1 ⴰⵡⴰⵔⵏⵉ ⵎⴰⵏ ⴰⵢⴰ ⵢⵓⵙⴰ-ⴷⴷ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⴰⴱⵔⴰⵎ ⴷⵉ ⵜⵎⴻⵥⵔⵉⵡⵜ. ⵉⵏⵏⴰ ⴰⵙ “ⵡⴰⵔ ⵜⵜⴻⴳⴳⵯⴻⴷ ⵛⴰ, ⴰⴱⵔⴰⵎ, ⵏⴻⵛⵛ ⴷ ⴰⵙⴻⵍⵇⵉ ⵉ ⵛⴻⴽ, ⵍⵎⵓⵏⴻⵜ ⵏⵏⴻⴽ ⵜⴻⵎⵖⴰⵔ ⴰⵟⵟⴰⵙ ⴷ ⵏⴻⵛⵛ.” ^■   2 ⵓⵛⴰ ⵉⵏⵏⴰ ⴰⴱⵔⴰⵎ: “ⵙⵉⴷⵉ ⵉⵏⵓ, ⵙⵉⴷⵉ, ⵎⵉⵏ ⴷ ⴰⵢⵉ ⵖⴰ ⵜⴻⵡⵛⴻⴷ, ⵎⴰⵖⴰⵔ ⵏⴻⵛⵛ ⴰⴷ ⵔⴰⵃⴻⵖ ⴰⵎⵎⵓ ⴱⵍⴰ ⵎⵎⵉ ⵓ ⴰⵍⵉⵄⴰⵥⵉⵔ ⵥⵉ ⴷⵉⵎⴰⵛⵇ ⴰⴷ ⵢⵉⵍⵉ ⴰⵎⴻⵛⵏⴰⵡ ‘ⵎⵎⵉ’ ⵅ ⵡⴰⴳⵍⴰ ⵏ ⵜⴰⴷⴷⴰⵔⵜ ⵉⵏⵓ?” ^□   3 ⵉⵏⵏⴰ ⴰⴱⵔⴰⵎ ⵄⴰⵡⴻⴷ: “ⵅⵥⴰⵔ, ⵡⴰⵔ ⴷ ⴰⵢⵉ ⵜⴻⵡⵛⵉⴷ ⵥⵥⴰⵔⵉⵄⴻⵜ, ⵙ ⵓⵢⴻⵏⵏⵉ, ⵡⴻⵏⵏⵉ ⵉⴵⴰⵏ ⴰⵎⴻⵛⵏⴰⵡ ⵎⵎⵉ ⵏ ⵜⴰⴷⴷⴰⵔⵜ ⵉⵏⵓ, ⴰⴷ ⵢⵉⵍⵉ ⴷ ⴰⵡⵔⵉⵜ ⵉⵏⵓ!” ^□   4 ⵓⵛⴰ ⵅⵥⴰⵔ, ⴰⵡⴰⵍ ⵏ ⵙⵉⴷⵉ ⵢⵓⵙⴰ-ⴷⴷ ⵖⴰⵔⴻⵙ, ⵉⵏⵏⴰ: “ⵡⴰⵔ ⵛⴻⴽ ⵉⵡⴰⵔⵔⴻⵜ ⵛⴰ ⵡⴰ, ⵎⴰⵛⴰ ⵡⴻⵏⵏⵉ ⵉ ⵖⴰ ⵉⴼⴼⵖⴻⵏ ⵥⵥⴰⵢⴻⴽ ⴰⴷ ⵢⵉⵍⵉ ⴷ ⴰⵡⵔⵉⵜ ⵏⵏⴻⴽ.” 5 ⵉⵙⵙⵓⴼⴼⴻⵖ ⵉ-ⵜ ⵖⴰⵔ ⴱⴰⵔⵔⴰ, ⵉⵏⵏⴰ: “ⵅⵥⴰⵔ ⵖⴰⵔ ⵓⵊⴻⵏⵏⴰ, ⵜⵃⴻⵙⴱⴻⴷ ⵉⵜⵔⴰⵏ, ⵎⴰⵍⴰ ⵜⵥⴻⵎⵎⴰⵔⴻⴷ ⴰⴷ ⵜⴻⵏ ⵜⵃⴻⵙⴱⴻⴷ!” ⵓⵛⴰ ⵉⵏⵏⴰ ⴰⵙ: “ⴰⵎⵎⵓ ⵉ ⵖⴰ ⵜⵉⵍⵉ ⵥⵥⴰⵔⵉⵄⴻⵜ ⵏⵏⴻⴽ.” ^■   6 ⵏⴻⵜⵜⴰ ⵢⵓⵎⴻⵏ ⴷⵉ ⵙⵉⴷⵉ ⵓⵛⴰ ⵉⵃⵙⴻⴱ ⴰⵙ ⵜ-ⵉ-ⴷⴷ ⴷ ⵜⴰⵙⴻⴳⴷⴰ. ^□  ■  

7 ⵉⵏⵏⴰ ⴰⵙ ⵄⴰⵡⴻⴷ: “ⵏⴻⵛⵛ ⴷ ⵙⵉⴷⵉ, ⵡⴻⵏⵏⵉ ⵛⴻⴽ ⴷⴷ-ⵢⵉⵡⵢⴻⵏ ⵥⵉ ⵓⵔ ⵏ ⵉⴽⴰⵍⴷⴰⵏⵉⵢⵢⴻⵏ, ⵃⵉⵎⴰ ⴰⴷ ⴰⵛ ⵡⵛⴻⵖ ⵜⴰⵎⵎⵓⵔⵜ-ⴰ ⴷ ⵍⵡⴰⵔⵜ.” ^■   8 ⵏⴻⵜⵜⴰ ⵉⵏⵏⴰ: “ⵙⵉⴷⵉ ⵉⵏⵓ, ⵙⵉⴷⵉ, ⵙ ⵎⵉⵏⵥⵉ ⵉ ⵖⴰ ⵙⵙⵏⴻⵖ ⴱⴻⵍⵍⵉ ⴰⴷ ⵜⵜ ⵡⴰⵔⵜⴻⵖ?” 9 ⵉⵏⵏⴰ ⴰⵙ ⵏⴻⵜⵜⴰ: “ⴰⵡⵉ ⴰⵢⵉ-ⴷⴷ ⵉⵛⵜ ⵏ ⵜⵢⴻⵏⴷⵓⵥⵜ ⵏ ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ ⴷ ⵉⵊⵊ ⵏ ⵉⵖⴰⵢⴹ ⵏ ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ ⴷ ⵉⵊⵊ ⵏ ⵉⵛⴰⵔⵔⵉ ⵏ ⵜⵍⴰⵜⴰ ⵏ ⵉⵙⴻⴳⴳⵯⵓⵙⴰ ⴷ ⵉⵛⵜ ⵏ ⵜⴻⵊⵍⵉⵍⵍⴻⵃⵜ ⴷ ⵉⵊⵊ ⵏ ⵡⴻⴷⴱⵉⵔ ⴷ ⴰⵎⴻⵥⵢⴰⵏ.”

10 ⵏⴻⵜⵜⴰ ⵢⵉⵡⵉ-ⴷⴷ ⵖⴰⵔⴻⵙ ⵎⴰⵔⵔⴰ ⵎⴰⵏ ⴰⵢⴰ, ⵉⴱⴹⴰ ⵜⴻⵏ ⵅ ⵡⴻⵥⵢⴻⵏ ⵓ ⵉⴳⴳⴰ ⴽⵓⵍ ⴰⵥⵢⴻⵏ ⵇⵉⴱⴰⵞ ⵉ ⵡⴻⵏⵏⴻⵖⵏⵉ, ⵎⴰⵛⴰ ⵡⴰⵔ ⵉⴱⴹⵉ ⵛⴰ ⵉⵊⴹⴰⴹ.

11 ⵀⵡⴰⵏ-ⴷⴷ ⵉⵊⴹⴰⴹ ⵉⵜⵜⴽⴻⵛⵛⴰⴹⴻⵏ ⵅ ⵉⵎⵓⵔⴹⴰⵙ, ⵎⴰⵛⴰ ⴰⴱⵔⴰⵎ ⵢⵓⵥⵥⴻⵍ ⵅⴰⵙⴻⵏ.

12 ⵖⴰⵔ ⵓⵖⴻⴵⴰⵢ ⵏ ⵜⴼⵓⵛⵜ, ⵉⵎⵙⴰⵔ ⴰⵇⴰ ⵢⵓⵙⴰ ⴰⵙ-ⴷⴷ ⵉ ⴰⴱⵔⴰⵎ ⵉⵊⵊ ⵏ ⵢⵉⴹⴻⵚ ⵢⵓⴵⴻⵖ, ⵅⵥⴰⵔ, ⵜⵉⴳⴳⵯⵓⴷⵉ ⴷ ⵜⴰⴵⴻⵙⵜ ⵉⵃⴻⴷⵇⴻⵏ ⵡⴹⴰⵏ-ⴷⴷ ⵅⴰⵙ.

13 ⵅⴻⵏⵏⵉ ⵉⵏⵏⴰ ⵉ ⴰⴱⵔⴰⵎ: “ⵙⵙⴻⵏ ⵙ ⵜⵉⴷⴻⵜⵜ ⴰⵇⴰ ⵥⵥⴰⵔⵉⵄⴻⵜ ⵏⵏⴻⴽ ⴰⴷ ⵜⵉⵍⵉ ⴷ ⵜⴰⴱⴰⵔⵔⴰⵏⴻⵛⵜ ⴷⴻⴳ ⵉⵛⵜ ⵏ ⵜⴻⵎⵎⵓⵔⵜ ⵉ ⵡⴰⵔ ⵉⴵⵉⵏ ⵏⵏⴻⵙ ⵓⵛⴰ ⴰⴷ ⴰⵙⴻⵏ ⵅⴻⴷⵎⴻⵏ ⴰⵎ ⵉⵙⴻⵎⵖⴰⵏ ⵓ ⵏⵉⵜⵏⵉ ⴰⴷ ⵅⴰⵙⴻⵏ ⴳⴳⴻⵏ ⴰⵖⵉⵍ ⴰⵔⴻⴱⵄⴰ-ⵎⵢⴰ ⵏ ⵉⵙⴻⴳⴳⵯⵓⵙⴰ. ^■  

14 ⵎⴰⵛⴰ ⵍⴳⴻⵏⵙ ⵓⵎⵉ ⵖⴰ ⵅⴻⴷⵎⴻⵏ ⴰⵎ ⵉⵙⴻⵎⵖⴰⵏ, ⴰⴷ ⵅⴰⵙⴻⵏ ⵃⴻⴽⵎⴻⵖ ⵄⴰⵡⴻⴷ, ⵓⵛⴰ ⴰⵡⴰⵔⵏⵉ ⵎⴰⵏ ⴰⵢⴰ ⴰⴷ ⴼⴼⵖⴻⵏ ⵙ ⵡⴰⴳⵍⴰ ⵉⵎⵖⴰⵔ. ^■  

15 ⵛⴻⴽ ⵎⴰⵛⴰ ⴰⴷ ⵜⵔⴰⵃⴻⴷ ⵖⴰⵔ ⵍⴻⵊⴷⵓⴷ ⵏⵏⴻⴽ ⵙ ⵍⴻⵀⵏⴰ ⵓⵛⴰ ⴰⴷ ⵛⴻⴽ ⵏⴻⴹⵍⴻⵏ ⴰⵎ ⵓⵎⴻⵛⵛⴰⵢⴱⵓ ⵉⵡⴻⵇⵇⴰⵔ. ^■  

16 ⵊⵊⵉⵍ ⵡⵉⵙⵙ ⴰⵔⴻⴱⵄⴰ ⴰⴷ ⴷⴷ-ⵉⵄⵇⴻⴱ ⴷⴰⵏⵉⵜⴰ, ⵎⵉⵏⵥⵉ ⵍⵇⴻⴷⴷ ⵏ ⵍⵎⵓⵄⵚⵉⵢⵢⴻⵜ ⵏ ⵉⵎⵓⵔⵉⵢⵢⴻⵏ ⵄⴰⴷ ⵡⴰⵔ ⵉⴽⴻⵎⵎⴻⵍ.” ^■  

17 ⵍⴰⵎⵉ ⵜⴻⵖⵍⵉ ⵜⴼⵓⵛⵜ ⵓⵛⴰ ⵜⴻⴷⵡⴻⵍ ⴷ ⵜⴰⴵⴻⵙⵜ, ⵜⵓⵖⴰ ⴷⵉⵏ ⴰⴼⴰⵔⵔⴰⵏ ⵉⴷⴷⴻⵅⵅⵏⴻⵏ ⵓ ⵉⵄⴷⵓ ⵉⵊⵊ ⵏ ⵡⴻⵚⴼⴻⴹ ⵏ ⵜⵎⴻⵙⵙⵉ ⵊⴰⵔ ⵉⵥⴻⵢⵏⴰⵏ ⵏⵏⵉ. ^□  

18 ⴷⴻⴳ ⵡⴰⵙⵙ ⵏⵏⵉ ⵏⵏⵉⵜ ⵉⴳⴳⴰ ⵙⵉⴷⵉ ⵉⵊⵊ ⵏ ⵍⵄⴰⵀⴷ ⴰⴽ-ⴷ ⴰⴱⵔⴰⵎ, ⵉⵏⵏⴰ: “ⵉ ⵥⵥⴰⵔⵉⵄⴻⵜ ⵏⵏⴻⴽ ⵓⵎⵉ ⵡⵛⵉⵖ ⵜⴰⵎⵎⵓⵔⵜ-ⴰ ⵥⴻⴳ ⵢⴻⵖⵥⴰⵔ ⵏ ⵎⵉⵚⵔⴰ ⴰⵍ ⵉⵖⵥⴰⵔ ⴰⵎⴻⵇⵇⵔⴰⵏ, ⵉⵖⵥⴰⵔ ⵏ ⵍⴼⵓⵔⴰⵟ: ^■  

19 ⵉⵇⵉⵏⵉⵢⵢⴻⵏ, ⵉⵇⴻⵏⵉⵥⵉⵢⵢⴻⵏ, ⵉⵇⴻⴷⵎⵉⵢⵢⴻⵏ, 20 ⵉⵃⵉⵜⵜⵉⵢⵢⴻⵏ, ⵉⴼⵉⵔⵥⵉⵢⵢⴻⵏ, ⵉⵔⴰⴼⴰⵡⵉⵢⵢⴻⵏ, 21 ⵉⵎⵓⵔⵉⵢⵢⴻⵏ, ⵉⴽⴻⵏⵄⴰⵏⵉⵢⵢⴻⵏ, ⵉⴳⵉⵔⴳⴰⵛⵉⵢⵢⴻⵏ ⴷ ⵉⵢⵉⴱⵓⵙⵉⵢⵢⴻⵏ.”