Aɛdař n Yahuda d Israil
10
1 Ttarem anẓar zi SIDI, di řweqt n wenẓar n tefsut.
SIDI ittegg assamen.
Netta ad iwc ibuda n wenẓar,
i kuř ijj n wefsu deg iyyar. □
2 Maɣar řexyařat n l’aṣnam ssawařen řɣecc,
u igezzanen ttwařan ixarriqen
u nitni ttɛawaden tirja icemmten,
nitni ssfewwajen s řeɛwin.
S uyenni i ttwasiggʷejen am wuǧi,
ttwaḥṣaren, minzi ameksaw war din iǧi. □ ■
3 X imeksawen yarɣa weɣḍab inu
u Necc ad xeǧṣeɣ iɣayḍen,
maɣar SIDI n řɛeskarat ad issijj x tḥimart nnes,
x taddart n Yahuda,
u Netta ad ten isedd am uyis nnes ittissiqen ɣar umenɣi.
4 Zzayes aẓru n teɣmart,
zzayes řewted,
zzayes řqews n umenɣi,
ad zzayes dd-ffɣen marra imzeyyaren jmiɛ.
5 Nitni marra ad dewřen am ayt n bu-teɣruḍt
inni deg umenɣi ad ɛefsen x ubeǧaɛ di zznaqi.
Wah, nitni ad mmenɣen,
maɣar SIDI ad yiři akidsen,
u nitni ad sseḍḥan inni inyin x yeysan.
6 Necc ad ssjehdeɣ taddart n Yahuda
u ad ssnejmeɣ taddart n Yusuf
u Necc ad asen wceɣ tazeddiɣt,
maɣar Necc arreḥmeɣ daysen
u nitni ad iřin axmi Necc war ten nḍareɣ,
maɣar Necc d SIDI, AREBBI nsen,
u Necc ad ɣarsen sřeɣ.
7 Inni n Ifrayim ad iřin am ijj n bu-teɣruḍt
u uř nsen ad ifarḥ am ɣar binu,
u iḥenjiren nsen ad t ẓaren u ad farḥen,
uř nsen ad ifarḥ di SIDI.
8 Necc ad xasen ṣeffareɣ u ad ten ssmuneɣ,
maɣar Necc fdiɣ ten u nitni ad dd-dewřen deg waṭṭas,
am mammec ten tuɣa deg waṭṭas.
9 Necc ad ten zarɛeɣ jar řegnus
u nitni ad ayi idaren di jjwayeh iggʷejjen.
Ad ddaren din ak-d iḥenjiren nsen uca ad dd-dewřen.
10 Necc ad ten jjeɣ ad dd-ɛeqben zi Misřa
u ad ten dd-ssmuneɣ zi Accur
u ad ten dd-awyeɣ ɣar temmurt n Jilɛad u ɣar Lubnan,
maca aya war ten ittqeddi.
11 Netta ad iẓwa řebḥar n řeḥṣaret nsen
u ad iwwet řemwaj n řebḥar
u marra imucan yuǧɣen n yeɣzar n Nil ad aẓɣen.
Nnfaxet n Accur ad tᵉttwaswaḍeɛ,
u azeǧaḍ n Misřa ad ittwaweddar.
12 Necc ad ten ssjehdeɣ di SIDI
u nitni ad uyuren deg Yisem nnes,
ammu i iqqar SIDI.