1 Ajeǧid Balcaṣṣar igga ijj n umensi d ameqqran i wařef n ayt n jjehd nnes u netta iswa binu zzat i wařef nni. 2 Řami iqqas Balcaṣṣar binu, yumar ad dd-awyen řeqcuɛ n wureɣ d nnuqart nni iksi babas Nabuxadnaṣṣar zi Zzawect Tameqqrant di Urcalim ḥima ad zzaysen isu ujeǧid d ayt n jjehd nnes d temɣarin nnes d tiyya nnes.

3 Xenni iwyen-dd řeqcuɛ n wureɣ nni dd-kksen zi Zzawect Tameqqrant di Urcalim, zi Taddart n AREBBI i tuɣa qbeř di Urcalim, uca iswa zzaysen ujeǧid d ayt n jjehd nnes d temɣarin nnes d tiyya nnes. 4 Nitni swin binu u ṣebbḥen i irebbiten n wureɣ d nnuqart d nnḥas d wuzzař d weẓru.

5 Di řweqt d ict ḍharen-dd iḍewḍan n ijj n ufus n bnadem nni tuɣa ittarin arendad i řqendiř x jjar n řḥiḍ n řeqṣar igellden, uca iẓra ujeǧid tasɣart n ufus nni tuɣa ittarin.

6 Xenni tbeddeř tessiqt x wudem n ujeǧid uca ixarriṣen nnes ssiggʷden t u tisɣunin n tmeṣṣaḍin nnes dewřent fesyent u ifadden nnes dduqzen ijj arendad i wenneɣni. 7 Ajeǧid iřaɣa s jjehd maḥend ad awyen zzates imesnawen n itran d Ikaldaniyyen d igezzanen u ajeǧid iṭṭef deg wawař, inna i imiɣisen n Babil: “Kuř aryaz i izemmaren ad iɣar tira aya u ad ayi iwc řmeɛna nnes, ad as ssyarḍen ijj n warruḍ d adehmani, ak-d ict n tseddect n wureɣ x yiri nnes, u netta ad yiři d řḥakem wiss třata di tgeldit.”

8 Xenni udfen marra imiɣisen n ujeǧid, maca nitni war zemmaren ad ɣaren tira nni u řmeɛna nnes war zemmaren ad t ssargben. 9 Řexdenni innexřeɛ ujeǧid Balcaṣṣar u tissiqt n wudem nnes tbeddeř u ayt n jjehd nnes qqimen ḥeyyaren.

10 Di ssibbet n řḥarḍ n ujeǧid d ayt n jjehd nnes, tudef tjeǧidt ɣar taddart n umensi. Tessiweř tjeǧidt, tenna: “A ajeǧid, ddar i řebda!. Ejj ixarriṣen nnek war cek ssnexřiɛen u ejj tissiqt n wudem nnek war tbeddiř.

11 Aqa din ijj n weryaz di tgeldit nnek i di iǧa buḥbeř n irebbiten imqeddasen. Minzi deg wussan n babac ufin dayes tafawt, řefhamet d tiɣit am tiɣit n irebbiten. S uyenni igga i-t ujeǧid Nabuxadnaṣṣar, babac, d arrays x tarwa n tseḥḥart d imesnawen n itran d Ikaldaniyyen d igezzanen. Wah babac, a ajeǧid, ^■  

12 minzi di Daniyal, i umi igga ujeǧid isem n Balṭacaṣṣar, aqa ittwaf dayes ijj n buḥbeř icna aṭṭas d tussna d řefhamet maḥend ad ifessar tirja u ad issen min innuffaren u ad ifekk ifeqqusen iwɛaren. Ejj ad řaɣan x Daniyal u netta ad issargeb řmeɛna nnes.”

13 Xenni iwyen-dd Daniyal zzat i ujeǧid. Ajeǧid iṭṭef deg wawař, inna i Daniyal: “Ma cek d Daniyal, ijj zeg ayt n imenfiyyen zi Yahuda nni yiwi ujeǧid, baba, akides zi Yahuda?

14 Necc sřiɣ xak, aqa buḥbeř n irebbiten izeddeɣ dayek u tᵉttwaf dayek tafawt d řefhamet d tiɣit ař ṭṭarf.

15 Aqa nedhen zzati imiɣisen d imesnawen n itran ḥima ad ɣaren tira aya u ad ssargben řmeɛna nnes, maca nitni war zemmaren ad ayi ssargben x řmeɛna n wawař aya.

16 Necc maca sřiɣ xak aqa cek tzemmared ad tfessared u ad tfekked řemɛani iwɛaren. Xenni řexxu, mařa tzemmared ad tɣared tira aya u ad ayi tessaregbed x řmeɛna nnes, ad cek ssyarḍen arruḍ adehmani, ak-d ict n tseddect n wureɣ x yiri nnek, u ad tiřid d řḥakem wiss třata di tgeldit inu.”

17 Řexdenni yarra-dd Daniyal, inna zzat i ujeǧid: “Tirzifin nnek ad ɣarek qqiment u ccan nnek ewc i-t i wenneɣni. Maca tira i ujeǧid ad tent ɣareɣ u ad t ssargbeɣ x řmeɛna.

18 Xak, a ajeǧid, aqa AREBBI, Amɛuǧi x kuřci, iwca i babac Nabuxadnaṣṣar tagelda uřa d řemɣaret d ccan d lɛaḍama.

19 Zi ssibbet n řemɣaret i d as iwca, dewřen marra řegnus, timmura d iřsawen ttarjijen ttqefqifen zzates. Netta tuɣa ineqq wenni yexs u ittejja iddar wenni yexs u issgeɛɛed wenni yexs u issfeṭṭaḥ wenni yexs netta. 20 Maca umi ibda uř nnes ittnurfuɛ u buḥbeř nnes itteqsaḥ ařami tedweř dayes nnfaxet, ittwaɣḍeř zi řɛarc nnes u ittwakkes zzayes ccan nnes. 21 Uẓẓřen xas jar tarwa n bnadem u uř nnes idweř amecnaw uř n imuddaren u netta tuɣa izeddeɣ ak-d yeɣyař n řexřa. Wcin as arrbiɛ d macca am řebḥayem u nnda n ujenna issuffa zzayes arrimet nnes ɣares ařami inɛem aqa AREBBI, Amɛuǧi x kuřci, d řḥakem x tgelda n iwdan u iwca i-tt i wenni yexs Netta. ^■  

22 U cek, mmis, Balcaṣṣar, waxxa tessned marra man aya, cek war tesswaḍɛed uř nnek, 23 u tessgeɛɛded ixef nnek ḍidd i Sidi n ujenna u řeqcuɛ zi taddart nnes iwyen ten zzatek u cek d ayt n ṣṣulta nnek d temɣarin nnek d tiyya nnek swin zzaysen u cek tuɣa tᵉttṣebbaḥed i irebbiten n nnuqart d wureɣ d wuzzař d ukeccuḍ d weẓru, inni war ittwiřin, war ittesřin, war ssinen walu uca AREBBI wenni ɣar iǧa twarrit n nnefs nnek deg ufus nnes u wenni ɣar iǧa marra ibriden nnek, war t tessɛuǧid ca. 24 Xenni issekk Netta iḍewḍan n ufus nni yurin tira aya x řḥiḍ.

25 Man aya d tira i yurin: ‘Mini, mini, tikil, u farsin’.

26 Wa d řmeɛna n wawař-a. ‘Mini’, ixs ad yini, AREBBI aqa iḥseb tagelda nnek u iqḍa i-tt.

27 ‘Tikil’, aqa cek tᵉttwawezned x řmizan u ufin cek tefsused.

28 ‘Faris’, tageldit nnek temmsebḍa u temmewc i ayt n Maday d ayt n Lfurs.” ^□  

29 Řexdenni yumar Balcaṣṣar ḥima ad ssyarḍen Daniyal arruḍ adehmani, ak-d ict n tsendect n wureɣ x yiri nnes, u ad xas barrḥen belli netta ad yiři d řḥakem wiss třata di tgeldit.

30 Di ǧiřet nni ittwaneɣ Balcaṣṣar, ajeǧid n Ikaldaniyyen.