1 Ikkar, yuyur ssenni uca yiweḍ ɣar temmurt n Yahudiyya, ɣar wemcan n uẓekkwi n L'Urdun. Munen-dd xas řɣaci aṭṭas u ɛawed tuɣa isseřmad i-ten am mammec tuɣa innum. ^■   2 Usin-dd ɣares Ifarisiyyen, sseqsan t ḥima ad t jarrben: “Ma iḥeǧeř i weryaz ad iǧef i temɣart nnes?” 3 Yarra-dd, inna asen: “Min xef tuɣa kenniw yumur Musa?” 4 Nnan: “Musa iwca ttesriḥ ad tᵉttwari tebrat n waǧaf maḥend aryaz ad as iǧef.” ^■   5 Yarra-dd Yeccu, inna asen: “X ssibbet n řeqsaḥet n wuřawen nwem aqa yura awem tawṣeyyet-a, 6 maca zi beddu zi mani tᵉttwagg ddunect, AREBBI ixřeq i-ten-dd d awtem d tewtemt. ^■   7 S uyenni ad ismeḥ weryaz di babas d yemmas, ad iqqen ɣar temɣart nnes, ^■   8 uca tnayen idsen xenni ad iřin d ict n arrimet, uca ammu war ttiřin ɛad d tnayen, maca ad iřin d ict n arrimet. ^■   9 Min issmun AREBBI, war t ibeṭṭi bnadem.” ^■  

10 Di taddart sseqsan t imeḥḍaren nnes ɛawed x man aya.

11 Inna asen: “Wi i ɣa iǧfen i temɣart nnes uca ad imřec tenneɣnit, aqa netta izna xas, ^■  

12 u mařa tamɣart teǧef i weryaz nnes, uca xenni ad temřec wenneɣni, aqa nettat tezna.”

13 Iwyen as-dd iḥenjiren ḥima ad ten iḥada, maca imeḥḍaren webbxen inni ten dd-yiwyen ɣares. ^■  

14 Umi iẓra Yeccu man aya, ixeyyeq, inna asen: “Jjem iḥenjiren ad ɣari dd-asen, war ten mennɛem, minzi Tageldit n AREBBI n yinni amecnaw nitni. ^■  

15 S tidett, Necc ad awem iniɣ: “Wi war iqebbřen Tageldit n AREBBI amecnaw aḥenjir, aqa ɛemmarṣ war ɣares ittidef.”

16 Idarreɛ asen, uca am xasen issars ifassen nnes, ibark i-ten. ^■  

17 Umi iffeɣ maḥend ad yuyur deg webrid, yuzzeř-dd ɣares ijjen, iwḍa as ɣar ifadden uca isseqsa t: “A Amseɣɣar Aṣebḥan, min ɣa ggeɣ ḥima ad warteɣ Tudart ittduman?” ^■  

18 Inna as Yeccu: “Mayemmi i d ayi tᵉttřaɣid: ‘Aṣebḥan!’? Uřa d ijj war iǧi d aṣebḥan, mɣir Ijjen waha: AREBBI.

19 Cek tessned tiweṣṣa: ‘War zenni, war neqq, war tticar, war cehhed s ẓur, war ttɣecca, weqqar babac d yemmac.’ ” ^■   20 Yarra-dd, inna as: “Wah, a Amseɣɣar, aqa marra tina tuɣa ḍeffareɣ tent zi temẓi inu.” 21 Ixzar dayes Yeccu uca issɛizz i-t, inna as: “Teqqim icten ɛad: Uyur, zenz marra min ɣarek, ewc i-t i imezřaḍ uca ad ɣarek yiři ijj n řkenz deg ujenna, xenni as-dd da, ksi ṣṣalib nnek, ḍfar ayi-dd!” ^■   22 Maca netta tuɣa iḥzen s wawař nni, uca iruḥ icḍen minzi tuɣa ɣares aṭṭas n wagřa.

23 Ixzar Yeccu ɣar yenni d as dd-innḍen, inna i imeḥḍaren nnes: “Mecḥař iwɛar x wenni i ɣar iǧa aṭṭas n wagřa ḥima ad adfen ɣar Tgeldit n AREBBI!” ^■   24 Tbehten imeḥḍaren zeg wawařen nnes. Maca Yeccu iɛawed iṭṭef deg wawař, inna asen: “A tarwa inu, mecḥař iwɛar x yenni ittcařan x wagřa nsen maḥend ad dd-adfen ɣar Tgeldit n AREBBI! 25 Ihwen ad yadef weřɣem zi tiṭṭ n tsineft uřa ma yudef-dd bu-wagřa ɣar Tgeldit n AREBBI.” 26 Immarni daysen ɛad unexřiɛ, nnan i wayawya: “Wi izemmaren xenni ad ittwassenjem ɛad?” 27 Ixzar daysen Yeccu, inna: “Ɣar iwdan war izemmaren, maca maci ɣar AREBBI, minzi aqa ɣar AREBBI kuřci di tzemmar nnes.” ^■  

28 Ibda Buṭrus ad as yini: “Xzar, aqa neccin nejja kuřci, neḍfar i Cek-dd.” ^■   29 Yarra-dd xas Yeccu, inna: “S tidett, Necc ad awem iniɣ: War din iǧi uřa d ijjen wenni isemḥen di taddart niɣ deg aytmas niɣ di yessmas niɣ di babas niɣ di yemmas niɣ di temɣart niɣ di tarrawt uřa di tendint di ṭṭweɛ inu u di ṭṭweɛ n Řexbar Aṣebḥan, 30 i war ikessin mya n tseqqar, řexxu di zman-a ad iksi tudrin niɣ aytmas niɣ yessmas niɣ tiyemmatin niɣ tarrawt d yeyyaren, ak-d umarret, uca di zman i dd ɣa yasen ad iksi Tudart ittduman. 31 Maca aṭṭas n yinni iǧan d imezwura ad iřin d ineggura, uca aṭṭas n yenni iǧan d ineggura ad iřin d imezwura.” ^■  

32 Tuɣa-ten deg webrid maḥend ad geɛɛden ɣar Urcalim u Yeccu tuɣa izwar asen. Nitni tuɣa ttbehten uca ggʷeden umi t-i-dd-ḍfaren. Iksi ɛawed tenɛac ɣar uɣezdis uca ibda iqqar asen x min d as ɣa imsaren, inna: ^■   33 “Aqa neccin ad ngeɛɛed ɣar Urcalim u Mmis n bnadem ad immewc i imeqqranen n ikehhanen d imseřmaden n idlisen u nitni ad xas ḥekmen s řmewt, ad t sellmen i řegnus. 34 Ad t sseḥqaren, ad t hettken s urekkuḍ, ad xas ssusfen, ad t nɣen, maca deg wass wiss třata ad ikkar.”

35 Yusa-dd ɣares Yaɛqub d Yuḥanna, tarwa n Zabdi, nnan as: “A Amseɣɣar, nexs ad aneɣ tegged marra min zzayek ɣa nettar.” ^■   36 Inna asen: “Min texsem ad awem ggeɣ?” 37 Nnan as: “Ewc aneɣ ad neqqim ijjen ɣar ufusi nnek u wenneɣni ɣar uzeřmaḍ nnek deg uɛuǧi nnek.” 38 Maca Yeccu inna asen: “Aqa war tessinem ca min tᵉttarem. Ma tzemmarem ad teswem řkas i zi ɣa sweɣ Necc niɣ ad tᵉttwasɣeḍṣem s useɣḍeṣ i zi ɣa ttwasɣeḍṣeɣ Necc?” ^■   39 Nnan as: “Nzemmar!” Inna asen Yeccu: “Řkas i ɣa sweɣ Necc, ad t teswem, u aseɣḍeṣ i zi ttwasɣeḍṣeɣ Necc, ad zzayes ttwasɣeḍṣem, ^□   40 maca aɣimi x yeffus inu niɣ x uzeřmaḍ inu, war ɣari iǧi deg ufus inu ad t wceɣ, maca ad immewc i yenni umi ittwassewjed.” ^■  

41 Řami sřin ɛecra n imeḥḍaren man aya, xeyyqen x Yaɛqub d Yuḥanna. ^■   42 Xenni iřaɣa asen-dd Yeccu ɣares, inna asen: “Kenniw tessnem belli inni ittwaḥesben d řḥukkam n řegnus, aqa ḥekkmen xasen, u imeqqranen nsen, aqa ttṣeǧaḍen ten. ^■   43 War ittiři ammu jar awem, maca wenni ixsen ad idweř d ameqqran jar awem, aqa netta ad yiři d amsexxar nwem, ^■   44 u wenni ixsen ad yiři d amezwaru jar awem, aqa netta ad yiři d amsexxar i marra. 45 Minzi ɛawed Mmis n bnadem war dd-yusi ḥima ad xas sexxaren, maca ḥima ad ixdem, ad iwc tudart nnes d aṣřaḥ i waṭṭas n iwdan.” ^■  

46 Iwḍen-dd ɣar Ariḥa. Řami dd-iffeɣ Yeccu zi Ariḥa ak-d imeḥḍaren nnes d waṭṭas n řɣaci, tuɣa Timawus, mmis n Timawus, wenni tuɣa d adarɣař, iqqim deg webrid, ittettar. ^■   47 Umi isřa belli Yeccu Nnaṣiri aqa-t din, ibda isɣuyyu, iqqar: “A Yeccu, mmis n Dawud, arḥem ayi!” 48 Webbxen t aṭṭas ḥima ad isqar, maca netta iqqim isɣuyyu ktar: “A Mmis n Dawud, arḥem ayi!” 49 Ibedd Yeccu uca inna asen ad xas dd-řaɣan. Řaɣan-dd i udarɣař, nnan as: “Egg uř! Kkar, aqa ittřaɣa-dd xak!” 50 Řexdenni inḍar ajeǧab nnes, ikkar uca yusa-dd ɣar Yeccu. 51 Yarra-dd Yeccu, inna as: “Min texsed ad ac t ggeɣ?” Inna as udarɣař: “A Amseřmad inu, ḥima ad twařiɣ.” 52 Inna as Yeccu: “Xzar, l’iman nnek issgenfa cek !” Řexdenni idweř ittwařa uca iḍfar Yeccu deg webrid. ^■