Tageldit i d ɣa yasen n SIDI zi Ṣihyun
4
1 “Deg uneggar n wussan ad imsar, aqa adrar n Taddart n SIDI ad ibedd imten
x tqiccet n idurar.
Ad yiři yuɛřa x tewririn,
uca řegnus ad ɣares dd-azzřen. ■
2 Aṭṭas n řegnus ad geɛɛden, ad inin:
“Jjem aneɣ ad ngeɛɛed ɣar wedrar n SIDI
u ɣar Taddart n AREBBI n Yaɛqub,
ḥima ad aneɣ isseřmed zeg ibriden nnes,
ad nuyur neccin deg imesraq nnes,
minzi zi Ṣihyun ad dd-teffeɣ Ccariɛa
u awař n SIDI zi Urcalim.
3 Netta ad icarreɛ jar řegnus imɣaren
u ad iseggem řegnus nni ɣar iǧa tizemmar timeqqranin,
ɛad uřa d řegnus iggʷejen.
Nitni ad ggen řesyuf nsen d dduzan
u fřitcat nsen d řemwas n wezbar.
War issgiɛɛid uřa d ijj n řgens ɛad ssif x wenneɣni,
u nitni war řemmden ɛad amenɣi.
4 Nitni ad qqimen,
kuř ijj sadu tzayart nnes u sadu wartu n tazart nnes,
uca uřa d ijjen ad ten issnexřeɛ,
maɣar aqemmum n SIDI n řɛeskarat aqa inna t.” ■
5 “Minzi marra řegnus ad uyuren,
kuř ijj zzaysen deg yisem n arebbi nnes,
maca neccin ad nuyur deg Yisem n SIDI, AREBBI nneɣ,
i řebda qaɛ.”
SIDI ad issenjem Ṣihyun
6 “Deg wass nni, iqqar SIDI,
Necc ad yarweɣ min iqejdḥen,
u ad ɣari ssmuneɣ min x uzzřen,
u wi di ggiɣ Necc řɣar. ■
7 Min iqejdḥen ad t ggeɣ d řbaqi,
uřa min ittwaɛarrnen ɣar řaggʷaj,
ad t ggeɣ d ijj n řgens s tzemmar d tameqqrant,
uca SIDI ad xasen yiři d ajeǧid x wedrar n Ṣihyun,
zi řexxu ař řebda. ■
8 I cem, Migdal-Ɛidr,
a cem, tawrirt n tyeǧit Ṣihyun!
ad ɣarem dd-tas,
wah, ad ɣarem dd-tas řeḥkamet
tenni i tuɣa iǧan deg umezwaru,
tageldit n yeǧis n Urcalim.”
9 “Řexxu maca, mayemmi tesɣuyyud ammu s jjehd?
Ma war ɣarem iǧi ujeǧid?
Ma ittwahellek umcawar nnem,
aqa iṭṭef i cem řeḥriq am n yict n temɣart ittarwen? ■
10 Ɣnes u tɛebbzed, a cem tayeǧit Ṣihyun,
am ict n temɣart ittarwen.
Maɣar waxxa řexxu ad teffɣed zi tendint,
ad tzedɣed deg iyyar,
uca ad dd-tased ař Babil.
Maca din ad tnejmed,
dinni ad cem ifekk SIDI zeg ufus n řɛedyan nnem.”
11 “Řexxu maca munen xak aṭṭas n řegnus.
Nitni qqaren: ‘Nettat ad tᵉttwaɛarra!’
Tiṭṭawin nneɣ ad ẓarent Ṣihyun.
12 Nitni war ssinen inwayen n SIDI,
u war fehhmen ca ccwar nnes!
Maɣar Netta iksi ten ɣares
am tqebbiḍin n imendi deg unedrar.” ■
13 “Kkar, tessarewted,
a cem, yeǧis n Ṣihyun,
maɣar Necc ad am arreɣ yicc nnem d uzzař,
u ad am ggeɣ ticeḍyin nnem zi nnḥas,
u cem ad třebzed aṭṭas n řegnus
u Necc ad ḥarrmeɣ takeccaḍt nsen marra i SIDI,
uřa d agřa nsen i Sidi n marra tammurt. ■
14 Xenni řexxu, řeḥmem ijjen ɣar wenneɣni,
a cem yeǧis n ijj n bandiyya n ixewwanen!
Netta iḥeṣṣar aneɣ.
Nitni ad ccaten řqaḍi n Israil
x uqabsi s ijj n weɛmud.”