66
1 “Ammu i iqqar SIDI: ‘Ajenna d řɛarc inu u tammurt d tanebdat i iḍaren inu. Mani i ɣa tiři xenni taddart nni texsem ad ayi tebnam u mani i ɣa yiři wemcan n arraḥet inu? ■ 2 Marra aya igga i-t ufus inu d marra aya tuɣa iǧa ɛad, ammu i iqqar SIDI, maca Necc ad nḍareɣ tiṭṭawin inu x umezřuḍ, x wenni ittwarẓan buḥbeř nnes u x wenni ittarjijin zzat i wawař inu.’ ” 3 “Wenni iɣarṣen i ufunas, inɣa uřa d aryaz, wenni yiwyen ijjen zeg wuǧi d ddbiḥet, yarẓa ɛawed iri i yiṭan, u wenni iqeddmen tawhibt n řɣiǧet, iqeddem uřa d idammen n yiřef, u wenni issbexxaren jjawi, ibarek uřa d aɛbed n řexyařat. Nitni ixḍaren ibriden i yixef nsen uca řeɛmar nsen iɛjeb as nnɛawat nsen n ṣṣanam. 4 Ammu i ɣa areccḥeɣ tiyyita nsen i nitni uca ad xasen awyeɣ min zi tteggʷeden, maɣar nitni war dd-arrin umi Necc d asen řaɣiɣ, maɣar nitni war sřin umi ɣarsen ssiwřeɣ, maca nitni ggin min iǧan d aɛeffan di tiṭṭawin inu uca ixḍaren min war dd-yusin x řxaḍar inu.” ■
5 “Sřem i wawař n SIDI, a kenniw inni ittarjijin zzat i wawař nnes: ‘Aytmatwem, inni kenniw icarrhen, inni kenniw inḍaren di ṭṭweɛ n Yisem inu uca qqaren: Iři ad ittwassɛuǧa SIDI, scen aneɣ řefraḥet nwem!, ad sseḍḥan. ■ 6 Ad dd-iffeɣ ddriz imɣar zi tendint, tmijja zi Zzawect Tameqqrant, tmijja n SIDI, wenni i ɣa ixeǧṣen řɛedyan nnes řmunet nsen i isdaḥeǧen.’ ”
7 “Qbeř ma ad iṭṭef řeḥriq n tarwa i temɣart Ṣihyun, aqa turuw-dd, qbeř ma tt-i-dd menɛen řewjeɛ n tarut, tegga aḥenjir d awtem ad injem. 8 Wi isřan aya? Man wen i iẓrin aya? Ma ad dd-texřeq ict n temmurt deg ijj n wass waha? Ma ad dd-ixřeq ijj n řgens deg ict n tecti waha? Maca usin as-dd i Ṣihyun řewjeɛ n tarut ɛad cwayt waha, aqa turuw-dd iḥenjiren nnes.”
9 “Ma iři as arzmeɣ aɛeddis nhřa ma jjiɣ tt ad taru?’, iqqar SIDI. ‘Ma Necc wenni issarawen timɣarin, ad asent bellɛeɣ taɛeddist?, iqqar AREBBI nnem.”
10 “Farḥem ak-d Urcalim uca sřiwřiwem as, a marra kenniw inni tt ittexsen. Farḥem zzayes s usřiwřew, marra kenniw inni tuɣa xas iceḍnen,
11 ḥima ad tᵉṭṭḍem, ad tejjiwnem zeg ibbac nnes iccuren s ufewwej, ḥima ad teswem s tyawant u ad tarrem meẓri zi min iǧan d aṣebḥan qaɛ n uɛuǧi nnes!”
12 “Maɣar ammu i iqqar SIDI: ‘Xzar, Necc ad as ssizzřeɣ řehna am yeɣzar u aɛuǧi n řegnus am teɣzart iḥemřen, ḥima kenniw ad zzayes tᵉṭṭḍen. Ad kenniw arbun x tmeṣṣaḍin u ad xawem ssḥinnben x ifadden. ■
13 Am ijj n weryaz nni tessřehha as yemmas, ammu kenniw i ɣa sseřhuɣ, di Urcalim ad kenniw ssfewwjen.
14 Ad tẓarem aya, ad ifarḥ wuř nwem u ixsan nwem ad ttwaneɛcen am arrbiɛ aziza. Ammu i ɣa ittwassen ufus n SIDI ɣar imsexxaren nnes, maca Netta ad isxeḍ x řɛedyan nnes.’ ”
15 “Minzi, xzar, ad dd-yas SIDI di tmessi, ikarruten nnes ad ggen am tḥaryaḍt, ḥima ad yejj aɣḍab ad yarsa s ijj n uduqqez n tefqeḥt u asɛar nnes s iḥudaq n tmessi.
16 Maɣar SIDI ad iḥkem marra ddat ak-d idammen s tmessi d ssif uca inni ɣa ittwanɣen zi SIDI ad iřin deg waṭṭas.
17 Marra inni issqeddsen u issizdigen ixef nsen di řemraḥat awarni i yijjen, inni ittetten aysum n iřfan uřa d nnɛi n řmař d iɣardayen, aqa marra nitni ad ttwaqḍan!, ammu i iqqar SIDI.”
18 “Necc ad xeǧṣeɣ timegga nsen d ixarriṣen nsen, uca ad imsar ad ssmuneɣ marra řegnus d iřsawen u nitni ad dd-asen ad ẓaren aɛuǧi inu.
19 Necc ad ggeɣ ict n řeɛřamet jar asen uca ad ssekkeɣ inni zzaysen innejmen ɣar řegnus, ɣar Tarcic, Fuṭ d Lud, imjebbaden n řqews, ɣar Tubal d Yawan, ɣar tegzirin iggʷejen, tinni war isřin řexbar xafi u war iẓrin aɛuǧi inu. Nitni ad barrḥen aɛuǧi inu i řegnus, 20 ad awyen aytmatwem zi marra řegnus d tawhibt i SIDI: x yeysan d ikarruten, di řekrasi ittwarebbun, x isardan d iřeɣman n ict n tgeɛrurt, ɣar wedrar inu amqeddes, ɣar Urcalim, ammu i iqqar SIDI inu, am mammec ttawyen ayt n Israil tawhibt n řɣiǧet di tqedduḥt tezdig ɣar Taddart n SIDI. 21 Uřa zzaysen ad farzeɣ ca maḥend ad iřin d ikehhanen d Ilawiyyen, iqqar SIDI. 22 Maɣar am ujenna n jdid d temmurt n jdid nni i ɣa ggeɣ ad bedden zzat i wudem inu, iqqar SIDI, ammu i ɣa teqqim tbedd uřa d zzariɛet nwem d isem nwem zzat i wudem inu. ■ 23 Ad imsar zi qaɛ abeddi n uyur ɣares ař qaɛ abeddi nneɣni u zeg wass n ssebt ɣares ař ass n ssebt nneɣni ad dd-asen marra iwdan maḥend ad aḍaren zzat i wudem inu, ammu i iqqar SIDI. □ 24 Nitni ad ffɣen, ad ẓařen řxecbat n yeryazen nni xafi iɛeddan, maɣar akecca nsen ɛemmarṣ war ittmetti uřa d timessi nsen ɛemmarṣ war tᵉttxessi. Ad iřin d nnɛi i marra iwdan d řmař.”