1 Ḍfarem tayri u njebdem ɣar tewhibin n Arruḥ, d amezwaru ḥima ad tnebbam. ^□   2 Minzi wenni issawařen s iřsawen inneɣni, war issiwiř ca i iwdan, maca i AREBBI, minzi uřa d ijj war d as ifehhem, maca issawař řesrar s Arruḥ. 3 Maca wenni ittnabben, issawař ɣar yewdan ḥima ad ten ibna, ad ten isejjeɛ, ad ten issfewwej. 4 Wenni issawařen s yijj n iřes nneɣni, ibenna ixef nnes, maca wenni ittnabben ibenna tamesmunt. 5 Iwa xseɣ marra kenniw ad tessiwřem s iřsawen inneɣni, maca mliḥ ɛad ad tnebbam, minzi amenzu wi ittnebban x wi issiwřen s iřsawen inneɣni, mɣir mařa wanita ad t ifessar, minzi mařa ifessar ad tᵉttwabna tmesmunt.

6 Xenni řexxu, a aytma, mařa usiɣ-dd ɣarwem uca ad kiwem ssiwřeɣ s iřsawen nneɣni, man nnfeɛ i ɣarwem i ɣa yawyeɣ, mařa war d awem ssiwřeɣ ca s usargeb niɣ s tussna niɣ s ijj n wawař i ɣa nabbeɣ niɣ s useřmed? 7 Uřa d řeḥwayec war iddaren amecnaw tamja niɣ lgambri, ggin řḥess. Mařa war ittwafarz řḥess nsen, mammec i ɣa idweř ittwassen min ttiraren s tamja niɣ s lgambri? 8 Iwa, mařa řbuq igga řḥess u ittegg řḥess war iṣfi, wi i ɣa isswejden xenni i umenɣi? 9 Ammu ɛawed kenniw, mařa tessiwiřem awařen s ijj n yiřes nneɣni, mammec i ɣa fehmen min teqqarem? Ad tessiwřem xenni am wenni issawařen di řeɛwin.

10 Aqa din wi issnen mecḥař n iřsawen di ddunect uca uřa d icten zzaysen war iǧi břa řḥess nnes.

11 Xenni mařa war ssineɣ řaǧaɣ n řḥess, ad iřiɣ necc d ijj n ubarrani i wenni issawařen, d wenni issawařen ad yiři d abarrani i necc.

12 Ammu ɛawed kenniw, umi tenjebdem ɣar tewhibin n Arruḥ, arzum ad tfeyyḍem di ṭṭweɛ n řebni n tmesmunt.

13 S uyenni, wenni issawařen s ca n iřes nneɣni, ad iẓẓaǧ ḥima izemmar i ufessar nnes.

14 Minzi mařa necc ẓẓuǧeɣ s ca n yiřes, arruḥ inu aqa iẓẓuǧ, maca řefhamet inu ad teqqim břa řɣiǧet.

15 Mammec i ɣa ggeɣ? Ad ẓẓaǧeɣ s arruḥ inu, maca ad ẓẓaǧeɣ ɛawed s řeɛqeř inu, ad ɣennjeɣ s arruḥ inu, maca ad ɣennjeɣ ɛawed s řeɛqeř inu. ^■  

16 Mammec nneɣni mařa tbarkem s Arruḥ, xenni mammec i ɣa yini ḥed wenni din iqqimen am war ifhim ‘Amin!’ i tẓaǧit n uqadi nnek, minzi netta war issin min teqqared.

17 Minzi waxxa cek tbarked mliḥ, maca amqarreb nnek war ittwabenni ca zi man aya.

18 Necc ttqadiɣ AREBBI aqa ssawařeɣ s iřsawen ktar zzaywem marra,

19 maca di tmesmunt aqa maɛlik ufiɣ ad iniɣ xemsa n wawařen s řeɛqeř inu ḥima ad ssřemdeɣ ɛawed inneɣni, uřa ɛecra-ařaf n wawařen s yijj n yiřes.

20 A aytma inu, war ttiřim d tarwa deg ixarriṣen nwem, maca iřim d tarwa di tuɛeffna, u iřim tiwḍem di řefhamet. ^■   21 Aqa tura di Ccariɛa:

“Ad ssiwřeɣ i řgens-a s ijj n řhard n řbarrani

u s ijj n yiřes nneɣni.

Waxxa ammu war d ayi ttesřin ca,

iqqar SIDI.” ^■  

22 Ammu xenni iřsawen d řeɛřamet, war iǧi i yenni yumnen, maca i yenni war yuminen ca, maca awař i ittwanabben zzayes war iǧi i yenni war yuminen, maca i yenni yumnen.

23 Xenni mařa marra tamesmunt tuɣa tessmun uca marra tuɣa ssawařen s iřsawen, uca udfen inni ijehřen niɣ inni war yuminen, ma nitni war qqaren belli aqa iwdan-a ttxeřfen? 24 Maca mařa marra tnebbam uca yudef-dd ḥed war yumin niɣ ḥed ijheř, xenni wanita ad ittwasseqneɛ zi marra kenniw uca ad ittwawebbex zzaywem marra, 25 uca min innufaren deg wuř nnes ad ittwaɛarra. Netta ad yaḍar s wudem nnes, ad isjed i AREBBI, ad yini: “Aqa s tidett AREBBI aqa-t jar awem!”

26 S uyenni, a aytma inu, mařa tmunem, ejj kuř ijjen zzaywem wenni ɣar iǧa ijj n uzehhid niɣ ict n tɣuri niɣ ijj n usargeb niɣ ijj n yiřes niɣ ijj n ufessar ad zzayes dd-inṭeq. Ejj ad yiři marra i řebni. 27 Mařa din ḥed issiweř s yijj n iřes nneɣni, ejj i-ten ad ssiwřen s tnayen niɣ s waṭṭas s třata yidsen, uca kuř ijjen zzaysen s nnubet nnes, u ejj ijj ad t ifessar. 28 Uca mařa war din iǧi wi izemmaren ad ifessar, ad isqar netta di tmesmunt, ad issiweř i yixef nnes u i AREBBI.

29 Ejj ad ssiwřen tnayen niɣ třata n inabiyyen, uca inneɣni ad ḥekmen. 30 Maca mařa ittwassargeb ca i ḥed i din iqqimen , ejj xenni wenni d amezwar ad issusem. 31 Minzi tzemmarem ad tnebbam marra ijjen awarni wenneɣni, ḥima marra ad řemden uca ad daysen ittwagg wuř marra. 32 Uca arruḥ n inabiyyen, aqa-t immars sadu inabiyyen, 33 minzi AREBBI war iǧi d AREBBI n uxarweḍ maca n řehna, amecnaw di marra timesmunin n imqeddasen.

34 Tusa-dd x temɣarin nwem ad ssusment di tmesmunin, minzi war d asent ismiḥ ad ssiwřent, maca icuwwar asent ad iřint ttwaḍɛent am mammec teqqar ɛawed Ccariɛa. ^■   35 Uca mařa xsent ad řemdent ca, ad sseqsant iryazen nsent di taddart nsen, minzi aqa-tt d řefḍiḥet i temɣarin ad ssiwřent di tmesmunt. 36 Ma zeɛma iffeɣ-dd zzaykent awař n AREBBI? Niɣ yiweḍ-dd ɣarwem waha? 37 Mařa ḥed ittɣiř as d anabi niɣ d bnadem arruḥani, ejj i-t ad iɛqeř mliḥ belli min d awem ttariɣ, aqa atent d tiweṣṣa n Siditneɣ. 38 Maca mařa ḥed ixs ad iqqim ijheř, ejj i-t ad ijheř.

39 Ammu xenni, a aytma inu, njebdem ḥima ad tnebbam, war mennɛem ca awař s iřsawen. 40 Ad imsar marra s ladab u s usettef.