1 Ma izɛem ḥed zzaywem, xmi ɣares ccreɛ ak-d wenneɣni, ad zzayes iḥkem zzat n yinni war iseggden, war iǧi zzat i imqeddasen? 2 Niɣ war tessinem ca belli imqeddasen ad ḥekmen ddunect? Uca mařa xenni ddunect ad tᵉttwaḥkem zzaywem, ma war tzemmarem xenni ad tɛedřem ddɛawi timeẓyanin jar awem? ^■   3 Niɣ war tessinem ca belli ad neḥkem x lmalakat? Mecḥař ɛad ktar i ɣa neḥkem x yenni iǧan n ddunect-a? 4 Xenni, mařa din jar awem timesřayin n tudart-a ittxeṣṣa ad ttwaḥakment, ma tᵉtteggem inni ɣar iǧa drus n uweqqar waha di tmesmunt ḥima ad ḥekmen? 5 Qqareɣ awem t ḥima ad tesseḍḥam. Ma xenni war dinni ḥed jar awem d amiɣis wenni izemmaren ad iḥkem jar tawmat d umas? 6 Maca s řɛeks, ijj n tewmat ad icarreɛ ak-d umas u man aya qibač i yenni war yuminen ca. 7 S uya tḥekkmem x yixef nwem, minzi temcarraɛem jar awem. Mayemmi war tqebbřem ad kenniw ḍeǧen? Mayemmi war tqebbřem ca ad kenniw ɣeccen? ^■   8 Maca kenniw tᵉtteggem min war iseggden, uca tᵉttɣeccam, d man aya i tᵉtteggem ɛad i aytmatwem.

9 Ma war tessinem ca belli inni war iseggden war warrten ca Tageldit n AREBBI? War ttraḥem ca di ɣalaṭ! Ni ayt n ffarq-ccɣer niɣ inni iɛebbden l’aṣnam niɣ inni itteggen zzina niɣ inni issexsaran, niɣ zzwameř, ^■  

10 niɣ iḍemmaɛen niɣ iceffaren niɣ iskarjiyyen niɣ imceqqafen uřa d ibeɛɛajen ad warten Tageldit n AREBBI.

11 Tuɣa timesřayin řesqent ɣar ca zzaywem, maca aqa kenniw tᵉttwassizedgem, aqa tᵉttwaqeddsem, aqa tᵉttwaseggdem s Yisem n Siditneɣ Yeccu Lmasiḥ u s Arruḥ n AREBBI nneɣ. ^■  

12 Marra timesřayin ḥeǧřent ayi, maca marra war neffɛent. Marra timesřayin ḥeǧřent ayi, maca war d ayi ittḍebbar uřa d ijjen. ^■  

13 Macca i uɛeddis uca aɛeddis i macca, maca AREBBI ad ten ibeṭṭeř s tyuya. Maca arrimet war teǧi i farq-ccɣeř, maca i Siditneɣ, uca Siditneɣ i arrimet.

14 Maca AREBBI wenni dd-issnekkaren Siditneɣ ad aneɣ dd-issnekkar s jjehd nnes. ^■  

15 Ma war tessinem ca belli arrimat nwem ǧant d iɣezdisen n Lmasiḥ? Ma ad ksiɣ xenni ijj n uɣezdis n Lmasiḥ maḥend ad t ggeɣ d aɣezdis n ict n temɣart n farq-ccɣeř? Ɛemmarṣ!

16 Niɣ war tessinem ca belli wi imunen ak-d temɣart n farq-ccɣeř, aqa-t d ict n arrimet akides? Minzi iqqar: ‘Nitni s tnayen ad iřin d ict n arrimet.’ ^■  

17 Maca wenni imunen ak-d Siditneɣ, aqa-t d ijj n arruḥ akides.

18 Arewřem zi farq-ccɣeř. Kuř ca n ddenb i ittegg bnadem, aqa-t barra i arrimet, maca wenni issefsaden ixef nnes s ffarq-cɣeř, aqa netta ixeṭṭa ḍidd i arrimet nnes.

19 Ma war tessinem ca belli arrimet nwem d zzawect n Arruḥ Iqeddsen wenni daywem iǧan, wenni i ṭṭfem zi AREBBI, u aqa kenniw war teǧim ca i yixef nwem? ^■   20 Aqa temmesɣem-dd s ttaman. Semɣarem xenni AREBBI di arrimet nwem u di arruḥ nwem tinni iǧan n AREBBI. ^■