11
1 ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⴰⴷ ⵍⴻⵇⴼⴻⵖ ⵄⴰⴷ ⵎⵖⵉⵔ ⵙ ⵢⵉⵛⵜ ⵏ ⵊⵊⵔⵉⵃⴻⵛⵜ ⵅ ⴼⵉⵔⵄⵓⵏ ⴷ ⵎⵉⵚⵔⴰ. ⴰⵡⴰⵔⵏⵉ ⵜⴰ ⴰⴷ ⴽⴻⵏⵏⵉⵡ ⵢⴻⵊⵊ ⴰⴷ ⵜⵔⴰⵃⴻⵎ ⵙⵙⴰ. ⵖⴰⵔ ⵓⵏⴻⴳⴳⴰⵔ ⵅⵎⵉ ⴽⴻⵏⵏⵉⵡ ⵖⴰ ⵢⴻⵊⵊ ⴰⴷ ⵜⵔⴰⵃⴻⵎ, ⴰⴷ ⵅⴰⵡⴻⵎ ⵢⴰⵥⵥⴻⵍ ⵙⵙⴰ ⵎⴰⵔⵔⴰ. 2 ⵙⵉⵡⴻⵍ ⵅⴻⵏⵏⵉ ⴷⴻⴳ ⵉⵎⴻⵥⵥⵓⵖⴻⵏ ⵏ ⵍⴳⴻⵏⵙ ⵎⴰⵃⴻⵏⴷ ⴰⴷ ⵉⵜⵜⴰⵔ ⴽⵓⵍ ⴰⵔⵢⴰⵥ ⵥⴻⴳ ⵡⴰⵊⵊⴰⵔ ⵏⵏⴻⵙ ⵓ ⴽⵓⵍ ⵜⴰⵎⵖⴰⵔⵜ ⵥⵉ ⵜⴰⵊⵊⴰⵔⵜ ⵏⵏⴻⵙ ⵍⴻⵇⵛⵓⵄ ⵏ ⵏⵏⵓⵇⴰⵔⵜ ⴷ ⵡⵓⵔⴻⵖ.” ■ 3 ⵙⵉⴷⵉ ⵉⵡⵛⴰ ⴰⵙ ⵉ ⵍⴳⴻⵏⵙ ⴰⵔⴹⴰ ⴷⵉ ⵜⵉⵟⵟⴰⵡⵉⵏ ⵏ ⵉⵎⵉⵚⵔⵉⵢⵢⴻⵏ. ⵄⴰⵡⴻⴷ ⵜⵓⵖⴰ ⵎⵓⵙⴰ ⴷ ⵉⵊⵊ ⵡⴻⵔⵢⴰⵥ ⵙ ⵛⵛⴰⵏ ⴰⵎⴻⵇⵇⵔⴰⵏ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ ⴷⵉ ⵜⵉⵟⵟⴰⵡⵉⵏ ⵏ ⵍⴳⴻⵏⵙ ⵓ ⴷⵉ ⵜⵉⵟⵟⴰⵡⵉⵏ ⵏ ⵉⵎⵙⴻⵅⵅⴰⵔⴻⵏ ⵏ ⴼⵉⵔⵄⵓⵏ. ■ 4 ⵉⵏⵏⴰ ⵎⵓⵙⴰ: “ⴰⵎⵎⵓ ⵉ ⵉⵏⵏⴰ ⵙⵉⴷⵉ: ‘ⵖⴰⵔ ⵡⴻⵥⵢⴻⵏ ⵏ ⴵⵉⵍⴻⵜ ⵏⴻⵛⵛ ⴰⴷ ⵄⴷⵓⵖ ⴷⵉ ⵍⵡⴻⵙⵜ ⵏ ⵎⵉⵚⵔⴰ ■ 5 ⵓⵛⴰ ⴰⴷ ⵉⵎⵎⴻⵜ ⴽⵓⵍ ⴰⵎⴻⵏⵥⵓ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ, ⵥⴻⴳ ⵓⵎⴻⵏⵥⵓ ⵏ ⴼⵉⵔⵄⵓⵏ, ⵡⴻⵏⵏⵉ ⵉⵇⵇⵉⵎⴻⵏ ⵅ ⵍⵄⴰⵔⵛ ⵏ ⵜⴳⴻⵍⴷⵉⵜ, ⴰⵍ ⴰⵎⴻⵏⵥⵓ ⵏ ⵜⴻⵙⵎⴻⵖⵜ, ⵜⴻⵏⵏⵉ ⵉⵇⵇⵉⵎⴻⵏ ⴰⵡⴰⵔⵏⵉ ⵉ ⵜⵙⵉⵔⵜ ⵜⵃⴰⵔⵔⵉ ⵉⵎⴻⵏⴷⵉ, ⵓⵍⴰ ⴷ ⴽⵓⵍ ⴰⵎⴻⵏⵥⵓ ⵥⵉ ⵍⴻⴱⵀⴰⵢⴻⵎ. ■ 6 ⴰⴷ ⴷⵉⵏ ⵜⵉⵍⵉ ⵉⵛⵜ ⵏ ⵜⵖⵓⵢⵢⵉⵜ ⴷ ⵜⴰⵎⴻⵇⵇⵔⴰⵏⵜ ⵅ ⵎⴰⵔⵔⴰ ⵜⴰⵎⵎⵓⵔⵜ ⵏ ⵎⵉⵚⵔⴰ ⵉ ⵡⴰⵔ ⵜⵓⵖⵉ ⵄⴻⵎⵎⴰⵔⵚ ⵏⵉⵖ ⵄⴻⵎⵎⴰⵔⵚ ⵄⴰⴷ ⴰⴷ ⵜⵉⵍⵉ. 7 ⵎⴰⵛⴰ ⵖⴰⵔ ⵎⴰⵔⵔⴰ ⴰⵢⵜ ⵏ ⵉⵙⵔⴰⵉⵍ, ⵡⴰⵔ ⵉⵙⵙⵄⵉⵡⵄⵉⵡ ⵓⵍⴰ ⴷ ⵉⵊⵊ ⵏ ⵡⴻⵇⵥⵉⵏ ⵅ ⵉⵡⴷⴰⵏ ⵓⵍⴰ ⵅ ⵍⵎⴰⵍ, ⵎⴰⵃⴻⵏⴷ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⵙⵉⴷⵉ ⵉⵜⵜⴻⴳⴳ ⵍⴼⴰⵔⵥ ⵊⴰⵔ ⵉⵎⵉⵚⵔⵉⵢⵢⴻⵏ ⴷ ⵉⵙⵔⴰⵉⵍ. 8 ⵅⴻⵏⵏⵉ ⴰⴷ ⵖⴰⵔⵉ ⴷⴷ-ⵀⵡⴰⵏ ⵎⴰⵔⵔⴰ ⵉⵎⵙⴻⵅⵅⴰⵔⴻⵏ ⵏⵏⴻⴽ, ⴰⴷ ⴰⴹⴰⵔⴻⵏ ⵥⵥⴰⵜⵉ, ⴰⴷ ⵉⵏⵉⵏ: ‘ⴼⴼⴻⵖ ⵛⴻⴽ ⴷ ⵎⴰⵔⵔⴰ ⵍⴳⴻⵏⵙ ⵉ ⵛⴻⴽ ⵉⴹⴻⴼⴼⴰⵔⴻⵏ ⴷⴻⴳ ⵉⵚⵓⵔⴰⴼ ⵏⵏⴻⴽ!’ ⴰⵡⴰⵔⵏⵉ ⵎⴰⵏ ⴰⵢⴰ ⵏⴻⵛⵛ ⴰⴷ ⴼⴼⵖⴻⵖ.” ⵓⵛⴰ ⵉⴼⴼⴻⵖ ⵅ ⴼⵉⵔⵄⵓⵏ, ⵜⴻⴽⴽⴰⵔ ⴷⴰⵢⴻⵙ ⵜⵎⴻⵙⵙⵉ ⵙ ⵓⵅⴻⵢⵢⴻⵇ.■ 9 ⴰⵇⴰ ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⴼⵉⵔⵄⵓⵏ ⵡⴰⵔ ⴷ ⴰⵡⴻⵎ ⵉⵜⵜⴻⵙⵍⵉ ⵛⴰ, ⵃⵉⵎⴰ ⴰⴷ ⵎⵎⴰⵔⴻⵏⵢⴻⵏⵜ ⵍⴻⵄⵍⴰⵎⴰⵜ ⵉⵏⵓ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ.”
10 ⴰⵇⴰ ⵎⵓⵙⴰ ⴷ ⵀⴰⵔⵓⵏ ⴳⴳⵉⵏ ⵎⴰⵔⵔⴰ ⵍⴻⵄⵍⴰⵎⴰⵜ-ⴰ ⵥⵥⴰⵜ ⵉ ⵡⵓⴷⴻⵎ ⵏ ⴼⵉⵔⵄⵓⵏ, ⵎⴰⵛⴰ ⵙⵉⴷⵉ ⵜⵓⵖⴰ ⵉⵙⵙⴻⵇⵙⴻⵃ ⵓⵍ ⵏ ⴼⵉⵔⵄⵓⵏ ⴰⵍⴰⵎⵉ ⵡⴰⵔ ⵉⵊⵊⵉ ⴰⴷ ⴼⴼⵖⴻⵏ ⴰⵢⵜ ⵏ ⵉⵙⵔⴰⵉⵍ ⵥⵉ ⵜⴻⵎⵎⵓⵔⵜ ⵏⵏⴻⵙ. ■