢⴰ ⴷⴻⴳ ⵉⵊⵊ ⵏ ⵡⴻⴷⵍⵉⵙ ⵉⵜⵜⵡⴰⵏⵏⴹⴻⵏ ⵉ ⵍⵉⴷⴰⵔⴻⵜ ⴷⴰⵢⴻⵙ ⵓⵛⴰ ⴻⴳⴳ ⵉ-ⵜ ⴷⴻⴳ ⵉⵎⴻⵊⵊⴰⵏ ⵏ ⵢⴰⵛⵓⵡⴰ, ⴱⴻⵍⵍⵉ ⴰⵇⴰ ⵏⴻⵛⵛ ⴰⴷ ⵎⵃⵉⵖ ⵇⴰⵄ ⵍⵉⴷⴰⵔⴻⵜ ⴷⵉ ⵄⴰⵎⴰⵍⵉⵇ ⵙⴰⴷⵓ ⵓⵊⴻⵏⵏⴰ.” ^■  

15 ⵉⴱⵏⴰ ⵎⵓⵙⴰ ⵉⵊⵊ ⵏ ⵓⵄⴰⵍⵟⴰⵔ ⵓⵛⴰ ⵉⵍⴰⵖⴰ ⴰⵙ ⵙ ⵢⵉⵙⴻⵎ: “ⵙⵉⴷⵉ ⴷ ⵜⴰⵄⴻⴵⴰⵏⵜ ⵉⵏⵓ!”

16 ⵓⵛⴰ ⵉⵏⵏⴰ: “ⴰⴼⵓⵙ ⵜⵓⵖⴰ ⵜ ⵅ ⵍⵄⴰⵔⵛ ⵏ ⵙⵉⴷⵉ. ⵙⵉⴷⵉ ⴰⴷ ⵢⴻⴳⴳ ⴳⴰⵔⵔⴰ ⵅ ⵄⴰⵎⴰⵍⵉⵇ ⵥⵉ ⵊⵊⵉⵍ ⵖⴰⵔ ⵊⵊⵉⵍ.” ^■