Řḥukm x Miṣra
30
1 Yusa-dd ɣari wawař n SIDI, inna: 2 “A mmis n bnadem, nabb uca ini: Ammu i iqqar Sidi inu, SIDI:
Rum! Ayyehhat x wass nni!
3 Minzi yudes i yeǧa wass nni, yudes i yeǧa wass n SIDI,
ass n iseynuten.
Ad yiři d řweqt n řegnus.
4 Ad dd-yas ssif di Miṣra
uca ad yiři warjef ameqqran di temmurt n Kuc
xmi i ɣa wḍan inni ittwasnuqqben di Miṣra,
minzi ad awyen afeyyeḍ n wagřa nnes,
ad areddǧen dsusa nnes.
5 Kuc d Fuṭ d Lud d ɛřam kuř ibarraniyyen,
d Kub, d ayt n temmurt n Řɛahd
ad kisen wḍan s ssif.”
6 “Ammu i iqqar SIDI:
Inni ittcařen x Miṣra ad wḍan,
u nnfaxet n ṣṣulṭa nnes ad tɣarq.
Zi Majdal ař Aswan ad wḍan nitni s ssif di temmurt!,
ammu i iqqar Sidi inu, SIDI. □
7 Ad din tiři d řxirbet di řwest n temmura ittwaredǧent,
u tineddam nnes ad iřint di řwest n tneddam nneɣni ittwaxarrben.
8 Xenni ad ssnen belli Necc d SIDI,
xmi i ɣa ssarɣeɣ timessi di Miṣra
uca marra inni tt ittɛawanen ad ttwarẓen.
9 Deg wass nni ad ffɣen ireqqasen s tɣarruba zi zzat n wudem inu
maḥend ad ssiggʷeden Kuc wenni umi ittɣiř aqa netta di řaman.
Ad daysen yiři warjef ameqqran,
amecnaw deg wass nni n Miṣra,
maɣar xzar, ad dd-yas!”
10 “Ammu i iqqar Sidi inu, SIDI:
Necc ad ssbeddeɣ řɣaci inhewřen n Miṣra
s ufus n Nabuxadraṣṣar, ajeǧid n Babil.
11 Netta d řgens nnes akides,
imsaggʷaden qaɛ n řegnus
ad dd-asen ḥima ad teḥḥan tammurt.
Nitni ad ssuffɣen řesyuf nsen ḍidd i Miṣra
uca ad ccuren tammurt s yenni ittwasnuqqben. ■
12 Necc ad ssiẓɣeɣ iɣezran uca ad zzenzeɣ tammurt i iɛeffanen
u Necc ad areddǧeɣ tammurt d marra min dayes
s ufus n ibarraniyyen.
Necc, SIDI, wenni innan aya.” □
13 “Ammu i iqqar Sidi inu, SIDI:
Necc ad areddǧeɣ imeyḍa n ṣṣanam
uca ad qḍiɣ x l’aṣnam zi Nuf.
War ittɣimi ɛad uřa d ijj n řḥakem zi Miṣra.
Necc ad ssidfeɣ řɛurret di temmurt n Miṣra.
14 Necc ad areddǧeɣ Fatrus
u ad ssarɣeɣ Ṣuɛan
u ad awyeɣ řeḥkamat inu di Nu.
15 Necc ad ssfarɣeɣ asɛar inu x Sin,
lburj n Miṣra,
ad qeḍɛeɣ řɣaci inhewřen n Nu.
16 Necc ad ssidfeɣ timessi ɣar Miṣra,
Sin ad tefsi s řeḥriq,
tammurt n Nu ad tᵉttwafeǧeq
u Nuf ad tiři di řeḥṣaret kuř ass.
17 Iḥudriyyen zi Awan d Fibista ad wḍan s ssif,
u timɣarin ad uyurent di tmeḥbast.
18 Ass ad ittbarcen di Taḥfaḥis
xmi i ɣa yarẓeɣ Necc azayřu n Miṣra,
u ad as ssbeddeɣ nnfaxet n jjehd nnes dinni.
Ijj n useynu ad tt isdurri
uca yessis ad uyurent di tmeḥbast.
19 Necc ad ssiwḍeɣ řeḥkamat x Misřa
u nitni ad ssnen belli Necc d SIDI.”
20 Deg useggʷas wiss ḥiṭac, deg uyur amezwaru, deg wass wiss sebɛa n uyur, imsar belli yusa-dd ɣari wawař n SIDI, inna:
21 “A mmis n bnadem, Necc arẓiɣ aɣiř n Firɛun, ajeǧid n Miṣra.
Xzar, war t ijebbar uřa d ijjen maḥend ad ittwasgenfa,
umi t ɣa nnḍen s bindat ařami zzaysent t ɣa ssjehden
ḥima ad iṭṭef ssif!”
22 “S uya, ammu i iqqar Sidi inu, SIDI:
Xzar, Necc x Firɛun, ajeǧid n Miṣřa,
u Necc ad arẓeɣ iɣaǧen nnes,
am uɣiř ijehden ɛad uřa d wenni ittwarẓin.
Necc ad arreɣ ssif nnes ad iwḍa zeg ufus nnes.
23 Necc ad zuzzareɣ Imiṣriyyen jar řegnus
u ad ten bezzɛeɣ x temmura.
24 Necc ad ssjehdeɣ iɣaǧen n ujeǧid n Babil
uca ad wceɣ ssif inu deg ufus nnes,
maca iɣaǧen n Firɛun ad ten arẓeɣ,
ařami i ɣa isɣuyy
am isɣuyy wenni issnuqben.
25 Wah Necc ad ssjehdeɣ iɣaǧen n ujeǧid n Babil,
maca iɣaǧen n Firɛun ad wḍan.
Xenni ad ssnen belli Necc d SIDI,
xmi i ɣa ggeɣ ssif inu deg ufus n ujeǧid n Babil
u netta ad t isswiẓẓeḍ x temmurt n Miṣra.
26 Necc ad zuzzareɣ Imiṣriyyen jar řegnus,
ad ten bezzɛeɣ x temmura.
Ammu i ɣa ssnen belli Necc d SIDI.”