1 ⵍⴻⵅⴷⴻⵏⵏⵉ ⵉⵏⵏⴰ ⵙⵉⴷⵉ ⵉ ⵎⵓⵙⴰ: “ⵍⴻⵅⵅⵓ ⴰⴷ ⵜⵥⴰⵔⴻⴷ ⵎⵉⵏ ⵖⴰ ⴳⴳⴻⵖ ⵉ ⴼⵉⵔⵄⵓⵏ, ⵎⵉⵏⵥⵉ ⵙ ⵓⴼⵓⵙ ⵉⵊⴻⵀⴷⴻⵏ ⴰⴷ ⴰⵙⴻⵏ ⵢⴻⵊⵊ ⴰⴷ ⵔⴰⵃⴻⵏ, ⵡⴰⵀ, ⵙ ⵓⴼⵓⵙ ⵉⵊⴻⵀⴷⴻⵏ ⴰⴷ ⵅⴰⵙⴻⵏ ⵢⴰⵥⵥⴻⵍ ⵥⵉ ⵜⴻⵎⵎⵓⵔⵜ ⵏⵏⴻⵙ.” 2 ⵉⵙⵙⵉⵡⴻⵍ ⴰⵔⴻⴱⴱⵉ ⵖⴰⵔ ⵎⵓⵙⴰ, ⵉⵏⵏⴰ ⴰⵙ: “ⵏⴻⵛⵛ ⴷ ⵙⵉⴷⵉ, 3 ⵏⴻⵛⵛ ⴱⴰⵏⴻⵖ-ⴷⴷ ⵉ ⵉⴱⵔⴰⵀⵉⵎ, ⴷ ⵉⵙⵃⴰⵇ ⴷ ⵢⴰⵄⵇⵓⴱ ⴰⵎ ⴰⵔⴻⴱⴱⵉ, ⴰⵎⵥⴻⵎⵎⴰⵔ ⵅ ⴽⵓⵍⵛⵉ, ⵎⴰⵛⴰ ⵙ ⵢⵉⵙⴻⵎ ⵉⵏⵓ ‘ⵙⵉⴷⵉ’, ⵜⵓⵖⴰ ⵡⴰⵔ ⵖⴰⵔⵙⴻⵏ ⵜⵜⵡⴰⵙⵙⵏⴻⵖ ⵛⴰ. 4 ⵄⴰⵡⴻⴷ ⵙⵙⴳⴻⵄⵄⴷⴻⵖ ⵍⵄⴰⵀⴷ ⵉⵏⵓ ⴰⴽⵉⴷⵙⴻⵏ ⴰⵇⴰ ⴰⴷ ⴰⵙⴻⵏ ⵡⵛⴻⵖ ⵜⴰⵎⵎⵓⵔⵜ ⵏ ⴽⴻⵏⵄⴰⵏ, ⵜⴰⵎⵎⵓⵔⵜ ⵏ ⵓⵏⴻⵡⵊⵉ ⵏⵙⴻⵏ ⵎⴰⵏⵉ ⵜⴻⵏ ⵜⵓⵖⴰ ⴰⵎ ⵉⴱⴰⵔⵔⴰⵏⵉⵢⵢⴻⵏ. 5 ⵄⴰⵡⴻⴷ ⵏⴻⵛⵛ ⵙⵍⵉⵖ ⴰⵏⵉⵅⵙⴻⵙ ⵏ ⴰⵢⵜ ⵏ ⵉⵙⵔⴰⵉⵍ, ⵉⵏⵏⵉ ⵉⵜⵜⵡⴰⴳⴳⴻⵏ ⴷ ⵉⵙⴻⵎⵖⴰⵏ ⵥⴻⴳ ⵉⵎⵉⵚⵔⵉⵢⵢⴻⵏ, ⴰⵇⴰ ⵅⴰⵔⵔⵚⴻⵖ ⴷⵉ ⵍⵄⴰⵀⴷ ⵉⵏⵓ. 6 ⵙ ⵓⵢⴻⵏⵏⵉ ⴰⴷ ⵜⵉⵏⵉⴷ ⵉ ⴰⵢⵜ ⵏ ⵉⵙⵔⴰⵉⵍ: ‘ⵏⴻⵛⵛ ⴰⵇⴰ ⴰⵢⵉ ⴷ ⵙⵉⴷⵉ ⵓ ⵏⴻⵛⵛ ⴰⴷ ⴽⴻⵏⵏⵉⵡ ⵙⵙⵓⴼⴼⵖⴻⵖ ⵥⵉ ⵙⴰⴷⵓ ⵥⴰⵢⵍⵓ ⵏ ⵉⵎⵉⵚⵔⵉⵢⵢⴻⵏ. ⵏⴻⵛⵛ ⴰⴷ ⴽⴻⵏⵏⵉⵡ ⴼⴻⴽⴽⴻⵖ ⵥⵉ ⵜⴻⵙⵎⵓⵖⵉ ⵏⵙⴻⵏ, ⴰⴷ ⴽⴻⵏⵏⵉⵡ ⴼⴷⵉⵖ ⵙ ⵓⵖⵉⵍ ⵉⵙⵙⵡⵉⵥⵥⴹⴻⵏ ⴷ ⵍⴻⵃⴽⴰⵎⴰⵜ ⵉⵎⵖⴰⵔⴻⵏ. 7 ⴰⴷ ⴽⴻⵏⵏⵉⵡ ⵇⴻⴱⵍⴻⵖ ⴷ ⵍⴳⴻⵏⵙ ⵉⵏⵓ ⵓⵛⴰ ⴰⴷ ⴰⵡⴻⵎ ⵉⵍⵉⵖ ⴷ ⴰⵔⴻⴱⴱⵉ ⵓ ⴽⴻⵏⵏⵉⵡ ⴰⴷ ⵜⴻⵙⵙⵏⴻⵎ ⴱⴻⵍⵍⵉ ⵏⴻⵛⵛ ⴷ ⵙⵉⴷⵉ, ⴰⵔⴻⴱⴱⵉ ⵏⵡⴻⵎ, ⴷ ⵡⴻⵏⵏⵉ ⵜⵓⵖⴰ ⴽⴻⵏⵏⵉⵡ ⵉⵙⵙⵓⴼⴼⵓⵖⴻⵏ ⵥⵉ ⵙⴰⴷⵓ ⵥⴰⵢⵍⵓ ⵏ ⵉⵎⵉⵚⵔⵉⵢⵢⴻⵏ. 8 ⴰⴷ ⴽⴻⵏⵏⵉⵡ ⵙⵙⵉⴷⴼⴻⵖ ⵖⴰⵔ ⵜⴻⵎⵎⵓⵔⵜ ⵎⵉⵅⴻⴼ ⵙⵙⴳⴻⵄⵄⴷⴻⵖ ⴰⴼⵓⵙ ⵉⵏⵓ ⵎⴰⵃⴻⵏⴷ ⴰⴷ ⵜⵜ ⵡⵛⴻⵖ ⵉ ⵉⴱⵔⴰⵀⵉⵎ ⴷ ⵉⵙⵃⴰⵇ ⴷ ⵢⴰⵄⵇⵓⴱ ⵓ ⵏⴻⵛⵛ ⴰⴷ ⴰⵡⴻⵎ ⵜⵜ ⵡⵛⴻⵖ ⴷ ⵍⵡⴰⵔⵜ, ⵏⴻⵛⵛ ⴷ ⵙⵉⴷⵉ!” ^□   9 ⴰⵎⵎⵓ ⵉ ⵉⵙⵙⵉⵡⴻⵍ ⵎⵓⵙⴰ ⴰⴽ-ⴷ ⴰⵢⵜ ⵏ ⵉⵙⵔⴰⵉⵍ, ⵎⴰⵛⴰ ⵏⵉⵜⵏⵉ ⵡⴰⵔ ⵙⵍⵉⵏ ⵛⴰ ⵖⴰⵔ ⵎⵓⵙⴰ ⵥⵉ ⵙⵙⵉⴱⴱⴻⵜ ⵏ ⵍⴻⵃⵚⴰⵔⴻⵜ ⵏ ⵜⵏⴻⴼⵙⴻⵛⵜ ⴷ ⵜⴰⵙⵎⵓⵖⵉ ⵉⵇⴻⵙⵃⴻⵏ.

10 ⵓⵛⴰ ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ:

11 “ⴰⴷⴻⴼ ⵖⴰⵔ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ, ⵜⵉⵏⵉⴷ ⴰⵙ ⴰⴷ ⵉⴹⵍⴻⵇ ⵉ ⴰⵢⵜ ⵏ ⵉⵙⵔⴰⵉⵍ ⴰⴷ ⴼⴼⵖⴻⵏ ⵥⵉ ⵜⴻⵎⵎⵓⵔⵜ ⵏⵏⴻⵙ.”

12 ⵎⴰⵛⴰ ⵎⵓⵙⴰ ⵉⵙⵙⵉⵡⴻⵍ ⵥⵥⴰⵜ ⵉ ⵙⵉⴷⵉ, ⵉⵏⵏⴰ: “ⵅⵥⴰⵔ, ⴰⵢⵜ ⵏ ⵉⵙⵔⴰⵉⵍ ⵡⴰⵔ ⵖⴰⵔⵉ ⴷⴷ-ⵙⵍⵉⵏ, ⵎⴰⵎⵎⴻⵛ ⵉ ⴷ ⴰⵢⵉ ⵖⴰ ⵉⵙⴻⵍ ⴼⵉⵔⵄⵓⵏ ⵓ ⵏⴻⵛⵛ ⴰⵇⴰ ⵖⴰⵔⵉ ⵉⵢⴻⵏⵛⵉⵛⴻⵏ ⵡⴰⵔ ⵉⵜⵜⵡⴰⵅⴻⵜⵏⴻⵏ.” ^□  

13 ⵍⴻⵅⴷⴻⵏⵏⵉ ⵉⵙⵙⵉⵡⴻⵍ ⵙⵉⴷⵉ ⵖⴰⵔ ⵎⵓⵙⴰ ⴷ ⵀⴰⵔⵓⵏ ⵓⵛⴰ ⵢⵓⵎⵓⵔ ⵉ-ⵜⴻⵏ ⴰⴷ ⵓⵢⵓⵔⴻⵏ ⵖⴰⵔ ⴰⵢⵜ ⵏ ⵉⵙⵔⴰⵉⵍ ⴷ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ, ⵃⵉⵎⴰ ⴰⴷ ⵉⵙⵙⵓⴼⴼⴻⵖ ⴰⵢⵜ ⵏ ⵉⵙⵔⴰⵉⵍ ⵥⵉ ⵜⴻⵎⵎⵓⵔⵜ ⵏ ⵎⵉⵚⵔⴰ.

14 ⵉⵏⴰ ⴷ ⵉⵥⴻⴵⵉⴼⴻⵏ ⵅ ⵍⴰⴵⴰⵜ ⵥⵉ ⵜⴰⴷⴷⴰⵔⵜ ⵏ ⵉⴱⴰⴱⴰⵜⴻⵏ ⵏⵙⴻⵏ.

ⵜⴰⵔⵡⴰ ⵏ ⵔⵓⴱⵉⵏ, ⴰⵎⴻⵏⵥⵓ ⵏ ⵉⵙⵔⴰⵉⵍ, ⵏⵉⵜⵏⵉ ⴷ ⵀⴰⵏⵓⴽ ⴷ ⴼⴰⵍⵍⵓ, ⵃⴰⵚⵔⵓⵏ ⴷ ⴽⴰⵔⵎⵉ. ⴷ ⵢⵉⵏⴰ ⴷ ⵍⴰⴵⴰⵜ ⵏ ⵔⵓⴱⵉⵏ. ^■  

15 ⵜⴰⵔⵡⴰ ⵏ ⵛⵉⵎⵄⵓⵏ ⵜⵓⵖⴰ ⴰⵜⴻⵏ ⴷ ⵢⴰⵎⵓⵢⵉⵍ ⴷ ⵢⴰⵎⵉⵏ ⴷ ⵓⵀⴰⴷ ⴷ ⵢⴰⴽⵉⵏ ⴷ ⵚⵓⵃⴰⵔ ⴷ ⵛⴰⵡⵓⵍ, ⵎⵎⵉ ⵏ ⵉⵛⵜ ⵏ ⵜⴻⵎⵖⴰⵔⵜ ⵜⴰⴽⴻⵏⵄⴰⵏⵉⵜ. ⵉⵏⴰ ⴷ ⵍⴰⴵⴰⵜ ⵏ ⵛⵉⵎⵄⵓⵏ. ^■  

16 ⵉⵏⴰ ⴷ ⵉⵙⵎⴰⵡⴻⵏ ⵏ ⵜⴰⵔⵡⴰ ⵏ ⵍⴰⵡⵉ ⵄⵍⴰⵃⵙⴰⴱ ⴰⵙⴻⵜⵜⴻⴼ ⵏ ⵡⴻⵅⵍⴰⵇ ⵏⵙⴻⵏ: ⵜⵓⵖⴰ ⴰⵜⴻⵏ ⴷ ⵊⴰⵔⵛⵓⵎ ⴷ ⵇⴰⵀⴰⵜ ⴷ ⵎⴰⵔⴰⵔⵉ. ⵜⵓⵖⴰ ⵍⵎⵉⵊⴰⵍ ⵏ ⵜⵓⴷⴰⵔⵜ ⵏ ⵍⴰⵡⵉ ⵎⵢⴰ ⵓ-ⵙⴻⴱⵄⴰ ⵓ-ⵜⵍⴰⵜⵉⵏ ⵏ ⵉⵙⴻⴳⴳⵯⵓⵙⴰ. ^■  

17 ⵜⴰⵔⵡⴰ ⵏ ⵊⴰⵔⵛⵓⵎ ⵜⵓⵖⴰ ⴰⵜⴻⵏ ⴷ ⵍⵉⴱⵏⴰ ⴷ ⵛⵉⵎⵄⵉ ⵄⵍⴰⵃⵙⴰⴱ ⵍⴰⴵⴰⵜ ⵏⵙⴻⵏ. ^■  

18 ⵜⴰⵔⵡⴰ ⵏ ⵇⴰⵀⴰⵜ ⵜⵓⵖⴰ ⴰⵜⴻⵏ ⴷ ⵄⴰⵎⵔⴰⵎ ⴷ ⵢⵉⵚⵀⴰⵔ ⴷ ⵃⴰⴱⵔⵓⵏ ⴷ ⵄⵓⵥⵥⵉⵢⵉⵍ. ⵜⵓⵖⴰ ⵍⵎⵉⵊⴰⵍ ⵏ ⵜⵓⴷⴰⵔⵜ ⵏ ⵇⴰⵀⴰⵜ ⵎⵢⴰ ⵓ-ⵜⵍⴰⵜⴰ ⵓ-ⵜⵍⴰⵜⵉⵏ ⵏ ⵉⵙⴻⴳⴳⵯⵓⵙⴰ. ^■  

19 ⵜⴰⵔⵡⴰ ⵏ ⵎⴰⵔⴰⵔⵉ ⵜⵓⵖⴰ ⴰⵜⴻⵏ ⴷ ⵎⴰⵃⵍⵉ ⴷ ⵎⵓⵛⵉ. ⵉⵏⴰ ⴷ ⵍⴰⴵⴰⵜ ⵏ ⵍⴰⵡⵉ ⵄⵍⴰⵃⵙⴰⴱ ⴰⵙⴻⵜⵜⴻⴼ ⵏ ⵡⴻⵅⵍⴰⵇ ⵏⵙⴻⵏ. ^■  

20 ⵓⵛⴰ ⵄⴰⵎⵔⴰⵎ ⵉⴽⵙⵉ ⵢⵓⴽⴰⴱⴰⴷ, ⵄⴻⵏⵜⵉⵙ, ⴷ ⵜⴰⵎⵖⴰⵔⵜ ⵉ ⵢⵉⵅⴻⴼ ⵏⵏⴻⵙ ⵓ ⵏⴻⵜⵜⴰⵜ ⵜⵓⵔⵓⵡ ⴰⵙ-ⴷⴷ ⵀⴰⵔⵓⵏ ⴷ ⵎⵓⵙⴰ. ⵜⵓⵖⴰ ⵍⵎⵉⵊⴰⵍ ⵏ ⵜⵓⴷⴰⵔⵜ ⵏ ⵄⴰⵎⵔⴰⵎ ⵎⵢⴰ ⵓ-ⵙⴻⴱⵄⴰ ⵓ-ⵜⵍⴰⵜⵉⵏ ⵏ ⵉⵙⴻⴳⴳⵯⵓⵙⴰ. ^■  

21 ⵜⴰⵔⵡⴰ ⵏ ⵢⵉⵚⵀⴰⵔ ⵜⵓⵖⴰ ⴰⵜⴻⵏ ⴷ ⵇⵓⵔⴰⵃ ⴷ ⵏⴰⴼⴰⵊ ⴷ ⴷⵉⴽⵔⵉ.

22 ⵜⴰⵔⵡⴰ ⵏ ⵄⵓⵥⵥⵉⵢⵉⵍ ⵜⵓⵖⴰ ⴰⵜⴻⵏ ⴷ ⵎⵉⵛⴰⵢⵉⵍ ⴷ ⴰⵍⵚⴰⴼⴰⵏ ⴷ ⵙⵉⵜⵔⵉ.

23 ⵓⵛⴰ ⵉⴽⵙⵉ ⵀⴰⵔⵓⵏ ⵉⵍⵉⵛⴰⴱⴰⵄ, ⵢⴻⴵⵉⵙ ⵏ ⵄⴰⵎⵎⵉⵏⴰⴷⴰⴱ, ⵓⵞⵎⴰⵙ ⵏ ⵏⴰⵃⵛⵓⵏ, ⴷ ⵜⴰⵎⵖⴰⵔⵜ ⵉ ⵢⵉⵅⴻⴼ ⵏⵏⴻⵙ ⵓ ⵏⴻⵜⵜⴰⵜ ⵜⵓⵔⵓⵡ ⴰⵙ-ⴷⴷ ⵏⴰⴷⴰⴱ ⴷ ⴰⴱⵉⵀⵓ ⴷ ⴰⵍⵉⵄⴰⵥⴰⵔ ⴷ ⵉⵜⴰⵎⴰⵔ. ^■  

24 ⵜⴰⵔⵡⴰ ⵏ ⵇⵓⵔⴰⵃ ⵜⵓⵖⴰ ⴰⵜⴻⵏ ⴷ ⴰⵙⵙⵉⵔ ⴷ ⴰⵍⵇⴰⵏⴰ ⴷ ⴰⴱⵉⵢⴰⵙⴰⴼ. ⵉⵏⴰ ⴷ ⵍⴰⴵⴰⵜ ⵏ ⵉⵇⵓⵔⴰⵃⵉⵢⵢⴻⵏ.

25 ⵓⵛⴰ ⴰⵍⵉⵄⴰⵥⴰⵔ, ⵎⵎⵉⵙ ⵏ ⵀⴰⵔⵓⵏ, ⵉⴽⵙⵉ ⵉⵛⵜⴻⵏ ⵥⴻⴳ ⵢⴻⵙⵙⵉⵙ ⵏ ⴼⵓⵜⵉⵢⵉⵍ ⴷ ⵜⴰⵎⵖⴰⵔⵜ ⵉ ⵢⵉⵅⴻⴼ ⵏⵏⴻⵙ ⵓⵛⴰ ⵏⴻⵜⵜⴰⵜ ⵜⵓⵔⵓⵡ ⴰⵙ-ⴷⴷ ⴼⵉⵏⴰⵃⴰⵙ. ⵉⵏⴰ ⴷ ⵉⵥⴻⴵⵉⴼⴻⵏ ⵏ ⵉⴱⴰⴱⴰⵜⴻⵏ ⵏ ⵉⵍⴰⵡⵉⵢⵢⴻⵏ ⵄⵍⴰⵃⵙⴰⴱ ⵍⴰⴵⴰⵜ ⵏⵙⴻⵏ.

26 ⴰⵇⴰ ⵉ ⵀⴰⵔⵓⵏ ⴷ ⵎⵓⵙⴰ ⵉ ⵓⵎⵉ ⵉⵏⵏⴰ ⵙⵉⴷⵉ: “ⵙⵓⴼⴼⵖⴻⵎ ⴰⵢⵜ ⵏ ⵉⵙⵔⴰⵉⵍ ⵥⵉ ⵜⴻⵎⵎⵓⵔⵜ ⵏ ⵎⵉⵚⵔⴰ ⵜⵜⵡⴰⵙⴻⵜⵜⴼⴻⵏ ⵄⵍⴰⵃⵙⴰⴱ ⵉⵙⴻⴷⴷⵉⵢⵢⴻⵏ ⵏ ⵍⵄⴻⵙⴽⴰⵔ ⵏⵙⴻⵏ.” 27 ⵉⵏⴰ ⴷ ⵉⵏⵏⵉ ⵉⵙⵙⵉⵡⵍⴻⵏ ⴰⴽ-ⴷ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ, ⵃⵉⵎⴰ ⴰⴷ ⵙⵙⵓⴼⴼⵖⴻⵏ ⴰⵢⵜ ⵏ ⵉⵙⵔⴰⵉⵍ ⵥⵉ ⵎⵉⵚⵔⴰ, ⵎⵓⵙⴰ ⴷ ⵀⴰⵔⵓⵏ ⵏⵉⵜⵏⵉ ⴷ ⵉⵏⴰ. 28 ⵜⵓⵖⴰ ⴷⴻⴳ ⵡⴰⵙⵙ ⵉ ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ ⴷⵉ ⵜⴻⵎⵎⵓⵔⵜ ⵏ ⵎⵉⵚⵔⴰ. 29 ⴰⵇⴰ ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ, ⵉⵏⵏⴰ: “ⵏⴻⵛⵛ ⴷ ⵙⵉⴷⵉ ⵉ ⴵⵉⵖ! ⵎⴰⵔⵔⴰ ⵎⵉⵏ ⴷ ⴰⵛ ⵇⵇⴰⵔⴻⵖ, ⵉⵏⵉ ⵜ ⵉ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ.” 30 ⵅⴻⵏⵏⵉ ⵉⵏⵏⴰ ⵎⵓⵙⴰ ⵥⵥⴰⵜ ⵉ ⵙⵉⴷⵉ: “ⴰⵇⴰ ⵖⴰⵔⵉ ⵏⴻⵛⵛ ⵉⵢⴻⵏⵛⵉⵛⴻⵏ ⵡⴰⵔ ⵉⵜⵜⵡⴰⵅⴻⵜⵏⴻⵏ, ⵎⴰⵎⵎⴻⵛ ⵉ ⵖⴰ ⵢⴻⴳⴳ ⵅⴻⵏⵏⵉ ⴰⴷ ⵖⴰⵔⵉ ⵉⵙⴻⴵ ⴼⵉⵔⵄⵓⵏ?” ^□  ■