Aweṭṭu n Ninwa
2
1 Xzar, x idurar ttazzřen iḍaren n wenni dd-yiwyen řexbar aṣebḥan, wenni ixebbaren s řehna.
Ɛeyyed řeɛyudat nnek, a Yahuda,
seqfeř lwuɛud nnek,
maɣar wenni war isekkwin walu war ittɣimi iẓekkwi xak ɛad,
netta inneqḍeɛ marra. ■
2 Ijjen wenni yuẓẓřen x iwdan s lɛunf i dd-igeɛɛed xak!
Ɛess x lburj,
ḥḍa abrid,
semḥeḍ tijɛinna nnek,
arni di jjhed nnek!
3 S minzi SIDI ad dd-yarr řɛezz n Yaɛqub,
aqa-t d řɛezz n Israil.
Maɣar ikeccaḍen keccḍen ten,
u nitni ɣeḍřen tizermin nsen. ■
4 Tcappat n useřqi n ayt n bu-teɣruḍt zewɣent,
iryazen imeḥḍen bedden sswejden i umenɣi
s warruḍ azeggʷaɣ yuẓɣen,
ɣar tessiqt n tmessi n wuzzař n ikarruten n umenɣi,
deg wass i di i ɣa issewjed ixef nnes
u ticejjura n umerzi ad nnhezzen. □
5 Ikarruten n umenɣi hajen deg ibriden,
aqa ẓẓeɛwaḍen zi ssa ɣar da deg wazzayen,
ttwaḍharen am iṣefḍawen,
nitni gemmaren da d diha am wassamen.
6 Netta ittxarreṣ deg ayt n jjehd,
nitni maca ttneqraḍen am gguren
nitni ttazzřen ɣar řḥiḍ nsen,
mani ibedd ssqef n uhjam iwjed.
7 Tiwwura n iɣezran nnurezment,
u řeqṣar ad ifsi.
8 Aqa tamesřact tbedd nican!
Nettat ad tᵉttwaɛarra,
ad tᵉttwasgeɛɛed,
u tisemɣin nnes sɣuyyunt
amecnaw abarri n tedbirin,
am ccatent deg idmaren nsent. □
9 Ninwa am yijj n uyeřmam n waman zeg wass i di iǧa.
Řexxu maca arekkweřen nitni.
Beddem! Beddem!, ttřaɣan nitni,
maca uřa d ijj war dd-ittneqřib.
10 Keccḍem nnuqart, keccḍem ureɣ!
War din qeṭṭu i řeknuz ,
ɣar ucewwar n ɛřam kuř řeqcuɛ.
11 Texwa, tᵉttwakecceḍ u tᵉttwareddeǧ nettat,
uř ifsi uca ifadden fecřen,
u ttekksent as tijɛinna marra
u iɣembab nsen warɣen marra. ■
12 Mani iǧa řexxu řmargeḥ n wayraden,
d řmedweř n wayraden imeẓyanen,
mani yuyur weyrad, aqa-tt d tayradt, ak-d weyrad ameẓyan
am uřa d ijj ma issnexřeɛ i-ten?
13 Mani iǧa řexxu wayrad nni imezzqen min ḥdajen tarwa nnes
u ijeyyef i tayradin nnes,
d wenni iccuren ifran nnes s ukecceḍ,
d imucan nnes n udurri zi min ittwacarrgen?
14 Xzar, Necc ad iřiɣ xak, ammu i iqqar SIDI n řɛeskar,
Necc ad arreɣ ikarruten nnek d ddexxan,
u ad cceɣ ssif n weyraden nnek imeẓyanen,
u Necc ad qeḍɛeɣ takeccaḍt nnek zi temmurt
u ɛemmarṣ ɛad ad tᵉttwaseř tmijja n ireqqasen nnek. □