1 Zi jjihet min d ayi turim, aqa mliḥ i bnadem war ittḥidi ca tamɣart. 2 Maca zi ssibbet n farq-ccɣeř, kuř aryaz ad yawi tamɣart nnes uca kuř ict n temɣart ad tawi ijj n weryaz ad tedweř nnes. 3 Ejj i weryaz ad isscen i temɣart nnes tayri i d as dd-yusin, ammu ɛawed tamɣart i weryaz nnes. ^■   4 Tamɣart war tᵉttḍebbari ca di arrimet nnes, maca aryaz nnes. Uca ammu ɛawed aryaz war ittḍebbari ca di arrimet nnes, maca tamɣart nnes. 5 War t qeṭṭɛem ca x wayawya, mɣir mařa tekksem deg wawař ca n umur ḥima ad ceɣřem s uẓummi d tẓaǧit, xenni munem ɛawed maḥend ad tawyem ariqqi i řemrac, ḥima war kenniw ittjarrib cciṭan zi ssibbet n meẓri n arrimet. ^■   6 Qqareɣ man aya di ṭṭweɛ n yinni iḍeɛfen, war iǧi s řumur. 7 Xseɣ ɛad mliḥ mařa marra iwdan ad iřin amecnaw necc di tazdugi, maca kuř ijj ɣares tawhibt nnes zi AREBBI, ijjen ammu, wenneɣni ammu. ^■  

8 Maca i yenni war imřicen u i tijjař qqareɣ, aqa mliḥ i nitni mařa qqimem amecnaw necc. 9 Maca mařa war zemmaren ad qqimen ṭṭfen di man aya, ejj i-ten ad meřcen, minzi d man aya ḥsen zeg wecmaḍ n nnecwet. ^■  

10 Maca i yenni yiwyen ict n temɣart, umureɣ, war iǧi d necc, maca Sidi inu, belli tamɣart war tbeṭṭi x weryaz. ^■  

11 Uca mařa tebḍa, ad teqqim břa aryaz, niɣ ad temmesseṣřeḥ ak-d weryaz nnes, uca aryaz war ittejji tamɣart nnes.

12 Xenni i inneɣni, war t qqareɣ necc, maca Sidi inu: Mařa ijj n tewmat ɣares tamɣart war ittimnen, uca nettat teqbeř ad tezdeɣ akides, war tt ineṭṭar ca.

13 Uca mařa ict n temɣart tenni ɣar iǧa weryaz war yuminen, u netta ixs ad kides izdeɣ, war tsemmeḥ ca nettat deg weryaz nnes.

14 S minzi aryaz war yuminen ittwaqeddes di temɣart tenni yumnen, uřa d tamɣart war yuminen tᵉttwaqeddes deg weryaz wenni yumnen, mařa mammec nneɣni ad iřin iḥenjiren nwem d imengas, maca řexxu aqa nitni d imezduga.

15 Maca mařa wenni war ittimnen ad iǧef, ejj i-t ad iǧef. Xenni tawmat niɣ tawečmat war ttwaqqnen ca di řḥar nni. Aqa AREBBI iřaɣa aneɣ-dd ɣar řehna.

16 Minzi manis tessnent kennint, a timɣarin, ad tessnejmem aryaz nnem? Niɣ manis tessnem kenniw, a iryazen, ad tessnejmed tamɣart nnek? ^■  

17 Maca kuř ijj am mammec i d as iwca SIDI, am mammec i d iřaɣa AREBBI i kuř ijj, ejj i-t ad iddar ammu. Ammu i umureɣ i marra timesmunin.

18 Mařa ittwařaɣa i ḥed ittwaxetnen ɣar umuni ak-d Lmasiḥ, wanita war yarezzu ad t ibḍeř, mařa ittwařaɣa i ḥed břa axtan, wanita war ittejji ad ittwaxten ixef nnes.

19 Axtan d walu u břa axtan d walu, maca aḥeṭṭu n tweṣṣa n AREBBI. 20 Ejj kuř ijjen ad iqqim di třaɣit i zi dd-ittwařaɣa. ^■   21 Mařa tuɣa cek tᵉttwařaɣid-dd d amsexxar, war tessḥissifed ca i man aya, maca ɛawed mařa tzemmared ad tᵉttwaṣařḥed, ixḍar i-t simant nnec maḥend ad tsexxared. 22 Minzi wenni ittwařaɣan di Siditneɣ am tuɣa-t d amsexxar, aqa-t d aḥurri n AREBBI, am mammec wenni ittwařaɣan d aḥurri, aqa-t d amsexxar n Lmasiḥ. 23 Aqa temmesɣem-dd s ttaman, xenni war iɛeddeř ad tiřim ɛad d imsexxaren n iwdan. ^■   24 A aytma, ejj kuř ijjen ad isiɣi deg webrid n AREBBI i di d as dd-ittwařaɣa.

25 Deg wazzay n teɛzariyyin, aqa war ɣari bu řumur n AREBBI, maca ad wceɣ array inu, amecnaw wi yiwḍen s arḍa n AREBBI ḥima ad yiři d amtiqqi. 26 Ittɣiř ayi mliḥ i řeɣben i iǧan di řweqt-a, belli aqa icna i bnadem ad yiři ammu. 27 Ma třeṣqed di temɣart? War arezzu ca deg weǧaf. Ma teǧfed? War arezzu ca x temɣart. 28 Maca mařa tiwyed tamɣart, war teggured ca ad texḍid, uca mařa taɛzarect tedweř ɣar weryaz, nettat war txeṭṭi ca. Maca amecnaw ina, tᵉttraja ten řmeḥnet di arrimet, uca xseɣ ad tt xawem kkseɣ.

29 D man aya i qqareɣ, a aytma, aqa řḥař imẓi. S uyenni inni ɣar iǧa temɣart, ejj i-ten ad iřin axmi war ɣarsen teǧi, 30 inni ittrun axmi war ttrun, u inni ifarrḥen axmi war friḥen, u inni issaɣen axmi war mellken, 31 u inni istenfaɛen zi ddunect-a, ittxeṣṣa war ttaggʷijen x ustenfeɛ i dd-ittřiqen, minzi udem n ddunect ad iɛdu. ^■  

32 S uyenni xseɣ ad tiřim břa amnus, maɣar wenni war ɣares teǧi temɣart, ad ixarreṣ di tmesřayin n Sides d mammec i ɣa yarḍa Sides. ^■   33 Maca wenni ɣar teǧa temɣart, ad iksi s wemnus i tmesřayin n ddunect-a u mammec i ɣa yarḍa tamɣart nnes.

34 Aqa din ijj n řfarq jar temɣart d teɛzarect. Tenni war ɣar iǧi weryaz ɛemmarṣ, ad txarreṣ di Sides, ḥima ad tiři tqeddes am di arrimet am di arruḥ, maca tenni ɣar teǧa weryaz, ad txarreṣ di tmesřayin n ddunect, i mammec i ɣa tarḍa aryaz nnes. 35 Degga qqareɣ awem-dd i tizi nwem, war iǧi ḥima ad awem ggeɣ taxceft, maca nniɣ t ḥima ad teqqimen d imtiqqan i Siditwem x ijj n webrid d aṣebḥan, am war tseřhim ak-d ddunect.

36 Maca mařa ḥed ixarreṣ belli aqa sthezzan zzayes zi ssibbet n yeǧis taɛzarect tenni x ɛdun wussan n temẓi nnes, uca war tt issemřec ɛad i weryaz, uca ittɣiř as nican ad tt issemřec, netta war ixḍi ca. Ejj i-tt ad tᵉttwassemřec. 37 Maca wi iǧan nican deg wuř nnes, břa ma yuca s uziyyar, uca ɣares ṣṣulṭa x yixef nnes, ikkes deg wuř nnes ad yejj taɛzarect nnes teṣfa, mliḥ i yegga. 38 S uyenni, wenni issmeřcen yeǧis taɛzarect igga mliḥ, u wenni war issmeǧicen yeǧis taɛzarect, igga mliḥ aṭṭas.

39 Tamɣart teqqen ɣar weryaz nnes s Ccariɛa min ɣa yekk weryaz nnes iddar, maca mařa aryaz nnes immut, aqa-tt tsarreḥ zzayes, tzemmar ad temřec ak-d wi texs, maca di Siditneɣ waha. ^■   40 Maca necc ɣari, aqa nettat ad tᵉttwabarek ktar mařa teqqim amenni. U aqa Necc ttwařiɣ Arruḥ n AREBBI ixeddem ɛawed dayi. ^■