1 X tmesřayin n arruḥ, a aytma, xseɣ ad tessnem, 2 tuɣa kenniw d lkuffar u tᵉttwanedhem ɣar l’aṣnam ignawen břa ma tucim. 3 S uyenni ssaregbeɣ kenniw, aqa war din uřa d ijjen wenni i ɣa yinin s Arruḥ n AREBBI ad yini: ‘Aqa ittwanɛeř Yeccu!’, u war din uřa d ijjen wenni i ɣa yinin: ‘Yeccu d SIDI!’, mɣir s Arruḥ Iqeddsen waha. ^■  

4 Aqa din tiwhibin ifarzen, maca Arruḥ aqa-t d Ijj. ^■   5 U aqa din řexdayem n tsexxart ifarzen, maca SIDI aqa-t d Ijj. 6 Uca aqa din řeɛjayeb ifarzen, maca AREBBI aqa-t d Ijj, d wenni itteggen marra di marra bnadem. 7 Maca asargeb n Arruḥ ad immewc i kuř ijj am mammec iǧa i uɛawen i netta.

8 Aqa s Arruḥ immewc i yijjen awař n tiɣit, i wenneɣni awař n tussna s Arruḥ d ijjen, 9 i wenneɣni l’iman s Arruḥ, i wenneɣni tawhibt i usgenfi s Arruḥ d ijjen,

10 i wenneɣni maḥend ad igg řeɛjayeb, i wenneɣni mahend ad ittnabb, i wenneɣni řfarz n arruḥat, i wenneɣni ɛřam kuř iřsawen uca i wenneɣni afessar n iřsawen.

11 Maca man aya marra ittegg i-t Arruḥ d Ijjen, wenni ibeṭṭan i kuř ijj anect mammec ixs Netta. ^■  

12 Minzi am arrimet aqa-tt d ict u ɣares aṭṭas n iɣezdisen, ɛad aqa aten marra d iɣezdisen n ict n arrimet. Waxxa nitni deg waṭṭas, aqa tteggen ict n arrimet waha. Ammu teǧa tmesřact ɛawed ak-d Lmasiḥ. ^■  

13 Minzi nettwaseɣḍeṣ marra s yijj n Arruḥ deg ict n arrimet, niɣ Udayen niɣ Iramiyyen niɣ imsexxaren niɣ iḥurriyyen, uca immewc aneɣ marra ad nsu zeg ijj n Arruḥ. ^■  

14 Uřa d arrimet war teǧi ca d ijj n uɣezdis, maca s waṭṭas n iɣezdisen.

15 Mařa aḍar ad ini minzi war ǧiɣ d afus, war ǧiɣ zi arrimet, ma xenni war ittiři zi arrimet?

16 Uca mařa amezzuɣ inna, minzi war ǧiɣ d tiṭṭ, war ǧiɣ zi arrimet, ma xenni war ittiři zi arrimet?

17 Mařa marra arrimet tuɣa-tt d tiṭṭ, manis d ikka useǧi? Mařa marra arrimet tuɣa-tt d aseǧi, manis d ikka ucemmi?

18 Maca řexxu AREBBI igga iɣezdisen di arrimet, kuř ijj zzaysen am mammec ixs Netta.

19 Minzi mařa marra tuɣa d ijj n uɣezdis, mani teǧa arrimet xenni? 20 Maca řexxu aqa din aṭṭas n iɣezdisen, maca d ict n arrimet waha. 21 Tiṭṭ war tzemmar ad tini i ufus: “War cek ḥwijeɣ ca!”, niɣ ɛawed azeǧif i iḍaren: “War kenniw ḥwijeɣ ca!” 22 Maca s řɛeks iɣezdisen n arrimet inni nḥesseb ḍeɛfen, aqa nitni ttwaḥdajen aṭṭas. 23 Iɣezdisen nni n arrimet i d aneɣ ittɣiřen d imuqřiřen, nettegg asen ccan ktar, uca iɣezdisen inni war ittbinen icnan, ad asen nessḥinneb s waṭṭas n řehzuṭ. 24 Minzi iɣezdisen nneɣ nni ɣar iǧa řehzuṭ, war ḥdajen man aya, maɣar AREBBI igga arrimet, uca i iɣezdisen i iǧan d qell, iwca asen ccan ktar, 25 ḥima war ittiři ubeṭṭu di arrimet, maca iɣezdisen ad wcen taynit ijjen i wenneɣni deg uqaren d ijjen. 26 Mařa ijj n uɣezdis tᵉttekk xas tamara, marra iɣezdisen ad ksin tamara akides, u mařa ijj n uɣezdis ifarḥ, ad farḥen marra iɣezdisen akides. 27 Xenni kenniw d Arrimet n Lmasiḥ d iɣezdisen kuř ijjen deg wemcan nnes. ^■  

28 Zeɛma AREBBI aqa igga di tmesmunt d amezwaru rrusul, awarni asen inabiyyen, awarni asen imesɣaren, awarni asen inni itteggen řeɛjayeb, awarni asen tiwhibin n usgenfi, n twiza, n uḍebbar uca ɛřam kuř iřsawen. ^□  ■   29 Ma zeɛma marra nitni d rrusul? Ma marra d inabiyyen? Ma marra d imesɣaren? Ma marra nitni tteggen řeɛjayeb? 30 Ma marra ɣarsen tiwhibin n usgenfi? Ma ssawařen marra s iřsawen? Ma ttfessaren marra iřsawen? 31 Maca mařa tarzum xenni di tewhibin timeqqranin, aqa necc ad awem ssecneɣ abrid yuɛřan.