1 A aytma inu, ad awem ssargbeɣ x Řexbar Aṣebḥan wenni d awem barrḥeɣ, d wenni tqebřem u d wenni di tbeddem nican, 2 i zi d awem i ɣa tiři Tudart, s wawař i d awem barrḥeɣ, mařa xas tɛeqřem ɛad, mammec nneɣni zeɛma tumnem amenni waha. ^■   3 Minzi zeg umezwar sseɛduɣ awem-dd min tuɣa ṭṭfeɣ s yixef inu, aqa Lmasiḥ immut x ddnub nneɣ ɛlaḥsab min yuran, ^■   4 aqa ittwanḍeř uca ittwasnekkar-dd deg wass wiss třata ɛlaḥsab min yuran. ^■   5 Netta iḍhar-dd ɣar Kifa, xenni ɣar tenɛac n imeḥḍaren. ^■   6 Awarni as iban-dd i tiwwa n xemsa-mya n wawmaten deg umur d ijjen, aṭṭas zzaysen ddaren ɛad ař i řexxu, maca inneɣni aqa ṭṭṣen iḍes n řmewt. 7 Awarni as iḍhar-dd i Yaɛqub, xenni i marra rrusul. ^□  

8 Amecnaw ɣar uneggar n marra, iḍhar ayi-dd ɛawed am i yijj n umexřuq dd-izwaren i řweqt nnes. ^■   9 Minzi necc ǧiɣ d amaẓuẓ qaɛ zi rrusul, war sdihijeɣ ad ayi řaɣan rrasul, minzi necc tuɣa darrceɣ Tamesmunt n AREBBI. ^□  ■  

10 Maca s arḍa n AREBBI i ǧiɣ min ǧiɣ uca arḍa nnes i dayi iǧan war iǧi baṭeř, minzi xedmeɣ mahu qaɛ xasen marra, maca war iǧi d necc, maca arḍa n AREBBI nni iǧan akidi. ^■  

11 Xenni ma d necc niɣ d nitni, ammu i nettbarreḥ, ammu i tumnem.

12 Xenni mařa ittwabarreḥ s Lmasiḥ wenni dd-ittwasnekkaren zi taddart n imettinen, mammec xenni zemmaren ca jar awem ad inin belli war din bu Tudart zi taddart n imettinen?

13 Minzi mařa war din bu Tudart i imettinen, uřa d Lmasiḥ war dd-ittwasnekkar xenni,

14 uca mařa Lmasiḥ war dd-ittwasnekkar, xenni baṭeř i teǧa tbarreḥt nneɣ, baṭeř i yeǧa xenni l’iman nwem,

15 uca neccin nban d řechud n ẓur n AREBBI, minzi neched x AREBBI belli aqa issnekkar-dd Lmasiḥ, waxxa Netta war i-t-i-dd-issnekkar ca.

16 Minzi mařa imettinen war dd-ttᵉtwasnekkaren ca, aqa Lmasiḥ war dd-ittwasnekkar ɛawed.

17 U mařa Lmasiḥ war dd-ittwasnekkar ca, aqa l’iman nwem ixwa, u aqa kenniw ɛad di ddnub nwem,

18 u uřa inni ittᵉṭṭsen di Lmasiḥ awarni řami mmuten, aqa ttwahellken.

19 Mařa tuɣa nessitim di Lmasiḥ i tudart-a waha, aqa aneɣ qaɛ d imcumen n marra iwdan.

20 Maca řexxu umi dd-ittwasnekkar Lmasiḥ zi taddart n imettinen, aqa idweř Netta d Amenzu n yinni iṭṭṣen deg wenḍeř. ^■   21 U am mammec dd-tusa řmewt zeg ijj n bnadem, ammu uřa d tanukra n imettinen teǧa zeg ijj n Bnadem. ^■   22 Minzi am iwdan marra ad mmten di Adam, ammu ɛawed i ɣa ddaren marra nitni ɛawed di Lmasiḥ. 23 Maca kuř ijj di nnubet nnes: Lmasiḥ tuɣa d amenzu, xenni awarni as inni iǧan n Lmasiḥ ɣar twasit nnes. 24 Awarni man aya d aneggaru, xmi i ɣa iwc tageldit i AREBBI, Tababat, xmi i ɣa ibḍeř marra řeḥkamet d marra ṣṣulṭa d marra jjehd.

25 Maɣar Netta ad iḥkem am ujeǧid ař d ɣa yegg marra řɛedyan nnes sadu iḍaren nnes. ^■   26 Řeɛdu aneggaru wenni i ɣa ittwabeḍřen, aqa-t d řmewt. 27 Minzi aqa igga marra sadu iḍaren nnes. Maca xmi ittwanna: “Aqa marra timesřayn ttwaggent sadu Netta!”, aqa iban mliḥ belli wenni d as iggin marra sadu Netta, aqa netta simant nnes war iǧi sadu Netta. ^■   28 Uca řami d as ittwagg marra sadu i Netta, řexdenni Tamemmit ɛawed ad tᵉttwagg sadu i Wenni umi d as iggin marra sadu i Netta, ḥima ad yiři AREBBI d marra di min di mma.

29 Niɣ, min ɣa ggen inni ittwasɣeḍṣen di ṭṭweɛ n imettinen, mařa war dd-tᵉttwasnekkaren imettinen ɛemmarṣ? Maɣar mayemmi i ɣa ttwasɣeḍṣen ɛad di ṭṭweɛ n imettinen? 30 U mayemmi neccin ɛad di lxaṭar di kuř tsaɛɛet? 31 A aytma, ttjaǧiɣ ɣar usemɣar nwem i iǧan ɣari di Siditneɣ, Yeccu Lmasiḥ, aqa ttmettiɣ kuř ass. 32 U mammec, mařa ttwamenḍareɣ am bnadem zzat i řewḥuc di Afasus, man řefḍeř i ɣari, mařa imettinen war dd-ttwasnekkaren ca? Ejj aneɣ ad nsu, minzi tiwecca ad nemmet. ^■   33 War ttɣeccim yixef nwem: řḥarḍ war iḥřin tjeyyaḥ nneyyet taṣebḥant. 34 Sfaqem uřawen nwem ɣar tsegda, war xeṭṭim ca. Minzi ca zzaywem war ɣarsen teǧi tussna n AREBBI. I řeḥya nwem qqareɣ t.

35 Maca ad inin ca zzaywem: “Mammec i dd ɣa ttwasnekkaren imettinen? S man arrimet i dd ɣa yasen?” ^■   36 A afɣuř, min tzarrɛed cek, war itteddar mařa war immut qbeř. ^■   37 Min tzarrɛed, war teǧi ca d arrimet nni i ɣa tiři, maca tzarrɛed taɛeqqact iɣeryen n yirden niɣ n imendi niɣ n ca n zzariɛet nneɣni. 38 Maca AREBBI iwca as arrimet am mammec ixs Netta, i kuř ddab n zzariɛet iwca as arrimet ɛlaḥsab ṭṭbiɛet n kuř icten zzaysent.

39 War iǧi marra arrimet d arrimet d ijj, maca tenni n iwdan imsebḍa x tenni n řmař u tenni n iseřman wenneɣni n tenni n ijḍaḍ. 40 Aqa din arrimat n ujenna d arrimat n temmurt, maca aɛuǧi n yinni n ujenna wenneɣni n yinni n temmurt. 41 Ijjen d aɛuǧi n tfuct, wenneɣni d aɛuǧi n uyur u wenneɣni d aɛuǧi n itřan, uca aɛuǧi n ijj n itři iɛeddun x uɛuǧi n ijj n itři nneɣni. 42 Ammu xenni i ɣa tiři Tudart i yenni mmuten. Aqa ttwazarrɛen nitni di min iɣeccen uca ttwasnekkaren-dd břa řɣecc. ^■  

43 Aqa ttwazarrɛen nitni di min war icniɛen uca ad dd-ttwassnekkaren deg uɛuǧi. Nitni ttwazarrɛen deg weḍɛaf uca ad dd-ttwassnekkaren di jjehd. 44 Aqa ttwazarrɛen nitni s ict n arrimet n ṭṭbiɛet uca ad dd-ittwassnekkar bnadem s ict n arrimet tarruḥanit. Aqa din arrimet n ṭṭbiɛet, ammu aqa din uřa d arrimet n Arruḥ.

45 Ammu tura ɛawed: “Aryaz amezwaru Adam, tuɣa d řeɛmar iddaren!”, Adam aneggaru idweř d Arruḥ n Řɛunṣar n Tudart. ^■   46 Maca min iǧan zi Arruḥ war dd-yusi ca d amezwaru, maca min iǧan n ṭṭbiɛet, xenni awarni man aya min iǧan zi Arruḥ. 47 Bnadem amezwaru ikka-dd zeg ucař n temmurt, Bnadem wiss tnayen d SIDI i dd-ikkin zeg ujenna. 48 Am mammec iǧa wenni zeg ucař n temmurt, ammu i iǧan uřa d nitni zeg ucař, uca am mammec iǧa Wenni n ujenna, ammu i iǧan uřa d inni n ujenna. 49 Uca am mammec narbu ṣṣifet n wenni ittwaggen zeg ucař n temmurt, ammu xenni ad narbu ṣṣifet n Wenni zeg ujenna. ^■  

50 A aytma inu, ddegga xseɣ ad iniɣ: Aqa aysum d idammen war zemmaren ad warten Tageldit n ijenwan, uca uřa d min ifennan war iwarret min war ifennin. ^■   51 Xzarem, ad kenniw ssaregbeɣ x ijj n ssirr: aqa aneɣ war nettᵉṭṭeṣ ca marra s yiḍes n řmewt, maca marra ad nettwabeddeř, ^■   52 deɣya, deg wermac n wabřiwen, ɣar řḥess n uṣuḍi aneggaru deg uyicc n icarri, uca imettinen ad dd-ttwassnekkaren ɣar min war ifennin uca neccin ad nettwabeddeř. ^■   53 Minzi min ifennan ittxeṣṣa as ad yarḍ min war ifennin u min ɣa immuten ittxeṣṣa as ad yarḍ min war ittmettin.

54 Uca xmi min ifennan ad yarḍ min war ifennin u min ɣa immuten ad yarḍ min war ittmettin, řexdenni ad ikemmeř wawař i ittwarin:

“Řmewt aqa tᵉttwaṣarḍ deg řeɣřeb.” ^■  

55 “A řmewt, mani iǧa usennan nnem?

A řaxart, mani iǧa řeɣřeb nnem?” ^■  

56 Aqa asennan n řmewt d ddenb, uca jjehd n ddenb aqa-t d Ccariɛa. 57 Maca aqadi i AREBBI, wenni d aneɣ iwcin řeɣřeb s Siditneɣ Yeccu Lmasiḥ. ^■  

58 S uya, a aytma iɛizzen, beddem nican u břa anhezzi, arnim řebda di řxedmet n SIDI s ufeyyeḍ, am tessnem belli řxedmet nwem war teǧi baṭeř di SIDI.