1 Zi jjihet n wesmuni n ṣṣdaqi i imqeddasen, ggem kenniw ɛawed am mammec ḍebbreɣ-i-t-i-dd di tmesmunin n Galaṭiya. 2 Kuř ass amezwar n simana kuř ijjen zzaywem ad iḥuz ca n tesɣart di taddart nnes uca ad tt ixemmeř ɛlaḥsab mammec iwesseɛ, ḥima, xmi dd ɣa awḍeɣ, war ibeddi ɛad řexdenni wesmuni n ṣṣdaqi. ^■   3 Uca xmi dd ɣa awḍeɣ, ad ssekkeɣ inni i ɣa tfarzem kenniw ak-d tebrat, ḥima ad awyen tacrimet n ṣṣdaqi nwem ɣar Urcalim. 4 Uca mařa tuɣa icuwwar ad raḥeɣ necc ɛawed dinni, xenni ad kkaren ad raḥen akidi.

5 Ad ɣarwem dd-aseɣ xmi dd ɣa kkeɣ x Makiduniya, minzi ad dd-kkeɣ x webrid n Masiduniya. ^■   6 Izemmar ad qqimeɣ akidwem niɣ ɛad ad sseɛduɣ řmecta akidwem, ḥima xenni kenniw tzemmarem ad ayi tessqebbḍem mani i ɣa raḥeɣ. 7 Minzi war xseɣ ad kenniw ẓareɣ řexxu am dd xawem i ɣa kkeɣ abrid waha, minzi ssitimeɣ ad qqimeɣ akidwem ca n řweqt, mařa ismeḥ Sidi. 8 Maca ad qqimeɣ ɛad di Afasus ař ass n Řɛid n Xemsin n Wussan. 9 Minzi aqa tennurzem ayi-dd tewwart tameqqrant, maca aqa din ijj n ubarru n řɛedyan.

10 Mařa yiweḍ-dd Timutiyu ɣarwem, ḥḍam maḥend izemmar ad din yiři jar awem břa tiggʷudi, minzi netta ittegg řxedmet n SIDI amecnaw necc.

11 S uyenni uřa d ijjen ad t isseḥqar, maca qebbḍem t di řehna, ḥima ad ɣari dd-yas, minzi necc ttrajiɣ t ak-d wawmaten.

12 Zi jjihet n tewmat Apullus, a awmaten inu, aqa zawgeɣ t aṭṭas, ḥima ad ɣarwem dd-yas ak-d wawmaten, maca netta tuɣa war iɛewweř ad dd-yas řexxu, maca ad dd-yas xmi d as i ɣa isarreḥ řweqt.

13 Ḥḍam, beddem nican di l’iman, ḥezmem s teryast, iřim tmeḥḍem.

14 Jjem marra min tᵉtteggem ad yiři s tayri.

15 Zawgeɣ kenniw, a aytma, zi jjihet n řaǧ n taddart n Stifanus, maɣar tessnem aqa aten d imenza n Axaya, u nitni ṭewwɛen ixef nsen i tsexxart di ṭṭweɛ n imqeddasen,

16 aqa ggem ixef nwem sadu ufus n yinni amecnaw nitni uca sadu kuř ijjen i ixeddmen akidneɣ u i d aneɣ ittɛawanen.

17 Aqa farḥeɣ s twasit n Stifanus d Furtunatus d Axayikus, minzi nitni kemmřen min d ayi ittxeṣṣan daywem,

18 s minzi nitni ssareyyḥen arruḥ inu d wenni nwem. Weqqarem iryazen amecnaw ina.

19 Timesmunin n Asiya ttseǧament-i-dd xawem s řehna. Akwila d Priskilla ak-d tmesmunt i iǧan di taddart nsen ttseǧamen-dd xawem s řehna aṭṭas di Siditneɣ. 20 Ttseǧamen-dd xawem marra awmaten s řehna. Ttseǧamem-dd x wayawya s řehna s usudem iqeddsen. ^■   21 Ijj n sřam i ttariɣ s ufus inu, zi Bulus.

22 Mařa ḥed war ixs Siditneɣ Yeccu Lmasiḥ, ad yiři d amenɛuř. Maran ata!, min ixs ad yini: “Siditneɣ ad dd-yas!” ^□   23 Arḍa n Siditneɣ Yeccu Lmasiḥ ad yiři akidwem. 24 Tayri inu aqa-tt akidwem marra di Lmasiḥ Yeccu. Amin.