ⴰⴷⵍⵉⵙ ⵉⵇⴻⴷⴷⵙⴻⵏ
ⵍⵄⴰⵀⴷ ⴰⵇⴷⵉⵎ
ⴷⴻⴳ ⵓⵎⴻⵥⵡⴰⵔⵓ ⵉⵅⵍⴻⵇ-ⴷⴷ ⴰⵔⴻⴱⴱⵉ ⴰⵊⴻⵏⵏⴰ ⴷ ⵜⴻⵎⵎⵓⵔⵜ ⴷ ⵎⴰⵔⵔⴰ ⵎⵉⵏ ⴷⴰⵢⵙⴻⵏ. ⵉⵅⵍⴻⵇ ⵉⵜⴻⵏ-ⴷⴷ ⵎⴰⵔⵔⴰ ⴷⵉ ⵙⴻⵜⵜⴰ ⵏ ⵡⵓⵙⵙⴰⵏ. ⴷⴻⴳ ⵡⴰⵙⵙ ⵡⵉⵙⵙ ⵙⴻⵜⵜⴰ ⵉⵅⵍⴻⵇ-ⴷⴷ ⴱⵏⴰⴷⴻⵎ: ⴰⴷⴰⵎ. ⵣⴻⴳ ⵓⵖⴻⵥⴷⵉⵙ ⵏ ⴰⴷⴰⵎ ⵉⴽⵙⵉ ⴰⵔⴻⴱⴱⵉ ⵃⴰⵡⴰ ⵓⵛⴰ ⵉⴳⴳⴰ ⵉ-ⵜⵜ ⴷ ⵜⴰⵎⵖⴰⵔⵜ ⵉ ⴰⴷⴰⵎ, ⵓⵛⴰ ⵉⴳⴳⴰ ⵉ-ⵜⴻⵏ ⵙ ⵜⵏⴰⵢⴻⵏ ⴷⵉ ⵊⵊⴻⵏⵏⴻⵜ ⵏ ⵄⴰⴷⵏ. ⴷⴻⴳ ⵡⴰⵙⵙ ⵡⵉⵙⵙ ⵙⴻⴱⵄⴰ ⵢⴰⵔⴻⵢⵢⴻⵃ ⴰⵔⴻⴱⴱⵉ ⵥⵉ ⵎⴰⵔⵔⴰ ⵎⵉⵏ ⴷⴷ-ⵉⵅⵍⴻⵇ ⴷ ⵎⵉⵏ ⵉⴳⴳⴰ. (ⵅⵥⴰⵔ ⴰⴷⵍⵉⵙ ⴰⵎⴻⵥⵡⴰⵔⵓ 1 ⴷ 2).
ⴰⴷⵍⵉⵙ ⵉⵇⵇⴰⵔ: “ⵓⵛⴰ ⵉⵥⵔⴰ ⴰⵔⴻⴱⴱⵉ ⵎⴰⵔⵔⴰ ⵎⵉⵏ ⵉⴳⴳⴰ, ⵓ ⵅⵥⴰⵔ, ⵜⵓⵖⴰ ⵉⵚⴱⴻⵃ ⴰⵟⵟⴰⵙ. ⵜⴻⴷⵡⴻⵍ ⴷ ⵜⴰⵎⴻⴷⴷⵉⵜ ⵓⵛⴰ ⵉⴷⵡⴻⵍ ⴷ ⵚⵚⴱⴻⵃ: ⴰⵙⵙ ⵡⵉⵙⵙ ⵙⴻⵜⵜⴰ. ⴰⵎⵎⵓ ⵉ ⵉⵜⵜⵡⴰⴽⴻⵎⵎⴻⵍ ⵓⵊⴻⵏⵏⴰ ⴷ ⵜⴻⵎⵎⵓⵔⵜ ⴷ ⵇⴰⵄ ⴰⵙⴻⵜⵜⴻⴼ ⵏⵙⴻⵏ ⵏ ⵜⵥⴻⵎⵎⴰⵔ. ⴷⴻⴳ ⵡⴰⵙⵙ ⵡⵉⵙⵙ ⵙⴻⴱⵄⴰ ⵉⴽⴻⵎⵎⴻⵍ ⴰⵔⴻⴱⴱⵉ ⵍⵅⴻⴷⵎⴻⵜ ⵏⵏⴻⵙ ⵉ ⵉⴳⴳⴰ ⵓⵛⴰ ⵢⴰⵔⴻⵢⵢⴻⵃ ⴷⴻⴳ ⵡⴰⵙⵙ ⵡⵉⵙⵙ ⵙⴻⴱⵄⴰ ⵥⵉ ⵎⴰⵔⵔⴰ ⵍⵅⴻⴷⵎⴻⵜ ⵏⵏⴻⵙ ⵉ ⵉⴳⴳⴰ. ⵉⴱⴰⵔⴻⴽ ⴰⵔⴻⴱⴱⵉ ⴰⵙⵙ ⵡⵉⵙⵙ ⵙⴻⴱⵄⴰ ⵓⵛⴰ ⵉⵇⴻⴷⴷⴻⵙ ⵉ-ⵜ, ⵎⵉⵏⵥⵉ ⴷⴰⵢⴻⵙ ⵉ ⵢⴰⵔⴻⵢⵢⴻⵃ ⵥⵉ ⵎⴰⵔⵔⴰ ⵍⵅⴻⴷⵎⴻⵜ ⵏⵏⴻⵙ ⵉ ⴷⴷ-ⵉⵅⵍⴻⵇ ⴰⵔⴻⴱⴱⵉ ⵎⴰⵃⴻⵏⴷ ⴰⴷ ⵜⵜ ⵉⴳⴳ ⴰⵎⴻⵏⵏⵉ. " (ⴰⵎⴻⵥⵡⴰⵔⵓ 1:31-2:3).
ⵙ ⵜⵉⴷⴻⵜⵜ ⵜⵓⵖⴰ ⴰⴷⴰⵎ ⴷ ⵎⵎⵉⵙ ⵏ ⴰⵔⴻⴱⴱⵉ ⴰⵎⴻⵥⵡⴰⵔⵓ ⵉ ⴷⴷ-ⵉⵅⵍⴻⵇ (ⵅⵥⴰⵔ ⵄⴰⵡⴻⴷ ⵍⵓⴽⴰ 3:38). ⴰⵔⴻⴱⴱⵉ ⵡⴰⵔ ⵖⴰⵔⴻⵙ ⴱⵓ ⵜⴻⵎⵖⴰⵔⵜ ⴰⵎ ⴱⵏⴰⴷⴻⵎ ⵉⴼⴻⵏⵏⴰⵏ ⴷ ⴰⵎⴻⴷⵏⵓⴱ ⵖⴰⵔⴻⵙ ⵜⴰⵎⵖⴰⵔⵜ ⵓⵛⴰ ⵢⵓⵢⵓⵔ ⴰⴽⵉⴷⴻⵙ. ⵀⴰⵛⴰ, ⴰⵔⴻⴱⴱⵉ ⴷ ⴰⵎⵇⴻⴷⴷⴰⵙ, ⵡⴰⵔ ⵉⵥⴻⵎⵎⴰⵔ ⴰⴷ ⵉⵇⴱⴻⵍ ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⴷ ⴰⵎⴻⴷⵏⵓⴱ ⴰⴷ ⵢⵉⵍⵉ ⴰⴽⵉⴷⴻⵙ. ⵉⵅⵍⴻⵇ-ⴷⴷ ⴰⵔⴻⴱⴱⵉ ⴰⴷⴰⵎ ⵥⴻⴳ ⵓⵛⴰⵍ ⵏ ⵜⴻⵎⵎⵓⵔⵜ ⵓⵛⴰ ⵅⴻⵏⵏⵉ ⵉⴳⴳⴰ ⴰⵔⴻⴱⴱⵉ ⵃⴰⵡⴰ ⵥⴻⴳ ⵓⵖⴻⵥⴷⵉⵙ ⵏⵏⴻⵙ. ⵎⴰⵏ ⵡⴻⵏ ⵉⴵⴰⵏ ⴷ ⴱⴰⴱⴰⵙ ⵏ ⴰⴷⴰⵎ? ⵎⵖⵉⵔ ⴰⵔⴻⴱⴱⵉ ⴷ ⵡⴻⵏⵏⵉ ⵉ ⵉⴵⴰⵏ ⴷ ⴱⴰⴱⴰⵙ ⵏ ⴰⴷⴰⵎ. ⵎⴰ ⵏⵥⴻⵎⵎⴰⵔ ⴰⴷ ⵏⵉⵏⵉ: ⴰⵔⴻⴱⴱⵉ ⵡⴰⵔ ⵖⴰⵔⴻⵙ ⴱⵓ ⵎⵎⵉⵙ ⴰⵎ ⵜ ⵇⵇⴰⵔⴻⵏ ⵡⴰⵟⵟⴰⵙ ⵏ ⵉⵡⴷⴰⵏ? ⵄⴻⵎⵎⴰⵔⵚ. ⵙ ⵜⵉⴷⴻⵜⵜ ⴰⵔⴻⴱⴱⵉ ⵖⴰⵔⴻⵙ ⵉⵊⵊ ⵏ ⵎⵎⵉⵙ ⵉ ⴷⴷ-ⵉⴳⴳⴰ ⵥⴻⴳ ⵓⵛⴰⵍ ⵏ ⵜⴻⵎⵎⵓⵔⵜ ⵍⴰⵎⵉ ⴷⴷ-ⵉⵚⵓⴹ ⵍⴻⵄⵡⵉⵏ ⵏ ⵜⵓⴷⴰⵔⵜ ⴷⴻⴳ ⵡⴻⵏⵥⴰⵔⴻⵏ ⵏⵏⴻⵙ (ⴰⵎⵥ. 2:7) ⵓⵛⴰ ⵉⴷⵡⴻⵍ ⴷ ⵉⵊⵊ ⵏ ⴱⵏⴰⴷⴻⵎ ⵉⴷⴷⴰⵔⴻⵏ!
ⴰⵡⴰⵔⵏⵉ ⵎⴰⵏ ⴰⵢⴰ ⵉⵎⵙⴰⵔ ⴰⵇⴰ ⴰⴷⴰⵎ ⴷ ⵃⴰⵡⴰ ⵅⴹⴰⵏ ⴰⴽ-ⴷ ⴰⵔⴻⴱⴱⵉ, ⴽⵙⵉⵏ ⵥⵉ ⵍⵖⵉⴵⴻⵜ ⵏ ⵜⵛⴻⵊⵊⴰⵔⵜ ⵏ ⵜⵓⵙⵙⵏⴰ ⵏ ⵍⵅⴰⵔ ⴷ ⵍⵖⴰⵔ ⴷⵉ ⵍⵡⴻⵙⵜ ⵏ ⵊⵊⴻⵏⵏⴻⵜ ⴰⵡⴰⵔⵏⵉ ⵍⴰⵎⵉ ⵉⵖⵡⴰ ⵛⵛⵉⵟⴰⵏ ⵃⴰⵡⴰ, ⵍⴰⵎⵉ ⵅⴰⵙ ⴷⴷ-ⵉⵅⴹⴻⵍ ⵙ ⵡⴰⴷⴷⵓⴷ ⵏ ⵓⴼⵉⵖⴰⵔ ... ⵅⴰⵙ ⵓⵛⴰ ⵜⴻⵡⵛⴰ ⵃⴰⵡⴰ ⵥⵉ ⵍⵖⵉⴵⴻⵜ ⵏ ⵜⵛⴻⵊⵊⴰⵔⵜ ⵉ ⴰⴷⴰⵎ. ⵏⴻⵜⵜⴰ ⵡⴰⵔ ⵢⵓⴳⵉ, ⵉⵅⴹⴰ ⴰⴽ-ⴷ ⴰⵔⴻⴱⴱⵉ ⵥⵉ ⵎⵉⵏⵥⵉ ⵢⵓⵎⵓⵔ ⴰⵔⴻⴱⴱⵉ ⴰⴷⴰⵎ ⵎⴰⵃⴻⵏⴷ ⵡⴰⵔ ⵜⵜⴻⵜⵜⴻⵏ ⵥⵉ ⵜⵛⴻⵊⵊⴰⵔⵜ ⵏ ⵜⵓⵙⵙⵏⴰ ⵏ ⵍⵅⴰⵔ ⴷ ⵍⵖⴰⵔ, ⵓⵍⴰ ⵥⵉ ⵜⵛⴻⵊⵊⴰⵔⵜ ⵏ ⵜⵓⴷⴰⵔⵜ, ⵜⵉⵏⵏⵉ ⵥⵉ ⵍⵡⴻⵙⵜ ⵏ ⵊⵊⴻⵏⵏⴻⵜ ⵄⴰⴷⵏ.
ⴰⴷⴰⵎ ⵜⵓⵖⴰ ⵖⴰⵔⴻⵙ ⵜⵓⴷⴰⵔⵜ ⴰⴽ-ⴷ ⴰⵔⴻⴱⴱⵉ ⵉ ⵍⴻⴱⴷⴰ, ⵜⵓⵖⴰ ⵖⴰⵔⴻⵙ ⵍⴻⵀⵏⴰ ⴷ ⵎⴰⵔⵔⴰ ⵍⵅⴰⵔ ⵏ ⵊⵊⴻⵏⵏⴻⵜ ⵏ ⵄⴰⴷⵏ! ⵎⴰⵛⴰ ⵉⵙⵙⴻⵅⵙⴰⵔ ⵎⴰⵔⵔⴰ ⴰⵢⴰ ⵙ ⵉⵊⵊ ⵏ ⴷⴷⴻⵏⴱ ⵉ ⵉⵊⵊⴰ ⴰⴷ ⵜ ⵜⴻⴳⴳ ⵜⴰⵎⵖⴰⵔⵜ ⵏⵏⴻⵙ, ⵅⴻⵏⵏⵉ ⵏⴻⵜⵜⴰ ⵙ ⵢⵉⵅⴻⴼ ⵏⵏⴻⵙ ⵉⵅⴹⴰ ⴰⴽ-ⴷ ⴰⵔⴻⴱⴱⵉ. ⵉⵙⵙⵓⴼⴼⴻⵖ ⴰⵔⴻⴱⴱⵉ ⴰⴷⴰⵎ ⴷ ⵃⴰⵡⴰ ⵥⵉ ⵊⵊⴻⵏⵏⴻⵜ ⵏ ⵄⴰⴷⵏ, ⵢⴰⵔⴻⵥⵥⵓ ⴰⴷ ⵉⵏⴻⵖ ⴱⵏⴰⴷⴻⵎ ⵥⴻⴳ ⵓⵖⴻⵥⴷⵉⵙ ⵏ ⴷⴷⴻⵏⴱ ⵉ ⵉⴳⴳⴰ ⴰⴷⴰⵎ, ⵎⴰⵛⴰ ⵥⴻⴳ ⵓⵖⴻⵥⴷⵉⵙ ⵏ ⴰⵔⵔⴻⵃⵎⴻⵜ ⵏⵏⴻⵙ ⵜⴰⵎⴻⵇⵇⵔⴰⵏⵜ ⵉⵅⵙ ⴰⵔⴻⴱⴱⵉ ⴰⴷ ⵉⵙⵙⴻⵏⵊⴻⵎ ⴱⵏⴰⴷⴻⵎ ...
ⴰⵡⴰⵔⵏⵉ ⵍⴰⵎⵉ ⵉⵙⵙⵓⴼⴼⴻⵖ ⴰⵔⴻⴱⴱⵉ ⴰⴷⴰⵎ ⴷ ⵃⴰⵡⴰ ⵥⵉ ⵊⵊⴻⵏⵏⴻⵜ ⵏ ⵄⴰⴷⵏ, ⵙⵙⴻⴹⵃⴰⵏ ⵏⵉⵜⵏⵉ ⵉⵊⵊ ⵥⴻⴳ ⵡⴻⵏⵏⴻⵖⵏⵉ, ⴷⴻⵡⵍⴻⵏ ⴷ ⵉⵡⴷⴰⵏ ⵉⴼⴻⵏⵏⴰⵏ, ⵡⴰⵔ ⵖⴰⵔⵙⴻⵏ ⵄⴰⴷ ⵜⵓⴷⴰⵔⵜ ⵉⵜⵜⴷⵓⵎⴰⵏ ⴰⴽ-ⴷ ⴰⵔⴻⴱⴱⵉ ⴰⵎ ⵇⴱⴻⵍ.
ⵎⴰⵛⴰ ⴰⵔⴻⴱⴱⵉ ⴷ ⵡⴻⵏⵏⵉ, ⴰⵇⴰ-ⵜ ⴷ ⵜⵓⴷⴰⵔⵜ ⵉ ⵡⴰⵔ ⵉⴼⴻⵏⵏⵉⵏ, ⵜⵓⴷⴰⵔⵜ ⵉⵜⵜⴷⵓⵎⴰⵏ ⵉ ⵉⴵⴰⵏ ⵥⵉ ⵍⴻⴱⴷⴰ ⵓⵛⴰ ⴰⴷ ⵜⵉⵍⵉ ⵉ ⵍⴻⴱⴷⴰ ⵏ ⵍⴻⴱⴷⴰⵜ!
ⵙ ⴷⴷⴻⵏⴱ ⵏ ⴱⵏⴰⴷⴻⵎ ⵉⴷⵡⴻⵍ ⴷⵉⵏ ⵉⵊⵊ ⵏ ⵡⴻⵃⴼⵓⵔ ⴷ ⴰⵎⴻⵇⵇⵔⴰⵏ ⵊⴰⵔ ⴰⵔⴻⴱⴱⵉ ⴷ ⴱⵏⴰⴷⴻⵎ, ⵉⵊⵊ ⵏ ⵡⴻⵃⴼⵓⵔ ⵡⴰⵔ ⵉⵥⴻⵎⵎⴰⵔ ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⴰⴷ ⵜ ⵉⵥⵡⴰ. ⴰⵟⵟⴰⵙ ⵏ ⵉⵡⴷⴰⵏ ⵇⵇⴰⵔⴻⵏ: ⴰⵔⴻⴱⴱⵉ ⴷ ⴰⵔⵃⵉⵎ, ⴰⴷ ⵜⴰⵖ ⴰⴷ ⴰⵢⵉ ⵉⵙⴰⵎⴻⵃ ⴷⴷⵏⵓⴱ ⵉ ⴳⴳⵉⵖ. ⴰⴷ ⵜⴰⵖ ⴰⴷ ⵥⴻⵎⵎⴰⵔⴻⵖ ⴰⴷ ⵄⴷⵓⵖ ⴰⵃⴼⵓⵔ, ⵄⴰⴷ ⵎⴰⵍⴰ ⵉⵜⵜⵅⴻⵚⵚⴰ ⴰⵢⵉ ⴰⴷ ⴽⴽⴻⵖ ⴷⵉ ⵜⵎⴻⵙⵙⵉ. ⴰⵎⵎⵓ ⵉ ⴷ ⴰⵙⴻⵏ ⵉⵜⵜⵖⵉⵍ ⵉ ⵡⴰⵟⵟⴰⵙ ⵏ ⵉⵡⴷⴰⵏ. ⵎⴰⵛⴰ ⵜⴰⵎⴻⵙⵍⴰⵛⵜ ⵡⴰⵔ ⵜⴻⴵⵉ ⴰⵎⴻⵏⵏⵉ. ⴰⵔⴻⴱⴱⵉ ⵡⴰⵔ ⵉⴵⵉ ⴷ ⴰⵔⵃⵉⵎ ⵡⴰⵀⴰ, ⵎⴰⵛⴰ ⵏⴻⵜⵜⴰ ⵄⴰⵡⴻⴷ ⴷ ⴰⵎⵇⴻⴷⴷⴰⵙ ⴷ ⴰⵎⵙⴻⴳⴳⴻⴷ. ⵎⴰ ⵉⵥⴻⵎⵎⴰⵔ ⴰⵔⴻⴱⴱⵉ ⴰⴷ ⵉⴱⴹⴻⵍ ⵜⵉⴼⵔⴰⵙ ⵏⵏⴻⵙ ⵉⵙⴻⴳⴳⴷⴻⵏ ⴰⵎ ⵉ ⵖⴰ ⵉⵇⴱⴻⵍ ⵉⵊⵊ ⴱⵏⴰⴷⴻⵎ ⵉⵅⴻⵎⵊⴻⵏ ⴰⴽ-ⴷ ⵎⴰⵔⵔⴰ ⴷⴷⵏⵓⴱ ⵏⵏⴻⵙ ⵉ ⵉⴳⴳⴰ? ⵄⴻⵎⵎⴰⵔⵚ. ⵣⵉ ⵊⵊⵉⵀⴻⵜ ⵏⵏⴻⵖⵏⵉ, ⵎⴰ ⵉⵥⴻⵎⵎⴰⵔ ⴰⵔⴻⴱⴱⵉ ⴰⴷ ⵉⵀⴻⵍⵍⴻⴽ ⵎⴰⵔⵔⴰ ⵉⵡⴷⴰⵏ ⵙ ⵎⵉⵏⵥⵉ ⵏⴻⵜⵜⴰ ⴷ ⴰⵎⵙⴻⴳⴳⴻⴷ ⴷ ⴰⵎⵇⴻⴷⴷⴰⵙ ⵓ ⵏⵉⵜⵏⵉ ⴷ ⵉⵎⴻⴷⵏⴰⴱ? ⵎⴰ ⵉⵥⴻⵎⵎⴰⵔ ⴰⵔⴻⴱⴱⵉ ⴰⴷ ⵉⴱⴹⴻⵍ ⴰⵔⵔⴻⵃⵎⴻⵜ ⵜⴰⵎⴻⵇⵇⵔⴰⵏⵜ ⵏⵏⴻⵙ ⴷⵉ ⵟⵟⵡⴻⵄ ⵏ ⵜⵙⴻⴳⴷⴰ ⵏⵏⴻⵙ? ⵄⴻⵎⵎⴰⵔⵚ!
ⵎⵉⵏ ⴷⵉⵏ ⵄⴰⴷ … ?
ⴰⵔⴻⴱⴱⵉ ⵉⵡⵛⴰ ⵉⵊⵊ ⵏ ⵡⴰⵡⴰⵍ ⵉ ⴰⴷⴰⵎ ⴷ ⵃⴰⵡⴰ, ⵓⵎⵉ ⵜⵓⵖⴰ ⵉⵏⵏⴰ ⵉ ⵛⵛⵉⵟⴰⵏ ⴰⵎⴻⵇⵇⵔⴰⵏ, ⵡⴻⵏⵏⵉ ⴷⴷ-ⵉⵅⴻⴹⵍⴻⵏ ⵖⴰⵔ ⵃⴰⵡⴰ ⴰⵎ ⵓⴼⵉⵖⴰⵔ: "ⴰⴷ ⴳⴳⴻⵖ ⵍⴻⵄⴷⴰⵡⴰⵜ ⵊⴰⵔ ⴰⵛ ⴷ ⵜⴻⵎⵖⴰⵔⵜ, ⵊⴰⵔ ⵥⵥⴰⵔⵉⵄⴻⵜ ⵏⵏⴻⴽ ⴷ ⵥⵥⴰⵔⵉⵄⴻⵜ ⵏⵏⴻⵙ. ⴷ ⵜⴻⵏⵏⵉ ⵏⵏⴻⵙ ⴰⴷ ⵜⴻⵍⴱⴻⵥ ⴰⵥⴻⴵⵉⴼ ⵏⵏⴻⴽ, ⵓ ⵛⴻⴽ ⴰⴷ ⴰⵙ ⵜⵍⴻⴱⵥⴻⴷ ⴰⵏⵉⵔⵥ ⵏⵏⴻⵙ." (ⵅⵥⴰⵔ ⴰⴷⵍⵉⵙ ⴰⵎⴻⵥⵡⴰⵔⵓ 3:15).
ⵎⴰⵏ ⴰⵢⴰ ⵉⵅⵙ ⴰⴷ ⵢⵉⵏⵉ ⴰⵇⴰ ⴷⵉⵏ ⵉⵛⵜ ⵏ ⵜⴻⵡⵡⴰⵔⵜ ⵉ ⵓⵙⴻⵏⵊⴻⵎ ⵉ ⴰⴷⴰⵎ ⴷ ⵃⴰⵡⴰ ⵙ ⵡⴻⴱⵔⵉⴷ ⵏ ⵡⴰⵡⴰⵍ ⵉ ⵉⵡⵛⴰ ⴰⵔⴻⴱⴱⵉ ⵥⵉ ⵊⵊⵉⵀⴻⵜ ⵏ ⵥⵥⴰⵔⵉⵄⴻⵜ ⵏ ⵜⴻⵎⵖⴰⵔⵜ, ⵉⵅⵙ ⴰⴷ ⵢⵉⵏⵉ ⵥⵉ ⵊⵊⵉⵀⴻⵜ ⵏ ⵓⵃⴻⵏⵊⵉⵔ ⵏⵏⴻⵙ.
ⵜⵓⵔⵓ-ⴷⴷ ⵃⴰⵡⴰ ⵉⵃⴻⵏⵊⵉⵔⴻⵏ: ⵇⴰⵢⵉⵏ ⴷ ⵀⴰⴱⵉⵍ ⵓ ⴰⵡⴰⵔⵏⵉ ⴰⵙⴻⵏ ⵉⵏⵏⴻⵖⵏⵉ. ⵎⴰⵛⴰ ⵇⴰⵢⵉⵏ, ⴰⵃⴻⵏⵊⵉⵔ ⴰⵎⴻⵥⵡⴰⵔ, ⵉⵏⵖⴰ ⵓⵎⴰ ⴰⵙ ⵀⴰⴱⵉⵍ (ⴰⵃⴻⵏⵊⵉⵔ ⵏⵏⴻⵙ ⵡⵉⵙⵙ ⵜⵏⴰⵢⴻⵏ). ⴰⵎⵎⵓ ⴷⴷ-ⵉⴱⴰⵏ ⴰⵇⴰ ⵇⴰⵢⵉⵏ ⵡⴰⵔ ⵜ ⵜⵓⵖⵉ ⴷ ⵥⵥⴰⵔⵉⵄⴻⵜ ⵏ ⵜⴻⵎⵖⴰⵔⵜ ⵉ ⵉⵡⴰⵄⴷ ⴰⵔⴻⴱⴱⵉ ⵉ ⵃⴰⵡⴰ, ⵎⵉⵏⵥⵉ ⵏⴻⵜⵜⴰ ⵡⴰⵔ ⵉⵍⴱⵉⵥ ⵛⴰ ⴰⵥⴻⴵⵉⴼ ⵏ ⵓⴼⵉⵖⴰⵔ, ⵎⴰⵛⴰ ⵉⵏⵖⴰ ⵓⵎⴰ ⴰⵙ. ⴰⵔⴻⴱⴱⵉ ⵉⴳⴳⴰ ⴰⴷ ⵉⵙⵙⴻⴽⴽ ⵇⴰⵢⵉⵏ ⵖⴰⵔ ⵉⵊⵊ ⵏ ⵡⴻⵎⵛⴰⵏ ⵉⴳⴳⵯⴻⵊ. "ⵅⴻⵏⵏⵉ ⵉⵏⵏⴰ ⵇⴰⵢⵉⵏ ⵉ ⵙⵉⴷⵉ: 'ⵍⵄⵉⵇⴰⴱ ⵉⵏⵓ ⵉⵎⵖⴰⵔ ⵡⴻⵏⵏⵉ ⵓⵎⵉ ⵡⴰⵔ ⵥⴻⵎⵎⴰⵔⴻⵖ ⴰⴷ ⵜ ⴽⵙⵉⵖ. ⴰⵇⴰ ⵛⴻⴽ ⴰⵙⵙ-ⴰ ⵜⵓⵥⵥⵍⴻⴷ-ⴷⴷ ⵅⴰⴼⵉ ⵥⴻⴳ ⵓⵖⴻⵎⴱⵓⴱ ⵏ ⵜⴻⵎⵎⵓⵔⵜ-ⴰ ⵓⵛⴰ ⵥⴻⴳ ⵓⵖⴻⵎⴱⵓⴱ ⵏⵏⴻⴽ ⴰⴷ ⵜⵜⵡⴰⴼⴼⴰⵔⴻⵖ, ⴰⴷ ⵉⵍⵉⵖ ⴷ ⴰⵎⴻⵏⵏⴻⵊⵔⵓ ⴷ ⴰⵎⴻⵜⵍⵓⵄ ⴷⵉ ⵜⴻⵎⵎⵓⵔⵜ ⵓⵛⴰ ⴰⴷ ⵢⵉⵍⵉ ⵎⴰⵔⵔⴰ ⵡⴻⵏⵏⵉ ⴷ ⴰⵢⵉ ⵉ ⵖⴰ ⵢⴰⴼⴻⵏ ⴰⴷ ⴰⵢⵉ ⵉⵏⴻⵖ.' ⵅⴻⵏⵏⵉ ⵉⵏⵏⴰ ⴰⵙ ⵙⵉⴷⵉ: 'ⵙ ⵓⵢⴰ ⵎⴰⵔⵔⴰ ⵡⴻⵏⵏⵉ ⵉ ⵖⴰ ⵉⵏⵖⴻⵏ ⵇⴰⵢⵉⵏ, ⴰⴷ ⵥⵥⴰⵢⴻⵙ ⵏⵜⴰⵇⵎⴻⵏ ⵙⴻⴱⵄⴰ ⵏ ⵜⵡⴰⵍⴰⵡⵉⵏ.' ⵓⵛⴰ ⵉⴳⴳⴰ ⵙⵉⴷⵉ ⵍⴻⵄⵍⴰⵎⴻⵜ ⵉ ⵇⴰⵢⵉⵏ ⴱⴻⵍⵍⵉ ⵡⴰⵔ ⵜ ⵉⵏⴻⵇⵇ ⵛⴰ ⵡⴻⵏⵏⵉ ⵜ ⵖⴰ ⵢⴰⴼⴻⵏ." (ⴰⴷⵍⵉⵙ ⴰⵎⴻⵥⵡⴰⵔⵓ 4:13-15) ⵙ ⵓⵢⴻⵏⵏⵉ ⵏⴻⵜⵜⵡⴰⵍⴰ ⴱⴻⵍⵍⵉ ⴰⵔⴻⴱⴱⵉ ⵢⴰⵔⵃⴻⵎ ⵅ ⵇⴰⵢⵉⵏ, ⵎⴰⵛⴰ ⴷⵉ ⵍⵡⴻⵇⵜ ⴷ ⵉⵛⵜⴻⵏ ⵉⵇⵇⵉⵎ ⴰⵔⴻⴱⴱⵉ ⵉⵜⵜᵉⵟⵟⴻⴼ ⴷⵉ ⵜⵙⴻⴳⴷⴰ ⴷ ⵍⵎⴰⵏⴻⵜ ⵏⵏⴻⵙ ⴰⵎ ⵉⵙⵙⵉⴳⴳⵯⴻⵊ ⵇⴰⵢⵉⵏ ⵥⵉ ⵜⴻⵎⵎⵓⵔⵜ ⴰⵎ ⵎⴰⵎⵎⴻⵛ ⴷⴷ-ⵉⵙⵙⵓⴼⴼⴻⵖ ⵓⵍⴰ ⴷ ⴰⴷⴰⵎ ⴷ ⵃⴰⵡⴰ ⵥⵉ ⵊⵊⴻⵏⵏⴻⵜ ⵄⴰⴷⵏ. ⵎⴰⵛⴰ ⴷⵉ ⵍⵡⴻⵇⵜ ⴷ ⵉⵛⵜⴻⵏ ⵉⵇⵇⵉⵎ ⵉⵟⵟⴻⴼ ⵓⵍⴰ ⴷⴻⴳ ⵡⴰⵡⴰⵍ ⵏⵏⴻⵙ ⵉ ⵉⵡⴰⵄⴷ ⵥⵥⴰⵜ ⵉ ⵡⵓⴷⴻⵎ ⵏ ⴰⴷⴰⵎ ⴷ ⵃⴰⵡⴰ.
ⵉⴱⴰⵏ-ⴷⴷ ⵍⴻⵅⵅⵓ ⴰⵇⴰ ⵉⵃⴻⵏⵊⵉⵔⴻⵏ ⵏ ⴰⴷⴰⵎ ⴷ ⵃⴰⵡⴰ ⴷ ⵉⵎⴻⴷⵏⴰⴱ ⴰⵎ ⴰⴷⴰⵎ ⵙ ⵢⵉⵅⴻⴼ ⵏⵏⴻⵙ, ⴰⵡⴰⵔⵏⵉ ⵍⴰⵎⵉ ⵉⵡⴹⴰ ⴷⵉ ⴷⴷⴻⵏⴱ, ⵉⴷⵡⴻⵍ ⴷ ⵉⵊⵊ ⵏ ⴱⵏⴰⴷⴻⵎ ⴷ ⴰⵎⴻⴷⵏⵓⴱ. ⵓ ⵎⴰⵔⵔⴰ ⵏⴻⵛⵛⵉⵏ ⴷ ⵜⴰⵔⵡⴰ ⵏ ⴰⴷⴰⵎ, ⵎⴰⵏ ⴰⵢⴰ ⵉⵅⵙ ⴰⴷ ⵢⵉⵏⵉ ⴱⴻⵍⵍⵉⵏ ⵏⴻⵛⵛⵉⵏ ⴷ ⵉⵎⴻⴷⵏⴰⴱ. ⵏⴻⵜⵜⵡⴰⵍⴰ ⵅⴻⵏⵏⵉ ⴰⵇⴰ ⵙ ⴷⴷⴻⵏⴱ ⵏ ⵉⵊⵊⴻⵏ ⵉⴷⵡⴻⵍ ⴷⴷⴻⵏⴱ ⵖⴰⵔ ⵎⴰⵔⵔⴰ.
ⵎⴰⵛⴰ ⵎⴰⵏ ⵡⴻⵏ ⵥⵉ ⵊⵊⵉⵍ ⵏ ⴰⴷⴰⵎ ⴷ ⵃⴰⵡⴰ ⴰⴷ ⵢⵉⵍⵉ ⴷ ⴰⵎⵙⴻⵏⵊⴻⵎ ⵉ ⵜⵓⵖⴰ ⵉⵡⴰⵄⴷ ⴰⵔⴻⴱⴱⵉ ⴰⴷⴰⵎ ⴷ ⵃⴰⵡⴰ? ⴰⵔⴻⴱⴱⵉ ⵉⵇⴱⴻⵍ ⵜⴰⵖⴰⵔⵚⵜ ⵏ ⵃⴰⴱⵉⵍ, ⵎⴰⵛⴰ ⵃⴰⴱⵉⵍ ⵉⵎⵎⵓⵜ, ⴰⵛⴻⵀⵀⴰⴷ ⴷ ⴰⵎⴻⵥⵡⴰⵔⵓ ⴷⵉ ⵟⵟⵡⴻⵄ ⵏ ⵍⵉⵎⴰⵏ ⴷⵉ ⴰⵔⴻⴱⴱⵉ, ⵎⵉⵏⵥⵉ ⵉⴷⴰⵎⵎⴻⵏ ⵏⵏⴻⵙ ⵉⵙⴻⴳⴳⴻⴷⴻⵏ ⵜⵜⵍⴰⵖⴰⵏ-ⴷⴷ ⵉ ⴰⵔⴻⴱⴱⵉ. ⵎⴰⵛⴰ ⵀⴰⴱⵉⵍ ⵙ ⵢⵉⵅⴻⴼ ⵏⵏⴻⵙ ⵡⴰⵔ ⵉⵥⴻⵎⵎⴰⵔ ⴰⴷ ⵉⵄⴷⵓ ⴰⵃⴼⵓⵔ ⵏ ⵍⵎⴻⵡⵜ ⵏⵏⵉ ⴷⴷ-ⵢⵓⵙⵉⵏ ⵥⵉ ⵙⵙⵉⴱⴱⴻⵜ ⵏ ⴷⴷⴻⵏⴱ! ⵙ ⴷⴷⴻⵏⴱ ⵏ ⵢⵉⵊⵊⴻⵏ ⵉⵎⵓⵟⵟⵉ ⴷⴷⴻⵏⴱ ⵖⴰⵔ ⵎⴰⵔⵔⴰ. ⵏⴻⵜⵜⵡⴰⵍⴰ ⴰⵇⴰ ⴰⵡⴰⵍ ⵉ ⵉⵡⵛⴰ ⴰⵔⴻⴱⴱⵉ ⵡⴰⵔ ⵉⵜⵜⵡⴰⴽⴻⵎⵎⴻⵍ ⵄⴰⴷ.
ⵍⴽⵓⴼⵔ ⴷ ⵜⵓⵄⴻⴼⴼⵏⴰ ⵏ ⵉⵡⴷⴰⵏ ⵅ ⵜⴻⵎⵎⵓⵔⵜ ⵜⵜⵔⴰⵃ ⵜⵜⵎⴰⵔⵏⵉ ⵄⴰⴷ ⴽⵜⴰⵔ. ⵡⴰⵔ ⵏⴷⵉⵎⴻⵏ ⵡⴰⵔ ⵜⵓⴱⴻⵏ ⵛⴰ ⴷⵉ ⵙⵙⵉⴱⴱⴻⵜ ⵏ ⵎⴰⵔⵔⴰ ⵎⵉⵏ ⵉⵎⵙⴰⵔⴻⵏ ⴰⴽ-ⴷ ⴰⴷⴰⵎ ⴷ ⵃⴰⵡⴰ, ⵓⵛⴰ ⵎⴰⵔⵔⴰ ⵓⵢⵓⵔⴻⵏ ⴰⴱⵔⵉⴷ ⵏⵙⴻⵏ. ⴰⵔⴻⴱⴱⵉ ⵜⵓⵖⴰ ⵉⵅⵙ ⴰⴷ ⵜⴻⵏ ⵉⵙⵙⵀⴻⵍⵍⴻⴽ ⵎⴰⵔⵔⴰ ⵙ ⵉⵛⵜ ⵏ ⵙⵙⴻⵃⵍⴻⵜ ⴷ ⵜⴰⵎⴻⵇⵇⵔⴰⵏⵜ ⵎⴰⵃⴻⵏⴷ ⴰⴷ ⵖⴰⵔⵇⴻⵏ ⵎⴰⵔⵔⴰ. ⵎⴰⵛⴰ ⴰⵔⴻⴱⴱⵉ ⵉⴳⴳⴰ ⵍⴻⵃⵙⴰⴱ ⵉ ⵉⵊⵊ ⵏ ⵡⴻⵔⵢⴰⵥ ⴷ ⴰⵎⵙⴻⴳⴳⴻⴷ, ⵏⴻⵜⵜⴰ ⴰⵇⴰ-ⵜ ⴷ ⴰⴷⴰⵎ. ⵉⵅⴹⴰⵔ ⴰⵔⴻⴱⴱⵉ ⵏⵓⵃ ⵃⵉⵎⴰ ⴰⴷ ⵜ ⵉⵙⵙⴻⵏⵊⴻⵎ ⴰⴽ-ⴷ ⵜⴻⵎⵖⴰⵔⵜ ⵏⵏⴻⵙ ⴷ ⵜⵍⴰⵜⴰ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵜⴻⵎⵖⴰⵔⵉⵏ ⵏⵙⴻⵏ. ⵢⵓⵎⵓⵔ ⴰⵔⴻⴱⴱⵉ ⵏⵓⵃ ⵃⵉⵎⴰ ⴰⴷ ⵉⴱⵏⴰ ⵉⵊⵊ ⵏ ⵓⵖⴰⵔⵔⴰⴱⵓ ⴷ ⴰⵎⴻⵇⵇⵔⴰⵏ ⵓⵛⴰ ⵏⵓⵃ ⵉⴳⴳⴰ ⵎⵉⵏ ⴷ ⴰⵙ ⵉⵏⵏⴰ ⴰⵔⴻⴱⴱⵉ. ⵍⴰⵎⵉ ⵉⴽⴻⵎⵎⴻⵍ ⵍⴻⴱⵏⵉ ⵏ ⵓⵖⴰⵔⵔⴰⴱⵓ, ⵉⵏⵏⴰ ⴰⵔⴻⴱⴱⵉ ⵉ ⵏⵓⵃ: “ⴰⴷⴻⴼ ⵛⴻⴽ ⴷ ⵎⴰⵔⵔⴰ (ⵍⴰⴵ ⵏ) ⵜⴰⴷⴷⴰⵔⵜ ⵏⵏⴻⴽ ⴷⴻⴳ ⵓⵖⴰⵔⵔⴰⴱⵓ, ⵎⵉⵏⵥⵉ ⵥⵔⵉⵖ ⵛⴻⴽ ⴷ ⴰⵎⵙⴻⴳⴳⴻⴷ ⵥⵥⴰⵜ ⵉ ⵡⵓⴷⴻⵎ ⵉⵏⵓ ⴷⵉ ⵊⵊⵉⵍ-ⴰ." (ⵅⵥⴰⵔ ⴰⴷⵍⵉⵙ ⴰⵎⴻⵡⴰⵔⵓ - ⵓⴷⴻⵎ ⵡⵉⵙⵙ 7:1). ⵉⵃⴻⵙⴱ ⵉ-ⵜ- ⴰⵔⴻⴱⴱⵉ ⴷ ⴰⵎⵙⴻⴳⴳⴻⴷ ⵥⵉ ⵙⵙⵉⴱⴻⵜ ⵏ ⵍⵉⵎⴰⵏ ⵉ ⵖⴰⵔⴻⵙ ⴷⵉ ⴰⵔⴻⴱⴱⵉ, ⵏⵓⵃ ⵉⵜⵜⵉⵇⵇ ⴷⵉ ⴰⵔⴻⴱⴱⵉ (ⵅⵥⴰⵔ ⴰⴷⵍⵉⵙ ⴰⵎⴻⵥⵡⴰⵔⵓ - ⵓⴷⴻⵎ 9:21). ⴰⵔⴻⴱⴱⵉ ⵉⵙⵙⵀⴻⵍⵍⴻⴽ ⵎⴰⵔⵔⴰ ⵉⵡⴷⴰⵏ ⵙ ⵙⵙⴻⵃⵍⴻⵜ ⵜⴰⵎⴻⵇⵇⵔⴰⵏⵜ ⵉ ⵉⴳⴳⴰ ⵅ ⵜⴻⵎⵎⵓⵔⵜ ⵓ ⵅ ⵎⴰⵔⵔⴰ ⵜⵉⵇⵉⵛⵛⴰⵜⵉⵏ ⵏ ⵉⴷⵓⵔⴰⵔ ⵢⵓⵄⵍⴰⵏ. ⵜⵜⵡⴰⵙⵙⵏⴻⵊⵎⴻⵏ ⵎⵖⵉⵔ ⵏⵓⵃ ⴷ ⵜⴻⵎⵖⴰⵔⵜ ⵏⵏⴻⵙ ⴷ ⵜⵍⴰⵜⴰ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⴰⴽ-ⴷ ⵜⴻⵎⵖⴰⵔⵉⵏ ⵏⵙⴻⵏ ⵡⴰⵀⴰ, ⵜⵎⴻⵏⵢⴰ ⵏ ⵉⵡⴷⴰⵏ ⴰⴽ-ⴷ ⵎⴰⵔⵔⴰ ⵉⵎⵓⴷⴷⴰⵔⴻⵏ ⵎⵉⵏ ⵅⴻⴼ ⵉⵡⴻⵚⵚⴰ ⴰⵔⴻⴱⴱⵉ ⴰⴷ ⵜⴻⵏ ⵉⴽⵙⵉ ⴷⴻⴳ ⵓⵖⴰⵔⵔⴰⴱⵓ.
ⵎⴰⵢⴻⵎⵎⵉ ⵜⵜⵡⴰⵙⵙⵏⴻⵊⵎⴻⵏ ⵏⵉⵜⵏⵉ? ⵙ ⵎⵉⵏⵥⵉ ⴰⵔⴻⴱⴱⵉ ⵉⵅⴹⴰⵔ ⵏⵓⵃ ⵓ ⵉⴳⴳⴰ ⴰⵙ ⵍⴻⵃⵙⴰⴱ ⵉ ⵍⵉⵎⴰⵏ ⵏⵏⴻⵙ (ⵎⴰⵏ ⴰⵢⴰ ⵉⵅⵙ ⴰⴷ ⵢⵉⵏⵉ ⵜⵜⵉⵇⵇⴻⵜ ⵏⵏⴻⵙ ⴷⵉ ⴰⵔⴻⴱⴱⵉ) ⴷ ⵜⵙⴻⴳⴷⴰ ⴰⵎ ⵎⴰⵎⵎⴻⵛ ⵏⴻⵇⵇⴰⵔ ⴷⴻⴳ ⵡⴻⴷⵍⵉⵙ ⵉⵇⴻⴷⴷⵙⴻⵏ ⴷⵉ ⵜⴻⴱⵔⴰⵜ ⵉ ⵉⵄⵉⴱⵔⴰⵏⵉⵢⵢⴻⵏ 11:7: "ⵙ ⵍⵉⵎⴰⵏ ⵜⵓⵖⴰ ⵏⵓⵃ ⵉⵜⵜⴻⴳⴳⵯⴻⴷ, ⴰⵡⴰⵔⵏⵉ ⵍⴰⵎⵉ ⴷ ⴰⵙ ⵉⵜⵜⵡⴰⵏⵏⴰ ⵎⵉⵏ ⵜⵓⵖⴰ ⵄⴰⴷ ⵡⴰⵔ ⴷⴷ-ⵉⴱⵉⵏⴻⵏ, ⵓⵛⴰ ⵉⴳⴳⴰ ⴰⵖⴰⵔⵔⴰⴱⵓ ⵉ ⵓⵙⴻⵏⵊⴻⵎ ⵏ ⵉⵃⴻⵏⵊⵉⵔⴻⵏ ⵏ ⵜⵡⴰⵛⵓⵏⵜ ⵏⵏⴻⵙ. ⵙ ⵎⴰⵏ ⴰⵢⴰ ⴰⵇⴰ ⵉⵃⴽⴻⵎ ⴷⴷⵓⵏⴻⵛⵜ ⵓⵛⴰ ⵉⴷⵡⴻⵍ ⴷ ⴰⵡⵔⵉⵜ ⵏ ⵜⵙⴻⴳⴷⴰ ⵜⴻⵏⵏⵉ ⵉⴵⴰⵏ ⵄⵍⴰⵃⵙⴰⴱ ⵍⵉⵎⴰⵏ."
ⵜⵜⵡⴰⵙⵙⵏⴻⵊⵎⴻⵏ ⵜⵍⴰⵜⴰ ⵏ ⵉⵃⴻⵏⵊⵉⵔⴻⵏ ⵏ ⵏⵓⵃ ⴰⴽⵉⴷⴻⵙ: ⵛⴰⵎ, ⵃⴰⵎ ⴷ ⵢⴰⴼⵉⵟ. ⵓⵔⵡⴻⵏ ⴰⵙⴻⵏ-ⴷⴷ ⵄⴰⵡⴻⴷ ⵉⵃⴻⵏⵊⵉⵔⴻⵏ. ⵉⵃⴻⵏⵊⵉⵔⴻⵏ ⵏ ⵛⴰⵎ ⵜⵓⵖⴰ-ⵜⴻⵏ ⴷ ⵄⵉⵍⴰⵎ, ⴰⵛⵛⵓⵔ, ⴰⵔⴼⴰⴽⵛⴰⴷ, ⵍⵓⴷ ⴷ ⴰⵔⴰⵎ. … ⴰⵔⴼⴰⴽⵛⴰⴷ ⵉⵊⵊⴰ-ⴷⴷ ⵛⴰⵍⴰⵃ ⵓ ⵛⴰⵍⴰⵃ ⵉⵊⵊⴰ-ⴷⴷ ⵄⴰⴱⵉⵔ. ⵅⴻⵏⵏⵉ: “ⵜⵜⵡⴰⵔⵡⴻⵏ-ⴷⴷ ⵉ ⵄⴰⴱⵉⵔ ⵜⵏⴰⵢⴻⵏ ⵏ ⵉⵃⴻⵏⵊⵉⵔⴻⵏ. ⵉⵊⵊⴻⵏ ⵇⵇⴰⵔⴻⵏ ⴰⵙ ⴼⴰⵍⴰⵊ, ⵎⵉⵏⵥⵉ ⴷⴻⴳ ⵡⵓⵙⵙⴰⵏ ⵏⵏⴻⵙ ⵜⴻⵜⵜⵡⴰⴼⴻⴵⴻⵇ ⵜⴻⵎⵎⵓⵔⵜ, ⵓ ⵇⵇⴰⵔⴻⵏ ⵉ ⵓⵎⴰⵙ ⵢⵓⵇⵟⴰⵏ.” (ⴰⵎⴻⵥⵡⴰⵔⵓ 10:25). ⴰⴷ ⵜⴰⵖ ⵜⵓⵖⴰ ⵜⴰⵎⵎⵓⵔⵜ ⵇⴱⴻⵍ ⵄⴰⴷ ⴷ ⵉⵛⵜⴻⵏ ⵓⵛⴰ ⵜⴻⵜⵜⵡⴰⴼⴻⴵⴻⵇ ⵜⴻⵎⵎⵓⵔⵜ ⴷⴻⴳ ⵡⵓⵙⵙⴰⵏ ⵏⵏⵉ. ⴷⴻⴳ ⵓⵎⴻⵥⵔⵓⵢ ⵏ ⵡⴻⵅⵍⴰⵇ ⵏ ⴷⴷⵓⵏⵏⵉⵜ ⵏⵓⴼⴰ ⴰⵡⴰⵍⴻⵏ-ⴰ: “ⵓⵛⴰ ⵉⵏⵏⴰ ⴰⵔⴻⴱⴱⵉ: “ⴰⴷ ⵎⵓⵏⴻⵏ ⵡⴰⵎⴰⵏ ⵉ ⵉⴵⴰⵏ ⵙⵡⴰⴷⴷⴰⵢ ⵉ ⵓⵊⴻⵏⵏⴰ ⵖⴰⵔ ⵉⵊⵊ ⵏ ⵡⴻⵎⵛⴰⵏ ⵎⴰⵃⴻⵏⴷ ⴰⴷ ⴷⴷ-ⵉⴱⴰⵏ ⵍⴱⴰⵔⵔ!” ⵓⵛⴰ ⴰⵎⵎⵓ ⵉ ⵜⴻⵎⵙⴰⵔ.” (ⴰⵎⴻⵥⵡⴰⵔⵓ 1:9)
ⵅⴻⵏⵏⵉ ⵏⵓⴼⴰ ⴱⴻⵍⵍⵉ ⵜⵓⵖⴰ ⴷⵉⵏ ⵉⵊⵊ ⵏ ⵡⴻⵎⵛⴰⵏ ⵏ ⵡⴰⵎⴰⵏ ⵓ ⴰⵔⴻⵏⴷⴰⴷ ⵏⵏⴻⵙ ⵉⵛⵜ ⵏ ⵜⴻⵎⵎⵓⵔⵜ ⵡⴰⵔ ⵜᵉⵜⵜⵡⴰⵎⵙⴻⴱⴹⵉ, ⵜⵓⵥⴻⵖ, ⵡⴰⵔ ⵉⴵⵉ ⴰⵎ ⵎⴰⵎⵎⴻⵛ ⵜⵜ ⵏⵓⴼⴰ ⵍⴻⵅⵅⵓ: ⵉⵛⵜ ⵏ ⵜⴰⵎⵎⵓⵔⵜ ⵜᵉⵜⵜⵡⴰⵎⵙⴻⴱⴹⴰ ⴷⴻⴳ ‘ⵉⵥⵉⵢⵏⴰⵏ’ ⵉⵎⴻⵇⵇⵔⴰⵏⴻⵏ ⵓⵎⵉ ⵏⴻⵇⵇⴰⵔ ⵉⴼⵔⵉⵇⵉⵢⴰ, ⵓⵔⵓⴱⴰ, ⴰⵎⵔⵉⴽⴰ, ⴰⵙⵉⵢⴰ, ⵓⵙⵜⵔⴰⵍⵉⵢⴰ ⴰⴽ-ⴷ ⵜⴻⴳⵥⵉⵔⵉⵏ ⵏⵙⴻⵏ ⴷ ⵍⴻⴱⵃⵓⵔ ⵊⴰⵔ ⴰⵙⴻⵏ.
ⵎⴰⵍⴰ ⵜⵓⵖⴰ ⴷⵉⵏ ⵙ ⵜⵉⴷⴻⵜⵜ ⵉⵛⵜ ⵏ ⵜⴻⵎⵎⵓⵔⵜ ⵜⵓⵥⴻⵖ ⵡⴰⵔ ⵜᵉⴻⵜⵜⵡⴰⵎⵙⴻⴱⴹⵉ, ⴰⴷ ⵜⴰⵖ ⵜⴻⵜⵜⵡⴰⴼⴻⴵⴻⵇ ⵜⴻⵎⵎⵓⵔⵜ ⵏⵏⵉ ⴷⴻⴳ ⵡⵓⵙⵙⴰⵏ ⵏ ⴼⴰⵍⴰⵊ ⵓⵛⴰ ⴱⴰⵏⴻⵏ ⵜⵜ ⵉ-ⴷⴷ ⵜⵃⴻⵥⵥⵉⵥⵉⵏ ⵓⵛⴰ ⴱⴷⴰⵏ ⵡⴰⵎⴰⵏ ⴰⴷ ⴰⵥⵥⵍⴻⵏ ⴷⴰⵢⵙⴻⵏⵜ, ⴷⴻⵡⵍⴻⵏⵜ ⴷ ⵍⴻⴱⵃⵓⵔ, ⴰⵎ ⵜⴻⵏ ⵏⴻⵜⵜⵡⴰⵔⴰ ⵍⴻⵅⵅⵓ.
ⵎⴰⵏ ⴰⵢⴰ ⵎⴰⵔⵔⴰ ⵉⵎⵙⴰⵔ ⵡⴰⵔ ⵉⴵⵉ ⴰⵟⵟⴰⵙ ⵏ ⵉⵙⴻⴳⴳⵯⵓⵙⴰ ⴰⵡⴰⵔⵏⵉ ⵍⴰⵎⵉ ⴷⴷ-ⵜⵓⵙⴰ ⵚⵚⴻⵃⵍⴻⵜ.
ⵎⴰⵛⴰ ⵜⴻⵎⵙⴰⵔ ⵓⵍⴰ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⵏⵏⴻⵖⵏⵉ ⴷⴻⴳ ⵡⵓⵙⵙⴰⵏ ⵏⵏⵉ ⵉ ⵥⵉ ⵥⴻⵄⵎⴰ ‘ⵜᵉⵜⵜⵡⴰⴼⴵⴻⵇ’ ⵜⴻⵎⵎⵓⵔⵜ. ⴰⵡⴰⵔⵏⵉ ⵉ ⵙⵙⴻⵃⵍⴻⵜ ⵜⵜⵡⴰⴱⴻⵥⵥⵄⴻⵏ ⵉⵡⴷⴰⵏ ⵅ ⵜⵎⵎⵓⵔⴰ ⵓⵎⵉ ⵉⵙⵙⴻⵎⵙⴻⴱⴹⴰ ⴰⵔⴻⴱⴱⵉ ⵉⵍⵙⴰⵡⴻⵏ ⵏⵙⴻⵏ ⵊⴰⵔ ⴰⵙⴻⵏ ⵍⴰⵎⵉ ⵜⵓⵖⴰ ⴱⴻⵏⵏⴰⵏ ⵍⴱⵓⵔⵊ ⵏ ⴱⴰⴱⵉⵍ ⴷⵉ ⵜⴻⵎⵎⵓⵔⵜ ⵏ ⵛⵉⵏⵄⴰⵔ (ⵍⵄⵉⵔⴰⵇ ⵏ ⵢⵉⴹⴰ). ⴰⵔⴻⵥⵥⵓⵏ ⴰⴷ ⴰⵡⴹⴻⵏ ⵖⴰⵔ ⵓⵊⴻⵏⵏⴰ, ⵎⵉⵏⵥⵉ ⴷⴻⵡⵍⴻⵏ ⴷ ⵉⵎⵄⴻⴼⴼⴰⵔⴻⵏ ⴷⴻⴳ ⵡⵓⵍⴰⵡⴻⵏ ⵏⵙⴻⵏ (ⵅⵥⴰⵔ ⴰⵎⴻⵥⵡⴰⵔⵓ 11). ⴰⵎ ⴱⴷⴰⵏ ⵙⵙⴰⵡⴰⵍⴻⵏ ⵙ ⵉⵍⵙⴰⵡⴻⵏ ⵉⴼⴰⵔⵥⴻⵏ, ⵡⴰⵔ ⵥⴻⵎⵎⴰⵔⴻⵏ ⵄⴰⴷ ⴰⴷ ⵥⴻⴷⵖⴻⵏ ⴰⴽ-ⴷ ⵡⴰⵢⴰⵡⵢⴰ, ⴳⴳⵯⴻⴷⴻⵏ ⵉⵊⵊ ⵥⴻⴳ ⵡⴻⵏⵏⴻⵖⵏⵉ. ⵎⴽⵓⵍ ⵍⴳⴻⵏⵙ ⵉⵟⵟⴻⴼ ⴰⴱⵔⵉⴷ ⵏⵏⴻⵙ, ⵖⴰⵔ ⵉⵛⵜ ⵏ ⵜⴻⵎⵎⵓⵔⵜ ⵉ ⴷ ⴰⵙⴻⵏ ⵉⵙⵙⵛⴻⵏ ⴰⵔⴻⴱⴱⵉ. ⴰⵎⵎⵓ ⴷⴷ-ⴷⵃⴰⵔⴻⵏ ⵍⴻⴳⵏⵓⵙ ⵏ ⴷⴷⵓⵏⴻⵛⵜ, ⴷⴷⵓⵏⴻⵛⵜ ⵡⴰⵔ ⵜⴻⴵⵉ ⵄⴰⴷ ⴷ ⵜⴻⵎⵎⵓⵔⵜ ⴷ ⵉⵊⵊⴻⵏ ⴰⵎ ⵇⴱⴻⵍ ⵓ ⵉⵍⴻⵙ ⵏ ⴱⵏⴰⴷⴻⵎ ⵡⴰⵔ ⵉⴵⵉ ⵄⴰⴷ ⴷ ⵢⵉⵍⴻⵙ ⴷ ⵉⵊⵊⴻⵏ ⴰⵎ ⵇⴱⴻⵍ ⵓ ⵉⵡⴷⴰⵏ ⵡⴰⵔ ⴵⵉⵏ ⵄⴰⴷ ⴷ ⵍⴳⴻⵏⵙ ⴷ ⵉⵊⵊⴻⵏ ⴰⵎ ⵎⴰⵎⵎⴻⵛ ⵜⴻⵏ ⵜⵓⵖⴰ ⵥⴻⴳ ⵓⵎⴻⵥⵡⴰⵔⵓ. ⴰⵇⴰ ⴷⵉⵏ ⵜⵉⵎⵎⵓⵔⴰ ⵉⴼⴰⵔⵥⴻⵏ ⴷ ⵍⴻⴳⵏⵓⵙ ⵉⴼⴰⵔⵥⴻⵏ ⴰⴽ-ⴷ ⵉⵍⵙⴰⵡⴻⵏ ⵏⵙⴻⵏ ⵉⴼⴰⵔⵥⴻⵏ.
ⵉⵅⴹⴰⵔ ⵙⵉⴷⵉ ⴰⵔⴻⴱⴱⵉ ⵉⴱⵔⴰⵀⵉⵎ, ⵉⵏⵏⴰ ⴰⵙ: “ⴼⴼⴻⵖ ⵥⵉ ⵜⴻⵎⵎⵓⵔⵜ ⵏⵏⴻⴽ, ⵥⵉ ⵜⴻⵎⵎⵓⵔⵜ ⵎⴰⵏⵉ ⴷⴷ-ⵜⵅⴻⵍⵇⴻⴷ ⵓ ⵥⵉ ⵜⴰⴷⴷⴰⵔⵜ ⵏ ⴱⴰⴱⴰⵛ, ⵔⵓⵃ ⵖⴰⵔ ⵜⴻⵎⵎⵓⵔⵜ ⵉ ⴷ ⴰⵛ ⵉ ⵖⴰ ⵙⵙⴻⵛⵏⴻⵖ. ⴰⴷ ⵥⵥⴰⵢⴻⴽ ⴷⴷ-ⵙⵙⵓⴼⴼⵖⴻⵖ ⵉⵊⵊ ⵏ ⵍⴳⴻⵏⵙ ⵉⵎⵖⴰⵔ, ⴰⴷ ⴰⵛ ⴱⴰⵔⴽⴻⵖ ⵓ ⴰⴷ ⵙⵙⴻⵎⵖⴰⵔⴻⵖ ⵉⵙⴻⵎ ⵏⵏⴻⴽ ⵓⵛⴰ ⵉⵍⵉ ⴷ ⵛⴻⴽ ⵄⴰⵡⴻⴷ ⴷ ⵍⴱⴰⵔⴰⴽⴰ. ⴰⴷ ⴱⴰⵔⴽⴻⵖ ⵡⴻⵏⵏⵉ ⵛⴻⴽ ⵉ ⵖⴰ ⵉⴱⴰⵔⴽⴻⵏ ⵓ ⵡⴻⵏⵏⵉ ⵛⴻⴽ ⵉ ⵖⴰ ⵉⵏⴻⵄⵍⴻⵏ, ⴰⴷ ⵜ ⵏⴻⵄⵍⴻⵖ. ⴷⴰⵢⴻⴽ ⵉ ⵖⴰ ⵜⵜⵡⴰⴱⴰⵔⴽⴻⵏⵜ ⵎⴰⵔⵔⴰ ⵜⵡⴰⵛⵓⵏⵉⵏ ⵏ ⵜⴻⵎⵎⵓⵔⵜ.” (ⴰⵎⴻⵥⵡⴰⵔⵓ 12:1, 2)
ⴰⵔⴻⴱⴱⵉ ⵉⵅⴹⴰⵔ ⵉⴱⵔⴰⵀⵉⵎ, ⵉⵡⴰⵄⴷ ⴰⵙ ⴰⴷ ⵥⵥⴰⵢⴻⵙ ⴷⴷ-ⵢⴻⵊⵊ ⵉⵊⵊ ⵏ ⵍⴳⴻⵏⵙ ⵉⵎⵖⴰⵔ ⵉ ⵖⴰ ⵢⵉⵍⵉⵏ ⴷ ⵍⴱⴰⵔⴰⴽⴰ ⵉ ⵎⴰⵔⵔⴰ ⵍⴻⴳⵏⵓⵙ. ⵉⵡⴰⵄⴷ ⴰⵙ ⵄⴰⵡⴻⴷ ⵉⵛⵜ ⵏ ⵜⴻⵎⵎⵓⵔⵜ, ⵎⴰⵛⴰ ⵎⴰⵏ ⴰⵢⴰ ⵡⴰⵔ ⵉⵜⵜⵉⵍⵉ ⴰⵎ ⵎⴰⵎⵎⴻⵛ ⵜ ⵉⴳⴳⴰ ⴰⴽ-ⴷ ⵍⴻⴳⵏⵓⵙ ⵏ ⴷⴷⵓⵏⴻⵛⵜ ⵉⵏⵏⵉ ⵉⵜⵜⵡⴰⵎⵙⴻⴱⴹⴰⵏ ⵅ ⵜⴻⵎⵎⵓⵔⵜ ⵄⵍⴰⵃⵙⴰⴱ ⵉⵍⵙⴰⵡⴻⵏ ⵏⵙⴻⵏ ⴷ ⵜⵉⵎⵎⵓⵔⴰ ⵏⵙⴻⵏ. ⵍⵍⴰ, ⵎⴰⵏ ⴰⵢⴰ ⴰⴷ ⵢⵉⵍⵉ ⵙ ⵡⴰⵡⴰⵍ ⵉ ⵉⵡⵛⴰ ⴰⵔⴻⴱⴱⵉ ⵉ ⵉⴱⵔⴰⵀⵉⵎ.
ⵔⴰⵊⴰⵏ ⵉⴱⵔⴰⵀⵉⵎ ⴷ ⵙⴰⵔⴰ ⴰⴷ ⵢⵉⵍⵉ ⵍⵡⴰⵄⴷ ⵉ ⵉⴱⵔⴰⵀⵉⵎ, ⵔⴰⵊⴰⵏ ⴰⵍⴰⵎⵉ ⴷⴻⵡⵍⴻⵏ ⵡⴰⵔ ⵥⴻⵎⵎⴰⵔⴻⵏ ⴰⴷ ⵟⵟⴼⴻⵏ ⵉⵃⴻⵏⵊⵉⵔⴻⵏ ⵓⵎⵉ ⴷⴻⵡⵍⴻⵏ ⵎⵖⴰⵔⴻⵏ ⴰⵟⵟⴰⵙ. ⴷⴻⴳ ⵡⵓⵙⵙⴰⵏ ⵏⵏⵉ ⵉⴹⵀⴰⵔ-ⴷⴷ ⴰⵔⴻⴱⴱⵉ ⵉ ⵉⴱⵔⴰⵀⵉⵎ ⴷ ⵙⴰⵔⴰ, ⵉⵡⴰⵄⴷ ⵉ-ⵜⴻⵏ ⵙ ⵉⵊⵊ ⵏ ⵓⵃⴻⵏⵊⵉⵔ. ⴰⵡⴰⵔⵏⵉ ⵍⴰⵎⵉ ⵉⵄⴷⵓ ⵍⵎⵉⵊⴰⵍ ⵏ ⵍⵡⴻⵇⵜ ⵉ ⵉⵏⵏⴰ ⴰⵔⴻⴱⴱⵉ ⵉ ⵙⴰⵔⴰ, ⵜⵓⵔⵓ-ⴷⴷ ⴰⵃⴻⵏⵊⵉⵔ, ⵜⵓⵖⴰ ⴰⵃⴻⵏⵊⵉⵔ-ⴰ ⵅ ⵍⴻⵃⵙⴰⴱ ⵏ ⵍⵡⴰⵄⴷ ⵏ ⴰⵔⴻⴱⴱⵉ. ⵎⴰ ⵜⵓⵖⴰ ⵏⴻⵜⵜⴰ ⴷ ⵥⵥⴰⵔⵉⵄⴻⵜ ⵉ ⵥⵉ ⵉⵡⴰⵄⴷ ⴰⵔⴻⴱⴱⵉ ⵃⴰⵡⴰ? ⴻⵊⵊ ⴰⵏⴻⵖ ⴰⴷ ⵏⵥⴰⵔ.
ⵉⵜⵜⴰⵔ ⴰⵔⴻⴱⴱⵉ ⵥⵉ ⵉⴱⵔⴰⵀⵉⵎ ⵎⴰⵃⴻⵏⴷ ⴰⴷ ⴰⵙ ⵉⵡⵛ ⵎⵎⵉⵙ ⵉⵙⵃⴰⵇ ⴷ ⵜⴰⵖⴰⵔⵚⵜ (=ⴷⴷⴱⵉⵃⴻⵜ). ⵉⴱⵔⴰⵀⵉⵎ ⵉⵙⵙⴳⴰⵄⵄⴻⴷ ⵜⴰⵅⴻⴷⵎⴻⵛⵜ ⵃⵉⵎⴰ ⴰⴷ ⵉⵖⴰⵔⵚ ⵉ ⵎⵎⵉⵙ, ⵎⴰⵛⴰ ⴷⵉ ⵜⵙⴰⵄⵄⴻⵜ ⵏⵏⵉ ⵉⵍⴰⵖⴰ ⴰⵙ-ⴷⴷ ⵍⵎⴰⵍⴰⴽ ⵏ ⵙⵉⴷⵉ ⵥⴻⴳ ⵓⵊⴻⵏⵏⴰ: “ⵉⴱⵔⴰⵀⵉⵎ, ⵉⴱⵔⴰⵀⵉⵎ!” ⵏⴻⵜⵜⴰ ⵉⵏⵏⴰ: “ⵏⴻⵛⵛ ⴰⵇⴰ ⴰⵢⵉ ⴷⴰ!” ⵅⴻⵏⵏⵉ ⵉⵏⵏⴰ ⴰⵙ: “ⵡⴰⵔ ⵙⵡⵉⵥⵥⵉⴹ ⴰⴼⵓⵙ ⵏⵏⴻⴽ ⵖⴰⵔ ⵓⵃⴻⵏⵊⵉⵔ ⵏⵉⵖ ⴰⴷ ⴰⵙ ⵜⴻⴳⴳⴻⴷ ⵛⴰ, ⵎⵉⵏⵥⵉ ⵍⴻⵅⵅⵓ ⴰⵇⴰ ⵙⵙⵏⴻⵖ ⴱⴻⵍⵍⵉ ⵜⴻⴳⴳⵯⴻⴷⴻⴷ ⴰⵔⴻⴱⴱⵉ ⵓ ⵡⴰⵔ ⵅⴰⴼⵉ ⵜⴻⵙⵙⵄⵉⵥⵥⴻⴷ ⴰⵢⴻⵏⵏⵉ ⵏ ⵎⵎⵉⵛ.” (ⴰⵎⴻⵥⵡⴰⵔⵓ 22:10, 11).
ⵎⴰⵢⴻⵎⵎⵉ ⵉⵎⵏⴻⵄ ⴰⵔⴻⴱⴱⵉ ⵉⴱⵔⴰⵀⵉⵎ ⵎⴰⵃⴻⵏⴷ ⴰⴷ ⵉⵡⵛ ⵎⵎⵉⵙ ⴷ ⵜⴰⵖⴰⵔⵚⵜ ⵓⵛⴰ ⵉⵡⵛⴰ ⴰⵙ ⵅⴻⵏⵏⵉ ⵉⵥⵎⴰⵔ. ⵎⴰ ⵉⵥⵎⴰⵔ ⵃⵙⴻⵏ ⵥⵉ ⵎⵎⵉⵙ? ⵄⴻⵎⵎⴰⵔⵚ! ⵎⴰⵢⴻⵎⵎⵉ ⵅⴻⵏⵏⵉ? ⵎⴰ ⵎⵉⵏⵥⵉ ⴰⵔⴻⴱⴱⵉ ⵉⵅⵙ ⴰⴷ ⵉⵊⴰⵔⵔⴻⴱ ⵉⴱⵔⴰⵀⵉⵎ ⵡⴰⵀⴰ? ⵍⵍⴰ! ⴰⵇⴰ ⴷⵉⵏ ⵉⵛⵜ ⴷ ⵍⵃⴰⵊⵊⴻⵜ ⴷ ⵜⴰⵎⴻⵇⵇⵔⴰⵏⵜ ⵅ ⵜⴰⵏⵉⵜⴰ. ⵎⴰⵏ ⵜⴰ? ⴰⵇⴰ ⵎⵎⵉⵙ ⵏ ⵉⴱⵔⴰⵀⵉⵎ ⵡⴰⵔ ⵉⵥⴻⵎⵎⴰⵔ ⴰⴷ ⵉⴽⴽⴻⵙ ⴷⴷⴻⵏⴱ ⵉ ⵉⴳⴳⴰ ⴰⴷⴰⵎ, ⵎⵉⵏⵥⵉ ⵎⴰⵔⵔⴰ ⵉⵡⴷⴰⵏ ⴷ ⵉⵎⴻⴷⵏⴰⴱ. ⵓⵍⴰ ⴷ ⵎⵎⵉⵙ ⵏ ⵉⴱⵔⴰⵀⵉⵎ ⵡⴰⵔ ⵉⵏⴻⴼⴼⴻⵄ ⵉ ⵓⵅⴻⴵⴻⵚ ⵏ ⴷⴷⴻⵏⴱ ⵏ ⴱⵏⴰⴷⴻⵎ, ⵙ ⵎⵉⵏⵥⵉ ⵎⴰⵔⵔⴰ ⵉⵡⴷⴰⵏ ⴷ ⵉⵎⴻⴷⵏⴰⴱ. ⵓⵍⴰ ⴷ ⵎⵎⵉⵙ ⵏ ⵉⴱⵔⴰⵀⵉⵎ ⵡⴰⵔ ⵉⵥⴻⵎⵎⴰⵔ ⴰⴷ ⵉⴽⴽⴻⵙ ⴷⴷⵏⵓⴱ ⵉ ⴷⴰⵢⴻⵙ ⵉⵥⴻⴷⵖⴻⵏ ⵓ ⴷⵉ ⵎⴰⵔⵔⴰ ⵉⵡⴷⴰⵏ.
ⵣⵉ ⵉⴱⵔⴰⵀⵉⵎ ⵉⵜⵜⵡⴰⵅⵍⴻⵇ-ⴷⴷ ⵍⴳⴻⵏⵙ ⵏ ⵉⵙⵔⴰⵢⵉⵍ, ⵎⵉⵏⵥⵉ ⵏⴻⵜⵜⴰ ⵉⵊⵊⴰ-ⴷⴷ ⵉⵙⵃⴰⵇ, ⵉⵙⵃⴰⵇ ⵉⵊⵊⴰ-ⴷ ⵢⴰⵄⵇⵓⴱ ⵓ ⵢⴰⵄⵇⵓⴱ ⵉⵊⵊⴰ-ⴷⴷ 12 ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⵓⵛⴰ ⴰⵔⴻⴱⴱⵉ ⵉⵙⴻⵎⵎⴰ ⴰⵙ ⵉⵙⵔⴰⵢⵉⵍ. ⵅⴻⵏⵏⵉ ⴷⴻⵡⵍⴻⵏ 12 ⵏ ⵉⵃⴻⵏⵊⵉⵔⴻⵏ ⴷ 12 ⵏ ⵜⵇⴻⴱⴱⴰⵍ ⵏ ⵉⵙⵔⴰⵢⵉⵍ. ⵢⵓⵙⵓⴼ ⴷ ⵉⵊⵊⴻⵏ ⵥⵥⴰⵢⵙⴻⵏ, ⵎⴰⵛⴰ ⵓⵎⵉ ⴰⵢⵜⵎⴰⵙ ⵛⴰⵔⵀⴻⵏⵜ, ⵥⵥⴻⵏⵥⴻⵏ ⵜ ⴷⵉ ⵎⵉⵚⵔⴰ. ⵎⴰⵛⴰ ⵢⵓⵙⵓⴼ ⵉⵜⵜⵉⵇⵇ ⴷⵉ ⴰⵔⴻⴱⴱⵉ ⵓⵛⴰ ⴰⵔⴻⴱⴱⵉ ⵉⴳⴳⴰ ⵉ-ⵜ ⴷ ⴰⵊⴻⴵⵉⴷ ⵏ ⵎⵉⵚⵔⴰ ⵙⴰⴷⵓ ⵓⴼⵓⵙ ⵏ ⴼⵉⵔⵄⵓⵏ, ⴰⵊⴻⴵⵉⴷ ⵏ ⵎⵉⵚⵔⴰ. ⵎⴰⵛⴰ ⵜⵓⵖⴰ ⵉⵊⵊ ⵏ ⵍⴰⵥ ⴷ ⴰⵎⴻⵇⵇⵔⴰⵏ ⵉⴳⴳⵓⵔ ⴰⴷ ⵉⵍⵇⴻⴼ ⵜⴰⵎⵎⵓⵔⵜ ⵏ ⵎⵉⵚⵔⴰ ⵉ ⵢⵉⵊⵊ ⵏ ⵍⵎⵉⵊⴰⵍ ⵏ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⴰⵡⴰⵔⵏⵉ ⵉ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⵏ ⵓⴼⴻⵢⵢⴻⴹ. ⵉⵥⵡⴰⵔ ⵉⵙⵙⵉⵡⴻⵍ ⴰⵔⴻⴱⴱⵉ ⵅ ⵍⴰⵥ ⵏⵏⵉ ⵉ ⴼⵉⵔⵄⵓⵏ ⴷⵉ ⵜⵉⵔⵊⴰ ⵓⵛⴰ ⵢⵓⵙⵓⴼ ⵉⴼⴻⵙⵙⴰⵔ ⴰⵙ ⵎⵉⵏ ⵜⴻⵅⵙ ⴰⴷ ⵜⵉⵏⵏⵉ ⵜⵉⵔⵊⴰ ⵏⵏⴻⵙ. ⵉⴳⴳⴰ ⵢⵓⵙⵓⴼ ⵙ ⵜⵉⵖⵉⵜ ⵓⵛⴰ ⵉⵅⴻⵎⵎⴻⵍ ⴰⵟⵟⴰⵙ ⵏ ⵉⵎⴻⵏⴷⵉ ⴷⵉ ⵙⴻⴱⵄⴰ ⵏ ⵉⵙⴻⴳⴳⵯⵓⵙⴰ ⵏ ⵓⴼⴻⵢⵢⴻⴹ ⵃⵉⵎⴰ ⴰⴷ ⵖⴰⵔⵙⴻⵏ ⵢⵉⵍⵉ ⵎⴰⵛⵛⴰ ⴷⴻⴳ ⵡⵓⵙⵙⴰⵏ ⵏ ⵍⴰⵥ ⵉ ⴷⴷ-ⵢⵓⵙⵉⵏ ⵅ ⵎⵉⵚⵔⴰ ⵓ ⵅ ⵎⴰⵔⵔⴰ ⴷⴷⵓⵏⴻⵛⵜ. ⴰⵎⵎⵓ ⵉ ⵉⵙⵙⴻⵏⵊⴻⵎ ⵢⵓⵙⵓⴼ ⵎⴰⵔⵔⴰ ⵍⴻⴳⵏⵓⵙ ⵎⴰⵖⴰⵔ ⵎⴰⵔⵔⴰ ⵓⵙⵉⵏ-ⴷⴷ ⵖⴰⵔⴻⵙ ⴷⵉ ⵎⵉⵚⵔⴰ, ⵜⵜⴰⵔⴻⵏ ⵥⵥⴰⵢⴻⵙ ⵃⵉⵎⴰ ⴰⴷ ⵟⵟⴼⴻⵏ ⵉⵎⴻⵏⴷⵉ ⵥⴻⴳ ⵉⴼⴰⵙⵙⴻⵏ ⵏⵏⴻⵙ. ⵓⵍⴰ ⴷ ⴰⵢⵜⵎⴰⵙ ⵉⵏⵏⵉ ⵜⵓⵖⴰ ⵢⴰⵔⴻⵥⵥⵓⵏ ⵎⴰⵛⵛⴰ, ⵓⵙⵉⵏ-ⴷⴷ ⵖⴰⵔ ⵎⵉⵙⵍⴰ. ⵏⵉⵜⵏⵉ ⵓⴼⵉⵏ ⴰⵇⴰ ⵓⵎⴰⵜⵙⴻⵏ ⵢⵓⵙⵓⴼ ⵉⴷⴷⴰⵔ ⵄⴰⴷ, ⵉⴷⵡⴻⵍ ⴷ ⴰⵊⴻⴵⵉⴷ ⵏ ⵎⵉⵚⵔⴰ, ⵓⵛⴰ ⴳⴳⵯⴻⴷⴻⵏ ⵥⵥⴰⵢⴻⵙ. ⵎⴰⵛⴰ ⵏⴻⵜⵜⴰ ⵢⴰⵔⵃⴻⵎ ⵅⴰⵙⴻⵏ, ⵉⵖⴼⴰⵔ ⴰⵙⴻⵏ ⴷⴷⵏⵓⴱ ⵏⵙⴻⵏ ⵉ ⵥⵉ ⴽⵉⴷⴻⵙ ⵅⴹⴰⵏ, ⵓⵛⴰ ⵉⵡⵛⴰ ⴰⵙⴻⵏ ⵓ ⵉ ⴱⴰⴱⴰⵙ ⵢⴰⵄⵇⵓⴱ ⵎⴰⵛⵛⴰ ⴷ ⵉⵊⵊ ⵏ ⵡⴻⵎⵛⴰⵏ ⴷⵉ ⵜⴻⵎⵎⵓⵔⵜ ⵏ ⵎⵉⵙⵍⴰ ⵃⵉⵎⴰ ⴰⴷ ⴷⵉⵏ ⵥⴻⴷⵖⴻⵏ.
ⵜⵓⵖⴰ ⵢⵓⵙⵓⴼ ⴷ ⴰⵎⵙⴻⵏⵊⴻⵎ ⵏ ⴷⴷⵓⵏⴻⵛⵜ ⴷⴻⴳ ⵡⵓⵙⵙⴰⵏ ⵏⵏⵉ, ⵎⴰⵛⴰ ⵏⴻⵜⵜⴰ ⵡⴰⵔ ⵉⵥⴻⵎⵎⴰⵔ ⴰⴷ ⵉⴼⴻⴽⴽ ⴱⵏⴰⴷⴻⵎ ⵥⵉ ⴷⴷⵏⵓⴱ ⵏⵏⴻⵙ ⵓ ⵡⴰⵔ ⵉⵥⴻⵎⵎⴰⵔ ⴰⴷ ⵉⴱⴻⴷⴷⴻⵍ ⵓⵍ ⵏ ⴰⵢⵜ ⵏ ⵉⵙⵔⴰⵢⵉⵍ ⴰⵍⴰⵎⵉ ⵡⴰⵔ ⵇⵇⵉⵎⴻⵏ ⵅⴻⵟⵟⴰⵏ ⴰⴽ-ⴷ ⴰⵔⴻⴱⴱⵉ. ⵏⴻⵜⵜⴰ ⴷ ⵉⵊⵊ ⵏ ⵓⵎⴻⴷⵢⴰ ⵏ ⵉⵊⵊ ⵏ ⵓⵊⴻⴵⵉⴷ ⵏⵏⴻⵖⵏⵉ ⴷ ⵉⵊⵊ ⵏ ⵓⵎⵙⴻⵏⵊⴻⵎ ⵏⵏⴻⵖⵏⵉ ⵉ ⵡⴰⵔ ⴷⴷ-ⵢⵓⵙⵉⵏ ⵄⴰⴷ.
ⴰⵡⴰⵔⵏⵉ ⴰⵟⵟⴰⵙ ⵏ ⵉⵙⴻⴳⴳⵯⵓⵙⴰ ⴼⴼⵖⴻⵏ ⴰⵢⵜ ⵏ ⵉⵙⵔⴰⵢⵉⵍ ⵥⵉ ⵜⴻⵎⵎⵓⵔⵜ ⵏ ⵎⵉⵚⵔⴰ ⵎⵉⵏⵥⵉ ⵉⵊⵊ ⵏ ⴼⵉⵔⵄⵓⵏ ⵏⵏⴻⵖⵏⵉ ⵉ ⵡⴰⵔ ⵉⵙⵙⵉⵏ ⵢⵓⵙⵓⴼ ⵉⵙⵙⴻⵇⵙⴻⵃ ⵅⴰⵙⴻⵏ ⵜⵓⴷⴰⵔⵜ ⴷⵉ ⵎⵉⵙⵍⴰ ⴰⵟⵟⴰⵙ. ⵉⴳⴳⴰ ⵉ-ⵜⴻⵏ ⴷ ⵉⵙⴻⵎⵖⴰⵏ, ⵉⵅⵙ ⴰⴷ ⵉⵏⴻⵖ ⵎⴰⵔⵔⴰ ⵉⵃⴻⵏⵊⵉⵉⵔⴻⵏ ⵏⵙⴻⵏ. ⵎⴰⵛⴰ ⴰⵔⴻⴱⴱⵉ ⵉⵙⵙⴻⵏⵊⴻⵎ ⵎⵓⵙⴰ ⵥⴻⴳ ⵉⴼⴰⵙⵙⴻⵏ ⵏⵙⴻⵏ, ⵉⵊⵊⴰ ⵜⴰⵎⵖⴰⵔⵜ ⵏ ⴼⵉⵔⵄⵓⵏ ⴰⴷ ⵜ ⵜⴻⴽⵙⵉ ⴷ ⵎⵎⵉⵙ ⵖⴰⵔⴻⵙ ⵥⴻⴳ ⵡⴰⵎⴰⵏ ⵏ ⵢⴻⵖⵥⴰⵔ ⵏ ⵏⵉⵍ ⵏⵏⵉ ⴷⵉ ⵜ ⵜⴻⴳⴳⴰ ⵢⴻⵎⵎⴰⵙ ⵥⵉ ⵜⵉⴳⴳⵯⵓⴷⵉ ⵏ ⵍⵓⵎⵓⵔ ⵏ ⴼⵉⵔⵄⵓⵏ. ⴰⵎⵎⵓ ⵉ ⵢⴰⵔⵔⴰ ⴰⵔⴻⴱⴱⵉ ⵎⵓⵙⴰ ⴷ ⵉⵛⵜ ⵏ ⵍⵇⴻⵛⵄⴻⵜ ⴷⴻⴳ ⵉⴼⴰⵙⵙⴻⵏ ⵏⵏⴻⵙ, ⵉⴳⴳⴰ ⵥⵥⴰⵢⴻⵙ ⵉⵊⵊ ⵏ ⵓⵙⴻⵏⵊⴻⵎ ⴷ ⴰⵎⴻⵇⵇⵔⴰⵏ ⴰⵎ ⵢⵓⵙⵓⴼ, ⵡⴻⵏⵏⵉ ⵉ ⵖⴰ ⵉⵙⵙⵏⴻⵊⵎⴻⵏ ⵍⴳⴻⵏⵙ ⵏⵏⴻⵙ ⵉⵙⵔⴰⵢⵉⵍ, ⵥⴻⴳ ⵉⴼⴰⵙⵙⴻⵏ ⵏ ⴼⵉⵔⵄⵓⵏ, ⵡⴻⵏⵏⵉ ⴷ ⴰⵎⴻⴷⵢⴰ ⵏ ⵓⵎⴻⵇⵇⵔⴰⵏ ⵇⴰⵄ ⵏ ⴷⴷⵓⵏⴻⵛⵜ-ⴰ, ⴰⵇⴰ-ⵜ ⴷ ⵛⵛⵉⵟⴰⵏ.
ⴰⵔⴻⴱⴱⵉ ⵉⴳⴳⴰ ⵎⵓⵙⴰ ⴷ ⵓⵎⴰⵙ ⵀⴰⵔⵓⵏ ⴷ ⵉⵎⴳⴻⵡⵡⴰⴷⴻⵏ ⵏ ⵍⴳⴻⵏⵙ. ⵙ ⵓⴼⵓⵙ ⵏ ⵎⵓⵙⴰ ⵉⵙⵙⴻⵀⵡⴰ-ⴷⴷ ⴰⵔⴻⴱⴱⵉ 10 ⵏ ⵊⵊⵔⴰⵢⴻⵃ ⵉⵇⴻⵙⵃⴻⵏ ⵅ ⵜⴻⵎⵎⵓⵔⵜ ⵏ ⵎⵉⵚⵔⴰ ⵎⵉⵏⵥⵉ ⴼⵉⵔⵄⵓⵏ ⵡⴰⵔ ⵜⴻⵏ ⵉⵊⵊⵉ ⴰⴷ ⴼⴼⵖⴻⵏ ⵥⵉ ⵎⵉⵚⵔⴰ ⵎⴰⵃⴻⵏⴷ ⴰⴼ ⵄⴻⴱⴷⴻⵏ ⴰⵔⴻⴱⴱⵉ ⵏⵙⴻⵏ. ⵖⴰⵔ ⵓⵏⴻⴳⴳⴰⵔ ⵏ ⵊⵊⵔⵉⵃⴻⵛⵜ ⵡⵉⵙⵙ ⵄⴻⵛⵔⴰ ⵉⵊⵊⴰ ⴼⵉⵔⵄⵓⵏ ⴰⴷ ⵉⴼⴼⴻⵖ ⵍⴳⴻⵏⵙ ⵏ ⵉⵙⵔⴰⵢⵉⵍ ⵥⵉ ⵎⵉⵚⵔⴰ, ⴰⵡⴰⵔⵏⵉ ⵍⴰⵎⵉ ⵢⵓⵎⵓⵔ ⴰⵔⴻⴱⴱⵉ ⴰⵢⵜ ⵏ ⵉⵙⵔⴰⵢⵉⵍ ⵎⴰⵃⴻⵏⴷ ⴰⴷ ⵅⴻⵜⵏⴻⵏ ⵎⴰⵔⵔⴰ ⵉⵔⵢⴰⵥⴻⵏ ⵓ ⵎⴰⵃⴻⵏⴷ ⴰⴷ ⵖⴰⵔⵚⴻⵏ ⵉ ⵢⵉⵊⵊ ⵏ ⵉⵥⵎⴰⵔ ⵉ ⴽⵓⵍ ⵉⵛⵜ ⵏ ⵜⵡⴰⵛⵓⵏⵜ ⵏ ⴰⵢⵜ ⵏ ⵉⵙⵔⴰⵢⵉⵍ. ⵜⵓⵖⴰ ⵉⵜⵜⵅⴻⵚⵚⴰ ⴰⴷ ⵔⵓⵛⵛⴻⵏ ⵉⴷⴰⵎⵎⴻⵏ ⵏ ⵉⵥⵎⴰⵔ ⴱⴰⵔⵔⴰ ⵖⴰⵔ ⵜⴻⵡⵡⵓⵔⴰ ⵏⵙⴻⵏ ⵓ ⴷⴻⵖⵢⴰ ⴷⵉ ⴵⵉⵍⴻⵜ ⴰⵡⴰⵔⵏⵉ ⵍⴰⵎⵉ ⵖⴰⵔⵚⴻⵏ ⵉ ⵉⵥⵎⴰⵔ, ⵛⵛⵉⵏ ⵜ ⴷⵉ ⵜⵓⴷⵔⵉⵏ ⵏⵙⴻⵏ.
ⵜⴰⵖⴰⵔⵚⵜ ⵜⴰⵏⵉⵜⴰ ⵇⵇⴰⵔⴻⵏ ⴰⵙ ⵜⴰⵖⴰⵔⵚⵜ ⵏ ⵓⵙⴻⵄⴷⵓ (ⵏⵉⵖ ‘ⴱⴰⵙⵅⴰ’) ⵎⵉⵏⵥⵉ ⴰⵔⴻⴱⴱⵉ ⴷⵉ ⴵⵉⵍⴻⵜ ⴰⵡⴰⵔⵏⵉ ⵍⴰⵎⵉ ⴷ ⴰⵙ ⵖⴰⵔⵚⴻⵏ ⵜⵓⵖⴰ ⴰⵔⴻⴱⴱⵉ ⵉⵜⵜⴻⴽⴽ ⵅ ⵜⵓⴷⵔⵉⵏ ⵏ ⵎⴰⵔⵔⴰ ⵉⵡⴷⴰⵏ ⴷⵉ ⵎⵉⵚⵔⴰ, ⵓⵛⴰ ⵎⴰⵍⴰ ⵡⴰⵔ ⵉⵥⵔⵉ ⵉⴷⴰⵎⵎⴻⵏ ⵅ ⵍⴻⴹⵔⵓⴼ ⵏ ⵜⴻⵡⵡⴰⵔⵜ, ⵉⵜⵜⴰⴷⴻⴼ ⵏⴻⵜⵜⴰ ⵖⴰⵔ ⵜⴰⴷⴷⴰⵔⵜ ⵏⵏⵉ ⵓⵛⴰ ⵉⵏⴻⵇⵇ ⴰⵎⴻⵏⵥⵓ. ⴰⵎⵎⵓ ⵉ ⵉⵏⵖⴰ ⴰⵔⴻⴱⴱⵉ ⵉⵎⴻⵏⵥⴰ ⵏ ⵎⴰⵔⵔⴰ ⵉⵎⵉⵙⵔⵉⵢⵢⴻⵏ ⵍⴰⵎⵉ ⵡⴰⵔ ⵉⵥⵔⵉ ⵉⴷⴰⵎⵎⴻⵏ ⵖⴰⵔ ⵜⵉⵡⵡⵓⵔⴰ ⵏⵙⴻⵏ, ⵥⴻⴳ ⵓⵎⴻⵏⵥⵓ ⵏ ⴼⵉⵔⵄⵓⵏ ⴰⵍ ⴰⵎⴻⵏⵥⵓ ⵏ ⵜⴻⵙⵎⴻⵖⵜ ⴷ ⵉⵎⴻⵏⵥⴰ ⵏ ⵍⴻⴱⵀⴰⵢⴻⵎ.
ⵎⴰⵛⴰ ⴷⵉ ⴵⵉⵍⴻⵜ ⵏⵏⵉ ⴼⴼⵖⴻⵏ ⴰⵢⵜ ⵏ ⵉⵙⵔⴰⵢⵉⵍ ⵥⵉ ⵎⵉⵚⵔⴰ. ⵎⴰⵛⴰ ⵉⴹⴼⴰⵔ ⵉ-ⵜⴻⵏ ⴼⵉⵔⵄⵓⵏ ⵙ ⵍⵄⴻⵙⴽⴰⵔ ⵏⵏⴻⵙ, ⵉⵅⵙ ⴰⴷ ⵜⴻⵏ ⵉⵎⵏⴻⵄ ⴰⴷ ⵔⴰⵃⴻⵏ. ⴰⵔⴻⴱⴱⵉ ⵉⴳⴳⴰ ⵉⵊⵊ ⵏ ⵡⴻⴱⵔⵉⴷ ⵅ ⵡⵓⴷⴻⵎ ⵏ ⵍⴻⴱⵃⴰⵔ ⵉ ⴰⵢⵜ ⵏ ⵉⵙⵔⴰⵢⵉⵍ ⵙ ⵓⴼⵓⵙ ⵏ ⵎⵓⵙⴰ, ⵓⵛⴰ ⵥⵡⴰⵏ ⵍⴻⴱⵀⴰⵔ ⵅ ⵉⴹⴰⵔⴻⵏ, ⴰⵎ ⵜⴻⵏ ⴹⴻⴼⴼⴰⵔⴻⵏ ⵉⵎⵉⵚⵔⵉⵢⵢⴻⵏ. ⵎⴰⵛⴰ ⵓⵎⵉ ⵉⵡⴹⴻⵏ ⵖⴰⵔ ⵓⵊⴻⵎⵎⴰⴹ, ⵉⴱⴻⵍⵍⴻⵄ ⴰⵔⴻⴱⴱⵉ ⴰⴱⵔⵉⴷ ⵏⵏⵉ, ⵉⵊⵊⴰ ⴰⵎⴰⵏ ⵏ ⵍⴻⴱⵃⴰⵔ ⴰⴷ ⴰⵥⵥⵍⴻⵏ ⵓⵛⴰ ⵖⴰⵔⵇⴻⵏ ⵉⵎⵉⵚⵔⵉⵢⵢⴻⵏ ⴷⵉ ⵍⴻⴱⵃⴰⵔ ⵙ ⵉⴽⴰⵔⵔⵓⵜⴻⵏ ⵏⵙⴻⵏ, ⵡⴰⵔ ⵉⵊⵊⵉ ⵓⵍⴰ ⴷ ⵉⵊⵊ ⵥⵥⴰⵢⵙⴻⵏ.
ⴹⴼⴰⵔⴻⵏ ⴰⵢⵜ ⵏ ⵉⵙⵔⴰⵢⵉⵍ ⴰⴱⵔⵉⴷ ⵉ ⴷ ⴰⵙⴻⵏ ⵉⵙⵙⵛⴻⵏ ⴰⵔⴻⴱⴱⵉ ⴷⵉ ⵍⴻⵅⵍⴰ, ⴰⵍⴰⵎⵉ ⵉⵡⴹⴻⵏ ⵖⴰⵔ ⵡⴻⴷⵔⴰⵔ ⵏ ⵙⵉⵏⴰ ⵎⴰⵏⵉ ⴷ ⴰⵙⴻⵏ ⵉⵡⵛⴰ ⵜⵜⴰⵡⵔⴰⵜ ⵙ ⵓⴼⵓⵙ ⵏ ⵎⵓⵙⴰ. ⵇⵇⵏⴻⵏ ⵉⵊⵊ ⵏ ⵍⵄⴰⵀⴷ ⴰⴽ-ⴷ ⴰⵔⴻⴱⴱⵉ ⵎⴰⵃⴻⵏⴷ ⴰⴷ ⴳⴳⴻⵏ ⵎⴰⵔⵔⴰ ⵎⵉⵏ ⵢⵓⵔⴰⵏ ⴷⵉ ⵜⵜⴰⵡⵔⴰⵜ. ⵜⵓⵖⴰ ⴰⵔⴻⵥⵥⵓⵏ ⴰⴷ ⴹⴼⴰⵔⴻⵏ ⵍⵄⴰⵀⴷ ⵉ ⴽⵉⴷⵙⴻⵏ ⵉⴳⴳⴰ ⴰⵔⴻⴱⴱⵉ.
ⴷⵉ ⵍⵄⴰⵀⴷ ⵏⵏⵉ ⵉⴳⴳⴰ ⴰⵔⴻⴱⴱⵉ ⴰⴽ-ⴷ ⴰⵢⵜ ⵏ ⵉⵙⵔⴰⵢⵉⵍ ⴷⴰⵢⴻⵙ 10 ⵏ ⵜⴻⵡⵚⵉⵢⵢⴰⵜ ⵏ ⵜⵜⴰⵡⵔⴰⵜ, ⴷⴰⵢⴻⵙ ⵜⵉⵡⵀⵉⴱⵉⵏ ⴷ ⵉⴽⴻⵀⵀⴰⵏⴻⵏ ⴷ ⵉⵊⵊ ⵏ ⵓⵇⵉⴹⵓⵏ ⵉⵇⴻⴷⴷⵙⴻⵏ ⴷ ⵉⵊⵊ ⵏ ⵍⴻⴼⵏⴰⵔ ⵙ 7 ⵏ ⵜⴼⴰⵡⵉⵏ ⵙ ⵥⵥⴻⵛⵜ ⴷ ⵉⵛⵜ ⵏ ⵟⵟⴰⴱⵍⴰ ⵙ ⵡⴻⵖⵔⵓⵎ ⵏ ⵡⴻⵙⵛⴰⵏ ⴷ ⵉⵊⵊ ⵏ ⵓⵄⴰⵍⵜⴰⵔ ⵏ ⵍⴻⴱⵅⵓⵔ ⴷ ⵜⵜⴰⴱⵓⵜ (ⴷⴰⵢⴻⵙ ⵉ ⵜⵜⵡⴰⴳⴳⴻⵏⵜ ⵜⵏⴰⵢⴻⵏ ⵏ ⵜⴻⵍⵡⵉⵃⵉⵏ ⵏ ⵡⴻⵥⵔⵓ ⵏ ⵜⵜⴰⵡⵔⴰⵜ ⵉ ⵉⵡⵛⴰ ⴰⵔⴻⴱⴱⵉ ⵉ ⵎⵓⵙⴰ ⴰⴽ-ⴷ ⵜⴰⵖⵖⴰⵔⵛⵜ ⵏ ⵎⵓⵙⴰ ⴷ ⵡⴻⵖⵔⵓⵎ ⵉ ⵛⵛⵉⵏ ⴰⵢⵜ ⵏ ⵉⵙⵔⴰⵢⵉⵍ ⴷⵉ ⵍⴻⵅⵍⴰ ⵇⵇⴰⵔⴻⵏ ⴰⵙ ‘ⵎⴰⵏⵏⴰ’) ⴷ ⵉⵅⵉⵔⵓⴱⴻⵏ (ⵍⵎⴰⵍⴰⴽⴰⵜ ⵏ ⴰⵔⴻⴱⴱⵉ) ⵏⵏⵉ ⵉⴱⴻⴷⴷⴻⵏ ⵅ ⵜⵜⴰⴱⵓⵜ ⴰⵎ ⵅⴻⵥⵥⴰⵔⴻⵏ ⵖⴰⵔ ⵉⴷⴰⵎⵎⴻⵏ ⵉ ⵉⵙⵙⵉⵥⴻⵍ ⵓⴽⴻⵀⵀⴰⵏ ⴰⵎⴻⵇⵇⵔⴰⵏ ⵅ ⵜⵇⴻⴱⴱⴰⵔⵜ ⵏ ⵡⴻⵚⵍⴰⵃ ⵉ ⵉⴵⴰⵏ ⵅ ⵜⵜⴰⴱⵓⵜ, ⵓ ⵜⵓⵖⴰ ⴷⴰⵢⴻⵙ ⵄⴰⵡⴻⴷ ⴰⵟⵟⴰⵙ ⵏ ⵜⵎⴻⵙⵍⴰⵢⵉⵏ ⵏⵏⴻⵖⵏⵉ ... ⵅⵥⴰⵔ ⴰⴷⵍⵉⵙ ⵡⵉⵙⵙ ⵜⵏⴰⵢⴻⵏ ⵏ ⵍⵄⴰⵀⴷ ⴰⵇⴷⵉⵎ ⵇⵇⴰⵔⴻⵏ ⴰⵙ ⵓⴼⴼⵓⵖ (ⴻⵅⵓⴷⵓⵙ, ⴻⵅⵓⴷⵓ, ⴻⵅⵓⴷⴻ).
ⵜⵓⵖⴰ ⴰⵄⵓⴵⵉ ⵏ ⴰⵔⴻⴱⴱⵉ, ⵉⵅⵙ ⴰⴷ ⵢⵉⵏⵉ ⵍⵄⴻⵥⵥ ⵏⵏⴻⵙ ⵉⵇⴻⴷⴷⵙⴻⵏ ⴷ ⵚⵚⵓⵍⵟⴰ ⵏⵏⴻⵙ, ⵉⵥⴻⴷⴷⴻⵖ ⴷⴻⴳ ⵡⴻⵇⴷⴰⵙ ⵏ ⵓⵇⴻⴷⴷⴰⵙ ⴷⴻⴳ ⵡⴻⵅⵅⴰⵎ ⵏ ⴷⴰⵅⴻⵍ ⵖⴰⵔ ⴹⴻⴼⴼⴰⵔ ⵏ ⵓⵇⵉⴹⵓⵏ ⵉⵇⴻⴷⴷⵙⴻⵏ, ⵡⴰⵔ ⵉⵥⴻⵎⵎⴰⵔ ⴰⴷ ⴷⵉⵏ ⵢⴰⴷⴻⴼ ⵓⵍⴰ ⴷ ⵉⵊⵊ, ⵎⵖⵉⵔ ⴰⴽⴻⵀⵀⴰⵏ ⴰⵎⴻⵇⵇⵔⴰⵏ ⵉⵛⵜ ⵏ ⵜⵡⴰⵍⴰ ⴷⴻⴳ ⵓⵙⴻⴳⴳⵯⴰⵙ ⵡⴰⵀⴰ ⵎⴰⵃⴻⵏⴷ ⴰⴷ ⵉⵔⵓⵛⵛ ⵉⴷⴰⵎⵎⴻⵏ ⵏ ⵜⵖⴰⵔⵚⴰ (ⴷⴷⴱⴰⵢⴻⵃ) ⵅ ⵜⵇⴻⴱⴱⴰⵔⵜ ⵏ ⵡⴻⵚⵍⴰⵃ ⵉ ⵉⴵⴰⵏ ⵅ ⵜⵜⴰⴱⵓⵜ ⵓⵍⴰ ⵅ ⵜⴻⵎⵎⵓⵔⵜ ⵥⵥⴰⵜ ⵉ ⵜⵜⴰⴱⵓⵜ. ⴰⵔⴻⴱⴱⵉ ⴷ ⴰⵎⵇⴻⴷⴷⴰⵙ ⵇⴰⵄ, ⴱⵏⴰⴷⴻⵎ ⵡⴰⵔ ⵉⵥⴻⵎⵎⴰⵔ ⴰⴷ ⵖⴰⵔⴻⵙ ⴷⴷ-ⵉⵇⴰⵔⵔⴻⴱ ⴰⵎⴻⵏⵏⵉ ⵡⴰⵀⴰ!
ⴰⵟⵟⴰⵙ ⵏ ⵜⵖⴰⵔⵚⴰ ⵉ ⵜⵓⵖⴰ ⵉⵜⵜⵅⴻⵚⵚⴰⵏ ⵉ ⵡⵓⴷⴰⵢⴻⵏ ⴰⴷ ⵜⴻⵏⵜ ⵇⴻⴷⴷⵎⴻⵏ ⵉ ⴰⵔⴻⴱⴱⵉ, ⵡⴰⵅⵅⴰ ⵉⵡⵛⴰ ⴰⵙⴻⵏ ⵜⴻⵏⵜ ⴰⵔⴻⴱⴱⵉ ⵙ ⵢⵉⵅⴻⴼ ⵏⵏⴻⵙ ⵎⵉⵏⵥⵉ ⵏⴻⵜⵜⴰ ⵉⵅⵍⴻⵇ-ⴷⴷ ⵎⴰⵔⵔⴰ ⵉⵎⵓⴷⴷⴰⵔⴻⵏ, ⴰⵎ ⵉⴼⵓⵏⴰⵙⴻⵏ ⴰⵎ ⵉⵥⵎⴰⵔⴻⵏ. ⴰⵢⵜ ⵏ ⵉⵙⵔⴰⵢⵉⵍ ⵉⵡⵢⴻⵏ ⵜⴻⵏⵜ ⵖⴰⵔ ⵓⵄⴰⵍⵜⴰⵔ ⵎⴰⵃⴻⵏⴷ ⴰⴷ ⵜⴻⵏⵜ ⵇⴻⴷⴷⵎⴻⵏ ⴷ ⵜⴰⵖⴰⵔⵚⵜ ⵖⴰⵔⴻⵙ. ⴰⴷⵍⵉⵙ ⵉⵇⴻⴷⴷⵙⴻⵏ ⵉⵇⵇⴰⵔ:
"ⵎⵉⵏⵥⵉ ⵍⴻⵄⵎⴰⵔ ⵏ ⴰⵔⵔⵉⵎⴻⵜ ⴷⴻⴳ ⵉⴷⴰⵎⵎⴻⵏ ⵓⵛⴰ ⵏⴻⵛⵛ ⵡⵛⵉⵖ ⴰⵡⴻⵎ ⵜⴻⵏ ⵅ ⵓⵄⴰⵍⵟⴰⵔ (=ⵍⵎⴻⴷⴱⴻⵃ) ⵎⴰⵃⴻⵏⴷ ⴰⴷ ⴼⴷⵉⵏ ⵅ ⵍⴻⵄⵎⵓⵔ ⵏⵡⴻⵎ, ⵎⵉⵏⵥⵉ ⵉⴷⴰⵎⵎⴻⵏ ⴷ ⵉⵏⴰ ⵉ ⵖⴰ ⴼⴷⵉⵏ ⵅ ⵍⴻⵄⵎⴰⵔ." (ⵍⴰⵡⵉ 17:11)
ⵉⴱⴰⵏ-ⴷⴷ ⵥⴻⴳ ⵡⴰⵡⴰⵍⴻⵏ-ⴰ ⴰⵇⴰ ⴰⵔⴻⴱⴱⵉ ⵉⵃⵙⴻⴱ ⵉⴷⴰⵎⵎⴻⵏ ⴷ ⵍⴻⴼⴷⵉⵢⵢⴻⵜ ⵉ ⴷⴷⵏⵓⴱ ⵙ ⵎⵉⵏⵥⵉ ⵉⴷⴰⵎⵎⴻⵏ ⴷ ⵍⴻⵄⵎⴰⵔ ⵏ ⴱⵏⴰⴷⴻⵎ ⵏⵉⵖ ⵉⴷⴰⵎⵎⴻⵏ ⵙⴻⴽⴽⵡⴰⵏ ⵍⴻⵄⵎⴰⵔ ⵏ ⴱⵏⴰⴷⴻⵎ. ⵎⴰⵛⴰ ⵉⴷⴰⵎⵎⴻⵏ ⵏ ⵍⵎⴰⵍ ⴰⵢⵏⴰⵡ ⵡⴰⵔ ⵥⴻⵎⵎⴰⵔⴻⵏ ⴰⴷ ⴼⴷⵉⵏ ⴷⴷⴻⵏⴱ ⵏ ⴱⵏⴰⴷⴻⵎ ⵙ ⵜⵉⴷⴻⵜⵜ, ⵓⵛⴰ ⵓⵍⴰ ⴷ ⵉⴷⴰⵎⵎⴻⵏ ⵏ ⴱⵏⴰⴷⴻⵎ ⴰⵎⴻⴷⵏⵓⴱ ⴰⵎⴻⵛⵏⴰⵡ ⵎⵎⵉⵙ ⵏ ⵉⴱⵔⴰⵀⵉⵎ ⵡⴰⵔ ⵙⴻⴽⴽⵡⵉⵏ ⵡⴰⵍⵓ ⵉ ⵓⴼⴻⴽⴽⵉ ⵏ ⴱⵏⴰⴷⴻⵎ ⵥⵉ ⵍⵃⴰⵍ ⵏⵏⴻⵙ ⵉ ⴷⵉ ⵉⵡⴹⴰ ⵥⴻⴳ ⵡⴰⵎⵉ ⵉⵅⴹⴰ ⴰⴷⴰⵎ.
ⴰⵡⴰⵔⵏⵉ ⵓⴼⵓⵖ ⵥⵉ ⵎⵉⵚⵔⴰ ⵉⵏⴷⴻⵀ ⴰⵔⴻⴱⴱⵉ ⵍⴳⴻⵏⵙ ⵏ ⵉⵙⵔⴰⵢⵉⵍ ⵖⴰⵔ ⵜⴻⵎⵎⵓⵔⵜ ⵏ ⴽⴻⵏⵄⴰⵏ ⵏⵏⵉ ⵉⵡⴰⵄⴷ ⴰⵔⴻⴱⴱⵉ ⵥⵉⵛ ⵉ ⵉⴱⵔⴰⵀⵉⵎ ⴷ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵍⵡⴰⵔⵜ. ⵃⴻⵙⴱⴻⵏ ⴰⵢⵜ ⵏ ⵉⵙⵔⴰⵢⵉⵍ ⵉⵅⴻⴼ ⵏⵙⴻⵏ ⴷ ⵜⴰⵔⵡⴰ ⵏ ⵉⴱⵔⴰⵀⵉⵎ ⵓⵛⴰ ⴰⵔⴻⵥⵥⵓⵏ ⴰⴷ ⵜⵜ ⵟⵟⴼⴻⵏ ⴷ ⵍⵡⴰⵔⵜ ⵙⴰⴷⵓ ⵓⴼⵓⵙ ⵏ ⵎⵓⵙⴰ. ⵎⴰⵛⴰ ⵓⵎⵉ ⵥⵔⵉⵏ ⵜⴰⵎⵎⵓⵔⵜ ⴷ ⵍⴻⴳⵏⵓⵙ ⵉ ⴷⴰⵢⴻⵙ, ⴳⴳⵯⴻⴷⴻⵏ ⴰⵟⵟⴰⵙ ⵥⴻⴳ ⵓⵎⴻⵏⵖⵉ ⴰⴽⵉⴷⵙⴻⵏ ⵃⵉⵎⴰ ⴰⴷ ⵜⵜ ⵟⵟⴼⴻⵏ. ⵏⵉⵜⵏⵉ ⵡⴰⵔ ⵜⵜⵉⵇⵇⴻⵏ (=ⵓⵎⵉⵏⴻⵏ) ⴰⵔⴻⴱⴱⵉ ⴱⴻⵍⵍⵉ ⵏⴻⵜⵜⴰ ⴰⴷ ⵜⴻⵏ ⵜⵜ ⵉⵡⵛ ⴷⴻⴳ ⵉⴼⴰⵙⵙⴻⵏ ⵏⵙⴻⵏ. ⵓⴳⵉⵏ ⴰⴷ ⵜⵜ ⴰⴷⴼⴻⵏ. ⵙ ⵓⵢⴻⵏⵏⵉ ⵉⵊⵊⴰ ⵉ-ⵜⴻⵏ ⴰⵔⴻⴱⴱⵉ ⴰⴷ ⵜⴻⵍⵄⴻⵏ ⴰⵔⴱⵄⵉⵏ ⵏ ⵉⵙⴻⴳⴳⵯⵓⵙⴰ ⴷⵉ ⵍⴻⵅⵍⴰ ⴰⴽ-ⴷ ⵎⵓⵙⴰ ⴷ ⵀⴰⵔⵓⵏ, ⵙ ⵓⵇⵉⴹⵓⵏ ⵉⵇⴻⴷⴷⵙⴻⵏ ⴷ ⵎⴰⵔⵔⴰ ⵍⴻⵇⵛⵓⵄ ⵏⵏⴻⵙ, ⵜⴻⵍⵄⴻⵏ ⵥⴻⴳ ⵡⴻⵎⵛⴰⵏ ⵖⴰⵔ ⵡⴻⵎⵛⴰⵏ ⵏⵏⴻⵖⵏⵉ ⴰⵎ ⴷ ⴰⵙⴻⵏ ⵉⵥⵡⴰⵔ ⴰⵔⴻⴱⴱⵉ ⴷⴻⴳ ⵉⵊⵊ ⵏ ⵓⵙⴻⵢⵏⵓ ⵙ ⵓⵥⵉⵍ ⵓ ⵙ ⴵⵉⵍⴻⵜ ⵏⴻⵜⵜⴰ ⵉⴹⴼⴰⵔ ⵉ-ⵜⴻⵏ, ⵉⴷⵡⴻⵍ ⵓⵙⴻⵢⵏⵓ ⵏⵏⵉ ⴷ ⵉⵊⵊ ⵏ ⵓⵇⴻⵍⵍⵉⵊ ⵏ ⵜⵎⴻⵙⵙⵉ ⵖⴰⵔ ⴹⴻⴼⴼⴰⵔ ⵏ ⵍⴳⴻⵏⵙ. ⴰⵎⵎⵓ ⵉ-ⵜⴻⵏ ⵉⵏⴷⴻⵀ ⴰⵔⴻⴱⴱⵉ ⵙ ⵓⵥⵉⵍ ⵓ ⵉⵙⵙⴰⵔ ⵅⴰⵙⴻⵏ ⵙ ⴵⵉⵍⴻⵜ ⴰⵍⴰⵎⵉ ⵡⴰⵔ ⵥⴻⵎⵎⴰⵔⴻⵏ ⵍⵄⴻⴷⵢⴰⵏ ⴰⴷ ⵖⴰⵔⵙⴻⵏ ⴷⴷ-ⵇⴰⵔⵔⴱⴻⵏ ⵥⵉ ⴹⴻⴼⴼⴰⵔ ⵥⵉ ⵙⵙⵉⴱⴱⴻⵜ ⵏ ⵓⵇⴻⵍⵍⵉⵊ ⵏ ⵜⵎⴻⵙⵙⵉ ⵉ ⴷⵉ ⵜⵓⵖⴰ ⴰⵔⴻⴱⴱⵉ ⵢⵓⵢⵓⵔ ⴰⴽⵉⴷⵙⴻⵏ.
ⴰⵡⴰⵔⵏⵉ 40 ⵏ ⵉⵙⴻⴳⴳⵯⵓⵙⴰ ⵓⴷⴼⴻⵏ ⵏⵉⵜⵏⵉ ⵖⴰⵔ ⵜⴻⵎⵎⵓⵔⵜ ⵏ ⴽⴻⵏⵄⴰⵏ ⵙⴰⴷⵓ ⵓⴼⵓⵙ ⵏ ⵓⵎⴳⴻⵡⵡⴰⴷ ⵢⴰⵛⵓⵡⴰ. ⵖⴻⵍⵍⴱⴻⵏ ⵅ ⵉⵎⴻⵥⴷⴰⵖ ⵏ ⴽⴻⵏⵄⴰⵏ, ⵥⴻⴷⵖⴻⵏ ⴷⵉⵏ ⵄⵍⴰⵢⴻⵏ 400 ⵏ ⵉⵙⴻⴳⴳⵯⵓⵙⴰ ⴰⵍ ⵓⵙⵙⴰⵏ ⵏ ⵓⵊⴻⴵⵉⴷ ⴷⴰⵡⵓⴷ, ⵡⴻⵏⵏⵉ ⴷ ⴰⵊⴻⴵⵉⴷ ⵡⵉⵙⵙ ⵜⵏⴰⵢⴻⵏ ⵏ ⵉⵙⵔⴰⵢⵉⵍ ⴰⵡⴰⵔⵏⵉ ⵛⴰⵡⵓⵍ, ⵡⴻⵏⵏⵉ ⵜⵓⵖⴰ ⴷ ⴰⵊⴻⴵⵉⴷ ⴰⵎⴻⵥⵡⴰⵔⵓ. ⵎⴰⵛⴰ ⴰⵊⴻⴵⵉⴷ ⵛⴰⵡⵓⵍ ⵡⴰⵔ ⵜⵓⵖⵉ ⵎⵍⵉⵃ ⴰⴽ-ⴷ ⴰⵔⴻⴱⴱⵉ, ⵙ ⵓⵢⴻⵏⵏⵉ ⵉⵅⴹⴰⵔ ⴰⵔⴻⴱⴱⵉ ⴷⴰⵡⵓⴷ ⴷ ⴰⵊⴻⴵⵉⴷ ⴰⵡⴰⵔⵏⵉ ⴰⵙ.
ⵣⵉ ⵜⴻⵎⵥⵉ ⵏⵏⴻⵙ ⵜⵓⵖⴰ ⴷⴰⵡⵓⴷ ⴷ ⴰⵎⴻⴽⵙⴰ. ⵉⵃⴻⵟⵟⴰ ⵓⴵⵉ, ⵜⵓⵖⴰ ⵉⵜⵜⵎⴻⵏⵖⴰ ⴰⴽ-ⴷ ⵍⴻⵡⵃⵓⵛ, ⵉⵏⵖⴰ ⴰⵢⵔⴰⴷ. ⵡⴰⵔ ⵉⵜⵜⴻⴳⴳⵯⴻⴷ ⵃⴻⴷ, ⵉⵜⵜⵉⵇⵇ ⴷⵉ ⴰⵔⴻⴱⴱⵉ ⵏ ⵉⵙⵔⴰⵢⵉⵍ. ⵓⵎⵉ ⵜⵓⵖⴰ ⴷⴰⵡⵓⴷ ⵄⴰⴷ ⴷ ⴰⵃⵓⴷⵔⵉ ⵜⵓⵖⴰ ⴰⵊⴻⴵⵉⴷ ⵛⴰⵡⵓⵍ ⵉⵜⵜⵎⴻⵏⵖⴰ ⴰⴽ-ⴷ ⵉⴼⵉⵍⵉⵙⵟⵉⵏⵉⵢⵢⴻⵏ. ⴰⵢⵜ ⵏ ⵉⵙⵔⴰⵢⵉⵍ ⴳⴳⵯⴻⴷⴻⵏ ⴰⵟⵜⴰⵙ ⵍⴰⵎⵉ ⵊⵊⵉⵃⴻⵔ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ ⵇⵇⴰⵔⴻⵏ ⴰⵙ ⵊⵓⵍⵉⵢⴰⵜ, ⵉⵙⵙⴻⵃⵇⴰⵔⴰ ⵥⵥⴰⵢⵙⴻⵏ, ⵉⵜⵜⴰⵔ ⵥⵥⴰⵢⵙⴻⵏ ⵉⵊⵊ ⵏ ⵡⴻⵔⵢⴰⵥ ⵎⴰⵃⴻⵏⴷ ⴰⴷ ⴽⵉⴷⴻⵙ ⵉⵎⵏⴻⵖ.ⵜⵓⵖⴰ ⵊⵓⵍⵉⵢⴰⵜ ⴷ ⴰⵎⴻⵇⵇⵔⴰⵏ ⴰⵟⵟⴰⵙ, ⵄⵍⴰⵢⴻⵏ 3 ⵎⵉⵜⵔⵓ ⵏ ⵍⵓⵄⵍⴰ ⵓ ⵖⴰⵔⴻⵙ ⵍⴻⵙⵏⴰⵃ ⵉⵙⵙⴰⴳⴳⵯⴰⴷⴻⵏ ⵓ ⵢⴰⵔⴹ ⵜⴰⵙⴻⴷⴷⴰⵔⵜ ⵏ ⵍⵄⴻⵙⴽⴰⵔ ⵏ ⵡⵓⵥⵥⴰⵍ. ⵎⴰⵛⴰ ⴷⴰⵡⵓⴷ ⵢⵓⵥⵥⴻⵍ ⵖⴰⵔⴻⵙ-ⴷⴷ, ⵉⵖⴻⵍⵍⴻⴱ ⵅⴰⵙ ⵙ ⵢⵉⵙⴻⵎ ⵏ ⴰⵔⴻⴱⴱⵉ ⵏ ⵉⵙⵔⴰⵢⵉⵍ ⵍⴰⵎⵉ ⵜ ⵉⵍⵇⴻⴼ ⵙ ⵉⵊⵊ ⵏ ⵡⴻⵥⵔⵓ:
"ⵉⵡⵜⴰ ⴷⴰⵡⵓⴷ ⵖⴰⵔ ⵜⴻⵛⵢⴰⵔⵜ ⵏⵏⴻⵙ ⵏ ⵜⴰⵔⴻⵡⵙⴰ, ⵉⴽⴽⴻⵙ-ⴷⴷ ⵉⵊⵊ ⵏ ⵡⴻⵥⵔⵓ, ⵉⵃⴻⵊⵊⴰⵔ (ⵉ-ⵜ) ⵙ ⵉⴵⵉⵢ ⵓⵛⴰ ⵉⵍⵇⴻⴼ ⴰⴼⵉⵍⵉⵙⵟⵉⵏⵉ ⴷⵉ ⵜⴻⵏⵢⴰⵔⵜ ⵏⵏⴻⵙ. ⴰⵥⵔⵓ ⵉⵍⵇⴻⴼ ⵜⴰⵏⵢⴰⵔⵜ ⵏⵏⴻⵙ ⵓⵛⴰ ⵉⵡⴹⴰ ⵏⴻⵜⵜⴰ ⵅ ⵓⵖⴻⵎⴱⵓⴱ ⵏⵏⴻⵙ ⵖⴰⵔ ⵜⴻⵎⵎⵓⵔⵜ. ⴰⵎⵎⵓ ⵉ ⵉⵖⵍⴻⴱ ⴷⴰⵡⵓⴷ ⴰⴼⵉⵍⵉⵙⵟⵉⵏⵉ ⵙ ⵉⵊⵊ ⵏ ⵢⵉⴵⵉⵢ ⵓ ⵙ ⵉⵊⵊ ⵏ ⵡⴻⵥⵔⵓ. ⵏⴻⵜⵜⴰ ⵉⵍⵇⴻⴼ ⴰⴼⵉⵍⵉⵙⵟⵉⵏⵉ, ⵉⵏⵖⴰ ⵉ-ⵜ. ⵡⴰⵔ ⵖⴰⵔⴻⵙ ⵜⵓⵖⵉ ⵉ ⴷⴰⵡⵓⴷ ⵇⴰⵄ ⵙⵙⵉⴼ ⴷⴻⴳ ⵓⴼⵓⵙ ⵏⵏⴻⵙ." (1 ⵚⴰⵎⵡⵉⵍ 17:49, 50).
ⴷⴰⵡⵓⴷ ⵉⵖⴻⵍⵍⴻⴱ ⵅ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵙ ⵥⵉ ⴷⴰⵅⴻⵍ ⵓ ⵥⵉ ⴱⴰⵔⵔⴰ ⵜⴰⵎⵎⵓⵔⵜ ⵏ ⵉⵙⵔⴰⵢⵉⵍ, ⵜⴰⵎⵎⵓⵔⵜ ⵏⵏⵉ ⵟⵟⴼⴻⵏ ⵏⵉⵜⵏⵉ ⴷ ⵍⵡⴰⵔⵜ ⵥⴻⴳ ⵓⴼⵓⵙ ⵏ ⵉⴼⵉⵍⵉⵙⵟⵉⵏⵉⵢⵢⴻⵏ. ⵏⴻⵜⵜⴰ ⵜⵓⵖⴰ ⵉⵜⵜⴻⵅⵙ ⴰⵔⴻⴱⴱⵉ ⵏ ⵉⵙⵔⴰⵢⵉⵍ ⴰⵟⵟⴰⵙ ⴰⵍⴰⵎⵉ ⵉⵅⵙ ⴰⴷ ⴰⵙ ⵉⴱⵏⴰ ⵉⵛⵜ ⵏ ⵜⴰⴷⴷⴰⵔⵜ ⴷⵉ ⵓⵔⵛⴰⵍⵉⵎ, ⵉⵛⵜ ⵏ ⵣⵥⴰⵡⴻⵛⵜ ⴷ ⵜⴰⵎⴻⵇⵇⵔⴰⵏⵜ ⵉ ⴰⵔⴻⴱⴱⵉ. ⵎⴰⵛⴰ ⴰⵔⴻⴱⴱⵉ ⵡⴰⵔ ⵜ ⵉⵊⵊⵉ ⴰⴷ ⵉⴱⵏⴰ ⵜⴰⴷⴷⴰⵔⵜ ⵏⵏⵉ, ⵥⵉ ⵙⵙⵉⴱⴱⴻⵜ ⵏ ⵉⴷⴰⵎⵎⴻⵏ ⵉ ⵉⵙⵙⵉⵥⴻⵍ ⴷⴰⵡⵓⴷ ⴷⴻⴳ ⵡⴰⵟⵟⴰⵙ ⵏ ⵉⵎⴻⵏⵖⴰⵏ ⵉ ⵉⵎⵏⴻⵖ. ⵉⵙⴰⵎⵃ ⴰⵙ ⴰⵔⴻⴱⴱⵉ ⵎⴰⵃⴻⵏⴷ ⴰⴷ ⵉⵙⵙⴻⵡⵊⴻⴷ ⵍⴻⴱⵏⵉ ⵡⴰⵀⴰ, ⵉⵏⵏⴰ ⴰⵇⴰ ⵎⵎⵉⵙ ⵙⵓⵍⵉⵎⴰⵏ ⴰⴷ ⵜⵜ ⵉⴱⵏⴰ.
ⵜⵓⵖⴰ ⴷⴰⵡⵓⴷ ⴷ ⵉⵊⵊ ⵏ ⵓⵊⴻⴵⵉⴷ ⴷ ⴰⵎⴻⵇⵇⵔⴰⵏ ⵉ ⵉⵎⵎⴻⵏⵖⴻⵏ ⴰⵟⵟⴰⵙ ⵙ ⵢⵉⵙⴻⵎ ⵏ ⴰⵔⴻⴱⴱⵉ ⵏ ⵉⵙⵔⴰⵢⵉⵍ ⵓ ⵜⴻⴽⴽⴰ ⵅⴰⵙ ⴰⵟⵟⴰⵙ ⵏ ⵜⴰⵎⴰⵔⴰ ⴷ ⵓⵎⴰⵔⵔⴻⵜ. ⵉⵜⵜⵉⵔⴰⵔ ⵍⵀⴰⵔⴱⴰ, ⵢⵓⵔⴰ ⵉⵥⵍⴰⵏ ⵉ ⴰⵔⴻⴱⴱⵉ, ⵇⵇⴰⵔⴻⵏ ⴰⵙⴻⵏ 'ⵉⵥⴻⵀⵀⵉⴷⴻⵏ', ⵏⴻⵜⵜⴰ ⴷ ⴰⵎⵡⴰⴹⴻⵄ ⴰⵟⵟⴰⵙ ⵥⵥⴰⵜ ⵉ ⵡⵓⴷⴻⵎ ⵏ ⴰⵔⴻⴱⴱⵉ, ⵉⵜⵜⵏⴰⴱⴱⴰ ⵅ ⵍⵎⴰⵙⵉⵃ ⵉ ⴷⴷ ⵖⴰ ⵢⴰⵙⴻⵏ ⴰⵎ ⵡⴰⵟⵟⴰⵙ ⵏ ⵉⵏⴰⴱⵉⵢⵢⴻⵏ ⵉ ⴷⴷ-ⵢⵓⵙⵉⵏ ⴰⵡⴰⵔⵏⵉ ⴰⵙ: ⵉⵛⴰⵄⵢⴰ, ⵉⵔⵎⵉⵢⴰ, ⵃⴰⵥⵇⵉⵢⴰⵍ, ⴷⴰⵏⵉⵢⴰⵍ, ⵃⵓⵛⵉⵄⴰ, ⵢⵓⵡⵉⵍ, ⵄⴰⵎⵓⵙ, ⵄⵓⴱⴰⴷⵢⴰ, ⵢⵓⵏⵓⵙ, ⵎⵉⵅⴰ, ⵏⴰⵃⵓⵎ, ⵃⴰⴱⴰⵇⵇⵓⵇ, ⵚⴰⴼⴰⵏⵢⴰ, ⵃⴰⴳⴳⴰⵢⵉ, ⵣⴰⴽⴰⵔⵉⵢⵢⴰ ⴷ ⵎⴰⵍⴰⵅⵉ.
ⵎⵉⵏ ⵉⵄⵏⴰ ⵍⵎⴰⵙⵉⵃ ⵏⵏⵉ ⵅⴻⴼ ⵉⵜⵜⵏⴰⴱⴱⴰ ⴷⴰⵡⵓⴷ ⵓⵍⴰ ⴷ ⵎⴰⵔⵔⴰ ⵉⵏⴰⴱⵉⵢⵢⴻⵏ? ⴰⵡⴰⵍ ⵍⵎⴰⵙⵉⵃ ⵉⵅⵙ ⴰⴷ ⵢⵉⵏⵉ ‘ⴰⵎⴻⴷⵀⵓⵏ’, ⵉⵊⵊ ⵏ ⴱⵏⴰⴷⴻⵎ ⴷⴻⵀⵏⴻⵏ ⵜ ⵙ ⵥⵥⴻⵛⵜ ⵅ ⵓⵥⴻⴵⵉⴼ ⵏⵏⴻⵙ. ⵉⵙⴻⵎ ‘ⵅⵔⵉⵙⵜⵓⵙ’ (ⴰⵡⴰⵍ-ⴰ ⵉⴼⴼⴻⵖ-ⴷⴷ ⵥⴻⴳ ⵉⵍⴻⵙ ⵏ ⵜⵢⵓⵏⴰⵏⵉⵜ) ⴷⴰⵢⴻⵙ ⵙⵉⵎⴰⵏⵜ ⵏ ⵍⵎⴻⵄⵏⴰ: ‘ⴰⵎⴻⴷⵀⵓⵏ’. ⵉⵜⵜⵅⴻⵚⵚⴰ ⴰⵏⴻⵖ ⴰⴷ ⵏⴻⵙⵙⴻⵏ ⴰⵇⴰ ⵎⴰⵔⵔⴰ ⵉⴽⴻⵀⵀⴰⵏⴻⵏ ⴷ ⵉⵊⴻⴵⵉⴷⴻⵏ ⴷⵉ ⵉⵙⵔⴰⵢⵉⵍ ⵜⵜⵡⴰⴷⴻⵀⵏⴻⵏ. (ⵅⵥⴰⵔ ⵍⴰⵡⵉ 4:3, 1 ⵚⴰⵎⵡⵉⵍ 10:1, 1 ⵚⴰⵎⵡⵉⵍ 16:13, 1 ⵉⵊⴻⴵⵉⴷⴻⵏ 1:50-53). ⵎⵓⵙⴰ ⵉⴷⵀⴻⵏ ⵄⴰⵡⴻⴷ ⴰⵇⵉⴹⵓⵏ ⵉⵇⴻⴷⴷⵙⴻⵏ ⴷ ⵎⴰⵔⵔⴰ ⵍⴻⵇⵛⵓⵄ ⵉ ⴷⴰⵢⴻⵙ ⵇⴱⴻⵍ ⵎⴰ ⴰⴷ ⴱⴷⴰⵏ ⴰⴷ ⴷⴰⵢⴻⵙ ⵙⴻⵅⵅⴰⵔⴻⵏ ⵉ ⴰⵔⴻⴱⴱⵉ. ⵎⵓⵙⴰ ⵉⴷⵀⴻⵏ ⴰⴽⴻⵀⵀⴰⵏ ⵀⴰⵔⵓⵏ, ⵓⵛⴰ ⴰⵡⴰⵔⵏⵉ ⴰⵟⵟⴰⵙ ⵏ ⵉⵙⴻⴳⴳⵯⵓⵙⴰ ⵉⴷⵀⴻⵏ ⴰⵏⴰⴱⵉ ⵛⴰⵎⵡⵉⵍ ⵄⴰⵡⴻⴷ ⵛⴰⵡⵓⵍ, ⴰⵊⴻⴵⵉⴷ ⴰⵎⴻⵥⵡⴰⵔⵓ ⵏ ⵉⵙⵔⴰⵢⵉⵍ, ⵓ ⴰⵡⴰⵔⵏⵉ ⴰⵙ ⵓⵍⴰ ⴷ ⴰⵊⴻⴵⵉⴷ ⴷⴰⵡⵓⴷ. ⵏⴻⵜⵜⵡⴰⵍⴰ ⵅⴻⵏⵏⵉ ⴰⵇⴰ ⵉⵊⴻⴵⵉⴷⴻⵏ ⴷ ⵉⴽⴻⵀⵀⴰⵏⴻⵏ ⵏⵉⵜⵏⵉ ⴷ ‘ⵉⵎⴰⵙⵉⵃⴻⵏ’ ⵏ ⵉⵙⵔⴰⵢⵉⵍ, ⵓ ⵄⴰⵡⴻⴷ ⴷⴰⵡⵓⴷ ⵙⵉⵎⴰⵏⵜ ⵏⵏⴻⵙ ⵜⵓⵖⴰ ⴷ ⵉⵊⵊ ⵏ ‘ⵍⵎⴰⵙⵉⵃ’, ⵉⵊⵊ ⵏ ⵓⵎⴻⴷⵀⵓⵏ.
ⵎⴰ ⵜⵓⵖⴰ ⴷⴰⵡⵓⴷ ⴷ ⵎⴰⵔⵔⴰ ⵉⵏⴰⴱⵉⵢⵢⴻⵏ ⵜⵜⵔⴰⵊⴰⵏ ⵉⵅⴻⴼ ⵏⵙⴻⵏ, ⵓⵎⵉ ⵜⵓⵖⴰ ⵜⵜⵏⴰⴱⴱⴰⵏ ⵅ ⵍⵎⴰⵙⵉⵃ ⵉ ⴷⴷ ⵖⴰ ⵢⴰⵙⴻⵏ. ⵄⴻⵎⵎⴰⵔⵚ. ⵎⴰⵛⴰ ⵜⵓⵖⴰ ⵙⵙⴰⵡⴰⵍ ⵅ ⵉⵊⵊⴻⵏ ⴰⴷ ⴷⴷ-ⵢⴰⵙ ⴰⵡⴰⵔⵏⵉ ⴰⵙⴻⵏ, ⵉⵊⵊⴻⵏ ⵏⵏⵉ ⴷ ⵎⵎⵉⵙ ⴷ ⴰⴽⴻⵀⵀⴰⵏ ⴷ ⴰⵊⴻⴵⵉⴷ ⴷⴻⴳ ⵢⵉⵅⴻⴼ ⵏⵏⴻⵙ ⴷⴻⴳ ⵓⵎⵓⵔ ⴷ ⵉⵊⵊ, ⵎⵉⵏⵥⵉ ⵄⴰⴷ ⴰⵊⴻⴵⵉⴷ ⴰⵎⴻⵇⵇⵔⴰⵏ ⴷⴰⵡⵓⴷ ⵡⴰⵔ ⵉⵥⴻⵎⵎⴰⵔ ⴰⴷ ⵉⴼⴻⴽⴽ ⵉⵅⴻⴼ ⵏⵏⴻⵙ ⵥⵉ ⴷⴷⴻⵏⴱ ⵉ ⵉⵥⴻⴷⴷⵖⴻⵏ ⴷⴻⴳ ⵡⵓⵍ ⵏⵏⴻⵙ.
ⵙ ⵓⵢⴻⵏⵏⵉ ⵉⵡⴰⵄⴷ ⴰⵔⴻⴱⴱⵉ ⵉ ⴷⴰⵡⵓⴷ ⴰⵎⵎⵓ:
“ⵓⵎⵉ ⵉⵇⵇⵉⵎ ⵓⵊⴻⴵⵉⴷ ⴷⴰⵡⵓⴷ ⴷⵉ ⵜⴰⴷⴷⴰⵔⵜ ⵏⵏⴻⵙ ⵓ ⵙⵉⴷⵉ ⵜⵓⵖⴰ ⵉⴳⴳⴰ ⴰⵙ ⵍⴻⵀⵏⴰ ⵥⵉ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⵙ ⵉ ⴷ ⴰⵙ ⴷⴷ-ⵉⵏⵏⴹⴻⵏ, ⵉⵎⵙⴰⵔ, ⴰⵇⴰ ⵉⵏⵏⴰ ⵓⵊⴻⴵⵉⴷ ⵉ ⵓⵏⴰⴱⵉ ⵏⴰⵜⴰⵏ: “ⵅⵥⴰⵔ, ⵏⴻⵛⵛ ⵥⴻⴷⴷⵖⴻⵖ ⴷⴻⴳ ⵉⵛⵜ ⵏ ⵜⴰⴷⴷⴰⵔⵜ ⵏ ⵓⴽⴻⵛⵛⵓⴹ ⵏ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ, ⵎⴰⵛⴰ ⵜⵜⴰⴱⵓⵜ ⵏ ⵙⵉⴷⵉ ⵉⵥⴻⴷⴷⴻⵖ ⴷⵉ ⵍⵡⴻⵙⵜ ⵏ ⵜⵊⴰⵔⵜⵉⵍⵉⵏ ⵏ ⵓⵇⵉⴹⵓⵏ.” ⵏⴰⵜⴰⵏ ⵉⵏⵏⴰ ⵉ ⵓⵊⴻⴵⵉⴷ: “ⵓⵢⵓⵔ ⵡⴰⵀⴰ, ⴻⴳⴳ ⵎⴰⵔⵔⴰ ⵎⵉⵏ ⵖⴰⵔⴻⴽ ⴷⴻⴳ ⵡⵓⵍ ⵏⵏⴻⴽ, ⵎⴰⵖⴰⵔ ⵙⵉⴷⵉ ⴰⴽⵉⴷⴻⴽ.”
ⴷⵉ ⴵⵉⵍⴻⵜ ⵏⵏⵉ ⵉⵎⵙⴰⵔ ⴰⵇⴰ ⵉⴼⴼⴻⵖ ⵡⴰⵡⴰⵍ ⵏ ⵙⵉⴷⵉ ⵖⴰⵔ ⵏⴰⵜⴰⵏ, ⵉⵏⵏⴰ: “ⵓⵢⵓⵔ, ⵉⵏⵉ ⵉ ⵓⵎⵙⴻⵅⵅⴰⵔ ⵉⵏⵓ, ⵉ ⴷⴰⵡⵓⴷ: ‘ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ: ⵎⴰ ⵛⴻⴽ ⵜⴻⵅⵙⴻⴷ ⴰⴷ ⴰⵢⵉ ⵜⴻⴱⵏⵉⴷ ⵉⵛⵜ ⵏ ⵜⴰⴷⴷⴰⵔⵜ, ⵎⴰⵃⴻⵏⴷ ⴰⴷ ⴷⴰⵢⴻⵙ ⵥⴻⴷⵖⴻⵖ? ⵄⴻⵎⵎⴰⵔⵚ ⵡⴰⵔ ⵥⴷⵉⵖⴻⵖ ⴷⴻⴳ ⵉⵛⵜ ⵏ ⵜⴰⴷⴷⴰⵔⵜ ⵥⴻⴳ ⵡⴰⵙⵙ ⵓⵎⵉ ⴷⴷ-ⵙⵙⴳⴰⵄⵄⴷⴻⵖ ⴰⵢⵜ ⵏ ⵉⵙⵔⴰⵢⵉⵍ ⵥⵉ ⵎⵉⵚⵔⴰ ⵖⴰⵔⴻⵙ ⴰⵍ ⴰⵙⵙ-ⴰ, ⵎⴰⵛⴰ ⴷⵓⵔⵔⵢⴻⵖ ⴷⴻⴳ ⵉⵊⵊ ⵏ ⵓⵇⵉⴹⵓⵏ, ⴷⴻⴳ ⵉⵛⵜ ⵏ ⵜⵥⴻⴷⴷⵉⵖⵜ. ⵎⴰⵏⵉ ⵎⵎⴰ ⴷⵓⵔⵔⵢⴻⵖ ⴰⴽ-ⴷ ⴰⵢⵜ ⵏ ⵉⵙⵔⴰⵢⵉⵍ, ⵎⴰ ⵏⴻⵛⵛ ⵄⴻⵎⵎⴰⵔⵚ ⵙⵙⵉⵡⵍⴻⵖ ⵓⵍⴰ ⵙ ⵉⵊⵊ ⵏ ⵡⴰⵡⴰⵍ ⵉ ⵉⵛⵜ ⵥⵉ ⵜⵇⴻⴱⴱⴰⵍ ⵏ ⵉⵙⵔⴰⵢⵉⵍ ⵜⵉⵏⵏⵉ ⵉ ⵓⵎⵓⵔⴻⵖ ⴰⴷ ⴰⵔⵡⴻⵙⴻⵏ ⵍⴳⴻⵏⵙ ⵉⵏⵓ ⵉⵙⵔⴰⵢⵉⵍ, ⵓ ⵏⵏⵉⵖ: ⵎⴰⵢⴻⵎⵎⵉ ⵡⴰⵔ ⴷ ⴰⵢⵉ ⵜⴻⴱⵏⵉⵎ ⵉⵛⵜ ⵏ ⵜⴰⴷⴷⴰⵔⵜ ⵏ ⵓⴽⴻⵛⵛⵓⴹ ⵏ ⵜⵛⴻⵊⵊⴰⵔⵜ ⵏ ⵜⴻⵏⴳⴻⵍⵜ?’ ”
ⵅⴻⵏⵏⵉ ⵍⴻⵅⵅⵓ, ⴰⵎⵎⵓ ⵉ ⵉⵜⵜⵅⴻⵚⵚⴰ ⴰⴷ ⵜⵉⵏⵉⴷ ⵉ ⵓⵎⵙⴻⵅⵅⴰⵔ ⵉⵏⵓ, ⵉ ⴷⴰⵡⵓⴷ: “ⴰⵎⵎⵓ ⵉ ⵉⵇⵇⴰⵔ ⵙⵉⴷⵉ ⵏ ⵍⵄⴻⵙⴽⴰⵔⴰⵜ: ⵏⴻⵛⵛ ⵉⵡⵢⴻⵖ-ⴷⴷ ⵛⴻⴽ ⵥⵉ ⵍⴽⵓⵔⵉ, ⵥⵉ ⴹⴻⴼⴼⴰⵔ ⵏ ⵡⵓⴵⵉ, ⵎⴰⵃⴻⵏⴷ ⴰⴷ ⵜⵉⵍⵉⴷ ⴷ ⴰⵎⴳⴻⵡⵡⴰⴷ ⵅ ⵍⴳⴻⵏⵙ ⵉⵏⵓ, ⵅ ⵉⵙⵔⴰⵢⵉⵍ. ⵎⴰⵏⵉ ⵎⴰ ⵜⵓⵢⵓⵔⴻⴷ, ⵏⴻⵛⵛ ⴰⵇⴰ ⴰⵢⵉ ⴰⴽⵉⴷⴻⴽ ⵓ ⵏⴻⵛⵛ ⵇⴹⵉⵖ ⵅ ⵎⴰⵔⵔⴰ ⵍⵄⴻⴷⵢⴰⵏ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ. ⵏⴻⵛⵛ ⴳⴳⵉⵖ ⴰⵛ ⵉⵊⵊ ⵏ ⵉⵙⴻⵎ ⴷ ⴰⵎⴻⵇⵇⵔⴰⵏ ⴰⵎⴻⵛⵏⴰⵡ ⵉⵙⵎⴰⵡⴻⵏ ⵏ ⵉⵎⴻⵇⵇⵔⴰⵏⴻⵏ ⵏⵏⵉ ⵉⴵⴰⵏ ⵅ ⵜⴻⵎⵎⵓⵔⵜ. ⵏⴻⵛⵛ ⵏⴻⵢⵢⵛⴻⵖ ⵉⵊⵊ ⵏ ⵡⴻⵎⵛⴰⵏ ⵉ ⵍⴳⴻⵏⵙ ⵉⵏⵓ, ⵉ ⵉⵙⵔⴰⵢⵉⵍ, ⵓⵛⴰ ⵥⵥⵓⵖ ⵜ ⴷⵉⵏ ⵎⴰⵃⴻⵏⴷ ⴰⴷ ⵉⵥⴷⴻⵖ ⴷⴻⴳ ⵡⴻⵎⵛⴰⵏ ⵏⵏⴻⵙ ⵓ ⵡⴰⵔ ⵉⵜⵡⴰⵙⵙⴻⵏⵀⴻⵥⵥⵉ ⵄⴰⴷ ⵓⵍⴰ ⵡⴰⵔ ⵜ ⵙⵙⵃⴻⵚⵚⴰⵔⵉⵏ ⵄⴰⴷ ⴰⵢⵜ ⵏ ⵍⵎⵓⵄⵚⵉⵢⵢⴻⵜ ⴰⵎ ⴷⴻⴳ ⵓⵎⴻⵥⵡⴰⵔⵓ, ⵥⴻⴳ ⵡⴰⵙⵙ ⵏⵏⵉ ⴳⴳⵉⵖ ⵏⴻⵛⵛ ⵍⵇⵓⴹⴰⵜ ⵅ ⵍⴳⴻⵏⵙ ⵉⵏⵓ ⵉⵙⵔⴰⵢⵉⵍ. ⵏⴻⵛⵛ ⵡⵛⵉⵖ ⴰⵛ ⵍⴻⵀⵏⴰ ⵥⵉ ⵎⴰⵔⵔⴰ ⵍⵄⴻⴷⵢⴰⵏ ⵏⵏⴻⴽ ⵓⵛⴰ ⵍⴻⵅⵅⵓ ⴰⴷ ⴰⵛ ⵉⵙⵙⵛⴻⵏ ⵙⵉⴷⵉ, ⴰⵇⴰ ⵙⵉⴷⵉ ⴰⴷ ⴰⵛ ⵉⴳⴳ ⵉⵛⵜ ⵏ ⵜⴰⴷⴷⴰⵔⵜ. ⵍⴰⵎⵉ ⵜⵜⵡⴰⴽⴻⵎⵎⵍⴻⵏ ⵡⵓⵙⵙⴰⵏ ⵏⵏⴻⴽ ⵓⵛⴰ ⵜⴻⵜⵜⵡⴰⵙⵙⴰⵔⵙⴻⴷ ⴷⴻⴳ ⵡⴻⵏⴹⴻⵍ ⵊⴰⵔ ⵍⴻⵊⴷⵓⴷ ⵏⵏⴻⴽ, ⴰⴷ ⴷⴷ-ⵙⵙⴻⴽⴽⴰⵔⴻⵖ ⵥⵥⴰⵔⵉⵄⴻⵜ ⵏⵏⴻⴽ ⵉ ⴷⴷ-ⵉⵜⵜⴻⴼⴼⵖⴻⵏ ⵥⵉ ⴷⴰⵅⴻⵍ ⵏⵏⴻⴽ ⵓ ⵏⴻⵛⵛ ⴰⴷ ⵙⵙⵎⴻⵜⵏⴻⵖ ⵜⴰⴳⴻⵍⴷⵉⵜ ⵏⵏⴻⵙ. ⵏⴻⵜⵜⴰ ⴰⴷ ⵉⴱⵏⴰ ⵉⵛⵜ ⵏ ⵜⴰⴷⴷⴰⵔⵜ ⵉ ⵢⵉⵙⴻⵎ ⵉⵏⵓ ⵓ ⵏⴻⵛⵛ ⴰⴷ ⵙⵙⵎⴻⵜⵏⴻⵖ ⵍⴽⵓⵔⵙⵉ ⵏ ⵜⴰⴳⴻⵍⴷⵉⵜ ⵏⵏⴻⵙ ⵉ ⵍⴻⴱⴷⴰ. ⵏⴻⵛⵛ ⴰⴷ ⵉⵍⵉⵖ ⴷ ⴱⴰⴱⴰ ⴰⵙ ⵉ ⵏⴻⵜⵜⴰ ⵓ ⵏⴻⵜⵜⴰ ⴰⴷ ⵢⵉⵍⵉ ⵉ ⵏⴻⵛⵛ ⴷ ⵎⵎⵉ. ⵎⴰⵍⴰ ⵏⴻⵜⵜⴰ ⵉⴼⴼⴰⵔⵢⴻⴹ, ⴰⴷ ⵜ ⴰⵔⴻⴱⴱⵉⵖ ⵙ ⵡⴻⵄⵎⵓⴷ ⴷ ⵜⴻⵢⵢⵉⵜⴰ ⵏ ⴱⵏⴰⴷⴻⵎ. ⵜⴰⵎⴻⵅⵙⵉⵡⵜ ⵉⵏⵓ ⵉⵛⴻⵡⵡⴰⵔⴻⵏ ⵡⴰⵔ ⵥⵥⴰⵢⴻⵙ ⵜⵜⵅⴻⵏⵏⴻⵙ ⴰⵎ ⵎⴰⵎⵎⴻⵛ ⵜⴻⵙⵙⵅⴻⵏⵙⴻⵖ ⵏⴻⵛⵛ ⵅ ⵛⴰⵡⵓⵍ, ⵡⴻⵏⵏⵉ ⵉ ⴷⴷ-ⴽⴽⵙⴻⵖ ⵥⵉ ⵥⵥⴰⵜ ⵏ ⵡⵓⴷⴻⵎ ⵏⵏⴻⴽ. ⵜⴰⴷⴷⴰⵔⵜ ⵏⵏⴻⴽ ⴷ ⵜⴳⴻⵍⴷⵉⵜ ⵏⵏⴻⴽ ⴰⴷ ⵜⵜⵡⴰⵙⵙⵎⴻⵜⵏⴻⵏⵜ ⵥⵥⴰⵜ ⵉ ⵡⵓⴷⴻⵎ ⵏⵏⴻⴽ ⵉ ⵍⴻⴱⴷⴰ, ⵍⴽⵓⵔⵙⵉ ⵉⴳⴻⵍⵍⴷⴻⵏ ⵏⵏⴻⴽ ⴰⴷ ⵉⵇⵇⵉⵎ ⵉⴱⴻⴷⴷ ⵉ ⵍⴻⴱⴷⴰ.’ ” ⵏⴰⵜⴰⵏ ⵉⵙⵙⵉⵡⴻⵍ ⵖⴰⵔ ⴷⴰⵡⵓⴷ ⴰⵡⴰⵍⴻⵏ-ⴰ ⴷ ⵉⵊⵊⴻⵏ ⴷ ⵎⴰⵔⵔⴰ ⴰⵙⴰⵔⴳⴻⴱ-ⴰ. (2 ⵚⴰⵎ. 7:1-17)
ⵏⴻⵜⵡⴰⵍⴰ ⴰⵇⴰ ⴰⵔⴻⴱⴱⵉ ⵉⵡⴰⵄⴷ ⴷⴰⵡⵓⴷ ⵉⵊⵊ ⵎⵎⵉⵙ ⵏⵏⵉ ⵉ ⵖⴰ ⵢⵉⵍⵉⵏ ⵅ ⵍⴽⵓⵔⵙⵉ ⵏ ⵜⴳⴻⵍⴷⵉⵜ ⵏⵏⴻⵙ ⵉ ⵍⴻⴱⴷⴰ. ⵎⴰⵏ ⴰⵢⴰ ⵉⵅⵙ ⴰⴷ ⵢⵉⵏⵉ ⴱⴻⵍⵍⵉ ⵎⵎⵉⵙ ⵏ ⴷⴰⵡⵓⴷ ⵏⵏⵉ ⴰⴷ ⵢⵉⵍⵉ ⴷ ⴱⵏⴰⴷⴻⵎ ⵥⴻⴳ ⵉⵊⵊ ⵏ ⵓⵖⴻⵥⴷⵉⵙ ⵎⴰⵛⴰ ⵥⴻⴳ ⵓⵖⴻⵥⴷⵉⵙ ⵏⵏⴻⵖⵏⵉ ⴰⴷ ⵢⵉⵍⵉ ⴰⵎ ⴰⵔⴻⴱⴱⵉ ⵡⴻⵏⵏⵉ ⵖⴰⵔ ⵜⴻⴵⴰ ⵜⵓⴷⴰⵔⵜ ⵉ ⵡⴰⵔ ⵉⴼⴻⵏⵏⵉⵏ, ⵎⵉⵏⵥⵉ ⵏⴻⵖⵔⴰ ⴰⵇⴰ ⵜⴰⴳⴻⵍⴷⴰ ⴷ ⵍⵄⴰⵔⵛ ⴷ ⵜⴳⴻⵍⴷⵉⵜ ⵏ ⵎⵎⵉⵙ ⵏ ⴷⴰⵡⵓⴷ ⴰⴷ ⵇⵇⵉⵎⴻⵏ ⵉ ⵍⴻⴱⴷⴰ! ⴰⵎⵎⵓ ⵉ ⵜⵓⵖⴰ ⵜⵜⵏⴰⴱⴱⴻⵏ ⵄⴰⵡⴻⴷ ⵎⴰⵔⵔⴰ ⵉⵏⴰⴱⵉⵢⵢⴻⵏ ⵅ ⵜⵡⴰⵙⵉⵜ ⵏ ⵓⵊⴻⴵⵉⴷ ⴰⵎⴻⵇⵇⵔⴰⵏ ⵏ ⵉⵙⵔⴰⵢⵉⵍ ⵓ ⵅ ⵜⴳⴻⵍⴷⵉⵜ ⵉⵜⵜⴷⵓⵎⴰⵏ ⵉ ⵍⴻⴱⴷⴰ ⵉ-ⴷⴷ ⵖⴰ ⵢⴰⵙⴻⵏ.
ⵎⴰⵛⴰ ⴰⵎ ⵏⵉⵥⵡⴰⵔ ⵏⴻⵏⵏⴰ, ⴷⴰⵡⵓⴷ ⵡⴰⵔ ⵉⵥⴻⵎⵎⴰⵔ ⴰⴷ ⵉⴼⴻⴽⴽ ⵉⵅⴻⴼ ⵏⵏⴻⵙ ⵥⵉ ⴷⴷⴻⵏⴱ ⵉ ⵉⴷⴷⴰⵔⴻⵏ ⴷⴻⴳ ⵡⵓⵍ ⵏⵏⴻⵙ, ⵡⴰⵅⵅⴰ ⵖⴰⵔⴻⵙ ⵍⴻⵎⵖⴰⵔⴻⵜ ⴰⵟⵟⴰⵙ ⵓⵍⴰ ⴷ ⵉⵊⴻⴵⵉⴷⴻⵏ, ⵜⴰⵔⵡⴰ ⵏⵏⴻⵙ ⴰⵡⴰⵔⵏⵉ ⴰⵙ ⵡⴰⵔ ⵥⴻⵎⵎⴰⵔⴻⵏ, ⴷⴻⵏⵏⴱⴻⵏ ⵎⴰⵀⵓ, ⵄⴻⴱⴱⴷⴻⵏ ⵍⴰⵚⵏⴰⵎ, ⴼⴼⵖⴻⵏ ⵥⴻⴳ ⵡⴻⴱⵔⵉⴷ ⵏ ⵓⵄⴱⴻⴷ ⵏ ⴰⵔⴻⴱⴱⵉ ⵏ ⵉⵙⵔⴰⵢⵉⵍ, ⴼⴻⵙⵙⴷⴻⵏ ⵣⵥⴰⵡⴻⵛⵜ ⵏⵏⴻⵙ ⵉⵇⴻⴷⴷⵙⴻⵏ ⴷⵉ ⵓⵔⵛⴰⵍⵉⵎ, ⵙⵙⵉⴷⴼⴻⵏ ⴷⴰⵢⵙⴻⵏ ⵉⵔⴻⴱⴱⵉⵜⴻⵏ ⵉⵖⵔⵉⴱⴻⵏ ⴰⵍⴰⵎⵉ ⵉⵅⴻⵢⵢⴻⵇ ⴰⵔⴻⴱⴱⵉ ⴰⵟⵟⴰⵙ ⵙ ⵡⴰⵟⵟⴰⵙ, ⵉⵙⵙⵓⴼⴼⴻⵖ ⵉ-ⵜⴻⵏ ⵥⵉ ⵜⴻⵎⵎⵓⵔⵜ ⵉ ⴷ ⴰⵙⴻⵏ ⵉⵡⵛⴰ ⴰⵡⴰⵔⵏⵉ ⵍⴰⵎⵉ ⴷⴷ-ⴼⴼⵖⴻⵏ ⵥⵉ ⵎⵉⵚⵔⴰ, ⵉⵏⴷⴻⵀ ⵉ-ⵜⴻⵏ ⵖⴰⵔ ⵜⴻⵎⵎⵓⵔⵜ ⵏ ⴱⴰⴱⵉⵍ (ⵍⵄⵉⵔⴰⵇ ⵏ ⵍⴻⵅⵅⵓ). ⵏⴰⴱⵓⵅⴰⴷⵏⴰⵚⵚⴰⵔ, ⴰⵊⴻⴵⵉⴷ ⵏ ⴱⴰⴱⵉⵍ ⵉⵀⴷⴻⵎ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ ⴷⵉ ⵓⵔⵛⴰⵍⵉⵎ, ⵉⵡⵢⵉ ⴰⴽⵉⴷⴻⵙ ⵍⴻⵇⵛⵓⵄ ⵉⵇⴻⴷⴷⵙⴻⵏ ⵥⵥⴰⵢⴻⵙ, ⵉⵙⵙⴰⵔⵙ ⵉ-ⵜⴻⵏ ⴷⵉ ⵥⵥⴰⵡⴻⵛⵜ ⵏ ⵉⵔⴻⴱⴱⵉⵜⴻⵏ ⵏⵏⴻⵙ ⴷⵉ ⴱⴰⴱⵉⵍ ⵓⵛⴰ ⵜⴻⴷⵡⴻⵍ ⵜⴻⵏⴷⵉⵏⵜ ⵏ ⵓⵔⵛⴰⵍⵉⵎ ⴷ ⵍⵅⴰⵔⴱⴻⵜ ⵓ ⵉⵎⴻⵥⴷⴰⵖ ⵏ ⵜⴻⵎⵎⵓⵔⵜ, ⴰⵢⵜ ⵏ ⵉⵙⵔⴰⵢⵉⵍ ⵉⵏⴷⴻⵀ ⵉ-ⵜⴻⵏ ⴷⵉ ⵍⵎⴻⵏⴼⴰ ⵖⴰⵔ ⴱⴰⴱⵉⵍ, ⵥⴻⴷⵖⴻⵏ ⴷⵉⵏ 70 ⵉⵙⴻⴳⴳⵯⵓⵙⴰ.
ⵏⵜⴰⴼ ⵅⴻⵏⵏⵉ ⴰⵇⴰ ⵍⵄⴰⵀⴷ ⴰⵇⴷⵉⵎ ⵡⴰⵔ ⵉⵏⴻⴼⴼⴻⵄ ⵛⴰ ⵉ ⴰⵢⵜ ⵏ ⵉⵙⵔⴰⵢⵉⵍ ⵎⵉⵏⵥⵉ ⵏⵉⵜⵏⵉ ⵡⴰⵔ ⵥⴻⵎⵎⴰⵔⴻⵏ ⴰⴷ ⴽⴻⵎⵎⵍⴻⵏ ⵎⴰⵔⵔⴰ ⵍⴼⴰⵔⴰⵢⵉⴹ ⴷ ⵜⵡⴻⵚⵚⴰ ⵉ ⴷ ⴰⵙⴻⵏ ⵉⵡⵛⴰ ⴰⵔⴻⴱⴱⵉ ⵙ ⵓⴼⵓⵙ ⵏ ⵎⵓⵙⴰ. ⴼⴻⵛⵍⴻⵏ ⵙ ⵙⵙⵉⴱⴱⴻⵜ ⵏ ⴷⴷⴻⵏⴱ ⵉ ⵉⴷⴷⴰⵔⴻⵏ ⴷⴻⴳ ⵡⵓⵍⴰⵡⴻⵏ ⵏ ⴱⵏⴰⴷⴻⵎ ⵥⴻⴳ ⵡⴰⵎⵉ ⵉⵅⴹⴰ ⴰⴷⴰⵎ, ⴱⵏⴰⴷⴻⵎ ⴰⵎⴻⵥⵡⴰⵔⵓ. ⴰⴷⴰⵎ ⵉⵅⴹⴰ ⵓ ⵃⴰⵡⴰ ⵜᵉⵜⵜⵡⴰⵙⵙⴻⵖⵡⴰ. ⵙ ⵓⵢⴻⵏⵏⵉ ⴷⴻⵡⵍⴻⵏ ⵎⴰⵔⵔⴰ ⵉⵡⴷⴰⵏ ⴷ ⵉⵎⴻⴷⵏⴰⴱ ⵥⴻⴳ ⵡⵓⵙⵙⴰⵏ ⵏ ⴰⴷⴰⵎ ⴰⵍ ⵓⵙⵙⴰⵏ ⵏ ⵏⵓⵃ, ⵓ ⵥⴻⴳ ⵡⵓⵙⵙⴰⵏ ⵏ ⵏⵓⵃ ⴰⵍ ⵓⵙⵙⴰⵏ ⵏ ⵉⴱⵔⴰⵀⵉⵎ, ⵓ ⵥⴻⴳ ⵡⵓⵙⵙⴰⵏ ⵏ ⵉⴱⵔⴰⵀⵉⵎ ⴰⵍ ⵓⵙⵙⴰⵏ ⵏ ⵢⴰⵄⵇⵓⴱ, ⵓ ⵥⴻⴳ ⵡⵓⵙⵙⴰⵏ ⵏ ⵢⴰⵄⵇⵓⴱ ⴷ 12 ⵉⵃⴻⵏⵊⵉⵔⴻⵏ ⵏⵏⴻⵙ ⴰⵍ ⵓⵙⵙⴰⵏ ⵏ ⵎⵓⵙⴰ, ⵓ ⵥⴻⴳ ⵡⵓⵙⵙⴰⵏ ⵏ ⵎⵓⵙⴰ ⴰⵍ ⵓⵙⵙⴰⵏ ⵏ ⵓⵊⴻⴵⵉⴷ ⵏ ⵉⵙⵔⴰⵢⵉⵍ ⴷⴰⵡⵓⴷ, ⵓ ⵥⴻⴳ ⵡⵓⵙⵙⴰⵏ ⵏ ⴷⴰⵡⵓⴷ ⴰⵍ ⵓⵙⵙⴰⵏ ⵏ ⵍⵎⴰⵙⵉⵃ ⵡⴻⵏⵏⵉ ⴷⴷ-ⵉⵅⴻⵍⵇⴻⵏ ⵥⵉ ⵎⴰⵔⵢⴰⵎ (ⵜⴰⵎⵖⴰⵔⵜ ⵜⵓⴷⴰⵛⵜ ⵥⵉ ⵜⴻⵇⴱⵉⵞ ⵏ ⵓⵊⴻⴵⵉⴷ ⴷⴰⵡⵓⴷ) ⵙ ⴰⵔⵔⵓⵃ ⵉⵇⴻⴷⴷⵙⴻⵏ.
ⵏⵜⴰⴼ ⵅⴻⵏⵏⵉ ⴰⵇⴰ ⴰⴷⴰⵎ ⵉⵙⵙⴻⵅⵙⴰⵔ ⵜⵓⴷⴰⵔⵜ ⵏⵏⴻⵙ ⵉⵜⵜⴷⵓⵎⴰⵏ ⴰⴽ-ⴷ ⴰⵔⴻⴱⴱⵉ, ⵓⵍⴰ ⴷ ⴰⵢⵜ ⵏ ⵉⵙⵔⴰⵢⵉⵍ ⵡⴰⵔ ⵥⴻⵎⵎⴰⵔⴻⵏ ⴰⴷ ⵄⴻⴷⵍⴻⵏ ⵜⵓⵢⵓⵔⵜ ⵜⴰⵎⴻⴷⵏⵓⴱⵜ ⵏⵙⴻⵏ ⵙ ⵓⴽⴻⵎⵎⴻⵍ ⵏ ⵎⴰⵔⵔⴰ ⵎⵉⵏ ⵉⵜⵜⵡⴰⵡⴻⵚⵚⴰⵏ ⴷⵉ ⵛⵛⴰⵔⵉⵄⴰ ⵏ ⵎⵓⵙⴰ ⵏⵉⵖ ⵙ ⵜⴻⵡⵀⵉⴱⵜ ⵏ ⵍⵓⵍⵓⴼ ⵏ ⵉⵎⵓⴷⴷⴰⵔⴻⵏ ⵅ ⵓⵄⴰⵍⵜⴰⵔ ⵥⵥⴰⵜ ⵉ ⵓⵇⵉⴹⵓⵏ ⵉⵇⴻⴷⴷⵙⴻⵏ ⴷ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏⵙⴻⵏ ⴷⵉ ⵓⵔⵛⴰⵍⵉⵎ ⵉ ⵓⵄⴱⴰⴷ ⵏ ⵙⵉⴷⵉ ⴰⵔⴻⴱⴱⵉ ⵅ ⵍⴻⵃⵙⴰⴱ ⵏ ⵍⴼⴰⵔⴰⵢⵉⴹ ⴷ ⵜⵡⴻⵚⵚⴰ ⵏⵏⴻⵙ.
ⴰⵡⴰⵔⵏⵉ 70 ⵏ ⵉⵙⴻⴳⴳⵯⵓⵙⴰ ⴷⵉ ⴱⴰⴱⵉⵍ ⵢⴰⵔⵔⴰ ⴰⵔⴻⴱⴱⵉ ⵍⵃⴰⴽⴻⵎ ⵏ ⵍⴼⵓⵔⵙ, ⵇⵇⴰⵔⴻⵏ ⴰⵙ ⵇⵓⵔⴰⵛ, ⵡⴻⵏⵏⵉ ⵉⵥⵡⴰⵔⴻⵏ ⵉⵟⵟⴻⴼ ⵜⴰⴳⴻⵍⴷⵉⵜ ⵏ ⴱⴰⴱⵉⵍ, ⵎⴰⵃⴻⵏⴷ ⴰⴷ ⵉⴱⴰⵔⵔⴻⵃ ⵙ ⵜⵉⵍⴻⵍⵍⵉ ⵉ ⵍⴳⴻⵏⵙ ⵏ ⵡⵓⴷⴰⵢⴻⵏ ⵉ ⴷⵉⵏ ⵉⴵⴰⵏ. ⵡⵉ ⵜⵓⵖⴰ ⵉⵅⵙ ⴰⴷ ⴷⴷ-ⵉⵄⵇⴻⴱ ⴰⵇⴰ ⵖⴰⵔⴻⵙ ⵜⵜⴻⵙⵔⵉⵃ ⵥⵥⴰⵢⴻⵙ. ⵎⵖⵉⵔ ⵉⵊⵊ ⵏ ⵡⴻⵥⵢⴻⵏ ⴷ ⴰⵎⴻⵥⵢⴰⵏ ⵏ ⴰⵢⵜ ⵏ ⵉⵙⵔⴰⵢⵉⵍ ⵟⵟⴼⴻⵏ ⵜⴰⵡⵡⴰⵔⵜ ⵏⵏⵉ, ⴷⴻⵡⵍⴻⵏ-ⴷⴷ ⵖⴰⵔ ⵜⴻⵎⵎⵓⵔⵜ ⵏ ⵢⴰⵀⵓⴷⴰ ⴷ ⵜⴻⵏⴷⵉⵏⵜ ⵏ ⵓⵔⵛⴰⵍⵉⵎ ⴷ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵉ ⵉⵜⵜⵡⴰⵀⴻⴷⵎⴻⵏ ⴰⵍ ⴷⵙⴰⵙ ⵏⵏⴻⵙ. ⵖⴰⵔ ⵓⵎⴻⵥⵡⴰⵔⵓ ⵄⴻⴷⵍⴻⵏ ⵣⵥⴰⵡⴻⵛⵜ, ⵅⴻⵏⵏⵉ ⴱⵏⴰⵏ ⵍⴻⵃⵢⵓⴹ ⵄⴰⵡⴻⴷ. ⵉⵏⵏⵉ ⴷ ⴰⵙⴻⵏ ⴷⴷ-ⵉⵏⵏⴹⴻⵏ ⴰⵔⴻⵥⵥⵓⵏ ⴰⴷ ⵜⴻⵏ ⵙⵙⵉⴳⴳⵯⴷⴻⵏ ⴷⵉ ⵎⴰⵔⵔⴰ ⵎⴰⵏ ⴰⵢⴰ, ⵎⴰⵛⴰ ⴰⵔⴻⴱⴱⵉ ⵉⵡⵛⴰ ⴰⵙⴻⵏ ⴰⴼⵓⵙ. ⵎⴰⵛⴰ ⵜⴰⴳⴻⵍⴷⵉⵜ ⵏ ⵉⵙⵔⴰⵢⵉⵍ ⵡⴰⵔ ⴷⴷ-ⵜⴻⴷⵡⵉⵍ ⵄⴰⵡⴻⴷ, ⵙ ⵎⵉⵏⵥⵉ ⵇⵇⵉⵎⴻⵏ ⵙⴰⴷⵓ ⵓⴼⵓⵙ ⵏ ⵍⴼⵓⵔⵙ, ⵓ ⴰⵡⴰⵔⵏⵉ ⴰⵙ ⵙⴰⴷⵓ ⵓⴼⵓⵙ ⵏ ⵉⵢⵓⵏⴰⵏⵉⵢⵢⴻⵏ ⴷ ⵍⵃⴰⴽⴻⵎ ⵏⵙⴻⵏ ⴰⵍⵉⴽⵙⴰⵏⴷⵉⵔ ⴰⵎⴻⵇⵇⵔⴰⵏ, ⵓ ⴰⵡⴰⵔⵏⵉ ⴰⵙ ⵙⴰⴷⵓ ⴰⴼⵓⵙ ⵏ ⵉⵔⵓⵎⴰⵏⵉⵢⵢⴻⵏ, ⵍⵡⴻⵇⵜ ⵏⵏⵉ ⴷⵉ ⴷⴷ-ⵉⵅⵍⴻⵇ ⵢⴻⵛⵛⵓ ⵍⵎⴰⵙⵉⵃ.
ⵎⴰⵎⵎⴻⵛ ⵉ ⵖⴰ ⵢⵉⵍⵉ ⵅⴻⵏⵏⵉ ⵓⵙⴻⵏⵊⴻⵎ ⵏ ⴰⵔⴻⴱⴱⵉ ⵉ ⵉⵡⴰⵄⴷ ⴰⴷⴰⵎ ⴷ ⵃⴰⵡⴰ? ⴰⵔⴻⴱⴱⵉ ⵜⵓⵖⴰ ⵢⴰⵔⴻⵥⵥⵓ ⵉⵊⵊ ⵏ ⵎⵎⵉⵙ ⵏ ⴱⵏⴰⴷⴻⵎ ⴱⵍⴰ ⵍⵄⵉⴱ ⴷⴻⴳ ⵡⴻⵎⵛⴰⵏ ⵏ ⴰⴷⴰⵎ, ⵎⴰⵛⴰ ⵓⵎⵉ ⵡⴰⵔ ⵜ ⵢⵓⴼⵉ ⵊⴰⵔ ⵜⴰⵔⵡⴰ ⵏ ⴱⵏⴰⴷⴻⵎ ⵓ ⵡⴰⵔ ⵜ ⵢⵓⴼⵉ ⵄⴰⵡⴻⴷ ⵊⴰⵔ ⴰⵢⵜ ⵏ ⵉⵙⵔⴰⵢⵉⵍ, ⵉⵙⴻⴽⴽ-ⴷⴷ ⵎⵎⵉⵙ ⵡⴻⵏⵏⵉ ⴷⴷ-ⵉⵇⵇⴰⵔⵚⴻⵏ ⵥⴻⴳ ⵡⵓⴷⴰⵢⴻⵏ, ⵉⵅⵙ ⴰⴷ ⵢⵉⵏⵉ ⵥⵉ ⵜⴻⵄⵥⴰⵔⴻⵛⵜ ⵎⴰⵔⵢⴰⵎ, ⵙ ⴰⵔⵔⵓⵃ ⵉⵇⴻⴷⴷⵙⴻⵏ, ⵓ ⵜⴰⵏⵉⵜⴰ ⵜⵓⵖⴰ ⵜⵜ ⴷ ⵣⵥⴰⵔⵉⵄⴻⵜ ⵏ ⵜⴻⵎⵖⴰⵔⵜ: ⵢⴻⵛⵛⵓ ⵍⵎⴰⵙⵉⵃ. ⵓⵛⴰ ⵓⵎⵉ ⵜⵓⵖⴰ ⵢⵓⵙⵓⴼ, ⵡⴻⵏⵏⵉ ⵃⴻⵙⴱⴻⵏ ⵏⵉⵜⵏⵉ ⴷ ⴱⴰⴱⴰ ⴰⵙ, ⵉⴼⴼⴻⵖ-ⴷⴷ ⵥⵉ ⵜⴰⵔⵡⴰ ⵏ ⵓⵊⴻⴵⵉⴷ ⴷⴰⵡⵓⴷ (ⵡⴰⵅⵅⴰ ⵡⴰⵔ ⴷⵉⵏ ⵜⴻⴵⵉ ⵜⴰⴳⴻⵍⴷⵉⵜ ⴷⴻⴳ ⵡⵓⵙⵙⴰⵏ ⵏⵏⵉ), ⵜⵓⵖⴰ ⵢⴻⵛⵛⵓ ⵍⵎⴰⵙⵉⵀ ⴷⵉ ⵍⵡⴻⵇⵜ ⴷ ⵉⵊⵊⴻⵏ ⵓⵍⴰ ⴷ ⵎⵎⵉⵙ ⵏ ⴷⴰⵡⵓⴷ ⵓⵛⴰ ⵓⵍⴰ ⴷ ⵎⵎⵉⵙ ⵏ ⵉⴱⵔⴰⵀⵉⵎ, ⵡⴻⵏⵏⵉ ⵉⴵⴰⵏ ⴷ ⴱⴰⴱⴰⵙ ⵏ ⵍⴳⴻⵏⵙ ⵏ ⵉⵙⵔⴰⵢⵉⵍ.
ⴰⴷⵍⵉⵙ ⵏ ⵓⵎⴻⵥⵔⵓⵢ ⵏ ⵡⴻⵅⵍⴰⵇ ⵏ ⵢⴻⵛⵛⵓ ⵍⵎⴰⵙⵉⵃ, ⵎⵎⵉⵙ ⵏ ⴷⴰⵡⵓⴷ, ⵎⵎⵉⵙ ⵏ ⵉⴱⵔⴰⵀⵉⵎ ⵉⵇⵇⴰⵔ (ⵍ’ⵉⵏⵊⵉⵍ ⵎⴰⵜⵜⴰ 1).
ⵉⴱⵔⴰⵀⵉⵎ ⵉⵊⵊⴰ-ⴷⴷ ⵉⵙⵃⴰⵇ, ⵉⵙⵃⴰⵇ ⵉⵊⵊⴰ-ⴷⴷ ⵢⴰⵄⵇⵓⴱ, ⵢⴰⵄⵇⵓⴱ ⵉⵊⵊⴰ-ⴷⴷ ⵢⴰⵀⵓⴷⴰ ⴷ ⴰⵢⵜⵎⴰⵙ. ⵢⴰⵀⵓⴷⴰ ⵉⵊⵊⴰ-ⴷⴷ ⴼⴰⵔⵉⵚ ⴷ ⵣⴰⵔⴰⵃ ⴰⴽ-ⴷ ⵜⴰⵎⴰⵔ, ⴼⴰⵔⵉⵚ ⵉⵊⵊⴰ-ⴷⴷ ⵃⴰⵚⵔⵓⵏ, ⵃⴰⵚⵔⵓⵏ ⵉⵊⵊⴰ-ⴷⴷ ⴰⵔⴰⵎ, ⴰⵔⴰⵎ ⵉⵊⵊⴰ-ⴷⴷ ⵄⴰⵎⵎⵉⵏⴰⴷⴰⴱ, ⵄⴰⵎⵎⵉⵏⴰⴷⴰⴱ ⵉⵊⵊⴰ-ⴷⴷ ⵏⴰⵃⵛⵓⵏ, ⵏⴰⵃⵛⵓⵏ ⵉⵊⵊⴰ-ⴷⴷ ⵙⴰⵍⵎⵓⵏ, ⵙⴰⵍⵎⵓⵏ ⵉⵊⵊⴰ-ⴷⴷ ⴱⵓⵄⴰⵥ ⴰⴽ-ⴷ ⵔⴰⵃⴰⴱ, ⴱⵓⵄⴰⵥ ⵉⵊⵊⴰ-ⴷⴷ ⵄⵓⴱⵉⴷ ⴰⴽ-ⴷ ⵔⴰⵄⵓⵜ, ⵄⵓⴱⵉⴷ ⵉⵊⵊⴰ-ⴷⴷ ⵢⴰⵙⵙⴰ, ⵢⴰⵙⵙⴰ ⵉⵊⵊⴰ-ⴷⴷ ⴷⴰⵡⵓⴷ, ⴰⵊⴻⴵⵉⴷ, ⵓⵛⴰ ⴷⴰⵡⵓⴷ, ⴰⵊⴻⴵⵉⴷ, ⵉⵊⵊⴰ-ⴷⴷ ⵙⵓⵍⵉⵎⴰⵏ ⴰⴽ-ⴷ ⵜⴻⵎⵖⴰⵔⵜ ⵏ ⵓⵔⵉⵢⴰ.
ⵙⵓⵍⵉⵎⴰⵏ ⵉⵊⵊⴰ-ⴷⴷ ⵔⴰⵃⴰⴱⵄⴰⵎ, ⵔⴰⵃⴰⴱⵄⴰⵎ ⵉⵊⵊⴰ-ⴷⴷ ⴰⴱⵉⵢⴰ, ⴰⴱⵉⵢⴰ ⵉⵊⵊⴰ-ⴷⴷ ⴰⵙⴰ, ⴰⵙⴰ ⵉⵊⵊⴰ-ⴷⴷ ⵢⴰⵀⵓⵛⴰⴼⴰⵟ, ⵢⴰⵀⵓⵛⴰⴼⴰⵟ ⵉⵊⵊⴰ-ⴷⴷ ⵢⵓⵔⴰⵎ, ⵢⵓⵔⴰⵎ ⵉⵊⵊⴰ-ⴷⴷ ⵄⵓⵥⵥⵉⵢⴰ, ⵄⵓⵥⵥⵉⵢⴰ ⵉⵊⵊⴰ-ⴷⴷ ⵢⵓⵜⴰⵎ, ⵢⵓⵜⴰⵎ ⵉⵊⵊⴰ-ⴷⴷ ⴰⵃⴰⵥ, ⴰⵃⴰⵥ ⵉⵊⵊⴰ-ⴷⴷ ⵃⵉⵥⵇⵉⵢⴰ, ⵃⵉⵥⵇⵉⵢⴰ ⵉⵊⵊⴰ-ⴷⴷ ⵎⴰⵏⴰⵙⵙⴰ, ⵎⴰⵏⴰⵙⵙⴰ ⵉⵊⵊⴰ-ⴷⴷ ⴰⵎⵓⵏ, ⴰⵎⵓⵏ ⵉⵊⵊⴰ-ⴷⴷ ⵢⵓⵛⵉⵢⴰ, ⵢⵓⵛⵉⵢⴰ ⵉⵊⵊⴰ-ⴷⴷ ⵢⴰⴽⵓⵏⵢⴰ ⴷ ⴰⵢⵜⵎⴰⵙ ⴷⵉ ⵍⵡⴻⵇⵜ ⵏ ⵜⵎⴻⵃⴱⴰⵙⵜ ⴷⵉ ⴱⴰⴱⵉⵍ.
ⴰⵡⴰⵔⵏⵉ ⵍⴰⵎⵉ ⵅⴰⵙⴻⵏ ⵓⵥⵥⵍⴻⵏ ⵖⴰⵔ ⴱⴰⴱⵉⵍ, ⵢⴰⴽⵓⵏⵢⴰ ⵉⵊⵊⴰ-ⴷⴷ ⵛⴰⵄⴰⵍⵜⵉⵢⵉⵍ, ⵛⴰⵄⴰⵍⵜⵉⵢⵉⵍ ⵉⵊⵊⴰ-ⴷⴷ ⵣⴰⵔⵓⴱⴱⴰⴱⵉⵍ. ⵣⴰⵔⵓⴱⴱⴰⴱⵉⵍ ⵉⵊⵊⴰ-ⴷⴷ ⴰⴱⵉⵀⵓⴷ, ⴰⴱⵉⵀⵓⴷ ⵉⵊⵊⴰ- ⴷⴷ ⴰⵍⵢⴰⵇⵉⵎ, ⴰⵍⵢⴰⵇⵉⵎ ⵉⵊⵊⴰ-ⴷⴷ ⵄⴰⵥⵓⵔ, ⵄⴰⵥⵓⵔ ⵉⵊⵊⴰ-ⴷⴷ ⵚⴰⴷⵓⵇ, ⵚⴰⴷⵓⵇ ⵉⵊⵊⴰ- ⴷⴷ ⴰⵅⵉⵎ, ⴰⵅⵉⵎ ⵉⵊⵊⴰ-ⴷⴷ ⴰⵍⵉⵢⵓⴷ, ⴰⵍⵉⵢⵓⴷ ⵉⵊⵊⴰ-ⴷⴷ ⴰⵍⵉⵄⴰⵥⴰⵔ, ⴰⵍⵉⵄⴰⵥⴰⵔ ⵉⵊⵊⴰ-ⴷⴷ ⵎⴰⵜⵜⴰⵏ, ⵎⴰⵜⵜⴰⵏ ⵉⵊⵊⴰ-ⴷⴷ ⵢⴰⵄⵇⵓⴱ, ⵢⴰⵄⵇⵓⴱ ⵉⵊⵊⴰ-ⴷⴷ ⵢⵓⵙⵓⴼ, ⴰⵔⵢⴰⵥ ⵏ ⵎⴰⵔⵢⴰⵎ, ⵜⴻⵏⵏⵉ ⵉ ⴷⴷ-ⵉⵊⵊⵉⵏ ⵢⴻⵛⵛⵓ ⵓⵎⵉ ⵇⵇⴰⵔⴻⵏ ⵍⵎⴰⵙⵉⵃ.
ⵙ ⵓⵢⴻⵏⵏⵉ ⵎⴰⵔⵔⴰ ⴰⵔⵔⴰⵡⴻⵏ ⵥⵉ ⵉⴱⵔⴰⵀⵉⵎ ⴰⵍ ⴷⴰⵡⵓⴷ ⵉⵡⴹⴻⵏ ⴰⵔⴱⴻⵄⵟⴰⵛ ⵏ ⵡⴰⵔⵔⴰⵡⴻⵏ. ⵣⵉ ⴷⴰⵡⵓⴷ ⴰⵍ ⵜⴰⵎⴻⵃⴱⴰⵙⵜ ⴷⵉ ⴱⴰⴱⵉⵍ ⴰⵔⴱⴻⵄⵜⴰⵛ ⵏ ⵡⴰⵔⵔⴰⵡⴻⵏ ⵓⵛⴰ ⵥⵉ ⵜⵎⴻⵃⴱⴰⵙⵜ ⴷⵉ ⴱⴰⴱⵉⵍ ⴰⵍ ⵍⵎⴰⵙⵉⵃ ⴰⵔⴱⴻⵄⵜⴰⵛ ⵏ ⵡⴰⵔⵔⴰⵡⴻⵏ.
— ⴰⵎⵎⵓ ⵉ ⵢⴻⵎⵙⴰⵔ ⵡⴻⵅⵍⴰⵇ ⵏ ⵢⴻⵛⵛⵓ ⵍⵎⴰⵙⵉⵃ. ⵓⵎⵉ ⵢⴻⵎⵎⴰⵙ ⵎⴰⵔⵢⴰⵎ ⵜⵓⵖⴰ-ⵜⵜ ⴷ ⵜⴰⵏⴻⵅⴹⴻⴱⵜ ⵏ ⵢⵓⵙⵓⴼ, ⵉⴹⵀⴰⵔ-ⴷⴷ ⴱⴻⵍⵍⵉ ⵏⴻⵜⵜⴰⵜ ⵜⴻⴽⵙⵉ ⴰⵄⴻⴷⴷⵉⵙ ⵥⵉ ⴰⵔⵔⵓⵃ ⵉⵇⴻⴷⴷⵙⴻⵏ ⵇⴱⴻⵍ ⵉ ⵖⴰ ⵎⴻⵍⵛⴻⵏ. ⵓⵎⵉ ⴰⵔⵢⴰⵥ ⵏⵏⴻⵙ ⵢⵓⵙⵓⴼ ⵜⵓⵖⴰ ⵉⴳⴳⵓⵔ ⵏⵉⵛⴰⵏ, ⵓ ⵡⴰⵔ ⵉⵅⵙ ⵛⴰ ⴰⴷ ⵜⵜ ⵉⵙⵙⴱⴻⵀⴷⴻⵍ, ⵜⵓⵖⴰ ⵢⴰⵔⴻⵥⵥⵓ ⴰⴷ ⴰⵙ ⵉⴵⴻⴼ ⵙ ⵜⵏⵓⴼⴼⵔⴰ. ⵓⵎⵉ ⵜⵓⵖⴰ ⵉⵜⵜⵅⴰⵔⵔⴰⵚ ⴷⵉ ⵎⴰⵏ ⴰⵢⴰ, ⵉⴹⵀⴰⵔ ⴰⵙ-ⴷⴷ ⵍⵎⴰⵍⴰⴽ ⵏ ⵙⵉⴷⵉ ⴷⵉ ⵜⴰⵔⵊⵉⵜ, ⵉⵏⵏⴰ: “ⴰ ⵢⵓⵙⵓⴼ, ⴰ ⵎⵎⵉⵙ ⵏ ⴷⴰⵡⵓⴷ, ⵡⴰⵔ ⵜⵜⴻⴳⴳⵡⴻⴷ ⴰⴷ ⴷⴷ-ⵜⴰⵡⵢⴻⴷ ⵎⴰⵔⵢⴰⵎ ⴷ ⵜⴰⵎⵖⴰⵔⵜ ⵏⵏⴻⴽ, ⵎⵉⵏⵥⵉ ⵡⴻⵏⵏⵉ ⵉ ⴷⴰⵢⴻⵙ ⴷⴷ-ⵉⵅⴻⵍⵇⴻⵏ, ⴰⵇⴰ ⵏⴻⵜⵜⴰ ⵥⵉ ⴰⵔⵔⵓⵃ ⵉⵇⴻⴷⴷⵙⴻⵏ. ⵏⴻⵜⵜⴰⵜ ⴰⴷ ⵜⴰⵔⵓⵡ ⴰⵃⴻⵏⵊⵉⵔ, ⴰⴷ ⵜ ⵜⵙⴻⵎⵎⵉⴷ ⵢⴻⵛⵛⵓ, ⵎⵉⵏⵥⵉ ⵏⴻⵜⵜⴰ ⴰⴷ ⵉⵙⵙⴻⵏⵊⴻⵎ ⵍⴳⴻⵏⵙ ⵏⵏⴻⵙ ⵥⵉ ⴷⴷⵏⵓⴱ ⵏⵙⴻⵏ.”
ⵎⴰⵔⵔⴰ ⴰⵢⴰ ⵉⵎⵙⴰⵔ ⵃⵉⵎⴰ ⴰⴷ ⵉⵜⵜⵡⴰⴽⴻⵎⵎⴻⵍ ⵎⵉⵏ ⵉⵏⵏⴰ ⵙⵉⴷⵉ ⵙ ⵓⵇⴻⵎⵎⵓⵎ ⵏ ⵓⵏⴰⴱⵉ, ⵓⵎⵉ ⵉⵏⵏⴰ:
“ⵅⵥⴰⵔ, ⵜⴰⵄⵥⴰⵔⴻⵛⵜ ⴰⴷ ⵜⴻⴽⵙⵉ ⴷⴷⴻⵢⵙⴻⵜ ⵓⵛⴰ ⴰⴷ ⵜⴰⵔⵓⵡ ⴰⵃⴻⵏⵊⵉⵔ, ⴰⴷ ⴰⵙ ⵜⴻⴳⴳⴻⴷ ‘ⵄⵉⵎⵎⴰⵏⵓ-ⵉⵍ’
ⵎⵉⵏ ⵉⵅⵙ ⴰⴷ ⵢⵉⵏⵉ: ‘ⴰⵔⴻⴱⴱⵉ ⴰⵇⴰ-ⵜ ⴰⴽⵉⴷⵏⴻⵖ’.”
ⵍⴰⵎⵉ ⴷⴷ-ⵉⴼⴰⵇ ⵢⵓⵙⵓⴼ ⵥⴻⴳ ⵉⴹⴻⵚ, ⵉⴳⴳⴰ ⴰⵎ ⵎⴰⵎⵎⴻⵛ ⵜⵜ ⵢⵓⵎⵓⵔ ⵍⵎⴰⵍⴰⴽ ⵏ ⵙⵉⴷⵉ ⵓⵛⴰ ⵢⵉⵡⵢⵉ-ⴷⴷ ⵜⴰⵎⵖⴰⵔⵜ ⵏⵏⴻⵙ ⵖⴰⵔⴻⵙ, ⵓⵛⴰ ⵏⴻⵜⵜⴰ ⵡⴰⵔ ⵖⴰⵔⴻⵙ ⴷⴷ-ⵉⵇⴰⵔⵔⴻⴱ ⵛⴰ ⴰⵍⴰⵎⵉ ⴷⴷ-ⵜⵓⵔⵓⵡ ⵎⵎⵉⵙ ⴰⵎⴻⵏⵥⵓ ⵓⵛⴰ ⵜⵙⴻⵎⵎⴰ ⵉ-ⵜ ‘ⵢⴻⵛⵛⵓ’.
ⵎⴰ ⵢⴻⵛⵛⵓ ⵡⴰⵏⵉⵜⴰ ⴷ ⵜⵉⴷⴻⵜⵜ ⴷ ⵎⵎⵉⵙ ⵏ ⴷⴰⵡⵓⴷ? … ⵡⴰⵀ, ⵏⵉⵛⴰⵏ, ⵏⴻⵜⵜⴰ ⵥⵉ ⵊⵊⵉⵍ ⵏ ⴷⴰⵡⵓⴷ … ⵉⵅⵙ ⴰⴷ ⵢⵉⵏⵉ ⴰⵎ ⵎⴰⵎⵎⴻⵛ ⵜⵜⵡⴰⵍⴰⵏ ⵉⵡⴷⴰⵏ ⵓ ⵄⵍⴰⵃⵙⴰⴱ ⵍⴼⴰⵔⴰⵢⵉⴹ ⵏ ⵛⵛⴰⵔⵉⵄⴰ. ⵏⵉⵜⵏⵉ ⵃⴻⵙⵙⴱⴻⵏ ⵜ ⴷ ⵎⵎⵉⵙ ⵏ ⵢⵓⵙⵓⴼ ⴷ ⵎⴰⵔⵢⴰⵎ, ⵓⵛⴰ ⵙⵙⵏⴻⵏ ⴰⵇⴰ ⵖⴰⵔⴻⵙ ⴰⵢⵜⵎⴰⵙ ⴷ ⵢⴻⵙⵙⵎⴰⵙ! (ⵅⵥⴰⵔ ⵍ’ⵉⵏⵊⵉⵍ ⵎⴰⵜⵜⴰ 12:46, 13:55-56, ⵍ’ⵉⵏⵊⵉⵍ ⵎⴰⵔⴽⵓⵙ 3:31-32, 6:3 ⵓ ⵍ’ⵉⵏⵊⵉⵍ ⵍⵓⴽⴰ 8:19-20, ⵍ’ⵉⵏⵊⵉⵍ ⵢⵓⵃⴰⵏⵏⴰ 2:12). ⵎⴰⵏ ⴰⵢⴰ ⵥⵉ ⵊⵊⵉⵀⴻⵜ ⵏ ⵡⴻⵅⵍⴰⵇ ⵏⵏⴻⵙ ⵄⵍⴰⵃⵙⴰⴱ ⵛⵛⴰⵔⵉⵄⴰ.
ⵎⴰⵛⴰ ⵥⵉ ⵊⵊⵉⵀⴻⵜ ⵏ ⴰⵔⵔⵓⵃ ⵏⴻⵜⵜⴰ ⵥⵉ ⴰⵔⵔⵓⵃ ⵉⵇⴻⴷⴷⵙⴻⵏ, ⵉⵅⵙ ⴰⴷ ⵢⵉⵏⵉ ⵥⵉ ⴰⵔⴻⴱⴱⵉ, ⵙ ⵎⵉⵏⵥⵉ ⴰⵔⵔⵓⵃ ⵉⵇⴻⴷⴷⵙⴻⵏ ⴷ ⴰⵔⵔⵓⵃ ⵏ ⴰⵔⴻⴱⴱⵉ. ⴰⵔⵔⵓⵃ ⵏⵉⵖ ⴱⵓⵃⴱⴻⵍ ⵏⵏⴻⵖ ⴷ ⵉⵊⵊ ⵏ ⴱⵓⵃⴱⴻⵍ ⵉⵡⴻⵙⵙⴻⵅ ⵥⵉ ⵙⵙⵉⴱⴱⴻⵜ ⵏ ⴷⴷⵏⵓⴱ ⵉ ⴷⴰⵢⵏⴻⵖ, ⵎⴰⵛⴰ ⴰⵔⵔⵓⵃ ⵏ ⴰⵔⴻⴱⴱⵉ ⴷ ⴰⵎⴻⵥⴷⴰⴳ ⵎⴰⵔⵔⴰ, ⵡⴰⵔ ⴷⴰⵢⴻⵙ ⵓⵍⴰ ⴷ ⵉⵊⵊ ⵏ ⵍⵄⵉⴱ. ⵙ ⵓⵢⴻⵏⵏⵉ ⴰⵔⵔⵓⵃ ⵏ ⴰⵔⴻⴱⴱⵉ ⴷ ⴰⵔⵔⵓⵃ ⵉⵇⴻⴷⴷⵙⴻⵏ. ⵢⴻⵛⵛⵓ ⵉⵜⵜⵡⴰⵅⵍⴻⵇ-ⴷⴷ ⵙ ⴰⵔⵔⵓⵃ ⵉⵇⴻⴷⴷⵙⴻⵏ! ⴷ ⵎⴰⵏ ⴰⵢⴰ ⵡⴰⵔ ⵉⵎⵙⴰⵔ ⵄⴻⵎⵎⴰⵔⵙ ⵥⴻⴳ ⵡⴰⵎⵉ ⴷⴷ-ⵉⴳⴳⴰ ⴰⵔⴻⴱⴱⵉ ⵉⵊⴻⵏⵡⴰⵏ ⴷ ⴷⴷⵓⵏⴻⵛⵜ ⴷ ⵎⴰⵔⵔⴰ ⵎⵉⵏ ⴷⴰⵢⴻⵙ.
ⴰⴷⴰⵎ ⴷ ⵎⵎⵉⵙ ⵏ ⴰⵔⴻⴱⴱⵉ ⵥⴻⴳ ⵓⵛⴰⵍ ⴰⵎ ⵎⴰⵎⵎⴻⵛ ⵏⵉⵥⵡⴰⵔ ⵏⴻⵏⵏⴰ (ⵍ’ⵉⵏⵊⵉⵍ ⵍⵓⴽⴰ 3:38). ⵎⴰ ⵏⵥⴻⵎⵎⴰⵔ ⴰⴷ ⵏⵉⵏⵉ ⴰⵇⴰ ⵓⵍⴰ ⴷ ⵢⴻⵛⵛⵓ ⵍⵎⴰⵙⵉⵀ ⴷ ⵎⵎⵉⵙ ⵏ ⴰⵔⴻⴱⴱⵉ ⵥⵉ ⴰⵔⵔⵓⵃ ⵏⵏⴻⵙ ⵉ ⵡⴰⵔ ⵉⴼⴻⵏⵏⵉⵏ? ⵡⴰⵀ, ⵏⴻⵜⵜⴰ ⵥⵉ ⴰⵔⵔⵓⵃ ⵉⵇⴻⴷⴷⵙⴻⵏ ⵥⵉ ⵊⵊⵉⵀⴻⵜ ⵏ ⴰⵔⵔⵓⵃ ⵏⵏⴻⵙ, ⵓ ⵏⴻⵜⵜⴰ ⵥⴻⴳ ⵓⵛⴰⵍ ⵥⵉ ⵊⵊⵉⵀⴻⵜ ⵏ ⴰⵔⵔⵉⵎⴻⵜ ⵏⵏⴻⵙ ⵉ ⴷ ⴰⵙ ⵉⵡⵛⵉⵏ ⴰⵔⴻⴱⴱⵉ ⵓⵎⵉ ⴷⴷ-ⵢⵓⴷⴻⴼ ⵙ ⴰⵔⵔⵓⵃ ⵉⵇⴻⴷⴷⵙⴻⵏ ⴷⴻⴳ ⵓⵄⴻⴷⴷⵉⵙ ⵏ ⵎⴰⵔⵢⴰⵎ. ⴰⵎ ⴰⵔⵔⵓⵃ ⵏⵏⴻⵙ, ⴰⵎ ⴰⵔⵔⵉⵎⴻⵜ ⵏⵏⴻⵙ, ⵡⴰⵔ ⴷⴰⵢⴻⵙ ⴱⵓ ⴷⴷⴻⵏⴱ ⵙ ⵎⵉⵏⵥⵉ ⵎⴰⵔⵔⴰ ⵥⵉ ⴰⵔⴻⴱⴱⵉ ⴱⵍⴰ ⵎⴰ ⵉⵡⵛⴰ ⴰⵙ ⴰⴼⵓⵙ ⵓⵍⴰ ⴷ ⵉⵊⵊⴻⵏ!
ⵍⵄⴰⵀⴷ ⵏ ⵊⴷⵉⴷ ⴷⵉ ⵢⴻⵛⵛⵓ ⵍⵎⴰⵙⵉⵃ
ⴰⵇⴰ-ⵜ ⴷ ⵍ’ⵉⵏⵊⵉⵍ: ⵍⴻⵅⴱⴰⵔ ⴰⵚⴻⴱⵃⴰⵏ
ⵇⴱⴻⵍ ⵏⴻⵜⵜⵡⴰⵍⴰ ⴰⵇⴰ ⴰⵔⴻⴱⴱⵉ ⴷⵉ ⴰⵔⵔⴻⵃⵎⴻⵜ ⵏⵏⴻⵙ ⵜⴰⵎⴻⵇⵇⵔⴰⵏⵜ ⴷ ⵜⵙⴻⴳⴷⴰ ⵏⵏⴻⵙ ⵉⴽⴻⵎⵎⵍⴻⵏ ⵢⴰⵔⴻⵥⵥⵓ:
- ⵉⵊⵊ ⵏ ⵎⵎⵉⵙ ⵏ ⴱⵏⴰⴷⴻⵎ ⴱⵍⴰ ⴷⴷⴻⵏⴱ ⴷⴻⴳ ⵡⴻⵎⵛⴰⵏ ⵏ ⴰⴷⴰⵎ,
- ⵉⵊⵊ ⵏ ⵓⴽⴻⵀⵀⴰⵏ ⵉ ⵉⵙⴷⴰⵃⴻⴵⴻⵏ ⴰⴷ ⵖⴰⵔⴻⵙ ⴷⴷ-ⵉⵇⴰⵔⵔⴻⴱ ⵍⴻⴱⴷⴰ, ⵡⴰⵔ ⵉⴵⵉ ⵉⵛⵜ ⵏ ⵜⵡⴰⵍⴰ ⴷⴻⴳ ⵓⵙⴻⴳⴳⵯⴰⵙ ⵡⴰⵀⴰ ⵙ ⵉⴷⴰⵎⵎⴻⵏ ⵏ ⵍⵎⴰⵍ ⵉⴼⴻⵏⵏⴰⵏ, ⵎⴰⵛⴰ ⵙ ⵉⴷⴰⵎⵎⴻⵏ ⵉⵎⴻⵥⴷⴰⴳⴻⵏ ⵏ ⴱⵏⴰⴷⴻⵎ ⴷ ⴰⵎⴻⵥⴷⴰⴳ,
- ⵉⵛⵜ ⵏ ⵜⵖⴰⵔⵚⵜ (ⴷⴷⴱⵉⵃⴻⵜ) ⵜⴻⵏⵏⵉ ⵖⴰⵔ ⵉⴵⴰ ⵉⴷⴰⵎⵎⴻⵏ ⴷ ⵉⵎⴻⵥⴷⴰⴳⴻⵏ ⵃⵉⵎⴰ ⴰⴷ ⵙⵙⵉⵥⵍⴻⵏ ⵉⴷⴰⵎⵎⴻⵏ ⵏⵏⵉ ⵥⵥⴰⵜⴻⵙ ⵉ ⵡⴻⵖⴼⴰⵔ ⴷ ⵍⴻⴼⴷⵉⵢⵢⴻⵜ ⵏ ⴷⴷⵏⵓⴱ,
- ⵉⵊⵊ ⵏ ⵓⵊⴻⴵⵉⴷ ⴷ ⴰⵎⵙⴻⴳⴳⴻⴷ ⵡⴻⵏⵏⵉ ⵉⵃⴻⴽⴽⵎⴻⵏ ⵙ ⵜⵉⴷⴻⵜⵜ ⴷ ⵜⵙⴻⴳⴷⴰ, ⵡⴻⵏⵏⵉ ⴷ ⵎⵎⵉⵙ ⵏ ⴷⴰⵡⵓⴷ ⵉ ⵍⴻⴱⴷⴰ.
ⴰⵔⴻⴱⴱⵉ ⵜⵓⵖⴰ ⵢⴰⵔⴻⵥⵥⵓ ⵅ ⵎⴰⵏ ⴰⵢⴰ ⵃⵉⵎⴰ ⴰⴷ ⵉⴽⴻⵎⵎⴻⵍ ⵎⴰⵔⵔⴰ ⴰⵡⴰⵍⴻⵏ ⵏⵏⴻⵙ ⵉ ⵉⴳⴳⴰ ⵉ ⴰⴷⴰⵎ ⴷ ⵃⴰⵡⴰ, ⵓ ⵉ ⵉⴱⵔⴰⵀⵉⵎ ⵓ ⵉ ⵎⵓⵙⴰ ⵓ ⵉ ⵓⵊⴻⴵⵉⴷ ⴷⴰⵡⵓⴷ ⵉ ⵓⵙⴻⵏⵊⴻⵎ ⵏ ⵊⵊⵉⵍ ⵏ ⴱⵏⴰⴷⴻⵎ ⵥⵉ ⴷⴷⵏⵓⴱ ⵏⵙⴻⵏ.
ⵍⵄⴰⵀⴷ ⴰⵇⴷⵉⵎ ⵉ ⵉⴳⴳⴰ ⴰⴽ-ⴷ ⵎⵓⵙⴰ ⴷ ⴰⵢⵜ ⵏ ⵉⵙⵔⴰⵢⵉⵍ, ⵉⵙⵙⵛⴻⵏ ⴰⵏⴻⵖ ⴱⴻⵍⵍⵉ ⴰⵔⴻⴱⴱⵉ ⴷ ⴰⵎⵇⴻⴷⴷⴰⵙ ⴷ ⴰⵢⵜ ⵏ ⵉⵙⵔⴰⵢⵉⵍ ⴷ ⵉⵎⴻⴷⵏⴰⴱ, ⴰⵎ ⵏⵉⵥⵡⴰⵔ ⵏⴻⵥⵔⴰ. ⵎⴰ ⵅⴻⵏⵏⵉ ⵓⴷⴰⵢⴻⵏ ⴷ ⵉⵎⴻⴷⵏⴰⴱ ⴽⵜⴰⵔ ⵥⴻⴳ ⵉⵡⴷⴰⵏ ⵥⵉ ⵍⴻⴳⵏⵓⵙ ⵏⵏⴻⵖⵏⵉ? ⵄⴻⵎⵎⴰⵔⵚ, ⵎⴰⵛⴰ ⴰⵔⴻⴱⴱⵉ ⵉⵅⴹⴰⵔ ⵉ-ⵜⴻⵏ ⴷ ⵍⴳⴻⵏⵙ ⵏⵏⴻⵙ ⵓ ⵉⵙⵙⴻⴹⵀⴰⵔ-ⴷⴷ ⴷⴰⵢⵙⴻⵏ ⴰⵇⴰ ⴰⵔⴻⴱⴱⵉ ⴷ ⴰⵎⵇⴻⴷⴷⴻⵙ ⵓ ⵓⴷⴰⵢ ⴷ ⴰⵎⴻⴷⵏⵓⴱ. ⵍⵄⴰⵀⴷ ⴰⵇⴷⵉⵎ ⵉⵙⵙⵛⴻⵏ ⴰⵏⴻⵖ ⴰⵇⴰ ⵓⵍⴰ ⴷ ⵉⵊⵊ ⵏ ⴱⵏⴰⴷⴻⵎ ⵉ ⴷⴷ-ⵉⵇⵇⴰⵔⵙⴻⵏ ⵥⵉ ⴰⴷⴰⵎ ⵡⴰⵔ ⵉⵥⴻⵎⵎⴰⵔ ⴰⴷ ⴷⴷ-ⵢⴰⵙ ⵅ ⵍⵅⴰⴹⴰⵔ ⵖⴰⵔ ⴰⵔⴻⴱⴱⵉ ⵥⵉ ⵙⵙⵉⴱⴱⴻⵜ ⵏ ⴷⴷⴻⵏⴱ ⴷⴻⴳ ⵡⵓⵍ ⵏ ⴱⵏⴰⴷⴻⵎ. ⵣⵉ ⴽⵓⵍ ⵍⴳⴻⵏⵙ ⵉ ⵉⴵⴰⵏ ⴷⴰⵢⴻⵙ ⵉⵊⵊ ⵏ ⴱⵏⴰⴷⴻⵎ, ⴰⵔⴻⴱⴱⵉ ⵡⴰⵔ ⵉⵥⴻⵎⵎⴰⵔ ⴰⴷ ⵜ ⵉⵇⴱⴻⵍ ⵥⵉ ⵙⵙⵉⴱⴱⴻⵜ ⵏ ⴷⴷⴻⵏⴱ.
ⵢⴻⵛⵛⵓ ⵍⵎⴰⵙⵉⵃ ⵉⵇⵇⴰⵔ:
“ⵡⴰⵔ ⴷⵉⵏ ⵓⵍⴰ ⴷ ⵉⵛⵜ ⵏ ⵍⵃⴰⵊⵊⴻⵜ ⵉ ⴷⴷ-ⵉⵜⵜⴰⴷⴼⴻⵏ ⵖⴰⵔ ⴱⵏⴰⴷⴻⵎ ⵥⵉ ⴱⴰⵔⵔⴰ ⵜⵥⴻⵎⵎⴰⵔ ⴰⴷ ⵜ ⵜⴻⵙⵙⴻⵅⵎⴻⵊ. ⵎⴰⵛⴰ ⵎⵉⵏ ⵉ ⴷⴷ-ⵉⵜⵜⴻⴼⴼⵖⴻⵏ ⵥⵉ ⴱⵏⴰⴷⴻⵎ, ⴰⵇⴰ ⵎⴰⵏ ⴰⵢⴰ ⵉⵙⵙⴻⵅⵎⴰⵊ ⴱⵏⴰⴷⴻⵎ.” … ⵉⵏⵏⴰ ⴰⵙⴻⵏ ⵉ ⵉⵎⴻⵃⴹⴰⵔⴻⵏ ⵏⵏⴻⵙ: “ⵎⴰ ⴽⴻⵏⵏⵉⵡ ⵄⴰⴷ ⴱⵍⴰ ⵍⴻⴼⵀⴰⵎⴻⵜ? ⵎⴰ ⵡⴰⵔ ⵜⴻⴼⵀⵉⵎⴻⵎ ⵛⴰ ⴱⴻⵍⵍⵉ ⵎⴰⵔⵔⴰ ⵎⵉⵏ ⵉ ⵖⴰ ⵢⴰⴷⴼⴻⵏ ⴱⵏⴰⴷⴻⵎ ⵥⵉ ⴱⴰⵔⵔⴰ, ⵡⴰⵔ ⵉⵥⴻⵎⵎⴰⵔ ⴰⴷ ⵜ ⵉⵙⵙⴻⵅⵎⴻⵊ, ⵎⵉⵏⵥⵉ ⵎⴰⵏ ⴰⵢⴰ ⵡⴰⵔ ⴷⴷ-ⵉⵜⵜⵉⴷⴻⴼ ⵛⴰ ⵖⴰⵔ ⵡⵓⵍ ⵏⵏⴻⵙ, ⵎⴰⵛⴰ ⵖⴰⵔ ⵓⵄⴻⴷⴷⵉⵙ, ⵅⴻⵏⵏⵉ ⴰⴷ ⵉⴼⴼⴻⵖ ⵖⴰⵔ ⵡⴻⵎⵛⴰⵏ ⵏⵏⴻⵙ, ⴰⵎ ⵉⵙⵙⵉⵥⴷⴻⴳ ⵎⴰⵔⵔⴰ ⵎⴰⵛⵛⴰ.” ⵅⴻⵏⵏⵉ ⵉⵏⵏⴰ: “ⵎⵉⵏ ⵉ ⴷⴷ-ⵉⵜⵜⴻⴼⴼⵖⴻⵏ ⵥⵉ ⴱⵏⴰⴷⴻⵎ ⴷ ⵎⴰⵏ ⴰⵢⴰ ⵉⵙⵙⵅⴻⵎⵎⴰⵊ ⴱⵏⴰⴷⴻⵎ. ⵎⵉⵏⵥⵉ ⵥⵉ ⴷⴰⵅⴻⵍ, ⵥⴻⴳ ⵡⵓⵍⴰⵡⴻⵏ ⵏ ⵉⵡⴷⴰⵏ ⵉ ⴷⴷ-ⵉⵜⵜⴻⴼⴼⵖⴻⵏ ⵉⵅⴰⵔⵔⵉⵚⴻⵏ ⵉⵄⴻⴼⴼⴰⵏⴻⵏ: ⵥⵥⵉⵏⴰ, ⴼⴰⵔⵇ-ⵛⵛⵖⴻⵍ, ⵜⵓⴽⴽⴰⵔⴹⴰ, ⴰⵏⵖⴰⵢ, ⵟⵟⵎⴻⵄ, ⵍⵖⴰⵔ, ⵜⴰⵃⵔⴰⵢⵎⴻⵛⵜ, ⴰⴼⵓⵛⵛⴻⵃ, ⵜⵉⵟⵟ ⵜⴰⵄⴻⴼⴼⴰⵏⵜ, ⴰⵛⴻⵇⵇⴻⴼ, ⵜⵓⴼⴼⴻⵜ, ⵜⵓⴱⴱⵓⵀⴻⵍⵢⴰ. ⵎⴰⵔⵔⴰ ⵜⵉⵎⴻⵙⵍⴰⵢⵉⵏ-ⴰ ⵜⵉⵄⴻⴼⴼⴰⵏⵉⵏ ⵜⵜⴻⴼⴼⵖⴻⵏⵜ-ⵉ-ⴷⴷ ⵥⵉ ⴷⴰⵅⴻⵍ ⵓⵛⴰ ⵙⵙⵅⴻⵎⵎⴰⵊⴻⵏⵜ ⴱⵏⴰⴷⴻⵎ.” (ⵍ’ⵉⵏⵊⵉⵍ ⵎⴰⵔⴽⵓⵙ 7:15-23)
ⵍ’ⵉⵏⵊⵉⵍ ⵉⵙⵙⴻⴹⵃⴰⵔ ⴰⵏⴻⵖ ⴱⴻⵍⵍⵉ ⵢⴻⵛⵛⵓ ⵍⵎⴰⵙⵉⵃ ⵡⴻⵏⵏⵉ ⵉⴵⴰⵏ ⵥⵉ ⴰⵔⴻⴱⴱⵉ ⵙ ⴰⵔⵔⵓⵃ ⵉⵇⴻⴷⴷⵙⴻⵏ, ⵉⵜⵜⵡⴰⵚⴻⵍⵍⴻⴱ ⴰⵎ ⵎⴰⵎⵎⴻⵛ ⵏⴻⵇⵇⴰⵔ ⴷⴻⴳ ⵡⴻⴷⵍⵉⵙ ⵏ ⵓⵏⴰⴱⵉ ⴰⵎⴻⵇⵇⵔⴰⵏ ⵉⵛⴰⵄⵢⴰ ⵡⴻⵏⵏⵉ ⵜⵓⵖⴰ ⵉⵏⵏⴰⵏ ⴰⵡⴰⵍⴻⵏ-ⴰ ⵄⵍⴰⵢⴻⵏ 700 ⵏ ⵉⵙⴻⴳⴳⵯⵓⵙⴰ ⵇⴱⴻⵍ ⵉ ⵡⴻⵅⵍⴰⵇ ⵏ ⵢⴻⵛⵛⵓ ⵍⵎⴰⵙⵉⵃ (ⵉⵛⴰ. 53:5-7):
“ⵉⵜⵜⵡⴰⵙⵏⵓⵇⵇⴻⴱ ⵅ ⵉⵄⴻⴷⴷⵉⵢⴻⵏ ⵏⵏⴻⵖ, ⵅ ⵍⵎⵓⵄⵚⵉⵢⵢⴻⵜ ⵏⵏⴻⵖ ⵍⴻⴱⵥⴻⵏ ⵜ. ⵜⴻⵎⵎⴰⵔⵙ ⵅⴰⵙ ⵜⴻⵛⵜⵉ ⵏⵏⵉ ⴷ ⴰⵏⴻⵖ ⴷⴷ-ⵉⵙⵙⴰⴽⴽⵡⴰⴹⴻⵏ ⵍⴻⵀⵏⴰ, ⵓ ⵙ ⵉⵢⴻⵥⵥⵉⵎⴻⵏ ⵏⵏⴻⵙ ⵉⴷⵡⴻⵍ ⴰⵏⴻⵖ ⴷ ⴰⴳⴻⵏⴼⵉ. ⵎⴰⵔⵔⴰ ⵏⴻⵛⵛⵉⵏ ⵜⵓⵖⴰ ⵏⵡⴻⴷⴷⴰⵔ ⴰⵎ ⵡⵓⴵⵉ, ⵏⴻⴷⵡⴻⵍ-ⴷⴷ ⴽⵓⵍ ⵉⵊⵊ ⵖⴰⵔ ⵡⴻⴱⵔⵉⴷ ⵏⵏⴻⵙ, ⵎⴰⵛⴰ ⵙⵉⴷⵉ ⵉⵊⵊⴰ ⴰⴷ ⵅⴰⵙ ⴷⴷ-ⵜⴻⵡⴹⴰ ⵍⵎⵓⵄⵚⵉⵢⵢⴻⵜ ⵏⵏⴻⵖ ⵎⴰⵔⵔⴰ. ⴷⴻⴵⴻⵏ ⵜ, ⵓⵛⴰ ⵉⵊⵊⴰ ⵉ-ⵜⴻⵏ ⴰⴷ ⵜ ⵙⵙⴱⴻⵀⴷⵍⴻⵏ. ⵡⴰⵔ ⵢⴰⵔⵥⵉⵎ ⴰⵇⴻⵎⵎⵓⵎ ⵏⵏⴻⵙ. ⴰⵎ ⵉⵥⵎⴰⵔ ⵏⴻⴷⵀⴻⵏ ⵜ ⵖⴰⵔ ⵜⵖⴰⵔⵚⵜ, ⴰⵎⴻⵛⵏⴰⵡ ⵜⵉⵅⵙⵉ ⵜⴻⴳⵏⵓ ⵇⵉⴱⴰⵞ ⵉ ⵡⴻⵏⵏⵉ ⵜⵜ ⵉⴵⴰⵙⴻⵏ, ⴰⵎⵎⵓ ⵡⴰⵔ ⵢⴰⵔⵥⵉⵎ ⵏⴻⵜⵜⴰ ⴰⵇⴻⵎⵎⵓⵎ ⵏⵏⴻⵙ.”
ⵍ’ⵉⵏⵊⵉⵍ ⵢⵓⵃⴰⵏⵏⴰ ⵉⵇⵇⴰⵔ:
"ⴰⵎⵎⵓ ⵉⵅⵙ ⴰⵔⴻⴱⴱⵉ ⴷⴷⵓⵏⴻⵛⵜ ⴰⵍ ⵎⴰⵏⵉ ⵉⵡⵛⴰ ⴰⵢⴻⵏⵏⵉ ⵏ ⵎⵎⵉⵙ ⵃⵉⵎⴰ ⴽⵓⵍ ⵉⵊⵊⴻⵏ ⵡⴻⵏⵏⵉ ⵥⵥⴰⵢⴻⵙ ⵉ ⵖⴰ ⵢⴰⵎⵏⴻⵏ, ⵡⴰⵔ ⵉⵜⵜⵡⴰⵀⴻⵍⵍⵉⴽ ⵛⴰ, ⵎⴰⵛⴰ ⴰⴷ ⵖⴰⵔⴻⵙ ⵜⵉⵍⵉ ⵜⵓⴷⴰⵔⵜ ⵉⵜⵜⴷⵓⵎⴰⵏ." (ⵢⵓⵃⴰⵏⵏⴰ 3:16)
ⵓ ⵜⴰⴱⵔⴰⵜ ⵉ ⵉⵄⴱⵔⴰⵏⵉⵢⵢⴻⵏ ⵜⴻⵇⵇⴰⵔ:
"ⴰⵔⴻⴱⴱⵉ, ⴰⵡⴰⵔⵏⵉ ⵍⴰⵎⵉ ⵉⵙⵙⵉⵡⴻⵍ ⴰⵟⵟⴰⵙ ⵏ ⵜⵡⴰⵍⴰⵡⵉⵏ ⵓ ⴷⴻⴳ ⵡⴰⵟⵟⴰⵙ ⵏ ⵉⴱⵔⵉⴷⴻⵏ ⴰⴽ-ⴷ ⵍⴻⵊⴷⵓⴷ ⵙ ⵉⵏⴰⴱⵉⵢⵢⴻⵏ, ⴰⵇⴰ ⵉⵙⵙⵉⵡⴻⵍ ⴰⴽⵉⴷⵏⴻⵖ ⴷⴻⴳ ⵡⵓⵙⵙⴰⵏ-ⴰ ⵉⵏⴻⴳⴳⵓⵔⴰ ⵙ ⵎⵎⵉⵙ, ⵡⴻⵏⵏⵉ ⵉⴳⴳⴰ ⴷ ⴰⵡⵔⵉⵜ ⵏ ⴽⵓⵍⵛⵉ, ⵙ ⵡⴻⵏⵏⵉ ⵄⴰⵡⴻⴷ ⵉ ⵉⴳⴳⵉⵏ ⴷⴷⵓⵏⴻⵛⵜ. ⵡⴰ ⴷ ⵜⴰⵍⴻⵍⵍⴻⵛⵜ ⵏ ⵓⵄⵓⴵⵉ ⵏⵏⴻⵙ ⵓⵍⴰ ⴷ ⵟⵟⴰⴱⴻⵄ ⵏ ⵜⴻⴼⵔⴰⵙ ⵏ ⵜⵡⴻⵚⵚⴰⴼ ⵏⵏⴻⵙ, ⵡⴻⵏⵏⵉ ⵢⴰⵔⴻⴱⴱⵓⵏ ⵎⴰⵔⵔⴰ ⵜⵉⵎⴻⵙⵍⴰⵢⵉⵏ ⵙ ⵊⵊⴻⵀⴷ ⵏ ⵡⴰⵡⴰⵍ ⵏⵏⴻⵙ, ⴰⵇⴰ ⵏⴻⵜⵜⴰ, ⴰⵡⴰⵔⵏⵉ ⵍⴰⵎⵉ ⵉⵙⵙⵉⵥⴷⴻⴳ ⴷⴷⵏⵓⴱ ⵏⵏⴻⵖ ⵙ ⵢⵉⵅⴻⴼ ⵏⵏⴻⵙ, ⴰⵇⴰ ⵉⵇⵇⵉⵎ ⵖⴰⵔ ⵢⴻⴼⵓⵙ ⵏ ⵍⵄⴰⴹⵉⵎ ⴷⵉ ⵍⵓⵄⵍⴰ. ⵏⴻⵜⵜⴰ ⵉⵎⵖⴰⵔ ⴰⵟⵟⴰⵙ ⵅ ⵍⵎⴰⵍⴰⴽⴰⵜ ⴰⵎ ⵉⵡⴰⵔⵜ ⵉⵙⴻⵎ ⵉⵛⵏⴰⵏ ⴽⵜⴰⵔ ⵥⵥⴰⵢⵙⴻⵏ." (ⵉⵄⴱⵔⴰⵏⵉⵢⵢⴻⵏ 1:1-3)
ⵓⵛⴰ ⵄⴰⵡⴻⴷ:
“ⵎⵉⵏⵥⵉ ⵍⵎⴰⵙⵉⵃ ⵡⴰⵔ ⵢⵓⴷⵉⴼ ⵛⴰ ⴷⵉ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ ⵉ ⵉⵜⵜⵡⴰⴳⴳⴻⵏ ⵙ ⵉⴼⴰⵙⵙⴻⵏ, ⴷ ⵡⴻⵏⵏⵉ ⵏⴻⵜⵜⴰ ⴷ ⵍⵎⴰⵜⴰⵍ ⵏ ⵎⵉⵏ ⵉⴵⴰⵏ ⴷ ⵜⵉⴷⴻⵜⵜ, ⵎⴰⵛⴰ ⴷⴻⴳ ⵓⵊⴻⵏⵏⴰ ⵙⵉⵎⴰⵏⵜ ⵏⵏⴻⵙ, ⵃⵉⵎⴰ ⴰⴷ ⴷⴷ-ⵉⴹⵀⴰⵔ ⵖⴰⵔⵏⴻⵖ ⵇⵉⴱⴰⵞ ⵉ ⴰⵔⴻⴱⴱⵉ. ⵡⴰⵔ ⵉⴵⵉ ⵄⴰⵡⴻⴷ ⵃⵉⵎⴰ ⴰⴷ ⵉⵇⴻⴷⴷⴻⵎ ⵉⵅⴻⴼ ⵏⵏⴻⵙ ⴰⵟⵟⴰⵙ ⵏ ⵜⵡⴰⵍⴰⵡⵉⵏ ⴰⵎ ⵎⴰⵎⵎⴻⵛ ⵜⵓⵖⴰ ⵉⵜⵜⴰⴷⴻⴼ ⴰⵔⵔⴰⵢⴻⵙ ⵏ ⵉⴽⴻⵀⵀⴰⵏⴻⵏ ⴽⵓⵍ ⴰⵙⴻⴳⴳⵯⴰⵙ ⵙ ⵉⴷⴰⵎⵎⴻⵏ ⵏ ⵉⵏⵏⴻⵖⵏⵉ ⵖⴰⵔ ⵣⵥⴰⵡⴻⵛⵜ ⵉⵇⴻⴷⴷⵙⴻⵏ, - ⵎⵉⵏⵥⵉ ⵎⴰⵍⴰ ⴰⵎⵎⵓ ⵉ ⵉⴵⴰ, ⵉⵍⵉ ⵉⵜⵜⵅⴻⵚⵚⴰ ⴰⴷ ⵉⵡⴻⴷⴷⴻⴱ ⴰⵟⵟⴰⵙ ⵏ ⵜⵡⴰⵍⴰⵡⵉⵏ ⵥⴻⴳ ⵡⴰⵎⵉ ⵜᵉⵜⵜⵡⴰⴳⴳ ⴷⴷⵓⵏⴻⵛⵜ - , ⵎⴰⵛⴰ ⵖⴰⵔ ⵓⵏⴻⴳⴳⴰⵔ ⵏ ⴷⴷⵓⵏⴻⵛⵜ ⵉⵡⵛⴰ ⵉⵅⴻⴼ ⵏⵏⴻⵙ ⵉⵛⵜ ⵏ ⵜⵡⴰⵍⴰⵜ ⵃⵉⵎⴰ ⴰⴷ ⵉⴱⴻⵟⵟⴻⵍ ⴷⴷⵏⵓⴱ ⵙ ⵜⵖⴰⵔⵚⵜ ⵏ ⵢⵉⵅⴻⴼ ⵏⵏⴻⵙ, ⴰⵎⴻⵛⵏⴰⵡ ⵎⴰⵎⵎⴻⵛ ⴷ ⵉⵜⵜⵡⴰⵙⵙⴰⵔⵙ ⵉ ⵉⵡⴷⴰⵏ ⴰⴷ ⵎⵎⴻⵜⴻⵏ ⵉⵛⵜ ⵏ ⵜⵡⴰⵍⴰ, ⵅⴻⵏⵏⵉ ⴰⵡⴰⵔⵏⵉ ⵉ ⵍⵎⴻⵡⵜ ⵏⵙⴻⵏ ⴰⴷ ⴷⴷ-ⵢⴰⵙ ⵍⵃⵓⴽⵎ. ⴰⵎⵎⵓ ⵄⴰⵡⴻⴷ ⵉⵎⵎⴻⵡⵛ ⵍⵎⴰⵙⵉⵃ ⵉⵛⵜ ⵏ ⵜⵡⴰⵍⴰⵜ ⴷ ⵜⴰⵖⴰⵔⵚⵜ, ⵉⵡⵛⴰ ⴷⴻⴳ ⵢⵉⵅⴻⴼ ⵏⵏⴻⵙ ⵜⴰⵖⴰⵔⵚⵜ ⵏ ⴷⴷⵏⵓⴱ ⵏ ⵡⴰⵟⵟⴰⵙ, ⵎⴰⵛⴰ ⵖⴰⵔ ⵜⵡⴰⵙⵉⵜ ⵏⵏⴻⵙ ⵉ ⵜⵡⴰⵍⴰ ⵡⵉⵙⵙ ⵜⵏⴰⵢⴻⵏ ⴰⴷ ⵉⵜⵜⵡⴰⵥⴰⵔ ⴱⵍⴰ ⴷⴷⴻⵏⴱ ⵉ ⵜⵓⴷⴰⵔⵜ ⵏ ⵢⴻⵏⵏⵉ ⵜ ⵉⵜⵜⵔⴰⵊⴰⵏ.” (ⵉⵄⵉⴱⵔⴰⵏⵉⵢⵢⴻⵏ 9:24-28)
ⴰⴷⵍⵉⵙ ⵉⵇⴻⴷⴷⵙⴻⵏ ⵉⵙⵙⴰⵔⴳⴻⴱ ⴰⵏⴻⵖ ⴰⵇⴰ ⴰⵟⵟⴰⵙ ⵏ ⵡⵓⴷⴰⵢⴻⵏ ⵃⴻⵙⵙⴱⴻⵏ ⵍⵎⴰⵙⵉⵃ ⴷ ⵎⵎⵉⵙ ⵏ ⴷⴰⵡⵓⴷ:
“ⵓⵎⵉ ⵥⵔⵉⵏ ⵉⵎⴻⵇⵇⵔⴰⵏⴻⵏ ⵏ ⵉⴽⴻⵀⵀⴰⵏⴻⵏ ⴷ ⵉⵎⵙⴻⵍⵎⴰⴷⴻⵏ ⵏ ⵉⴷⵍⵉⵙⴻⵏ ⵍⵎⵓⵄⵊⵉⵥⴰⵜ ⵉ ⵢⴻⴳⴳⴰ ⵓ ⴰⵇⴰ ⵉⵃⴻⵏⵊⵉⵔⴻⵏ ⵜⵜⵍⴰⵖⴰⵏ ⴷⵉ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ, ⵇⵇⴰⵔⴻⵏ: ‘ⵓⵚⴰⵏⵏⴰ ⵉ ⵎⵎⵉⵙ ⵏ ⴷⴰⵡⵓⴷ!’, ⵅⴻⵢⵢⵇⴻⵏ ⴰⵟⵟⴰⵙ …” (ⵍ’ⵉⵏⵊⵉⵍ ⵙ ⵓⴼⵓⵙ ⵏ ⵎⴰⵜⵜⴰ 21:15)
“ⵢⴻⵛⵛⵓ ⵉⵏⵏⴰ: ‘ⵎⵉⵏ ⴷⴷ ⴰⵡⴻⵎ ⵉⴹⵀⴰⵔⴻⵏ ⴷⵉ ⵍⵎⴰⵙⵉⵃ? ⵓⵎⵉ ⵉⴳⴳⴰ ⵎⵎⵉⵙ?’ ⵏⵏⴰⵏ ⴰⵙ: ‘ⵏ ⴷⴰⵡⵓⴷ.’ ” (ⵍ’ⵉⵏⵊⵉⵍ ⵙ ⵓⴼⵓⵙ ⵏ ⵎⴰⵜⵜⴰ 22:42)
‘ⵓⵎⵉ ⵉⵙⵍⴰ ⴱⴻⵍⵍⵉ ⵢⴻⵛⵛⵓ ⵏⵏⴰⵚⵉⵔⵉ ⴰⵇⴰ-ⵜ ⴷⵉⵏ, ⵉⴱⴷⴰ ⵉⵙⵖⵓⵢⵢⵓ, ⵉⵇⵇⴰⵔ: ‘ⴰ ⵢⴻⵛⵛⵓ, ⵎⵎⵉⵙ ⵏ ⴷⴰⵡⵓⴷ, ⴰⵔⵃⴻⵎ ⴰⵢⵉ!’ ⵡⴻⴱⴱⵅⴻⵏ ⵜ ⴰⵟⵟⴰⵙ ⵃⵉⵎⴰ ⴰⴷ ⵉⵙⵇⴰⵔ, ⵎⴰⵛⴰ ⵏⴻⵜⵜⴰ ⵉⵇⵇⵉⵎ ⵉⵙⵖⵓⵢⵢⵓ ⴽⵜⴰⵔ: ‘ⴰ ⵎⵎⵉⵙ ⵏ ⴷⴰⵡⵓⴷ, ⴰⵔⵃⴻⵎ ⴰⵢⵉ!’ ” (ⵍ’ⵉⵏⵊⵉⵍ ⵙ ⵓⴼⵓⵙ ⵏ ⵎⴰⵔⴽⵓⵙ 10:47, 48)
ⵉⵜⵜⵡⴰⵚⴻⵍⵍⴻⴱ ⵎⵎⵉⵙ ⵏ ⴷⴰⵡⵓⴷ ⵡⴰⵏⵉⵜⴰ ⵄⵍⴰⵃⵙⴰⴱ ⵏⵏⵓⴱⵓⵡⴰⵜ ⵉ ⵅⴰⵙ ⵏⴰⴱⴱⴻⵏ ⵉⵏⴰⴱⵉⵢⵢⴻⵏ ⵥⵉ ⵉⵙⵔⴰⵢⵉⵍ, ⵓ ⵄⵍⴰⵃⵙⴰⴱ ⴰⵡⴰⵍⴻⵏ ⵏ ⵍⵎⴰⵙⵉⵃ ⵅ ⵢⵉⵅⴻⴼ ⵏⵏⴻⵙ ⵓⵎⵉ ⵉⵥⵡⴰⵔ ⵉⵙⵙⵉⵡⵉⵍ ⵅ ⵓⵡⴻⴷⴷⴻⴱ ⵏⵏⴻⵙ ⵉ ⵖⴰ ⵉⵎⵙⴰⵔⴻⵏ ⴷⵉ ⵓⵔⵛⴰⵍⵉⵎ: ⴰⵇⴰ ⴰⴷ ⵜ ⵙⴻⵍⵍⵎⴻⵏ ⵉ ⵉⵎⴻⵇⵇⵔⴰⵏⴻⵏ ⵏ ⵍⴳⴻⵏⵙ ⵓ ⵉ ⵉⴽⴻⵀⵀⴰⵏⴻⵏ ⵓ ⴰⴷ ⵅⴰⵙ ⵃⴻⴽⵎⴻⵏ ⵙ ⵍⵎⴻⵡⵜ ⵅ ⵚⵚⴰⵍⵉⴱ ⵓⵛⴰ ⴷⴻⴳ ⵡⴰⵙⵙ ⵡⵉⵙ ⵜⵍⴰⵜⴰ ⴰⴷ ⴷⴷ-ⵉⴽⴽⴰⵔ. ⵎⴰⵏ ⴰⵢⴰ ⵎⴰⵔⵔⴰ ⵉⵎⵙⴰⵔ ⴰⵎ ⵎⴰⵎⵎⴻⵛ ⵜ ⵏⵏⴰⵏ ⵉⵏⴰⴱⵉⵢⵢⴻⵏ ⵓⵍⴰ ⴷ ⵍⵎⴰⵙⵉⵃ ⵙⵉⵎⴰⵏⵜ ⵏⵏⴻⵙ ⵓ ⵎⴰⵔⵔⴰ ⴰⵢⴰ ⵉⵜⵜⵡⴰⵔⵉ ⴷⵉ ⵍ’ⵉⵏⵊⵉⵍ.
ⵍⴰⵎⵉ ⵜⵓⵖⴰ ⵢⵓⵢⴻⵍ ⵖⴰⵔ ⵚⵚⴰⵍⵉⴱ, ⵢⴰⵔⴱⵓ ⵍⵄⵉⵇⴰⴱ ⵏⵏⵉ ⵙ ⵓⵖⵉⵍ ⵜⵓⵖⴰ ⵉⵜⵜⵅⴻⵚⵚⴰ ⴰⴷ ⵅⴰⵙ ⵢⵉⵍⵉ ⵃⵉⵎⴰ ⴰⴷ ⵅⴰⵏⴻⵖ ⵉⴼⴷⵉ ⵙ ⵉⴷⴰⵎⵎⴻⵏ ⵏⵏⴻⵙ: ⵖⴰⵔⴻⵙ ⵏⴻⵜⵜⴰ ⵍⵄⵉⵇⴰⴱ, ⵖⴰⵔⵏⴻⵖ ⵏⴻⵛⵛⵉⵏ ⴰⵙⴻⵏⵊⴻⵎ ⴷⴻⴳ ⵢⵉⵙⴻⵎ ⵏⵏⴻⵙ, ⴰⵎⵎⵓ ⵉ ⵉⴽⴻⵎⵎⴻⵍ ⴰⵔⴻⴱⴱⵉ ⵜⴰⵙⴻⴳⴷⴰ ⵏⵏⴻⵙ ⴷⴰⵢⴻⵙ ⴰⵍⴰⵎⵉ ⵏⴻⵛⵛⵉⵏ ⵉⵏⵏⵉ ⵉⵅⴹⴰⵏ, ⴰⴷ ⵜⵜⵡⴰⵙⵙⵏⴻⵊⵎⴻⵏ ⴰⵎ ⵎⴰⵎⵎⴻⵛ ⵜ ⵢⴻⵏⵏⴰ ⵢⵓⵃⴰⵏⵏⴰ ⴰⵎⵙⴻⵖⴹⴰⵚ:
“ⵅⵥⴰⵔⴻⵎ, ⴰⵇⴰ-ⵜ ⴷ ⵉⵥⵎⴰⵔ ⵏ ⴰⵔⴻⴱⴱⵉ ⵉ ⵉⵜⵜⴻⴽⴽⵙⴻⵏ ⴷⴷⵏⵓⴱ ⵅ ⴷⴷⵓⵏⴻⵛⵜ!” ((ⵍ’ⵉⵏⵊⵉⵍ ⵙ ⵓⴼⵓⵙ ⵏ ⵢⵓⵃⴰⵏⵏⴰ 1:29)
ⵎⴰ ⵜⵉⵡⴹⴻⴷ ⴰⴷ ⵜⴼⴻⵀⵎⴻⴷ ⵍⴻⵅⵅⵓ ⵙⵙⵉⵔ ⴰⵎⴻⵇⵇⵔⴰⵏ ⵡⴰⵏⵉⵜⴰ? ⵢⴻⵛⵛⵓ ⵍⵎⴰⵙⵉⵃ ⵡⴰⵏⵉⵜⴰ ⵏⴻⵜⵜⴰ ⴷ ⵎⵎⵉⵙ ⵏ ⴱⵏⴰⴷⴻⵎ ⵏⵉⵛⴰⵏ ⴷ ⴰⵎⵙⴻⴳⴳⴻⴷ, ⴱⵍⴰ ⴷⴷⴻⵏⴱ ⵎⴰⵛⴰ ⵙ ⵍⵄⴻⴽⵙ ⵏ ⴰⴷⴰⵎ, ⵏⴻⵜⵜⴰ ⴷ ⴰⴽⴻⵀⵀⴰⵏ ⴰⵎⴻⵇⵇⵔⴰⵏ ⵡⴻⵏⵏⵉ ⵉⵇⴻⴷⴷⵎⴻⵏ ⵉⵅⴻⴼ ⵏⵏⴻⵙ ⴷ ⵜⴰⵖⴰⵔⵚⵜ ⵏⵏⵉ ⵥⵉ ⵉⵜⵜⵡⴰⵥⴻⴵⵄⴻⵏ ⵉⴷⴰⵎⵎⴻⵏ ⵏⵏⴻⵙ ⵉⵥⴷⵉⴳⴻⵏ ⵥⵥⴰⵜ ⵉ ⵍⴽⵓⵔⵙⵉ ⵉⴳⴻⵍⵍⴷⴻⵏ ⵏ ⴰⵔⴻⴱⴱⵉ ⵉ ⵡⴻⵖⴼⴰⵔ ⵏ ⴷⴷⵏⵓⴱ, ⵏⴻⵜⵜⴰ ⴷ ⴰⵔⵔⵓⵢⴰⵙ ⵏ ⵉⴽⴻⵀⵀⴰⵏⴻⵏ ⵏⵏⵉ ⵉⵥⴻⵎⵎⴰⵔⴻⵏ ⴰⴷ ⴷⴷ-ⴰⴷⴼⴻⵏ ⵍⴻⴱⴷⴰ ⵖⴰⵔ ⵣⵥⴰⵡⴻⵛⵜ ⵜⴰⵎⴻⵇⵇⵔⴰⵏⵜ ⵏ ⴰⵔⴻⴱⴱⵉ ⴷⴻⴳ ⵓⵊⴻⵏⵏⴰ ⵙ ⵜⵏⵓⴽⵔⴰ ⵏⵏⴻⵙ ⵥⴻⴳ ⵉⵎⴻⵜⵜⵉⵏⴻⵏ ⴷ ⵜⵎⴻⴽⵙⵉ ⵏⵏⴻⵙ ⵖⴰⵔ ⵓⵊⴻⵏⵏⴰ (ⵅⵥⴰⵔ ⵍⴻⵅⴷⴰⵢⴻⵎ ⵏ ⵔⵔⵓⵙⵓⵍ 1:1-11) ⵓ ⵏⴻⵜⵜⴰ ⵄⴰⵡⴻⴷ ⴷ ⵎⵎⵉⵙ ⵏ ⴷⴰⵡⵓⴷ, ⴷ ⴰⵊⴻⴵⵉⴷ ⵉ ⵍⴻⴱⴷⴰ ⵙ ⵜⵓⴷⴰⵔⵜ ⵏⵏⴻⵙ ⵉ ⵡⴰⵔ ⵉⴼⴻⵏⵏⵉⵏ ⵙ ⵜⵏⵓⴽⵔⴰ ⵏⵏⴻⵙ ⵥⴻⴳ ⵉⵎⴻⵜⵜⵉⵏⴻⵏ ⴰⵡⴰⵔⵏⵉ ⵍⴰⵎⵉ ⵉⵎⵎⵓⵜ ⵅ ⵚⵚⴰⵍⵉⴱ ⵉⵙⵙⵉⵥⴷⴻⴳ ⴰⵏⴻⵖ ⵙ ⵉⴷⴰⵎⵎⴻⵏ ⵏ ⵢⵉⵅⴻⴼ ⵏⵏⴻⵙ.
ⵉ ⵍⴻⵅⵅⵓ ⵎⵉⵏ ⵉ ⵖⴰ ⵜⴻⴳⴳⴻⴷ? ⴰⴷ ⵜⴰⵖ ⴰⴷ ⵉⵏⵀⴻⵥⵥ ⴷⵙⴰⵙ ⵏ ⵜⵓⴷⴰⵔⵜ ⵏⵏⴻⴽ ⵎⴰⵍⴰ ⵜⴻⵖⵔⵉⴷ ⵎⴰⵔⵔⴰ ⵎⴰⵏ ⴰⵢⴰ ⵉ ⵜⵡⴰⵍⴰⵜ ⵜⴰⵎⴻⵥⵡⴰⵔⵓⵜ. ⵎⴰ ⵎⴰⵏ ⴰⵢⴰ ⵏⵉⵛⴰⵏ, ⵎⴰ ⵎⴰⵏ ⴰⵢⴰ ⴷ ⵜⵉⴷⴻⵜⵜ? ⴰⴷ ⵜⴰⵖ ⴰⴷ ⵜⴰⴼⴻⴷ ⴰⵇⴰ ⵖⴰⵔⴻⴽ ⴰⵟⵟⴰⵙ ⵏ ⵉⵙⴻⵇⵙⵉⵜⴻⵏ ⵏⵉⵖ ⵡⴰⵔ ⴷ ⴰⵛ ⵉⵄⵊⵉⴱ ⵛⴰ ⵍⵃⴰⵍ ⵏⵉⵖ ⵖⴰⵔⴻⴽ ⵎⴻⵥⵔⵉ ⵎⴰⵃⴻⵏⴷ ⴰⴷ ⵜⴻⵙⵙⵏⴻⴷ ⴽⵜⴰⵔ. ⵏⴻⵜⵜⵛⴻⵊⵊⴰⵄ ⴽⵓⵍ ⵉⵊⵊⴻⵏ ⵡⴻⵏⵏⵉ / ⵜⴻⵏⵏⵉ ⵉ ⵖⴰ ⵉⵖⴰⵔⴻⵏ ⴰⵡⴰⵍⴻⵏ-ⴰ ⵃⵉⵎⴰ ⴰⴷ ⵉⵅⴰⵔⵔⴻⵚ ⵎⵍⵉⵃ, ⴰⴷ ⵢⴰⵔⵥⵓ ⴷⴻⴳ ⵡⴻⴷⵍⵉⵙ ⵉⵇⴻⴷⴷⵙⴻⵏ, ⵙ ⵎⵉⵏⵥⵉ ⴰⵔⴻⴱⴱⵉ ⵉⵥⴻⵎⵎⴰⵔ ⴰⴷ ⵢⴰⵔⵥⴻⵎ ⵍⴻⵄⵇⴻⵍ ⵏⵏⴻⴽ ⴷ ⵡⵓⵍ ⵏⵏⴻⴽ, ⵎⴰ ⵎⴰⵏ ⴰⵢⴰ ⴷ ⵜⵉⴷⴻⵜⵜ ⵏⵉⵖ ⵍⵍⵍⴰ! ⵎⴰⵛⴰ ⵉⵜⵜⵅⴻⵚⵚⴰ ⴰⴷ ⵜⴰⵔⵥⵓⴷ ⵎⵍⵉⵃ. ⴰⴷⵍⵉⵙ ⵉⵇⴻⴷⴷⵙⴻⵏ ⵉⵇⵇⴰⵔ:
“ⵎⴰⵛⴰ ⴱⵍⴰ ⵍⵉⵎⴰⵏ ⵡⴰⵔ ⵉⵥⴻⵎⵎⴰⵔ ⴰⴷ ⵉⵜⵜⵡⴰⵔⴹⴰ ⴰⵔⴻⴱⴱⵉ. ⵎⵉⵏⵥⵉ ⵡⴻⵏⵏⵉ ⵉ ⴷⴷ-ⵉⵇⴰⵔⵔⴱⴻⵏ ⵖⴰⵔ ⴰⵔⴻⴱⴱⵉ, ⵉⵜⵜⵅⴻⵚⵚⴰ ⴰⵙ ⴰⴷ ⵢⴰⵎⴻⵏ ⴱⴻⵍⵍⵉ ⵏⴻⵜⵜⴰ ⴰⵇⴰ-ⵜ ⴷⵉⵏ ⵓ ⵏⴻⵜⵜⴰ ⴷ ⴰⵎⵅⴻⴵⴻⵚ ⵏ ⵢⴻⵏⵏⵉ ⵅⴰⵙ ⵢⴰⵔⴻⵥⵥⵓⵏ.” (ⵜⴰⴱⵔⴰⵜ ⵉ ⵄⵉⴱⵔⴰⵏⵉⵢⵢⴻⵏ 11:6)
ⵎⴰ ⵜⴻⵅⵙⴻⴷ ⴰⴷ ⴷⴷ-ⵜⴰⴷⴼⴻⴷ ⵖⴰⵔ ⵍⵄⴰⵀⴷ ⵏ ⵊⴷⵉⴷ ⴰⴽ-ⴷ ⴰⵔⴻⴱⴱⵉ ⵎⴰⵃⴻⵏⴷ ⴰⴷ ⵖⴰⵔⴻⴽ ⵢⵉⵍⵉ ⵡⴻⵖⴼⴰⵔ ⵏ ⴷⴷⵏⵓⴱ ⵏⵏⴻⴽ ⴷ ⵡⴻⵙⵍⴻⵃ ⴰⴽⵉⴷⴻⵙ ⵥⵉ ⵍⴻⵄⴷⴰⵡⴻⵜ ⵉ ⵉⴵⴰⵏ ⴷⴻⴳ ⵡⵓⵍ ⵏⵏⴻⴽ ⵓⵎⵉ ⵡⴰⵔ ⵜⵓⵎⵉⵏⴻⴷ ⴷⵉ ⵎⵎⵉⵙ ⵉ ⴷ ⴰⵏⵖ ⵉⵡⵛⵉⵏ ⵙ ⵡⴰⵟⵟⴰⵙ ⵏ ⵓⵡⴻⴷⴷⴻⴱ ⴷ ⵓⵎⴰⵔⵔⴻⵜ. ⴰⵔⵥⵓ ⵎⵍⵉⵃ ⴷⴻⴳ ⵡⴻⴷⵍⵉⵙ ⵉⵇⴻⴷⴷⵙⴻⵏ ⵉ ⵖⴰⵔⴻⴽ/ⵖⴰⵔⴻⵎ ⵊⴰⵔ ⵉⴼⴰⵙⵙⴻⵏ.
ⵙ ⵡⴻⴷⵍⵉⵙ ⵏⵏⴻⵙ ⵉⵥⴻⵎⵎⴰⵔ ⴰⵔⴻⴱⴱⵉ ⴰⴷ ⴰⵛ ⵉⵙⵙⵉⵡⴻⵍ ⴷⴻⴳ ⵡⵓⵍ ⴷ ⵍⴻⵄⵇⴻⵍ ⵏⵏⴻⴽ. ⴰⵇⴰ ⴷⵉⵏ ⴰⵟⵟⴰⵙ ⵏ ⵜⵎⴻⵙⵍⴰⵢⵉⵏ ⵏⵏⵉ ⵄⴰⴷ ⵡⴰⵔ ⵏⵥⴻⵎⵎⴰⵔ ⴰⴷ ⵜⴻⵏⵜ ⵏⴼⴻⵙⵙⴰⵔ, ⵎⴰⵛⴰ ⴰⵔⴻⴱⴱⵉ ⵉⵥⴻⵎⵎⴰⵔ ⴰⴷ ⴰⵛ / ⴰⵎ ⵉⴼⴻⵙⵙⴰⵔ ⵎⴰⵔⵔⴰ ⵎⴰⵏ ⴰⵢⴰ ⵅⵎⵉ ⵉ ⵖⴰ ⵜⴰⵔⵥⵎⴻⴷ ⴰⴷⵍⵉⵙ ⵉⵇⴻⴷⴷⵙⴻⵏ, ⴰⴷ ⵜⴻⴱⴷⵉⴷ ⴰⴷ ⵜⵖⴰⵔⴻⴷ ⵙ ⵢⵉⵅⴻⴼ ⵏⵏⴻⴽ ⵙ ⵡⵓⵍ ⵢⴰⵔⵥⴻⵎ ⵓ ⵙ ⵍⴻⵄⵇⴻⵍ ⵢⴰⵔⴻⵥⵥⵓⵏ ⵃⵉⵎⴰ ⴰⴷ ⵜⴻⵙⵙⵏⴻⴷ ⵎⵉⵏ ⵉⵅⵙ ⴰⴷ ⵢⵉⵏⵉ ⴰⵔⴻⴱⴱⵉ ⵓ ⵎⵉⵏ ⵉⵄⵏⴰ ⵢⴻⵛⵛⵓ ⵍⵎⴰⵙⵉⵃ. ⵢⴻⵛⵛⵓ ⵉⵇⵇⴰⵔ:
“ⵜⵜⴰⵔⴻⵎ, ⴰⴷ ⴰⵡⴻⵎ ⵉⵎⵎⴻⵡⵛ, ⴰⵔⵥⵓⵎ, ⴰⴷ ⵜⴰⴼⴻⵎ, ⵙⵇⴰⵔⵇⴱⴻⵎ, ⴰⴷ ⴰⵡⴻⵎ ⵉⵜⵜⵡⴰⵔⵥⴻⵎ. ⵎⴰⵖⴰⵔ ⵎⴰⵔⵔⴰ ⵡⴻⵏⵏⵉ ⵉ ⵖⴰ ⵉⵜⵜⴰⵔⴻⵏ, ⴰⴷ ⵉⵟⵟⴻⴼ ⵓ ⵡⴻⵏⵏⵉ ⵉ ⵖⴰ ⵢⴰⵔⵥⵓⵏ ⴰⴷ ⵢⴰⴼ, ⵓ ⵡⴻⵏⵏⵉ ⵉ ⵖⴰ ⵉⵙⵙⵇⴰⵔⵇⴱⴻⵏ ⴰⴷ ⴰⵙ ⵉⵜⵜⵡⴰⵔⵥⴻⵎ.” (ⵍ’ⵉⵏⵊⵉⵍ ⵎⴰⵜⵜⴰ 7:7-8)
ⵎⴰ ⵜⵓⴼⵉⴷ ⴰⵇⴰ ⴰⵔⴻⴱⴱⵉ ⵉⵙⵙⵛⴻⵏ ⴰⵛ / ⴰⵎ ⴰⴱⵔⵉⴷ ⵉ ⵉⴵⴰⵏ ⵏⵉⵛⴰⵏ, ⵅⴻⵏⵏⵉ ⵅⴰⵔⵔⴻⵚ ⵎⵍⵉⵀ ⵓ ⵃⵙⴻⴱ ⵜⵜⴰⵎⴰⵏ ⵏ ⵡⴻⴹⴼⴰⵔ ⵏ ⵢⴻⵛⵛⵓ ⵍⵎⴰⵙⵉⵃ, ⵎⵉⵏⵥⵉ ⵉⵡⴷⴰⵏ ⵛⴰⵔⵀⴻⵏ ⵜ, ⵓⵛⴰ ⴰⴷ ⵛⴰⵔⵀⴻⵏ ⵄⴰⵡⴻⴷ ⵉⵎⴻⵃⴹⴰⵔⴻⵏ ⴷ ⵉⵎⴻⴹⴼⴰⵔⴻⵏ ⵏⵏⴻⵙ. ⵅⵥⴰⵔ ⵍ’ⵉⵏⵊⵉⵍ ⵙ ⵓⴼⵓⵙ ⵏ ⵍⵓⴽⴰ 9:57-62 ⵅ ⵎⴰⵏ ⴰⵢⴰ. ⵅⵥⴰⵔ ⵄⴰⵡⴻⴷ ⵍⵓⴽⴰ 18:28-30 ⴷ ⵍⵓⴽⴰ 14:25-35 ⵅ ⵍⴻⴼⴹⴻⵔ ⴰⵎⴻⵇⵇⵔⴰⵏ ⵏ ⵡⴻⴹⴼⴰⵔ ⵏ ⵢⴻⵛⵛⵓ ⵍⵎⴰⵙⵉⵃ ⴷ ⵍⵎⵓⵏⴻⵜ ⵉ ⴷⴷ-ⵉⵜⵜⵍⵉⵇⴻⵏ ⵉ ⵢⴻⵏⵏⵉ ⵉ ⴷ ⴰⵙ ⵉ ⵖⴰ ⵉⴹⴼⴰⵔⴻⵏ.
ⵍ’ⵉⵏⵊⵉⵍ ⵏ ⵢⴻⵛⵛⵓ ⵍⵎⴰⵙⵉⵃ, ⵍⴻⵅⴱⴰⵔ ⴰⵚⴻⴱⵃⴰⵏ ⵢⵉⵡⴻⴹ-ⴷⴷ ⵍⴻⵅⵅⵓ ⵖⴰⵔ ⵉⵏⴻⴳⴳⵓⵔⴰ ⵏ ⴷⴷⵓⵏⴻⵛⵜ ⵙ ⴽⵜⴰⵔ ⵏ 2000 ⵉⵍⵙⴰⵡⴻⵏ. ⴰⵟⵟⴰⵙ ⵡⴰⵔ ⴷⴰⵢⴻⵙ ⴰⵔⴻⵥⵥⵓⵏ, ⴰⵟⵟⴰⵙ ⵄⴰⴷ ⵡⴰⵔ ⴷ ⴰⵙ ⴼⵀⵉⵎⴻⵏ, ⴰⵟⵟⴰⵙ ⵇⵇⴰⵔⴻⵏ ⴰⴷⵍⵉⵙ ⵉⵇⴻⴷⴷⵙⴻⵏ ⵃⴰⵔⴼⴻⵏ ⵜ ⵉⵡⴷⴰⵏ, ⴰⵟⵟⴰⵙ ⵏ ⵍⵃⵓⴽⴽⴰⵎ ⴷ ⵉⵎⴻⵇⵇⵔⴰⵏⴻⵏ ⵏ ⴷⴷⵓⵏⴻⵛⵜ ⵛⴰⵔⵀⴻⵏ ⵜ, ⵎⴻⵏⵏⵄⴻⵏ ⵉⵏⵏⵉ ⵙⴰⴷⵓ ⵍⵃⵓⴽⵎ ⵏⵙⴻⵏ ⴰⴷ ⵜ ⵖⴰⵔⴻⵏ, ⴰⵟⵟⴰⵙ ⵏ ⵉⵡⴷⴰⵏ ⵇⵇⴰⵔⴻⵏ ⵎⴰⵎⵎⴻⵛ ⵉ ⵖⴰ ⵜⵜⵡⴰⵖⴼⴰⵔⴻⵏ ⴷⴷⵏⵓⴱ ⴰⵎⴻⵏⵏⵉ ⵡⴰⵀⴰ (ⵜⵜⵓⵏ ⴱⴻⵍⵍⵉ ⵍⵎⴰⵙⵉⵃ ⵉⵎⴰⵔⵔⴻⵜ ⵙⴻⵏⵏⴻⵊ ⵉ ⵍⵎⵉⵊⴰⵍ ⵉ ⵏⵥⴻⵎⵎⴰⵔ ⴰⴷ ⵜ ⵏⴻⴽⵙⵉ ⵏⴻⵛⵛⵉⵏ), ⴰⵟⵟⴰⵙ ⵡⴰⵔ ⴼⵀⵉⵎⴻⵏ ⴱⴻⵍⵍⵉ ⵍⵉⵎⴰⵏ ⴷⵉ ⵍⵎⴰⵙⵉⵃ ⵡⴰⵔ ⵉⴵⵉ ⴷ ⵉⵛⵜ ⵜⵎⴻⵙⵍⴰⵛⵜ ⵜⴰⵔⵅⴻⵚ ⵎⴰⵛⴰ ⵙ ⵍⵄⴻⴽⵙ ⴷ ⵉⵛⵜ ⵏ ⵜⵎⴻⵙⵍⴰⵛⵜ ⵉ ⵅ ⵉⵜⵜⵅⴻⵚⵚⴰ ⴱⵏⴰⴷⴻⵎ ⴰⴷ ⵉⵅⵙⴰⵔ ⵜⵓⴷⴰⵔⵜ ⵏⵏⴻⵙ ⵃⵉⵎⴰ ⴰⴷ ⵜⵜ ⵢⴰⴼ.
ⵢⴻⵛⵛⵓ ⵍⵎⴰⵙⵉⵃ ⵉⵇⵇⴰⵔ:
“ⵎⴰⵍⴰ ⵃⴻⴷ ⵢⵓⵙⴰ-ⴷⴷ ⵖⴰⵔⵉ ⵓⵛⴰ ⵡⴰⵔ ⵉⵛⴰⵔⵀ ⴱⴰⴱⴰ ⴰⵙ ⵏⵉⵖ ⵢⴻⵎⵎⴰ ⴰⵙ, ⴰⵢⵜⵎⴰⵙ ⵏⵉⵖ ⵢⴻⵙⵙⵎⴰⵙ, ⵜⴰⵎⵖⴰⵔⵜ ⵏⵏⴻⵙ ⵏⵉⵖ ⵜⴰⵔⵡⴰ ⵏⵏⴻⵙ, ⵓ ⵄⴰⴷ ⵓⵍⴰ ⴷ ⵉⵅⴻⴼ ⵏⵏⴻⵙ, ⵡⴰⵔ ⵉⵥⴻⵎⵎⴰⵔ ⵏⴻⵜⵜⴰ ⴰⴷ ⵢⵉⵍⵉ ⴷ ⴰⵎⴻⵃⴹⴰⵔ ⵉⵏⵓ. ⵡⴻⵏⵏⵉ ⵡⴰⵔ ⵉⴽⵙⵉⵏ ⵚⵚⴰⵍⵉⴱ ⵏⵏⴻⵙ, ⴰⴷ ⴰⵢⵉ ⴷⴷ-ⵉⴹⴼⴰⵔ, ⵡⴰⵔ ⵉⵥⴻⵎⵎⴰⵔ ⴰⴷ ⵢⵉⵍⵉ ⴷ ⴰⵎⴻⵃⴹⴰⵔ ⵉⵏⵓ. ⵡⴻⵏⵏⵉ ⵡⴰⵔ ⵉⴽⵙⵉⵏ ⵚⵚⴰⵍⵉⴱ ⵏⵏⴻⵙ, ⴰⴷ ⴰⵢⵉ ⴷⴷ-ⵉⴹⴼⴰⵔ, ⵡⴰⵔ ⵉⵥⴻⵎⵎⴰⵔ ⴰⴷ ⵢⵉⵍⵉ ⴷ ⴰⵎⴻⵃⴹⴰⵔ ⵉⵏⵓ.” (ⵍ’ⵉⵏⵊⵍ ⵙ ⵓⴼⵓⵙ ⵏ ⵍⵓⴽⴰ 14:26-27)
ⵙ ⵓⵢⴻⵏⵏⵉ ⵏⵜⴰⴼ ⴰⵇⴰ ⴷⴷⴻⵏⴱ ⴰⵎⴻⵥⴰⵔⵓ ⵓ ⴷⴷⴻⵏⴱ ⴰⵎⴻⵇⵇⵔⴰⵏ ⵎⴰⵔⵔⴰ, ⵏⴻⵜⵜⴰ ⴷ ⴱⵍⴰ ⵍⵉⵎⴰⵏ ⴷⵉ ⵢⴻⵛⵛⵓ ⵍⵎⴰⵙⵉⵃ, ⵎⵎⵉⵙ ⵏ ⴰⵔⴻⴱⴱⵉ. ⵏⴻⵇⵇⴰⵔ ⵎⴰⵏ ⴰⵢⴰ ⴷⵉ ⵍ’ⵉⵏⵊⵉⵍ ⵙ ⵓⴼⵓⵙ ⵏ ⵢⵓⵃⴰⵏⵏⴰ:
“ⴰⵎⵎⵓ ⵉⵅⵙ ⴰⵔⴻⴱⴱⵉ ⴷⴷⵓⵏⴻⵛⵜ ⴰⵍ ⵎⴰⵏⵉ ⵉⵡⵛⴰ ⴰⵢⴻⵏⵏⵉ ⵏ ⵎⵎⵉⵙ ⵃⵉⵎⴰ ⴽⵓⵍ ⵉⵊⵊⴻⵏ ⵡⴻⵏⵏⵉ ⵥⵥⴰⵢⴻⵙ ⵉ ⵖⴰ ⵢⴰⵎⵏⴻⵏ, ⵡⴰⵔ ⵉⵜⵜⵀⴻⵍⵍⵉⴽ ⵛⴰ, ⵎⴰⵛⴰ ⴰⴷ ⵖⴰⵔⴻⵙ ⵜⵉⵍⵉ ⵜⵓⴷⴰⵔⵜ ⵉⵜⵜⴷⵓⵎⴰⵏ. ⵎⵉⵏⵥⵉ ⴰⵔⴻⴱⴱⵉ ⵡⴰⵔ ⴷⴷ-ⵉⵙⵙⴻⴽⴽ ⵛⴰ ⵎⵎⵉⵙ ⵖⴰⵔ ⴷⴷⵓⵏⴻⵛⵜ ⵃⵉⵎⴰ ⴰⴷ ⵉⵃⴰⵙⴻⴱ ⴷⴷⵓⵏⴻⵛⵜ, ⵎⴰⵛⴰ ⵉⵙⵙⴻⴽⴽ ⵉ-ⵜ-ⵉ-ⴷⴷ ⵃⵉⵎⴰ ⴰⴷ ⵥⵥⴰⵢⴻⵙ ⵜⴻⵏⵊⴻⵎ ⴷⴷⵓⵏⴻⵛⵜ. ⵡⴻⵏⵏⵉ ⵥⵥⴰⵢⴻⵙ ⵉ ⵖⴰ ⵢⴰⵎⵏⴻⵏ ⵡⴰⵔ ⵉⵜⵜᵉⵜⵡⴰⵃⴰⵙⴻⴱ ⵛⴰ. ⵡⴻⵏⵏⵉ ⵡⴰⵔ ⵉⵜⵜⵉⵎⵏⴻⵏ ⵛⴰ ⴰⵇⴰ ⵉⵜⵜⵡⴰⵃⴰⵙⴻⴱ ⵥⵉ ⵍⴻⵅⵅⵓ ⵎⵉⵏⵥⵉ ⵏⴻⵜⵜⴰ ⵡⴰⵔ ⵢⵓⵎⵉⵏ ⵛⴰ ⴷⴻⴳ ⵢⵉⵙⴻⵎ ⵏ ⵓⵢⴻⵏⵏⵉ ⵏ ⵎⵎⵉⵙ ⵏ ⴰⵔⴻⴱⴱⵉ. ⴷ ⵡⴰ ⴷ ⵍⴻⵃⴽⴰⵎ, ⴰⵇⴰ ⵜⴰⴼⴰⵡⵜ ⵜⵓⵙⴰ-ⴷⴷ ⵖⴰⵔ ⴷⴷⵓⵏⴻⵛⵜ, ⵉⵡⴷⴰⵏ ⵅⵙⴻⵏ ⵜⴰⴵⴻⵙⵜ ⵅ ⵜⴼⴰⵡⵜ, ⵎⵉⵏⵥⵉ ⵜⵉⵎⴻⴳⴳⴰ ⵏⵙⴻⵏ ⵜⵓⵖⴰ ⴰⵜⴻⵏⵜ ⴷ ⵜⵉⵄⴻⴼⴼⴰⵏⵉⵏ. ⵎⴰⵔⵔⴰ ⵡⴻⵏⵏⵉ ⵉⵜⵜⴻⴳⴳⴻⵏ ⵜⵓⵄⴻⴼⴼⵏⴰ, ⵉⵛⴰⵔⵔⴻⵀ ⵜⴰⴼⴰⵡⵜ, ⵡⴰⵔ ⴷⴷ-ⵉⵜⵜⵉⵙ ⵛⴰ ⵖⴰⵔ ⵜⴼⴰⵡⵜ, ⵃⵉⵎⴰ ⵡⴰⵔ ⵜⵜⵡⴰⵡⴻⴱⴱⵅⴻⵏⵜ ⵛⴰ ⵜⵉⵎⴻⴳⴳⴰ ⵏⵏⴻⵙ. ⵡⴻⵏⵏⵉ ⵉⵜⵜⴻⴳⴳⴻⵏ ⵜⵉⴷⴻⵜⵜ ⴰⴷ ⴷⴷ-ⵢⴰⵙ ⵖⴰⵔ ⵜⴼⴰⵡⵜ, ⵃⵉⵎⴰ ⴰⴷ ⴱⴰⵏⴻⵏⵜ ⵜⵉⵎⴻⴳⴳⴰ ⵏⵏⴻⵙ, ⴰⵇⴰ ⵜⵜⵡⴰⴳⴳⴻⵏⵜ ⴷⵉ ⴰⵔⴻⴱⴱⵉ.” (ⵍ’ⵉⵏⵊⵍ ⵙ ⵓⴼⵓⵙ ⵏ ⵢⵓⵃⴰⵏⵏⴰ 3:16-21)
ⵎⴰⵍⴰ ⴱⵏⴰⴷⴻⵎ ⵢⵓⵎⴻⵏ ⴷⵉ ⵍⵎⴰⵙⵉⵃ ⴰⵇⴰ ⵎⵎⴻⴽⵙⵉⵏ ⵅⴰⵙ ⴷⴷⵏⵓⴱ ⵏⵏⴻⵙ ⵙ ⵜⴰⵖⴰⵔⵚⵜ ⵏ ⵉⵥⵎⴰⵔ ⵏ ⴰⵔⴻⴱⴱⵉ ⴷⴻⴳ ⵡⴻⵎⵛⴰⵏ ⵏⵏⴻⵙ, ⵓⵛⴰ ⵎⴰⵔⵔⴰ ⴷⴷⵏⵓⴱ ⵉ ⵏⴻⴳⴳⴰ ⴰⴷ ⴰⵏⴻⵖ ⵜⵜⵡⴰⵖⴼⴰⵔⴻⵏ ⵙ ⵢⵉⵙⴻⵎ ⵏⵏⴻⵙ, ⵏⴻⴷⵡⴻⵍ ⴷ ⵉⵊⵊ ⴱⵏⴰⴷⴻⵎ ⵏ ⵊⴷⵉⴷ ⴰⵎ ⵎⴰⵎⵎⴻⵛ ⵜⵓⵔⴰ:
“ⵙ ⵓⵢⴻⵏⵏⵉ ⵎⴰⵍⴰ ⵃⴻⴷ ⴷⵉ ⵍⵎⴰⵙⵉⵃ ⵉ ⵉⴵⴰ, ⴰⵇⴰ ⵏⴻⵜⵜⴰ ⵉⵜⵜⵡⴰⵅⵍⴻⵇ-ⴷⴷ ⵥⵉ ⵊⴷⵉⴷ. ⵅⴻⵏⵏⵉ ⵎⵉⵏ ⵉⴵⴰⵏ ⴷ ⴰⵇⴷⵉⵎ ⵉⵄⴷⵓ. ⵎⴰⵔⵔⴰ ⵉⴷⵡⴻⵍ ⴷ ⵊⴷⵉⴷ ⵙ ⴰⵔⴻⴱⴱⵉ ⵡⴻⵏⵏⵉ ⴷ ⴰⵏⴻⵖ ⵉⵙⵙⴻⵚⵍⴻⵃ ⴰⴽⵉⴷⴻⵙ ⵙ ⵍⵎⴰⵙⵉⵃ ⵓⵛⴰ ⵉⵡⵛ ⴰⵏⴻⵖ ⵜⴰⵙⴻⵅⵅⴰⵔⵜ ⵏ ⵡⴻⵚⵍⴰⵃ.” (ⵜⴰⴱⵔⴰⵜ ⵉ ⵉⴽⵓⵔⵉⵏⵜⵉⵢⵢⴻⵏ ⵡⵉⵙⵙ ⵜⵏⴰⵢⴻⵏ 5:17, 18)
ⵅⴻⵏⵏⵉ ⴰⴷ ⵏⵓⵢⵓⵔ ⴷⵉ ⵜⵓⴷⴰⵔⵜ ⵏ ⵊⴷⵉⴷ ⵓⵛⴰ ⴰⴷ ⵏⴻⵇⵇⵉⵎ ⴷ ⵉⵃⴻⵏⵊⵉⵔⴻⵏ ⵏ ⴰⵔⴻⴱⴱⵉ ⴱⵍⴰ ⵍⵄⵉⴱ ⵙ ⵓⵔⵓⵛⵛⵉ ⴰⴽ-ⴷ ⵉⴷⴰⵎⵎⴻⵏ ⵏⵏⴻⵙ. ⴰⴷ ⵏⵉⵍⵉ ⴷ ⵉⵎⴻⵥⴷⴰⴳⴻⵏ, ⵡⴰⵔ ⵉⴵⵉ ⵙ ⵍⴻⵅⴷⴰⵢⴻⵎ ⵏⵏⴻⵖ ⵏⵏⵉ ⵏⴻⴳⴳⴰ, ⵎⴰⵛⴰ ⵙ ⵍⵉⵎⴰⵏ ⴷⴰⵢⴻⵙ ⴰⵇⴰ ⵏⴻⵎⵓⵟⵟⵉ ⵥⵉ ⵜⴰⴵⴻⵙⵜ ⵖⴰⵔ ⵜⴳⴻⵍⴷⵉⵜ ⵏ ⵎⵎⵉⵙ ⵏ ⴰⵔⴻⴱⴱⵉ ⵜⴻⵏⵏⵉ ⵉ ⴷⴷ ⵖⴰ ⵢⴰⵙⴻⵏ ⴷⴻⵖⵢⴰ.
ⵍⵎⴰⵙⵉⵃ ⵉⵇⵇⴰⵔ:
“ⴰⵙⴻⵎ-ⴷⴷ ⵖⴰⵔⵉ ⵎⴰⵔⵔⴰ ⴽⴻⵏⵏⵉⵡ, ⵉⵏⵏⵉ ⵢⵓⵃⵍⴻⵏ ⴷ ⵢⴻⵏⵏⵉ ⵢⴰⵔⴱⵓⵏ ⴷⴷⵇⴻⵍ, ⴰⴷ ⴰⵡⴻⵎ ⵡⵛⴻⵖ ⴰⵔⵔⴰⵃⴻⵜ, ⴽⵙⵉⵎ-ⴷⴷ ⴰⵥⴰⵢⵍⵓ ⵉⵏⵓ ⵅⴰⵡⴻⵎ, ⵍⴻⵎⴷⴻⵎ ⵥⵥⴰⵢⵉ, (ⵎⵉⵏⵥⵉ) ⵏⴻⵛⵛ ⴷ ⴰⵎⵀⵉⵏ ⴷ ⴰⵎⵡⴰⴹⴻⵄ ⵏ ⵡⵓⵍ ⵓⵛⴰ ⴰⴷ ⵜⴰⴼⴻⵎ ⴰⵔⵔⴰⵃⴻⵜ ⵉ ⵍⴻⵄⵎⵓⵔ ⵏⵡⴻⵎ. ⵎⵉⵏⵥⵉ ⴰⵥⴰⵢⵍⵓ ⴷ ⵍⴻⵃⵎⴻⵍ ⵉⵏⵓ ⴼⵙⵓⵙⴻⵏ.” (ⵍ’ⵉⵏⵊⵍ ⵙ ⵓⴼⵓⵙ ⵏ ⵎⴰⵜⵜⴰ 11:28-30).