1 ⵍⴻⵅⴷⴻⵏⵏⵉ ⵉⵥⴻⵀⵀⴻⴷ ⵎⵓⵙⴰ ⵊⵎⵉⵄ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ ⵥⵀⵉⴷ-ⴰ ⵉ ⵙⵉⴷⵉ, ⵏⵏⴰⵏ:

“ⴰⴷ ⵥⴻⵀⵀⴷⴻⵖ ⵉ ⵙⵉⴷⵉ, ⵎⵉⵏⵥⵉ ⵏⴻⵜⵜⴰ ⵜⵓⵖⴰ ⵉⵖⵍⴻⴱ ⵙ ⵢⵉⵊⵊ ⵏ ⵍⴻⵖⵍⴻⴱ ⵉⵎⵖⴰⵔ!

ⴰⵢⵉⵙ ⴷ ⵡⴻⵏⵏⵉ ⵅⴰⵙ ⵢⴻⵏⵢⵉⵏ ⵉⵏⴹⴰⵔ ⵉ-ⵜⴻⵏ ⴷⵉ ⵍⴻⴱⵃⴰⵔ. ^■  

2 ⵙⵉⴷⵉ ⴷ ⵊⵊⴻⵀⴷ ⵉⵏⵓ ⴷ ⵓⵥⴻⵀⵀⴻⴷ ⵉⵏⵓ.

ⵏⴻⵜⵜⴰ ⵉⴷⵡⴻⵍ ⴷ ⴰⵙⴻⵏⵊⴻⵎ ⵉⵏⵓ.

ⵡⴰ ⴷ ⴰⵔⴻⴱⴱⵉ ⵉⵏⵓ, ⵏⴻⵛⵛ ⴰⴷ ⵜ ⵙⵙⴻⵎⵖⴰⵔⴻⵖ.

ⵏⴻⵜⵜⴰ ⴷ ⴰⵔⴻⴱⴱⵉ ⵏ ⴱⴰⴱⴰ, ⵏⴻⵛⵛ ⴰⴷ ⵜ ⵙⵙⵄⵓⴵⴻⵖ! ^■  

3 ⵙⵉⴷⵉ ⴷ ⴰⵔⵢⴰⵥ ⵏ ⵓⵎⴻⵏⵖⵉ,

ⵙⵉⴷⵉ ⴷ ⵉⵙⴻⵎ ⵏⵏⴻⵙ!

4 ⵉⴽⴰⵔⵔⵓⵜⴻⵏ ⵏ ⴼⵉⵔⵄⵓⵏ ⴷ ⵍⵄⴻⵙⴽⴰⵔ ⵏⵏⴻⵙ ⵉⵏⴹⴰⵔ ⵉ-ⵜⴻⵏ ⴷⵉ ⵍⴻⴱⵃⴰⵔ

ⵓ ⴰⵛⴻⵡⵡⴰⵔ ⵏ ⵉⵏⴻⵖⵔⴰⴼⴻⵏ ⵏⵏⴻⵙ ⵥⵉ ⵍⵄⴻⵙⴽⴰⵔ ⵖⴰⵔⵇⴻⵏ ⴷⵉ ⵍⴻⴱⵃⴰⵔ ⵏ ⵜⴻⵍⴳⴰ.

5 ⴰⵎⴰⵏ ⵢⵓⴵⵖⴻⵏ ⴷⵍⴻⵏ ⵉ-ⵜⴻⵏ.

ⴰⵎⴻⵛⵏⴰⵡ ⴰⵥⵔⵓ ⵀⵡⴰⵏ ⵖⴰⵔ ⵍⴰⴵⴰⵖ. ^■  

6 ⴰ ⵙⵉⴷⵉ, ⴰⴼⵓⵙ ⴰⴼⵓⵙⵉ ⵏⵏⴻⴽ ⵉⵜⵜⵡⴰⵄⴻⵥⵥ ⵙ ⵊⵊⴻⵀⴷ,

ⴰⴼⵓⵙ ⴰⴼⵓⵙⵉ ⵏⵏⴻⴽ, ⴰ ⵙⵉⴷⵉ, ⴰⵇⴰ ⵉⵍⴱⴻⵥ ⵍⴻⵄⴷⵓ. ^■  

7 ⵙ ⵍⴻⵎⵖⴰⵔⴻⵜ ⵏ ⵓⵄⵓⴵⵉ ⵏⵏⴻⴽ ⵜᵉⵜⵜⴻⵃⵃⵉⴷ ⵉⵏⵏⵉ ⴽⵉⴽ ⵉⵜⵜⴻⵎⵄⴰⵍⴰⵏ.

ⵎⴰⵍⴰ ⵜⴻⵙⵙⴻⴽⴽⴻⴷ ⵍⵃⴰⴷⵓⵇ ⵏ ⵡⴻⵖⴹⴰⴱ ⵏⵏⴻⴽ, ⴰⴷ ⵜⴻⵏ ⵢⴻⵛⵛ ⴰⵎⴻⵛⵏⴰⵡ ⵉⵖⴻⴵ.

8 ⵙ ⵓⵚⵓⴹⵉ ⵏ ⵡⴻⵏⵥⴰⵔⴻⵏ ⵏⵏⴻⴽ ⵄⵓⵔⵔⵛⴻⵏ ⵡⴰⵎⴰⵏ,

ⵜⵜⵡⴰⵙⵙⴱⴻⴷⴷⴻⵏ ⵜⵙⴻⴵⵢⴰ ⴰⵎⴻⵛⵏⴰⵡ ⴰⵖⴱⴰⵔ,

ⵓ ⴰⵎⴰⵏ ⵢⵓⴵⵖⴻⵏ ⵊⴻⵎⴷⴻⵏ ⴷⵉ ⵍⵡⴻⵙⵜ ⵏ ⵍⴻⴱⵃⴰⵔ. ^■  

9 ⵉⵏⵏⴰ ⵍⴻⵄⴷⵓ: ‘ⴳⴳⵓⵔ ⴰⴷ ⵜⴻⵏ ⴰⵔⴻⴷⴼⴻⵖ, ⴳⴳⵓⵔ ⴰⴷ ⵜⴻⵏ ⵄⴷⵓⵖ,

ⴰⴷ ⴱⴹⵉⵖ ⵍⵎⵓⵔ, ⵍⴻⵄⵎⴰⵔ ⵉⵏⵓ ⴰⴷ ⵥⵥⴰⵢⵙⴻⵏ ⵉⵊⵊⵉⵡⴻⵏ,

ⴰⴷ ⴷⴷ-ⵊⴻⴱⴷⴻⵖ ⵙⵙⵉⴼ ⵉⵏⵓ, ⴰⴼⵓⵙ ⵉⵏⵓ ⴰⴷ ⵜⴻⵏ ⵉⵀⴻⵍⵍⴻⴽ.’

10 ⵜⴻⵚⵓⴹⴻⴷ ⵙ ⵏⵏⴻⴼⵙ ⵏⵏⴻⴽ ⵓⵛⴰ ⵉⴷⴻⵍ ⵉ-ⵜⴻⵏ ⵍⴻⴱⵃⴰⵔ.

ⵏⵉⵜⵏⵉ ⵀⵡⴰⵏ-ⴷⴷ ⴰⵎⴻⵛⵏⴰⵡ ⵍⴻⵅⴼⵉⴼ ⴷⴻⴳ ⵡⴰⵎⴰⵏ ⵉⵎⵖⴰⵔⴻⵏ. ^■  

11 ⴰ ⵙⵉⴷⵉ, ⵎⴰⵏ ⵡⴻⵏ ⵉ ⵉⴵⴰⵏ ⴰⵎ ⵛⴻⴽ ⵊⴰⵔ ⵉⵔⴻⴱⴱⵉⵜⴻⵏ?

ⵡⵉ ⵉⴵⴰⵏ ⴰⵎ ⵛⴻⴽ, ⴷ ⵡⴻⵏⵏⵉ ⵉⵜⵜⵡⴰⵙⵙⵄⵓⴵⴻⵏ ⴷⵉ ⵜⵇⴻⴷⴷⴰⵙⵜ,

ⴰⵎⵡⴻⵇⵇⴰⵔ ⴷⴻⴳ ⵉⵥⵍⴰⵏ ⵏ ⵓⵚⴻⴱⴱⴻⵃ ⴷ ⵎⴰⵏ ⵡⴻⵏ ⵉⵜⵜⴻⴳⴳⴻⵏ ⵍⴻⵄⵊⴰⵢⴻⴱ ⴰⵎ ⵛⴻⴽ?

12 ⵜⴻⵙⵙⵡⵉⵥⵥⴹⴻⴷ ⴰⴼⵓⵙ ⴰⴼⵓⵙⵉ ⵏⵏⴻⴽ,

ⵜⵚⴰⵔⴹ ⵉ-ⵜⴻⵏ ⵜⴻⵎⵎⵓⵔⵜ.

13 ⵛⴻⴽ ⵜⴳⴻⵡⵡⴷⴻⴷ ⵍⴳⴻⵏⵙ-ⴰ ⵙ ⵜⵎⴻⵅⵙⵉⵡⵜ ⵏⵏⴻⴽ ⵉⵛⵓⵡⵡⴰⵔⴻⵏ, ⴰⵇⴰ ⵜⴻⴼⴷⵉⴷ ⵜ,

ⵙ ⵊⵊⴻⵀⴷ ⵏⵏⴻⴽ ⵜⵏⴻⴷⵀⴻⴷ ⵜⴻⵏ ⵖⴰⵔ ⵜⵥⴻⴷⴷⵉⵖⵜ ⵉⵇⴻⴷⴷⵙⴻⵏ ⵏⵏⴻⴽ.

14 ⵍⴻⴳⵏⵓⵙ ⵙⵍⵉⵏ ⵅ ⵓⵢⴰ ⵓⵛⴰ ⴰⵔⵊⵉⵊⴻⵏ.

ⵜⴻⵟⵟⴻⴼ ⵜⴻⴳⴳⵯⵓⴷⵉ ⴷⴻⴳ ⵉⵎⴻⵥⴷⴰⵖ ⵏ ⴼⵉⵍⵉⵛⵉⵜ.

15 ⵍⴻⵅⴷⴻⵏⵏⵉ ⵉⵎⴻⵇⵇⵔⴰⵏⴻⵏ ⵏ ⵜⵇⴻⴱⴱⴰⵍ ⵏ ⵉⴷⵓⵎ ⴰⴷ ⵜⴱⴻⵀⵜⴻⵏ,

ⵓⵛⴰ ⵉⵏⵏⵉ ⵖⴰⵔ ⵜⴻⴵⴰ ⵚⵚⵓⵍⵟⴰ ⴷⵉ ⵎⵓ’ⴰⴱ ⴰⴷ ⴰⵔⵊⵉⵊⴻⵏ,

ⵓ ⵎⴰⵔⵔⴰ ⵉⵎⴻⵥⴷⴰⵖ ⵏ ⴽⴻⵏⵄⴰⵏ ⴰⴷ ⴼⴻⵙⵢⴻⵏ! ^■  

16 ⴰⴷ ⵅⴰⵙⴻⵏ ⴷⴷ-ⵜⴻⵡⴹⴰ ⵍⵄⵓⵔⵔⴻⵜ ⴷ ⵜⵉⴳⴳⵯⵓⴷⵉ.

ⵙ ⵍⴻⵎⵖⴰⵔⴻⵜ ⵏ ⵓⵖⵉⵍ ⵏⵏⴻⴽ ⴰⴷ ⵙⵙⴻⵖⴷⴻⵏ ⴰⵎⴻⵛⵏⴰⵡ ⴰⵥⵔⵓ,

ⴰⵍ ⵉ ⵖⴰ ⵉⵥⵡⴰ ⵍⴳⴻⵏⵙ ⵏⵏⴻⴽ, ⴰ ⵙⵉⴷⵉ,

ⴰⵍ ⵉⵥⵡⴰ ⵍⴳⴻⵏⵙ-ⴰ ⵉ ⵜⴽⴻⵙⴱⴻⴷ ⵉ ⵢⵉⵅⴻⴼ ⵏⵏⴻⴽ. ^■  

17 ⵛⴻⴽ ⴰⴷ ⵜⴻⵏ ⵜⵏⴻⴷⵀⴻⴷ ⵓⵛⴰ ⴰⴷ ⵜⴻⵏ ⵜⴻⵥⵥⵓⴷ ⵅ ⵡⴻⴷⵔⴰⵔ ⵏ ⵍⵡⴰⵔⵜ ⵏⵏⴻⴽ,

ⴰⵎⵛⴰⵏ ⵉ ⵜⴻⴳⴳⵉⴷ ⴷ ⵜⴰⵥⴻⴷⴷⵉⵖⵜ ⵏⵏⴻⴽ, ⴰ ⵙⵉⴷⵉ,

ⵣⵥⴰⵡⴻⵛⵜ ⵉⵇⴻⴷⴷⵙⴻⵏ ⵉ ⵉⴳⴳⵉⵏ ⵉⴼⴰⵙⵙⴻⵏ ⵏⵏⴻⴽ, ⴰ ⵙⵉⴷⵉ ⵉⵏⵓ.

18 ⵙⵉⴷⵉ ⴰⴷ ⵉⵃⴽⴻⵎ ⵉ ⵍⴻⴱⴷⴰ ⵇⴰⵄ!

19 ⵎⵉⵏⵥⵉ ⴰⵢⵉⵙ ⵏ ⴼⵉⵔⵄⵓⵏ ⵢⵓⴷⴻⴼ ⵖⴰⵔ ⵍⴻⴱⵃⴰⵔ ⵙ ⵉⴽⴰⵔⵔⵓⵜⴻⵏ ⵏⵏⴻⵙ ⴷ ⵉⵎⵏⴰⵢⴻⵏ ⵏⵏⴻⵙ ⵓⵛⴰ ⵉⵇⵍⴻⴱ ⵅⴰⵙⴻⵏ ⵙⵉⴷⵉ ⵄⴰⵡⴻⴷ ⴰⵎⴰⵏ ⵏ ⵍⴻⴱⵃⴰⵔ. ⵎⴰⵛⴰ ⴰⵢⵜ ⵏ ⵉⵙⵔⴰⵉⵍ ⵥⵡⴰⵏ ⵅ ⵍⴰⵥⴰⵖ ⴷⵉ ⵍⵡⴻⵙⵜ ⵏ ⵍⴻⴱⵃⴰⵔ.”

20 ⵓ ⵎⴰⵔⵢⴰⵎ, ⵜⴰⵏⴰⴱⵉⵜ, ⵓⵞⵎⴰⵙ ⵏ ⵀⴰⵔⵓⵏ, ⵜⴻⴽⵙⵉ ⴰⴵⵓⵏ ⴷⴻⴳ ⵓⴼⵓⵙ ⵏⵏⴻⵙ ⴷ ⵎⴰⵔⵔⴰ ⵜⵉⵎⴻⵟⵟⴰ ⴼⴼⵖⴻⵏⵜ ⴹⴻⴼⴼⴰⵔ ⵏⵏⴻⵙ ⵙ ⵉⴱⴻⵏⴷⵉⵔⴻⵏ ⴷ ⵛⵛⴹⵉⵃ ⵙ ⵏⵏⵓⴱⵜⴰⵜ. ^■   21 ⵅⴻⵏⵏⵉ ⵜⴰⵔⵔⴰ-ⴷⴷ ⵅⴰⵙⴻⵏⵜ ⵎⴰⵔⵢⴰⵎ: “ⵖⴻⵏⵏⵊⴻⵏⵜ ⵉ ⵙⵉⴷⵉ, ⵎⵉⵏⵥⵉ ⴰⵇⴰ ⵉⵖⵍⴻⴱ ⵙ ⵢⵉⵊⵊ ⵏ ⵍⴻⵖⵍⴻⴱ ⵉⵎⵖⴰⵔ! ⵉⵏⴹⴰⵔ ⴰⵢⵉⵙ ⴰⴽ-ⴷ ⵡⴻⵏⵏⵉ ⵅⴰⵙ ⵢⴻⵏⵢⵉⵏ ⴷⵉ ⵍⴻⴱⵃⴰⵔ.”

22 ⵅⴻⵏⵏⵉ ⵎⵓⵙⴰ ⵉⴳⴳⴰ ⴰⴷ ⵉⴼⵙⵉ ⵍⴳⴻⵏⵙ ⵏ ⵉⵙⵔⴰⵉⵍ ⵉⵇⵉⴹⴰⵏ ⵏⵙⴻⵏ ⵉⵏⵏⵉ ⵉⴵⴰⵏ ⵖⴰⵔ ⵍⴻⴱⵃⴰⵔ ⵏ ⵜⴻⵍⴳⴰ ⵓⵛⴰ ⵔⵓⵃⴻⵏ ⴷⵉ ⵍⴻⵅⵍⴰ ⵏ ⵛⵓⵔ, ⵓⵢⵓⵔⴻⵏ ⵜⵍⴰⵜⴰ ⵏ ⵡⵓⵙⵙⴰⵏ ⴷⵉ ⵍⴻⵅⵍⴰ ⴱⵍⴰ ⵎⴰ ⴰⴷ ⴰⴼⴻⵏ ⴰⵎⴰⵏ. 23 ⵓⵛⴰ ⵉⵡⴹⴻⵏ ⵖⴰⵔ ⵎⴰⵔⴰ, ⵎⴰⵛⴰ ⵡⴰⵔ ⵥⴻⵎⵎⴰⵔⴻⵏ ⴰⴷ ⵙⵡⴻⵏ ⴰⵎⴰⵏ ⵏ ⵎⴰⵔⴰ, ⵎⵉⵏⵥⵉ ⵜⵓⵖⴰ ⴰⵜⴻⵏ ⴷ ⵉⵎⴻⵔⵥⴰⴳⴻⵏ. ⵙ ⵓⵢⴰ ⴳⴳⵉⵏ ⴰⵙ ⵉⵙⴻⵎ: ‘ⵎⴰⵔⴰ’. ^■   24 ⵉⵏⵏⴻⴷⵇⴻⵎ ⵍⴳⴻⵏⵙ ⵅ ⵎⵓⵙⴰ, ⵉⵏⵏⴰ: “ⵎⵉⵏ ⵉ ⵖⴰ ⵏⵙⵓ?” ^□   25 ⵏⴻⵜⵜⴰ ⵉⵍⴰⵖⴰ ⵉ ⵙⵉⴷⵉ ⵓⵛⴰ ⵙⵉⴷⵉ ⵉⵎⵎⴻⵍ ⴰⵙ ⵉⵊⵊ ⵏ ⵓⴽⴻⵛⵛⵓⴹ ⵓⵛⴰ ⵉⵏⴹⴰⵔ ⵉ-ⵜ ⴷⴰⵅⴻⵍ ⴷⴻⴳ ⵡⴰⵎⴰⵏ ⵓⵛⴰ ⴷⴻⵡⵍⴻⵏ ⵡⴰⵎⴰⵏ ⴷ ⵉⵎⵉⵥⵉⴷⴻⵏ. ⴷⵉⵏ ⵉ ⴷ ⴰⵙ ⵉⴳⴳⴰ ⵉ ⵍⴳⴻⵏⵙ ⵉⵛⵜ ⵏ ⵜⴻⵡⵚⴻⵢⵢⴻⵜ ⴷ ⵉⵛⵜ ⵏ ⵍⴼⴰⵔⵉⴹⴰ ⵓ ⴷⵉⵏⵏⵉ ⵉ-ⵜⴻⵏ ⵉⵇⴻⴵⴻⴱ. 26 ⵉⵏⵏⴰ: “ⵎⴰⵍⴰ ⵜⴻⵙⵍⵉⴷ ⵎⵍⵉⵃ ⵉ ⵡⴰⵡⴰⵍ ⵏ ⵙⵉⴷⵉ, ⴰⵔⴻⴱⴱⵉ ⵏⵏⴻⴽ, ⵜⴻⴳⴳⵉⴷ ⵎⵉⵏ ⵉⴵⴰⵏ ⵏⵉⵛⴰⵏ ⴷⵉ ⵜⵉⵟⵟⴰⵡⵉⵏ ⵏⵏⴻⵙ, ⴰⴷ ⵜⴻⵙⵍⴻⴷ ⵉ ⵍⵓⵎⴰⵔⴰⵜ ⵏⵏⴻⵙ, ⴰⴷ ⵜⴻⵃⴹⵉⴷ ⵎⴰⵔⵔⴰ ⵜⵉⵡⴻⵚⵚⴰ ⵏⵏⴻⵙ, ⵅⴻⵏⵏⵉ ⵏⴻⵛⵛ ⵡⴰⵔ ⴷ ⴰⵡⴻⵎ-ⴷⴷ ⵙⵙⴻⴽⴽⵉⵖ ⵍⴻⵀⵍⴰⵛ ⵉ ⴷⴷ-ⵙⵙⴻⴽⴽⴻⵖ ⵅ ⵎⵉⵚⵔⴰ, ⵎⵉⵏⵥⵉ ⵏⴻⵛⵛ ⴷ ⵙⵉⴷⵉ, ⴰⵎⴻⵙⴳⴻⵏⴼⵉ ⵏⵏⴻⴽ!” 27 ⵍⴻⵅⴷⴻⵏⵏⵉ ⵉⵡⴹⴻⵏ ⵖⴰⵔ ⵉⵍⵉⵎ, ⵎⴰⵏⵉ ⵜⵓⵖⴰ ⵜⴻⵏⵄⴰⵛ ⵏ ⵍⵄⵓⵏⵚⴰⵔⴰⵜ ⵏ ⵡⴰⵎⴰⵏ, ⴷ ⵙⴻⴱⵄⵉⵏ ⵏ ⵜⵛⴻⵊⵊⵓⵔⴰ ⵏ ⵜⵉⵏⵉ ⵓⵛⴰ ⵡⵜⵉⵏ ⵉⵇⵉⴹⴰⵏ ⵏⵙⴻⵏ ⴷⵉⵏⵏⵉ ⵥⵥⴰⵜ ⵉ ⵡⴰⵎⴰⵏ.