1 ⵉⵙⵙⴻⵏ ⴰⴷⴰⵎ ⵃⴰⵡⵡⴰ, ⵜⴰⵎⵖⴰⵔⵜ ⵏⵏⴻⵙ, ⵓⵛⴰ ⵜⴻⵢⵙⵉ ⵙ ⴷⴷⴻⵢⵙⴻⵜ ⵓⵛⴰ ⵜⵓⵔⵓⵡ-ⴷⴷ ⵇⴰⵢⵉⵏ, ⵜⴻⵏⵏⴰ “ⵊⵊⵉⵖ-ⴷⴷ ⴰⵔⵢⴰⵥ, ⴷ ⵙⵉⴷⵉ!” ^□   2 ⵅⴻⵏⵏⵉ ⵄⴰⵡⴻⴷ ⵜⵓⵔⵓⵡ-ⴷⴷ ⵓⵎⴰⵙ ⵀⴰⴱⵉⵍ. ⵜⵓⵖⴰ ⵀⴰⴱⵉⵍ ⴷ ⴰⵎⴻⴽⵙⴰ ⵏ ⵡⵓⴵⵉ ⵓ ⵇⴰⵢⵉⵏ ⵉⵔⵓⵃ ⵉⵅⴻⴷⴷⴻⵎ ⵜⴰⵎⵎⵓⵔⵜ. ^□  

3 ⵓⵛⴰ ⴰⵡⴰⵔⵏⵉ ⵓⵙⵙⴰⵏ ⵉⵎⵙⴰⵔ ⴱⴻⵍⵍⵉ ⵇⴰⵢⵉⵏ ⵉⵇⴻⴷⴷⴻⵎ ⵉⵛⵜ ⵏ ⵜⴻⵡⵀⵉⴱⵜ ⵥⵉ ⵍⵖⵉⴵⴻⵜ ⵏ ⵜⴻⵎⵎⵓⵔⵜ ⵉ ⵙⵉⴷⵉ. 4 ⵉⵇⴻⴷⴷⴻⵎ ⵀⴰⴱⵉⵍ ⵄⴰⵡⴻⴷ ⵥⴻⴳ ⵉⵎⴻⵏⵥⴰ ⵏ ⵡⵓⴵⵉ ⵏⵏⴻⵙ, ⵥⴻⴳ ⵢⴻⵏⵏⵉ ⵖⴰⵔ ⵉⴵⴰ ⵜⴰⴷⵓⵏⵜ ⴰⵟⵟⴰⵙ. ⵉⵅⵥⴰⵔ ⵙⵉⴷⵉ ⵖⴰⵔ ⵀⴰⴱⵉⵍ ⴷ ⵜⴻⵡⵀⵉⴱⵜ ⵏⵏⴻⵙ. ^■   5 ⵎⴰⵛⴰ ⵖⴰⵔ ⵇⴰⵢⵉⵏ ⴷ ⵜⴻⵡⵀⵉⴱⵜ ⵏⵏⴻⵙ ⵡⴰⵔ ⴷ ⴰⵙ ⵢⴰⵔⵔⵉ ⵛⴰ ⵜⴰⵢⵏⵉⵜ. ⵓⵛⴰ ⵉⵅⴻⵢⵢⴻⵇ ⵇⴰⵢⵉⵏ ⴰⵟⵟⴰⵙ, ⵉⵏⵏⴻⵇⵍⴻⴱ ⴰⵙ ⵓⵖⴻⵎⴱⵓⴱ. 6 ⵉⵏⵏⴰ ⵙⵉⴷⵉ ⵉ ⵇⴰⵢⵉⵏ: “ⵎⴰⵢⴻⵎⵎⵉ ⵜⵅⴻⵢⵢⵇⴻⴷ? ⵎⴰⵢⴻⵎⵎⵉ ⵉ ⴷ ⴰⵛ ⵉⵏⵏⴻⵇⵍⴻⴱ ⵓⵖⴻⵎⴱⵓⴱ? 7 ⵎⴰⵍⴰ ⵜⴻⴳⴳⵉⴷ ⵎⵍⵉⵃ ⵎⴰ ⵡⴰⵔ ⴷⵉⵏ ⵉⵜⵜⵉⵍⵉ ⵓⵙⴳⴻⵄⵄⴻⴷ ⵓⵛⴰ ⵎⴰⵍⴰ ⵡⴰⵔ ⵜⴻⴳⴳⵉⴷ ⵎⵍⵉⵃ, ⴷⴷⴻⵏⴱ ⴰⵇⴰ-ⵜ ⵉⵥⵥⴻⵍ ⵖⴰⵔ ⵜⴻⵡⵡⴰⵔⵜ. ⵎⴻⵥⵔⵉ ⵏⵏⴻⵙ ⵖⴰⵔⴻⴽ, ⵎⴰⵛⴰ ⵉⵜⵜⵅⴻⵚⵚⴰ ⵛⴻⴽ ⴰⴷ ⵅⴰⵙ ⵜⵙⴻⴵⴻⴷ.” 8 ⵉⵙⵙⵉⵡⴻⵍ ⵇⴰⵢⵉⵏ ⴰⴽ-ⴷ ⵀⴰⴱⵉⵍ ⵓⵎⴰⵙ. ⵓⵛⴰ ⵉⵎⵙⴰⵔ ⴰⵎ ⴵⴰⵏ ⵏⵉⵜⵏⵉ ⴷⴻⴳ ⵉⵢⵢⴰⵔ, ⴱⴻⵍⵍⵉ ⵇⴰⵢⵉⵏ ⵉⴽⴽⴰⵔ ⵖⴰⵔ ⵓⵎⴰⵙ ⵀⴰⴱⵉⵍ ⵓⵛⴰ ⵉⵏⵖⴰ ⵉ-ⵜ. ^■  

9 ⵉⵏⵏⴰ ⵙⵉⴷⵉ ⵉ ⵇⴰⵢⵉⵏ: “ⵎⴰⵏⵉ ⵉⴵⴰ ⵓⵎⴰⵛ ⵀⴰⴱⵉⵍ?” ⵉⵏⵏⴰ: “ⵡⴰⵔ ⵙⵙⵉⵏⴻⵖ. ⵎⴰ ⵏⴻⵛⵛ ⴷ ⴰⵎⴻⵃⴷⴰⵢ ⵅ ⵓⵎⴰ?”

10 ⵓⵛⴰ ⵉⵏⵏⴰ ⵏⴻⵜⵜⴰ: “ⵎⵉⵏ ⵜⴻⴳⴳⵉⴷ? ⴰⵇⴰ ⵜⵎⵉⵊⵊⴰ ⵏ ⵉⴷⴰⵎⵎⴻⵏ ⵏ ⵓⵎⴰⵛ ⵙⵖⵓⵢⵢⵓⵏ-ⴷⴷ ⵖⴰⵔⵉ ⵥⵉ ⵜⴻⵎⵎⵓⵔⵜ. ^■  

11 ⵍⴻⵅⵅⵓ, ⴰⵇⴰ ⵛⴻⴽ ⴷ ⵎⴻⵏⵄⵓⵍ ⵥⵉ ⵜⴻⵎⵎⵓⵔⵜ ⵜⴻⵏⵏⵉ ⵢⴰⵔⴻⵥⵎⴻⵏ ⴰⵇⴻⵎⵎⵓⵎ ⵏⵏⴻⵙ ⵃⵉⵎⴰ ⴰⴷ ⵜⴻⵇⴱⴻⵍ ⵉⴷⴰⵎⵎⴻⵏ ⵏ ⵓⵎⴰⵛ ⵥⴻⴳ ⵉⴼⴰⵙⵙⴻⵏ ⵏⵏⴻⴽ.

12 ⵅⵎⵉ ⵉ ⵖⴰ ⵜⵅⴻⴷⵎⴻⴷ ⵅ ⵜⴻⵎⵎⵓⵔⵜ, ⵡⴰⵔ ⵜⴷⵉⴽⴽⵯⵉⵍ ⴰⴷ ⴰⵛ ⵜⴻⵡⵛ ⵎⴰⵔⵔⴰ ⵊⵊⴻⵀⴷ ⵏⵏⴻⵙ ⵓⵛⴰ ⵛⴻⴽ ⴰⴷ ⵜⵉⵍⵉⴷ ⴷ ⴰⵎⴻⵏⵏⴻⵊⵔⵓ ⴷ ⴰⵎⴻⵜⵍⵓⵄ ⴷⵉ ⵜⴻⵎⵎⵓⵔⵜ.” ^■  

13 ⵅⴻⵏⵏⵉ ⵉⵏⵏⴰ ⵇⴰⵢⵉⵏ ⵉ ⵙⵉⴷⵉ: “ⵍⵄⵉⵇⴰⴱ ⵉⵏⵓ ⵉⵎⵖⴰⵔ ⴰⵟⵟⴰⵙ ⵅ ⵜⵥⴻⵎⵎⴰⵔ ⵉⵏⵓ”.

14 ⴰⵇⴰ ⵛⴻⴽ ⴰⵙⵙ-ⴰ ⵜⵓⵥⵥⵍⴻⴷ ⵅⴰⴼⵉ ⵥⴻⴳ ⵓⵖⴻⵎⴱⵓⴱ ⵏ ⵜⴻⵎⵎⵓⵔⵜ-ⴰ ⵓⵛⴰ ⵥⴻⴳ ⵓⵖⴻⵎⴱⵓⴱ ⵏⵏⴻⴽ ⴰⴷ ⵜⵜⵡⴰⴼⴼⴰⵔⴻⵖ, ⴰⴷ ⵉⵍⵉⵖ ⴷ ⴰⵎⴻⵏⵏⴻⵊⵔⵓ ⴷ ⴰⵎⴻⵜⵍⵓⵄ ⴷⵉ ⵜⴻⵎⵎⵓⵔⵜ ⵓⵛⴰ ⴰⴷ ⵢⵉⵍⵉ ⵎⴰⵔⵔⴰ ⵡⴻⵏⵏⵉ ⴷ ⴰⵢⵉ ⵖⴰ ⵢⴰⴼⴻⵏ ⴰⴷ ⴰⵢⵉ ⵉⵏⴻⵖ.” ^■  

15 ⵅⴻⵏⵏⵉ ⵉⵏⵏⴰ ⴰⵙ ⵙⵉⴷⵉ: “ⵙ ⵓⵢⴰ ⵎⴰⵔⵔⴰ ⵡⴻⵏⵏⵉ ⵉ ⵖⴰ ⵉⵏⵖⴻⵏ ⵇⴰⵢⵉⵏ, ⴰⴷ ⵥⵥⴰⵢⴻⵙ ⵏⵜⴰⵇⵎⴻⵏ ⵙⴻⴱⵄⴰ ⵏ ⵜⵡⴰⵍⴰⵡⵉⵏ.” ⵓⵛⴰ ⵉⴳⴳⴰ ⵙⵉⴷⵉ ⵍⴻⵄⵍⴰⵎⴻⵜ ⵉ ⵇⴰⵢⵉⵏ ⴱⴻⵍⵍⵉ ⵎⴰⵔⵔⴰ ⵡⴻⵏⵏⵉ ⵜ ⵖⴰ ⵢⴰⴼⴻⵏ ⵡⴰⵔ ⵜ ⵉⵏⴻⵇⵇ.

16 ⵅⴻⵏⵏⵉ ⵉⴼⴼⴻⵖ-ⴷⴷ ⵇⴰⵢⵉⵏ ⵥⴻⴳ ⵡⵓⴷⴻⵎ ⵏ ⵙⵉⴷⵉ ⵓⵛⴰ ⵉⵔⵓⵃ ⵉⵥⴻⴷⴷⴻⵖ ⴷⵉ ⵜⴻⵎⵎⵓⵔⵜ ⵏ ⵏⵓⴷ, ⵛⵛⴰⵔⵇ ⵏ ⵄⴰⴷⵏ. ^□  

17 ⵉⵙⵙⴻⵏ ⵇⴰⵢⵉⵏ ⵜⴰⵎⵖⴰⵔⵜ ⵏⵏⴻⵙ ⵓⵛⴰ ⵜⴻⵢⵙⵉ ⵙ ⴷⴷⴻⵢⵙⴻⵜ ⵓⵛⴰ ⵜⵓⵔⵓⵡ-ⴷⴷ ⵃⴰⵏⵓⵅ. ⵜⵓⵖⴰ ⵇⴰⵢⴻⵏ ⵉⴱⵏⴰ ⵉⵛⵜ ⵏ ⵜⴻⵏⴷⵉⵏⵜ ⵓⵛⴰ ⵉⵍⴰⵖⴰ ⴰⵙ ⵉ ⵜⴻⵏⴷⵉⵏⵜ ⴰⵎⴻⵛⵏⴰⵡ ⵉⵙⴻⵎ ⵏ ⵎⵎⵉⵙ ⵀⴰⵏⵓⵅ. ^□  

18 ⵉⵜⵜⵡⴰⵔⵓⵡ-ⴷⴷ ⵄⵉⵔⴰⴷ ⵉ ⵃⴰⵏⵓⵅ ⵓ ⵄⵉⵔⴰⴷ ⵉⵊⵊⴰ-ⴷⴷ ⵎⵉⵃⵓⵢⴰ’ⵉⵍ ⵓ ⵎⵉⵃⵓⵢⴰ’ⵉⵍ ⵉⵊⵊⴰ-ⴷⴷ ⵎⴰⵜⵓⵛⴰ’ⵉⵍ ⵓ ⵎⴰⵜⵓⵛⴰ’ⵉⵍ ⵉⵊⵊⴰ-ⴷⴷ ⵍⴰⵎⴰⴽ. ^□  

19 ⵉⵎⵍⴻⵛ ⵍⴰⵎⴰⴽ ⵜⵏⴰⵢⴻⵏ ⵏ ⵜⴻⵎⵖⴰⵔⵉⵏ. ⵉⵛⵜⴻⵏ ⵇⵇⴰⵔⴻⵏ ⴰⵙ ⵄⴰⴷⴰ, ⵜⴻⵏⵏⴻⵖⵏⵉ ⵇⵇⴰⵔⴻⵏ ⴰⵙ ⵜⵙⵉⵍⵍⴰ. ^□   20 ⵜⵓⵔⵓⵡ-ⴷⴷ ⵄⴰⴷⴰ ⵢⴰⴱⴰⵍ. ⵏⴻⵜⵜⴰ ⵉⴷⵡⴻⵍ ⴷ ⴱⴰⴱⴰⵜⵙⴻⵏ ⵉ ⵉⵎⴻⵥⴷⴰⵖ ⵏ ⵉⵇⵉⴹⴰⵏ ⵓ ⵉ ⵉⵎⴻⴽⵙⴰⵡⴻⵏ ⵏ ⵍⴻⴱⵀⴰⵢⴻⵎ. ^□   21 ⵉⵙⴻⵎ ⵏ ⵓⵎⴰⵙ ⵜⵓⵖⴰ ⴷ ⵢⵓⴱⴰⵍ ⵡⴻⵏⵏⵉ ⵜⵓⵖⴰ ⴷ ⴱⴰⴱⴰⵜⵙⴻⵏ ⵉ ⵎⴰⵔⵔⴰ ⵉⵏⵏⵉ ⵉⵜⵜⵉⵔⴰⵔⴻⵏ ⵍⴳⴰⵎⴱⵔⵉ ⴷ ⵜⴻⵎⵊⴰ. ^□   22 ⵜⵙⵉⵍⵍⴰ ⵜⵓⵔⵓⵡ-ⴷⴷ ⵄⴰⵡⴻⴷ ⵜⵓⴱⴰⵍ-ⵇⴰⵢⵉⵏ, ⴰⵎⵥⵉⵍ ⵏ ⵉⵎⵥⵉⵍⴻⵏ ⵏ ⵎⴰⵔⵔⴰ ⵉⵏⵏⵉ ⵉⵅⴻⴷⴷⵎⴻⵏ ⵙ ⵏⵏⵃⴰⵙ ⴷ ⵡⵓⵥⵥⴰⵍ. ⵓⵞⵎⴰⵙ ⵏ ⵜⵓⴱⴰⵍ-ⵇⴰⵢⵉⵏ ⵜⵓⵖⴰ-ⵜⵜ ⴷ ⵏⴰⵄⵎⴰ. ^□  

23 ⵉⵏⵏⴰ ⵍⴰⵎⴰⴽ ⵉ ⵜⴻⵎⵖⴰⵔⵉⵏ ⵏⵏⴻⵙ, ⵄⴰⴷⴰ ⴷ ⵜⵙⵉⵍⵍⴰ: “ⵙⵍⴻⵏⵜ ⵉ ⵜⵎⵉⵊⵊⴰ ⵉⵏⵓ, ⴰ ⵜⵉⵎⵖⴰⵔⵉⵏ ⵏ ⵍⴰⵎⴰⴽ! ⵙⵍⴻⵏⵜ ⵖⴰⵔ ⵎⵉⵏ ⵖⴰ ⵉⵏⵉⵖ. ⴰⵇⴰ ⵏⵖⵉⵖ ⴰⵔⵢⴰⵥ ⵉ ⵓⵢⴻⵥⵥⵉⵎ ⵉⵏⵓ ⴷ ⵓⵃⴻⵏⵊⵉⵔ ⵉ ⵓⵢⴻⴷⴷⵉⵎ ⵉⵏⵓ. ^□   24 ⴰⵇⴰ ⴰⴷ ⵏⵏⵜⴰⵇⵎⴻⵏ ⵥⵉ ⵇⴰⵢⵉⵏ ⵙⴻⴱⵄⴰ ⵏ ⵜⵡⴰⵍⴰⵡⵉⵏ, ⵎⴰⵛⴰ ⵥⵉ ⵍⴰⵎⴰⴽ ⵙⴻⴱⵄⴰ ⵓ-ⵙⴻⴱⵄⵉⵏ ⵏ ⵜⵡⴰⵍⴰⵡⵉⵏ.” ^■  

25 ⵢⵓⴷⴻⴼ ⴰⴷⴰⵎ ⵄⴰⵡⴻⴷ ⵅ ⵜⴰⵎⵖⴰⵔⵜ ⵏⵏⴻⵙ ⵓⵛⴰ ⵜⵓⵔⵓⵡ-ⴷⴷ ⵏⴻⵜⵜⴰⵜ ⴰⵃⴻⵏⵊⵉⵔ. ⵜⵍⴰⵖⴰ ⴰⵙ ⵛⵉⵜ, ⵎⵉⵏⵥⵉ ⵜⴻⵏⵏⴰ: “ⴰⵔⴻⴱⴱⵉ ⵉⵡⵛⴰ ⴰⵢⵉ ⵥⵥⴰⵔⵉⵄⴻⵜ ⵏⵏⴻⵖⵏⵉ ⴷⴻⴳ ⵡⴻⵎⵛⴰⵏ ⵏ ⵀⴰⴱⵉⵍ, ⵎⵉⵏⵥⵉ ⵇⴰⵢⵉⵏ ⵉⵏⵖⴰ ⵉ-ⵜ.” ^□   26 ⵉ ⵛⵉⵜ ⵄⴰⵡⴻⴷ, ⵓⵍⴰ ⵉ ⵏⴻⵜⵜⴰ, ⵉⵜⵜⵡⴰⵅⵍⴻⵇ-ⴷⴷ ⵓⵙⴻⵢⵎⵉ ⵓⵛⴰ ⵉⴳⴳⴰ ⴰⵙ ⴰⵏⵓⵛ. ⵍⴻⵅⴷⴻⵏⵏⵉ ⵉⴱⴷⴰ ⴱⵏⴰⴷⴻⵎ ⵙ ⵓⵍⴰⵖⵉ ⵅ ⵢⵉⵙⴻⵎ ⵏ ⵙⵉⴷⵉ. ^□