1 ⵉⵏⵏⴰ ⵙⵉⴷⵉ ⵉ ⴰⴱⵔⴰⵎ: “ⴼⴼⴻⵖ ⵥⵉ ⵜⴻⵎⵎⵓⵔⵜ ⵏⵏⴻⴽ, ⵥⵉ ⵜⴻⵎⵎⵓⵔⵜ ⵎⴰⵏⵉ ⴷⴷ-ⵜⵅⴻⵍⵇⴻⴷ ⵓ ⵥⵉ ⵜⴰⴷⴷⴰⵔⵜ ⵏ ⴱⴰⴱⴰⵛ, ⵔⵓⵃ ⵖⴰⵔ ⵜⴻⵎⵎⵓⵔⵜ ⵉ ⴷ ⴰⵛ ⵖⴰ ⵙⵙⴻⵛⵏⴻⵖ. ^■   2 ⴰⴷ ⵥⵥⴰⵢⴻⴽ ⴷⴷ-ⵙⵙⵓⴼⴼⵖⴻⵖ ⵉⵊⵊ ⵏ ⵍⴳⴻⵏⵙ ⵉⵎⵖⴰⵔ, ⴰⴷ ⵛⴻⴽ ⴱⴰⵔⴽⴻⵖ ⵓ ⴰⴷ ⵙⵙⴻⵎⵖⴰⵔⴻⵖ ⵉⵙⴻⵎ ⵏⵏⴻⴽ ⵓⵛⴰ ⵉⵍⵉ ⴷ ⵛⴻⴽ ⵄⴰⵡⴻⴷ ⴷ ⵍⴱⴰⵔⴰⴽⴰ. 3 ⴰⴷ ⴱⴰⵔⴽⴻⵖ ⵡⴻⵏⵏⵉ ⵛⴻⴽ ⵉ ⵖⴰ ⵉⴱⴰⵔⴽⴻⵏ ⴷ ⵡⴻⵏⵏⵉ ⵛⴻⴽ ⵉ ⵖⴰ ⵉⵏⴻⵄⵍⴻⵏ, ⴰⴷ ⵜ ⵏⴻⵄⵍⴻⵖ. ⴷⴰⵢⴻⴽ ⵉ ⵖⴰ ⵜⵜⵡⴰⴱⴰⵔⴽⴻⵏⵜ ⵎⴰⵔⵔⴰ ⵜⵉⵇⴻⴱⴱⴰⵍ ⵏ ⵜⴻⵎⵎⵓⵔⵜ.” ^■  

4 ⵓⵛⴰ ⵉⵔⵓⵃ ⴰⴱⵔⴰⵎ ⴰⵎ ⵎⴰⵎⵎⴻⵛ ⴷ ⴰⵙ ⵉⵏⵏⴰ ⵙⵉⴷⵉ, ⵓⵛⴰ ⵉⵔⵓⵃ ⵍⵓⵜ ⴰⴽⵉⴷⴻⵙ. ⵜⵓⵖⴰ ⴰⴱⵔⴰⵎ ⵖⴰⵔⴻⵙ ⵅⴻⵎⵙⴰ ⵓ-ⵙⴻⴱⵄⵉⵏ ⵏ ⵉⵙⴻⴳⴳⵯⵓⵙⴰ ⵓⵎⵉ ⴷⴷ-ⵉⴼⴼⴻⵖ ⵥⵉ ⵃⴰⵔⴰⵏ. 5 ⵓⵛⴰ ⵉⵏⴷⴻⵀ ⴰⴱⵔⴰⵎ ⵙⴰⵔⴰⵢ ⵜⴰⵎⵖⴰⵔⵜ ⵏⵏⴻⵙ, ⴷ ⵍⵓⵟ ⵎⵎⵉⵙ ⵏ ⵓⵎⴰⵙ, ⴷ ⵎⴰⵔⵔⴰ ⴰⴳⵍⴰ ⵉ ⵢⴰⵔⴻⴱⵃⴻⵏ, ⴷ ⵉⵡⴰⴷⴰⵏ ⴷ ⵍⵎⴰⵍ ⵏⵏⵉ ⴷⴷ-ⴽⴻⵙⴱⴻⵏ ⴷⵉ ⵃⴰⵔⴰⵏ. ⴼⴼⵖⴻⵏ ⵥⵉ ⵃⴰⵔⴰⵏ ⵃⵉⵎⴰ ⴰⴷ ⵔⴰⵃⴻⵏ ⵖⴰⵔ ⵜⴻⵎⵎⵓⵔⵜ ⵏ ⴽⴻⵏⵄⴰⵏ ⵓⵛⴰ ⵉⵡⴹⴻⵏ ⵖⴰⵔ ⵜⴻⵎⵎⵓⵔⵜ ⵏ ⴽⴻⵏⵄⴰⵏ. ^■   6 ⵉⵥⵡⴰ ⴰⴱⵔⴰⵎ ⵥⵉ ⵜⴻⵎⵎⵓⵔⵜ ⵏⵏⵉ ⵖⴰⵔ ⵡⴻⵎⵛⴰⵏ ⵏ ⵛⴰⴽⵉⵎ ⴰⵍ ⵜⴰⵛⴻⵊⵊⴰⵔⵜ ⵏ ⵢⵉⴳⴳ ⵏ ⵎⵓⵔⴰ. ⴷⵉ ⵍⵡⴻⵇⵜ ⵏⵏⵉ ⵜⵓⵖⴰ ⵉⴽⴻⵏⵄⴰⵏⵉⵢⵢⴻⵏ ⵥⴻⴷⴷⵖⴻⵏ ⴷⵉ ⵜⴻⵎⵎⵓⵔⵜ. ^□  ■   7 ⵉⴱⴰⵏ-ⴷⴷ ⵙⵉⴷⵉ ⵉ ⴰⴱⵔⴰⵎ, ⵉⵏⵏⴰ ⴰⵙ: “ⵉ ⵥⵥⴰⵔⵉⵄⴻⵜ ⵏⵏⴻⴽ ⵓⵎⵉ ⵉ ⵖⴰ ⵡⵛⴻⵖ ⵜⴰⵎⵎⵓⵔⵜ-ⴰ.” ⵓⵛⴰ ⵉⴱⵏⴰ ⴷⵉⵏ ⵉⵊⵊ ⵏ ⵓⵄⴰⵍⵟⴰⵔ ⵎⵉⵏ ⵅⴻⴼ ⵉⵙⵙⴰⵔⵙ ⵜⴰⵖⴰⵔⵚⵜ ⵉ ⵙⵉⴷⵉ ⵡⴻⵏⵏⵉ ⴷ ⴰⵙ ⴷⴷ-ⵉⴱⴰⵏⴻⵏ. ^□  ■  

8 ⵅⴻⵏⵏⵉ ⵉⵄⴷⵓ ⵙⵙⴻⵏⵏⵉ ⵖⴰⵔ ⵉⴷⵓⵔⴰⵔ ⵉ ⵉⴵⴰⵏ ⵅ ⵛⵛⴰⵔⵇ ⵏ ⴱⴰⵢⵜ-ⵉⵍ ⵓⵛⴰ ⵉⵡⵜⴰ ⴷⵉⵏⵏⵉ ⵉⵇⵉⴹⴰⵏ ⵏⵏⴻⵙ. ⵉⵊⵊⴰ ⴱⴰⵢⵜ-ⵉⵍ ⵅ ⵊⵊⵉⵀⴻⵜ ⵏ ⵍⵖⴰⵔⴱ ⵓ ⵄⴰⵢ ⵅ ⵛⵛⴰⵔⵇ. ⴷⵉⵏ ⵉⴱⵏⴰ ⵉⵊⵊ ⵏ ⵓⵄⴰⵍⵟⴰⵔ ⵉ ⵙⵉⴷⵉ ⵓⵛⴰ ⵉⵍⴰⵖⴰ ⵉⵙⴻⵎ ⵏ ⵙⵉⴷⵉ. ^□  

9 ⴰⵡⴰⵔⵏⵉ ⵎⴰⵏ ⴰⵢⴰ ⵉⴼⵙⵉ ⴰⴱⵔⴰⵎ ⵉⵇⵉⴹⴰⵏ ⵏⵏⴻⵙ, ⵉⵎⵎⵓⵟⵟⵉ ⵥⴻⴳ ⵡⴻⵎⵛⴰⵏ ⵖⴰⵔ ⵡⴻⵎⵛⴰⵏ, ⵖⴰⵔ ⵜⴻⵎⵎⵓⵔⵜ ⵏ ⵍⵊⴰⵏⵓⴱ.

10 ⵉⴷⵡⴻⵍ ⵍⴰⵥ ⴷⵉ ⵜⴻⵎⵎⵓⵔⵜ ⵓⵛⴰ ⵉⴽⴻⵎⵎⴻⵍ ⴰⴱⵔⴰⵎ ⵅ ⵡⴻⴱⵔⵉⴷ ⵏⵏⴻⵙ ⵖⴰⵔ ⵎⵉⵚⵔⴰ ⵃⵉⵎⴰ ⴰⴷ ⵉⵥⴷⴻⵖ ⴷⵉⵏ ⴰⵎ ⵓⴱⴰⵔⵔⴰⵏⵉ, ⵎⵉⵏⵥⵉ ⵜⵓⵖⴰ ⵍⴰⵥ ⵉⵎⵖⴰⵔ ⴷⵉ ⵜⴻⵎⵎⵓⵔⵜ.

11 ⵍⴰⵎⵉ ⴷⴷ-ⵜⵉⵡⴻⴹ ⵍⵡⴻⵇⵜ ⵏⵏⵉ ⵓⵎⵉ ⵜⵓⵖⴰ ⵉⵜⵜⴰⴷⴻⴼ ⵖⴰⵔ ⵎⵉⵚⵔⴰ, ⵉⵏⵏⴰ ⵉ ⵙⴰⵔⴰⵢ, ⵜⴰⵎⵖⴰⵔⵜ ⵏⵏⴻⵙ: “ⵅⵥⴰⵔ, ⴰⵇⴰ ⵙⵙⵏⴻⵖ ⴱⴻⵍⵍⵉ ⵛⴻⵎ ⴷ ⵜⴻⵎⵖⴰⵔⵜ ⴷⴰⵢⴻⵙ ⴰⵥⵔⵉ.

12 ⵅⵎⵉ ⵛⴻⵎ ⵉ ⵖⴰ ⵥⴰⵔⴻⵏ ⵉⵎⵉⵚⵔⵉⵢⵢⴻⵏ, ⵥⴻⵎⵎⴰⵔⴻⵏ ⴰⴷ ⵉⵏⵉⵏ: ‘ⵜⴰ ⴷ ⵜⴰⵎⵖⴰⵔⵜ ⵏⵏⴻⵙ!’, ⴰⴷ ⴰⵢⵉ ⵏⵖⴻⵏ ⵓⵛⴰ ⴰⴷ ⵛⴻⵎ ⵊⵊⴻⵏ ⴷⵉ ⵜⵓⴷⴰⵔⵜ.

13 ⵉⵏⵉ ⴰⵇⴰ ⵛⴻⵎ ⴷ ⵓⵞⵎⴰ, ⵃⵉⵎⴰ ⴰⴷ ⴰⵢⵉ ⵢⵉⵍⵉ ⵍⵅⵉⵔ ⴷⵉ ⵟⵟⵡⴻⵄ ⵏⵏⴻⵎ ⵓⵛⴰ ⴰⴷ ⵉⵇⵇⵉⵎ ⵍⴻⵄⵎⴰⵔ ⵉⵏⵓ ⵉⴷⴷⴰⵔ ⵉ ⵛⴻⵎ.” ^■  

14 ⵉⵎⵙⴰⵔ ⵓⵎⵉ ⵢⵓⴷⴻⴼ ⴰⴱⵔⴰⵎ ⵖⴰⵔ ⵎⵉⵚⵔⴰ, ⵥⵔⵉⵏ ⵉⵎⵉⵚⵔⵉⵢⵢⴻⵏ ⴱⴻⵍⵍⵉ ⵜⴰⵎⵖⴰⵔⵜ ⵜⴻⵚⴱⴻⵃ ⴰⵟⵟⴰⵙ.

15 ⵓⵍⴰ ⴷ ⵍⵃⵓⴽⴽⴰⵎ ⵏ ⴼⵉⵔⵄⵓⵏ ⵥⵔⵉⵏ ⵜⵜ ⵓⵛⴰ ⵙⵙⴻⵎⵖⴰⵔⴻⵏ ⵜⵜ ⵖⴰⵔ ⴼⵉⵔⵄⵓⵏ ⵓⵛⴰ ⵉⵡⵢⴻⵏ ⵜⵜ ⵖⴰⵔ ⵜⴰⴷⴷⴰⵔⵜ ⵏ ⴼⵉⵔⵄⵓⵏ.

16 ⵓⵛⴰ ⵉⵎⵚⵓⵔⴻⴼ ⴼⵉⵔⵄⵓⵏ ⵎⵍⵉⵀ ⴰⴽ-ⴷ ⴰⴱⵔⴰⵎ ⴷⵉ ⵟⵟⵡⴻⵄ ⵏⵏⴻⵙ. ⴰⵎⵎⵓ ⵉ ⵉⴽⵙⵉ ⵓⴵⵉ ⴷ ⵉⴼⵓⵏⴰⵙⴻⵏ ⴷ ⵜⴼⵓⵏⴰⵙⵉⵏ ⴷ ⵢⴻⵖⵢⴰⵍ ⴷ ⵉⵙⴻⵎⵖⴰⵏ ⴷ ⵜⵉⵢⵢⴰ ⴷ ⵜⴻⵖⵢⴰⵍ ⴷ ⵉⵍⴻⵖⵎⴰⵏ. ^□  

17 ⵎⴰⵛⴰ ⵙⵉⴷⵉ ⵉⵡⵜⴰ ⴼⵉⵔⵄⵓⵏ ⴷ ⴰⵢⵜⴱⴰⴱ ⵏ ⵜⴰⴷⴷⴰⵔⵜ ⵏⵏⴻⵙ ⵙ ⵊⵊⵔⴰⵢⴻⵃ ⵎⵖⴰⵔⴻⵏⵜ ⴷⵉ ⵍⴻⵙⴱⴰⴱ ⵏ ⵙⴰⵔⴰⵢ, ⵜⴰⵎⵖⴰⵔⵜ ⵏ ⴰⴱⵔⴰⵎ. ^■  

18 ⵅⴻⵏⵏⵉ ⴼⵉⵔⵄⵓⵏ ⵉⵍⴰⵖⴰ-ⴷⴷ ⵉ ⴰⴱⵔⴰⵎ, ⵉⵏⵏⴰ ⴰⵙ: “ⵎⴰⵏⴰⵡⴰⵢⴰ ⵉ ⴷⴰⵢⵉ ⵜⴻⴳⴳⵉⴷ? ⵎⴰⵖⴰⵔ ⵡⴰⵔ ⴷ ⴰⵢⵉ ⵜⴻⵏⵏⵉⴷ ⴱⴻⵍⵍⵉ ⵏⴻⵜⵜⴰⵜ ⴷ ⵜⴰⵎⵖⴰⵔⵜ ⵏⵏⴻⴽ?

19 ⵎⴰⵢⴻⵎⵎⵉ ⵜⴻⵏⵏⵉⴷ: ‘ⵏⴻⵜⵜⴰⵜ ⴷ ⵓⵞⵎⴰ!’, ⴰⵍⴰⵎⵉ ⵜⵜ ⴳⴳⵉⵖ ⵏⴻⵛⵛ ⴷ ⵜⴰⵎⵖⴰⵔⵜ ⵉ ⵢⵉⵅⴻⴼ ⵉⵏⵓ? ⵍⴻⵅⵅⵓ ⵅⵥⴰⵔ, ⴰⵇⴰ ⴰⵛ ⵜⴰⵎⵖⴰⵔⵜ ⵏⵏⴻⴽ, ⴽⵙⵉ ⵜⵜ, ⵜⴱⴻⵄⵄⴷⴻⴷ!” 20 ⵢⵓⵎⵓⵔ ⴼⵉⵔⵄⵓⵏ ⵉⵔⵢⴰⵥⴻⵏ ⵏⵏⴻⵙ ⵅⴰⵙ ⵓⵛⴰ ⵙⵙⵇⴻⴱⴱⴹⴻⵏ ⵜ ⴰⴽ-ⴷ ⵜⴻⵎⵖⴰⵔⵜ ⵏⵏⴻⵙ ⵓ ⴰⴽ-ⴷ ⵎⴰⵔⵔⴰ ⵎⵉⵏ ⵜⵓⵖⴰ ⵖⴰⵔⴻⵙ.