1 Zi jjihet n tɣarṣin i l’aṣnam, aqa nessen, belli marra ɣarneɣ tussna. Tussna maca tᵉttegg tuffet, maca tayri tessyemma. 2 Mařa din ḥed ittɣiř as belli issen ca, ɛad war issin walu anect mammec ittxeṣṣa ad issen. 3 Maca mařa ḥed ittexs AREBBI, aqa d wa ittwassen zzayes.

4 X macca tenni ittwaɣarṣen i l’aṣnam, aqa nessen belli ṣṣanam war iǧi d walu di ddunect, u belli war din iǧi ca AREBBI nneɣni mɣir Ijjen. ^■   5 Xenni, waxxa aqa din inni umi qqaren irebbiten, ma deg ujenna niɣ di temmurt, - amecnaw mammec ǧan din aṭṭas n irebbiten d waṭṭas n isiditen - , 6 i neccin, aqa ɣarneɣ ijj n AREBBI, Tababat, maɣar zzayes i dd-usint marra timesřayin u dayes i neǧa, u aqa ɣarneɣ ijj n SIDI, aqa-t d Yeccu Lmasiḥ, maɣar marra timesřayin ǧant s ufus nnes, uca uřa d neccin aqa s ifassen nnes i neǧa. ^■  

7 Maca tussna war daysen teǧi marra, minzi din ca n yinni di tnefsect nsen ttᵉtten min ittwaɣarṣen i l’aṣnam, u minzi teḍɛef tnefsect nsen, aqa tᵉttwaxmej s manayenni tnefsect. ^■   8 Xenni macca war d aneɣ tessiwiḍ ca ɣar AREBBI, minzi mařa necc, aqa war dayneɣ yarenni ca, niɣ mařa war necci, aqa war dayneɣ bu řexṣeṣ. ^■   9 Maca ɣarwem, aqa ttesriḥ nwem war dd-tusi ad tiři d taɛenkrift i yenni iḍeɛfen. ^■  

10 S minzi mařa ḥed ittwařa kenniw, inni ɣar teǧa tussna, tᵉttɣimam di zzawect mani ɛebbden l’aṣnam, ma tanefsect nnes, minzi netta iḍɛef, war tᵉttwajbed ca ad tekkar maḥend ad yecc min ɣarṣen i l’aṣnam?

11 Ammu s tussna nnek ad ittwahellek xenni wenni iḍeɛfen, wenni i xef immut Lmasiḥ. ^■  

12 Xmi txeṭṭim ammu x wawmaten nwem uca tessyezzmem tuḍɛeft n tnefsect nsen, aqa txeṭṭim x Lmasiḥ.

13 S uyenni, mařa macca aqa tarra uma ad innedref, war ttᵉtteɣ aysum ɛemmarṣ, ḥima war ssendrifeɣ ca uma. ^■