Tayri
13
1 Maɛlik necc ssawařeɣ s iřsawen n iwdan d lmalakat, maca war ɣari bu tayri,
aqa dewřeɣ d nnḥas ittentunen,
niɣ d aǧun iddendunen.
2 Maɛlik ɣari tawhibt maḥend ad nabbeɣ,
fehhmeɣ marra řesrar
u ɣari marra tussna d marra l’iman
ař d ssmuṭṭiyeɣ idurar,
maca war d ayi teǧi tayri,
xenni necc d walu i ǧiɣ. ■
3 Maɛlik bḍiɣ marra agřa inu d macca x imezřaḍ,
maɛlik wciɣ arrimet inu ḥima ad tecmeḍ,
maca war dayi teǧi tayri,
war d ayi tneffeɛ di walu.
4 Tayri teǧa ɣares ttasiɛ n řxaḍar d řeḍrafet,
tayri war dayes bu tusmi,
tayri war tᵉttfeyyec s yixef nnes,
war dayes bu nnfaxet, □ ■
5 Tayri war tᵉttegg bu řefḍiyyet,
war tarezzu tizi nnes,
war tᵉttwasarzag,
uca war tᵉttxemmam di min iǧan d aɛeffan. ■
6 aqa war tfarreḥ ca zi řɣecc,
maca tfarreḥ zi tidett. ■
7 Aqa třeḥḥef marra,
tᵉttamen di marra,
tessatem marra
uca tarebbu marra.
8 Tayri war tfenni ɛemmarṣ,
maca awařen n yinni ittnabben ad beḍřen,
iřsawen ad gnun,
u tussna ad tebḍeř.
9 Minzi aqa nessen ɣar ijj n uɣezdis waha,
uca nettnabb mɣir ijj n wezyen,
10 maca xmi dd ɣa yas ukemmeř,
řexdenni min iǧan ɣar ijj n wezyen ad ibḍeř.
11 Řami tuɣa ayi d aseymi,
ssiwřeɣ amecnaw aseymi,
fekkareɣ amecnaw aseymi,
xarṣeɣ amecnaw aseymi,
maca řami dewřeɣ d aryaz,
jjiɣ awarni ayi min iǧan n useymi.
12 Řexxu nettwařa s ict n tisit
ɣar ijj n warwas n min iǧan,
maca xenni ad nẓar tifras ɣar tifras.
Řexxu ssneɣ ɣar ijj n wezyen waha,
maca xenni ad ssneɣ mammec tuɣa ttwassneɣ necc. ■
13 Maɣar třata aya ad qqimen:
liman, asitem d tayri,
maca ameqqran nsen aqa-tt d tayri.