ⵀⴰⵊⴰⵔ ⴷ ⵉⵙⵎⴰⵄⵉⵍ
16
1 ⵙⴰⵔⴰⵢ, ⵜⴰⵎⵖⴰⵔⵜ ⵏ ⴰⴱⵔⴰⵎ, ⵡⴰⵔ ⴷ ⴰⵙ ⴷⴷ-ⵜⵉⵔⵓⵡ ⵛⴰ. ⵜⵓⵖⴰ ⵖⴰⵔⴻⵙ ⵉⵛⵜ ⵏ ⵜⴰⵢⵢⴰ ⵥⵉ ⵎⵉⵚⵔⴰ ⵇⵇⴰⵔⴻⵏⵜ ⴰⵙ ⵀⴰⵊⴰⵔ. 2 ⵜⴻⵏⵏⴰ, ⵅⴻⵏⵏⵉ, ⵙⴰⵔⴰⵢ ⵉ ⴰⴱⵔⴰⵎ: “ⴰⵇⴰ ⵜⴻⵥⵔⵉⴷ ⴱⴻⵍⵍⵉ ⵙⵉⴷⵉ ⵉⵟⵟⴻⴼ ⵅⴰⴼⵉ ⵜⴰⵔⵡⴰ. ⴰⴷⴻⴼ ⵖⴰⵔ ⵜⴰⵢⵢⴰ ⵉⵏⵓ, ⴱⴰⵍⴰⴽ ⴰⴷ ⵥⵥⴰⵢⴻⵙ ⴽⵙⵉⵖ ⵜⴰⵔⵡⴰ.” ⴰⴱⵔⴰⵎ ⵜⵓⵖⴰ ⵉⵙⵙⵃⴻⵙⵙⴰ ⵖⴰⵔ ⵙⴰⵔⴰⵢ. □ 3 ⴰⵡⴰⵔⵏⵉ ⵍⴰⵎⵉ ⵉⵥⴷⴻⵖ ⴰⴱⵔⴰⵎ ⵄⴻⵛⵔⴰ ⵏ ⵉⵙⴻⴳⴳⵯⵓⵙⴰ ⴷⵉ ⵜⴻⵎⵎⵓⵔⵜ ⵏ ⴽⴻⵏⵄⴰⵏ, ⵜⵉⵡⵉ-ⴷⴷ ⵙⴰⵔⴰⵢ, ⵜⴰⵎⵖⴰⵔⵜ ⵏ ⴰⴱⵔⴰⵎ, ⵜⴰⵢⵢⴰ ⵏⵏⴻⵙ ⵀⴰⵊⴰⵔ, ⵜⴻⵏⵏⵉ ⵥⵉ ⵎⵉⵚⵔⴰ, ⵓⵛⴰ ⵜⴻⵡⵛⴰ ⴰⵙ-ⴷⴷ ⵉ ⴰⴱⵔⴰⵎ, ⴰⵔⵢⴰⵥ ⵏⵏⴻⵙ, ⴷ ⵜⴰⵎⵖⴰⵔⵜ ⵏⵏⴻⵙ. 4 ⵢⵓⴷⴻⴼ ⵅ ⵀⴰⵊⴰⵔ ⵓⵛⴰ ⵏⴻⵜⵜⴰⵜ ⵜⴻⴽⵙⵉ ⴷⴷⴻⵢⵙⴻⵜ. ⵓⵎⵉ ⵜⴻⵥⵔⴰ ⴱⴻⵍⵍⵉ ⵜⴻⴽⵙⵉ ⴷⴷⴻⵢⵙⴻⵜ, ⵅⴻⵏⵏⵉ ⵜⴻⴷⵡⴻⵍ ⵍⴰⵍⵍⴰⵙ ⵜᵉⵜⵜⵡⴰⵙⵙⴻⵃⵇⴰⵔ ⴷⵉ ⵜⵉⵟⵟⴰⵡⵉⵏ ⵏⵏⴻⵙ. 5 ⵜⴻⵏⵏⴰ ⵙⴰⵔⴰⵢ ⵉ ⴰⴱⵔⴰⵎ: “ⵣⵉ ⵙⵙⵉⴱⴱⴻⵜ ⵏⵏⴻⴽ ⴳⴳⵉⵏ ⴷⴰⵢⵉ ⵍⵎⵓⵏⴽⴰⵔ. ⵏⴻⵛⵛ ⴳⴳⵉⵖ ⵜⴰⵢⵢⴰ ⵉⵏⵓ ⴷⴻⴳ ⵡⴻⵃⵙⵉⵏ ⵏⵏⴻⴽ. ⵓⵎⵉ ⵜⴻⵥⵔⴰ ⴱⴻⵍⵍⵉ ⵜⴻⴽⵙⵉ ⴷⴷⴻⵢⵙⴻⵜ, ⴷⴻⵡⵍⴻⵖ ⴷ ⵜⴰⵎⴻⵃⴳⵓⵔⴻⵜ ⴷⵉ ⵜⵉⵟⵟⴰⵡⵉⵏ ⵏⵏⴻⵙ. ⴻⵊⵊ ⴰⴷ ⵉⵃⴽⴻⵎ ⵙⵉⴷⵉ ⵊⴰⵔ ⴰⵢⵉ ⴷ ⵛⴻⴽ!” 6 ⵉⵏⵏⴰ ⴰⴱⵔⴰⵎ ⵉ ⵙⴰⵔⴰⵢ: “ⵅⵥⴰⵔ, ⵜⴰⵢⵢⴰ ⵏⵏⴻⵎ ⴷⴻⴳ ⵉⴼⴰⵙⵙⴻⵏ ⵏⵏⴻⵎ. ⴻⴳⴳ ⵥⵥⴰⵢⴻⵙ ⵎⵉⵏ ⵜᵉⵜⵜⵡⴰⵍⵉⴷ ⵛⴻⵎ ⵎⵍⵉⵃ.” ⵓⵛⴰ ⵙⴰⵔⴰⵢ ⵜⵇⴻⵎⵎⴻⵄ ⵉ-ⵜⵜ ⵓ ⵅⴻⵏⵏⵉ ⵏⴻⵜⵜⴰⵜ ⵜⴰⵔⵡⴻⵍ ⵥⵥⴰⵢⴻⵙ. 7 ⵓⵛⴰ ⵍⵎⴰⵍⴰⴽ ⵏ ⵙⵉⴷⵉ ⵉⵍⵇⴰ ⵉ-ⵜⵜ ⵖⴰⵔ ⵜⴰⵍⴰ ⵏ ⵡⴰⵎⴰⵏ ⴷⵉ ⵍⴻⵅⵍⴰ, ⵖⴰⵔ ⵜⴰⵍⴰ ⴷⴻⴳ ⵡⴻⴱⵔⵉⴷ ⵉⵜⵜⴰⵡⵢⴻⵏ ⵖⴰⵔ ⵛⵓⵔ. □ 8 ⵉⵏⵏⴰ: “ⵀⴰⵊⴰⵔ, ⵜⴰⵢⵢⴰ ⵏ ⵙⴰⵔⴰⵢ, ⵎⴰⵏⵉⵙ ⴷⴷ-ⵜⵓⵙⵉⴷ ⵓ ⵎⴰⵏⵉ ⵉ ⵖⴰ ⵜⵔⴰⵃⴻⴷ?” ⵏⴻⵜⵜⴰⵜ ⵜⴻⵏⵏⴰ: “ⵜⵔⴰⴽⴽⵡⴰⵍⴻⵖ ⵥⴻⴳ ⵡⵓⴷⴻⵎ ⵏ ⵍⴰⵍⵍⴰ ⵙⴰⵔⴰⵢ!” 9 ⵅⴻⵏⵏⵉ ⵉⵏⵏⴰ ⴰⵙ ⵍⵎⴰⵍⴰⴽ ⵏ ⵙⵉⴷⵉ: “ⴷⵡⴻⵍ ⵖⴰⵔ ⵍⴰⵍⵍⴰⵎ, ⵓⴹⴰⵔ ⵙⴰⴷⵓ ⵉⴼⴰⵙⵙⴻⵏ ⵏⵏⴻⵙ.”
10 ⵉⵏⵏⴰ ⴰⵙ ⵄⴰⵡⴻⴷ ⵍⵎⴰⵍⴰⴽ ⵏ ⵙⵉⴷⵉ: “ⴰⴷ ⴽⴻⵜⵜⴰⵔⴻⵖ ⴰⵟⵟⴰⵙ ⵥⵥⴰⵔⵉⵄⴻⵜ ⵏⵏⴻⵎ, ⴰⵍ ⵡⴰⵔ ⵉⵥⴻⵎⵎⴰⵔ ⴰⴷ ⵜⴻⵏ ⵃⴻⵙⴱⴻⵏ ⵍⴰⵎⵉ ⵉ ⵖⴰ ⵢⵉⵍⵉⵏ ⴷⴻⴳ ⵡⴰⵟⵟⴰⵙ.”
11 ⵉⵏⵏⴰ ⴰⵙ ⵍⵎⴰⵍⴰⴽ ⵏ ⵙⵉⴷⵉ ⵄⴰⵡⴻⴷ: “ⴰⵇⴰ ⵍⴻⵅⵅⵓ, ⵜⴻⴽⵙⵉⴷ ⴷⴷⴻⵢⵙⴻⵜ ⵓⵛⴰ ⴰⴷ ⵜⴰⵔⵡⴻⴷ ⴰⵙⴻⵢⵎⵉ. ⴰⴷ ⴰⵙ ⵜⴻⴳⴳⴻⴷ ⵉⵙⵎⴰⵄⵉⵍ, ⵎⵉⵏⵥⵉ ⵙⵉⴷⵉ ⵉⵙⵍⴰ ⴰⵎ ⴷⵉ ⵍⴻⵎⵃⴰⵢⴻⵏ ⵏⵏⴻⵎ. □
12 ⵓⵛⴰ ⵏⴻⵜⵜⴰ ⴰⴷ ⵢⵉⵍⵉ ⴷ ⵉⵊⵊ ⵏ ⴱⵏⴰⴷⴻⵎ ⴰⵎⴻⵛⵏⴰⵡ ⴰⵙⵏⵓⵙ ⵏ ⵍⴻⵅⵍⴰ. ⴰⴼⵓⵙ ⵏⵏⴻⵙ ⴰⴷ ⵢⵉⵍⵉ ⵅ ⵎⴰⵔⵔⴰ, ⵓ ⴰⴼⵓⵙ ⵏ ⵎⴰⵔⵔⴰ ⴰⴷ ⵢⵉⵍⵉ ⵅⴰⵙ. ⴰⴷ ⵉⵥⴷⴻⵖ ⴰⵔⴻⵏⴷⴰⴷ ⵏ ⵎⴰⵔⵔⴰ ⴰⵢⵜⵎⴰⵙ.” ■
13 ⵓ ⵏⴻⵜⵜⴰⵜ ⵜⵍⴰⵖⴰ ⵅ ⵢⵉⵙⴻⵎ ⵏ ⵙⵉⴷⵉ ⵉ ⵖⴰⵔⴻⵙ-ⴷⴷ ⵉⵙⵙⵉⵡⵍⴻⵏ, ⵜⴻⵏⵏⴰ: “ⵛⴻⴽ ⴷ ⴰⵔⴻⴱⴱⵉ ⵉ ⵉⵜⵜⵡⴰⵍⴰⵏ!”, ⵎⵉⵏⵥⵉ ⵜⴻⵏⵏⴰ: “ⵎⴰ ⵡⴰⵔ ⴷⴰ ⵥⵔⵉⵖ ⵡⴻⵏⵏⵉ ⴷ ⴰⵢⵉ ⵉⵜⵜⵡⴰⵍⴰⵏ?”
14 ⵙ ⵓⵢⴰ ⵙⴻⵎⵎⴰⵏ ⴰⵏⵓ ⵏⵏⵉ: ⴰⵏⵓ ‘ⵍⴰⵃⴰⵢ-ⵔⵓ’ⵉ’. ⵅⵥⴰⵔ, ⴰⵇⴰ-ⵜ ⵊⴰⵔ ⵇⴰⴷⴰⵛ ⴷ ⴱⴰⵔⴰⴷ. □ ■
15 ⵓⵛⴰ ⵜⵓⵔⵓⵡ-ⴷⴷ ⵀⴰⵊⴰⵔ ⵉ ⴰⴱⵔⴰⵎ ⴰⵙⴻⵢⵎⵉ. ⵉⴳⴳⴰ ⴰⵙ ⴰⴱⵔⴰⵎ ⵉⵙⴻⵎ ⵏ ⵎⵎⵉⵙ ⵏⵏⵉ ⵉ ⴷ ⴰⵙ ⴷⴷ-ⵜⵓⵔⵓⵡ ⵀⴰⵊⴰⵔ, ⵉⵙⵎⴰⵄⵉⵍ. ■
16 ⴰⴱⵔⴰⵎ ⵜⵓⵖⴰ ⵖⴰⵔⴻⵙ ⵙⴻⵜⵜⴰ ⵓ-ⵜⵎⴰⵏⵢⵉⵏ ⵏ ⵉⵙⴻⴳⴳⵯⵓⵙⴰ, ⵓⵎⵉ ⴷⴷ-ⵜⵓⵔⵓⵡ ⵀⴰⵊⴰⵔ ⵉⵙⵎⴰⵄⵉⵍ ⵉ ⴰⴱⵔⴰⵎ.