1 Ḍfarem ayi-dd am mammec ḍfareɣ Lmasiḥ. ^■   2 Ttqadiɣ kenniw, a aytma inu, minzi tᵉttfekkarem dayi di marra, uca tᵉtteṭṭfem di tewṣeyyat am mammec d awem tent wciɣ.

3 Maca xseɣ ad tessnem belli Lmasiḥ d Azeǧif n kuř aryaz uca aryaz d azeǧif n temɣart, uca AREBBI d Azeǧif n Lmasiḥ. ^■   4 Kuř aryaz wenni ittẓaǧan niɣ ittnabben am iřeḥḥef x uzeǧif nnes, ifeṭṭeḥ azeǧif nnes. 5 Maca kuř tamɣart tenni ittẓaǧan niɣ ittnabben am iɛarra uzeǧif nnes, tfeṭṭeḥ azeǧif nnes, minzi nettat am tenni iḥeffen azeǧif nnes. 6 Minzi mařa tamɣart war třeḥḥif, ejj i-tt ad tḥeff ɛawed. Maca mařa d řefḍiḥet i temɣart mařa tqess acuwwaf niɣ tḥeff, ḥsen mařa třeḥḥef. ^■   7 Minzi aryaz war itteḥwiji ca ad iřeḥḥef azeǧif, minzi netta d ṣṣifet d aɛuǧi n AREBBI, maca tamɣart teǧa d aɛuǧi n weryaz. ^■   8 Minzi aryaz war d iqqars ca zi temɣart, maca tamɣart zeg weryaz. ^■   9 Uca ɛawed war dd-ixřiq ca weryaz i temɣart, maca tamɣart i weryaz.

10 S uyenni ittxeṣṣa as i temɣart ad ɣares tiři ṣṣulṭa x uzeǧif nnes x ssibbet n lmalakat.

11 Maca di Siditneɣ aryaz war iǧi břa tamɣart, uřa d tamɣart war teǧi břa aryaz.

12 Minzi amecnaw tamɣart tusa-dd zeg weryaz, amenni ɛawed iǧa weryaz s temɣart, maca marra min iǧan aqa-t zi AREBBI.

13 Ḥekmem kenniw simant nwem: Ma tusa-dd x temɣart ad teẓẓaǧ i AREBBI am tessɛarra i uzeǧif nnes?

14 Ma tubbart simant nnes war d awem tesscan belli acuwwaf d azirar d řefḍiḥet i weryaz?

15 Maca i temɣart d aɛuǧi mařa ɣares yiři ucuwwaf d azirar, minzi immewc as ucewwaf am uřeḥḥaf.

16 Maca mařa ḥed ixs ad ixarweḍ man aya, neccin war nennum manaya uřa d timesmunin n AREBBI. ^■  

17 Weṣṣiɣ kenniw x tmesřayin-a řexxu, aqa war d awem tteggeɣ ccan, minzi war tuyurem ɣar zzat, maca teggurem ɣar ḍeffar.

18 Ɣar umezwar, mařa tmunem am tmesmunt, sřiɣ aqa din jar awem amsebḍi, u man aya zemmareɣ ad t amneɣ i ijj n wezyen,

19 s minzi ittxeṣṣa ad din yiři jar awem imcubbcen, ḥima ad iban man wen zzaywem i iǧan d amqeǧeb. ^■  

20 Xmi ttmunam, war tᵉttettem d tsessem am mammec icuwwar deg wass n Siditneɣ. ^□  ■   21 Maɣar kuř ijjen ittett amensi nnes i yixef nnes, am ijj nneɣni dayes řaẓ uca nneɣni iscara. 22 Ma war ɣarwem tudrin mani i ɣa teccem u mani i ɣa teswem? Niɣ tesseḥqaram tamesmunt n AREBBI uca tessḥeccamem inni war ɣar iǧi ca? Min d awem i ɣa iniɣ? Ma ad awem ggeɣ ccan? Lla, war d awem tteggeɣ ccan!

23 Minzi min ṭṭfeɣ zi Siditneɣ, ssiwḍeɣ awem t-i-dd, aqa Siditneɣ Yeccu di ǧiřet i di ittwaɣdar, iksi aɣrum, ^■   24 ibarek, yarẓa i-t, inna: “Ksim, ta d arrimet inu i xawem ittwarẓen, ggem aya ammu i řidaret xafi.” 25 Uca ammu awarni amensi iwca řkas, inna:

“Řkas-a d Řɛahd n Jdid deg Idammen inu.

Ggem aya, mecḥař ma zzayes teswim, i řiḍaret xafi.

26 S minzi mecḥař ma i ɣa teccem aɣrum-a u ad teswem zi řkas-a, aqa tᵉttidarem řmewt n Siditneɣ, ař dd ɣa yas. ^■  

27 S uyenni man wen i ɣa iccen aɣrum n SIDI uca ad isu zi řkas nnes, am war ittiři s udaheǧi i man aya, ad yiři s umarwas i Idammen n SIDI u i Arrimet nnes. ^■   28 S uyenni ejj bnadem ad iqeǧeb ixef nnes, uca ejj i-t ad icc xenni zeg weɣrum u ad isu zi řkas. ^■   29 Minzi wi i ɣa iccen d wi i ɣa iswen am war isdiheǧ, aqa netta ad issiweḍ řḥukm ɣar ixef nnes am ittett u am isess, minzi netta war ifarrez ca Arrimet n SIDI. 30 S uyenni aqa din aṭṭas n yinni iḍeɛfen d yenni iheřcen jar awem uca aṭṭas dewřen ttᵉṭṭṣen iḍeṣ n řmewt.

31 Maca mařa neḥkem x ixef nneɣ, xenni war ggur ad nettwaḥakem. ^■   32 Maca mařa nettwaḥkem zi Siditneɣ, aqa nettwarebba, ḥima war nettwaḥakem ca ak-d ddunect. 33 Zi řexxu, a aytma, xmi i ɣa tmunem ḥima ad teccem, rajam ijjen wenneɣni. 34 Mařa ḥed dayes řaẓ, ad icc di taddart nnes, ḥima war tᵉttmunem i ccreɛ. Min iqqimen, ad t ɛedřeɣ xmi dd ɣa yaseɣ.