1 Umi dd-qarrben ɣar Urcalim ɣar Bayt-Faji d Bayt-Ɛanya zzat i wedrar n Zzitun, issekk tnayen n imeḥḍaren nnes, ^■   2 inna asen: “Ruḥem ɣar dcar nni qibač nwem. Xmi ɣares i ɣa tadfem, řexdenni ad tafem ijj n wesnus iqqen, war xas inyi uřa d ijj n bnadem. Fesyem as-dd uca awyem t-i-dd ɣari. 3 Mařa inna awem ḥed: ‘Mayemmi i tᵉtteggem aya?’, xenni inim: ‘Aqa Sidi iḥdaj i-t!’, uca řexdenni ad t-i-dd issekk da.” 4 Nitni ruḥen, ufin asnus nni iqqen ɣar tewwart barra x webrid. Řami d as dd-arxun, 5 nnan asen ca n yinni tuɣa din ibedden: “Min tᵉtteggem, tfessyem i wesnus?” 6 Nnan asen am mammec ten iweṣṣa Yeccu uca jjin ten. 7 Iwyen-dd asnus ɣar Yeccu, ssarsen xas arruḍ nsen uca inya xas Netta. ^■   8 Aṭṭas ssun arruḍ nsen x webrid, ca nneɣni qessen-dd řefruɛ s wafriwen zi tcejjura uca ssun ten x webrid. 9 Inni izwaren d yenni t-i-dd-iḍfaren, tuɣa sɣuyyun s jjehd, qqaren: “Uṣanna! D amimun Wenni dd-yusin s Yisem n SIDI! ^■  

10 Ad tᵉttwabarek Tgeldit tenni i dd ɣa yasen s Yisem n babatneɣ Dawud. Uṣanna di řuɛřa x řuɛřa n ujenna!”

11 Yudef Yeccu di Zzawect Tameqqrant di Urcalim uca iẓra marra min din imsaren. Řami tuɣa issutem řḥař, iffeɣ ɣar Bayt-Ɛanya ak-d tenɛac. ^■  

12 Tiwecca nnes řami dd-ffɣen zi Bayt-Ɛanya, iṭṭef i-t-i-dd řaẓ. ^■  

13 Umi iẓra zi řaggʷaj ijj n wartu n tazart ɣares tifray, yuyur din ḥima ad yarzu ma ad taɣ ad dayes yaf ca. Umi ɣares dd-yiweḍ, war yufi walu mɣir tifray, minzi war tuɣi bu řweqt n tazart.

14 Iṭṭef deg wawař, inna as i wartu: “Zi řexxu d tsawent war zzayem ittett uřa d ijj ɛad řɣiǧet.” Tuɣa imeḥḍaren nnes ttesřan min iqqar.

15 Usin-dd ɣar Urcalim u umi yudef Yeccu ɣar Zzawect Tameqqrant, ibda issuffuɣ isebbaben d imsewwaqen nni iǧan di Zzawect Tameqqrant, uca ibda issneqřab ṭṭwabeř n iṣarrafen n tmenyat d řekrasi n yinni tuɣa iznuzan idbiren, ^■  

16 uca war ijji ḥed ad iɛdu Zzawect Tameqqrant uřa s ict n řqecɛet.

17 Tuɣa isseřmad, inna asen: “Ma war turi:

‘Taddart inu ad as řaɣan

‘Taddart n tẓaǧit i marra řegnus.’

Maca kenniw tarrim tt d ifri n iceffaren.” ^■  

18 Imseřmaden n idlisen d imeqqranen n ikehhanen sřin man aya, kkaren uca arezzun mammec i ɣa ggen ad t nɣen, minzi ggʷeden zzayes, minzi řɣaci marra tuɣa ittebhet s useřmed nnes. ^■  

19 Řami dd-tewḍa tmeddit, iffeɣ ɣar barra n tendint.

20 Di ṣṣbeḥ zic, řami senni ɛdun, ẓrin belli wartu nni isřaw zeg iẓewran. 21 Cimɛun iften, xenni inna as: “A Amseřmad inu, xzar, artu i texzid, aqa isřaw.” 22 Yarra-dd Yeccu, inna asen: “Maɛlik ad daywem yiři l’iman n AREBBI, 23 maɣar s tidett, Necc ad awem iniɣ belli wenni i ɣa inin i wedrar-a: ‘Meksi, menḍar di řebḥar!’, war ittcekki deg wuř nnes maca ad yamen belli min inna ad iffeɣ, iwa aqa ad iffeɣ min d as inna. ^■   24 S uyenni Necc ad awem iniɣ, marra min ɣa tᵉttarem am tᵉttẓaǧam, amnen belli ad t tkesbem uca ad ɣarwem yiři. ^■   25 U xmi i ɣa tbeddem ad teẓẓaǧem, ɣfarem mařa ɣarwem ca x ijj n bnadem, ḥima uřa Babatwem i iǧan deg ijenwan ad awem iɣfar ddnub nwem. ^■   26 Mařa war tɣeffarem kenniw, war d awem iɣeffar uřa d Babatwem i iǧan deg ijenwan i ddnub nwem.” ^■  

27 Usin-dd ɛawed ɣar Urcalim. Am tuɣa iggur di Zzawect Tameqqrant, qarrben-dd ɣares imeqqranen n ikehhanen d imseřmaden n idlisen d imɣaren n řgens. ^■   28 Nnan as: “S man ttesriḥ i zi tᵉttegged timesřayin-a? Wi d ac iwcin ṣṣulṭa aya ḥima ad tegged timesřayin-a?” ^■   29 Yarra-dd Yeccu, inna asen: “Uřa d Necc ad kenniw sseqsiɣ ijj n useqsi. Arrem-dd xafi uca xenni uřa d Necc ad awem iniɣ s man ttesriḥ i zi tteggeɣ aya. 30 Aseɣḍaṣ n Yuḥanna ma ikka-dd zeg ujenna niɣ zeg iwdan? Arrem-dd xafi!” 31 Mcawaren jar asen, nnan: “Mařa nenna: ‘Zeg ujenna!’, ad yini: ‘Mayemmi war zzayes tuminem?’ 32 Maca mařa nenna: ‘Zeg iwdan!’, xenni ittxeṣṣa ad neggʷed zi řgens!”, minzi marra ḥesben Yuḥanna d anabi s tidett. ^■   33 Arrin-dd, nnan i Yeccu: “War nessin!” Yarra-dd xasen Yeccu, inna: “Xenni uřa d Necc war d awem qqareɣ zi man ttesriḥ i zi tteggeɣ timesřayin-a.”