Řḥakem wenni i ɣa dd-ixeřqen di Bayt-Lahm
5
1 “U cek, Bayt-Laḥm Ifrata, Waxxa cek d ameẓyan ařami war tzemmared ad tiřid jar řuřuf n Yahuda,
aqa zzayek i dd ɣa iffeɣ Netta i Necc,
maḥend ad yiři d Řḥakem x Israil.
Abani nnes aqa-t zi mecḥař uya,
zeg wussan n řebda. ■
2 X uyenni Netta ad ten isellem ař řweqt nni,
aqa tenni i ɣa yarwen, aqa turuw-dd.
Xenni ad dd-idweř řbaqi n yaytmas,
jmiɛ ak-d ayt n Israil.
3 Netta ad ibedd dinni
uca ad yarwes di jjehd n SIDI,
di řuɛřa n Yisem n SIDI, AREBBI nnes.
Nitni ad zedɣen dinni,
maɣar Netta ad yiři d ameqqran
ař ineggura n temmurt. □
4 Wanita ad yiři d Řehna.”
“Xmi dd ɣa yas Accur ɣar temmurt nneɣ,
u xmi dd ɣa yadef ɣar řeqṣur nneɣ,
xenni ad as nesseřqa sebɛa n imeksawen
d tmenya n ayt n jjehd zi midden. ■
5 Nitni ad ḥḍan x temmurt n Accur s ssif
u tammurt n Nimrud di tewwura nnes.
Ammu Netta ad aneɣ issenjem zeg ufus n Accur,
xmi dd ɣa yas wanita ɣar temmurt nneɣ
u xmi dd ɣa yadef ɣar wudem n temmurt nneɣ.”
Řbaqi nni i ɣa innejmen
6 “Řbaqi n Yaɛqub ad yiři di řwest n řegnus
amecnaw nnda n SIDI,
amecnaw tiddumin x wefsu aziza,
wenni war ixezzaren ɣar uřa d ijj n weryaz
u war ittrijin tarwa n bnadem.
7 Řbaqi n Yaɛqub ad yiři jar řegnus,
di řwest n řegnus,
amecnaw ayrad jar řmař n yezɣar,
amecnaw ayrad d ameẓyan jar tḥimriwin n wuǧi,
wenni, xmi i ɣa iɛdu,
iɛeffes u ittcarrag
uca war din uřa d ijj i ɣa ifekken. □
8 Afus nnek ad yiři ittwasgeɛɛed sennej i yenni i cek iḥeṣṣaren,
uca marra řɛedyan nnek ad ttwamḥan.”
9 “Ad imsar deg wass nni, ammu i iqqar SIDI,
aqa Necc ad teḥḥiɣ iysan nnek zi řwest nnek
u ad sshellkeɣ ikarruten nnek. ■
10 Ad mḥiɣ tineddam zi temmurt nnek,
u ad hedmeɣ marra lburjat nnek.
11 Necc ad qeḍɛeɣ taseḥḥart nnek zeg ufus nnem,
u war ɣarek ttiřin ɛad ibezgawen.
12 Řexyařat nnem ineqcen d imayḍuten nnek iqeddsen,
ad ten mḥiɣ zi řwest nnek,
ḥima war tᵉttiḍared ɛad,
i řxedmet n ifassen nnek.
13 Tirebbin nnek n cwarti ad tent teḥḥiɣ zi řwest nnek,
u ad hedmeɣ tineddam nnek.
14 Necc ad ntaqmeɣ s weɣḍab u s wesɛar
x řegnus nni war ittexsen ad sřen.”