1 “Tuɣa ttbaneɣ asen-dd i yenni war xafi sseqsin, zemmaren ad ayi afen, inni war xafi yarezzun. Necc nniɣ i řgens i war iřiɣin s Yisem inu: ‘Aqa ayi da, xzar, aqa ayi da!’ 2 Ass marra sswiẓẓaḍeɣ ifassen inu ɣar řgens iɣewwɣen, wenni yuyuren deg ijj n webrid war iḥřin, x řeḥsab ixarriṣen nnes, 3 řgens nni d ayi iseɛɛaren řebda deg wudem inu, am qeddmen tiɣarṣa di řemraḥat inu u bexxaren tiwhibin x llajur, 4 am ttɣiman deg imeḍřan u ttnusan deg ifran am ttᵉtten aysum n iřfan u ɣarsen ijj n nnɛi n arrwa di tziwḍiwin nsen. 5 Nitni qqaren: ‘Qqim mani teǧid, war d ayi dd-tades, maɣar necc d amqeddes zzayek!’ Aqa aten am ddexxan deg wenzaren inu, am tmessi yareqqen ass ikmeř. 6 Xzar, aya yura zzat i wudem inu, war ssɣidiɣ, maca ad xeřfeɣ, wah ad xeřfeɣ aya deg weḥsin nsen: ^□   7 řmuɛṣiyyat nwem d řmuɛṣiyyat n ibabaten nwem, inni wehhben řebxur x idurar u inni d ayi isseḥqaren x tewririn. Necc simant inu ad asen xeǧṣeɣ řmunet nsen i sdahǧen, ammu i iqqar SIDI.”

8 “Ammu i iqqar SIDI: ‘Am mammec umi ufin aẓemmi n uḍiř deg uzekkun uca qqaren: War t jarreḥ, maɣar dayes lbaraka!, ammu i ɣa ggeɣ di ṭṭweɛ n imsexxaren inu, ḥima war ten qeṭṭiɣ marra. 9 Necc ad dd-jjeɣ zzariɛet zi Yaɛqub u ad ssuffɣeɣ awrit n idurar inu zi Yahuda. Inni zzayi ittwafarzen ad tt ṭṭfen d tasɣart uca imsexxaren inu ad dinni zedɣen.

10 Řewḍa n Carun ad yiři d takessawt n wuǧi, u taɣzurt n Axur d amcan n arraḥet i ifunasen, i řgens inu wenni xafi yarezzun.”

11 “Kenniw maca inni isemḥen di SIDI, inni ittun adrar amqeddes inu, inni isswejden ṭṭabřa i Jad u inni iccuren aɣarraf s binu ixeǧḍen i Mini,

12 Necc ad kenniw ḥesbeɣ i ssif. Kenniw ad taḍarem marra maḥend ad ttwaɣarṣem, umi Necc i d awem řaɣiɣ, maca kenniw war xafi dd-tarrim, umi Necc ɣarwem ssiwřeɣ, maca kenniw war ɣari tesřim, maca teggim min iǧan d aɛeffan di tiṭṭawin inu, u tixḍarem min war d ayi dd-yusin x řxaḍar.”

13 “S uyenni, ammu i iqqar Sidi inu, SIDI: ‘Xzar, imsexxaren inu ad ccen, maca kenniw ad tǧaẓem. Xzar, imsexxaren inu ad swen, maca kenniw ad teffadem. Xzar, imsexxaren inu ad farḥen, maca kenniw ad tesseḍḥam.

14 Xzar, imsexxaren inu ad sřiwřewen s řefraḥet n wuř, maca kenniw ad tesɣuyyem zi řeḥriq n wuř, u zi arẓiyyet n buḥbeř ad tweɛɛḍem.

15 Ad tejjem isem nwem am nneɛřet i yenni zzayi ittwafarzen, uca Sidi inu, SIDI, ad kenniw ineɣ, maca imsexxaren nnes ad xasen iřaɣa s ijj n yisem nneɣni,

16 ařami wenni ixsen ad ibarek ixef nnes di temmurt, ad ibarek ixef nnes di AREBBI n tidett, u wenni ixsen ad ijjuǧ di temmurt, ad ijjuǧ ɣar AREBBI n tidett, maɣar řeḥṣarat n zic ad ttwattunt u ad ttwasnuffarent zzat i tiṭṭawin inu.’ ”

17 “Maɣar xzar, Necc ad ggeɣ ijenwan n jdid d temmurt n jdid. War tteɛqiřen ɛad x tmesřayin iɛdun, war dd-ttisent ɛad i uřa d ijj ɣar řbař.

18 Farḥem xenni u farrjem i řebda x min i dd ɣa xeřqeɣ, maɣar xzar, Necc ad dd-xeřqeɣ Urcalim d řefraḥet u řgens nnes d afarrej.

19 Necc ad sřiwřeweɣ x Urcalim u ad farḥeɣ zi řgens inu. Ɛemmarṣ ɛad ad dayes sřen i řḥess n imeṭṭawen niɣ n uɣuyyi. 20 Aḥḍiḍ i ɣa iddaren ca n wussan waha, war ggur ad yiři ɛad, uřa d awessar nni war ittkemmiřen ussan nnes. Maɣar aḥuḍri ad immet xmi i ɣares ɣa yiři mya n iseggʷusa, u amednub ad ittwanɛeř xmi ɣares ɣa yiři mya n iseggʷusa. 21 Nitni ad bnan tudrin ad daysent zedɣen, u ad ẓẓun tizayarin deg imarjaɛen, ad ccen řɣiǧet nsen. 22 Nitni war bennin maḥend wenneɣni ad dayes izdeɣ, war tteẓẓun maḥend wenneɣni ad zzayes yecc, maɣar ussan n řgens inu ad iřin am wussan n tcejjart, u inni zzayi ittwafarzen ad awyen ariqqi zi řxedmet n ifassen nsen. ^□   23 Nitni war xeddmen ɛad baṭeř, war ttirwen iḥenjiren i uceřwaw s řɣefřet, maɣar nitni d zzariɛet n yinni ittwabarken zi SIDI, uřa d tarrawt nsen akidsen. 24 Qbeř ma ad řaɣan, ad xasen arreɣ, xwansu ɛad ssawařen, ad asen sřeɣ. 25 Uccen d izmar ad arewsen munen, ayrad ad icc řum am ufunas, uca afar ad yiři d macca i ufiɣar. War tteggen tuɛeffna u war ssekkaren řeqjaret x marra adrar amqeddes inu, ammu i iqqar SIDI.” ^■