1 “Necc, Nabuxadnaṣṣar, tuɣa ayi di řaman di taddart inu u s ttisir di řeqṣar inu. 2 Xenni ẓriɣ ict n terjit, tessiggʷed ayi. Ssḥeyyaren ayi ixarriṣen nni ɣari di tassut d tṣawar deg uzeǧif inu. 3 S uyenni dd-iffeɣ zzayi řumur ḥima ad awyen zzati marra imiɣisen n Babil, maḥend nitni ad ayi ssargben afessar n terjit.

4 Řexdenni usin-dd tarwa n tseḥḥart d imesnawen n itran d Ikaldaniyyen d igezzanen u necc ɛawdeɣ asen tarjit, maca nitni war zemmaren ad ayi ssargben x ufessar nnes. 5 Ɣar uneggar yusa-dd ɣari Daniyal wenni umi qqaren Balṭacaṣṣar ɣar yisem n arebbi inu, di min di izeddeɣ buḥbeř n irebbiten imqeddasen u i netta umi ḥajiɣ tarjit uca nniɣ:

6 ‘Balṭacaṣṣar, cek d arrays n tarwa n tseḥḥart, aqa ssneɣ belli buḥbeř n irebbiten imqeddasen i dayek izeddɣen, u war xak iwɛar uřa d ijj n ssir. Ini ayi timeẓra nni ẓriɣ d ufessar nnes.

7 Timeẓra nni ɣari deg uzeǧif inu řami d ayi tuɣa di tassut aqa d tina: Necc ẓriɣ, u xzar, aqa din ict n tcejjart di řwest n temmurt, tuɣa tuɛřa aṭṭas. ^□   8 Tacejjart temɣar tedweř tejhed u taqiccat nnes tiweḍ ɣar ujenna u tᵉttwaẓarr tcejjart deg uneggaru n temmurt marra. 9 Tifray nnes ṣebḥent u řɣiǧet nnes tuɣa-tt d aṭṭas u tuɣa dayes macca i marra. Imuddaren n řexřa ufin tiři sadu nnes u ijḍaḍ n ujenna zedɣen jar řefruɛ nnes u ittwasecc zzayes marra inni ɣarsen ict n arrimet n weysum.

10 Necc ẓriɣ di tmeẓra deg uzeǧif inu di tassut u xzar, ijj n uɛessas, ijj n umqeddas ihwa-dd zeg ujenna

11 uca iřaɣa-dd s jjehd, inna ammu: Zdem tacejjart uca qess řefruɛ nnes. Kkes zzayes tifray nnes u zeǧeɛ řɣiǧet nnes maḥend imuddaren ad arewřen zi sadu nnes uřa d ijḍaḍ zi jar řefruɛ nnes,

12 maca ejj jjdeɛ n tcejjart s iẓewran nnes ad iqqim di temmurt u ejj i-t ad iqqim s ict n tsarrift n wuzzař d nnḥas jar arrbiɛ aziza di řexřa, u ejj i-t ad issuff s nnda n ujenna u ad tiři tesɣart nnes ak-d řewḥuc jar cbarq n temmurt.

13 Ejj uř nnes ad ibeddeř maḥend war ittiři ɛad d uř n bnadem u ewc as uř n imuddaren u ejj ad xas ɛdun sebɛa n ikuden. ^□  

14 Tamesřact-a tbedd x řxaḍar n iɛessasen u tutra aya aqa tusa-dd zeg imqeddasen, ḥima inni iddaren ad neɛmen aqa Amɛuǧi x kuřci ɣares tizemmar x tgelda n yewdan u ad tt iwc i wi ixs Netta, aqa igga xas uřa d wenni d amuqřiř qaɛ jar iwdan.

15 Tarjit-a ẓriɣ tt necc, ajeǧid Nabuxadnaṣṣar. Cek, Balṭacaṣṣar, ini ayi afessar nnes, maɣar marra imiɣisen di tgeldit inu war zemmaren ad ayi wcen afessar nnes, maca cek wah tzemmared, minzi buḥbeř n irebbiten imqeddasen izeddeɣ dayek.’ ”

16 Xenni tuɣa Daniyal, wenni umi qqaren Balṭacaṣṣar, yarjef ict n řweqt uca ixariṣṣen nnes ssḥeyyaren t. Iṭṭef ujeǧid deg wawař uca inna: “Balṭacaṣṣar, ejj tarjit d ufessar nnes war cek ssḥeyyaren!” Yarra-dd Balṭacaṣṣar, inna: “Sidi inu, ejj tarjit ad tiři x yenni cek icarrhen u afessar nnes x řɛedyan nnek!

17 Tacejjart nni teẓrid, tenni idewřen temɣar u tejhed, tenni umi tiweḍ taqiccat nnes ař ajenna u tenni dd-ittbanen zi marra ddunect,

18 - s tefray nnes iṣebḥen d řɣiǧet nnes i tuɣa deg waṭṭas, i dayes ittwafen macca i marra, u swadday nnes zeddɣen marra imuddaren n řexřa, uřa d ijḍaḍ n ujenna zeddɣen jar řefruɛ nnes - ,

19 aqa d cek, a ajeǧid, cek wenni idewřen d ameqqran u tjehded, maɣar řemɣaret nnek temmarni ařami tiweḍ ař ajenna u lmulk nnek ař ṭṭarf n ddunect. 20 U řami iẓra ujeǧid, aqa ijj n uɛessas, ijj n umqeddas, ihwa-dd zeg ujenna, i innan: “Zdem tacejjart u ɣḍeř i-tt, maca ejj jjdeɛ s iẓewran nnes deg ucař ak-d ict n tsarrift n wuzzař d nnḥas jar arrbiɛ n řexřa u ejj i-t ad issuff s nnda n ujenna u ad tiři tesɣart nnes jar řewḥuc n řexřa ařami xas ɛdun sebɛa n ikuden, 21 aqa ammu i yeǧa řmeɛna n marra man aya, a ajeǧid, u man aya d lqarar i dd-iffɣen zeg Umɛuǧi x kuřci, ijj n lqarar nni dd ɣa yas x sidi inu, ajeǧid:

22 Ad xak aẓẓřen zi řwest n iwdan u tazeddiɣt nnek ad tiři ak-d řmař n řexřa. Am řebhayem ad ak sseccen arrbiɛ u nnda n ujenna ad cek issuff, u ammu ad xak ɛdun sebɛa n ikuden ař ɣa tneɛmed aqa Amɛuǧi x kuřci iḥekkem x tgelda n iwdan u ittic i-tt i wi ixs Netta. ^■   23 Aqa nnan, aqa ittxeṣṣa ad ittwajj jjdeɛ n tcejjart ak-d iẓewran nnes, ixs ad yini, aqa tagelda nnek ad teqqim xmi i ɣa tneɛmed aqa ṣṣulta ɣar ujenna i teǧa. 24 S uyenni, a ajeǧid, iři ad yiři ccwar inu i řxaḍar nnek u arẓ ddnub nnek s tsegda u řmuɛṣiyyet nnek umi teggid s uḥinni i řmusakin. Ad taɣ ad tᵉttwazzuggar ttisir nnek.”

25 Qaɛ man aya iwḍa-dd xenni x ujeǧid Nabuxadnaṣṣar.

26 Awarni řami ɛdun tenɛac n iyuren, řami tuɣa iggur x tzeqqa n řeqṣar n Babil, 27 issiweř ujeǧid, inna: “Ma man aya war iǧi d Babil ameqqran nni bniɣ s jjehd n tzemmar inu d taddart i tgelda u i uɛuǧi n lɛaḍama inu!”

28 Ɛad tuɣa wawař-a deg uqemmum n ujeǧid uca teffeɣ-dd ict n tmijja zeg ujenna tenna: “Ammu i qqaren, a ajeǧid Nabuxadnaṣṣar: Tagelda tᵉttwakkes zzayek! 29 Ad xak aẓẓřen zi řwest n iwdan u tazeddiɣt nnek ad tiři ak-d řmař n řexřa. Am řebhayem ad cek sseccen arrbiɛ u ad xak ɛdun sebɛa n ikuden ař ɣa tneɛmed aqa ṣṣulṭa x tgelda n iwdan ɣar Umɛuǧi x kuřci u Netta iwca i-tt i wi ixs Netta.”

30 Di tsaɛɛet nni iqfeř wawař-a x Nabuxadnaṣṣar, minzi uẓẓřen xas zi řwest n iwdan. Tuɣa ittett arrbiɛ am řebhayem u arrimet nnes issuff i-tt nnda n ujenna, ařami idweř ucewwaf nnes d azirar am wafriwen n igidaren u accaren nnes am yenni n ijḍaḍ.

31 Awarni ɛdun wussan-a, ssgeɛɛdeɣ nnec, Nabuxadnaṣṣar tiṭṭawin inu ɣar ujenna uca idweř-dd ɣari řeɛqeř inu. Necc ṣebḥeɣ Amɛuǧi x kuřci u ssemɣareɣ u ssɛuǧeɣ wenni iddaren i řebda, maɣar ṣṣulṭa nnes d ict n ṣṣulṭa n řebda u Tageldit nnes teqqim zi jjiř ař jjiř.

32 Marra imezdaɣ n temmurt ttwaḥesben d walu u Netta igga am mammec ixs s řɛeskar n ujenna u s imezdaɣ n ddunect. War din iǧi uřa d ijj nni izemmaren ad imneɛ afus nnes niɣ ad as yini: Min tᵉttegged?!

33 Di tsaɛɛet nni idweř ayi-dd řeɛqeř. Uřa d aɛuǧi n tgelda inu d lɛaḍama inu d ucewwar inu dewřen-dd xafi. Imcawaren inu d ayt n jjehd inu arzun ɛawed xafi u ttwasmetneɣ di tgelda inu u ɛad immarni ayi deg uɛuǧi inu.

34 Řexxu necc, Nabuxadnaṣṣar, ssɛuǧeɣ u ssemɣareɣ Ajeǧid n ujenna, minzi marra řefɛayeř nnes d tidett u imesraq nnes d tasegda. Netta ɣares ṣṣulṭa maḥend ad isswaḍeɛ inni iddaren di nnfaxet.