1 ⵢⵓⵢⵓⵔ ⵅⴻⵏⵏⵉ ⴰⴱⵔⴰⵎ ⵥⵉ ⵎⵉⵚⵔⴰ ⵖⴰⵔ ⵜⴻⵎⵎⵓⵔⵜ ⵏ ⵍⵊⴰⵏⵓⴱ ⵏ ⴽⴻⵏⵄⴰⵏ, ⵏⴻⵜⵜⴰ ⴷ ⵜⴻⵎⵖⴰⵔⵜ ⵏⵏⴻⵙ, ⴰⴽ-ⴷ ⵎⴰⵔⵔⴰ ⵎⵉⵏ ⵖⴰⵔⴻⵙ, ⴷ ⵍⵓⵟ ⴰⴽⵉⴷⴻⵙ. 2 ⴰⴱⵔⴰⵎ ⵜⵓⵖⴰ ⵖⴰⵔⴻⵙ ⴰⵟⵟⴰⵙ ⵏ ⵡⴰⴳⵍⴰ ⴷ ⵍⴻⴱⵀⴰⵢⴻⵎ ⴷ ⵏⵏⵓⵇⴰⵔⵜ ⴷ ⵡⵓⵔⴻⵖ. 3 ⵓⵛⴰ ⵉⵎⵎⵓⵟⵟⵉ ⵥⴻⴳ ⵡⴻⵎⵛⴰⵏ ⵖⴰⵔ ⵡⴻⵎⵛⴰⵏ ⵥⵉ ⵜⴻⵎⵎⵓⵔⵜ ⵏ ⵍⵊⴰⵏⵓⴱ ⵖⴰⵔ ⴱⴰⵢⵜ-ⵉⵍ ⴰⵍ ⴰⵎⵛⴰⵏ ⵎⴰⵏⵉ ⵜⵓⵖⴰ ⵉⴵⴰ ⵓⵇⵉⴹⵓⵏ ⵏⵏⴻⵙ ⵇⴱⴻⵍ, ⵊⴰⵔ ⴱⴰⵢⵜ-ⵉⵍ ⴷ ⵄⴰⵢ, ^■   4 ⴰⵍ ⴰⵎⵛⴰⵏ ⵏ ⵓⵄⴰⵍⵟⴰⵔ ⵉ ⵜⵓⵖⴰ ⵉⴳⴳⴰ ⵇⴱⴻⵍ, ⵎⵉⵏ ⵅⴻⴼ ⵉⵙⵙⴰⵔⵙ ⵜⵉⵖⴰⵔⵚⴰ ⴷ ⵜⴻⵡⵀⵉⴱⵉⵏ, ⵓⵛⴰ ⴷⵉⵏⵏⵉ ⵉ ⵉⵍⴰⵖⴰ ⴰⴱⵔⴰⵎ ⵉⵙⴻⵎ ⵏ ⵙⵉⴷⵉ. ^■   5 ⵓⵛⴰ ⵍⵓⵟ, ⵡⴻⵏⵏⵉ ⵢⵓⵢⵓⵔⴻⵏ ⴰⴽ-ⴷ ⴰⴱⵔⴰⵎ, ⵜⵓⵖⴰ ⵖⴰⵔⴻⵙ ⵄⴰⵡⴻⴷ ⵓⴵⵉ ⴷ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⴷ ⵉⵇⵉⴹⴰⵏ. 6 ⵜⴰⵎⵎⵓⵔⵜ ⵡⴰⵔ ⴷ ⴰⵙⴻⵏ ⵜⵉⵔⵉⵡ ⵃⵉⵎⴰ ⴰⴷ ⵥⴻⴷⵖⴻⵏ ⵊⵎⵉⵄ, ⵎⵉⵏⵥⵉ ⴰⴳⵍⴰ ⵏⵙⴻⵏ ⵉⵎⵖⴰⵔ ⴰⵟⵟⴰⵙ ⴰⵍ ⵡⴰⵔ ⵥⴻⵎⵎⴰⵔⴻⵏ ⴰⴷ ⴷⵉⵏ ⵥⴻⴷⵖⴻⵏ ⵊⵎⵉⵄ. ^■   7 ⵓⵛⴰ ⵉⵎⵙⴰⵔ ⵓⵎⵛⵓⴱⴱⴻⵛ ⵊⴰⵔ ⵉⵎⴻⴽⵙⴰⵡⴻⵏ ⵏ ⵍⴻⴱⵀⴰⵢⴻⵎ ⵏ ⴰⴱⵔⴰⵎ ⴷ ⵉⵎⴻⴽⵙⴰⵡⴻⵏ ⵏ ⵍⴻⴱⵀⴰⵢⴻⵎ ⵏ ⵍⵓⵟ. ⵜⵓⵖⴰ ⵉⴽⴻⵏⵄⴰⵏⵉⵢⵢⴻⵏ ⴷ ⵉⴼⵉⵔⵉⵥⵉⵢⵢⴻⵏ ⵥⴻⴷⴷⵖⴻⵏ ⵍⴻⵅⴷⴻⵏⵏⵉ ⴷⵉ ⵜⴻⵎⵎⵓⵔⵜ.^□  ■   8 ⵉⵏⵏⴰ ⴰⴱⵔⴰⵎ ⵉ ⵍⵓⵟ: “ⵡⴰⵔ ⵉⵜⵜⵉⵍⵉ ⵄⴰⴷ ⵓⵎⵛⵓⴱⴱⴻⵛ ⵊⴰⵔ ⴰⵢⵉ ⴷ ⵛⴻⴽ, ⵊⴰⵔ ⵉⵎⴻⴽⵙⴰⵡⴻⵏ ⵉⵏⵓ ⴷ ⵉⵎⴻⴽⵙⴰⵡⴻⵏ ⵏⵏⴻⴽ, ⵎⵉⵏⵥⵉ ⵏⴻⵛⵛⵉⵏ ⴷ ⵉⵔⵢⴰⵥⴻⵏ ⴰⵡⵎⴰⵜⴻⵏ. 9 ⵎⴰ ⵡⴰⵔ ⴷⵉⵏ ⵜⵜⵡⴰⵙⴻⵄ ⵏ ⵜⴻⵎⵎⵓⵔⵜ ⵥⵥⴰⵜⴻⵛ? ⵜⵜⵥⴰⵡⴳⴻⵖ ⵛⴻⴽ ⴰⴷ ⵅⴰⴼⵉ ⵜⴻⴱⴹⵉⴹ, ⵎⴰ ⵅ ⵓⵥⴻⵍⵎⴰⴹ, ⵏⵉⵖ ⵅ ⵢⴻⴼⵓⵙ! ⵎⴰⵍⴰ ⵛⴻⴽ ⵜⵔⵓⵃⴻⴷ ⵅ ⵢⴻⴼⴼⵓⵙ, ⵏⴻⵛⵛ ⴰⴷ ⵔⴰⵃⴻⵖ ⵅ ⵓⵥⴻⵍⵎⴰⴹ.” ^■  

10 ⵉⵙⵙⴳⴻⵄⵄⴻⴷ ⵍⵓⵟ ⵜⴰⵎⵓⵖⵍⵉ ⵏⵏⴻⵙ ⵓⵛⴰ ⵉⵥⵔⴰ ⴰⴷⴻⵡⵡⴰⵔ ⵏ ⵢⴻⵖⵥⴰⵔ ⵏ ⵍ'ⵓⵔⴷⵓⵏ ⵜⵓⵖⴰ ⵎⴰⵔⵔⴰ ⵉⵙⵡⴰ. ⵇⴱⴻⵍ ⴰⵔⴻⴷⴷⴻⴵ ⵥⵉ ⵙⵉⴷⵉ ⵜⵓⵖⴰ ⵙⴰⴷⵓⵎ ⴷ ⵄⴰⵎⵓⵔⵔⴰ ⴰⵎⴻⵛⵏⴰⵡ ⵊⵊⴻⵏⵏⴻⵜ ⵏ ⵙⵉⴷⵉ, ⴰⵎⴻⵛⵏⴰⵡ ⵜⴰⵎⵎⵓⵔⵜ ⵏ ⵎⵉⵚⵔⴰ ⵅⵎⵉ ⴷⴷ ⵖⴰ ⵜⴰⵙⴻⴷ ⵖⴰⵔ ⵚⵓⵖⴰⵔ.

11 ⵓⵛⴰ ⵉⵅⴹⴰⵔ ⵍⵓⵟ ⵉ ⵢⵉⵅⴻⴼ ⵏⵏⴻⵙ ⵎⴰⵔⵔⴰ ⴰⴷⴻⵡⵡⴰⵔ ⵏ ⵢⴻⵖⵥⴰⵔ ⵏ ⵍ'ⵓⵔⴷⵓⵏ ⵓ ⵉⴼⵙⵉ ⵍⵓⵟ ⵉⵇⵉⴹⴰⵏ ⵏⵏⴻⵙ ⵓⵛⴰ ⵢⵓⵢⵓⵔ ⵖⴰⵔ ⵛⵛⴰⵔⵇ. ⴰⵎⵎⵓ ⵉ ⵎⵙⴻⴱⴹⴰⵏ ⵏⵉⵜⵏⵉ ⵉⵊⵊⴻⵏ ⵅ ⵡⴻⵏⵏⴻⵖⵏⵉ.

12 ⴰⴱⵔⴰⵎ ⵉⵥⴷⴻⵖ ⴷⵉ ⵜⴻⵎⵎⵓⵔⵜ ⵏ ⴽⴻⵏⵄⴰⵏ ⵓ ⵍⵓⵟ ⵉⵥⴷⴻⵖ ⴷⵉ ⵜⵏⴻⴷⴷⴰⵎ ⵏ ⵓⴷⴻⵡⵡⴰⵔ ⵏ ⵍ'ⵓⵔⴷⵓⵏ, ⵉⵡⵜⴰ ⵉⵇⵉⴹⴰⵏ ⵏⵏⴻⵙ ⴰⵍ ⵙⴰⴷⵓⵎ.

13 ⵉⵔⵢⴰⵥⴻⵏ ⵏ ⵙⴰⴷⵓⵎ ⵜⵓⵖⴰ ⴰⵜⴻⵏ ⴷ ⵉⵄⴻⴼⴼⴰⵏⴻⵏ ⴷ ⵉⵎⴻⴷⵏⴰⴱ ⴰⴽ-ⴷ ⵙⵉⴷⵉ ⴰⵍ ⵟⵟⴰⵔⴼ. ^■  

14 ⴰⵡⴰⵔⵏⵉ ⵍⴰⵎⵉ ⵅⴰⵙ ⵉⵎⵙⴻⴱⴹⴰ ⵍⵓⵟ, ⵉⵏⵏⴰ ⵙⵉⴷⵉ ⵉ ⴰⴱⵔⴰⵎ: “ⵙⴰⵔⵔⴻⵃ ⵍⴻⵅⵅⵓ ⵜⵉⵟⵟⴰⵡⵉⵏ ⵏⵏⴻⴽ, ⵜⴻⵅⵥⴰⵔⴻⴷ ⵥⴻⴳ ⵡⴻⵎⵛⴰⵏ ⵎⴰⵏⵉ ⵜⴻⴵⵉⴷ ⵖⴰⵔ ⵛⵛⴰⵎⴰⵍ, ⵖⴰⵔ ⵍⵊⴰⵏⵓⴱ, ⵖⴰⵔ ⵛⵛⴰⵔⵇ ⵓ ⵖⴰⵔ ⵍⵖⴰⵔⴱ,

15 ⵎⵉⵏⵥⵉ ⵎⴰⵔⵔⴰ ⵜⴰⵎⵎⵓⵔⵜ ⵉ ⵜᵉⵜⵜⵡⴰⵍⵉⴷ, ⴰⴷ ⴰⵛ ⵜⵜ ⵡⵛⴻⵖ, ⵉ ⵛⴻⴽ ⴷ ⵥⵥⴰⵔⵉⵄⴻⵜ ⵏⵏⴻⴽ ⵉ ⵍⴻⴱⴷⴰ. ^■  

16 ⴰⴷ ⴳⴳⴻⵖ ⵥⵥⴰⵔⵉⵄⴻⵜ ⵏⵏⴻⴽ ⴰⵎⴻⵛⵏⴰⵡ ⵜⴰⵄⴻⵊⵊⴰⵊⵜ ⵏ ⵜⴻⵎⵎⵓⵔⵜ, ⵃⵉⵎⴰ, ⵎⴰⵍⴰ ⵃⴻⴷ ⵉⵥⴻⵎⵎⴰⵔ ⴰⴷ ⵉⵃⵙⴻⴱ ⵜⴰⵄⴻⵊⵊⴰⵊⵜ ⵏ ⵜⴻⵎⵎⵓⵔⵜ, ⵓⵍⴰ ⴷ ⵥⵥⴰⵔⵉⵄⴻⵜ ⵏⵏⴻⴽ ⵜⵥⴻⵎⵎⴰⵔ ⵄⴰⵡⴻⴷ ⴰⴷ ⵜᵉⵜⵜⵡⴰⵃⵙⴻⴱ. ^■  

17 ⴽⴽⴰⵔ, ⵛⵓⵇ ⴷⵉ ⵜⴻⵎⵎⵓⵔⵜ ⴷⵉ ⵜⵓⵥⵥⴻⴳⴳⴰⵔⵜ ⵏⵏⴻⵙ ⴷ ⵜⵉⵔⵓ ⵏⵏⴻⵙ, ⵎⵉⵏⵥⵉ ⵉ ⵛⴻⴽ ⵓⵎⵉ ⵜⵜ ⵉ ⵖⴰ ⵡⵛⴻⵖ.”

18 ⵅⴻⵏⵏⵉ ⵉⴽⴽⴻⵙ ⴰⴱⵔⴰⵎ ⵉⵇⵉⴹⴰⵏ ⵏⵏⴻⵙ ⵓⵛⴰ ⵢⵓⵢⵓⵔ ⴰⴷ ⵉⵥⴷⴻⵖ ⵖⴰⵔ ⵜⵛⴻⵊⵊⵓⵔⴰ ⵏ ⵢⵉⴳⴳ ⵏ ⵎⴰⵎⵔⵉ, ⵉⵏⵏⵉ ⵉⴵⴰⵏ ⴷⵉ ⵃⴰⴱⵔⵓⵏ. ⴷⵉⵏⵏⵉ ⵉⴱⵏⴰ ⵉⵊⵊ ⵏ ⵓⵄⴰⵍⵟⴰⵔ ⵉ ⵙⵉⴷⵉ. ^■