Areddeǧ n Lubnan d Bacan
11
1 Arzem tiwwura nnek, a Lubnan, maḥend timessi ad tecc tineglin nnek.
2 Ru, a tacejjart n umerzi, maɣar tangelt tewḍa,
maɣar ticejjura nni ijehden ttwareddǧent!
Rut, a ticejjura n řbeǧuḍ n Bacan,
maɣar azɣar immcubbcen iwḍa. □
3 Sřem i řḥess n tɣuyyit n imeksawen,
maɣar aɛuǧi nsen ittwareddeǧ,
sřem i řḥess n uzehhar n weyraden imeẓyanen,
maɣar řɛezz n L'Urdun ittwareddeǧ.
Tnayen n imeksawen
4 “Ammu i iqqar SIDI, AREBBI inu: Arwes uǧi nni umi ɣa ɣarṣen, 5 inni ten imellken neqqen ten břa ma ad ttwaɛaqben, inni ten imellken zzenzen ten, qqaren: Ad ittwabarek SIDI, aqa necc dewřeɣ ɣari agřa! Imeksawen nsen war d asen zziǧizen. 6 Maɣar Necc war d ayi zziǧizen ɛad imezdaɣ n temmurt, iqqar SIDI. Xzar, Necc ad wceɣ i iwdan kuř ijj deg ufus n umqarreb nnes u deg ufus n ujeǧid nnes, u nitni ad ɛefsen x temmurt u Necc war ten ssenjimeɣ ca zeg ufus nsen.”
7 “Necc arewseɣ uǧi tinni umi ɣa ɣarṣen, maɣar nitenti d uǧi ittwaḥsaren. Necc ksiɣ i Yixef inu tnayen n tᵉɣɣaryen. Ict ggiɣ as ‘Řxaḍar!’ u tenneɣni ggiɣ as ‘Taɣruḍt!’, u Necc arwseɣ uǧi.
8 Deg ijj n uyur tteḥḥiɣ třata zeg imeksawen. Řeɛmar inu war izemmar ad ten tarbu ɛad uca uřa d řeɛmar nsen icarh ayi ɛawed. 9 Necc nniɣ: Necc war kenniw arekkwseɣ ɛad! Min immuten, ejj i-t ad immet u min ihellken, ejj i-t ad ittwahellek, u jjem inni iqqimen ad ccen aysum ijj n wenneɣni.
10 Necc ksiɣ taɣɣarct inu ‘Rxaḍar’, uca arẓiɣ tt maḥend ad arẓeɣ ammu řɛahd inu nni ggiɣ ak-d marra řegnus.
11 Deg wass nni idweř řɛahd yarreẓ u ammu i ssnen wuǧi ittwaḥṣaren nni d ayi iḥeṭṭan, aqa aya tuɣa d ijj n wawař n SIDI.”
12 “Necc nniɣ asen: Mařa aya mliḥ di tiṭṭawin nwem, wcem ayi řmunet inu, u mařa lla, jjem t! Xenni weznen řmunet inu: třatin n řweznat n nnuqart. ■
13 Xenni inna ayi SIDI: Nḍar i tent ɣar bu-třaxt, ttaman nni ‘iṣebḥen’ inni d ayi ggin ttaman! U necc ksiɣ třatin n řweznat uca nḍareɣ tent ɣar bu-třaxt di Taddart n SIDI. □
14 Řexdenni arẓiɣ Necc taɣɣarct inu nneɣni tenni ggiɣ as ‘Taɣruḍt’ maḥend ad arẓeɣ ammu tawmat jar Yahuda d Israil.”
15 “SIDI inna ayi: Ksi twařa nneɣnit dduzan n ijj n umeksaw abuhaři,
16 maɣar Necc ad jjeɣ ad dd-ikkar ijj n umeksaw di temmurt: min iruḥen war yarezzu, min imṭarrcen war t yarezzu, min yarẓen war t issgenfi u min iqqimen ibedd, war t iḥeṭṭi netta. Maca netta ad yecc aysum n řebhayem iṣeḥḥen u ad asent ikkes ticeḍyin.”
17 “Uct x umeksaw i war isekkwin, wenni isemmḥen deg wuǧi!
Ssif ad dd-iɛdu x uɣiř nnes
u x tiṭṭ nnes tafusect.
Aɣiř nnes ad yaẓeɣ marra,
u tiṭṭ nnes tafusect ad teɛmec marra!” ■