1 “Sřem i wawař n SIDI, ayt n Israil, maɣar SIDI iksi tanfuč ḍidd i imezdaɣ n temmurt, minzi war din yeǧi řaman niɣ tamexsiwt icewwaren uřa d tussna n AREBBI di temmurt. ^■   2 Tikkʷura d ixarriqen d umenɣi d tucceffra d zzina! Aqa aten dduqqzen, asizzeř n idammen awarni i usizzeř n idammen. 3 S uyenni tammurt ad tecḍen u kuř ijjen i dayes izeddɣen ad yaẓeɣ ak-d řewḥuc n yeyyar u ak-d yijḍaḍ n ujenna, wah uřa d iseřman di řebḥar ad ttwakksen.

4 Uct x weryaz nni i d ɣa iksin tanfuč u uct x weryaz nni i ɣa icetcan. Řgens nnek axmi yenni ittemcubbcen ak-d ukehhan. 5 S uziř ad tenqarḍed u s ǧiřet ad inqarḍ ɛad anabi akidek u yemmac ad tt sshellkeɣ. 6 Řgens inu idweř d aynaw minzi aqa-t břa tussna. Umi cek tenḍared tussna, Necc nḍareɣ cek maḥend ad ayi tsexxared am ukehhan. Umi cek tᵉttud Ccariɛa n AREBBI, uřa d Necc ad ttuɣ iḥenjiren nnek.

7 Mammec ma wesɛen¸ arnin di ddnub akidi. Ad arreɣ ccan nsen d řefḍiḥet. 8 Nitni ttᵉtten zi ddnub n řgens inu u s řeɛmar nsen ttarran meẓri i řmuɛṣiyyet nsen. 9 Am mammec i iǧa řgens, ammu i ɣa yiři uřa d akehhan. S uyenni Necc ad dayes xeřfeɣ ibriden nnes u timegga nnes ad tent ɣares ssdewřeɣ. ^■  

10 Nitni ad ccen, maca war tᵉttjjiwinen ca, nitni ad ssfesden ixef nsen, maca war ttarwen, minzi nitni semḥen deg uḥettu n tsexxart i SIDI. ^■  

11 Farq-ccɣeř d binu u binu n jdid aqa kksen uř i bnadem.

12 Řgens inu ittseqsa ṣṣanam nnes n ukeccuḍ u taɣɣarct nnes ad as tewc řexbar, minzi buḥbeř n farq-ccɣeř iɣarra i-ten ařami ffɣen s farq-ccɣeř nsen zi sadu AREBBI nsen. ^■  

13 X tqiccat n idurar ttqeddamen tiɣarṣa u x tewriririn ttawyen tiwhibin n řebxur, sadu řbeǧuḍ d ṣṣefṣaf d tcejjart n yigg, minzi tiři nsen teṣbeḥ. S uya ssefsadent yessitwem ixef nsent u tisřatin nwem ttareẓẓant řemřac s zzina. ^■  

14 Maca Necc war ssiwiḍeɣ řḥukm x yessitwem umi ssfesdent ixef nsent uřa x tesřatin nwem umi ttareẓẓant řemřac s zzina. Aqa nitenti ḥuzent ixef nsent ak-d temɣarin n farq-ccɣeř u ttqeddament tiɣarṣa jmiɛ ak-d temɣarin n farq-ccɣeř n zzawect. Ad iwḍa řgens i war ɣar iǧi řeɛqeř.

15 Waxxa cek, Israil, tessefseded ixef nnek, war ttarri uřa d Yahuda d bu-umarwas. War dd-ttisim ɣar Jiljal, war ttgeɛɛadem ɣar Bayt-Awan u war ttjaǧam: ‘S tidett am iddar SIDI!’

16 Minzi Israil dayes taɣennant am ict n tyenduzt tameẓyant tɛarren. Xenni řexxu, ad ten indeh SIDI am yijj n yezmar deg iyyar iwesɛen.

17 Ifrayim iqqen ixef nnes ak-d ṣṣanam, ejj i-t ad yareyyeḥ.

18 Tasessit nsen dayes ssem, tteggen farq-ccɣeř awarni i farq-ccɣeř, u imeḥḍayen nsen ttexsen mɣir řefḍiḥet waha.

19 Ict n tḥaryaḍt tessjebd i-tt s wafriwen nnes, aqa nitni ad dewřen ttseḍḥan zi tɣarṣi nsen.”