1 ⵜⵓⵖⴰ ⴰⴼⵉⵖⴰⵔ ⴷ ⴰⵃⵔⴰⵢⵎⵉ ⵅ ⵎⴰⵔⵔⴰ ⵍⵎⴰⵍ ⵏ ⵍⴻⵅⵍⴰ ⵉ ⵉⴳⴳⴰ ⵙⵉⴷⵉ ⴰⵔⴻⴱⴱⵉ. ⵉⵏⵏⴰ ⵉ ⵜⴻⵎⵖⴰⵔⵜ: “ⵎⴰ ⴷ ⵜⵉⴷⴻⵜⵜ ⵉⵏⵏⴰ ⴰⵔⴻⴱⴱⵉ: ‘ⵖⴰⵔⵡⴻⵎ ⵡⴰⵔ ⵜⵜᵉⵜⵜⴻⵎ ⵛⴰ ⵥⵉ ⵎⴰⵔⵔⴰ ⵜⵉⵛⴻⵊⵊⵓⵔⴰ ⵏ ⵊⵊⴻⵏⵏⴻⵜ!’?” 2 ⵜⴻⵏⵏⴰ ⵜⴻⵎⵖⴰⵔⵜ ⵉ ⵓⴼⵉⵖⴰⵔ “ⵣⵉ ⵍⵖⵉⴵⴻⵜ ⵏ ⵜⵛⴻⵊⵊⵓⵔⴰ ⴷⵉ ⵊⵊⴻⵏⵏⴻⵜ ⵏⵥⴻⵎⵎⴰⵔ ⴰⴷ ⵏⴻⵛⵛ, 3 ⵎⴰⵛⴰ ⵥⵉ ⵍⵖⵉⴵⴻⵜ ⵏ ⵜⵛⴻⵊⵊⴰⵔⵜ ⵏⵏⵉ ⴷⵉ ⵍⵡⴻⵙⵜ ⵏ ⵊⵊⴻⵏⵏⴻⵜ, ⵉⵏⵏⴰ ⴰⵔⴻⴱⴱⵉ: ‘ⵡⴰⵔ ⵥⵥⴰⵢⴻⵙ ⵜⵜᵉⵜⵜⴻⵎ, ⵡⴰⵔ ⵜⵜ ⵜⵜⵃⴰⴷⴰⵎ, ⵃⵉⵎⴰ ⵡⴰⵔ ⵜⵜⵎⴻⵜⵜⵉⵎ.’ ” 4 ⵉⵏⵏⴰ ⵓⴼⵉⵖⴰⵔ ⵉ ⵜⴻⵎⵖⴰⵔⵜ: “ⴽⴻⵏⵏⵉⵡ ⵡⴰⵔ ⵜᵉⵜⵜⵎⴻⵜⵜⵉⵎ ⵛⴰ ⵙ ⵍⵎⴻⵡⵜ ⵇⴰⵄ, ^■   5 ⵎⴰⵛⴰ ⴰⵔⴻⴱⴱⵉ ⵉⵙⵙⴻⵏ ⴱⴻⵍⵍⵉ ⴰⵙⵙ ⵏⵏⵉ ⴷⵉ ⵥⵥⴰⵢⴻⵙ ⵉ ⵖⴰ ⵜⴻⵛⵛⴻⵎ, ⴰⴷ ⴰⵔⵥⵎⴻⵏⵜ ⵜⵉⵟⵟⴰⵡⵉⵏ ⵏⵡⴻⵎ ⵓⵛⴰ ⴰⴷ ⵜⵉⵍⵉⵎ ⴰⵎⴻⵛⵏⴰⵡ ⴰⵔⴻⴱⴱⵉ, ⴰⴷ ⵜⴻⵙⵙⵏⴻⵎ ⵍⵅⴰⵔ ⵥⵉ ⵍⵖⴰⵔ.” ^■  

6 ⵜⴻⵥⵔⴰ ⵜⴻⵎⵖⴰⵔⵜ ⴱⴻⵍⵍⵉ ⵜⴰⵛⴻⵊⵊⴰⵔⵜ ⵜⴻⵚⴱⴻⵃ ⵉ ⵎⴰⵛⵛⴰ ⵓⵛⴰ ⵜⴻⵄⵊⴻⴱ ⴰⵙⴻⵏⵜ ⵉ ⵜⵉⵟⵟⴰⵡⵉⵏ, ⴰⵇⴰ ⵜⴰⵛⴻⵊⵊⴰⵔⵜ ⵜⴻⴳⴳⴰ ⴷⴰⵢⴻⵙ ⵎⴻⵥⵔⵉ ⵎⴰⵃⴻⵏⴷ ⴰⴷ ⵥⵥⴰⵢⴻⵙ ⵜⴻⴷⵡⴻⵍ ⴷ ⵜⴰⵎⵉⵖⵉⵙⵜ. ⵅⴻⵏⵏⵉ ⵜⴻⴽⵙⵉ ⵥⵉ ⵍⵖⵉⴵⴻⵜ ⵏⵏⴻⵙ, ⵜⴻⵛⵛⴰ ⵓⵛⴰ ⵜⴻⵡⵛⴰ ⵄⴰⵡⴻⴷ ⵉ ⵡⴻⵔⵢⴰⵥ ⵏⵏⴻⵙ ⵉ ⵜⵓⵖⴰ ⴰⴽⵉⴷⴻⵙ, ⵓⵛⴰ ⵏⴻⵜⵜⴰ ⵉⵛⵛⴰ. ^■   7 ⵏⵏⴰⵔⵥⵎⴻⵏⵜ ⵜⵉⵟⵟⴰⵡⵉⵏ ⵏⵙⴻⵏ ⵓⵛⴰ ⵓⴼⵉⵏ ⵉⵅⴻⴼ ⵏⵙⴻⵏ ⴷ ⵉⵄⴰⵔⵢⴰⵏⴻⵏ. ⵅⴻⵏⵏⵉ ⵅⴻⵢⵢⴹⴻⵏ ⵜⵉⴼⵔⴰⵢ ⵏ ⵡⴰⵔⵜⵓ, ⵓⵛⴰ ⴳⴳⵉⵏ ⵥⵥⴰⵢⵙⴻⵏⵜ ⵜⵉⴱⴰⵏⵜⵉⵡⵉⵏ ⵉ ⵢⵉⵅⴻⴼ ⵏⵙⴻⵏ. 8 ⵅⴻⵏⵏⵉ ⵙⵍⵉⵏ ⵏⵉⵜⵏⵉ ⵍⵃⴻⵙⵙ ⵏ ⵙⵉⴷⵉ ⴰⵔⴻⴱⴱⵉ ⵉⴳⴳⵓⵔ ⴷⵉ ⵊⵊⴻⵏⵏⴻⵜ ⵥⴻⴳ ⵓⵚⵓⴹⵉ ⵏ ⵓⵙⴻⵎⵎⵉⴹ ⵏ ⵡⴰⵙⵙ, ⵓⵛⴰ ⵉⴼⴼⴰⵔ ⴰⴷⴰⵎ ⴷ ⵜⴻⵎⵖⴰⵔⵜ ⵏⵏⴻⵙ ⵥⴻⴳ ⵡⵓⴷⴻⵎ ⵏ ⵙⵉⴷⵉ ⴰⵔⴻⴱⴱⵉ ⵊⴰⵔ ⵜⵛⴻⵊⵊⵓⵔⴰ ⵏ ⵊⵊⴻⵏⵏⴻⵜ.

9 ⵓⵛⴰ ⵉⵍⴰⵖⴰ ⵙⵉⴷⵉ ⴰⵔⴻⴱⴱⵉ ⴰⴷⴰⵎ, ⵉⵏⵏⴰ ⴰⵙ: “ⵎⴰⵏⵉ ⵜⴻⴵⵉⴷ?”

10 ⵏⴻⵜⵜⴰ ⵉⵏⵏⴰ: “ⵙⵍⵉⵖ ⵉ ⵜⵎⵉⵊⵊⴰ ⵏⵏⴻⴽ ⴷⵉ ⵊⵊⴻⵏⵏⴻⵜ ⵓⵛⴰ ⴳⴳⵯⴻⴷⴻⵖ ⵎⵉⵏⵥⵉ ⵏⴻⵛⵛ ⴷ ⴰⵄⴰⵔⵢⴰⵏ, ⵅⴻⵏⵏⵉ ⴼⴼⴰⵔⴻⵖ.” ^□  

11 ⵉⵏⵏⴰ ⴰⵙ ⵏⴻⵜⵜⴰ: “ⵡⵉ ⴷ ⴰⵛ ⵉⵏⵏⴰⵏ ⴱⴻⵍⵍⵉ ⵛⴻⴽ ⴷ ⴰⵄⴰⵔⵢⴰⵏ? ⵎⴰ ⵜⴻⵛⵛⵉⴷ ⵥⵉ ⵜⵛⴻⵊⵊⴰⵔⵜ ⵏⵏⵉ ⵅ ⵛⴻⴽ ⵡⴻⵚⵚⵉⵖ ‘ⴰⵇⴰ ⴰⴷ ⵥⵥⴰⵢⴻⵙ ⵜⴻⵛⵛⴻⴷ!’?”

12 ⵉⵏⵏⴰ ⴰⴷⴰⵎ: “ⵜⴰⵎⵖⴰⵔⵜ ⵏⵏⵉ ⴷ ⴰⵢⵉ ⵜⴻⵡⵛⵉⴷ, ⵏⴻⵜⵜⴰⵜ ⵜⴻⵡⵛⴰ ⴰⵢⵉ ⵥⵉ ⵜⵛⴻⵊⵊⴰⵔⵜ ⵓⵛⴰ ⵛⵛⵉⵖ.”

13 ⵉⵏⵏⴰ ⴰⵙ ⵙⵉⴷⵉ ⴰⵔⴻⴱⴱⵉ ⵉ ⵜⴻⵎⵖⴰⵔⵜ: “ⵎⴰⵏⴰⵡⵢⴰ ⵉ ⵜⴻⴳⴳⵉⴷ?” ⵜⴻⵏⵏⴰ ⴰⵙ ⵜⴻⵎⵖⴰⵔⵜ: “ⵉⵖⴰⵔⵔⴰ ⴰⵢⵉ ⵓⴼⵉⵖⴰⵔ ⵓⵛⴰ ⵛⵛⵉⵖ.” ^■  

14 ⵉⵏⵏⴰ ⵙⵉⴷⵉ ⴰⵔⴻⴱⴱⵉ ⵉ ⵓⴼⵉⵖⴰⵔ:

“ⵍⴰⵎⵉ ⵜⴻⴳⴳⵉⴷ ⴰⵢⴰ, ⴰⵇⴰ ⴰⵛ ⴷ ⴰⵎⴻⵏⵄⵓⵍ ⵊⴰⵔ ⵎⴰⵔⵔⴰ ⵍⴻⴱⵀⴰⵢⴻⵎ

ⵓ ⵊⴰⵔ ⵎⴰⵔⵔⴰ ⵍⵎⴰⵍ ⵏ ⵍⴻⵅⵍⴰ.

ⵅ ⵓⵄⴻⴷⴷⵉⵙ ⵏⵏⴻⴽ ⴰⴷ ⵜⵎⵓⵔⴷⴻⴷ,

ⵓⵛⴰ ⴰⴷ ⵜⴻⵛⵛⴻⴷ ⵓⵛⴰⵍ ⵎⴰⵔⵔⴰ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⴽ. ^□  

15 ⴰⴷ ⴳⴳⴻⵖ ⵍⴻⵄⴷⴰⵡⴰⵜ ⵊⴰⵔ ⴰⵛ ⴷ ⵜⴻⵎⵖⴰⵔⵜ,

ⵊⴰⵔ ⵥⵥⴰⵔⵉⵄⴻⵜ ⵏⵏⴻⴽ ⴷ ⵥⵥⴰⵔⵉⵄⴻⵜ ⵏⵏⴻⵙ.

ⴷ ⵜⴻⵏⵏⵉ ⵏⵏⴻⵙ ⴰⴷ ⵜⴻⵍⴱⴻⵥ ⴰⵥⴻⴵⵉⴼ ⵏⵏⴻⴽ,

ⵓ ⵛⴻⴽ ⴰⴷ ⴰⵙ ⵜⵍⴻⴱⵥⴻⴷ ⴰⵏⵉⵔⵥ ⵏⵏⴻⵙ.” ^■  

16 ⵉⵏⵏⴰ ⵉ ⵜⴻⵎⵖⴰⵔⵜ:

“ⴰⵟⵟⴰⵙ ⵉ ⵖⴰ ⴰⵔⵏⵉⵖ ⵍⴻⵃⵔⵉⵇ ⴷ ⵍⴻⵡⵊⴻⵄ ⵏ ⵜⴰⵔⵡⴰ ⵏⵏⴻⵎ.

ⵙ ⵍⴻⵃⵔⵉⵇ ⴰⴷ ⴷⴷ-ⵜⴰⵔⵡⴻⴷ ⵉⵃⴻⵏⵊⵉⵔⴻⵏ,

ⵓⵛⴰ ⵖⴰⵔ ⵡⴻⵔⵢⴰⵥ ⵏⵏⴻⵎ ⴰⴷ ⵜⴻⵎⵎⴻⵥⵔⴻⴷ

ⵎⴰⵛⴰ ⵏⴻⵜⵜⴰ ⴰⴷ ⵅⴰⵎ ⵉⵃⴽⴻⵎ.” ^■  

17 ⵓⵛⴰ ⵉⵏⵏⴰ ⵉ ⴰⴷⴰⵎ:

“ⵎⵉⵏⵥⵉ ⵜⴻⵙⵍⵉⴷ ⵖⴰⵔ ⵜⵎⵉⵊⵊⴰ ⵏ ⵜⴻⵎⵖⴰⵔⵜ ⵏⵏⴻⴽ

ⵓ ⵜⴻⵛⵛⵉⴷ ⵥⵉ ⵜⵛⴻⵊⵊⴰⵔⵜ ⵜⴻⵏⵏⵉ ⵅ ⵛⴻⴽ ⵡⴻⵚⵚⵉⵖ: ‘ⴰⵇⴰ ⴰⴷ ⵥⵥⴰⵢⴻⵙ ⵜⴻⵛⵛⴻⴷ!’,

ⴰⴷ ⵜⵉⵍⵉ ⵜⴻⵎⵎⵓⵔⵜ ⴷ ⵏⵏⴻⵄⵍⴻⵜ ⵅ ⵙⵙⵉⴱⴱⴻⵜ ⵏⵏⴻⴽ.

ⵙ ⵜⴰⵎⴰⵔⴰ ⴰⴷ ⵥⵥⴰⵢⴻⵙ ⵜⴻⵛⵛⴻⴷ ⵎⴰⵔⵔⴰ ⵓⵙⵙⴰⵏ ⵏ ⵜⵓⴷⴰⵔⵜ ⵏⵏⴻⴽ.

18 ⵉⵙⴻⵏⵏⴰⵏⴻⵏ ⴷ ⵜⵥⴻⴳⴳⵯⴰⵔⵜ ⵉ ⴷ ⴰⵛ ⴷⴷ ⵖⴰ ⵜⴻⵙⵙⴻⵖⵎⵉ,

ⵓⵛⴰ ⴰⴷ ⵜⴻⵛⵛⴻⴷ ⴰⴼⵙⵓ ⵏ ⵜⴻⵎⵎⵓⵔⵜ.

19 ⵙ ⵜⵉⴷⵉ ⵏ ⵓⵖⴻⵎⴱⵓⴱ ⵏⵏⴻⴽ ⴰⴷ ⵜⴻⵛⵛⴻⴷ ⴰⵖⵔⵓⵎ

ⴰⵍ ⴷⴷ ⵖⴰ ⵜⴷⴻⵡⵍⴻⴷ ⵖⴰⵔ ⵜⴻⵎⵎⵓⵔⵜ ⵉ ⵥⵉ ⵜⴻⵎⵎⴻⴽⵙⵉⴷ,

ⵎⵉⵏⵥⵉ ⵛⴻⴽ ⴷ ⴰⵛⴰⵍ ⵓⵛⴰ ⵖⴰⵔ ⵓⵛⴰⵍ ⵉ ⵖⴰ ⴷⴷ-ⵜⴷⴻⵡⵍⴻⴷ.”

20 ⵉⵍⴰⵖⴰ ⴰⴷⴰⵎ ⵉⵙⴻⵎ ⵏ ⵜⴻⵎⵖⴰⵔⵜ ⵏⵏⴻⵙ ⵃⴰⵡⵡⴰ ⵎⵉⵏⵥⵉ ⵏⴻⵜⵜⴰⵜ ⴷ ⵢⴻⵎⵎⴰⵙ ⵏ ⵎⴰⵔⵔⴰ ⵉⵏⵏⵉ ⵉⴷⴷⴰⵔⴻⵏ. ^□  

21 ⵉⴳⴳⴰ ⵙⵉⴷⵉ ⴰⵔⴻⴱⴱⵉ ⵉ ⴰⴷⴰⵎ ⴷ ⵜⴻⵎⵖⴰⵔⵜ ⵏⵏⴻⵙ ⴰⵔⵔⵓⴹ ⵙ ⵢⵉⵍⴻⵎ ⵓⵛⴰ ⵢⴰⵔⴹ ⴰⵙⴻⵏ ⵜ. ^■   22 ⵉⵏⵏⴰ ⵙⵉⴷⵉ ⴰⵔⴻⴱⴱⵉ: “ⵅⵥⴰⵔ, ⴰⴷⴰⵎ ⵡⴰ ⴰⵇⴰ ⵉⴷⵡⴻⵍ ⴰⵎ ⵉⵊⵊⴻⵏ ⵥⵥⴰⵢⵏⴻⵖ, ⵉⵙⵙⴻⵏ ⵍⵅⴰⵔ ⴷ ⵍⵖⴰⵔ. ⵍⴻⵅⵅⵓ, ⴻⵊⵊ ⵉ-ⵜ ⵡⴰⵔ ⵉⵙⵙⵡⴰⵥⵥⴰⴹ ⴰⴼⵓⵙ ⵏⵏⴻⵙ ⵎⴰⵃⴻⵏⴷ ⴰⴷ ⵉⴽⵙⵉ ⵥⵉ ⵜⵛⴻⵊⵊⴰⵔⵜ ⵏ ⵜⵓⴷⴰⵔⵜ ⵄⴰⵡⴻⴷ, ⴰⴷ ⵢⴻⵛⵛ ⵓ ⵅⴻⵏⵏⵉ ⴰⴷ ⵉⴷⴷⴰⵔ ⵉ ⵍⴻⴱⴷⴰ.” 23 ⵓⵛⴰ ⵉⵙⵙⵓⴼⴼⵓⵖ ⵉ-ⵜ ⵙⵉⴷⵉ ⴰⵔⴻⴱⴱⵉ ⵥⵉ ⵊⵊⴻⵏⵏⴻⵜ ⵏ ⵄⴰⴷⵏ ⵃⵉⵎⴰ ⴰⴷ ⵉⵅⴷⴻⵎ ⵜⴰⵎⵎⵓⵔⵜ ⵉ ⵥⵉ ⵜⵓⵖⴰ ⵉⵎⵎⴻⴽⵙⵉ. 24 ⵢⵓⵥⵥⴻⵍ ⵅ ⴰⴷⴰⵎ ⵓⵛⴰ ⵉⴳⴳⴰ ⵉⴽⵉⵔⵓⴱⴻⵏ ⵛⵛⴰⵔⵇ ⵉ ⵊⵊⴻⵏⵏⴻⵜ ⵏ ⵄⴰⴷⵏ ⴷ ⵢⵉⵊⵊ ⵏ ⵙⵙⵉⴼ ⵉⵜⵜⴻⵃⴷⵓⴷⵓⵇ, ⵉⵜⵜⴻⵛⴹⵉⴹⵉⵃ ⵙⵙⴰ ⴷ ⵙⵙⴰ ⵉ ⵓⵄⴻⵙⵙⵉ ⵅ ⵡⴻⴱⵔⵉⴷ ⵖⴰⵔ ⵜⵛⴻⵊⵊⴰⵔⵜ ⵏ ⵜⵓⴷⴰⵔⵜ. ^□