1 Necc ssgeɛɛdeɣ tiṭṭawin inu twařa nneɣni, u xzar, aqa arebɛa n ikarruten ffɣen-dd zi jar tnayen n idurar u idurar nni tuɣa d idurar n nnḥas. 2 Ɣar ukarru amezwaru tuɣa din iysan d izeggʷaɣen, ɣar ukarru wiss tnayen iysan d ibarcanen, 3 ɣar ukarru wiss třata iysan d icemřařen u ɣar ukarru wiss arebɛa iysan d iqarqacen jehden. 4 Necc arriɣ-dd, nniɣ i lmalak nni kidi issawařen: “Min ɛnan ina, a sidi inu?”

5 Yarra-dd lmalak, inna ayi: “Ina d arebɛa n isemmiḍen n ujenna nni dd-itteffɣen zi mani bedden zzat i SIDI n marra tammurt. 6 Inni s iysan ibarcanen ad ffɣen ɣar temmurt n Ccamal u iysan icemřařen ad ffɣen ḍeffaren ten uca iysan iqarqacen ad ffɣen ɣar temmurt n Ljanub.” 7 Iysan ijehden ffɣen, arzun ad ẓwan tammurt, maɣar Netta inna: “Ffeɣ, ẓwam tammurt!” U nitni ẓwan temmurt. 8 Netta iřaɣa ayi-dd, inna: “Xzar, iysan nni iffɣen ɣar temmurt n Ccamal, aqa ssareyyḥen Arruḥ inu di temmurt n Ccamal.” ^□  

9 Yusa-dd ɣari wawař n SIDI, inna:

10 “Ksi tiwhibin zeg imeḥbas, zi Ḥalim, Ṭubiya d Yadaɛya u ruḥ dinni uřa d cek deg wass nni u adef ɣar taddart n Yuciya, mmis n Ṣafanya, ɣar taddart i ɣares dd-yusin zi Babil. ^□  

11 Ksi nnuqart d wureɣ, egg zzaysen ttajat u sars i-ten x uzeǧif n Yahucaɛ, mmis n Yahuṣadaq, arrays n ikehhanen,

12 u siweř akides, ini as:

Ammu i iqqar SIDI n řɛeskarat! Inna: Xzar, ijj n weryaz, ‘AƔEDDU’ d Isem nnes. Netta ad dd-iffeɣ zeg wemcan nnes u Netta ad ibna Zzawect Tameqqrant n SIDI.

13 Netta ad ibna Zzawect Tameqqrant n SIDI u ad yarḍ lɛaḍama. Netta ad iqqim u ad iḥkem x řɛarc nnes u Netta ad yiři d akehhan x řɛarc nnes u ad yiři jar asen ccwar s řehna.”

14 “Ttijan ad iřin i Ḥalim, Ṭubiya, Yadaɛya d Ḥayn, mmis n Ṣafanya, d řidaret di Zzawect Tameqqrant n SIDI. ^□  

15 Zi řaggʷaj ad dd-asen iwdan u nitni ad bnan Zzawect Tameqqrant n SIDI u kenniw ad tessnem aqa SIDI n řɛeskarat issekk ayi-dd ɣarwem. Aya ad imsar, mařa kenniw tᵉttesřam s tidett ɣar tmijja n SIDI, AREBBI nwem.”