1 “Sřem aya, a kenniw taddart n Yaɛqub, inni umi ttřaɣan s yisem n Israil, inni iffɣen zeg waman n Yahuda, inni ittjaǧan ɣar Yisem n SIDI u ttidaren AREBBI n Israil, maca war iǧi di tidett, u war iǧi di tsegda. 2 Nitni ttřaɣan ixef nsen ‘Řgens zi tendint tamqeddast!’ u ttcařen x AREBBI n Israil, aqa SIDI n řɛeskarat d Isem nnes.”

3 “Timesřayin timezwura ssargbeɣ xasent ɛad aṭṭas zeg wami, aqa ffɣent-i-dd zeg uqemmum inu uca barrḥeɣ zzaysent. Deɣya ggiɣ tent uca xenni usint-i-dd. 4 Minzi Necc ssneɣ, aqa cek tessqesḥed ixef nnek, aqa ijiman nnek am tbarrat n wuzzař u tanyart nnek axmi dd-tekka zi nnḥas, 5 ssargbeɣ ac tent ɛad aṭṭas zeg wami. Qbeř ma imsar, barrḥeɣ zzaysent maḥend cek war teqqared: ‘Ṣṣanam inu igga i-tent!’, niɣ ‘Řexyarat inu ineqcen!’ niɣ: ‘Řexyař inu ifesyen yumur i-tent!’ 6 Cek tesřid xasent, xzar mliḥ ɣar marra aya. Ma war texsem ad zzaysent tbarrḥem? Zi řexxu ad ac barrḥeɣ timesřayin n jdid, timesřayin innuffaren nni war tessined.

7 Řexxu ttwaxeřqent-dd, war iǧi aṭṭas zeg wami. Qbeř ass-a war xasent tesřid maḥend war teqqared: ‘Xzar, ssneɣ tt meřmi!’ 8 Wah, war xasent tesřid u ɛawed war tent tessined u ɛawed amezzuɣ nnek tuɣa war yarzim, maɣar Necc ssneɣ, aqa cek ad tegged s řeɣdaret aṭṭas uca ad ac inin ‘Wenni ittɛeddan!’ ɛad zeg uɛeddis n yemmac.”

9 “Di ṭṭweɛ n Yisem inu ad ssɛeḍřeɣ aɣḍab inu, u di ṭṭweɛ n ccan inu ad tebbteɣ ixef inu i řxar nnek maḥend war cek meḥḥiɣ qaɛ. ^■  

10 Xzar, Necc sseṣfiɣ cek, maca war iǧi am nnuqart, qeǧbeɣ cek di tefqunt n usefṣi n řeɣben.

11 Di ṭṭweɛ inu, di ṭṭweɛ inu ad t ggeɣ, maɣar mammec i ɣa ittwaɛarra xenni Isem inu? Aɛuǧi inu war t tticeɣ i uřa d ijjen nneɣni.” ^■  

12 “Seř-dd ɣari, a Yaɛqub, cek a Israil, wenni umi řaɣiɣ! Necc d Wenni, Necc d Amezwaru uřa d Aneggaru. ^■  

13 Afus inu issars ɛawed dsusa n temmurt, uca afusi inu ibezzeɛ ijenwan. Mařa řaɣiɣ asen, ttbeddan nitni dinni jmiɛ.

14 Munem marra kenniw u sřem: ‘Man wen jar asen ibarreḥ zi marra man aya? SIDI ittexs i-t, u wanita ad yegg min iǧan i řxaḍar nnes ḍidd i Babil, aɣiř nnes ad yiři ḍidd i Ikaldaniyyen. ^■  

15 Aqa Necc nniɣ t, wah, řaɣiɣ as. Ad ggeɣ ad dd-yas uca Netta ad ifřeḥ deg webrid nnes.

16 Qarrbem-dd ɣari, sřem aya: ‘Zeg umezwaru Necc war ssiwřeɣ di tnuffra. Zeg wami aya marra imsar, aqa ayi Necc din!’. ‘U řexxu Sidi inu, SIDI, issekk ayi-dd, ak-d Arruḥ nnes.’ ”

17 “Ammu i iqqar SIDI, Amefdi nnek, Amqeddas n Israil: ‘Necc d SIDI, AREBBI nnek, wenni cek issřemden min ineffɛen, d wenni cek ineddhen deg webrid nni x i ɣa tuyured.

18 Ax, mři texzared maca ɣar tweṣṣa inu, xenni ad yaf řehna nnek ad yiři am yeɣzar u asenjem nnek am řemwaj n řebḥar, ^■  

19 zzariɛet nnek tuɣa-tt am ijdi, u iḥenjiren nnek nni dd-itteffɣen zi tejɛinna nnek am řḥebb i dd-yusin zzayes. Isem nnes war ittneqḍiɛ u war ittwateḥḥi zzat i wudem inu.’ ”

20 “Ffɣem zi Babil, arewřem zeg Ikaldaniyyen, barrḥem as s iɣuyyan n usřiwřew, maḥend ad sřen aya, suffɣem řexbar ař aneggar n ddunect, inim: ‘SIDI ifekk amsexxar nnes Yaɛqub!’ ^□  ■   21 War xasen ikki ufadi umi ten dd-igewwed ɣar imucan ittwaxarrben. Netta issuffeɣ asen-dd aman zi teṣḍart. Umi Netta ifeǧeq jjarf, dduqqzen-dd zzayes waman.”

22 “Iɛeffanen war ttifen řehna!, iqqar SIDI.^■