1 Ssgeɛɛdeɣ tiṭṭawin inu twařa nneɣni uca ẓriɣ, u xzar, aqa din ijj n wedlis ittwannḍen iṭṭaw. 2 Netta inna ayi: “Min tᵉttwařid cek?” Necc nniɣ: “Necc ttwařiɣ ijj n wedlis ittwannḍen iṭṭaw s yijj n tuzzeggart n ɛicrin n iɣaǧen d ict n tiru n ɛecra n iɣaǧen.” 3 Xenni inna ayi: “Ta d nneɛřet nni i ɣa iffɣen x marra tammurt, maɣar marra wenni i ɣa yacaren, ad ittwaqḍeɛ zi ssibbet n min yuran x uɣezdis-a u kuř ijj wenni i ɣa ijjaǧen ẓur ad ittwaqḍeɛ zi ssibbet n min yuran x uɣezdis nneɣni. 4 Necc ad arreɣ nneɛřet ad dd-teffeɣ, ammu i iqqar SIDI n řɛeskarat, ḥima ad dd-tas di taddart n uceffar u di taddart n yinni ittjaǧan ẓur s Yisem inu, u nettat ad tessens di řwest n taddart nnes u nettat ad tt yecc s ukeccuḍ nnes d iẓra nnes.”

5 Iffeɣ-dd lmalak nni kidi issawařen, inna ayi: “Sgeɛɛed tiṭṭawin nnek u xzar min din dd-ittbanen!” 6 Necc nniɣ: “Manawya?” Netta inna: “Wa d ijj n řmud n ifa nni dd-ittbanen.” Xenni inna: “Ta d furma nsen x marra tammurt.” 7 U xzar, aqa tᵉttwasgeɛɛed tqebbart n řexfif d taqurarirt u teqqim ict n temɣart di řwest n ifa. 8 Netta inna: “Ta d taɛeffant!” uca inḍar i-tt ɛawed deg ifa nni uca inḍar aẓru n řexfif x uqemmum nnes. 9 Necc ssgeɛɛdeɣ tiṭṭawin inu uca ẓriɣ, u xzar tnayen n temɣarin usint-i-dd ɣar zzat u aṣemmiḍ iccur afriwen nsent. Nitenti tuɣa ɣarsent afriwen am wafriwen n ubellarj u nitenti ssgeɛɛdent ifa nni jar temmurt d ujenna.

10 Xenni nniɣ i lmalak nni kidi issawařen: “Mani i ɣa yawyent ifa aya?”

11 Netta inna ayi: “Maḥend ad as bnan ict n taddart di temmurt n Cinar. Mařa tᵉttwakemmeř, ad tᵉttwasbedd din deg wemcan nnes.”